Vahe Ua

Fakahīkihikiʻi ʻa Sihova ko e ʻOtua Moʻoni Pē Taha

1. Ko hai ʻa e ʻOtua moʻoni pē tahá?

 ʻOKU pehē ʻe he Tohitapú neongo ʻoku ʻi ai ʻa e faʻahinga tokolahi ʻoku fai ʻa e vakai ki ai ko e ngaahi ʻotua, “kiate kitautolu ʻoku taha pe ʻa e ʻOtua, ko e Tamai.” (1 Kolinito 8:5, 6) Ko e ‘ʻOtua ʻe taha’ ko iá ko Sihova, ko e Tokotaha-Fakatupu ʻo e meʻa kotoa pē. (Teutalonome 6:4; Fakahā 4:11) Naʻe lave ki ai ʻa Sīsū ko “hoku ʻOtua pea ko homou ʻOtua.” (Sione 20:17) Naʻá ne loto-tatau mo Mōsese, ʻa ia naʻá ne pehē ki muʻa: “Ko Jihova koia koe Otua [moʻoní]; oku ikai ha toko taha mo ia.” (Teutalonome 4:35, PM) ʻOku māʻolunga mamaʻo ange ʻa Sihova ʻi ha toe meʻa pē ʻoku fai ki ai ha lotu, hangē ko e ngaahi ʻaitolí, ʻotuaʻaki ʻo e tangatá, pe ko hono filí ʻa Sētane ko e Tēvoló, ʻa e “ʻotua ʻo e tuʻu ko eni.” (2 Kolinito 4:3, 4) ʻI hono kehe mei he ngaahi meʻá ni kotoa, ko Sihová, hangē ko hono ui ia ʻe Sīsuú, “ko e Otua moʻonia pe taha.”—Sione 17:3, fakaʻītali ʻamautolu.

2. ʻI heʻetau ako ʻo fekauʻaki mo e ʻOtuá, ʻoku totonu ke fēfē ʻene ueʻi ʻetau moʻuí?

² Ko e kakai houngaʻia ko ia ʻoku nau ako fekauʻaki mo e ngaahi ʻulungaanga fakalotomāfana ʻo e ʻOtuá, pea pehē ki he meʻa kuó ne faí mo ia te ne toki fai maʻatautolú, ʻoku tohoaki kinautolu kiate ia. ʻI he tupulaki ʻenau ʻofa kia Sihová, ʻoku nau ongoʻi ʻoku ueʻi kinautolu ke fakahīkihikiʻi ia. Anga-fēfē? Ko e founga ʻe taha ko e talanoa ki he niʻihi kehé ʻo fekauʻaki mo ia. “ʻOku fai ʻa e fakaha ʻaki ʻa e ngutu ke maʻu ʻa e fakamoʻui,” ko e lau ia ʻa e Loma 10:10. Ko e toe founga ʻe taha ko e faʻifaʻitaki kiate ia ʻi he lea mo e ngāue. “Mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina,”  ko e lau ia ʻa e Efeso 4:32 (Efeso 5:1, PM). Ke fai ia ke kakato angé, ʻoku fiemaʻu ke tau ʻiloʻi ʻa Sihova ʻi hono tuʻunga totonú.

3. Ko e hā ʻa e ngaahi ʻulungaanga tefito ʻo e ʻOtuá?

³ ʻI he kotoa ʻo e Tohitapú ʻoku ʻi ai ʻa e ngaahi fakamatala lahi ʻoku fakahaaʻi ai ʻa e ngaahi anga tuʻu-ki-muʻa ʻo e ʻOtuá. Ko hono ngaahi ʻulungaanga tefito ʻe faá ko e poto, fakamaau totonu, mālohi, mo e ʻofa. “ʻOku feʻao mo e ʻAfio ʻa e poto.” (Siope 12:13, fakaʻītali ʻamautolu) “Ko ʻene ngaahi foungá kotoa ʻoku fakamaau totonu.” (Teutalonome 32:4, NW) “ʻOkú ne . . . longomoʻui ʻi he mālohi.” (Aisea 40:26, NW) “Ko e ʻOtua ko e ʻOfa.” (1 Sione 4:8, fakaʻītali ʻamautolu) Kae kehe, ʻi he ngaahi ʻulungaanga tefito ʻe fā ʻo e ʻOtuá, ko fē ʻoku tuʻu-ki-muʻa tahá, ʻa e ʻulungaanga ʻokú ne fakahaaʻi ʻo laka ange ʻi ha toe meʻa pe ko e ʻOtua fēfē iá?

