Vahe 22

Ui ʻa e Kau Ākonga ʻe Toko Fā

ʻI HE hili ʻa e feinga fakapō naʻe fai ki he moʻui ʻa Sīsuú ʻi hono kolo ko Nasaletí, naʻá ne ʻalu leva ki he kolo ko Kāpaneume ʻo ofi ki he Tahi Kālelí. Ko e fakahoko ʻeni ʻo ha toe kikite ʻe taha ʻa ʻAisea. Ko e kikite ia naʻe pehē ko e kakai ʻo Kāleli ʻa ia ʻoku nofo ofi ki he tahí te nau sio ki ha maama lahi.

ʻI he hoko atu heni ʻe Sīsū ʻa ʻene ngāue ko hono tapua atu ʻa e māmá ʻi hono malangaʻi ʻo e Puleʻangá, naʻá ne kumi ʻo ʻilo ai heni ʻa e toko fā ʻo ʻene kau ākongá. Naʻa nau fononga fakataha mo ia ki muʻa ka naʻa nau toe foki pē ki heʻenau ngāue fakatoutaí ʻi heʻenau foki mai mo Sīsū mei Siuteá. ʻOku hā ngalingali naʻe fekumi leva ʻa Sīsū kiate kinautolu, koeʻuhi naʻe hoko ʻa e taimi ke ne maʻu ʻa e kau tokoni fakakaukau pau, mo tuʻumaʻu ʻa ia naʻe malava ke ne akoʻi ke nau fakahoko ʻa e ngāue fakafaifekaú ʻi he hili ʻene ʻalú.

Ko ia ʻi he lue lalo ʻa Sīsū he matātahí ʻo ne sio kia Saimone Pita mo hono takangá ʻoku nau fō honau ngaahi kupengá, naʻá ne ʻalu atu kiate kinautolu. Naʻá ne heka ʻi he vaka ʻo Pitá ʻo ne kole kiate ia ke tukutuku atu mei ʻuta. ʻI heʻenau kiʻi mamaʻo atú, ne nofo hifo leva ʻa Sīsū ʻi he vaká pea kamata ʻene faiako ki he kakai naʻe ʻi he matātahí.

ʻI he hili iá, naʻe pehē ʻe Sīsū kia Pita: “Tuku atu ki he moaná, pea ʻaʻau homou ngaahi kupengá ki ha ika.”

“ʻEiki,” ko e tali ia ʻa Pitá, “ko e pō kātoa mo ʻemau fakaongosia, ʻo ʻikai maʻu ha mataʻi ika, ka ʻi hoʻo meʻá te u ʻaʻau pē ʻa e kupengá.”

ʻI hono tuku hifo ʻo e ngaahi kupengá, naʻe fuʻu lahi fau ʻa e ika ne maʻú pea kamata ke mahae ʻa e ngaahi kupengá. Naʻe fakavavevave ʻa e taʻalo ʻa e kau tangatá ki honau kaungātoutai ʻi ha vaka ʻe taha naʻe ofi mai ke haʻu ʻo tokoni. Naʻe ʻikai ke fuʻu fuoloa kuo fonu ʻaupito ʻa e ongo vaká fakatouʻosi ʻi he iká ʻo na kamata ngoto. ʻI he sio ʻa Pita ki he meʻá ni, naʻe fakatōmapeʻe atu ia kia Sīsū mo ne pehē: “Meʻa atu, ʻEiki, . . . he ko e tangata angahala au.”

“Oua ʻe manavahē,” ko e tali ia ʻa Sīsuú. “Mei he taimí ni te ke pō tangata.”

Naʻe fakaafeʻi foki ʻe Sīsū mo e tokoua ʻo Pitá, ko ʻAnitelū. “Mo ōmi ʻo muimui ʻiate au,” ko ʻene naʻinaʻi ia kiate kinauá, “pea te u ngaohi kimoua ko e ongo toutai tangata.” Naʻe fai ʻa e fakaafe tatau ki hona kaungātoutai ko Sēmisi mo Sione, ko e ongo foha ʻo Sēpetí, pea naʻá na toe tali foki ʻeni ʻo ʻikai toumoua. Ko ia ko e toko fā ko ʻení naʻa nau liʻaki ʻenau ngāue toutaí pea nau hoko ko e ʻuluaki toko fā ʻo e kau muimui fakakaukau pau mo tuʻumaʻu ʻo Sīsū. Luke 5:​1-11; Mātiu 4:​13-22; Maake 1:​16-20; Aisea 9:​1, 2.

▪ Ko e hā naʻe ui ai ʻe Sīsū ʻene kau ākongá ke muimui ʻiate iá, pea ko hai ʻa kinautolu ko iá?

▪ Ko e hā ʻa e mana naʻá ne fakailifiaʻi ʻa Pitá?

▪ Ko e hā ʻa e faʻahinga toutai naʻe fakaafeʻi ʻe Sīsū ʻa ʻene kau ākongá ke nau faí?