Vahe Ua Taha

Aʻusia ʻe he Taumuʻa ʻa Sihová ʻa e Lavameʻa Lāngilangiʻia

1, 2. (a) Ko e hā ʻa e taumuʻa ʻa Sihova fekauʻaki mo ʻene ngaahi meʻamoʻui ʻatamai potó? (e) Ko hai naʻe fakakau ʻi he fāmili fāʻūtaha ʻo e kau lotu ʻa e ʻOtuá?

 ʻOKU fāʻūtaha ʻa e meʻamoʻui ʻatamai poto kotoa pē ʻi he lotu ki he ʻOtua moʻoni pē tahá pea ʻoku nau maʻu kotoa ʻa e tauʻatāina lāngilangiʻia ko e fānau ʻa e ʻOtuá​​—ko e taumuʻa anga-ʻofa ia ʻa Sihová. Ko e toe meʻa foki ia ʻoku holi fakamātoato ki ai ʻa e kau ʻofa ki he māʻoniʻoní.

² Naʻe kamata ke fakahoko ʻe Sihova ʻa e taumuʻa maʻongoʻonga ko ení ʻi he taimi naʻe kamata ai ʻene ngaahi ngāue fakaefakatupú. Ko ʻene ʻuluaki fakatupú ko ha ʻAlo ʻa ia naʻe talu hono fokotuʻu mei he maté mo ʻene “ulo atu [ko e] langilangi [ʻo e ʻOtuá], mo e imisi ʻo ʻEne ʻAfio moʻoni.” (Hepelu 1:1-3) Ko e ʻAlo ko ení naʻe makehe, he naʻe fakatupu ia ʻe he ʻOtuá tokotaha pē. Hili iá, ʻe toki fakafou mai ʻi he ʻAlo ko ení ʻa e hoko mai ʻo ʻi ai ʻa e ngaahi meʻa kehe kotoa pē: ʻuluakí ko e kau ʻāngelo ʻi hēvaní, pea toki faʻahinga ʻo e tangatá ʻi māmaní. (Siope 38:7; Luke 3:38) ʻOku faʻu ʻaki ʻa e faʻahinga kotoa ko ení ʻa e fāmili fakaeʻuniveesi pē taha. Ki he kotoa ʻo kinautolú, naʻe ʻOtua ʻa Sihova, ko e Hau Fakalevelevá, pea ko ʻenau Tamai anga-ʻofá.

3. (a) Ko e hā kuo tau maʻu tukufakaholo mei heʻetau ʻuluaki ongo mātuʻá? (e) Ko e hā ʻa e tokonaki anga-ʻofa naʻe fai ʻe Sihova maʻá e fānau ʻa ʻĀtamá?

³ ʻI he taimi naʻe fakahalaiaʻi ai ʻetau ʻuluaki ongo mātuʻá ki he maté ko e ongo angahala loto-fiefai, naʻe kapusi leva kinaua mei ʻĪteni pea siʻaki ʻe he ʻOtuá. Naʻe ʻikai te na kei  hoko ko ha konga ʻo hono fāmili fakaeʻunivēsí. (Senesi 3:22-24; Teutalonome 32:4, 5) Ko kitautolu kotoa ko hona hako, ko ia ai kuo fanauʻi mai kitautolu fakataha mo e ngaahi hehema angahalaʻia. Ka naʻe ʻafioʻi ʻe Sihova ko e niʻihi mei he haʻohaʻonga ʻo e ngaahi hako ʻo ʻĀtama mo ʻIví te nau ʻofa ki he māʻoniʻoní. Ko ia naʻá ne anga-ʻofa ai ʻo fai ha tokonaki koeʻuhi ke malava ai ʻa e faʻahingá ni ʻo aʻusia “ʻa e tauʻatāina lāngilangiʻia ʻo e fānau ʻa e ʻOtuá.”​—Loma 8:20, 21, NW.