“Ko e ʻOtua ko e ʻOfa”

4. Ko fē ʻi he ngaahi ʻulungaanga ʻo e ʻOtuá naʻe mahuʻinga tefito ki heʻene fakatupu ʻa e ʻunivēsí mo e ngaahi meʻamoʻui kotoa pē?

⁴ Fakakaukau pe ko e hā e meʻa naʻá ne ueʻi ʻa Sihova ke ne fakatupu ʻa e ʻunivēsí mo e ngaahi meʻamoʻui ʻatamai poto fakalaumālie mo fakaetangatá. Ko hono potó pe mālohí? ʻIkai, he lolotonga naʻá ne ngāueʻaki ʻa e ongo meʻa ko iá, naʻe ʻikai ko e ongo mālohi fakaueʻilotó kinaua. Pea naʻe ʻikai fiemaʻu heʻene fakamaau totonú ʻana ke ne vahevahe atu ʻa e meʻaʻofa ko e moʻuí. Ka, ko e ʻofa lahi ia ʻa e ʻOtuá naʻá ne ueʻi ia ke ne vahevahe atu ʻa e fiefia ʻo e moʻui ʻatamai potó fakataha mo e niʻihi kehé. Ko e ʻofá naʻá ne ueʻi ia ke ne fakataumuʻa ʻoku totonu ke moʻui taʻengata ʻa e faʻahinga talangofua ʻo e tangatá ʻi Palataisi. (Senesi 1:28; 2:15) Ko e ʻofá naʻá ne fakatupunga ia ke ne fokotuʻutuʻu ke toʻo atu ʻa e fakahalaia naʻe fakahoko mai ʻe he faihala ʻa ʻĀtamá ki he faʻahinga ʻo e tangatá.

5. Fakatatau ki he Tohitapú, ko Sihová ko e hā sino mai ia ʻa e ʻulungaanga fē, pea ko e hā hono ʻuhingá?

⁵ Ko ia ai, ʻi he kotoa ʻo e ngaahi ʻulungaanga ʻo e ʻOtuá, ko e tuʻu-ki-muʻa tahá ko ʻene ʻofá. Ko hono angá ia, pe natulá. ʻI heʻene mahuʻinga hangē pē ko hono potó, fakamaau totonú, mo e mālohí, ʻoku halaʻatā ke pehē ʻe he Tohitapú ia ko Sihová  ko e taha ʻo e ngaahi meʻa ko iá. Ka ʻoku pehē ia ai ko iá ko e ʻofa. ʻIo, ko Sihová ko e hā sino ia ʻo e ʻofá. Ko e ʻofa eni ʻoku tataki ʻe he tefitoʻi moʻoni, ʻikai ko e ongó. Ko e ʻofa ʻa e ʻOtuá ʻoku puleʻi ia ʻe he ngaahi tefitoʻi moʻoni ʻo e moʻoní mo e māʻoniʻoní. Ko e tuʻunga māʻolunga taha ia ʻo e ʻofá, ʻo hangē ko ia ʻoku fakahāhaaʻi tonu ʻia Sihova ko e ʻOtuá. Ko e ʻofa peheé ko ha fakahāhā ia ʻo e taʻesiokita kakato pea ʻoku ō fakataha maʻu pē mo e fakamoʻoni hā mahino ʻo e ngāue.

