Vahe 100

Ko e Talanoa Fakatātā ʻo e Ngaahi Miná

MAHALO naʻe kei ʻi he ʻapi ʻo Sākeasí ʻa Sīsū, ʻa ia naʻá ne nofo ai ʻi heʻene fononga ki Selusalemá. Naʻe tui ʻene kau ākongá ʻo pehē ʻi heʻenau aʻu ki Selusalemá, te ne hanga ʻo fakahā ko e Mīsaiá ia pea te ne fokotuʻu ai hono Puleʻangá. Naʻe fai ai ʻe Sīsū ʻa e talanoa fakatātā ke fakatonutonu ʻa e fakakaukau ko ʻení mo fakahā ko e Puleʻangá naʻe kei tuai ʻene hoko maí.

“Naʻe ai ha tangata, ko e ʻeiki,” ko ʻene fakamatalá ia, “naʻá ne ʻalu ki ha fonua mamaʻo ke maʻu moʻona ha mafai ko e tuʻi, pea toki foki mai.” Ko Sīsū ʻa e “tangata ko e ʻeikí,” pea ko e “fonua mamaʻó” ko hēvani ia. ʻI he aʻu ʻa Sīsū ki aí, naʻe foaki kiate ia ʻe heʻene Tamaí ʻa e mafai ko e tuʻi.

Kae kehe, ki muʻa ke ʻalu ʻa e tangata ko e ʻeikí, naʻá ne ui ʻene kau tamaioʻeiki ʻe toko hongofulu ʻo ne tuku kiate kinautolu taki taha ha mina siliva, ʻo ne pehē kiate kinautolu: “Fai ngāueʻaki ia kaeʻoua ke u haʻu.” ʻI he ʻuluaki fakahoko ʻo e talanoa fakatātā ko ʻení, ko e kau tamaioʻeiki ʻe toko hongofulú naʻa nau fakatātaaʻi ʻa e ʻuluaki kau ākonga ʻa Sīsuú. ʻI hono fakahoko lahi angé, naʻa nau tuʻu fakaefakatātā kiate kinautolu kotoa ʻoku nau maʻu ʻa e ʻamanaki ke hoko ko e kau ʻea fakataha mo ia ʻi he Puleʻanga fakahēvaní.

Ko e ngaahi mina silivá ko e ngaahi foʻi paʻanga mahuʻinga, ko e mina ʻe taha ʻoku fakafuofua hono mahuʻingá ki he vāhenga māhina ʻe tolu ki ha tokotaha ngāue fakangoue. Ka ko e hā ʻa e meʻa ʻoku fakatātaaʻi ʻe he ngaahi miná? Pea ko e hā ʻa e faʻahinga pisinisi ke fai ʻaki ia ʻe he kau tamaioʻeikí?

ʻOku fakatātaaʻi ʻe he ngaahi miná ʻa e ngaahi meʻa mahuʻinga naʻe malava ke ngāueʻaki ʻe he kau ākonga kuo fanauʻi ʻe he laumālié ke ʻai ke tokolahi ange ʻa e kau ʻea ki he Puleʻanga fakahēvaní kaeʻoua kuo hoko mai ʻa Sīsū ko e Tuʻi ʻi he Puleʻanga naʻe talaʻofaʻaki maí. ʻI he hili ʻene toetuʻú peá ne hā ki heʻene kau ākongá, naʻá ne ʻoange kiate kinautolu ʻa e ngaahi mina fakaefakatātā ko ʻení ke nau ngaohi ha toe kau ākonga ke tānaki atu ki he kalasi ko ia ʻo e Puleʻanga fakahēvaní.

“Ka,” naʻe hoko atu ʻa Sīsū, “ko e kakai ʻo hono fonuá naʻa nau fehiʻa kiate ia [ko e tangata ko e ʻeikí], ʻo nau fekau atu ha kau fakafofonga ke fakataleʻi ia, pea ke fakahā, ‘ʻOku ʻikai te mau loto ke fakanofo ʻa e sianá ni ke tuʻi kiate kimautolu.’” Ko e kakai ʻo e fonuá ko e kakai ʻIsilelí, pe ko e kakai Siú, ʻo ʻikai ke kau ai ʻene kau ākongá. ʻI he hili ʻa e mavahe ʻa Sīsū ki hēvaní, naʻe ʻai ʻe he kau Siu ko ʻení ke ʻiloa ʻaki ʻenau fakatangaʻi ʻene kau ākongá naʻe ʻikai te nau fiemaʻu ia ko honau tuʻi. ʻI he founga ko ʻení naʻa nau ngāue ai ʻo hangē ko e kakai ʻo e fonuá ʻa ia naʻa nau fekau atu ʻa e kau fakafofongá.

Naʻe anga-fēfē hono ngāueʻaki ʻe he kau tamaioʻeiki ʻe toko hongofulú ʻenau ngaahi miná? Naʻe fakamatalaʻi ʻe Sīsū: “Pea faifai peá ne foki mai, kuo ʻoʻona ʻa e mafai ko e tuʻí; peá ne fekau ke ui mai ʻa e tuʻunga tamaioʻeiki ko iá, ʻa ia naʻá ne tuku ki ai ʻa e paʻanga silivá, koeʻuhi ke ne meaʻi pe kuo fēfē ʻenau ngāueʻi iá. Pea tuʻu mai ʻa e ʻuluakí, ʻo ne pehē, ‘ʻEiki, ko hoʻo miná kuó ne maʻu mai mo ha mina ʻe hongofulu.’ Pea meʻa mai ia, ‘ʻOiseuke! mālō, siʻi tamaioʻeiki lelei! Pea ko e meʻa ʻi hoʻo lototō ʻi ha kiʻi momoʻi meʻa pehē, ke ke nofo ko e pule ʻo ha kolo ʻe hongofulu.’ Pea haʻu mo hono uá, ʻo ne pehē, ‘ʻEiki, ko hoʻo miná kuó ne fakatupu ha mina ʻe nima.’ Pea ki he tokotaha ko iá foki naʻá ne meʻa mai, ‘Mo koe, foki, ke ke hoko ko e pule ʻo e ngaahi kolo ʻe nima.’”