Mole mei ʻIsileli ʻa e Tuʻunga Fakahōifua

4. Ko e hā ʻa e monū naʻe fakaaʻu ʻe Sihova ki ʻIsileli ʻo e kuonga muʻá?

⁴ Hili ha taʻu nai ʻe 2,500 mei hono fakatupu ʻo ʻĀtamá, naʻe fakaaʻu atu ʻe Sihova ki he faʻahinga ʻe niʻihi ʻo e tangatá ʻa e monū ko hono maʻu ha vahaʻangatae makehe mo Ia. Naʻá ne fili ʻa ʻIsileli ʻo e kuonga muʻá ke hoko ko hono kakai pea ʻoange kia kinautolu ʻene Laó. (Senesi 12:1, 2) Naʻá ne fokotuʻu kinautolu ki ha puleʻanga pea ngāueʻaki kinautolu felāveʻi mo ʻene taumuʻá. (Teutalonome 14:1, 2; Aisea 43:1) Kae kehe, naʻa nau kei haʻisia pē ki he angahalá mo e maté, ko ia naʻe ʻikai ke nau maʻu ʻa e tauʻatāina lāngilangiʻia naʻe muʻaki maʻu ʻe ʻĀtama mo ʻIví.

5. Naʻe anga-fēfē mole mei he kau ʻIsilelí honau tuʻunga makehe mo e ʻOtuá?

⁵ Kae kehe, naʻe maʻu ʻe ʻIsileli ha tuʻunga fakahōifua mo e ʻOtuá. Naʻa nau toe maʻu foki ʻa e fatongia ke ʻapasia kia Sihova ko ʻenau Tamaí pea ke ngāue ʻo fehoanaki mo ʻene taumuʻá. Naʻe fakamamafaʻi ʻe Sīsū ʻa e mahuʻinga ʻo ʻenau fakahoko ʻa e ngafa ko iá. (Mātiu 5:43-48) Kae kehe, naʻe taʻemalava ʻa e puleʻanga ʻIsilelí ke fai ʻa e meʻá ni. Lolotonga naʻe taukaveʻi ʻe he kau Siu ko iá, “ʻoku taha pē ʻemau tamai, ko e ʻOtua,” naʻe fakahā ʻe Sīsū ia ko ʻenau ngaahi tōʻongá mo e laumālie naʻa nau fakahāhaá naʻá ne fakahalaʻi ʻa e taukaveʻi ko iá. (Sione 8:41, 44, 47) ʻI he 33 T.S., naʻe fakangata ai ʻe he ʻOtuá ʻa e Laó, pea naʻe ngata ai ʻa e vahaʻangatae makehe ʻo ʻIsileli mo iá. Ka naʻe ʻuhinga ení ʻe ʻikai ʻaupito toe  malava ke maʻu ʻe he kakaí ha vahaʻangatae fakahōifua mo e ʻOtuá?

Fakatahatahaʻi “ʻa e Ngaahi Meʻa ʻi Hēvani”

