Vahe 82

Toe Huʻu ʻa Sīsū ki Selusalema

NAʻE vave ʻa e toe hoko atu ʻa e fononga ʻa Sīsuú, ʻo faiako mei he kolo ki he kolo pea mei he feituʻu ki he feituʻu. ʻOku hā mahino naʻá ne ʻi he vahefonua ʻo Pēleá, ʻoku fehangahangai mo Siutea ʻi he tafaʻaki ʻe taha ʻo e Vaitafe Sioataní. Ka ko e feituʻu naʻá ne fononga ki aí ko Selusalema.

Ko e ʻilo fakafilōsefa faka-Siu ko ia ʻoku fakangatangata pē ʻa e tokolahi te nau maʻu ʻa e fakamoʻuí ko e meʻa nai ia naʻá ne langaʻi ha tangata ke ne fehuʻi: “ʻEiki, ʻoku tokosiʻi koā ʻa e kakai ʻe fakamoʻuí?” ʻI heʻene talí, naʻe ʻai ai ʻe Sīsū ʻa e kakaí ke fakakaukau ki he meʻa ʻoku fiemaʻu pau ki he fakamoʻuí: “Mou tōtōivi [ʻa ia ko e femātematei, pe feinga mamahi] ke hū ʻi he matapā fāsiʻí.”

Ko e feinga tōtōivi peheé ʻoku fiemaʻu fakavavevave he “ʻoku ai ha tokolahi,” naʻe hoko atu ʻe Sīsū, “te nau feinga ke hū, kae ʻikai te nau lava.” Ko e hā ʻe ʻikai te nau lava aí? Naʻá ne fakamatala ʻo pehē ko e ‘tuʻu hake pē ʻa e tokotaha ʻo e ʻapí ʻo tāpuniʻi ʻa e matapaá pea ko e kakai te nau tuʻu ʻi tuʻá te nau tukituki, mo pehē, “ʻEiki! ke ke toʻo kiate kimautolu,” pea te ne lea atu: “ʻOku ʻikai te u ʻilo pē ko e kakai mei fē kimoutolu. Tuʻu atu meiate au, ʻa kimoutolu kotoa pē ʻa e kau ngāue ʻa taʻetotonu.”’

Ko kinautolu naʻe tāpuniʻi ʻi tuʻá ʻoku hā mahino naʻa nau haʻu pē kinautolu ʻi he taimi naʻe faingamālie pē kiate kinautolú. Ka ʻi he taimi ko iá naʻe tāpuni pea polotaʻi ai ʻa e matapā ia ʻo e faingamālié. Ke hū ki loto, naʻe totonu ke nau haʻu ki muʻa ange, neongo pē kapau naʻe faingatāmaki nai ʻa e taimi ia ko iá ke fai pehē ai. Ko e moʻoni, ko ha ikuʻanga fakamamahi ē ʻoku fakatatali mai kiate kinautolu ʻoku ʻikai te nau ʻai ʻa e lotu kia Sihová ko ʻenau taumuʻa tefito ia ʻi he moʻuí!

Ko e kakai Siú ʻa ia naʻe fekauʻi ʻa Sīsū ke tauhi ki aí, ko e konga lahi tahá, naʻe ʻikai te nau puke honau faingamālie fakaofo ke nau tali ʻa e tokonaki ʻa e ʻOtuá ki he fakamoʻuí. Ko ia naʻe pehē ʻe Sīsū te nau tangi mo fengaiʻitaki honau nifó ʻi hono lī kinautolu ki tuʻá. ʻI he tafaʻaki ʻe tahá, ko e kakai mei “hangahake, mo hangahifo, mo e tokelaú, mo e tongá,” ʻio, mei he puleʻanga kotoa pē, “te nau keinanga ʻi he puleʻanga ʻo e ʻOtuá.”

Naʻe hoko atu ʻe Sīsū: “ʻOku ʻi ai ʻa e niʻihi muimui [faʻahinga ʻikai Siu naʻe taʻetokaʻí, pea pehē pē ki he kau Siu naʻe fakafeʻātungiaʻí] te nau muʻomuʻa, pea ʻoku ʻi ai ʻa e niʻihi muʻomuʻa [ko e kau Siu manakoa fakamatelie mo fakalotú] te nau muimui.” Ko hono ʻuhinga ʻo ʻenau muimuí he ko e faʻahinga fakapikopiko mo taʻehounga peheé ʻe ʻikai ʻaupito te nau ʻi he Puleʻanga ʻo e ʻOtuá.

