Vahe 83

Talitali ʻe ha Fālesi

NAʻE kei ʻi he ʻapi ʻo ha Fālesi ʻiloa ʻa Sīsū, pea naʻe toki ʻosi ʻene fakamoʻui ai ha tangata naʻe moʻua ʻi he mahaki fufulavai. ʻI he sio ʻa Sīsū ʻoku fili ʻe hono kaungā fakaafé ʻa e ngaahi nofoʻanga muʻomuʻa ʻi he keinangaʻangá, naʻá ne akoʻi ai ha lēsoni ki he anga-fakatōkilaló.

“ʻO ka tala kiate koe ʻe ha taha ke ke ʻalu ki he taʻané,” naʻe fakamatala ʻe Sīsū, “ʻoua naʻá ke nofo hifo ʻi ha nofoʻanga muʻomuʻa tahá, telia naʻa kuo tala ʻe ia ki ha taha ʻoku māʻolunga ange ia ʻiate koe, pea haʻu ia, ʻa ia naʻá ne tala kiate koé mo ia, ʻo ne pehē kiate koe ‘Fakaʻataʻatā ʻeni ki he tangatá ni.’ Pea ke toki mā ai, ʻo ʻalu ki he nofoʻanga māʻulalo tahá.”

Ko ia naʻe fakahinohino ʻe Sīsū: “Ka ʻo ka tala kiate koe, pea ke ʻalu ʻo nofo ʻi he nofoʻanga māʻulaló, koeʻuhi ʻo ka haʻu ia naʻe tala kiate koé, te ne pehē kiate koe, ‘Kāinga, ʻalu koe ki ʻolunga.’ Pea te ke maʻu ʻa e fakamālō ʻi he ʻao ʻo kinautolu ʻoku mou nofo ʻo kaí.” ʻI hono fakaʻosí, naʻe pehē ʻe Sīsū: “He ko ia ia ʻoku hiki hake iá, ʻe fakavaivai ia pea ko ia ʻoku fakavaivai iá, ʻe hakeakiʻi ia.”

Ko hono hokó, naʻe lea ʻa Sīsū ki he Fālesi naʻá ne fakaafeʻi iá peá ne fakamatala ki he anga ʻo hono fai ha fakaafe ʻoku ʻaonga moʻoni ʻi he vakai ʻa e ʻOtuá. “ʻO ka ke ka teuteu ʻa e kai hoʻatā pe ko e kai efiafi, ʻoua naʻá ke ui ki ai ho ngaahi kaumeʻá pe ko ho ngaahi tokouá, pe ko ho ngaahi kāingá, pe ngaahi kaungāʻapi koloaʻiá, telia naʻa nau toe tala kiate koe, pea toe totongi ai kiate koe. Ka ʻo ka ke ka teu ʻa e kātoangá, ui ʻa e kau masivá, mo e heké, mo e ketú, mo e kuí; ʻe fiefia ai ʻa koe, he ʻoku ʻikai te nau faʻa totongi kiate koe.”

Ko hono tokonaki ha kai pehē ki he kau faingataʻaʻiá ʻe ʻomai ai ʻa e fiefia ki he tokotaha ʻokú ne tokonaki iá koeʻuhi ʻo hangē ko ia naʻe fakamatala ʻe Sīsū ki he tokotaha ʻoku ʻaʻana ʻa e fakaafé: “ʻE totongi kiate koe ʻi he toetuʻu ʻa e anga-tonú.” ʻI he fakamatala ʻa Sīsū ki he kaimeʻakai ʻaonga ko ʻení naʻe manatuʻi ai ʻe ha tokotaha ʻo e kau fakaafé ha kaimeʻakai kehe. “ʻE fiefia ia ʻa ia te ne kai mā ʻi he puleʻanga ʻo e ʻOtuá,” ko e lea ia ʻa e tokotaha fakaafé ni. Ka, ʻoku ʻikai fakamahuʻingaʻi ʻe he tokotaha kotoa ʻa e ʻamanaki fakafiefia ko iá, ʻo hangē ko ia ʻoku hoko atu hono fakahā ʻe Sīsū ʻaki ha talanoa fakatātā.

