Vahe Taha Valu

“ʻOku ʻIkai Te Nau ʻo Māmani”

1. (a) Ki muʻa ʻi heʻene pekiá, ko e hā naʻe lotu ki ai ʻa Sīsū koeʻuhi ko ʻene kau ākongá? (e) Ko e hā ʻoku mātuʻaki mahuʻinga ai ke “ʻikai . . . ʻo māmani”?

 ʻI HE pō ki muʻa ʻi hono fakapōngí, naʻe lotu ai ʻa Sīsū koeʻuhi ko ʻene kau ākongá. ʻI heʻene ʻilo ʻe tuku atu kinautolu ki he malumalu ʻo e tenge lahi fakaʻulia meia Sētane, naʻe pehē ai ʻe Sīsū ki heʻene Tamaí: “ʻOku ʻikai te u pehē, ke ke toʻo kinautolu mei māmani, ka ke ke taʻofi kinautolu mei he Fili. ʻOku ʻikai te nau ʻo māmani, hange ko au, ʻoku ʻikai te u ʻo māmani.” (Sione 17:15, 16) Ko e hā ʻoku mātuʻaki mahuʻinga ai ʻa e mavahe mei he māmaní? Koeʻuhi ko Sētane ʻa e pule ʻo e māmaní. Ko e kau Kalisitiané ʻe ʻikai te nau fie hoko ko e konga ʻo ha māmani ʻoku ʻi he malumalu ʻo ʻene pulé.​—Luke 4:5-8; Sione 14:30; 1 Sione 5:19.

2. ʻI he ngaahi founga fē naʻe ʻikai ʻo māmani ai ʻa Sīsuú?

² Ko e hoko ʻo ʻikai ʻo māmaní naʻe ʻikai ʻuhinga ia naʻe ʻikai ʻofa ʻa Sīsū ki he niʻihi kehé. Ko hono kehé, naʻá ne fakamoʻui ʻe ia ʻa e mahamahakí, fokotuʻu ʻa e maté, pea akoʻi ʻa e kakaí fekauʻaki mo e Puleʻanga ʻo e ʻOtuá. Naʻe aʻu ʻo ne foaki ʻene moʻuí maʻá e faʻahinga ʻo e tangatá. Ka naʻe ʻikai te ne saiʻia ʻi he ngaahi fakakaukau mo e ngaahi tōʻonga taʻefakaʻotua ʻa e faʻahinga ko ia naʻa nau fakahāhā ʻa e laumālie ʻo e māmani ʻo Sētané. Ko ia ai, naʻá ne fakatokanga fekauʻaki mo e ngaahi meʻa hangē ko e ngaahi holi taʻetāú, ko ha founga moʻui fakamatelie, pea mo e havala ki he tuʻu-ki-muʻá. (Mātiu 5:27, 28; 6:19-21; Luke 20:46, 47) ʻOku ʻikai leva ha ofo ai, naʻe toe fakaʻehiʻehi ʻa Sīsū mei he ngaahi meʻa fakapolitikale ʻo e māmaní. Neongo ko ha Siu ia, naʻe ʻikai te ne kau ki ha faʻahi ʻi he ngaahi fekīhiaki fakapolitikale ʻi he vahaʻa ʻo Loma mo e kau Siú.

 “Oku Ikai o Mamani Hoku Buleaga”

3. (a) Ko e hā ʻa e tukuakiʻi fekauʻaki mo Sīsū naʻe fai ʻe he kau taki lotu Siú kia Pailató, pea ko e hā hono ʻuhingá? (e) Ko e hā ʻokú ne fakahā naʻe ʻikai fie hoko ʻa Sīsū ia ko ha tuʻi fakaetangata?

