Vahe 95

Ngaahi Lēsoni he Vete Malí mo e ʻOfa ki he Fānaú

NAʻE fononga atu ʻa Sīsū mo ʻene kau ākongá ki Selusalema ke kau ki he Laka-Atu ʻo e 33 T.S. Naʻa nau kolosi atu he Vaitafe Sioataní ʻo fou ʻi he hala naʻe hū atu ʻi he vahefonua ʻo Pēleá. Naʻe ʻi Pēlea ʻa Sīsū ʻi ha ngaahi uike siʻi ki muʻa, pea naʻe fekau ke haʻu ki Siutea koeʻuhi ko hono kaungāmeʻa ko Lasalosí naʻe puke. Lolotonga ʻa ʻene ʻi Pēlea he taimi ko iá, naʻe lea ai ʻa Sīsū ki he kau Fālesí ʻo kau ki he vete malí, pea ko ʻeni naʻa nau toe ʻo hake ʻeni.

ʻI he lotolotonga ʻo e kau Fālesí naʻe ʻi ai ʻa e ngaahi fakakaukau kehekehe ʻo kau ki he vete malí. Naʻe pehē ʻe Mōsese ʻoku totonu ke veteʻi ha fefine koeʻuhi ko ha “meʻa fakalielia ʻi heʻene tafaʻakí.” Ko e niʻihi naʻa nau tui naʻe ʻuhinga pē ʻeni ia ki he taʻeangamaʻá. Ka naʻe fakakaukau ʻa e niʻihi ia ko e “meʻa fakalieliá” naʻe kau ki ai ʻa e ngaahi hala iiki pē. Ko ia, ʻi heʻenau feinga ke ʻahiʻahiʻi ʻa Sīsuú, naʻe ʻeke ai ʻe he kau Fālesí: “ʻOku ngofua koā ke veteʻi hoto uaifí ʻi ha meʻa pē?” Naʻa nau tui pau ʻo pehē ʻe tatau ai pē pe ko e hā ʻa e lau ʻa Sīsuú te ne tō ki ha faingataʻa mo e kau Fālesi ʻa ia naʻe kehe ʻenau fakakaukaú.

Naʻe poto ʻaupito ʻa Sīsū ʻi hono tali ʻa e fehuʻí, ʻo ʻikai te ne lave ki ha fakakaukau fakaetangata, ka naʻá ne lave ki he ʻuluaki faʻunga ʻo e nofo malí. “Ne ʻikai te mou lau koā,” ko ʻene fehuʻí ia, “ko ia naʻá ne ngaohi ʻa e kakaí ʻi he kamataʻangá naʻá ne ngaohi tangata mo fefine kinautolu, mo ne folofola, ‘Ko e meʻa ko ia ʻe tuku ai ʻe ha tangata ʻene tamaí mo ʻene faʻeé, ka ne pīkitai ki hono uaifí, pea ʻe hoko ʻa e toko uá ko e kakano pē taha’? Tā ʻoku ʻikai te na kei ua, ka ko e kakano pē taha. ʻAua, pea ko e meʻa kuo fakahoko ʻe he ʻOtuá, ke ʻoua naʻa fakamavae ʻe ha tangata.”

Naʻe fakahā ʻe Sīsū ko e muʻaki taumuʻa ʻa e ʻOtuá, ke nofo fakataha ʻa e ongo meʻa malí, pea ʻikai ke vete. Naʻe tali ʻe he kau Fālesí ʻo pehē, kapau ko ia, “pea ko e hā naʻe tuʻutuʻuni ai ʻe Mōsese ke ʻoange ha tohi vete, ʻo tukuange iá?”

“Ko e meʻa ʻi he fefeka ʻo hoʻomou angá, ko ia naʻe fakangofua ai ʻe Mōsese ke mou tukuange homou ngaahi uaifí,” ko e tali ia ʻa Sīsuú, “ka naʻe ʻikai ke pehē ʻi he kamataʻangá.” ʻIo, ʻi hono fokotuʻu ʻe he ʻOtuá ʻa e tuʻunga moʻoni ki he nofo malí ʻi he ngoue ʻo ʻĪtení, naʻe ʻikai te ne fai ai ha tokonaki ki ha vete mali.

Naʻe hoko atu ʻe Sīsū ʻo ne tala ki he kau Fālesí: “Ka ai ha taha te ne veteʻi hono uaifí, ʻo ʻikai ʻi haʻane feʻauaki [mei he faka-Kalisi, por·neiʹa], peá ne toki mali mo ha fefine kehe, ʻokú ne tono.” Naʻá ne fakahā heni ko e por·neiʹa, ʻa ia ko e fehokotaki fakasino taʻetāu maʻataʻatā, ko e makatuʻunga pē ia ʻe taha ʻoku hōifua ai ʻa e ʻOtuá ke fai ha vete mali.

