Vahe 45

Ko ha Ākonga Taʻeʻamanekina

KO HA meʻa fakamanavahē ē naʻe mātā ʻe Sīsū ʻi heʻene hifo ki he matātahí! Ko ha ongo tangata fakailifia angakehe naʻá na fehuufi mei he faʻitoka ofi pē ai ʻo na lele mai kiate ia. Naʻe uluisino ʻiate kinaua ʻa e tēmeniō. Koeʻuhi ko e taha ʻia kinaua naʻe fuʻu anga-fakamālohi ange pea naʻe toe fuʻu mamahi fuoloa ange ʻi hono puleʻi ʻe he tēmenioó, naʻe fakahanga ki ai ʻa e tokangá.

Naʻe fuoloa ʻa e nofo takai holo ʻa e tangata fakaʻofá ni he ngaahi fonualotó ʻo ʻikai ha vala. Naʻe hokohoko he ʻaho mo e pō, ʻa ʻene kaikaila mo tafatafaʻi ia ʻaki ʻa e ngaahi maka. Naʻá ne fuʻu anga-fakamālohi ʻaupito he naʻe ʻikai ha taha ʻe loto-toʻa feʻunga ke ne foua ʻa e vāʻihala ko iá. Naʻe fai hono ʻohofi ʻo haʻi, ka naʻá ne motuhi ʻa e ngaahi sēini haʻí pea maumauʻi mo e ngaahi ukamea naʻe kiiʻi ʻaki hono vaʻé. Naʻe ʻikai malava ʻe ha taha ke ikunaʻi ia.

ʻI he aʻu ʻa e tangatá ni kia Sīsuú peá ne tō tūʻulutui ki hono vaʻé, naʻe hanga ʻe he kau tēmeniō naʻa nau puleʻi iá ʻo ʻai ke ne kalanga leʻo-lahi ʻo pehē: “Ko ho hā au, ʻe Sīsū ko e ʻAlo ʻo e ʻOtua Fungani Māʻolungá? ʻOku ou hū tōtōaki kiate koe ʻi he ʻOtuá, ke ʻoua naʻá ke fakamamahiʻi au.”

“ʻA koe laumālie ʻulí na, mahuʻi mai mei he tangatá,” ko e toutou lea ia ʻa Sīsuú. Ka naʻe fehuʻi ange leva ʻe Sīsū kiate ia: “Ko hai ho hingoá?”

“Ko Kongakau au, he ʻoku mau tokolahi,” ko e talí ia. ʻOku fiefia lahi ʻa e kau tēmenioó ʻi heʻenau vakai ki he faingataʻaʻia ʻa e faʻahinga ʻoku malava ke nau uluisino aí, ngalingali ʻoku nau fiefia ʻi heʻenau fakatahataha ʻiate kinautolú ʻi ha laumālie loto-foʻi. Ka ʻi heʻenau fehangahangai mo Sīsuú, naʻa nau kole ke ʻoua naʻa tuku kinautolu ki he luó. ʻOku tau toe vakai ai heni naʻe maʻu ʻe Sīsū ʻa e mafai lahi ange; naʻá ne malava ke ikunaʻi naʻa mo e kau tēmeniō fulikivanú ni. ʻOku fakahaaʻi foki heni ko e kau tēmenioó kuo nau lāuʻilo ko hono tuku kinautolu ki he luó fakataha mo honau takí, ʻa Sētane ko e Tēvoló, ko e fakamaau aofangatuku ia ʻa e ʻOtuá kiate kinautolú.

Naʻe ʻi ai ha fanga puaka ʻe toko 2,000 naʻa nau huohua holo he tafaʻaki moʻungá. Ko ia naʻe pehē ʻe he kau tēmenioó: “Tuku mai kimautolu ki he fanga puaká, ke mau hū ki ai.” Ko ia naʻe maʻu ʻe he kau tēmenioó ni ʻa e faʻahinga fiemālie taʻefakaenatula mei he fakamamahi tupu mei heʻenau hū ki he ngaahi sino ʻo e ngaahi meʻamoʻui fakaekakanó. ʻI hono fakangofua kinautolu ʻe Sīsū ke nau hū ki he fanga puaká, ko e kātoa ʻa e fanga puaka ko ʻeni ʻe toko 2,000 naʻa nau feʻohofi kotoa ʻo tō ʻi he lilifá ki tahi ʻo melemo ai.

