Vahe 81

Ngaahi Toe Feinga ke Tāmateʻi ʻa Sīsū

KOEʻUHI ko e faʻahitaʻu momokó, naʻe fononga atu ʻa Sīsū ʻi he feituʻu malu naʻe ʻiloa ko e falehala ʻo Solomoné. Naʻe tuʻu ʻeni ʻi he tafaʻaki ʻo e temipalé. ʻI hení naʻe kāpui ai ia ʻe he kau Siú pea kamata ke nau pehē: “Ko futu mo hoʻo fakamanganga homau lotó! Kapau ko e Kalaisí koe, pea tala fakapatonu mai.”

“Kuó u tala atu,” ko e tali ia ʻa Sīsuú, “pea ʻoku ʻikai te mou tui ki ai.” Naʻe ʻikai tala fakahangatonu ʻe Sīsū kiate kinautolu ko e Kalaisí ia, ʻo hangē ko ʻene tala ki he fefine Samēliá ʻi he vaikelí. Ka naʻe hangē kuó ne ʻosi fakapapauʻi pe ko hai iá ʻaki ʻene fakamatala kiate kinautolu ko ʻene haʻu ʻaʻana mei he nofoʻanga ʻi ʻolungá pea naʻe ki muʻa ia ʻia ʻĒpalahame.

Kae kehe, naʻe fiemaʻu ʻe Sīsū ʻa e kakaí ke nau fakamoʻoniʻi ʻiate kinautolu pē ko e Kalaisí ia ʻaki ʻenau fakahoa ʻene ngaahi ngāué mo e meʻa naʻe kikiteʻi ʻe he Tohitapú ʻe fakahoko ʻe Kalaisí. Ko hono ʻuhinga ia naʻá ne fekau ai ki heʻene kau ākongá ki muʻa atu ke ʻoua te nau fakahā ki ha taha ko e Kalaisí ia. Pea ko hono ʻuhinga ia naʻá ne hoko atu ai ʻene lea ki he kau Siu fakafili ko ʻení: “Ko e ngaahi ngāue ʻoku ou fai ʻi he huafa ʻo ʻeku Tamaí, ko ia ia ʻoku fakahaaʻi aú. Ka neongo ia, ka ʻoku ʻikai te mou tui.”

Ko e hā naʻe ʻikai te nau tui aí? Koeʻuhi naʻe ʻikai feʻunga ʻa e fakamoʻoni ko Sīsū ko e Kalaisí? ʻIkai, ka naʻe tuʻunga ʻi he ʻuhinga naʻe leaʻaki ʻe Sīsū kiate kinautolú: “ʻOku ʻikai te mou ʻi he fanga sipi ʻaʻatá. Ko ʻete fanga sipi ʻaʻatá ʻoku nau tokanga ki hoto leʻó, pea ʻoku ou ʻilo kinautolu, pea ʻoku nau muimui kiate au. Pea ʻoku ou ʻatu kiate kinautolu ʻa e moʻui taʻengatá, pea ʻe ʻikai ʻaupito te nau ʻauha ʻo lauikuonga, pea ʻe ʻikai hamusi kinautolu ʻe ha taha mei hoku nimá. Ko ʻeku Tamaí, ʻa ia naʻá ne foaki kinautolu kiate aú, ʻoku lahi ia ʻi he meʻa kotoa pē, pea talaʻehai ʻe lava ʻe ha taha ke hamusi mei he nima ʻo e Tamaí.”

Ko ia naʻe fakamatala leva ʻe Sīsū ʻa e vāofi hono vā mo ʻene Tamaí, ʻaki ʻene pehē: “Ko au mo e Tamaí ʻokú ma taha.” Koeʻuhi naʻe ʻi māmani ʻa Sīsū pea naʻe ʻi hēvani ʻa ʻene Tamaí, ʻoku hā mahino naʻe ʻikai ʻuhinga ia ʻokú ne taha fakaesino mo ʻene Tamaí. Ka, naʻá ne ʻuhingá ʻokú na taha ʻi he taumuʻa, ʻa ia ʻokú na faaitaha.

ʻI he ʻita ʻi he ngaahi lea ʻa Sīsuú, naʻe toʻo hake ʻe he kau Siú ha ngaahi foʻi maka ke tāmateʻiʻaki ia, ʻo hangē ko ia naʻa nau fai ki muʻá, he lolotonga ʻa e Kātoanga Fale-Louʻakaú, pe Fakapalepalé. Naʻe fehangahangai loto-toʻa ʻa Sīsū mo kinautolu naʻa nau teu fakapoongi iá, peá ne pehē: “Kuo lahi ʻa e ngaahi ngāue lelei kuó u fakaʻaliʻali kiate kimoutolu mei he Tamaí. Ko e fē ia ʻi he ngaahi ngāue ko iá ʻoku mou fai ke tolongi ai aú?”