ʻI hono fakatokangaʻi ko e nofo malí ʻoku totonu ko ha fehokotaki taʻengata pea ko e tuʻunga pē ʻeni ʻe taha ke vete aí, naʻe ueʻi ai ʻa e kau ākongá ke nau pehē: “Kapau ko hono anga ia ʻo e tangatá mo hono uaifí, tā ʻoku lelei ke ʻoua ʻe mali.” ʻOku ʻikai ke toe fehuʻia ko ha tokotaha ʻoku fakakaukau ki he nofo malí ʻoku totonu ke fakakaukau mafatukituki ki he tuʻumaʻu ʻa e haʻi ʻo e nofo malí!

Naʻe hoko atu ʻa Sīsū ʻo fakamatala ʻo kau ki he nofo taʻemalí. Naʻá ne fakamatala ko e fānau tangata ʻe niʻihi ʻoku fanauʻi ko e kau ʻiunoke, ʻoku ʻikai ke malava ʻo mali koeʻuhi he ʻoku ʻikai ke tupu honau ʻōkani fakafanaú. Ko e niʻihi kuo ʻai ko ha kau ʻiunoke ʻe he tangatá, kuo fakataʻeʻaongaʻi anga-fakamamahi honau ʻōkani fakafanaú. Fakaʻosí, ko ha niʻihi kuo nau lōmia ʻa e holi ke mali mo fiefia ʻi he fehokotaki fakasinó koeʻuhi kae lava ke nau kau kakato ange kinautolu ki he ngaahi meʻa ʻo fekauʻaki mo e Puleʻanga ʻo hēvaní. “Ko ia ʻokú ne mafai ke tali [ʻa e nofo taʻemalí], ke ne tali,” ko e fakamulituku ia ʻa Sīsuú.

Naʻe kamata leva ʻa e kakaí ke ʻomai kia Sīsū ʻenau fānau iikí. Kae kehe, naʻe tafuluʻi ʻe he kau ākongá ʻa e fānaú mo feinga ke ʻave mamaʻo kinautolu, ʻoku ʻikai ha veiveiua ko e feinga ke maluʻi ʻa Sīsū mei hano fakahohaʻasi noaʻia. Ka naʻe pehē ʻe Sīsū: “Tuku pē ʻa e kau tamaikí ke nau haʻu kiate au; pea ʻoua ʻe taʻofi kinautolu, he ʻoku maʻá e faʻahinga ko iá ʻa e puleʻanga ʻo e ʻOtuá. Ko au ē, ʻoku ou tala atu, Ko ia ʻe ʻikai te ne tali ʻa e puleʻanga ʻo e ʻOtuá ʻo hangē ko ha tamasiʻí, ʻe ʻikai ʻaupito hū ia ki ai.”

Ko ha ngaahi lēsoni lelei ē naʻe ʻomai heni ʻe Sīsuú! Ke maʻu ʻa e Puleʻanga ʻo e ʻOtuá, kuo pau ke tau faʻifaʻitaki ki he anga-fakatōkilalo mo akoʻingofua ʻo e fānau iikí. Ka ko e fakatātā ʻa Sīsuú ʻokú ne toe fakahāhaaʻi ʻa e mahuʻinga tautefito ki he ngaahi mātuʻá, ke vaheʻi ha taimi mo ʻenau fānaú. Naʻe fakahāhā heni ʻe Sīsū ʻa ʻene ʻofa ki he fānau iikí ʻaki ʻene fua mo tāpuakiʻi kinautolu. Mātiu 19:​1-15; Teutalonome 24:1; Luke 16:18; Maake 10:​1-16; Luke 18:​15-17.

▪ Ko e hā ʻa e ngaahi fakakaukau kehekehe ʻa e kau Fālesí ʻo kau ki he vete malí, pea ko ia ai, naʻe anga-fēfē ʻa ʻenau feinga ke ʻahiʻahiʻi ʻa Sīsuú?

▪ Naʻe anga-fēfē hono tali ʻe Sīsū ʻa e feinga ʻa e kau Fālesí ke ʻahiʻahiʻi iá, pea ko e hā naʻá ne fakahā ko e tuʻunga pē ia ʻe taha ki ha vete malí?

▪ Ko e hā naʻe pehē ai ʻe he kau ākonga ʻa Sīsuú ʻoku lelei ange ke ʻoua ʻe malí, pea ko e hā ʻa e fakamatala naʻe fokotuʻu atu ʻe Sīsuú?

▪ Ko e hā ʻoku akoʻi mai kiate kitautolu ʻe Sīsū ʻi heʻene feangainga mo e fānau iikí?