6. Ko e hā ʻa e taumuʻa ʻo e “founga puleʻi” ʻoku lave ki ai ʻa Paula ʻi he Efeso 1:9, 10?

⁶ Naʻe fakahaaʻi ʻe he ʻapositolo ko Paulá ʻe malava ke maʻu ʻe he niʻihi ʻi he haʻohaʻonga ʻo e faʻahinga ʻo e tangatá ha vahaʻangatae makehe mo e ʻOtuá. Ko e fakatātaá, fekauʻaki mo e fokotuʻutuʻu ko ia ʻa Sihova ko e faʻahinga te nau ngāueʻi ʻa e tuí ʻe lava ke nau hoko nai ko e ngaahi mēmipa ʻo Hono kau nofoʻangá, naʻe tohi ʻe Paula: “[Ko e ʻOtuá] naʻá ne fakaʻilo mai kiate kitautolu ʻa e fakalilolilo toputapu ʻo hono finangaló. ʻOku fakatatau ia ki heʻene loto-lelei ʻa ia naʻá ne fakataumuʻa ʻiate ia pē ha founga puleʻi ʻi he kakato ʻo e taimi kuo kotofá, koeʻuhi ke toe fakatahatahaʻi ʻa e ngaahi meʻa kotoa pē ʻia Kalaisi, ʻa e ngaahi meʻa ʻi hēvani mo e ngaahi meʻa ʻi māmani.” (Efeso 1:9, 10, NW) Ko e “founga puleʻi” ko ení ʻoku fakatefito ia ʻia Sīsū Kalaisi. Fakafou ʻiate ia, ʻoku ʻomi ai ʻa e faʻahinga ʻo e tangatá ki ha tuʻunga fakahōifua ʻi he ʻao ʻo e ʻOtuá. Ko ha tokolahi fakangatangata pē ʻo kinautolu ʻoku nau maʻu ʻa e ʻamanaki ke ʻi hēvaní. Ko e fuʻu tokolahi ange te nau moʻui ʻi he māmaní ʻo taʻengata.

7. Ko hai “ʻa e ngaahi meʻa ʻi hēvani”?

⁷ ʻUluakí, kamata ʻi he Penitekosi 33 T.S., naʻe fai ai ʻa e tokanga ki he “ngaahi meʻa ʻi hēvani,” ʻa ia, ko e faʻahinga te nau kaungāʻea mo Kalaisi ʻi he Puleʻanga fakahēvaní. Makatuʻunga ʻi heʻenau tui ki he mahuʻinga ʻo e feilaulau ʻa Sīsuú, naʻe fakahaaʻi ai ʻe he ʻOtuá ʻoku nau māʻoniʻoni. (Loma 5:1, 2) ʻI he faai mai ʻa e taimí, naʻe fakakau mai ʻa e kau Siú mo e kau Senitailé, pea ko e “ngaahi meʻa ʻi Hēvani” ʻe toko 144,000 hono tokolahí. (Kaletia 3:26-​29; Fakahā 14:1) Ko e kiʻi toenga pē ʻo kinautolu ʻoku nau kei ʻi māmaní.

 Fakatahatahaʻi ʻa e “Ngaahi Meʻa ʻi Māmani”

8. Ko hai ʻa e “ngaahi meʻa ʻi māmani,” pea ko e hā honau vahaʻangatae mo Sihová?

⁸ Ko e founga puleʻi tatau pē ʻoku nau toe fakatahatahaʻi ʻa e “ngaahi meʻa ʻi māmani.” ʻOku laui miliona ʻa e kakai ʻoku lolotonga fakatahatahaʻi he taimí ni fakataha mo e ʻamanaki atu ke moʻui taʻengata ʻi he māmaní. ʻI he fāʻūtaha fakataha mo e toenga ʻo e ngaahi ʻea ʻo e Puleʻangá, ʻoku nau fakahīkihikiʻi ʻa e huafa ʻo Sihová mo hakeakiʻi ʻene lotú. (Aisea 2:2, 3; Sefanaia 3:9) ʻOku nau toe ui ʻa Sihova ko e “Tamai” koeʻuhí he ʻoku nau ʻiloʻi ia ko e matavai ʻo e moʻuí. Pea ʻoku nau maʻu ha tuʻunga fakahōifua ʻi hono ʻaó ʻo makatuʻunga ʻi heʻenau tui ki he taʻataʻa kuo lilingi ʻo Sīsuú. (Fakahā 7:9, 14) Ka koeʻuhí ʻoku nau kei taʻehaohaoa, ko hono tali kakato kinautolu ko e fānau ʻa e ʻOtuá ʻoku kei tuʻu ia mei he kahaʻú.