³ Fakakaukau atu ki he meʻa naʻe hoko ʻi he taimi naʻe fekauʻi atu ai ʻe he kau taki lotu Siú ke puke ʻa Sīsū pea ʻave kia Ponitō Pailato, ko e kōvana Lomá. Ko hono moʻoní, naʻe hohaʻa ʻa e kau taki ko iá koeʻuhí he kuo fakaeʻa ʻe Sīsū ʻenau mālualoí. Ke fakalotoʻi ʻa e kōvaná ke fai ha meʻa fekauʻaki mo Sīsuú, naʻa nau tukuakiʻi ia ʻo pehē: “Naʻa mau ʻilo ʻa e siana ni ʻoku ne veuveuki homau kakai, mo ne taʻofi ʻa e fai tukuhau kia Sisa, mo ne pehe ko Kingi Kalaisi ia.” (Luke 23:2) ʻOku hā mahino, ko e loi eni he ʻi he taʻu ʻe taha ki muʻa atu ʻi he taimi naʻe loto ai ʻa e kakaí ke fakanofo tuʻi ʻa Sīsuú, naʻá ne fakafisingaʻi ia. (Sione 6:15) Naʻá ne ʻilo te ne toki hoko ko ha Tuʻi fakahēvani ʻi he kahaʻú. (Luke 19:11, 12) Pehē foki, ʻe toki fakanofo tuʻi ia, ʻikai ʻe ha tangata, ka ʻe Sihova.

4. Ko e hā ʻa e vakai ʻa Sīsū fekauʻaki mo hono totongi ʻo e ngaahi tukuhaú?

⁴ ʻI he ʻaho ʻe tolu ki muʻa pē pea puke ʻa Sīsuú, naʻe feinga ʻa e kau Fālesí ke leaʻaki ʻe Sīsū ha faʻahinga meʻa ʻe fakahalaiaʻi ai ia fekauʻaki mo e totongi ʻo e ngaahi tukuhaú. Ka naʻá ne pehē ʻe ia: “Fakahā mai ha foʻi paʻanga [ko ha paʻanga Loma]. Ko e fofonga mo e hingoa ʻo hai ʻoku ʻi ai?” ʻI heʻenau pehē “ʻO Sisa,” naʻá ne tali: “ʻAua; peʻi ʻange kia Sisa ʻa e ngaahi meʻa ʻa Sisa, pea ki he ʻOtua ʻa e ngaahi meʻa ʻa e ʻOtua.”​—Luke 20:20-25.

5. (a) Ko e hā ʻa e lēsoni naʻe akoʻi ʻe Sīsū ki heʻene kau ākongá ʻi he taimi naʻe puke ai iá? (e) Naʻe anga-fēfē hono fakamatalaʻi ʻe Sīsū ʻa e ʻuhinga ʻo e meʻa naʻá ne faí? (f) Ko e hā ʻa e ikuʻanga ʻo e fakamaau ko iá?

⁵ ʻIkai, naʻe ʻikai akoʻi ʻe Sīsū ia ʻa e angatuʻu ki he ngaahi mafai fakaemāmaní. ʻI he taimi naʻe omi ai ʻa e kau sōtiá mo e kau tangata kehe ke puke ʻa Sīsuú, naʻe unuhi hake ʻe Pita ʻene heletaá ʻo taaʻiʻaki ʻa e taha ʻo e kau tangatá, ʻo motu hono telinga  ʻe taha. Ka naʻe pehē ʻe Sīsū: “Fakafoki hoʻo heletā ki hono tuʻunga: he ʻilonga kinautolu ʻoku ala ki he heletā te nau mate heletā.” (Mātiu 26:51, 52) ʻI he ʻaho hono hokó naʻe fakamatalaʻi ange ʻe Sīsū ʻa e meʻa naʻá ne faí kia Pailato, ʻo ne pehē: “Oku ikai o mamani hoku buleaga; ka ne o mamani hoku buleaga, behe, e tau hoku kakai, ke oua naa atu au ki he kakai Jiu.” (Sione 18:36, PM) Naʻe fakamoʻoni ʻe Pailato naʻe “ikai . . . ilo ha kovi” fekauʻaki mo Sīsū. Ka ʻi heʻene tukulolo ki he tenge mei he fuʻu kakaí, naʻe fekauʻi ai ʻe Pailato ke tutuki ʻa Sīsū.​—Luke 23:13-15; Sione 19:12-16.

Muimui ʻa e Kau Ākongá ʻi he Taki ʻa Sīsuú

6. Naʻe anga-fēfē hono fakahāhā ʻe he muʻaki kau Kalisitiané naʻa nau fakaʻehiʻehi mei he laumālie ʻo e māmaní ka naʻa nau ʻofa ki he kakaí?

