Vahe 16

Mamahiʻi ʻo e Lotu kia Sihová

KO E ngaahi tokoua faʻē-taha ʻo Sīsuú​—ko e toe fānau kehe ʻa Melé​—ko Sēmisi, Siosefa, Saimone, mo Siutasi. Ki muʻa ke fononga ʻa e faʻahinga kotoa ko ʻení fakataha mo Sīsū mo ʻene kau ākongá ki Kāpaneumé, ko ha kolo ofi ki he Tahi Kālelí, naʻa nau afe nai ʻi honau ʻapí ʻi Nasaleti koeʻuhi ke faʻo ʻe he fāmilí ʻa e meʻa te nau fiemaʻú.

Ka ko e hā ʻa e ʻuhinga naʻe ʻalu ai ʻa Sīsū ki Kāpaneume kae ʻikai te ne hoko atu ʻene ngāue fakafaifekau ʻi Kena, ʻi Nasaletí, pe ko ha toe feituʻu ʻi he ngaahi moʻunga ʻo Kālelí? Ko e meʻa ʻe taha, naʻe tuʻu-ki-muʻa ange ʻa e tuʻuʻanga ʻo Kāpaneumé pea ʻoku hā mahino ko ha kolo lahi ange ia. Pehē foki, naʻe nofo ʻa e tokolahi taha ʻa e kau ākonga foʻou ʻa Sīsuú ʻi Kāpaneume pe ofi ki ai, ko ia naʻe ʻikai fiemaʻu ke nau mavahe mei honau ngaahi ʻapí ke akoʻi kinautolu ʻe Sīsū.

ʻI he lolotonga ʻa e nofo ʻa Sīsū ʻi Kāpaneumé, naʻe fai ʻe Sīsū ʻa e ngaahi ngāue fakaofo, pea ko e meʻa ia naʻá ne fai ha fakamatala ʻo kau ki ai ʻi he ngaahi māhina hili ʻa e meʻá ni. Ka naʻe ʻikai ke fuʻu fuoloa pea naʻe toe hoko atu ʻa e fononga ʻa Sīsū mo hono takangá. Ko e faʻahitaʻu failaú ia, pea naʻa nau fononga ki Selusalema ke kau ki he Laka-Atu ʻo e 30 T.S. ʻI he lolotonga ʻo ʻenau ʻi aí, naʻe vakai ʻa ʻene kau ākongá ki ha meʻa fekauʻaki mo Sīsū ʻa ia naʻe ʻikai te nau sio ki ai ki muʻa.

Fakatatau ki he Lao ʻa e ʻOtuá, naʻe fiemaʻu ki he kau ʻIsilelí ke nau fai ʻa e ngaahi feilaulau fanga manu. Ko ia, ke faingofua ki he kakaí, naʻe fakatau atu ʻe he kau tangata faifakatau ʻi Selusalemá ʻa e fanga monumanu pe fanga manupuna ki he taumuʻa ko ʻení. Ka naʻa nau fai ʻa e fakatau atú ʻi loto ʻi he temipalé tonu, pea naʻa nau kākaaʻi ʻa e kakaí ʻaki hono totongi mamafa ʻaupito kiate kinautolu.

Naʻe mamahi lahi ai ʻa Sīsū ʻo ne ngaohi ha uipi ʻaki ʻa e ngaahi maea peá ne kapusi ʻa e kau faifakataú. Naʻá ne huaʻi ʻa e paʻanga ʻa e kau fetongi paʻangá pea fulihi ʻenau ngaahi tēpilé. “ʻAve ʻa e ngaahi meʻá na!” ko ʻene kaila ia ki he faʻahinga naʻa nau fakatau atu ʻa e fanga lupé. “ʻOua ʻe ngaohi ʻa e fale ʻo ʻeku Tamaí ko e fale fakatau!”

ʻI he vakai ʻa e kau ākonga ʻa Sīsuú ki he meʻá ni, naʻa nau manatuʻi ʻa e kikite ʻo kau ki he ʻAlo ʻo e ʻOtuá: “Ko e mamahiʻi ʻo ho falé te ne kai ʻo ʻosi au.” Ka naʻe ʻeke ʻe he kau Siú: “Ko e hā ha fakaʻilonga ʻokú ke tuku mai, koeʻuhi ko hoʻo fai ʻa e ngaahi meʻa ni?” Naʻe tali ʻe Sīsū ʻo pehē: “Holoki ʻa e temipalé ni, pea te u toe fokotuʻu ʻi ha ʻaho ʻe tolu.”

Naʻe fakakaukau ʻa e kau Siú ko e lea ʻeni ʻa Sīsū ʻo fekauʻaki mo e temipale moʻoní, ko ia ai, naʻa nau ʻeke: “Kuo ʻosi ʻa e taʻu ʻe fāngofulu mā ono mo e langa ʻo e temipalé ni, pea te ke fokotuʻu ʻe koe ʻi ha ʻaho ʻe tolu pē?” Kae kehe, naʻe lea ʻa Sīsū ʻo kau ki he temipale ko hono sinó. Pea ʻi he taʻu ʻe tolu ki mui mai aí, naʻe manatuʻi ʻe heʻene kau ākongá ʻa e leá ni ʻi hono fokotuʻu ia mei he pekiá. Sione 2:​12-22; Mātiu 13:55; Luke 4:23.

▪ ʻI he hili ʻa e kātoanga mali ʻi Kená, ko fē ʻa e ngaahi feituʻu naʻe fononga ki ai ʻa Sīsuú?

▪ Ko e hā naʻe mamahi lahi ai ʻa Sīsuú, pea ko e hā ʻa e meʻa naʻá ne faí?

▪ Ko e hā ʻa e meʻa naʻe manatuʻi ʻe he kau ākonga ʻa Sīsuú ʻi heʻenau sio ki he meʻa naʻá ne faí?

▪ Ko e hā ʻa e meʻa naʻe leaʻaki ʻe Sīsū ʻo fekauʻaki mo e “temipalé ni,” pea ko ʻene ʻuhingá ki he hā?