Vahe 55

Tokolahi ʻa e Kau Ākonga Naʻe Tuku ʻEnau Muimui ʻia Sīsuú

NAʻE faiako ʻa Sīsū ʻi ha sinakoke ʻi Kāpaneume ʻo fekauʻaki mo hono tuʻunga ko e mā moʻoni mei he langí. ʻOku hā mahino ko ʻene talanoá ni ko ha fakalahi atu ia ʻo e lāulea naʻe kamata mo e kakaí ʻi heʻenau ʻilo ia ʻi heʻenau foki mai mei he tafaʻaki fakahahake ʻo e Tahi Kālelí, ʻa ia naʻa nau kai ai mei he ngaahi foʻi mā mo e ngaahi mataʻiika naʻe tokonaki fakaemana maí.

Naʻe hoko atu ʻe Sīsū ʻene fakamatalá, ʻo pehē: “Ko e mā foki te u ʻatú ko hoku kakanó ia, koeʻuhiā ko e moʻui ʻa māmaní.” ʻI he taʻu pē ʻe ua ki muʻá, ʻi he faʻahitaʻu failau ʻo e 30 T.S., naʻe tala ai ʻe Sīsū kia Nikotīmasi naʻe ʻofa lahi pehē ʻa e ʻOtuá ki māmani ʻo ne tokonaki mai ai hono ʻAló ko ha Tokotaha-Fakamoʻui. Ko ia, naʻe fakahāhā leva heni ʻe Sīsū ko ha taha pē ʻi he māmani ʻo e faʻahinga ʻo e tangatá te ne kai fakaefakatātā mei hono kakanó, ʻaki ʻene ngāueʻi ʻa e tui ki he feilaulau naʻe tuʻunuku kiate ia ke ne faí, te ne lava ʻo maʻu ʻa e moʻui taʻengatá.

Kae kehe, naʻe tūkia ʻa e kakaí ʻi he ngaahi lea ʻa Sīsuú. “ʻO lava fēfē ʻa e sianá ni ʻo tuku mai hono kakanó ke kai?” ko ʻenau fehuʻí ia. Naʻe fiemaʻu ʻe Sīsū ke mahino ki heʻene kau fanongó ko e kai ko ia mei hono kakanó ʻe fai ia ʻi he founga fakaefakatātā. Ko ia, ke fakamamafaʻi ʻení, naʻá ne leaʻaki ha meʻa naʻe kei taukovi pē kapau ʻe sio ki ai ʻi hono ʻuhinga fakaeleá.

“Kapau kuo ʻikai te mou kai ʻa e kakano ʻo e Fanautama ʻa tangatá mo inu hono taʻataʻá,” ko e tala ia ʻe Sīsuú, “ʻoku ʻikai te mou maʻu moʻui ʻiate kimoutolu. Ko ia ʻokú ne keina hoku kakanó mo inu hoku totó, ʻokú ne maʻu ʻa e moʻui taʻengatá, pea te u fokotuʻu ia ʻi he ʻaho fakamuí. He ko hoku kakanó ko ha kai moʻoni ia, pea ko hoku totó ko ha inu moʻoni. Ko ia ʻokú ne keina hoku kakanó mo inu hoku totó, ʻokú ne nofo maʻu ʻiate au, mo au ʻiate ia.”

Ko e moʻoni, ko e akonaki ʻa Sīsuú ʻe ongo mātuʻaki pango ia ʻo kapau naʻá ne fokotuʻu mai ke fai ha kai-tangata. Ka, ko hono moʻoní, naʻe ʻikai tuʻuaki mai ʻe Sīsū ia ha kai moʻoni ʻo e kakanó pe inu moʻoni ʻo e totó. Naʻá ne fakamamafaʻi pē ko e faʻahinga kotoa te nau maʻu ʻa e moʻui taʻengatá kuo pau ke nau ngāueʻi ʻa e tui ki he feilaulau te ne fai ʻi heʻene foaki atu hono sino fakaetangata haohaoá mo hono lilingi atu hono taʻataʻa moʻuí. Neongo ia, naʻa mo e tokolahi ʻo ʻene kau ākongá naʻe ʻikai te nau feinga ke mahino ʻa ʻene akonakí pea nau taʻeloto ʻo pehē: “Ko e lea fefeka ʻeni; ko hai ʻe kātaki ke fanongo kiate ia?”