⁶ Naʻe mahino ai ki he kau ākonga ʻa Sīsuú ʻa e meʻa ʻoku fiemaʻu ki he hoko ʻo ʻikai ʻo e māmaní. Naʻe ʻuhinga ia ko e fakaʻehiʻehi mei he laumālie mo e ngaahi tōʻonga taʻefakaʻotua ʻo e māmaní, ʻa ia naʻe kau ai ʻa e fakafiefia anga-fakamālohi mo taʻetaau ʻi he ngaahi fale sipoti mo e ngaahi fale faiva Lomá. ʻI he meʻa ko iá, naʻe ui ai ʻa e kau ākongá ko e kau fehiʻa ki haʻa tangata. Kae mamaʻo mei haʻanau fehiʻa ki honau kaungātangatá, naʻa nau ngāue mālohi kinautolu ke tokoniʻi ʻa e niʻihi kehé ke nau maʻu ʻaonga mei he ngaahi tokonaki ʻa e ʻOtuá ki he fakamoʻuí.

7. (a) Koeʻuhi ko e ʻikai te nau ʻo e māmaní, ko e hā naʻe hokosia ʻe he muʻaki kau ākongá? (e) Naʻe anga-fēfē ʻenau vakai ki he kau pule fakapolitikalé mo hono totongi ʻo e ngaahi tukuhaú, pea ko e hā hono ʻuhingá?

⁷ Ko e kau muimui ʻo Sīsuú naʻe fakatangaʻi pē ʻo hangē ko iá, ʻo meimei ko e fai ʻe he kau ʻofisa fakapuleʻanga naʻe takihalaʻi. Neongo ia, ʻi he 56 T.S. nai, naʻe tohi ai ʻa e ʻapositolo ko Paulá ki he kau Kalisitiane ʻi Lomá, ʻo ekinaki kia kinautolu ke nau “anganofo . . . ki he ngaahi pule ʻoku maʻolunga [pule fakapolitikalé]: he ʻoku ʻikai ha pule, ka ʻoku mei he ʻOtua pe.” ʻOku ʻikai ko e fokotuʻu ia ʻe Sihova ʻa e ngaahi puleʻanga fakamāmaní, ka ʻokú ne fakaʻatā pē ke nau ʻi ai kae ʻoua kuo pule  tokotaha hono Puleʻangá ʻi he kotoa ʻo e māmaní. ʻI he tuʻunga feʻungamālie, naʻe akonekina ai ʻe Paula ʻa e kau Kalisitiané ke nau ʻapasia ki he kau ʻōfisa fakamāmaní pea totongi mo e ngaahi tukuhaú.​—Loma 13:1-7; Taitusi 3:1, 2. 

8. (a) Ko e hā hono lahi ʻe anganofo ai ʻa e Kalisitiané ki he ngaahi mafai māʻolungá? (e) Naʻe anga-fēfē muimui ʻa e muʻaki kau Kalisitiané ki he faʻifaʻitakiʻanga ʻa Sīsuú?

⁸ Kae kehe, ko e anganofo ki he kau pule fakapolitikalé ʻe faituʻunga, ʻo ʻikai fakaʻaufuli. ʻI he taimi ʻoku fepaki ai ʻa e ngaahi lao ʻa Sihová mo e ngaahi lao ʻa e tangatá, ko e faʻahinga ko ia ʻoku nau tauhi kia Sihová ʻoku fiemaʻu ke nau talangofua ki Heʻene ngaahi laó. Fakatokangaʻi ʻa e lau ʻa e tohi On the Road to Civilization​—A World History fekauʻaki mo e muʻaki kau Kalisitiané: “Naʻe fakafisi ʻa e kau Kalisitiané ke kau ʻi he ngaahi fatongia ʻe niʻihi ʻo e tangataʻifonua Lomá. Ko e kau Kalisitiané . . . naʻa nau ongoʻi ko ha maumauʻi ia ʻo ʻenau tuí ke kau atu ʻi he ngāue fakakautaú. ʻE ʻikai te nau ngāue ʻi ha lakanga fakapolitikale. ʻE ʻikai te nau lotu ki he ʻemipolá.” ʻI he taimi naʻe “matuʻaki fekau” ai ʻe he fakamaauʻanga lahi faka-Siú ʻa e kau ākongá ke tuku ʻenau malangá, naʻa nau tali: “ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Ngāue 5:27-29.