9. Ko e hā ʻa e talaʻofa ʻoku tuku tauhi mai ʻe he Loma 8:21 ki he faʻahinga ʻo e tangatá?

⁹ Ko e faʻahinga ko eni ʻoku nau maʻu ʻa e ʻamanaki fakaemāmaní ʻoku nau fakatatali vēkeveke he taimí ni ki he taimi ʻa ia ko e fakatupu fakaetangata kotoa pē ʻe “fakaʻataʻatā mei heʻene popula ki he ʻauha.” (Loma 8:21) Ko e fakatauʻatāina ko ení ʻe kamata ia hili hono hanga ʻe Kalaisi mo ʻene ngaahi kongakau fakahēvaní ʻo fakaʻosi ʻa e mamahi lahí fakafou ʻi he tumutumu ʻo ʻĀmaketoné. ʻE ʻuhinga eni ko hono fakaʻauha ʻa e fokotuʻutuʻu fulikivanu kotoa pē ʻo e ngaahi meʻa ʻa Sētané, ʻo muimui atu ai ʻa e ngaahi tāpuaki ʻo e Pule Taʻu ʻe Afe ʻa Kalaisi ʻi he mālohi ʻo e Puleʻangá.​—Fakahā 19:17-21; 20:6.

10. Ko e kau sevāniti ʻa Sihová te nau hivaʻi ʻa e hiva fakahīkihiki fē?

¹⁰ He meʻa fakafiefia moʻoni ia ʻi he taimi ʻe fāʻūtaha ai ʻa e kau sevāniti ʻa Sihova ʻi māmaní ʻo toe fakaongo atu ʻa e ngaahi ongoʻi ko ia ʻa ʻene kau sevāniti ʻi hēvaní, ʻa ia ʻoku nau talaki fiefia: “ʻOku lahi mo fakaofo hoʻo ngāue, ʻa e ʻAfiona ko e ʻOtua Aoniu; ʻoku totonu mo moʻoni ho ngaahi  ʻalunga, ʻa koe ko e Tuʻi ʻo e ngaahi Kuonga. Ko hai ʻe ʻikai ʻapasia ki he ʻAfiona, mo fakahikihikiʻi ho huafa? He ko koe toko taha ʻoku maʻoniʻoni: pea ʻe haʻu kotoa pē ʻa e ngaahi kakai, ʻo punou ʻi ho ʻao; koeʻuhi kuo fakaeʻa hoʻo maʻoniʻoni.” (Fakahā 15:3, 4) ʻIo, ko e kotoa ʻo e kau sevāniti ʻa Sihová te nau fāʻūtaha ʻi he lotu ki he ʻOtua moʻoni pē tahá. Naʻa mo e kau maté ʻe toe fokotuʻu hake pea foaki kia kinautolu ʻa e faingamālie ke kau ʻi hono hiki hake honau leʻó ʻi he fakahīkihiki kia Sihova.​—Ngāue 24:15.

Tauʻatāina Fakaofo ʻi Muʻa

11. Ko e hā ʻa e tauʻatāina fakaofo ʻe maʻu ʻe he kau hao ʻi he mamahi lahí?

¹¹ Hili hono ʻosi hanga ʻe he mamahi lahí, fakataha mo hono tumutumu ko ʻĀmaketoné, ʻo fakamaʻa ʻa e māmaní mei he fulikivanú, ʻe ʻikai toe hoko ʻa Sētane ko e Tēvoló ko e “ʻotua ʻo e tuʻu ko eni.” ʻE ʻikai toe fekuki ʻa e kau lotu ʻa Sihová mo e tākiekina pango ʻa Sētané. (2 Kolinito 4:4; Fakahā 20:1, 2) ʻE ʻikai toe fakafofongahalaʻi ʻe he lotu loí ʻa Sihova mo hoko ko ha tākiekina fakatupu māvahevahe ki he sōsaieti fakaetangatá. ʻE ʻikai toe hokosia ʻe he kau sevāniti ʻa e ʻOtua moʻoní ʻa e fakamaau taʻetotonú mo hono ngāueʻaki taʻetotonu kinautolu ʻi he nima ʻo e ngaahi mafai fakaetangatá. He tauʻatāina fakaofo moʻoni ʻe maʻú!

12. ʻE anga-fēfē hono fakatauʻatāinaʻi kotoa mei he angahalá mo hono ngaahi nunuʻá?