ʻI hono ʻilo ʻoku lāungatuʻu ʻa e tokolahi ʻo ʻene kau ākongá, naʻe pehē ʻe Sīsū: “ʻOku mou tūkia ʻi he meʻá ni koā? Hua noa ʻo ka mou ka siofia ʻa e Fanautama ʻa tangatá ʻokú ne ʻalu hake ki he potu naʻá ne ʻi ai ʻi muʻá. . . . Ko e ngaahi lea kuó u fai ʻe au kiate kimoutolú ko e koto laumālie ia mo e koto moʻui. Ka ʻoku ʻi ai homou niʻihi ʻoku ʻikai ke tui.”

Naʻe hoko atu ʻe Sīsū: “Ko hono ʻuhinga ia naʻá ku lea ai kiate kimoutolu ʻo pehē, ʻOku ʻikai lava ʻe ha taha ke haʻu kiate au, ka ʻi hono foaki kiate ia ʻe he Tamaí.” ʻI he meʻa ko iá, naʻe mavahe ai ʻa e tokolahi ʻo ʻene kau ākongá ʻo ʻikai te nau toe muimui ʻiate ia. Ko ia naʻe tafoki hake ai ʻa Sīsū ki heʻene kau ʻaposetolo ʻe toko 12 ʻo ne ʻeke ange: “ʻE ʻikai te mou fie ō mo kimoutolu?”

Naʻe tali ange ʻe Pita: “ʻEiki, te mau ʻalú kia hai? ʻOku ʻiate koe ʻa e ngaahi lea ʻo e moʻui taʻengatá; pea kuo fuoloa ʻemau tui ʻo mau ʻilo ko koe ia ʻa e Tokotaha Tapu ʻo e ʻOtuá.” Ko ha fakahaaʻi lelei ē ʻo e mateakí, neongo naʻe ʻikai nai ke mahino kakato kia Pita mo e kau ʻaposetolo kehé ʻa e meʻa naʻe akoʻi ʻe Sīsū ʻi he meʻá ni!

Neongo naʻe fiemālie ʻi he tali ʻa Pitá, naʻe pehē ʻe Sīsū: “ʻIkai kuó u fili ʻe au ʻa kimoutolu, ʻa e kau hongofulu mā uá? Pea naʻa mo kimoutolu ko homou toko taha ko e tokotaha lauʻikovi.” Naʻá ne lea heni ʻo kau kia Siutasi ʻIsikaliote. Mahalo naʻe fakatokangaʻi ʻe Sīsū ʻi he taimi ko ʻení ʻia Siutasi ha “kamataʻanga,” pe ko ha kamakamata, ʻo ha ʻalunga taʻetotonu.

Naʻe toki ʻosi atu foki ʻa e loto-mamahi ʻa e kakaí ʻia Sīsū ʻi heʻene fakataleʻi ʻa ʻenau feinga ke ʻai ia ko ha tuʻí, pea mahalo naʻa nau fakaʻuhinga ʻo pehē, ‘ʻE lava fēfē ke hoko ʻeni ko e Mīsaia ʻo kapau heʻikai te ne tali ʻa e tuʻunga totonu ʻo e Mīsaiá?’ Ko e meʻá ni foki, ko ha meʻa naʻe kei manatuʻi lelei ʻe he kakaí. Sione 6:​51-71; 3:16.

▪ Ko hai naʻe foaki ki ai ʻe Sīsū ʻa hono kakanó, pea ʻi he ʻuhinga fē ʻe ‘kai ai hono kakanó’ ʻe he faʻahingá ni?

▪ Ko e hā ʻa e toe ngaahi lea ʻa Sīsū naʻe fakaʻohovale ki he kakaí, ka ko e hā naʻá ne fakamamafaʻí?

▪ ʻI he tuku ko ia ʻe he tokolahi ʻenau muimui ʻia Sīsuú, ko e hā ʻa e tali ia ʻa Pitá?