Vahe 25

Manavaʻofa ki ha Kilia

ʻI HE ʻaʻahi mai ʻa Sīsū mo ʻene kau ākonga ʻe toko faá ki he ngaahi kolo ʻo Kālelí, naʻe mafola atu he vahefonua ko iá ʻa e ongoongo ʻo kau ki he ngaahi meʻa fakaofo naʻá ne faí. Ko e fakamatala ʻo kau ki heʻene ngaahi ngāué naʻe aʻu ki he kolo lahi ʻe taha naʻe puke ai ha tangata ʻi he kiliá. Naʻe fakamatalaʻi ʻe he toketā ko Luké ʻa e tangata ko ʻení ʻo pehē ko e tangata “kuo fonu ʻi he kilia.” ʻI he fakautuutu ʻa e mahaki fakalilifú ni, ʻoku māmālie ʻa ʻene fakamatamatakoviʻi ʻa e ngaahi kupu kehekehe ʻo e sinó. Ko ia ai, naʻe ʻi he tuʻunga fakaʻofa ʻa e tangata kilia ko ʻení.

ʻI he aʻu atu ʻa Sīsū ki he koló, naʻe fakaofiofi mai kiate ia ʻa e tangata kiliá ni. Fakatatau ki he Lao ʻa e ʻOtuá, ko ha taha kilia naʻe pau ke ne kaila atu ko ha fakatokanga, ʻo pehē, “Taʻemaʻa, taʻemaʻa!” ke maluʻi ʻa e niʻihi kehé mei haʻanau haʻu ʻo fuʻu ofi pea maʻu nai ʻa e mahaki pipihí ni. Naʻe toki fakatōmapeʻe ʻa e tangata kiliá ʻo ne kole kia Sīsū ʻo pehē: “ʻEiki, ka ne ke loto ki ai, te ke lava ke fakamaʻa au.”

Ko e toki tui moʻoni ē kia Sīsū naʻe maʻu ʻe he tangatá ni! Ka, ko ha hā fakaʻofa mai ē ka ko ia tupu mei hono mahakí! Ko e hā ʻa e meʻa ʻe fai ʻe Sīsuú? Ko e hā ʻa e meʻa te ke fai ʻe koé? Naʻe ueʻi ʻe he manavaʻofá ʻa Sīsū, ʻo ne mafao atu hono nimá ʻo ne ala ki he tangatá ʻo ne pehē: “ʻOku ou loto pē. Ke ke maʻa koe.” Pea naʻe pulia atu leva ʻa e kiliá meiate ia.

Te ke saiʻia ke ʻi ai ha tokotaha manavaʻofa lahi pehē ke hoko ko ho tuʻi? ʻOku hanga ʻe he founga ngāue ʻa Sīsū ki he tangata kiliá ni ʻo ʻomai kiate kitautolu ʻa e tui pau ʻe fakahoko ʻi he lolotonga ʻo e pule ʻa Hono Puleʻangá ʻa e kikite mei he Tohitapú ʻoku pehē: “Ko e tuʻutāmakí mo e masivá ʻokú ne fakaʻatuʻi, pea ko e ngaahi laumālie ʻo e masivá ʻokú ne fakamoʻui.” ʻIo, ʻe fakahoko ʻe Sīsū ʻi he taimi ko iá ʻa e holi ʻo hono lotó ke ne tokoniʻi ʻa e faʻahinga kotoa ʻoku faingataʻaʻiá.

Naʻa mo e ki muʻa pea fakamoʻui ʻa e tangata kiliá, naʻe loto-māfana lahi ʻa e kakaí tupu mei he ngāue fakafaifekau ʻa Sīsuú. ʻI hono fakahoko ʻa e kikite ʻa ʻAiseá, naʻe toki fekau ʻe Sīsū ki he tangata kuo fakamoʻuí: “ʻOua naʻá ke tala ha meʻa ki ha taha.” Peá ne toki fakahinohinoʻi ia: “Ka ke mole pē ʻo fakahā koe ki he taulaʻeikí, pea ʻoange ʻa e ngaahi meʻa naʻe tuʻutuʻuni ʻe Mōsese moʻao fakamaʻá, ko ha fakamoʻoni kiate kinautolu.”

Ka naʻe fuʻu fiefia ʻa e tangatá pea ʻikai malava ke ne mataʻofi ʻa hono fakahā ʻa e mana naʻe hokó. Naʻá ne ʻalu leva pea kamata fakamafola atu ʻa e ongoongó he feituʻu kotoa pē, pea ʻoku hā ngalingali naʻe fakatupu ai ʻa e fiefanongo mo e fieʻilo ʻi he lotolotonga ʻo e kakaí pea naʻe ʻikai malava ai ʻa Sīsū ke hū fakahāhā ki ha kolo. Ko ia, naʻe nofo pē ʻa Sīsū ʻi he ngaahi potu lala naʻe ʻikai ke nofo ai ha tahá, pea naʻe haʻu kiate ia ʻa e kakai mei he feituʻu kotoa ke fanongo kiate ia pea mo fakamoʻui ʻenau ngaahi mahamahakí. Luke 5:​12-16; Maake 1:​40-45; Mātiu 8:​2-4; Livitiko 13:45; 14:​10-13; Sāme 72:13; Aisea 42:​1, 2.

▪ Ko e hā ʻa e meʻa ʻe lava ke hoko ʻi hono maʻu ʻa e mahaki kiliá, pea ko e hā ʻa e fakatokanga naʻe pau ke fai ʻe ha taha kilia?

▪ Ko e hā ʻa e tangi naʻe fai kia Sīsū ʻe ha tangata kilia, pea ko e hā ʻa e meʻa ʻe lava ke tau ako mei he anga ʻo e tali ʻa Sīsuú?

▪ ʻI he founga fē naʻe ʻikai ke talangofua ai kia Sīsū ha tangata naʻe fakamoʻui, pea ko e hā ʻa e ngaahi nunuʻa aí?