Ko e tamaioʻeiki mo e ngaahi mina ʻe hongofulú ʻokú ne fakatātaaʻi ʻa e kalasi, pe ko e kulupu, ʻo e kau ākonga mei he Penitekosi ʻo e 33 T.S. ʻo aʻu mai ki he taimi ko ʻení ʻa ia naʻe fakakau ki ai ʻa e kau ʻaposetoló. Ko e tamaioʻeiki naʻá ne maʻu ʻa e ngaahi mina ʻe nimá ʻokú ne toe fakatātaaʻi ha kulupu he lolotonga ʻo e vahaʻa taimi tatau, ʻa e faʻahinga kuo nau fakalahi ʻa e ngaahi meʻa mahuʻinga ʻa e tuʻí ʻi he māmaní ʻo fakatatau ki honau ngaahi faingamālié mo ʻenau malavá. Ko e ongo kulupu ko ʻení ʻokú na faivelenga ʻi he malangaʻi ʻa e ongoongo leleí, pea ko hono olá, ʻoku tokolahi ʻa e kau loto-totonu kuo hoko ko e kau Kalisitiane. Ko e toko hiva ʻo e kau tamaioʻeikí naʻa nau lavameʻa ʻi he ngāué pea naʻe fakalahi ʻa e ngaahi meʻa naʻa nau maʻú.

Naʻe hoko atu ʻe Sīsū: “Pea toki haʻu ʻa e taha naʻe kehe, ʻo ne pehē, ‘ʻEiki, ko ʻena hoʻo miná, ʻa ia kuó u moʻu tauhia, kuo kofu ʻi ha holoholo. He ne u manavahē kiate koe, koeʻuhi ko e tangata anga-kakaha koe; he ko hoʻo angá ke ʻeke ʻa e meʻa naʻe ʻikai te ke ʻoangé, pea ke utu ʻa e meʻa naʻe ʻikai te ke toó.’ Pea folofola mai ia, ‘ʻA e tamaioʻeiki fulikivanu, te u fakamaau koe mei hoʻo lea ʻaʻaú. Naʻá ke ʻilo koā ko e tangata anga-kakaha au, ʻoku ou ʻeke ʻa e meʻa naʻe ʻikai te u ʻoangé, mo utu ʻa e meʻa naʻe ʻikai te u tō? Pea ko e hā ai naʻe ʻikai te ke tuku ʻeku paʻanga silivá ki he pangikeé? Pehē kuó u maʻu ai ia mo hono fua foki ʻi heʻeku haʻú ni.’ Pea meʻa ia kiate kinautolu naʻe haʻofia iá, ‘Mou toʻo ʻa e miná meiate ia, ʻo tuku kiate ia ʻoku maʻu ʻa e hongofulú.’”

Ko e mole ʻa e mina fakaefakatātaá ko hono ʻuhingá ko e mole ʻa e tuʻunga ʻi he Puleʻanga fakahēvaní mei he tamaioʻeiki fulikivanú. ʻIo, naʻe hangē naʻe mole meiate ia hono faingamālie ke pule ki he ngaahi kolo ʻe hongofulú pe ko e ngaahi kolo ʻe nimá. Toe fakatokangaʻi foki, naʻe ʻikai ke tala naʻe anga-fulikivanu ʻa e tamaioʻeikí ʻi ha faʻahinga kovi naʻá ne fai, ka koeʻuhi ko e ʻikai te ne ngāue ke tupu ʻa e koloa ʻa e puleʻanga ʻo hono ʻeikí.

ʻI hono ʻoatu ʻa e mina ʻa e tamaioʻeiki fulikivanú ki he ʻuluaki tamaioʻeikí, naʻe fai ʻa e taʻeloto ki ai: “ʻEiki, ka ʻoku hongofulu ʻene mina ʻaʻaná!” Ka naʻe tali atu ʻe Sīsū: “ʻIlonga ha taha ʻoku maʻu ha meʻa ʻe ʻoange ki ai mo ha meʻa; ka ko ia ʻoku ʻikai ke maʻú, naʻa mo e meʻa ʻokú ne maʻú ʻe toʻo meiate ia. Ka ko hoku ngaahi fili ko ia naʻe ʻikai loto ke u tuʻi kiate kinautolú, taki mai ki heni, pea tāmateʻi ʻi hoku ʻaó.” Luke 19:​11-27; Mātiu 28:​19, 20.

▪ Ko e hā naʻá ne langaʻi ʻa Sīsū ke fai ʻa e talanoa fakatātā ʻo e ngaahi miná?

▪ Ko hai ʻa e tangata ko e ʻeikí, pea ko e hā ʻa e fonua naʻá ne fononga ki aí?

▪ Ko hai ʻa e kau tamaioʻeikí, pea ko e hā ʻoku fakatātaaʻi ʻe he ngaahi miná?

▪ Ko hai ʻa e kakai ʻo e fonuá, pea naʻe fēfē ʻenau fakahā ʻenau fehiʻá?

▪ Ko e hā naʻe ui ai ʻa e tamaioʻeiki ʻe taha ko e fulikivanú, pea naʻe ʻuhinga ki he hā ʻa e mole ʻene miná?