Vahe 47

Liliu mei he Loʻimatá ki he Fiefia Lahi

ʻI HE vakai ʻa Sailosi kuo fakamoʻui ʻa e fefine naʻe ʻaú, ʻoku ʻikai ha veiveiua naʻe toe lahi ange ai ʻa ʻene falala pau ki he ngaahi mālohi fakaemana ʻo Sīsuú. ʻI he konga ki muʻa ʻo e ʻahó, ne ʻosi kole ai ʻe Sailosi ia kia Sīsū ke ne ʻalu ange ʻo fai ha tokoni ki hono ʻofefine ʻofeina taʻu 12, naʻe tokoto tali mate pē. Kae kehe, ʻi he taimi ko ʻení naʻe hoko ʻa e meʻa ia naʻe tailiili lahi taha ki ai ʻa Sailosí. ʻI he lolotonga ʻa e kei lea ʻa Sīsū ki he fefiné, naʻe aʻu mai ha kau tangata ʻo nau fakaoloolo ʻo tala kia Sailosi: “Kuo pekia ho ʻofefiné! Ko e hā ka toe fakahohaʻasi ai ʻa e faiakó?”

He meʻa taulōfuʻu moʻoni ko e ongoongó ia! Kiʻi fakakaukau angé: Ko e tangatá ni, ʻa ia ʻoku tokaʻi lahi ʻi he anga ʻo e nofó, kuó ne tuēnoa fakaʻaufuli ʻeni ʻi heʻene ʻilo ki he mate ʻa hono ʻofefiné. Kae kehe, naʻe fanongo atu ʻa Sīsū ki he fetalanoaʻakí. Ko ia, naʻá ne hanga atu kia Sailosi, ʻo ne lea fakalototoʻa: “ʻOua ʻe lotosiʻi, kehe pē ke ke tui.”

Naʻe fononga leva ʻa Sīsū mo e tangata mamahí ʻo foki ki hono ʻapí. ʻI heʻena aʻu atú, naʻá na ʻilo ai ha fuʻu fākafoa ʻo e tangi mo e tangilāulau. Ko ha fuʻu kakai kuo fakatahataha mai, pea ʻoku nau tangi mo fetuki kinautolu ʻi he mamahi. ʻI he hū atu ʻa Sīsū ki lotó, naʻá ne ʻeke: “Ko hoʻomou vālau mo tangí koeʻumaʻā? ʻOku ʻikai pekia ʻa e taʻahiné, ka ʻoku mohe.”

ʻI he fanongo ki he meʻá ni, naʻe kamata ai ke kata manuki ʻa e kakaí kia Sīsū koeʻuhi naʻa nau ʻilo kuo mate moʻoni ʻa e taʻahiné ia. Kae kehe, naʻe pehē ʻe Sīsū ia ʻokú ne mohe pē. ʻI hono ngāueʻaki ʻa hono ngaahi mālohi naʻe ʻoange ʻe he ʻOtuá, naʻá ne fakahāhā ai te ne malava noa pē ke fakafoki mai ʻa e kakaí mei he maté ʻo hangē ko e malava ke fakaʻaaki kinautolu mei ha mohe maʻu.

Naʻe fekau atu leva ʻe Sīsū ke ō ki tuʻa ʻa e tokotaha kotoa tukukehe pē ʻa Pita, Sēmisi, Sione, pea mo e faʻē mo e tamai ʻa e taʻahine naʻe maté. Naʻá ne ʻave leva ʻa e toko nimá ni ʻo nau ō ki he potu naʻe fakaʻeʻepa ai ʻa e kiʻi taʻahiné. Naʻe puke ʻe Sīsū hono nimá, ʻo ne pehē: “Talʹi·tha cuʹmi,” ʻa ia ko hono hikí: “Siʻi taʻahine, ʻoku ou tala atu, Ke ke tuʻu!” Pea naʻe tuʻu hake leva ʻa e taʻahiné ʻo kamata luelue! Ne meimei vale ai pē ʻa e ongo mātuʻá heʻena fiefia lahi he sio kiate iá.

ʻI he hili ʻa hono tala ange ke ʻoange ha meʻa ke kai ʻa e kiʻi taʻahiné, naʻe tuʻutuʻuni ʻe Sīsū kia Sailosi mo hono uaifí ke ʻoua te na tala ki ha taha ʻa e meʻa kuo hokó. Ka neongo ʻa e meʻa naʻe leaʻaki ʻe Sīsuú, naʻe mafola atu ʻi he vahe fonuá kotoa ia ʻa e talanoa fekauʻaki mo e meʻá ni. Ko e toetuʻu ʻaki ʻeni hono ua naʻe fakahoko ʻe Sīsū. Mātiu 9:​18-26; Maake 5:​35-43; Luke 8:​41-56.

▪ Ko e hā ʻa e ongoongo naʻe maʻu ʻe Sailosí, pea naʻe anga-fēfē ʻa hono fakalototoʻaʻi ia ʻe Sīsuú?

▪ Ko e hā ʻa e tuʻunga naʻe ʻi ai ʻi heʻena aʻu atu ki he ʻapi ʻo Sailosí?

▪ Ko e hā naʻe pehē ai ʻe Sīsū naʻe mohe pē ʻa e kiʻi tama ia naʻe maté?

▪ Ko hai ʻa e toko nima fakataha mo Sīsū naʻa nau sio tonu ʻi he toetuʻú?