Fāʻūtaha ʻo e Lotú ʻi Hotau Taimí—Ko e Hā Hono ʻUhingá?
Vahe ʻUluaki
Fāʻūtaha ʻo e Lotú ʻi Hotau Taimí—Ko e Hā Hono ʻUhingá?
1, 2. (a) Ko e hā ʻa e ngaʻunu fakafiefia ʻoku lolotonga fakahoko ʻi hotau taimí? (e) Ko e hā ʻa e ʻamanaki fakaofo ʻoku maʻu ʻe he kakai loto-totonú?
TAKATAKAI ʻi he kolopé ʻoku ʻi ai ʻa e ngaʻunu fakafiefia ki he fāʻūtaha ʻo e lotú. Ko hono fakatahatahaʻi mai ia ʻo e laui miliona ʻo e kakai ʻo e puleʻanga, matakali, mo e ngaahi lea kotoa pē. ʻOku tokolahi mo e faʻahinga ʻoku fakatahatahaʻi mai ʻi he taʻu taki taha. Ko e faʻahingá ni ʻoku fakamahinoʻi ia ʻi he Tohitapú ko e “kau fakamoʻoni” ʻa Sihova pea ʻoku ui kinautolu ko e “fuʻu kakai lahi.” ʻOku nau fai ki he ʻOtuá ʻa e “ngāue toputapu ʻi he ʻaho mo e pō.” (Aisea 43:10-12; Fakahā 7:9-15, NW) Ko e hā ʻoku nau fai ai ení? Koeʻuhí kuo nau hoko mai ʻo ʻilo ko Sihova ʻa e ʻOtua moʻoni pē tahá. ʻOku ueʻi ʻe he meʻá ni kinautolu ke ʻomi ʻenau moʻuí ke fehoanaki mo ʻene ngaahi founga māʻoniʻoní. ʻIkai ko ia pē, kuo nau ʻilo ʻoku tau lolotonga moʻui ʻi he “kuonga fakamui” ʻo e māmani fulikivanu lolotongá ni, pea ʻe vavé ni ke fakaʻauha ia ʻe he ʻOtuá, pea te ne fetongi ia ʻaki ʻene māmani foʻou palataisí.—2 Timote 3:1-5, 13; 2 Pita 3:10-13.
2 ʻOku talaʻofa ʻe he Folofola ʻa e ʻOtuá: “ʻOku toe siʻi pea mole ʻa ia ʻoku faikovi . . . Ka ʻe maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.” (Sāme 37:10, 11) “Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.” (Sāme 37:29) “[Ko e ʻOtuá] te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:4.
3. ʻOku anga-fēfē hono fakahoko ʻa e fāʻūtaha ʻo e lotu moʻoní?
3 Ko e faʻahinga ko ia ʻoku lolotonga fakafāʻūtahaʻi he taimí ni ki he lotu moʻoní ʻe hoko kinautolu ko e fuofua kau nofo ʻi he māmani foʻou ko iá. Kuo nau ʻosi ako ʻo ʻilo ʻa e finangalo ʻo e ʻOtuá pea ʻoku nau fai ia ki he lelei taha ʻo ʻenau malavá. ʻI hono fakahaaʻi ʻa e mahuʻinga ʻo e meʻá ni, naʻe pehē ʻe Sīsū: “Pea ko eni ia ʻa e moʻui taʻengata, ke nau fai ke ʻilo koe ko e ʻOtua moʻonia pe taha, pea mo Sisu ne ke fekau mai ko e Misaia.” (Sione 17:3) Naʻe tohi ʻe he ʻapositolo ko Sioné: “ʻOku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.”—1 Sione 2:17.
Meʻa ʻOku ʻUhinga Moʻoni ki Aí
4. (a) Ko e hā ʻa e ʻuhinga moʻoni ʻo hono fakatahatahaʻi mai ʻo e fuʻu tokolahi fau ki he lotu fāʻūtaha ʻi hotau taimí? (e) ʻOku anga-fēfē hono fakamatalaʻi ʻe he Tohitapú ʻa e fakatahatahaʻi ko ení?
