Vahe 42

Valokiʻi ʻe Sīsū ʻa e Kau Fālesí

KAPAU naʻe faiʻaki ʻa e mālohi ʻo Sētané ʻa ʻene kapusi tēmenioó, ko e fakakikihi ia ʻa Sīsuú, tā naʻe fai pē ʻe Sētane ʻa e meʻa ʻoku fepaki mo ia tonu. “Kehe pē ke mou lau ʻoku lelei ʻa e ʻakaú mo lelei hono fuá,” naʻá ne hoko atu, “pe te mou lau ʻoku kovi ʻa e akaú mo kovi hono fuá; he ko hono fuá ʻoku ʻilonga ai ʻa e ʻakaú.”

ʻOku ngalivale ke tukuakiʻi ʻo pehē ko e fua lelei ko ia ko hono kapusi ʻo e kau tēmenioó ko e ola ia ʻo hono tauhi ʻe Sīsū ʻa Sētané. Kapau ʻoku lelei ʻa e fuá, heʻikai lava ke pehē ʻoku kovi ʻa e fuʻu ʻakaú. ʻI he tafaʻaki ʻe tahá, ko e fua kovi ʻa e kau Fālesí ko ʻenau ngaahi tukuakiʻi ngalivale mo fakafepaki taʻeʻuhinga kia Sīsuú ko e fakamoʻoni ia naʻa nau kovi. “ʻA e hakoʻi ngata fekai,” ko e kalanga ia ʻa Sīsuú, “te mou lava fēfē ke leaʻaki ʻa e ngaahi meʻa ʻoku leleí, ka ko e faʻahinga ʻoku kovi? He ko e talanoa ʻa e ngutú ʻoku mei he meʻa ʻi he lotó ʻoku hulu atu.”

Koeʻuhi ko ʻetau ngaahi leá ʻokú ne fakahaaʻi mai ʻa e tuʻunga ʻo hotau lotó, ko e meʻa ʻoku tau leaʻakí ʻokú ne tokonaki mai ai ha makatuʻunga ki he faifakamāú. “ʻOku ou tala atu,” naʻe pehē ʻe Sīsū, “neongo ko ha foʻi lea papūnoa ʻa e kakaí, ka te nau fakamatala ki ai ʻi he ʻAho Fakamāú; he ko hoʻo ngaahi leá ʻe makatuʻunga ai hoʻo tonuhiá, pea ko hoʻo ngaahi leá ʻe makatuʻunga ai hoʻo halaiá.”

Neongo ʻa e ngaahi ngāue fakaofo kotoa ʻa Sīsuú, naʻe kole ʻa e kau sikalaipé mo e kau Fālesí: “Faiako, ʻoku mau fiemaʻu meiate koe ha fakaʻilonga ke mau sio ki ai.” Neongo ko e kau tangata makehe ko ʻeni mei Selusalemá naʻe ʻikai nai te nau sio tonu heʻene ngaahi maná, naʻe ʻi ai ha fakamoʻoni sio tonu taʻealafakaʻikaiʻi fekauʻaki mo e ngaahi maná. Ko ia ai, naʻe tala ʻe Sīsū ki he kau taki Siú: “Ko ha toʻutangata faikovi ia, mo ha toʻutangata alafia kae feʻauaki, ʻoku tangi ki ha fakaʻilonga, ka ʻoku ʻikai ha fakaʻilonga ʻe ʻange ki ai, ngata pē ʻi he fakaʻilonga ʻo Siona ko e palōfitá.”

ʻI he fakamatala ki he meʻa naʻá ne ʻuhinga ki aí, naʻe hoko atu ʻa Sīsū: “ʻOku hangē ko e ʻi he kete ʻo e fuʻu iká ʻa Sioná, ʻo ʻaho tolu mo pō tolú, pehē ʻe ʻi lolofonua ʻa e Fanautama ʻa tangatá, ʻo ʻaho tolu mo pō tolu.” ʻI he hili ʻa hono folo ia ʻe he fuʻu iká, naʻe haʻu ki tuʻa ʻa Siona ʻo hangē pē naʻe toetuʻú, ko ia naʻe tala ki muʻa ʻe Sīsū te ne pekia pea ʻi he ʻaho hono tolú ʻe fokotuʻu moʻui mai ia. Ka, naʻe fakataleʻi ʻe he kau taki Siú ia ʻa e “fakaʻilonga ʻo Sioná,” neongo ʻa e taimi ki mui naʻe toetuʻu ai ʻa Sīsuú.