9. (a) Ko e hā naʻe fai ai ʻe he kau Kalisitiane ʻi Selusalemá ʻa e meʻa naʻa nau fai ʻi he 66 T.S.? (e) ʻI he founga fē ʻoku hoko ai ia ko ha sīpinga mahuʻinga?

⁹ Fekauʻaki mo e ngaahi fekīhiaki fakapolitikalé mo e fakakautaú, naʻe tauhi maʻu ʻe he kau ākongá ʻa e mātuʻaki tuʻuʻatā. ʻI he 66 T.S., naʻe angatuʻu ai ʻa e kau Siu ʻi Siuteá kia Sisa. Naʻe takatakaiʻi vave ai ʻe he kau Lomá ʻa Selusalema. Ko e hā naʻe fai ʻe he kau Kalisitiane ʻi he koló? Naʻa nau manatuʻi ʻa e akonaki ko ia ʻa Sīsū ke nau hola mei he koló. ʻI he taimi naʻe holomui fakataimi ai ʻa e kau Lomá, naʻe hola leva ʻa e kau Kalisitiané ʻo kolosi atu ʻi he Vaitafe Sioataní ki he feituʻu moʻungaʻia ʻo Pelá. (Luke 21:20-24) Ko ʻenau tuʻuʻataá ʻoku hoko ia ko ha sīpinga ki he kau Kalisitiane faitōnunga ki muí.

 Tuʻuʻatā ʻa e Kalisitiané ʻi he Ngaahi ʻAho Fakaʻosí Ni

10. (a) Ko e hā ʻa e ngāue ʻoku femoʻuekina maʻu pē ki ai ʻa e Kau Fakamoʻoni ʻa Sihová, pea ko e hā hono ʻuhingá? (e) Fekauʻaki mo e hā ʻoku nau tuʻuʻatā mei aí?

¹⁰ ʻOku fakahā ʻe he lēkooti fakahisitōliá ʻoku ʻi ai ha kulupu ʻi he ngaahi ʻaho fakaʻosi ko ení kuo nau tuli ke mātuʻaki tuʻuʻatā ko e faʻifaʻitaki ki he muʻaki kau Kalisitiané? ʻIo, kuo fai pehē ʻa e Kau Fakamoʻoni ʻa Sihová. ʻI he lolotonga kotoa ʻo e vahaʻa taimi ko ení, kuo nau malangaʻi maʻu pē ʻa e Puleʻanga ʻo e ʻOtuá ko e founga pē ia ʻe taha ʻe ʻomi ai ʻa e melino, tuʻumālie, mo e fiefia tuʻuloa ki he kau ʻofa ki he māʻoniʻoní. (Mātiu 24:14) Ka ʻi he fekauʻaki mo e fekīhiaki ʻi he haʻohaʻonga ʻo e ngaahi puleʻangá, kuo nau tauhi maʻu ʻa e mātuʻaki tuʻuʻatā.

11. (a) ʻOku anga-fēfē ʻa e kehe ʻa e tuʻuʻatā ʻa e Kau Fakamoʻoní mei he ngaahi tōʻonga ʻa haʻa faifekaú? (e) Ko e hā ʻa e vakai ʻoku maʻu ʻe he Kau Fakamoʻoni ʻa Sihová felāveʻi mo e meʻa ʻoku fai ʻe he niʻihi kehé fekauʻaki mo e politikí?