“ʻOku ʻikai ko ha ngāue lelei ʻoku mau tolongi ai koé,” ko ʻenau talí ia, “ka ko e lea fieʻotua, ʻosi ko e tangata koe, ka ʻokú ke lau fola, tokua ko e ʻotua koe.” Koeʻuhi naʻe ʻikai teitei taukaveʻi ʻe Sīsū ko ha ʻotua ia, ko e hā hono ʻuhinga naʻe lea pehē ai ʻa e kau Siú?

Ngalingali naʻe tupu ia mei hono ʻai ʻe Sīsū kiate ia ha mafai naʻa nau tui ʻoku ʻi he ʻOtuá maʻataʻatā pē. Ko e fakatātā, naʻe toki ʻosi ʻene lea ʻo fekauʻaki mo e “fanga sipi,” “ʻoku ou ʻatu kiate kinautolu ʻa e moʻui taʻengatá,” ʻa ia ʻoku ʻikai lava ke fai ia ʻe ha tangata. Kae kehe, naʻe ʻikai ke fakatokangaʻi ʻe he kakai Siú ʻa e fakahā ange ʻe Sīsū ko hono mafaí ʻoku mei heʻene Tamaí.

Naʻe taukaveʻi ʻe Sīsū ʻokú ne māʻulalo ange ʻi he ʻOtuá, ʻaki ʻene toe fehuʻi ʻo pehē: “ʻIkai kuo tohi ʻi hoʻomou Laó [ʻia Sāme 82:6] ʻo pehē, ‘Naʻá ku lau: “Ko e ngaahi ʻotua kimoutolu?”’ Kapau naʻá ne lau ko e ‘ngaahi ʻotua’ ʻa kinautolu naʻe hoko ki ai ʻa e folofola ʻa e ʻOtuá, . . . pea ko hoʻomou lau koā ki he tokotaha naʻe fakanofo ʻe he Tamaí, mo fekau ki māmaní, ʻo mou pehē, ‘ʻOkú ke lea fieʻotua,’ koeʻuhiā ko ʻeku pehē, Ko e ʻAlo ʻo e ʻOtuá au?”

Koeʻuhi naʻa mo e kau fakamaau fakaetangata taʻefaitotonú ʻoku ui ʻe he Tohitapú ko e “ngaahi ʻotua,” ko e hā ʻa e hala naʻe lava ke ʻilo ʻe he kau Siu ko ʻení ʻia Sīsū ʻi heʻene pehē, “Ko e ʻAlo ʻo e ʻOtuá au”? Naʻe tānaki atu ʻe Sīsū: “Kapau ʻoku ʻikai te u feia ʻa e ngaahi ngāue ʻa ʻeku Tamaí, pea ʻoua te mou tui kiate au. Ka ʻo kapau ʻoku ou fai ia, pea neongo ʻoku ʻikai te mou tui kiate au, tui pē ā ki he ngaahi ngāué, koeʻuhi ke mou vakai ʻo ʻilo, ʻoku ʻiate au ʻa e Tamaí, mo au ʻoku ou ʻi he Tamaí.”

ʻI he lea ko ʻeni ʻa Sīsuú, naʻe feinga ʻa e kau Siú ke puke ia. Ka naʻá ne hao pē, ʻo hangē pē ko ia naʻá ne fai ki muʻa atu ʻi he Kātoanga Fale-Louʻakaú. Naʻá ne mavahe atu mei Selusalema ʻo fou atu ʻi he Vaitafe Sioataní ki he feituʻu naʻe kamata ai ʻa e papitaiso ʻa Sioné ʻi he meimei taʻu ʻe fā ki muʻá. Ngalingali ko e feituʻu ko ʻení naʻe ʻikai ke mamaʻo ia mei he matātahi fakatonga ʻo e Tahi Kālelí, ʻa ia ko ha fononga nai ʻi ha ʻaho ʻe ua mei Selusalema.

Ko e kakai tokolahi naʻa nau haʻu kia Sīsū ʻi he feituʻu ko ʻení pea nau lea ʻo pehē: “Ko Sione naʻe ʻikai te ne momoʻi fai ha mana ʻe taha, ka ko e ngaahi meʻa naʻe fakahā ʻe Sione ki he tokotahá ni, tā ʻoku moʻoni hono kotoa.” Ko ia naʻe tui ai ʻa e tokolahi kia Sīsū ʻi he feituʻú ni. Sione 10:​22-42; 4:26; 8:​23, 58; Mātiu 16:20.

▪ ʻI he founga fē naʻe fiemaʻu ai ʻe Sīsū ʻa e kakaí ke nau fakapapauʻi ai ia ko e Kalaisí?

▪ ʻOku anga-fēfē ʻa e taha ʻa Sīsū mo ʻene Tamaí?

▪ Ngalingali, ko e hā hono ʻuhinga naʻe pehē ai ʻe he kau Siú naʻe ʻai ʻe Sīsū ia ko ha ʻotua?

▪ Naʻe anga-fēfē hono fakahā ʻe Sīsū mei he Sāmé naʻe ʻikai te ne taukaveʻi ʻokú ne tatau mo e ʻOtuá?