Vahe 39

Ko e Loto-Pōlepolé pea mo e Anga-Fakatōkilaló

ʻI HE hili ʻa e lave ki he ʻulungaanga lelei ʻa Sione Papitaisó, naʻe fakahanga leva ʻe Sīsū ʻa e tokangá ki he kakai loto-pōlepole, anga-feliliuaki naʻe takatakai kiate iá. “ʻA e toʻutangatá ni,” ko ʻene leá ia, “ʻoku hangē ha tuʻunga tamaiki ʻoku nofo ʻi he malaʻe fakataú, ʻo kalanga ange ki ha tamaiki kehe, ʻo pehē, ‘Ne mau tā nafa atu, kae ʻikai te mou meʻe; pea mau hua ʻa e ʻoiauē, kae ʻikai te mou sī fatafata.’”

Ko e hā naʻe ʻuhinga ki ai ʻa Sīsuú? Naʻá ne fakamatalaʻi: “Naʻe haʻu ʻa Sione ʻo ʻikai keinanga mo faikava, pea nau pehē, ‘ʻOku ʻiate ia ha tēmeniō’; naʻe haʻu ʻa e Fanautama ʻa Tangatá ʻo keinanga mo faikava, pea nau pehē, ‘ʻIsa, ko e tama faʻa kai mo faʻa inu kava, ko e kaumeʻa ʻo e kau tānaki-tukuhaú mo e kau angahalá.’”

ʻOku ʻikai lava ke fakafiemālieʻi ʻa e kakaí. ʻOku ʻikai ha meʻa ke ne fakafiemālieʻi kinautolu. Naʻe moʻui ʻa Sione ʻi ha moʻui anga-fefeka ʻo e moʻui līʻoá ko ha Nāsili, ʻi he fai ki he tala ʻa e ʻāngeló ʻo pehē “ʻe ʻikai ʻaupito te ne inu ha uaine pe ha kava mālohi.” Pea pehē ʻe he kakaí ia naʻe uluisino ai ha tēmeniō. ʻI he tafaʻaki ʻe tahá, naʻe moʻui ʻa Sīsū ʻo hangē pē ko e kau tangata kehé, ʻo ʻikai ke moʻui ʻi ha founga fefeka, pea talatalaakiʻi ia ʻo pehē naʻe fuʻu ʻaiʻainoaʻia.

He meʻa faingataʻa lahi ē ke fakafiemālieʻi ʻa e kakaí! Naʻa nau hangē pē ko e ngaahi kaungā-tamaikí, ko e niʻihi ʻo kinautolu naʻe ʻikai te nau fie tauʻolunga ʻi he taimi naʻe ifi atu ai ʻe he fānau kehé ʻa e fulutá, pe mamahi ʻi he taimi naʻe tangi ai honau kaungāmeʻá. Ka neongo ia, naʻe pehē ʻe Sīsū: “ʻOku fakatonuhia ʻa poto ʻe heʻene ngaahi ngāué.” ʻIo, ko e fakamoʻoní​—ʻa e ngaahi ngāué—naʻa nau fakamahino ko e ngaahi talatalaakiʻi fakafepaki kia Sione mo Sīsuú fakatouʻosi naʻe loi.

Naʻe hoko atu leva ʻa Sīsū ʻo ne valokiʻi ʻa e ngaahi kolo lalahi ʻe tolu ko Kolesini, Petesaita, mo Kāpaneume, ʻa ia naʻá ne fakahoko ai ʻa e lahi taha ʻo ʻene ngaahi ngāue mālohí. Kapau naʻá ne fai ʻa e ngaahi ngāue ko iá ʻi he ongo kolo ʻo Finisia ko Tāia mo Saitoní, naʻe pehē ʻe Sīsū, ne fakatomala ʻa e ongo koló ni ia ʻo ʻai tauangaʻa mo pani efuefu. ʻI hono fakahalaiaʻi ʻo Kāpaneumé, ʻa ia ʻoku hangehangē naʻá ne māʻunga nofo ki ai he lolotonga ʻo e vahaʻa taimi ʻo ʻene ngāue fakafaifekaú, naʻe tala ʻe Sīsū: “ʻE kātakiʻingofua ange ʻi he ʻAho Fakamāú ʻa e fonua ko Sōtomá ʻiate koe.”