Ko ia naʻe pehē ʻe Sīsū ko e kau tangata ko ia ʻo Ninive naʻe fakatomala ʻi he malanga ʻa Sioná ʻe fokotuʻu hake ʻi he fakamāú ke fakahalaiaʻi ʻa e kau Siu naʻa nau fakataleʻi ʻa Sīsuú. ʻI he tuʻunga meimei tatau, naʻá ne fai ha fakafehoanaki mo e kuini ʻo Sipá, ʻa ia naʻá ne haʻu mei he ngataʻanga ʻo e māmaní ke fanongo ki he poto ʻo Solomoné pea naʻe ofo ʻi he meʻa naʻá ne mātaá mo fanongoá. “Kae vakai!” ko e lea ia ʻa Sīsuú, “ʻoku ʻi heni ha meʻa ʻoku lahi ʻia Solomone.”

Naʻe fai leva ʻe Sīsū ha talanoa fakatātā fekauʻaki mo ha tangata naʻe ʻalu ki tuʻa mei ai ha laumālie ʻuli. Kae kehe, naʻe ʻikai ke fakafonu ʻe he tangatá ʻa ʻene ʻatā ko iá ʻaki ha ngaahi meʻa lelei, ko ia ai, naʻe uluisino ai ha toe ngaahi laumālie ʻuli ʻe fitu. “ʻE pehē pē foki ki he toʻutangata faikoví ni,” ko e lea ia ʻa Sīsuú. Naʻe fakamaʻaʻi pea naʻe hokosia ha ngaahi fakafoʻou ʻe he puleʻanga ʻIsilelí​—hangē pē ko e mavahe fakataimi ʻa ha laumālie ʻulí. Ka ʻi hono fakataleʻi ʻe he puleʻangá ʻa e kau palōfita ʻa e ʻOtuá, ʻo tumutumuʻaki ʻene fakafepakiʻi ʻa Kalaisí tonu, naʻe fakahaaʻi ai ʻa hono tuʻunga fulikivanú ʻo kovi ange ia ʻi hono tuʻunga ʻi he kamataʻangá.

ʻI he lolotonga ʻa e kei lea ʻa Sīsuú, naʻe aʻu mai ʻa ʻene faʻeé mo hono ngaahi tokouá ʻo nau tuʻu mai pē ʻo ofi ki he fuʻu kakaí. Naʻe pehē leva ʻe ha taha: “ʻE, ko hoʻo faʻeé mo ho ngaahi tokouá ʻoku nau tutuʻu mei tuʻa, ʻoku nau fie lea kiate koe.”

“Ko hai ia ʻeku faʻeé, pea ko hai ia ʻa hoku ngaahi tokouá?” ko e fehuʻi ia ʻa Sīsuú. Naʻe mafao atu hono nimá ki heʻene kau ākongá, ʻo ne pehē: “Ko eni ia ʻeku faʻeé mo hoku ngaahi tokouá! He ka ʻilonga ʻa ia ʻokú ne fai ʻa e finangalo ʻo ʻeku Tamai ʻoku ʻi Hēvaní, ko ia ia ʻa hoku tokouá, mo hoku tuofefiné, mo ʻeku faʻeé.” Naʻe fakahāhā ʻe Sīsū ʻi he foungá ni ʻe tatau ai pē pe ko e hā hono lahi ʻo e ʻofeina ʻa e ngaahi haʻi ʻokú ne fepikitaki ai ki hono ngaahi kāingá, ʻoku kei ʻofeina lahi ange ʻa hono vahaʻangatae mo ʻene kau ākongá. Mātiu 12:​33-50; Maake 3:​31-35; Luke 8:​19-21.

▪ Naʻe anga-fēfē ʻa e ʻikai malava ʻe he kau Fālesí ke ʻai fakatouʻosi ʻa e fuʻu “ʻakaú” pea mo e “fuá” ke leleí?

▪ Ko e hā ʻa e “fakaʻilonga ʻo Sioná,” pea naʻe anga-fēfē hono fakataleʻi ia ki mui maí?

▪ Naʻe anga-fēfē ʻa e hangē ʻa e puleʻanga ʻIsileli ʻo e ʻuluaki senitulí ko e tangata naʻe ʻalu ki tuʻa mei ai ha laumālie ʻulí?

▪ Naʻe anga-fēfē ʻa hono fakamamafaʻi ʻe Sīsū ʻa hono vahaʻangatae vāofi mo ʻene kau ākongá?