¹¹ ʻI he tuʻunga mātuʻaki kehe ʻaupito, ko e haʻa faifekau ʻo e ngaahi lotu ʻo e māmani ko ení kuo nau kau ʻaupito kinautolu ʻi he ngaahi meʻa fakapolitikalé. ʻI he ngaahi fonua ʻe niʻihi, kuo nau kau longomoʻui kinautolu ʻi he feinga pe feʻauhi kanititeití. ʻOku aʻu ʻo maʻu ʻe he kau faifekau ʻe niʻihi ʻa e lakanga fakapolitikale. Kuo tenge ʻe he niʻihi ʻa e kau politikí ke nau saiʻia ʻi he ngaahi polokalama ʻoku saiʻia ai ʻa haʻa faifekaú. Kae kehe, ko e Kau Fakamoʻoni ʻa Sihová ʻoku ʻikai ke nau kaunoa kinautolu ʻi he ngaahi meʻa fakapolitikalé. Pea hala ke nau kaunoa ʻi he ngaahi meʻa ʻoku fai ʻe he niʻihi kehé fekauʻaki mo haʻanau kau atu ʻi ha faʻahi fakapolitikale, kanititeiti ki ha lakanga fakapolitikale, pe ko e fili fakafofonga ʻi he ngaahi filí. Naʻe pehē ʻe Sīsū ko ʻene kau ākongá ʻe ʻikai te nau ʻo e māmaní, ko ia ko e Kau Fakamoʻoni ʻa Sihová ʻoku ʻikai ke nau kau ki ha faʻahi ʻi he meʻa fakapolitikalé.

12. Ko e hā kuo iku ki ai koeʻuhi ko e ngaahi lotu ʻo e māmani ko ení ʻoku ʻikai ke nau tuʻuʻatā?

¹² Hangē ko ia naʻe tomuʻa tala ʻe Sīsuú, kuo toutou kau  atu ʻa e ngaahi puleʻangá ki he taú. Naʻa mo e ngaahi faʻahi ʻi loto ʻi he ngaahi puleʻangá ʻoku nau toe fetauʻaki pē. (Mātiu 24:3, 6, 7) Ko e kau taki fakalotú kuo nau meimei faʻa poupou ki ha puleʻanga pe faʻahi ʻe taha ʻo fakafepaki ki he taha ko ē, ʻo fakaʻaiʻai honau kau muimuí ke nau fai ʻa e meʻa tatau. Ko e olá? Ko e ngaahi mēmipa ʻi he lotu tatau ʻoku nau toe fetāmateʻaki pē ʻi he taú koeʻuhi ko e ngaahi faikehekehe ʻi he tangataʻifonuá pe matakalí. ʻOku fepaki eni ia mo e finangalo ʻo e ʻOtuá.​—1 Sione 3:10-12; 4:8, 20.

13. Ko e hā ʻoku fakahā ʻe he ngaahi foʻi moʻoní ʻo fekauʻaki mo e tuʻuʻatā ʻa e Kau Fakamoʻoni ʻa Sihová?

¹³ Kae kehe, kuo mātuʻaki tuʻuʻatā ʻa e Kau Fakamoʻoni ʻa Sihová ʻi he ngaahi fepaki kotoa pē. ʻOku pehē ʻe he The Watchtower ʻo Nōvema 1, 1939: “Ko e faʻahinga kotoa ʻoku nau kau ki he tafaʻaki ʻa e ʻEikí ke nau tuʻuʻatā fekauʻaki mo e ngaahi puleʻanga ʻoku taú.” Ko e Kau Fakamoʻoni ʻa Sihova ʻi he ngaahi puleʻanga kotoa pē pea ʻi he malumalu ʻo e ngaahi tuʻunga kotoa pē ʻoku nau hokohoko atu ke pikimaʻu ki he tuʻunga ko ení. ʻOku ʻikai ke nau fakaʻatā ʻa e ngaahi tuʻunga māvahevahe fakapolitikale mo e ngaahi tau ʻo e māmaní ke ne motuhi honau tuʻunga fetokouaʻaki fakavahaʻapuleʻangá. ʻOku nau “tuki huo ʻaki ʻenau ngaahi heleta, mo e ngaahi hele ʻauhani ʻaki honau ngaahi tao.” ʻI heʻenau tuʻuʻataá, ʻoku ʻikai ai ke nau kei ako tau.​—Aisea 2:3, 4; 2 Kolinito 10:3, 4.