4 Ko e hā ʻa e ʻuhinga moʻoni ʻa hono fakatahatahaʻi mai ʻo e fuʻu tokolahi fau ki he lotu fāʻūtahá ʻi hotau taimí? Ko e fakamoʻoni mahino ia ʻoku tau mātuʻaki ofi ki he ngataʻanga ʻo e māmani fulikivanu ko ení, pea mo e kamata leva ʻa e māmani foʻou ʻa e ʻOtuá hili pē ia. Ko e kau fakamoʻoni sio tonu kitautolu ʻi hono fakahoko ʻo e ngaahi kikite ko ia ʻa e Tohitapú naʻá ne tomuʻa tala ʻa e fakatahatahaʻi mahuʻinga ko ení. ʻOku fakahā ʻe ha kikite pehē ʻe taha: “Pea ʻe hoko ʻo pehe ʻi he kuonga ʻamui [ngaahi ʻaho fakaʻosí ni], ʻe fokotuʻu ʻa e moʻunga ʻo e fale ʻo Sihova [ʻa ʻene lotu moʻoni kuo hakeakiʻí] ko e ʻulu ʻo e ngaahi moʻunga [māʻolunga ange ʻi ha toe faʻahinga lotu pē], . . . pea ʻe tafe ki ai ʻa e ngaahi kakai. ʻIo, ʻe ōange ʻa e ngaahi puleʻanga lahi, pea te nau pehe, Haʻuā, ka tau ʻalu hake ki he moʻunga ʻo Sihova, pea ki he fale ʻo e ʻOtua ʻo Sekope; pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.”—Maika 4:1, 2; Sāme 37:34.
5, 6. (a) ʻOku anga-fēfē ʻa ʻene moʻoni ko e ngaahi puleʻangá ʻoku nau tafoki kia Sihova? (e) Ko e hā ʻa e ngaahi fehuʻi ʻoku totonu ke tau ʻeke hifo kiate kitautolú?
5 Lolotonga ʻoku ʻikai ke foaki kātoa atu ʻe he ngaahi puleʻangá kinautolu ki he fale fakalaumālie ʻo Sihova ki he lotú, ʻoku laui miliona ʻa e faʻahinga tāutaha mei he puleʻanga kotoa pē ʻoku nau fai pehē. ʻI heʻenau ako fekauʻaki mo e taumuʻa anga-ʻofa pea mo e ʻulungaanga fakamānako ʻo e ʻOtua ko Sihová, ʻoku maongo loloto ia ki honau lotó. ʻOku nau kumi anga-fakatōkilalo ke ʻilo ʻa e meʻa ʻoku fiemaʻu mai ʻe he ʻOtuá meiate kinautolú. Ko ʻenau lotú ʻoku hangē ko ia ko e lotu ʻa e tokotaha-tohi-sāmé ʻa ia naʻá ne pehē: “Ako au ke u fai ho finangalo; he ko hoku ʻOtua ʻa hoʻo ʻAfio.”—Sāme 143:10.
6 ʻOkú ke sio atu kiate koe ʻokú ke kau ʻi he haʻohaʻonga ʻo e fuʻu kakai tokolahi ko ia ʻoku lolotonga fakatahatahaʻi mai ʻe Sihova he taimí ni ki he lotu fāʻūtahá? ʻOku hanga ʻe hoʻo tali ko ia ki he fakahinohino kuó ke maʻu mei heʻene Folofolá ʻo fakahā ʻokú ke mahinoʻi moʻoni ko Sihova ʻa hono Matavaí? Ko e hā ʻa e lahi ʻa hoʻo ʻaʻeva “ʻi hono ngaahi founga”?
Founga ʻe Aʻusia Aí
7. (a) Ko e hā ʻa e lahi ʻe faai atu pē ʻo aʻusia ʻe he fāʻūtaha ʻo e lotú? (e) Ko e hā ʻoku fiemaʻu fakavavevave ai ke hoko ko ha tokotaha lotu kia Sihova he taimi ní, pea ʻe malava fēfē haʻatau tokoniʻi ʻa e niʻihi kehé ke nau fai iá?
