Vahe 49

Ko ha Toe Fononga Fakamalanga ʻi Kāleli

ʻI HE hili ʻa e ngāue fakamalanga lahi ʻaupito ʻi he meimei taʻu ʻe ua, ʻe kamata leva ke fakavaivai ʻa Sīsū pea mo fakafiefiemālie? ʻI hono kehe ʻaupitó, naʻá ne fakalahi ʻa ʻene ngāue fakamalangá ʻaki hono kamata ha toe fononga ʻe taha, ko hono tuʻo tolu ia ʻi Kāleli. Naʻá ne ʻaʻahi ki he ngaahi kolo lalahi mo e ngaahi kolo iiki kotoa ʻi he vahefonuá, ʻo faiako ʻi he ngaahi sinakoké pea malangaʻi ʻa e ongoongo lelei ʻo e Puleʻangá. Ko e meʻa naʻá ne sio ai ʻi heʻene fononga ko ʻení naʻá ne fakatuipauʻi lahi ange ai ia ʻi ha toe taimi ki muʻa ʻo fekauʻaki mo e fiemaʻu ke fakalahi ʻa e ngāue fakamalangá.

ʻI ha feituʻu pē naʻe ʻalu ki ai ʻa Sīsū, naʻá ne sio ai ki hono fiemaʻu ki he fuʻu kakaí ʻa e fakamoʻui fakalaumālie mo e fakafiemālié. Naʻa nau hangē ha fanga sipi ʻoku ʻikai hanau tauhí, ʻo ongosia mo tukuhāusia, pea naʻá ne ongoʻi fakaʻofaʻia ʻiate kinautolu. Naʻá ne tala ki heʻene kau ākongá: “Kuo lahi ʻa e taʻu kuo motuʻu, ka ʻoku kaungatāmaki ʻa e kau ngāué. Ko ia mou kole ki he ʻEiki ʻoku ʻaʻana ʻa e taʻú, ke ne kouna atu mo ha kau ngāue ke utu ʻene taʻú.”

Naʻe ʻi ai ha palani ngāue ʻa Sīsū. Naʻá ne ui ange ʻa ʻene kau ʻaposetolo ʻe toko 12, ʻa ia kuó ne fili ʻi he meimei taʻu nai ʻe taha ki muʻa. Naʻá ne vahevahe kinautolu ʻo tautau toko ua, ʻo ʻai ko e foʻi timi ngāue ʻe ono ʻo e kau malanga, pea ʻoange kiate kinautolu ʻa e ngaahi fakahinohino. Naʻá ne fakamatala: “ʻOua te mou afe ʻi ha hala ʻoku ʻalu ki ha Senitaile, pea ʻoua te mou hū ki ha kolo Samēlia; ka mou ō muʻa ki he fanga sipi kuo mole ʻi he hako ʻo ʻIsilelí. Pea ʻi hoʻomou ō, mou malanga, ʻo pehē, ‘Kuo ofi ʻa e puleʻanga ʻo hēvaní.’”

Ko e Puleʻanga ko ʻeni naʻe ʻai ke nau malangaʻakí ko e puleʻanga ko ia naʻe akoʻi ʻe Sīsū kinautolu ke nau lotu ʻo kole ʻi he sīpinga lotú. Kuo ofi ʻa e Puleʻangá ʻi he ʻuhinga ko e Tuʻi fakanofo ʻa e ʻOtuá, ʻa Sīsū Kalaisi, naʻe lolotonga ʻi ai. Ke fokotuʻu ha ngaahi fakaongoongolelei ʻa ʻene kau ākongá ko e kau fakafofonga kinautolu ʻo e founga-pule mahulu hake ko ia mei he tangatá, naʻe fakaivia kinautolu ʻe Sīsū ke nau fakamoʻui ʻa e mahakí pea naʻa mo hono fokotuʻu hake ʻa e maté. Naʻá ne fakahinohino kiate kinautolu ke nau fakahoko taʻetotongi ʻa e ngaahi ngāue ko ʻení.

Ko hono hokó naʻá ne tala ki heʻene kau ākongá ke ʻoua te nau teuteu ha ngaahi meʻa fakamatelie ki heʻenau fononga ko ʻeni ʻo malangá. “ʻOua te mou tokonaki ha paʻanga koula ke fakapona ʻi homou noʻó, pea naʻa mo e siliva ʻe ʻikai, kaeʻumaʻā ʻa e meʻa tēpū, ha paʻanga kapa. ʻOua naʻa kumí ni ha kato ʻoho ki he halá, pe tangi ke ua ha sote, pe ha sū, pea naʻa mo ha tokotoko, ʻoua. Seuke, ʻilonga ha taha ʻoku ngāue, ʻoku tāu ke ne maʻu hono tauhi.” Ko e faʻahinga te nau houngaʻia ʻi he pōpoakí te nau tali pea tokoni mai ʻaki ʻa e meʻakai mo e nofoʻanga. Hangē ko ia naʻe leaʻaki ʻe Sīsuú: “Ka mou ka aʻu ki ha kolo, pe ha vilisi, ʻeke pe ko hai ha taha ʻoku tāu ke mou ʻalu ki aí, pea nofo pē ai kaeʻoua ke mou hiki ki ha potu kehe.”

Naʻe ʻoatu leva ʻe Sīsū ʻa e ngaahi fakahinohino ki he anga ʻo e fakaofi ki he kakaí mo e pōpoaki ʻo e Puleʻangá. “Pea ʻi hoʻomou hū ki ha fale,” naʻá ne fakahinohino, “tāpuakiʻi ia; pea kapau ʻoku taau moʻoni ʻa e falé, ʻe toka ai hoʻomou tāpuakí; pea kapau ʻoku ʻikai tāu, pea ko hoʻomou tāpuakí ʻe foki mai. Pea ʻilonga ʻa ia ʻe ʻikai te ne tali kimoutolú, pe maʻu hoʻomou ngaahi leá pea ka mou ka hū mai mei he fale ko iá, pe ko e koló, mou tūtuuʻi hono efú mei homou vaʻé.”

Ko ha kolo naʻá ne fakataleʻi ʻenau pōpoakí, naʻe fakahā ʻe Sīsū ʻe kakaha moʻoni ʻa e fakamaau ʻe fai ki aí. Naʻá ne fakamatala: “Ko au ē, ʻoku ou talaatu, ʻE kātakingofua ʻi he ʻAho ʻo e Fakamāú ʻa e fonua ʻo Sōtoma mo Komolá ʻi he kolo ko iá.” Mātiu 9:​35–10:15; Maake 6:​6-12; Luke 9:​1-5.

▪ Naʻe kamata ʻe Sīsū ʻa e fononga ngāue fakamalanga hono tolu ʻi Kālelí ʻanefē, pea ko e hā ʻa e meʻa naʻá ne fakatuipauʻi iá?

▪ ʻI hono fekau atu ʻa e kau ʻaposetolo ʻe toko 12 ke nau malangá, ko e hā ʻa e ngaahi fakahinohino naʻá ne ʻoange kiate kinautolú?

▪ Ko e hā naʻe tonu ai ki he kau ākongá ke nau akoʻi ko e Puleʻangá kuo ofí?