14. Koeʻuhi ko hono tauhi maʻu ʻa e tuʻu mavahe mei he māmaní, ko e hā kuo hokosia ʻe he Kau Fakamoʻoni ʻa Sihová?

¹⁴ Ko e hā ha ola ʻe taha ʻo ʻenau tuʻuʻataá? Naʻe pehē ʻe Sīsū: “Ko e meʻa ʻi he ʻikai ʻo māmani ʻa kimoutolu . . . ʻoku fehiʻa ai ʻa māmani kiate kimoutolu.” (Sione 15:19) Kuo tokolahi ʻa e Kau Fakamoʻoni ʻa Sihova kuo tuku pilīsone koeʻuhí ko ʻenau hoko ko e kau sevāniti ʻa e ʻOtuá. Kuo fakamamahiʻi ʻa e niʻihi, ʻo aʻu ʻo tāmateʻi, ʻo hangē ko ia ko e meʻa naʻe hoko ki he kau Kalisitiane ʻo e ʻuluaki senitulí. ʻOku hoko ʻa e meʻá ni koeʻuhí  ko Sētane, ʻa e “ʻotua ʻo e tuʻu ko eni,” ʻokú ne fakafepakiʻi ʻa e kau sevāniti ʻa Sihová, ʻa ia ʻoku ʻikai te nau ʻo e tuʻu ko ení.​—2 Kolinito 4:4; Fakahā 12:12.

15. (a) Ko e hā ʻoku laka kotoa ki ai ʻa e ngaahi puleʻangá, pea ko e hā ʻa e meʻa ʻoku tokanga ʻa e Kau Fakamoʻoni ʻa Sihová ke fakaʻehiʻehi mei aí? (e) Ko e hā ko ha meʻa mafatukituki ai ʻa e mavahe mei he māmaní?

¹⁵ ʻOku fiefia ʻa e kau sevāniti ʻa Sihová he ʻoku ʻikai te nau ʻo e māmaní, he ko e kotoa ʻo hono ngaahi puleʻangá ʻoku nau laka atu ki honau ngataʻangá ʻi ʻĀmaketone. (Taniela 2:44; Fakahā 16:14, 16; 19:11-21) Te tau kalofi ʻa e nunuʻa ko iá koeʻuhi ʻoku tau tuʻu mavahe mei he māmaní. ʻI he tuʻunga ko e kakai fāʻūtaha ʻi he māmaní kotoa, ʻoku tau mateaki ai ki he Puleʻanga fakahēvani ʻo e ʻOtuá. Ko e moʻoni, ʻi he hoko ʻo ʻikai ʻo e māmaní, ʻoku tau fakaeʻa ai kitautolu ki heʻene lumá mo ʻene fakatangá. Neongo ia, ʻoku vavé ni ke ngata ia, koeʻuhi ko e māmani kovi lolotongá ni ʻi he malumalu ʻo Sētané ʻe fakaʻauha taʻengata ia. ʻI he tafaʻaki ʻe tahá, ko e faʻahinga ko ia ʻoku nau tauhi kia Sihová te nau moʻui taʻengata ʻi heʻene māmani foʻou māʻoniʻoni ʻi he malumalu ʻo e Puleʻanga ʻo e ʻOtuá.​—2 Pita 3:10-13; 1 Sione 2:15-17.

Fetalanoaʻaki Fakamanatu

• Naʻe anga-fēfē hono fakahā ʻe Sīsū ʻa e meʻa ʻoku kau ʻi he hoko ʻo “ʻikai . . . ʻo māmani”?

• Ko e hā ʻa e vakai ʻa e muʻaki kau Kalisitiané fekauʻaki mo e (a) laumālie ʻo e māmaní, (e) kau pule fakaemāmaní, pea mo e (f) totongi ʻo e ngaahi tukuhaú?

• ʻI he ngaahi founga fē kuo ʻoatu ai ʻe he Kau Fakamoʻoni ʻa Sihova ʻi onopōní ha fakamoʻoni ʻo ʻenau tuʻuʻatā faka-Kalisitiané?

[Fehuʻi ki he Ako]

 [Fakatātā ʻi he peesi 165]

Naʻe fakamatalaʻi ʻe Sīsū ko ia mo hono kau muimuí naʻe ‘ʻikai te nau ʻo māmani’