7 Ko e taumuʻa ia ʻa Sihova ki heʻene fakatupu ʻatamai poto kotoa pē ke nau fāʻūtaha ʻi he lotu moʻoní. He fakaʻamua ē ʻe kitautolu ʻa e ʻaho ʻa ia ko kinautolu kotoa pē ʻe moʻuí te nau lotu ki he ʻOtua moʻoni pē tahá! (Sāme 103:19-22) Ka ki muʻa ke hoko iá, kuo pau ke toʻo atu ʻe Sihova ʻa kinautolu kotoa pē ʻoku nau fakafisi ke fai ʻa hono finangalo māʻoniʻoní. Tuʻunga ʻi he mēsí, ʻokú ne hanga ai ʻo ʻomai ʻa e fakatokanga tokamuʻa ʻo e meʻa te ne faí, koeʻuhi ke lava ʻe he kakai ʻi he potu kotoa pē ʻo maʻu ʻa e faingamālie ke liliu honau ʻalungá. (Aisea 55:6, 7) Ko ia ai, ʻi hotau ʻahó ni “ki he puleʻanga kotoa pē, mo e matakali, mo e lea, mo e faʻahinga,” ko e ui fakavavevave ko ení ʻoku fai kiate kinautolu: “Mou manavahē ki he ʻOtua, pea tuku kololia kiate ia; he kuo hokosia ʻa e taimi ʻo ʻene fakamāu: pea mou hū kiate ia naʻa ne ngaohi ʻa e langi mo e fonua mo e tahi mo e ngaahi matavai ʻo e ngaahi vaitafe.” (Fakahā 14:6, 7) Kuó ke tali ʻa e fakaafe ko iá? Kapau ko ia, ko ho monū ia ke fakaafeʻi ha toe niʻihi kehe ke nau ʻilo mo lotu ki he ʻOtua moʻoní.
8. Hili hono ako ʻa e ngaahi akonaki tefito ʻa e Tohitapú, ko e hā ha toe fakalakalaka ʻoku totonu ke tau feinga fakamātoato ke faí?
8 ʻOku ʻikai ko e taumuʻa ia ʻa Sihová ke lotu ki ai ha kakai ʻoku nau pehē ʻoku nau tui kiate ia kae hili ko iá ʻoku nau hokohoko atu kinautolu ke tuli ki heʻenau ngaahi meʻa pē ʻanautolú. ʻOku loto ʻa e ʻOtuá ke hoko ʻo maʻu ʻe he kakaí ʻa e “ʻilo totonu ki hono finangaló” pea tapua mai ʻa e meʻá ni ʻi heʻenau moʻuí. (Kolose 1:9, 10, NW) Ko ia ai, ko e kakai houngaʻia ʻa ia ʻoku nau ako ʻa e ngaahi akonaki tefito ʻo e Tohitapú ʻoku nau loto ke tutui atu ki he matuʻotuʻa faka-Kalisitiané. Ko ʻenau holí ia ke nau fai ke ʻilo loloto ange kia Sihova, fakafālahi mo fakaloloto ʻenau mahinoʻi ʻene Folofolá, pea ngāueʻaki kakato ange ia ʻi heʻenau moʻuí. ʻOku nau feinga ke tapua meiate kinautolu ʻa e ngaahi ʻulungaanga ʻo ʻetau Tamai fakahēvaní pea ke vakai ki he ngaahi meʻá ʻo hangē ko ʻene vakai ki aí. ʻOku ueʻi ai kinautolu ke nau kumi ki ha ngaahi founga ke kau ai ʻi he ngāue fakahaofi moʻui kuó ne fokotuʻutuʻu ke fai ʻi māmani ʻi hotau ʻahó. ʻOkú ke toe holi mo koe ki ai?—Maake 13:10; Hepelu 5:12–6:3.
9. ʻI he ongo founga fē ʻoku malava ai he taimí ni ʻa e fāʻūtaha moʻoní?
