Vahe 23

Ngaahi Mana Lahi Ange ʻi Kāpaneume

ʻI HE Sāpate hili hono ui ʻe Sīsū ʻene ʻuluaki kau ākonga ʻe toko faá​—ʻa Pita, ʻAnitelū, Sēmisi, mo Sioné—naʻa nau ō kotoa ki ha sinakoke ʻi Kāpaneume. Naʻe kamata heni ʻa Sīsū ke faiako ai, pea naʻe ʻohovale ʻa e kakaí koeʻuhi ko ʻene akoʻi kinautolu ʻo taau mo ha tokotaha naʻe maʻu mafai, kae ʻikai ke hangē ko e kau sikalaipé.

ʻI he Sāpate pē ko iá naʻe ʻi ai ha tangata ne uluisino ai ʻa e kau tēmeniō. ʻI he hili ha kiʻi taimi siʻi, naʻá ne kalanga leʻo-lahi: “Ko ho hā kimaua, ʻe Sīsū mei Nasaleti? Kuó ke haʻu ke fakaʻauha kimaua? ʻOku ou ʻilo koe, ko e Tokotaha Tapu ʻo e ʻOtuá.”

Ko hono moʻoní, ko e tēmeniō naʻá ne puleʻi ʻa e tangatá ko e taha ia ʻo e kau ʻāngelo ʻa Sētané. ʻI hono valokiʻi ʻe Sīsū ʻa e tēmenioó, naʻá ne pehē: “Tuku hoʻo leá, pea ke mahuʻi meiate ia.”

Naʻe fakatekeliliʻi ʻe he tēmenioó ʻa e tangatá ni ʻo ne fuʻu kaila leʻo-lahi. Ka naʻe mavahe leva ia mei he tangatá ni ʻo ʻikai ke ne fakalaveaʻi ia. Naʻe ʻohovale lahi ʻa e tokotaha kotoa pē! “Ko e hā ʻeni?” naʻa nau ʻeke. “He naʻa mo e ngaahi faʻahikehé, ʻokú ne kouna pea nau talangofua kiate ia.” Naʻe mafola atu ʻa e ongoongo ʻo kau ki he meʻá ni ʻi he feituʻú takatakai.

ʻI he mavahe atu ʻa Sīsū mo ʻene kau ākongá mei he sinakoké, naʻa nau ʻalu ki he ʻapi ʻo Saimoné, pe ko Pitá. Naʻe puke lahi ai ʻa e faʻē ʻa e uaifi ʻo Pitá ʻo mofi lahi. ‘Kātaki ʻo tokoniʻi ia,’ ko ʻenau kolé ia. Ko ia naʻe ʻalu ʻa Sīsū kiate ia, ʻo puke hono nimá peá ne fokotuʻu hake ia. Naʻe fakamoʻui leva ai ia peá ne kamata ke teuteu ha meʻakai maʻanautolu!

Ki mui mai, ʻi he hili ʻa e tō ʻa e laʻaá, naʻe kamata ke haʻu ʻa e kakai mei he ngaahi feituʻu kehé ki he ʻapi ʻo Pitá mo ʻenau kau mahakí. Naʻe ʻikai ke fuʻu fuoloa kuo fakataha mai ʻa e koló kotoa ki he matapaá! Pea naʻe fakamoʻui ʻe Sīsū ʻenau kau mahakí kotoa, tatau ai pē pe ko e hā ha faʻahinga mahaki. Naʻe aʻu ʻo ne fakatauʻatāinaʻi ʻa kinautolu naʻe uluisino ai ʻa e kau tēmenioó. ʻI he mavahe pē ʻa e kau tēmeniō naʻá ne kapusí, naʻa nau kaila: “Ko koe ko e ʻAlo ʻo e ʻOtuá.” Ka naʻe valokiʻi kinautolu ʻe Sīsū pea naʻe ʻikai te ne tuku ke nau lea koeʻuhi he naʻa nau ʻilo ko e Kalaisí ia. Maake 1:​21-34; Luke 4:​31-41; Mātiu 8:​14-17.

▪ Ko e hā ʻa e meʻa naʻe hoko ʻi he sinakoké he Sāpate ʻi he hili ʻa hono ui ʻe Sīsū ʻene kau ākonga ʻe toko faá?

▪ Naʻe ʻalu ʻa Sīsū ki fē ʻi heʻene mavahe mei he sinakoké, pea ko e hā ʻa e mana naʻá ne fakahoko he feituʻu ko iá?

▪ Ko e hā ʻa e meʻa naʻe hoko ki mui ʻi he pō tatau pē ko iá?