Vahe 36

Ko e Tui Lahi ʻa ha ʻŌfisa Fakakautau

ʻI HE taimi naʻe fai ai ʻe Sīsū ʻa ʻene Malanga ʻi he Moʻungá, ko ʻene aʻu ia ki he meimei vaeuaʻanga ʻo ʻene ngāue fakafaifekau ki he kakaí. ʻOku ʻuhinga iá ko e taʻu pē ʻe taha mo e māhina ʻe hiva nai naʻe toe ke ne fakakakato ai ʻa ʻene ngāue ʻi he māmaní.

Naʻe hū leva ʻa Sīsū ki he kolo lahi ko Kāpaneumé, ko ha feituʻu tefito ia ke fai mei ai ʻa ʻene ngaahi ngāué. ʻI hení naʻe fakaofi mai kiate ia ʻa e kau tangata mātuʻa ʻo e kau Siú mo ha kole. Naʻe fekauʻi mai kinautolu ʻe ha ʻōfisa ʻi he kau tau Lomá, ʻa ia ko ha Senitaile, ko ha tangata ʻo ha matakali kehe ia mei he kau Siú.

Ko e sevāniti ʻofaʻanga ʻa e ʻōfisa fakakautaú naʻe ofi mate tupu mei ha puke lahi, pea naʻá ne fiemaʻu ke fakamoʻui ʻe Sīsū ʻa ʻene sevānití. Naʻe tangi tōtōivi ʻa e kau Siú maʻá e ʻōfisá: “Ko e tangata ʻeni ʻoku tāu ke ke fai ki ai ʻa e meʻa,” ko ʻenau leá ia, “he ʻokú ne ʻofaʻi hotau kakaí, pea naʻá ne langa ʻe ia pē hotau falelotu.”

Naʻe ʻikai ha toe toumoua, naʻe mavahe atu ʻa Sīsū mo e kau tangatá ni. Kae kehe, ʻi heʻenau ofi atú, ne fekau mai ʻe he ʻōfisá ha ngaahi kaungāmeʻa ke nau pehē: “ʻEiki, ʻoua naʻá ke ongosia he meʻa maí, he ʻoku ʻikai te u taau ke ke hū ki hoku pokoʻi falé. Pea ko ia foki naʻá ku pehē ai ʻoku ou taʻetaau ke ʻalu atu kiate koe.”

Ko ha lea anga-fakatōkilalo lahi ē ki ha ʻōfisa ʻa ia naʻe anga ki hono tuʻutuʻuniʻi ʻa e niʻihi kehé! Ka ʻoku mahalo foki naʻá ne fakakaukau fekauʻaki mo Sīsū, ʻo ʻilo naʻe tapui ʻe he anga-fakafonuá ha Siu mei he feohi fakaesōsiale mo e kakai ʻikai ko e kau Siú. Naʻa mo Pita naʻá ne pehē: “ʻOku mou lāuʻilo, ko e meʻa ia ʻoku tapuhā ki he tangata Siú, ke fafale ki ha tokotaha ʻi ha faʻahinga kehe, pē ʻuhi ki ai.”

Mahalo pē ko e ʻikai ke loto ke faingataʻaʻia ʻa Sīsū ʻi he ngaahi nunuʻa ʻo hono maumauʻi ʻo e anga-fakafonua ko iá, ne ʻai ai ʻe he ʻōfisá ʻa hono ngaahi kaungāmeʻá ke nau kole kiate ia: “Fai pē ha foʻi folofola, pea ʻe moʻui ai ʻeku tamaioʻeikí. He ko au foki ko e tangata puleʻia, pea ʻoku ai ha kau sōtia ʻoku fakaongo kiate au, peá u pehē ki ha taha, ‘ʻAlu!’ pea ʻalu ia, pea ki ha taha, ‘Haʻu!’ peá ne haʻu, peá u pehē ki heʻeku pōpulá, ‘Fai ē!’ pea ʻokú ne fai.”

Ko ia, ʻi he fanongo ʻa Sīsū ki he meʻá ni, naʻá ne ofo. “Ko au ē, ʻoku ou tala atu,” ko ʻene leá ia, “naʻe ʻikai te u ʻilo mei ha taha ʻi ʻIsileli ha tui ʻoku pehē fau.” ʻI he hili ʻa hono fakamoʻui ʻa e sevāniti ʻa e ʻōfisá, naʻe ngāueʻaki ʻe Sīsū ʻa e taimi ko iá ke lave ai ki he founga ʻe tāpuakiʻi ai ʻa e faʻahinga ʻikai ko e kau Siú ka ʻoku tuí ʻaki ʻa e ngaahi tāpuaki ʻa ia naʻe talitekeʻi ʻe he kau Siu taʻeangatonú.

“ʻE haʻu ha tokolahi,” ko e lea ia ʻa Sīsuú, “mei Hangahake mo Hangahifo, ʻo nau nofo mo ʻĒpalahame mo ʻAisake mo Sēkope, ʻi he puleʻanga ʻo hēvaní; ka ko e fānau totonu ʻo e puleʻangá ʻe kapusi ki he poʻuli ʻo tuaʻā. Ko e potu ia ʻe toki hoko ai ʻa e tangi mo e fengaiʻitaki ʻo e nifó.”

“Ko e fānau totonu ʻo e puleʻangá ʻe kapusi ki he poʻuli ʻo tuaʻā” ko e kau Siu totonu ia naʻe ʻikai te nau tali ʻa e faingamālie naʻe ʻuluaki tuku atu kiate kinautolu ʻa ia ko e hoko ko e kau pule fakataha mo Kalaisí. Ko ʻĒpalahame, ʻAisake, mo Sēkope ʻoku nau fakatātaaʻi ʻa e fokotuʻutuʻu ʻa e Puleʻanga ʻo e ʻOtuá. Ko ia naʻe lave ʻa Sīsū ki he founga ʻe talitali lelei ai ʻa e kau Senitailé ke hangē ʻoku nau nofo ki he tēpile fakahēvaní, “ʻi he Puleʻanga ʻo Hēvaní.” Luke 7:​1-10; Mātiu 8:​5-13; Ngāue 10:28.

▪ Ko e hā naʻe tangi ai ʻa e kau Siú maʻá e ʻōfisa fakakautau Senitailé?

▪ Ko e hā nai ʻokú ne fakamatalaʻi ʻa e ʻuhinga naʻe ʻikai ke fakaafeʻi ai ʻe he ʻōfisá ʻa Sīsū ke hū ange ki hono falé?

▪ Ko e hā naʻe ʻuhinga ki ai ʻa Sīsū ʻi heʻene fakamatala fakamulitukú?