9 ʻOku fakahā ʻe he Tohitapú ko e faʻahinga ko ia ʻoku nau tauhi ʻa Sihová kuo pau ke nau hoko ko e kakai fāʻūtaha. (Efeso 4:1-3) Ko e fāʻūtaha ko ení kuo pau ke hoko ia he taimí ni, neongo ʻoku tau moʻui ʻi ha māmani māvahevahe pea ʻoku tau kei fāinga mo hotau ngaahi taʻehaohaoá tonu. Naʻe lotu fakamātoato ʻa Sīsū ke hoko kotoa ʻene kau ākongá ʻo taha, ʻo maʻu ʻa e fāʻūtaha moʻoní. Naʻe ʻuhinga eni ki he hā? ʻUluakí, te nau maʻu ha vahaʻangatae lelei mo Sihova mo hono ʻAló. Uá, te nau hoko ʻo fāʻūtaha ʻiate kinautolu. (Sione 17:20, 21) Ke aʻusia iá, ʻoku ngāue ʻa e fakatahaʻanga Kalisitiané ko e kautaha ia ʻoku fou mai ai ʻa e ngaahi fakahinohino ʻa Sihova ki heʻene kakaí.
Ko e Hā ʻa e Ngaahi Moʻoniʻi Meʻa ʻOku Tokoni ki he Fāʻūtahá?
10. (a) Ko e hā ʻoku tau fakatupulekina ʻi he taimi ʻoku tau ngāueʻaki fakafoʻituitui ai ʻa e Tohitapú ke fakaʻuhingaʻi ʻa e ngaahi tali ki he ngaahi fehuʻi ʻoku kaunga kiate kitautolú? (e) ʻAnalaiso ʻa e ngaahi moʻoniʻi meʻa ʻoku tokoni ki he fāʻūtaha faka-Kalisitiané ʻaki hono tali ʻa e ngaahi fehuʻi ʻoku fakahokohoko ʻi he palakalafi ko ení.
10 ʻOku hiki ʻi lalo ʻa e ngaahi moʻoniʻi meʻa tefito ʻe fitu ʻoku tokoni ki he fāʻūtaha ʻo e lotú. ʻI hoʻo tali ʻa e ngaahi fehuʻi ʻoku ō fakataha mo iá, fai ha fakakaukau ki he kaunga ʻa e poini taki taha ki ho vahaʻangatae mo Sihová pea mo ho kaungā Kalisitiané. Ko e fakaʻuhinga ʻi he ngaahi poini ko ení mo sio ki he ngaahi konga tohi ʻoku ʻasi ka ʻoku ʻikai fakaleá ʻe tokoni ia ki hoʻo fakatupulekina ʻa e poto fakaʻotuá, malava fakaefakakaukaú, mo e ʻiloʻiló—ʻa ia ko e ngaahi ʻulungaanga ia ʻoku fiemaʻu kiate kitautolu kotoa. (Palovepi 5:1, 2; Filipai 1:9-11) Fakakaukau tahataha ki he ngaahi moʻoniʻi meʻá ni.
(1) ʻOku tau lāuʻilo ki he totonu ʻa Sihova ke fokotuʻu ʻa e tuʻunga ki he leleí mo e koví. “Falala ki he ʻEiki ʻaki ʻa e kotoa ʻo ho loto, ʻo ʻouae fāki ki ho poto oʻou: ke ke fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.”—Palovepi 3:5, 6.
Ko e hā ʻoku totonu ai ke tau kumi ki he akonaki mo e tataki ʻa Sihová ʻi he taimi ʻoku tau fai ai ha fili? (Sāme 146:3-5; Aisea 48:17)
(2) ʻOku tau maʻu ʻa e Folofola ʻa e ʻOtuá ke tataki kitautolu. “ʻI hoʻomou tali ʻa e folofola ongo telinga—ʻa ia naʻe fakafofonga ʻiate kimautolu, ka ko e meʻa ʻa e ʻOtua—fakafetaʻi naʻe ʻikai ko e lea ʻa e tangata naʻa mou maʻu, ka ko e folofola ʻa e ʻOtua, he ko ia maté pe, pea ko e meʻa foki ʻoku ngāngāue ʻiate kimoutolu ʻoku tui.”—1 Tesalonaika 2:13.