Naʻe hoko atu leva ʻa Sīsū ʻo ne fakahīkihikiʻi fakahāhā ʻa ʻene Tamai fakahēvaní. Naʻe ueʻi ia ke ne fai peheé koeʻuhi naʻe fufū ʻe he ʻOtuá ʻa e ngaahi moʻoni fakalaumālie mātuʻaki mahuʻingá mei he faʻahinga poto mo ʻatamaiʻiá kae fakahā ʻa e ngaahi meʻa fakaofó ni ia ki he faʻahinga anga-fakatōkilaló, ki he faʻahinga hangē ha fanga kiʻi pēpeé.

Fakaʻosí, naʻe fai ʻe Sīsū ʻa e fakaafe fakamānako: “Haʻu kiate au, ʻa kimoutolu kotoa pē ʻoku fakaongosia mo māfasiá, pea te u fakamālōlō kimoutolu. ʻAi ʻeku ʻioké kiate kimoutolu, pea mou ako ʻiate au, he ʻoku ou faʻa kātaki mo angafākatuʻa, pea te mou ʻilo ha mālōlō ʻi homou laumālié. He ko e ʻioke ʻaʻakú ʻoku anga-ʻofa, pea ko e kavenga ʻaʻakú ʻoku maʻamaʻa.”

Naʻe anga-fēfē hono fai ʻe Sīsū ʻa e fakamālōloó? Naʻá ne fai ia ʻaki hono tokonaki ʻa e fakatauʻatāina mei he ngaahi talatukufakaholo fakapōpula ko ia naʻe fakakavengaʻiʻaki ʻe he kau taki lotú ʻa e kakaí, ko e fakatātaá, naʻe kau ai ʻa e ngaahi tuʻutuʻuni fakataputapui fekauʻaki mo e tauhi Sāpaté. Naʻá ne toe fakahāhaaʻi ʻa e founga ki he fiemālié ki he faʻahinga naʻa nau ongoʻi ʻa e māfasia fakafeʻātungia ʻo e pule ʻa e kau maʻu mafai fakapolitikalé pea mo e faʻahinga naʻa nau ongoʻi māfasia tupu mei heʻenau ngaahi angahalá fakafou mai ʻi ha konisēnisi loto-moʻua. Naʻá ne fakahā ki he faʻahinga faingataʻaʻia peheé ʻa e founga ʻoku malava ke fakamolemoleʻi ai ʻa ʻenau ngaahi angahalá pea mo e founga ʻoku malava ke nau fiefia ai ʻi ha vahaʻangatae mātuʻaki mahuʻinga mo e ʻOtuá.

Ko e ʻioke anga-ʻofa naʻe tuʻuaki ʻe Sīsuú ko e ʻioke ʻo e fakatapui kakato ki he ʻOtuá, ʻo hoko ʻo malava ke tauhi ʻetau Tamai fakahēvani manavaʻofa mo faimeesí. Pea ko e kavenga maʻamaʻa naʻe tuʻuaki ʻe Sīsū ki he faʻahinga naʻe haʻu kiate iá ko e talangofua ki he ngaahi fiemaʻu ʻa e ʻOtuá ki he moʻuí, ʻa ia ko ʻEne ngaahi fekaú ʻoku hiki ʻi he Tohitapú. Pea ko e talangofua ki he ngaahi meʻá ni ʻoku ʻikai ʻaupito ke fakamafasia ia. Mātiu 11:​16-30; Luke 1:15; 7:​31-35; 1 Sione 5:​3, 4.

▪ Naʻe anga-fēfē ʻa e hoko ʻa e toʻutangata loto-pōlepole, anga-feliliuaki ʻo Sīsuú ʻo hangē ko e fānaú?

▪ Ko e hā naʻe ueʻi ai ʻa Sīsū ke ne fakahīkihikiʻi ʻa ʻene Tamai fakahēvaní?

▪ ʻI he ngaahi founga fē naʻe fakamafasiaʻi ai ʻa e kakaí, pea ko e hā ʻa e fakafiemālie naʻe tuʻuaki ʻe Sīsuú?