Vahe 48

Mavahe mei he ʻApi ʻo Sailosí pea Toe ʻAʻahi ki Nasaleti

KO E ʻaho femoʻuekina ia kia Sīsū​—ko ha folau tahi mei Tikapolusi, ko hono fakamoʻui ʻo e fefine naʻe ʻaú, mo hono fokotuʻu mei he maté ʻa e ʻofefine ʻo Sailosí. Ka naʻe teʻeki ʻosi ʻa e ʻahó ia. ʻOku hā mahino ʻi he mavahe atu ʻa Sīsū mei he ʻapi ʻo Sailosí, naʻe muimui ʻiate ia ha ongo tangata kui, ʻo kaila atu: “Hako ʻo Tēvita, ʻaloʻofa mai.”

ʻI he lea kia Sīsū ʻo pehē “Hako ʻo Tēvitá,” naʻe fakahaaʻi ai ʻe he ongo tangatá ni ʻa e tui ko Sīsuú ko e ʻea ia ki he taloni ʻo Tēvitá, ʻa ia ko ia ia ʻa e Mīsaia naʻe talaʻofaʻaki maí. Kae kehe, ʻoku hangehangē naʻe tukunoaʻi ʻe Sīsū ʻa ʻena kalanga ki ha tokoní, mahalo ko hono ʻahiʻahiʻi ʻa ʻena kītakí. Ka naʻe ʻikai ke foʻi ai ʻa e ongo tangatá ia. Naʻá na muimui ʻia Sīsū ki he feituʻu naʻá ne nofo aí, pea ʻi heʻene hū ki he falé, naʻá na muimui ai ki loto.

Naʻe ʻeke ai ʻe Sīsū: “ʻOkú mo tui te u lava ʻa e meʻá ni?”

“ʻIo, ʻEiki,” ko ʻena tali ia ʻi he tui pau.

Ko ia, naʻe ala ʻa Sīsū ki hona matá, ʻo ne pehē: “Ke fai kiate kimoua ʻo fakatatau ki hoʻomo tuí.” Fakafokifā pē kuó na lava ʻo sio! Pea naʻe naʻinaʻi mālohi ʻa Sīsū kiate kinaua: “Tokanga ke ʻoua naʻa ʻilo ia ʻe ha taha.” Ka ʻi heʻena fonu ʻi he fiefiá, naʻá na tukunoaʻi ʻa e fekau ʻa Sīsuú peá na talanoa ʻo kau kiate ia ʻi he feituʻu tukuʻutá kotoa.

ʻI he mavahe atu pē ʻa e ongo tangatá ni, naʻe ʻomai ʻe he kakaí ha tangata naʻe uluisino ai ha tēmeniō ʻa ia naʻe ʻai ia ʻe he tēmenioó ʻo ne noa. Naʻe kapusi ʻe Sīsū ʻa e tēmenioó, pea tuai-e-kemo kuo kamata lea ʻa e tangatá. Naʻe ofo ʻa e fuʻu kakaí ʻi he ngaahi maná ni, ʻo nau pehē: “Kuo teʻeki hoko pehē ʻa e meʻa ko iá ʻi ʻIsileli.”

Naʻe ʻi ai foki ʻa e kau Fālesí. Naʻe ʻikai malava ke nau fakaʻikaiʻi ʻa e ngaahi maná, ka ʻi heʻenau taʻetui anga-fulikivanú naʻa nau toe fai ai ʻenau tukuakiʻi ʻa e matavai ʻo e ngaahi ngāue mālohi ʻa Sīsuú, ʻo nau pehē: “Ko e pule ʻo e kau tēmenioó ʻoku fai ai ʻene kapusi ʻa e kau tēmenioó.”