Ko e hā ʻa e fakatuʻutāmaki ʻoku ʻi ai ʻi hono fai pē ʻa e meʻa ʻoku tau “ongoʻi” ʻoku tonú? (Palovepi 14:12; Selemaia 10:23, 24; 17:9)
Kapau ʻoku ʻikai ke tau ʻilo pe ko e hā ʻa e akonaki ʻoku ʻomi ʻe he Tohitapú ʻo fekauʻaki mo ha meʻa tonu, ko e hā ʻoku totonu ke tau faí? (Palovepi 2:3-5; 2 Timote 3:16, 17)
(3) ʻOku tau maʻu ʻaonga mei he polokalama fafanga fakalaumālie tatau. “Ko hoʻo fanau fuape ko e kau ako ʻa Sihova.” (Aisea 54:13) “Tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki, pea ʻasili he ʻoku mou sio ki he fakaofiofi mai ʻa e ʻaho [ʻo e fakaʻauhá].”—Hepelu 10:24, 25.
Ko e hā ʻa e ngaahi ʻaonga ʻoku hoko mai ki he faʻahinga ko ia ʻoku nau ngāueʻaongaʻaki kakato ʻa e fokotuʻutuʻu ʻa Sihova ki he fafanga fakalaumālié? (Aisea 65:13, 14)
(4) Ko Sīsū Kalaisi, ʻikai ko ha tangata, ʻa hotau Takí. “Ko kimoutolu ʻoua naʻa ui ko Lapai: he ʻoku taha pe hoʻomou Faiako, ka ko kimoutolu ko e ngāhi tokoua kotoa pe. Pea ʻoua naʻa ui ha toko taha ʻi mamani ko hoʻomou tamai: he ʻoku taha pe hoʻomou Tamai, ko e Tamai Fakalangi. Kaeʻumaʻā ʻoua naʻa ui kimoutolu ko e kau [taki]: he ʻoku taha homou [Takí], ko Kalaisi.”—Mātiu 23:8-10.
ʻOku totonu ke tui ha taha ʻo kitautolu ʻoku tau māʻolunga ange ʻi he niʻihi kehé? (Loma 3:23, 24; 12:3)
(5) ʻOku tau hanga ki he founga-pule ʻa e Puleʻanga ʻo e ʻOtuá ko e ʻamanakiʻanga pē ia ki he faʻahinga ʻo e tangatá. “Ko ia ai, kuo pau ke mou lotu ʻi he founga ko ení, ‘Ko ʻemau tamai ʻoku ʻi hēvani, ke māʻoniʻoni ho huafá. Ke hoko mai ho Puleʻangá. Ke fai ho finangaló, hangē ko ia ʻi hēvaní, ke pehē foki ʻi māmani.’ Hanganaki fuofua kumi ʻa e puleʻangá pea mo ʻene māʻoniʻoní.”—Mātiu 6:9, 10, 33, NW.
ʻOku anga-fēfē tokoni ʻa e “hanganaki fuofua kumi ʻa e puleʻangá” ke maluʻi ʻetau fāʻūtahá? (Maika 4:3; 1 Sione 3:10-12)
(6) ʻOku hanga ʻe he laumālie māʻoniʻoní ʻo tokonaki ʻi he kau lotu ʻa Sihová ʻa e ngaahi ʻulungaanga ʻoku mātuʻaki mahuʻinga ki he fāʻūtaha faka-Kalisitiané. “‘Ko e fua ʻo e laumālié ko e ʻofa, fiefia, melino, kātaki-fuoloa, anga-ʻofa, anga-lelei, tui, anga-malū, mo e mapuleʻi-kita.”—Kaletia 5:22, 23, NW.
