Vahe 87

Tokonaki ki he Kahaʻú ʻAki ʻa e Poto ʻOku ʻAongá

NAʻE toki ʻosi atu ʻa hono fai ʻe Sīsū ʻa e talanoa ʻo kau ki he foha maumau-koloá ki he fuʻu kakai ʻa ia naʻe kau ai mo ʻene kau ākongá, kau tānaki tukuhau taʻefaitotonú mo e kau faiangahala ʻiloa kehe, mo e kau sikalaipé mo e kau Fālesí. Ko ia, ʻi he lea ki heʻene kau ākongá, naʻá ne fai ha talanoa fakatātā ʻo fekauʻaki mo ha tangata koloaʻia ʻa ia naʻá ne maʻu ha ongoongo taʻefakafiemālie ʻo kau ki heʻene pule falé pe setuatá.

Fakatatau kia Sīsū, naʻe ui ʻe he tangata koloaʻiá ʻene setuatá ʻo tala ki ai te ne fakamālōlooʻi ia. “Ko e hā ʻaku ai ʻe fai, he ʻoku toʻo meiate au ʻa e lakanga setuatá ʻe heʻeku ʻeikí?” ko e fifili ia ʻa e setuatá. “ʻOku ʻikai te u mafai ke keli, pea ʻoku ou mā ke moʻui kolekole. ʻA! ʻoku ou ʻilo pē ʻa e meʻa te u fai kae fiemaʻu au ʻe he niʻihi ki hoʻonautolú fale, ʻo ka fakahifo au mei he lakanga setuatá.”

Ko e hā ʻa e palani ʻa e setuatá? Naʻá ne ui ʻa e faʻahinga naʻe moʻua ki heʻene ʻeikí. Naʻá ne ʻeke: “ʻOku fiha ho moʻuá?”

‘Ko e lita lolo ʻolive ʻe 2,200,’ ko e tali ia ʻa e ʻuluakí.

‘ʻAve hoʻo tohi aleapaú peá ke nofo leva ʻo tohi ke 1,100 pē,’ ko ʻene lea ange ia kiate iá.

Naʻá ne ʻeke ange ki ha taha kehe ia: ‘Mo koe foki, ʻoku fiha hoʻoú moʻua?’

Naʻá ne pehē, ‘Ko e lita uite ʻe 22,000.’

‘ʻAve hoʻo tohi aleapaú peá ke tohi ke 18,000 pē.’

Ko e meʻa totonu ki he setuatá ke ne fakasiʻisiʻi ʻa e ngaahi moʻua ki heʻene ʻeikí, koeʻuhi naʻá ne kei puleʻi pē ʻa e ngaahi meʻa fakapaʻanga ʻa ʻene ʻeikí. ʻI heʻene fakasiʻisiʻi ʻa hono lahi ʻo e ngaahi moʻuá, naʻá ne ʻai ai ke ne kaumeʻa mo kinautolu te nau malava ke fai mai ha ngaahi lelei kiate ia ʻi he mole ʻo ʻene ngāué.

Naʻe maongo ki heʻene ʻeikí ʻi heʻene fanongo ki he meʻa kuo hokó. Ko hono moʻoní, naʻá ne “fakaongoongoleleiʻi ʻa e setuatá, neongo ʻene taʻefaitotonú, koeʻuhi naʻá ne ngāueʻaki ʻa e fakapotopoto ʻoku ʻaongá.” Naʻe tānaki atu ʻe Sīsū: “Ko e fānau ʻo e fokotuʻutuʻu ko ʻení, ʻi he fai mo hoʻonautolú faʻahinga, ʻoku ngali poto ange kinautolu ʻi ha founga ʻoku ʻaonga ʻi he fānau ʻa e māmá.”

ʻI hono fakahā ʻa e taumuʻá ki heʻene kau ākongá, naʻe fakalototoʻaʻi ʻe Sīsū: “Mou ngāueʻaki ʻa e koloa taʻemāʻoniʻoní ke ngaohi ai ha ngaahi kaumeʻa, koeʻuhi ʻo ka taʻeʻaonga ia, pea nau fiemaʻu nai kimoutolu ki he ngaahi nofoʻanga taʻengatá.”

