Vahe 54

“Mā Moʻoni mei he Langí”

KO E ʻaho ki muʻá naʻe lahi moʻoni ʻa e ngaahi meʻa lalahi naʻe hoko aí. Naʻe fafanga fakaemana ai ʻe Sīsū ʻa e toko laui afe peá ne toki hola leva mei he feinga ʻa e kakaí ke ʻai ia ko ha tuʻí. ʻI he pō ko iá naʻá ne luelue ai ʻi he fukahi Tahi tōtōtaufa ʻo Kālelí; naʻe fakahaofi ai ʻa Pita, ʻa ia naʻe kamata ke melemo hifo ʻi heʻene luelue ʻi he fukahi tahí lolotonga ʻene houtuʻú; pea mo hono fakanonga ʻa e ngaahi peaú ke fakahaofi ʻa ʻene kau ākongá mei ha fakatamaki fakaevaha.

ʻI he taimi ko ʻení ko e kakai ko ia naʻe fafangaʻi fakaemana ʻe Sīsū ʻi he tokelau-hahake ʻo e Tahi Kālelí naʻa nau ʻilo ia ʻo ofi ki Kāpaneume pea nau ʻeke: “Naʻá ke haʻu fakakū ki hení?” ʻI hono valokiʻi kinautolú, naʻe pehē ʻe Sīsū kuo nau haʻu pē ʻo kumi kiate ia koeʻuhi ko ʻenau ʻamanekina ha toe kai taʻetotongi ʻe taha. Naʻá ne naʻinaʻi kiate kinautolu ke nau ngāue, ʻo ʻikai ki he meʻakai ʻoku ʻauhá, ka ki he meʻakai ʻoku tolonga ki he moʻui taʻengatá. Ko ia naʻe ʻeke ʻe he kakaí: “Ko e hā tū te mau fai, ka mau feia ʻa e ngaahi ngāue mei he ʻOtuá?”

Naʻe fakahā ʻe Sīsū ko e ngāue pē ʻe taha ʻoku mahuʻinga lahi tahá. “Ko eni ia ʻa e ngāue mei he ʻOtuá,” ko ʻene fakamatalá ia, “ke mou ngāueʻi ʻa e tui kiate ia ne fekau mai ʻe he ʻEne ʻAfió.”

Kae kehe, naʻe ʻikai ngāueʻi ʻe he kakaí ia ʻa e tui kia Sīsuú, neongo ʻa e ngaahi mana kotoa naʻá ne fakahokó. ʻOku ʻikai ala tui ki ai, naʻa mo e hili atu ē ʻa e ngaahi meʻa fakaofo kotoa naʻá ne faí, naʻa nau ʻeke: “Pea ko e hā ia ha meʻa ʻokú ke fai ko e fakaʻilonga, ke mau mamata ki ai ʻo tui kiate koe? Ko e hā hoʻo ngāue ʻoku faí? Ko ʻetau ngaahi kuí naʻa nau kai ʻa e mana ʻi he toafá, ʻo hangē ko ia kuo tohí, ‘Naʻá ne foaki kiate kinautolu ke kai ha mā mei he langí.’”

ʻI he tali ki heʻenau kole ki ha fakaʻilongá, naʻe ʻai ʻe Sīsū ke mahino ʻa e Matavai ʻo e ngaahi tokonaki fakaemaná, ʻo ne pehē: “Naʻe ʻikai ko Mōsese naʻá ne foaki kiate kimoutolu ʻa e mā mei he langí, ka ko ʻeku Tamaí ʻokú ne foaki kiate kimoutolu ʻa e mā mei he langí, ʻa e mā moʻoniá. He ko e mā ʻa e ʻOtuá, ko ia ia ʻoku ʻalu hifo mei he langí, ʻo ne foaki moʻui ki māmaní.”

“ʻEiki,” ko e lea ia ʻa e kakaí, “foaki mai kiate kimautolu ʻa e mā ko iá maʻu ai pē.”

“Ko au pē ko e mā ʻo e moʻuí,” ko e fakamatala ia ʻa Sīsuú. “Ko ia ʻoku haʻu kiate aú ʻe ʻikai ʻaupito te ne fiekaia, pea ko ia ʻoku ngāueʻi ʻa e tui kiate aú, ʻe ʻikai ʻaupito te ne fieinua ha taimi. Ka naʻá ku tala kiate kimoutolu, Kuo mou mamata foki kiate au, kae ʻikai tui. Ko e koto meʻa kātoa ʻoku foaki ʻe he Tamaí kiate au ʻe haʻu kiate au, pea ko ia ʻoku fotu mai kiate aú, ʻe ʻikai ʻaupito te u kapusi; koeʻuhi kuó u ʻalu hifo mei he langí, ʻo ʻikai te u fai ʻa e loto ʻoʻokú, ka ko e finangalo ʻo ia naʻá ne fekau mai aú. Pea ko eni ia ʻa e finangalo ʻo ia naʻá ne fekau mai aú, koeʻuhi ko e meʻa kātoa kuó ne foaki maí, ke ʻoua naʻá ku tuku ke mole hano meʻa ʻe taha, kae kehe ke u fokotuʻu ia ʻi he ʻaho fakamuí. He ko eni ia ʻa e finangalo ʻo ʻeku Tamaí, ke ʻilonga ʻa ia ʻokú ne siofia ʻa e ʻAló, mo ngāueʻi ʻa e tui kiate iá, ke ne maʻu ʻa e moʻui taʻengatá.”