Ko e hā kuo pau ke tau fai koeʻuhí kae hanga ʻe he laumālie ʻo e ʻOtuá ʻo tokonaki hono ngaahi fuá ʻiate kitautolú? (Ngāue 5:32)
ʻOku anga-fēfē hono hanga ʻe hono maʻu ʻo e laumālie ʻo e ʻOtuá ʻo tākiekina hotau vahaʻangatae mo e kaungā Kalisitiané? (Sione 13:35; 1 Sione 4:8, 20, 21)
(7) Kātoa e kau lotu moʻoni ʻa e ʻOtuá ʻoku nau kau ʻi hono malangaʻi ʻa e ongoongo lelei ʻo hono Puleʻangá. “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.”—Mātiu 24:14.
Ko e hā ʻoku totonu ke ne ueʻi kitautolu ke tau loto ke kau kakato ʻi he ngāue fakamalanga ko ení? (Mātiu 22:37-39; Loma 10:10)
11. ʻI he taimi ʻoku tau ngāueʻaki ai ʻa e ngaahi moʻoni ʻo e Tohitapú ʻi heʻetau moʻuí, ko e hā hono olá?
11 Ko e lotu fāʻūtaha kia Sihová ʻokú ne tohoaki kitautolu ke ofi ange kiate ia pea fakamafeia ai kitautolu ke tau maʻu ha feohi fakaivifoʻou mo e kaungā tuí. ʻOku pehē ʻe he Sāme 133:1 (NW): “Vakai! Hono ʻikai lelei pea hono ʻikai sai ki he fanga tokouá ke nofo fakataha ʻi he fāʻūtaha!” He meʻa fakaivifoʻou moʻoni ke mavahe mei he māmaní mo e kotoa ʻo ʻene siokitá, ʻulungaanga taʻetāú, mo e fakamālohí pea ke fakatahataha mo e faʻahinga ʻoku nau ʻofa moʻoni kia Sihová pea talangofua ki heʻene ngaahi laó!
Fakaʻehiʻehi mei he Ngaahi Tākiekina Fakatupu Māvahevahé
12. Ko e hā ʻoku fiemaʻu ai ke tau fakaʻehiʻehi mei he laumālie tauʻatāiná?
12 Koeʻuhí ke ʻoua naʻa fakameleʻi ʻetau fāʻūtaha mahuʻinga ʻi he kolopé, kuo pau ke tau fakaʻehiʻehi mei he ngaahi tākiekina fakatupu māvahevahé. Ko e taha ʻo e ngaahi meʻá ni ko e laumālie ʻo e tauʻatāina mei he ʻOtuá mo ʻene ngaahi laó. ʻOku tokoniʻi kitautolu ʻe Sihova ke fakaʻehiʻehi mei ai ʻaki hono fakaeʻa ʻa e tokotaha ʻoku tupu mei aí, ʻa Sētane ko e Tēvoló. (2 Kolinito 4:4; Fakahā 12:9) Ko Sētane ʻa e tokotaha naʻá ne tākiekina ʻa ʻĀtama mo ʻIvi ke na tukunoaʻi ʻa e meʻa ne tala ʻe he ʻOtuá pea fai ʻa e ngaahi fili naʻe fepaki mo e finangalo ʻo e ʻOtuá. Ko e olá naʻe fakatuʻutāmaki kiate kinaua pea kiate kitautolu. (Senesi 3:1-6, 17-19) Ko e māmani ko ení kuo fonu ia he laumālie ʻo e tauʻatāina mei he ʻOtuá mo ʻene ngaahi laó. Ko ia ʻoku fiemaʻu ke tau mapuleʻi ʻa e laumālie ko iá ʻiate kitautolu.
