Vahe 37

Toʻo Atu ʻe Sīsū ʻa e Mamahi ʻa ha Uitou

ʻI HE hili pē ha taimi siʻi mei hono fakamoʻui ʻa e sevāniti ʻa e ʻōfisá, naʻe mavahe ʻa Sīsū ki Neini, ko ha kolo naʻe ʻi he kilomita ʻe 30 tupu ki he tonga-hihifo ʻo Kāpaneumé. Naʻá ne ʻalu fakataha mo ʻene kau ākongá pea mo ha kakai tokolahi. Naʻe ofi nai ki he efiafi poʻulí ʻi heʻenau fakaaʻuaʻu atu ki he muitolotolo ʻo Neiní. Naʻa nau fetaulaki ai mo ha putu naʻe fakahāʻele mai. Ko e ʻangaʻanga ʻo ha kiʻi tamasiʻi naʻe fata mai ke ʻave ʻo tanu.

Naʻe mātuʻaki fakamamahi ʻa e tuʻunga ʻo e faʻeé, koeʻuhi ko ha uitou ia pea ko ʻene tamá pē ʻeni ʻe taha. ʻI he taimi naʻe mate ai ʻa hono husepānití, naʻá ne malava pē ke maʻu ha fiemālie he naʻe ʻi ai ʻene tamasiʻi. Ko ʻene ngaahi ʻamanakí, ngaahi fiemaʻú, mo e ngaahi taumuʻá naʻe hoko ʻo fakatuʻunga kotoa ʻi he kahaʻu ʻo ʻene tamasiʻí. Ka kuo ʻikai ʻeni ke ʻi ai ha taha ke maʻu mei ai ha fakafiemālie. Naʻe lahi ʻa ʻene loto-mamahí he naʻe fononga fakataha mai mo ia ʻa e kakai ʻo e koló ki he faʻitoká.

ʻI he vakai atu ʻa Sīsū ki he fefiné, naʻe ongo ki hono lotó ʻa ʻene fuʻu loto-mamahí. Ko ia, ʻi he manavaʻofa, ka ʻi he founga tuʻumaʻu ʻoku maʻu ai ʻa e falalá, naʻá ne pehē atu kiate ia: “ʻOua ʻe tangi.” Naʻe tohoaki mai ʻe hono angá mo ʻene ngāué ʻa e tokanga ʻa e fuʻu kakaí. Ko ia ʻi heʻene fakaofi atu ʻo ala ki he meʻa-fata ʻa ē naʻe fata ai ʻa e ʻangaʻangá, naʻe tuʻumaʻu ʻa e kau fatá. Kuo pau pē naʻe fifili ʻa e tokotaha kotoa pē pe ko e hā te ne faí.

ʻOku moʻoni ko e faʻahinga ko ia naʻe ō atu fakataha mo Sīsuú naʻa nau ʻosi sio ki heʻene fakamoʻui fakaemana ʻa e faʻahinga tokolahi naʻe maʻu ʻe he ngaahi mahakí. Ka ʻoku hā mahino naʻe teʻeki ai ʻaupito ke nau sio kiate ia kuó ne fokotuʻu ha taha mei he maté. Te ne lava ke fai ha meʻa pehē? ʻI he lea atu ki he ʻangaʻangá, naʻe fekau atu ʻe Sīsū: “Tama, ʻoku ou tala atu, Ke ke tuʻu!” Pea naʻe tangutu hake ʻa e tamasiʻí! Naʻe kamata ke ne lea, pea naʻe ʻoatu ia ʻe Sīsū ki heʻene faʻeé.

ʻI he sio ʻa e kakaí kuo moʻui moʻoni ʻa e tamasiʻí, naʻa nau kamata ke lea: “Kuo tupu ʻi hotau lotolotongá ha palōfita lahi.” Naʻe pehē ʻe he niʻihi kehe ia: “Kuo fakahanga ʻe he ʻOtuá ʻa ʻene tokangá ki heʻene kakaí.” Naʻe vave ʻa e mafola atu ʻa e ngaahi ongoongo fekauʻaki mo e ngāue fakaofó ni ki Siutea kātoa mo e fonua takatakaí kotoa.

Naʻe kei ʻi pilīsone ʻa Sione Papitaiso, pea naʻá ne fieʻilo lahi ange ʻo kau ki he ngaahi ngāue kuo malava ʻe Sīsū ʻo fakahokó. Naʻe tala ange ʻe he kau ākonga ʻa Sioné kiate ia ʻa e ngaahi maná ni. Ko e hā ʻa ʻene tali ki aí? Luke 7:​11-18.

▪ Ko e hā naʻe hoko ʻi he fakaofi atu ʻa Sīsū ki Neiní?

▪ Naʻe ueʻi fēfē ʻa Sīsū ʻe he meʻa naʻá ne sio ki aí, pea ko e hā naʻá ne faí?

▪ Naʻe anga-fēfē ʻa e tali ʻa e kakaí ki he mana ʻa Sīsuú?