Si‘i Fanga Tokoua mo e Fanga Tuofāfine:

‘I he senituli hono fitu K.M., na‘e ‘oange ai ki he palōfita ko ‘Isikelí ha vīsone fakaofo. Na‘á ne sio ki ha fu‘u saliote kāfakafa, ‘a ia ko ha saliote fakalangi ‘oku pule‘i ‘e he Hau ‘o e ‘univēsí. Ko e me‘a ‘oku fakato‘oaloto taha ai ‘a e saliote ko ení ko e anga ‘o ‘ene nga‘unú. Na‘á ne nga‘unu ‘i he vave ‘o hangē ko e tapa ‘a e ‘uhilá, na‘a mo e taimi ‘oku liliu ai ‘a hono ‘alungá—‘oku lava ke ne fai ia ‘o ‘ikai māmālie hifo pe na‘a mo e taimi ‘oku tafoki aí!—‘Isi. 1:4, 9, 12, 14, 16-27.

‘Oku fakamanatu mai kiate kitautolu ‘e he vīsone ko ení ko e konga fakalangi ‘o e kautaha fakae‘univeesi ‘a Sihová ‘oku nga‘unu ma‘u pē. Fēfē ‘a e konga fakaemāmaní? Kuo fakahaa‘i mā‘ala‘ala ‘i he ta‘u fakangāue kuo ‘osí hono hanga ‘e Sihova ‘o ‘ai ke nga‘unu foki mo ‘ene kakai fokotu‘utu‘u maau ‘i he māmaní ‘i ha founga fakaofo!

‘I heni ‘i ‘Amelika, kuo femo‘uekina ai ‘a e ngaahi mēmipa ‘o e fāmili Pētelí ‘i he‘enau fetukutuku mei Brooklyn ki he ‘ulu‘i ‘apitanga fo‘ou ‘i māmaní ‘oku tu‘u ‘i Warwick, Niu ‘Ioke, pea pehē ki he ngaahi fale kehé pea ki he mala‘e malangá. ‘Oku pehē pē mo e femo‘uekina ‘a e kau Pēteli ‘i he ngaahi va‘a ‘e ni‘ihi takatakai ‘i he māmaní ‘i he ngāue langá, ngaahi fakalelei‘í, fakataha‘i pe hiki ki ha ngaahi feitu‘u fo‘ou. Fēfē koe? Neongo kapau kuo ‘ikai ke ke femo‘uekina ‘i ha fe‘unu‘aki, ‘oku ‘ikai ha veiveiua ‘okú ke fe‘unu‘aki ‘i ha ngaahi founga kehe.

‘Oku maongo ‘aupito pea fakalototo‘a ki he Kulupu Pulé ‘enau sio ki he kakai ‘a e ‘Otuá takatakai ‘i he māmaní ‘oku nau femo‘uekina ange he taimí ni ‘i ha toe taimi ‘i he‘enau hanganaki laka fakataha mo e kautaha ‘a Sihová. Kuo hiki ‘a e tokolahi ‘o ngāue ‘i he feitu‘u ‘oku lahi ange ai ‘a e fiema‘ú. Kuo hiki ‘a e ni‘ihi ki ha tafa‘aki fo‘ou ‘o e ngāué, ‘o hangē ko e mala‘e ngāue lea mulí. Ko e tokolahi kuo nau ‘ahi‘ahi‘i ha founga faifakamo‘oni na‘e fo‘ou mo ‘ikai ke nau anga ki ai. Ko e toe tokolahi kuo nau fakalahi atu ‘enau ngāué ‘i ha toe ngaahi founga kehe. Pea ko e kotoa ‘o e kau Kalisitiane faitōnungá, ‘o kau ai ‘a e kau ta‘umotu‘á mo e kau mahamahakí ‘oku nau lele mateaki ‘i he lova ki he mo‘uí—‘i he hokohoko atu ‘enau hiki holo ‘i he ngāue ‘a Sihová ‘o nau tokoni ai ke fakahaa‘i ko Sētané ko ha tokotaha loi!—1 Kol. 9:24.

Fakapapau‘i ko e laumālie ‘okú ke fakahāhaá ‘oku ‘ikai ke ta‘efakatokanga‘i ‘e Sihova. (Hep. 6:10) Ko ho‘o fakakaukau loto-leleí ‘okú ne ‘ai kimautolu ke mau fakakaukau ai kia ‘Ēpalahame mo Sela. ‘I he ta‘u 70 ‘a ‘Ēpalahamé, na‘á ne mavahe ai mei he kolo Kalitia ko ‘Uá ‘o ne tataki hono fāmilí ki he fonua mama‘o ko Kenaní, ‘a ia na‘á ne nofo tēniti ai ‘i he toenga ‘o e ta‘u ‘e teau tupu ‘ene mo‘uí. He laumālie loto-lelei ē na‘á ne fakahāhā fakataha mo hono uaifi ‘ofa‘angá!—Sēn. 11:31; Ngā. 7:2, 3.