“Tokua naʻe ʻi ai ha tangata naʻá ne teu ha fuʻu tina, ʻo ne tala ki he tokolahi . . . naʻá ne fekau atu ʻene tamaioʻeikí ke fanongonongo kiate kinautolu kuo tala ki aí, ‘Mou ōmi, he kuo ʻosi hono teu.’ Ka naʻe huʻufataha ʻenau talí, ʻo nau lolou kotoa pē. Ko e ʻuluakí naʻá ne pehē ki he tamaioʻeikí, ‘ʻA, kuó u fakatau ha konga kelekele, pea kuo pau ke u ʻalu ʻo vakai ia; ke ke tala ange ke ne fakamolemole au.’ Pea lea ʻe hono uá, ʻo pehē, ‘ʻA, kuó u fakatau ha tauluaʻi pulu ʻe nima, pea ko ʻeku ʻalu ʻeni ke ʻahiʻahi kinautolu; ke ke tala ange ke ne fakamolemole au.’ Pea lea ange ʻe hono tolú, ʻo pehē, ‘ʻA, kuó u maʻu uaifi, pea ko ia ʻe ʻikai te u lava atu.’”

Ko ha kalofanga vaivai ē! ʻOku faʻa vakaiʻi ha konga kelekele pe monumanu ki muʻa ke fai ʻa e fakataú, ko ia naʻe ʻikai ke ʻi ai ha fuʻu fakavave moʻoni ia ke sio ki ai ʻi he hili iá. ʻOku meimei tatau pē, ʻoku ʻikai ke totonu ke taʻofi ʻe he mali ʻa ha taha ʻa ia mei hano tali ha fakaafe mahuʻinga pehē. Ko ia ʻi he fanongo ki he ngaahi kalofanga ko ʻení, naʻe ʻita ʻa e ʻeikí ʻo ne fekau ki heʻene tamaioʻeikí:

“‘ʻAlu ke vave ki he ngaahi hala lalahi mo e ngaahi hala iiki ʻo e koló, pea taki mai ʻa e kau masivá, mo e mamateá, mo e kuí, mo e heké.’ Faifai pea pehē ʻe he tamaioʻeikí, ‘ʻEiki, kuo fai pē ʻa e meʻa naʻá ke tuʻutuʻuni maí, ka ʻoku kei ʻatā pē.’ Pea meʻa ʻe he ʻeikí ki he tamaioʻeikí, ‘ʻAlu ki he ngaahi hala puleʻangá, mo e ngaahi loloʻakaú, pea ʻomi fakamālohi ʻa e kakaí, kehe pē ke fonu hoku ʻapí. . . . ʻE ʻikai ha taha ʻi he kau tangata ko ia naʻe tomuʻa tala ki aí te ne mama ha meʻa ʻi heʻeku kātoangá.’”

Ko e hā ʻa e tuʻunga naʻe fakamatalaʻi ʻi he fakatātaá? Sai, “ko e ʻeiki” ʻokú ne teuteu ʻa e kaimeʻakaí ʻokú ne fakatātaaʻi ʻa e ʻOtua ko Sihová; “ko e tamaioʻeiki” ʻokú ne fai ʻa e fakaafé, ko Sīsū Kalaisi ia; pea ko e “fuʻu tiná,” ko e ngaahi faingamālie ia ke kau ki he Puleʻanga ʻo hēvaní.

Mahulu hake he niʻihi kehe kotoa, ko kinautolu naʻa nau ʻuluaki maʻu ʻa e fakaafe ke kau ki he Puleʻangá, ko e kau taki lotu Siu ʻi he taimi ʻo Sīsuú. Kae kehe, naʻa nau talitekeʻi ʻa e fakaafé. Ko ia, naʻe fai ʻa e fakaafe hono uá ki he faʻahinga taʻetokaʻi mo māʻulalo ʻi he puleʻanga Siú, ʻo kamata tautautefito ʻi he Penitekosi ʻo e 33 T.S. Ka naʻe ʻikai ke tokolahi feʻunga hono talí ke kakato ai ʻa e toko 144,000 ki he Puleʻanga fakahēvani ʻo e ʻOtuá. Ko ia ʻi he 36 T.S., ko e taʻu ia ʻe tolu mo e konga ki mui mai ai, ko e fakaafe hono tolú pea ko e fakaʻosí ia naʻe fakaaʻu ki he faʻahinga taʻekamu ʻikai ko ha Siú, pea ko hono fakatahatahaʻi ʻo e faʻahinga ko iá kuo kei hokohoko mai pē ʻo aʻu mai ki hotau taimí. Luke 14:​1-24.

▪ Ko e hā ʻa e lēsoni ʻi he anga-fakatōkilaló naʻe akoʻi ʻe Sīsuú?

▪ ʻOku anga-fēfē hono malava ke fai ʻe ha tokotaha ha fakaafe ʻe ʻaonga ʻi he vakai ʻa e ʻOtuá, pea ko e hā te ne ʻomai ai kiate ia ʻa e fiefiá?

▪ Ko e hā naʻe vaivai ai ʻa e ngaahi kalofanga ʻa e kau fakaafé?

▪ Ko e hā naʻe fakatātaaʻi ʻe he talanoa fakatātā ʻa Sīsuú ki he “fuʻu tiná”?