ʻI he sio ʻa e faʻahinga naʻa nau tokangaʻi ʻa e fanga puaká ki he meʻá ni, naʻa nau fakavave ke fakahā ʻa e ngaahi ongoongo ko iá ki he koló mo e ngaahi feituʻu ʻutá. ʻI he meʻá ni, naʻe omi leva ʻa e kakaí ke sio ki he meʻa kuo hokó. ʻI heʻenau aʻu maí, naʻa nau sio ki he tangata naʻe mavahe mei ai ʻa e kau tēmenioó. Kuó ne kofu pea kuo ʻatamai lelei, peá ne tangutu he veʻe vaʻe ʻo Sīsuú!

Naʻe fakamatala ʻa e kau sio tonú ki he founga naʻe sai ai ʻa e tangatá. Naʻa nau fakahā foki ki he kakaí ʻo kau ki he mate angakehe ʻa e fanga puaká. ʻI he fanongo ʻa e kakaí ki he meʻá ni, naʻa nau manavahē ʻaupito, pea nau kole tōtōivi kia Sīsū ke ne mavahe mei honau feituʻú. Ko ia naʻá ne tali fiemālie peá ne heka ki he vaká. Naʻe kole kiate ia ʻa e tangata naʻe ʻāvanga ki muʻá ke na ō mo ia. Ka naʻe tala ange ʻe Sīsū kiate ia: “Mole ki ho ʻapí mo ho kāinga, pea ongoongoa kiate kinautolu ʻa e ngaahi fuʻu meʻa kuo fai ʻe he ʻEikí maʻaú mo ʻene ʻofaʻi koé.”

Naʻe enginaki maʻu pē ʻe Sīsū ki he faʻahinga naʻá ne fakamoʻuí ke ʻoua te nau toe tala ki ha taha, koeʻuhi naʻe ʻikai te ne fiemaʻu ʻa e kakaí ke nau aʻu ki he fakamulitukú ʻo makatuʻunga pē ʻi ha ngaahi ongoongo fakatoʻoaloto. Kae tuku kehe ʻa e meʻá ni ia koeʻuhi he ʻe malanga ʻa e tangata ia naʻe ʻāvanga ki muʻá ki he kakai ʻe ʻikai nai ha faingamālie ke aʻu tonu ki ai ʻa Sīsuú. Pehē foki, ʻi he ʻi ai ko ia ʻa e tangatá ʻe hoko ia ko e fakamoʻoni ʻo kau ki he mafai ʻo Sīsū ke ngāue leleí, ʻo fakafepakiʻi ai ha faʻahinga fakamatala taʻefakafiemālie naʻe ʻalu holo fekauʻaki mo e mole ʻa e fanga puaká.

ʻI he fai ki he enginaki ʻa Sīsuú, naʻe mavahe ai ʻa e tangata naʻe ʻāvanga ki muʻá ni. Naʻá ne kamata hono fanongonongo ʻa e meʻa kotoa naʻe fai ʻe Sīsū maʻaná ʻi Tikapolusi, pea naʻe ofo ai ʻa e kakaí. Mātiu 8:​28-34; Maake 5:​1-20; Luke 8:​26-39; Fakahā 20:​1-3.

▪ Ko e hā nai ʻa e ʻuhinga, naʻe fakahanga ai ʻa e tokangá ia ki he tangata ʻe toko taha naʻe uluisino ai ʻa e tēmenioó, neongo ko e toko ua naʻe ʻi aí?

▪ Ko e hā ʻokú ne fakahaaʻi kuo ʻilo ʻa e kau tēmenioó ʻo kau ki he tuku ki ha luo he kahaʻú?

▪ Ko e hā ʻoku ngalingali ai ʻoku saiʻia ʻa e kau tēmenioó ke nau uluisino ʻi he tangatá mo e fanga manú?

▪ Ko e hā naʻe ʻai ai ʻe Sīsū ʻa e tangata naʻe ʻāvanga ki muʻá ke kehe ia, heʻene enginaki kiate ia ke tala ki he niʻihi kehé ʻa e meʻa naʻá Ne fai maʻaná?