ʻI he meʻá ni naʻe kamata ke lāungatuʻu ai ʻa e kau Siú kia Sīsū koeʻuhi naʻá ne pehē, “Ko au pē ko e mā naʻe ʻalu hifo mei he langí.” Naʻa nau sio kiate ia ʻoku ʻikai ʻaupito ha meʻa ʻe toe mahulu hake ai ia mei he tuʻunga ko ha tama pē ʻa ha ongo mātuʻa fakaetangata pea ko ia ai, ʻi he founga tatau pē mo e kakai ʻo Nasaletí, naʻa nau taʻeloto, ʻo pehē: “ʻIkai ko Sīsū ʻeni, ko e foha ʻo Siosefa, ʻa ia ʻoku tau lāuʻilo ʻene tamaí mo ʻene faʻeé? Pea fēfē ai ʻene leá ni ʻo pehē, ‘Kuó u ʻalu hifo mei he langí’?”

“ʻOua te mou felāutuʻuaki,” ko e tali ia ʻa Sīsuú. “ʻOku ʻikai lava ʻe ha taha ke haʻu kiate au, ka ʻi he tohoaki ia ʻe he Tamaí, naʻá ne fekau mai aú; pea ko au te u fokotuʻu ʻa e tokotaha ko iá ʻi he ʻaho fakamuí. Kuo tohi ʻi he tohi Palōfitá, ‘Pea te nau hoko kotoa pē ko e kau akonekina ʻe he ʻOtuá.’ ʻIlonga ʻa ia kuo fanongo mei he Tamaí, pea kuo akonekiná, ʻokú ne haʻu kiate au. ʻOku ʻikai ko e pehē kuo mātā ʻa e Tamaí ʻe ha taha, ngata pē ʻi he tokotaha ko ia ʻoku mei he ʻOtuá; kuo mātā ʻa e Tamaí ʻe he tokotaha ko iá. Ko au ē, ko au ē, ʻoku ou tala atu, Ko ia ʻoku tuí ʻokú ne maʻu ʻa e moʻui taʻengatá.”

ʻI he toe hoko atú, naʻe toe pehē ʻe Sīsū: “Ko au pē ko e mā ʻo e moʻuí. Ko hoʻomou ngaahi kuí naʻa nau kai ʻi he toafá ʻa e mana, pea nau mate pē. Ko eni ia ʻa e mā ʻoku ʻalu hifo mei he langí, ʻa ia ʻilonga ha taha te ne kai mei ai pea ʻe ʻikai te ne mate. Ko au pē ko e mā ʻoku moʻui ʻa ia ne ʻalu hifo mei he langí; kapau ʻe kai ʻe ha taha mei he mā ko ení te ne moʻui pē ʻo taʻengata.” ʻIo, ʻi hono ngāueʻi ʻa e tui kia Sīsuú, ʻa e tokotaha naʻe fekau mai ʻe he ʻOtuá, ʻe lava ke maʻu ai ʻe he kakaí ʻa e moʻui taʻengatá. ʻOku ʻikai ha mana, pe ko ha toe mā kehe, ʻe lava ke ne tokonaki mai ia!

Ko e lāulea fekauʻaki mo e mā mei he langí ʻoku hangehangē naʻe kamata ia ʻi he hili pē ha taimi siʻi mei hono ʻilo ko ia ʻe he kakaí ʻa Sīsū ʻo ofi ki Kāpaneumé. Ka naʻe hokohoko atu ia, ʻo aʻu ki ha tumutumu ki mui he lolotonga ʻa e faiako ʻa Sīsū ʻi ha sinakoke ʻi Kāpaneume. Sione 6:​25-51, 59; Sāme 78:24; Aisea 54:13; Mātiu 13:​55-57.

▪ Ko e hā ʻa e ngaahi meʻa naʻe hoko ki muʻa ia ʻi he lāulea ʻa Sīsū fekauʻaki mo e mā mei he langí?

▪ ʻI he vakai atu ki he ngaahi meʻa naʻe toki ʻosi hono fai ʻe Sīsuú, ko e hā naʻe taʻengali ai ʻa e kole ke ʻomai ha fakaʻilongá?

▪ Ko e hā naʻe lāungatuʻu ai ʻa e kau Siú ʻi hono taukaveʻi ʻe Sīsū ko ia ia ʻa e mā moʻoni mei he langí?

▪ Naʻe fai ʻi fē ʻa e lāulea fekauʻaki mo e mā mei he langí?