Taimi nounou pē mei he hoko ʻa e ngaahi meʻá ni, naʻe foki ʻa Sīsū ki hono kolo ko Nasaletí, ʻi he taimi ko ʻení, naʻá ne ʻalu fakataha mo ʻene kau ākongá. ʻI he meimei taʻu ʻe taha ki muʻá, naʻá ne ʻaʻahi ai ki he sinakoké ʻo faiako ai. Neongo naʻe ʻuluaki fakatumutumu ʻa e kakaí ʻi heʻene ngaahi lea fakafiemālié, naʻa nau ʻita ki mui ai ʻi heʻene faiako naʻe faí pea nau feinga ke tāmateʻi ia. Naʻe meesi ʻa Sīsū ʻi he taimi ko ʻení ʻo fai ha toe feinga ke tokoni ki hono ngaahi kaungāʻapi ki muʻá.

Neongo naʻe ʻaukolo ʻa e kakai ia ʻi he ngaahi feituʻu kehé kia Sīsū, ʻoku ngalingali naʻe ʻikai pehē ia heni. Ko ia, ʻi he Sāpaté, naʻá ne ʻalu ai ki he sinakoké ke faiako. Ko e tokolahi taha ʻo e faʻahinga naʻa nau fanongo ki aí naʻa nau moʻutāfuʻua. “Naʻe maʻu mei fē ʻe he sianá ni ʻa e potó ni mo e ngaahi ngāue fakaofó ni?” ko ʻenau fehuʻí ia. “ʻIkai ko e foha ʻeni ʻo e motuʻa tufungá? ʻIkai ko e hingoa ʻo ʻene fāʻeé ko Mele, mo hono ngaahi tokouá ko Sēmisi mo Siosefa mo Saimone mo Siutasi? Pea ko hono ngaahi tuofāfiné, ʻikai ʻoku nau felemofafo kotoa pē ʻiate kitautolu? Pea mei fē ai ki he sianá ni ʻa e ngaahi fuʻu meʻa peheé?”

‘Ko Sīsuú ko ha tangata pē ʻi heni ʻo hangē ko kitautolú,’ ko ʻenau fakaʻuhingá ia. ‘Naʻa tau sio pē heʻene tupu haké, pea ʻoku tau ʻilo hono fāmilí. ʻE malava fēfē ke ne hoko ko e Mīsaia?’ Ko ia, neongo ʻa e fakamoʻoní kotoa​—ʻa e lahi ʻa hono potó mo e ngaahi maná—naʻa nau fakafisingaʻi ia. Koeʻuhi ko ʻenau fuʻu mahení, naʻa mo hono ngaahi kāingá tonu naʻa nau tūkia ʻiate ia, ʻo ʻai ai ʻa Sīsū ke ne fakaʻosiʻaki: “ʻOku ʻikai masiva fakaʻapaʻapa ʻe ha palōfita, ka ʻi hono fonua totonú, mo hono kāinga ʻoʻoná, mo hono fāmilí.”

Ko hono moʻoní, naʻe ʻohovale ʻa Sīsū ʻi heʻenau taʻetuí. Ko ia, naʻe ʻikai ai te ne fakahoko ha ngaahi mana ʻi ai tuku kehe pē ʻene hilifaki hono nimá ki ha niʻihi naʻe mahaki pea fakamoʻui kinautolu. Mātiu 9:​27-34; 13:​54-58; Maake 6:​1-6; Aisea 9:7.

▪ ʻI he lea kia Sīsū ʻo pehē “Hako ʻo Tēvitá,” ko e hā naʻe fakahaaʻi ʻe he ongo tangata kuí naʻá na tui ki aí?

▪ Ko e hā ʻa e fakamatala ki he ngaahi mana ʻa Sīsuú naʻe loto-taha ki ai ʻa e kau Fālesí?

▪ Ko e hā ko ha meesi ia kia Sīsū ke toe foki ʻo tokoni ki he faʻahinga ʻi Nasaletí?

▪ Ko e hā ʻa e talitali naʻe maʻu ʻe Sīsū ʻi Nasaletí, pea ko e hā hono ʻuhingá?