¹² ʻI he tuʻunga ko e “Lami ʻa e ʻOtua, ʻa ia ʻoku ne ʻave ʻa e angahala ʻa māmani,” ko Sīsū te ne ngāueʻaki ʻa e mahuʻinga ʻo ʻene feilaulaú ke kaniseliʻaki ʻa e angahala ʻa e faʻahinga ʻo e tangatá. (Sione 1:29) ʻI he taimi naʻe ʻi māmani ai ʻa Sīsuú ʻo ne fakamolemoleʻi ʻa e angahala ʻa e tokotaha, naʻá ne fakamoʻui ʻa e tokotaha naʻe fakamolemoleʻí ko e fakamoʻoni ʻo e meʻa ko iá. (Mātiu 9:1-7; 15:30, 31) ʻI he founga tatau, ko Kalaisi Sīsū, koeʻuhi ko e Tuʻi fakahēvani ia ʻo e Puleʻanga ʻo e ʻOtuá, te ne fakamoʻui fakaemana ʻa e kuí, ko e noá, ko e tulí, ko e kafo fakaesinó, ko e puke fakaʻatamaí, mo e  faʻahinga ʻoku toe ʻi ai hanau mahaki kehe. (Fakahā 21:3, 4) Ko e kau talangofua kotoa pē ʻe tāmateʻi ai ʻa e “lao angahalaʻia” koeʻuhí ke hoko ʻenau ngaahi fakakaukaú mo ʻenau ngaahi tōʻongá ʻo fakahōifua, fakatouʻosi kia kinautolu pea ki he ʻOtuá. (Loma 7:21-23) ʻI he ngata ʻo e Taʻu ʻe Taha Afé, ʻe ʻosi ʻomi kinautolu ki he haohaoa fakaetangatá, ʻi he ‘ʻīmisi mo e tatau’ ʻo e ʻOtua moʻoni pē tahá.​—Senesi 1:26, NW.

13. ʻI he ngata ʻa e Pule Taʻu ʻe Taha Afé, ko e hā ʻa e meʻa ʻe fai ʻe Kalaisí, pea ko e hā hono olá?

¹³ ʻI he taimi ʻe ʻosi ʻomai ai ʻe Kalaisi ʻa e faʻahinga ʻo e tangatá ki he haohaoá, te ne toki fakafoki leva ki he Tamaí ʻa e mafai naʻe foaki kiate ia ki he ngāue ko ení: “Ka tukuange ʻe ia ʻa e puleʻanga ki he ʻOtua, ʻio, ki he Tamai: ʻo ka kuo ne fakakaʻanga ʻa e pule kotoa pe mo e tuʻunga kotoa pe mo e malohi. He kuo pau pe ke ne Hau, kaeʻoua ke ne tuku ʻa e fili kotoa pe ki hono lalo vaʻe.” (1 Kolinito 15:24, 25) Ko e Pule Taʻu ʻe Taha Afe ʻa e Puleʻangá ʻe ʻosi fakahoko kakato ʻa hono taumuʻá; ko ia heʻikai toe fiemaʻu ia ki he puleʻanga tokoni ko ení ke toe ʻi ai ʻi he vahaʻa ʻo Sihova mo e faʻahinga ʻo e tangatá. Pea koeʻuhí ʻe ʻosi toʻo fakaʻaufuli atu ʻa e angahalá mo e maté pea mo ʻosi huhuʻi ʻa e faʻahinga ʻo e tangatá, ʻe ngata leva ʻa e fiemaʻu kia Sīsū ko e Tokotaha-Huhuʻí. ʻOku fakamatala ʻe he Tohitapú: “ʻE toki tuku ki lalo, ʻa e ʻAlo ʻe ia kiate ia naʻa ne fai ʻa e tuku ki lalo ʻo e meʻa kotoa pe kiate ia; koeʻuhiā ke tāfataha ʻa e ʻOtua ʻi he meʻa kotoa pe.”​—1 Kolinito 15:28.