Naʻe ʻikai ke fakaongoongoleleiʻi ʻe Sīsū ʻa e matāpulé ʻi heʻene taʻefaitotonú ka ki heʻene sio-mamaʻo, fakapotopoto ʻoku ʻaongá. ʻOku faʻa hoko ʻa e “fānau ʻo e fokotuʻutuʻu ko ʻení” ʻo nau ngāue-fakapotopoto-ʻaki ʻenau paʻangá pe tuʻungá ke fakakaumeʻa ai mo kinautolu te nau malava ke fai mai ha ngaahi lelei kiate kinautolú. Ko ia ko e kau sevāniti ʻa e ʻOtuá, “ko e fānau ʻa e māmá,” ʻoku fiemaʻu foki kiate kinautolu ke ngāueʻaki ʻa e ngaahi meʻa fakamatelie ʻanautolú, ko ʻenau “koloa taʻemāʻoniʻoní,” ʻi ha founga fakapotopoto ke ʻaonga ai kiate kinautolu.

Ka ʻo hangē ko e lea ʻa Sīsuú, ʻoku totonu ke nau fakakaumeʻaʻaki ʻa e ngaahi koloa ko ʻení mo kinautolu te nau tali nai kinautolu ki he “ngaahi nofoʻanga taʻengatá.” Ki he kau mēmipa ʻo e fanga sipi toko siʻí, ko e ngaahi feituʻu ko ʻení ʻoku ʻi hēvani; ki he fanga sipi kehé, ʻoku ʻi he māmani Palataisí. Koeʻuhi ko e ʻOtua ko Sihová mo hono ʻAló pē ʻe lava ke na tali ʻa e kakaí ki he ongo feituʻu ko ʻení, ʻoku totonu ke tau tōtōivi ke fakatupu ʻa e kaumeʻa mo kinauá ʻaki hono ngāueʻaki ha ngaahi “koloa taʻemāʻoniʻoni” pē ʻoku tau maʻu nai ke poupouʻiʻaki ʻa e ngaahi meʻa mahuʻinga ʻo e Puleʻangá. Pea, ʻi he taʻeʻaonga pe ʻauha ʻa e koloa fakamatelié, ʻo hangē ko ia kuo pau ke hokó, ʻe fakapapauʻi hotau kahaʻu taʻengatá.

Naʻe hoko atu ʻe Sīsū ʻo ne pehē ko e faʻahinga ʻoku anga-tonu ʻi he tokanga naʻa mo e ngaahi meʻa fakamatelie, pe ngaahi meʻa mahuʻinga siʻi taha ko ʻení, te nau anga-tonu foki ʻi hono tauhi ʻa e ngaahi meʻa ʻoku mahuʻinga lahi angé. “ʻIo,” naʻá ne hoko atu, “kapau kuo ʻikai te mou anga-tonu, ʻi he fai ki he koloa taʻemāʻoniʻoní, ko hai te ne falala kiate kimoutolu ʻo ʻoatu ʻa e koloa moʻoní [ʻa ia, ko e ngaahi meʻa fakalaumālie, pe ngaahi meʻa mahuʻinga ʻo e Puleʻangá]? Pea kapau kuo ʻikai te mou anga-tonu ʻi he ngāueʻaki ʻa e koloa ʻa ha taha kehe [ko e ngaahi meʻa mahuʻinga ʻo e Puleʻangá ʻa ia ʻoku tuku ʻe he ʻOtuá ki heʻene kau sevānití], ko hai ʻe ʻoatu hoʻomou koloa ʻamoutolú [ko e pale ʻo e moʻui ʻi he ngaahi nofoʻanga taʻengatá]?”

ʻOku ʻikai ke malava ke tau hoko ko e kau sevāniti moʻoni ʻa e ʻOtuá pea ʻi he taimi tatau pē ke tau hoko ko e kau sevāniti ki he koloa taʻemāʻoniʻoní, koloa fakamatelié, ʻo hangē ko ia naʻe fakaʻosiʻaki ʻe Sīsuú: “ʻOku ʻikai ke lava ʻe ha tamaioʻeiki ke ʻeikiʻaki ha ʻeiki ʻe toko ua; he te ne fehiʻa ki he taha, kae ʻofaʻi ʻa e taha, pea te ne piki ki he taha, kae taʻetokaʻi ʻa e taha. ʻOku ʻikai te mou lava ke ʻeikiʻaki ʻa e ʻOtuá pea mo e koloá, fakatouʻosi.” Luke 15:​1, 2; 16:1-13; Sione 10:16.

▪ ʻI he talanoa fakatātā ʻa Sīsuú, naʻe anga-fēfē ʻa e fakakaumeʻa ʻa e setuatá kiate kinautolu te nau malava ke tokoni mai kiate ia ʻamui angé?

▪ Ko e hā ʻa e “koloa taʻemāʻoniʻoní,” pea ʻe anga-fēfē ʻa e malava ke tau fakakaumeʻaʻaki kinautolú?

▪ Ko hai ʻe lava ke ne tali kitautolu ki he “ngaahi nofoʻanga taʻengatá,” pea ko e ngaahi feituʻu fē ʻeni?