‘Okú ke fakahāhā ‘a e laumālie ko iá? Ko kimoutolu kotoa ‘oku mou  kātaki faitōnunga ‘i he ngaahi taimi faingata‘a ko ení, ‘oku mou fai ‘a e me‘a na‘e tala mai ‘e Sīsū ke tau faí. Na‘á ne pehē: “Ko ia ai, mou ō ‘o ngaohi ko e kau ākonga ‘a e kakai ‘o e ngaahi pule‘anga kotoa pē, ‘o papitaiso kinautolu ‘i he huafa ‘o e Tamaí mo e ‘Aló mo e laumālie mā‘oni‘oní.”—Māt. 28:19.

Neongo ‘oku ngāue‘aki ‘e Sīsū ‘a e fo‘i lea “ō” ‘oku fokotu‘u mai ai kuo pau ke tau nga‘unu mo longomo‘ui. He hounga‘ia ē ko kitautolu ‘i hono ‘ilo‘i ‘a e lahi ‘o e me‘a kuo fakahoko ‘e he kau muimui faivelenga ‘o Kalaisí lolotonga ‘o e ta‘u kuo ‘osí! ‘Oku faingofua ke sio ki he to‘ukupu māfimafi ‘o Sihová ‘i he‘ene tāpuaki‘i ‘a e ngāue ko hono talaki ‘a e ongoongo lelei ‘o e Pule‘angá ki he ngaahi pule‘angá kotoa.—Mk. 13:10.

‘Oku tali ‘e he tokolahi ‘a e pōpoakí. Ko e tumutumu ‘o e kau malanga ‘i he ta‘u ko eni na‘e toki ‘osí na‘e toko 8,340,847, pea faka‘avalisi ki he ngaahi Ako Tohi Tapu ‘e 10,115,264 ‘i he māhina taki taha. ‘Oku hā mahino ai, ‘oku nga‘unu ‘a e saliote fakalangí, pea mo koe foki! Hokohoko atu ho‘o ngāue leleí ‘i he toe si‘i ko eni ‘o e taimi ‘oku toé ki mu‘a ke tāpuni ‘e Sihova ‘a e matapā ‘o e fakamo‘uí.

He fe‘ungamālie ē ko ‘etau konga tohi fakata‘u ki he 2017 ‘oku pehē ‘Falala kia Sihova, ‘o fai lelei’! (Saame 37:3) ‘I he taimi ‘okú ke talangofua ai ki he ngaahi lea ko ení, ‘o fai lelei ‘a e ngāue toputapu kia Sihová, ‘okú ke fakahāhā ai ho‘o falala kiate iá. Kātaki manatu‘i ma‘u pē ‘oku ‘ikai ke ke tokotaha. Ko e ngaahi lea ‘a Sīsuú ‘e mo‘oni ma‘u pē: “Vakai, ‘oku ou ‘iate kimoutolu ‘i he ‘aho kotoa pē ‘o a‘u ki he faka‘osi‘osi ‘o e fokotu‘utu‘u lolotongá.”—Māt. 28:20.

Hoko ‘o fakapapau‘i ‘e hokohoko atu hono hanga ‘e Sihova ‘o tāpuaki‘i koe ‘i ho‘o ngāue faitōnungá. Tatau ai pē pe ‘oku si‘isi‘i pe lahi ho‘o tokoní, ko e me‘a ‘oku mahu‘inga kia Sihová ‘oku hā mei ai ‘a ho‘o fai ho lelei tahá pea foaki ‘i he fakaue‘iloto totonu. Ko e ngaahi me‘a‘ofa peheé ‘oku maongo ia ki hono lotó pea ‘okú ne hōifua ai. (2 Kol. 9:6, 7) Ko ia hokohoko atu ‘i he ‘unu‘unu ofi ki ho‘o Tamai ‘ofá fakafou ‘i he lotu ma‘u pē, ako ‘a e Folofola ‘a e ‘Otuá, ma‘u ‘a e ngaahi fakataha faka-Kalisitiané pea kau longomo‘ui ‘i he ngāue fakafaifekaú.

Koe‘uhí ‘oku “toe si‘i pē” ‘a e taimi ki he Tēvoló, ‘oku fakapapau‘i ai ‘e he tokotaha angatu‘u fulikivanu ko ení ke ne ngāue‘aki ‘a e me‘a kotoa pē ‘okú ne ma‘ú ke fakatafoki‘i kitautolu mei ‘alunga ‘o ‘etau hanganaki tu‘uma‘u ‘i he‘etau tauhi anga-tonu kia Sihová. (Fkh. 12:12) Nofo ofi kia Sihova, pea he‘ikai ke lavame‘a ai ‘a e feinga kotoa pē ‘a e Tēvoló. (Saame 16:8) Kātaki ‘o ‘ilo‘i ‘oku mau ‘ofa lahi atu kiate kimoutolu mo hounga‘ia ‘i ho‘omou tokoni ki hono tokanga‘i ‘a e ngaahi me‘a ‘o e Pule‘anga ‘o e ‘Eikí ‘i he ngaahi ‘aho faka‘osi ko ení.

Mei homou fanga tokoua,

Kulupu Pule ‘o e Kau Fakamo‘oni ‘a Sihová