14. Ko e hā ʻe tuku atu ki ai ʻa e faʻahinga kotoa pē ʻo e tangatá kuo fakahaohaoaʻí, pea ko e hā hono ʻuhingá?

¹⁴ Hoko mai ʻi he meʻá ni, ʻe ʻoange ai ki he faʻahinga ʻo e tangatá kuo fakahaohaoaʻí ʻa e faingamālie ke fakahāhaaʻi ai ko ʻenau filí ia ke tauhi ki he ʻOtua moʻoni pē tahá ʻo taʻengata. Ko ia ai, ki muʻa ke ohi kakato kotoa mai kinautolu ko ʻene fānaú, ʻe tuku atu ʻe Sihova ʻa e faʻahinga kotoa ko ia ʻo e tangatá kuo fakahaohaoaʻí ki ha ʻahiʻahi fakaʻosi. ʻE tuku ange mai leva ʻa Sētane mo ʻene kau tēmenioó mei he  luó. ʻE ʻikai hoko eni ko ha faingataʻa tuʻuloa ki he faʻahinga ʻoku nau ʻofa moʻoni kia Sihová. Ka ko ha taha taʻemateaki pē te ne fakaʻatā ia ke tākiekina ki he talangataʻa kia Sihová ʻe fakaʻauha taʻengata ia, fakataha mo e muʻaki tokotaha angatuʻú mo ʻene kau tēmenioó.​—Fakahā 20:7-10.

15. Ko e hā ʻa e tuʻunga ʻe toe hoko ʻi he haʻohaʻonga kotoa ʻo e meʻamoʻui ʻatamai poto ʻa Sihová?

¹⁵ ʻE toki ohi mai leva ʻe Sihova ko ʻene fānau ʻa e faʻahinga kotoa pē ʻo e tangatá kuo fakahaohaoaʻí ʻa ia kuo nau poupouʻi ʻa e tuʻunga-hau ʻo e ʻOtuá he lolotonga ʻa e ʻahiʻahi fakaʻosi ko iá. Mei he taimi ko iá ʻo faai atu, te nau ʻinasi kakato ai ʻi he tauʻatāina lāngilangiʻia ʻo e fānau ʻa e ʻOtuá ko e konga ʻo hono fāmili fakaeʻunivēsí. Ko e meʻamoʻui ʻatamai poto kotoa pē ʻi hēvani mo māmani te nau toe hoko ʻo fāʻūtaha ʻi he lotu kiate ia ko e ʻOtua moʻoni pē tahá. ʻE ʻosi aʻusia lavameʻa leva ai ʻa e taumuʻa ʻa Sihová! ʻOkú ke fie hoko ko e konga ʻo e fāmili fakaeʻuniveesi, fiefia mo taʻengata ko iá? Kapau ko ia, ʻoku mau fakalototoʻaʻi atu koe ke ke fai ki he meʻa ʻoku leaʻaki ʻe he Tohitapú ʻi he 1 Sione 2:17: “ʻOku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.”

Fetalanoaʻaki Fakamanatu

• Ki muʻa ʻi he angatuʻu ʻi ʻĪtení, ko e hā ʻa e vahaʻangatae naʻe maʻu ʻe he kau lotu kotoa pē ʻa Sihová pea mo iá?

• Ko e hā ʻa e fatongia ʻoku hilifaki ʻi he faʻahinga ko ia ko e kau sevāniti ʻa Sihová?

• Ko hai ia ʻe toki hoko ko e fānau ʻa e ʻOtuá, pea ʻoku anga-fēfē ʻa e felāveʻi eni mo e taumuʻa ʻa Sihova fekauʻaki mo e lotu fāʻūtahá?

[Fehuʻi ki he Ako]

 [Fakatātā ʻi he peesi 190]

ʻE fiefia ʻa e faʻahinga talangofua ʻo e tangatá ʻi ha moʻui ʻi ha palataisi ʻi he kolopé kotoa