Naʻe haʻu ʻeni ʻa e kau Fālesí kia Sīsū mo nau pehē: “Ke ke hiki mei he potú ni, ʻo fononga, he ʻoku meʻa ʻa Hēlota [ʻAnitipasa] ke tāmateʻi koe.” Naʻe kamata nai ʻe Hēlota ʻa e lau ko ʻení ke fakatupunga ai ke hola ʻa Sīsū mei he vahefonua ko iá. Naʻe manavahē nai ʻa Hēlota ke toe ʻi ai haʻane fekauʻaki mo e mate ha toe palōfita kehe ʻa e ʻOtuá ʻo hangē ko ʻene kaunga ki he tāmateʻi ʻo Sione Papitaisó. Ka naʻe tala ʻe Sīsū ki he kau Fālesí: “Mou ʻalu ʻo tala ki he fōkisi ko iá, ‘Ko eni, ko e ʻahó ni mo e ʻapongipongi te u fai ai ʻeku kapusi tēmeniō, mo fakaʻosi ʻeku faitoʻó, pea ʻi hono ʻaho tolú peá u ʻosi.’”

ʻI he ʻosi ʻene ngāue aí, naʻe hoko atu ʻe Sīsū ʻene fonongá ʻo huʻu ki Selusalema koeʻuhi, ʻo hangē ko ʻene fakamatalá, “he ʻanefē ia ha tuʻutāmaki ha palōfita ʻo mamaʻo mo Selusalema.” Ko e hā naʻe ʻamanekina ai ʻe tāmateʻi ʻa Sīsū ʻi Selusalemá? Koeʻuhi he ko Selusalema ʻa e kolomuʻá, ʻa ia naʻe tuʻu ai ʻa e fakamaauʻanga lahi Sanetalimi mēmipa ʻe toko 71, pea naʻe fai foki ai mo e feilaulau monumanú. Ko ia ai, naʻe ʻikai ke taau ki he “Lami ʻa e ʻOtuá” ke tāmateʻi ʻi ha feituʻu kehe ka ko Selusalema pē.

“ʻA Selusalema! ʻa Selusalema! ʻa e kolo ʻoku fakapoongi ʻa e kau palōfitá, mo tolongi ʻa e kakai ʻoku talafekau ki aí,” ko e tangilaulau ia ʻa Sīsuú, “hono tuʻo taha ʻeku loto ke tānaki hoʻo fānaú, ʻo hangē ko e tānaki ʻe he motuʻa moá hono fānganga ʻoʻoná ki hono lalo kapakaú, ka naʻe ʻikai te mou loto ki ai! Ko ʻeni kuo motuhi atu kiate kimoutolu ʻa homou falé.” ʻI hono siʻaki ʻa e ʻAlo ʻo e ʻOtuá, naʻe tuʻutuʻuni ai ke fakaʻauha ʻa e kakaí!

ʻI he hoko atu ʻa Sīsū ʻo huʻu ki Selusalemá, naʻe fakaafeʻi ai ia ki ha fale ʻo ha pule ʻo e kau Fālesí. Ko e Sāpate ia, pea naʻe mātuʻaki vakai ofi ʻa e kakaí kiate ia, koeʻuhi he naʻe ʻi ai ha tangata naʻá ne moʻua ʻi he mahaki fufulavai, ko e fuʻu lahi nai ʻa e vai ʻi hono ongo nimá mo e vaʻé. Naʻe lea leva ʻa Sīsū ki he kau Fālesí mo e kau mataotao ʻi he Laó ʻa ia naʻa nau ʻi aí, ʻo ne fehuʻi: “ʻOku ngofua koā ke faitoʻo ʻi he ʻaho Sāpaté, pe ʻikai?”

Naʻe ʻikai leaʻaki ʻe ha taha ha foʻi lea. Ko ia naʻe fakamoʻui ʻe Sīsū ʻa e tangatá ni pea fekau ke ʻalu. Naʻá ne fehuʻi leva: “Tau lau ko ha toko taha ʻiate kimoutolu, pea kuo tō hano foha pe ko haʻane pulu ki ha luo, ʻikai te ne hanga leva ʻo fusi hake neongo ko e ʻaho Sāpate?” Naʻe ʻikai fai ʻe ha taha ha tali. Luke 13:​22–14:6; Sione 1:29.

▪ Ko e hā naʻe fakahā ʻe Sīsū naʻe fiemaʻu ki he fakamoʻuí, pea ko e hā hono ʻuhinga naʻe tāpuniʻi ai ʻa e tokolahi ʻi tuʻá?

▪ Ko hai ʻa e “muimui” naʻe hoko ʻo muʻomuʻá, mo e “muʻomuʻa” naʻe hoko ʻo muimuí?

▪ Ko e hā ʻoku malava nai ai ke pehē naʻe fiemaʻu ʻe Hēlota ke tāmateʻi ʻa Sīsū?

▪ Ko e hā naʻe ʻikai ke taau ai ki ha palōfita ke tāmateʻi ʻi tuʻa mei Selusalemá?