13. Ko e hā te ne fakahaaʻi pe ʻoku tau teuteu loto-moʻoni atu ki he moʻui ʻi he māmani foʻou māʻoniʻoni ʻa e ʻOtuá?
13 Ko e fakatātaá, fakakaukau atu ki he talaʻofa fakafiefia ʻa Sihova ke fetongi ʻa e māmani fulikivanu lolotongá ʻaki ʻa e ngaahi langi foʻou mo ha māmani foʻou ʻa ia ʻoku “nofoʻanga ai ʻa maʻoniʻoni.” (2 Pita 3:13) ʻIkai ʻoku totonu ke hanga ʻe he meʻa ko iá ʻo ueʻi kitautolu ke kamata ʻetau teuteu atu ke moʻui ʻi he taimi ko iá ʻi he taimi ʻe toʻulu ai ʻa e māʻoniʻoní? ʻOku ʻuhinga eni ko e fai ki he akonaki mahino ʻa e Tohitapú: “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani. Ka ʻofa ʻe ha taha ki mamani ʻoku ʻikai ʻiate ia ʻa e ʻofa ki he Tamai.” (1 Sione 2:15) Ko ia ai, ʻoku tau siʻaki ʻa e laumālie ʻo e māmani ko ení—ʻa ʻene fakakaukau tauʻatāiná, ʻa ʻene hohaʻa tōtuʻa ki hoto kitá, ʻa hono ʻulungaanga taʻetāú mo e fakamālohí. ʻOku tau ʻai ia ke tōʻongaʻaki ʻa e fanongo kia Sihova pea ke talangofua kiate ia mei hotau lotó, neongo ha faʻahinga hehema fakafepaki pē ʻa e kakano taʻehaohaoá. Ko ʻetau ʻalunga moʻuí kotoa ʻokú ne ʻomai ʻa e fakamoʻoni ko ʻetau fakakaukaú mo e meʻa ʻokú ne ueʻi hotau lotó ʻoku hehema ia ki hono fai ʻa e finangalo ʻo e ʻOtuá.—Sāme 40:8.
14. (a) Ko e hā ʻoku mahuʻinga ai ke puke ʻa e faingamālié he taimí ni ke ako ai ki he ngaahi founga ʻa Sihová pea muimui ki ai ʻi heʻetau moʻuí? (e) Ko e hā ʻene ʻuhinga kiate kitautolu fakafoʻituitui ʻa e ngaahi konga Tohitapu ʻoku lave ki ai ʻi he palakalafí?
14 ʻI he taimi ʻe hoko mai ai ʻa e taimi kotofa ʻa Sihova ke fakaʻauha ai ʻa e fokotuʻutuʻu fulikivanu ʻo e ngaahi meʻa ko ení pea mo e faʻahinga kotoa ʻoku nau saiʻia ʻi heʻene ngaahi foungá, heʻikai te ne toe fakatatali. Heʻikai te ne toe toloi ʻa e taimi ko iá pe liliu ʻene ngaahi tuʻungá ke fakafaingamālieʻi ai ʻa e faʻahinga ʻoku nau kei feinga ke piki ki he māmaní lolotonga ia ʻoku nau loto-veiveiua ke ako ʻa e finangalo ʻo e ʻOtuá mo fai ki aí. Ko e taimi eni ke fai leva ha meʻa! (Luke 13:23, 24; 17:32; 21:34-36) Ko ia ai, he meʻa fakaloto-māfana moʻoni ke sio ki he fuʻu kakai lahí ʻenau puke ki he faingamālie mahuʻinga ko ení, ʻo loto ʻalovili ke kumi ki he fakahinohino ʻoku tokonaki mai ʻe Sihova fakafou ʻi heʻene Folofolá mo ʻene kautahá pea ʻaʻeva fāʻūtaha ʻi hono ngaahi ʻalunga ki he māmani foʻoú! Pea ko e lahi ange ʻetau ako fekauʻaki mo Sihová, ko e lahi ange ia ʻetau ʻofa kiate ia mo loto ke tauhi iá.
Fetalanoaʻaki Fakamanatu
• Ko e hā ʻa e taumuʻa ʻa Sihova ki he lotú?
• Hili ʻetau ʻosi ako ʻa e ngaahi akonaki tefito ʻa e Tohitapú, ko e hā ʻa e toe fakalakalaka ʻoku totonu ke tau feinga fakamātoato ke faí?
• Ko e hā ʻoku malava ke tau fai fakafoʻituitui ka tau fāʻūtaha ai mo e kau lotu kehe ʻa Sihová?
[Fehuʻi ki he Ako]
[Fakatātā ʻi he peesi 4]
‘ʻE maʻu ʻa e fonuá ʻe he faʻa kataki pea te nau fefiefiaʻi ʻi he melino lahi’