6. Ko e hā ʻokú ne ʻai ke tau malava ʻo faʻifaʻitaki ki he ʻOtuá neongo ʻa ʻene māʻolunga ange ʻiate kitautolú?

⁶ Ko e ʻulungaanga fakaofo ko eni ʻo e ʻofá ʻokú ne fakamafeia ai kitautolu ke faʻifaʻitaki ki ha ʻOtua pehē. ʻI he tuʻunga ko e faʻahinga māʻulalo, taʻehaohaoa mo faihala ʻo e tangatá, te tau fakakaukau nai heʻikai ʻaupito lava ke tau fai pehē lavameʻa. Ka ko e toe fakatātā eni ʻe taha ʻo e ʻofa lahi ʻa Sihová: ʻOkú ne ʻafioʻi hotau ngaahi fakangatangatá pea ʻoku ʻikai te ne fiemaʻu ʻa e haohaoá meiate kitautolu. ʻOkú ne ʻafioʻi ʻoku tau mamaʻo kitautolu mei he haohaoá he taimí ni. (Sāme 51:5) Ko e ʻuhinga ia ʻoku pehē ai ʻe he Sāme 130:3, 4: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai? Ka ʻoku ʻiate koe ʻa e fakamolemole.” ʻIo, ko Sihová ko e “ʻOtua, ʻAloʻofa mo Anga lelei, Tuai ki he Houhau, pea Fonu ʻi he Kelesi mo e Moʻoni.” (Ekisoto 34:6) “Ko koe, ʻe Sihova, ʻokú ke anga-lelei mo tokateu ke fakamolemole.” (Sāme 86:5, NW) He meʻa fakafiemālie moʻoni! He meʻa fakaivifoʻou moʻoni ke tauhi ki he ʻOtua fakaofo ko ení pea ke aʻusia ʻa ʻene tokanga ʻofa mo faimēsí!

7. ʻOku malava fēfē ke mātā ʻa e ʻofa ʻa Sihová ʻi heʻene ngaahi ngāue fakatupú?

⁷ Ko e ʻofa ʻa Sihová ʻoku lava ke toe mātā ia ʻi heʻene ngaahi ngāue fakaefakatupú. Fakakaukau atu ki he ngaahi meʻa lelei kuo tokonaki mai ʻe Sihova ke tau fiefia aí, hangē ko e ngaahi moʻunga, ngaahi vaotā, mo e ngaahi ʻōseni fakaʻofoʻofá. Kuó ne foaki mai ʻa e meʻakai ʻi he faʻahinga kehekehe fakaofo ke ifo ki heʻetau kaí pea fakatolonga kitautolu. Pehē foki, kuo tokonaki mai ʻe Sihova ha fokotuʻuna matalaʻiʻakau kehekehe fakaʻofoʻofa mo namu lelei pea pehē ki he fakatupu  ʻo e fanga monumanu fakaholomamata. Naʻá ne ngaohi ʻa e ngaahi meʻa te ne fakafiefiaʻi ʻa e tangatá, neongo naʻe ʻikai fiemaʻu ia ke ne fai pehē. Ko e moʻoni, ko e moʻui ʻi he māmani fulikivanu ko ení ʻi hotau tuʻunga taʻehaohaoa lolotongá, ʻoku ʻikai lava ai ke tau fiefia kakato ʻi heʻene fakatupú. (Loma 8:22) Ka ke fakaʻuta atu angé ki he meʻa ʻe fai ʻe Sihova maʻatautolu ʻi Palataisí! ʻOku fakapapauʻi mai ʻe he tokotaha-tohi-sāmé kiate kitautolu: “ʻOku ke folahi ho nima, pea ke fakamakona ʻa e holi [totonu] ʻa e meʻa moʻui kotoa.”—Sāme 145:16.

8. Ko e hā ʻa e fakatātā tuʻu-ki-muʻa taha ʻo e ʻofa ʻa Sihova kiate kitautolú?

⁸ Ko e hā ʻa e fakatātā tuʻu-ki-muʻa taha ʻo e ʻofa ʻa Sihova ki he faʻahinga ʻo e tangatá? ʻOku fakamatala ʻe he Tohitapú: “He naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Ko e ʻuhinga nai iá ko ha lelei ʻa e tangatá naʻe fai ai ʻe Sihova ʻa e meʻá ni? ʻOku tali mai ʻe he Loma 5:8: “Ko e ʻOtua ʻoku ne fakaha ʻa e moʻoni o ʻene ʻofa aʻana kiate kitautolu ʻi he pekia ʻa Kalaisi maʻatautolu, lolotonga ʻoku tau kei angahala.” ʻIo, naʻe fekauʻi mai ʻe he ʻOtuá ʻa hono ʻAlo haohaoá ki māmani ke foaki ʻene moʻuí ko ha feilaulau huhuʻi ke fakatauʻatāinaʻi kitautolu mei he fakahalaia ki he angahalá mo e maté. (Mātiu 20:28) ʻOku fakaava ʻe he meʻá ni ʻa e hala ki he kakai ko ia ʻoku nau ʻofa ki he ʻOtuá ke maʻu ʻa e moʻui taʻengatá. Ko e meʻa māloó, ko e ʻofa ʻa e ʻOtuá ʻoku aʻu atu ia ki he faʻahinga kotoa pē ʻoku nau fie fai hono finangaló, he ʻoku tala mai ʻe he Tohitapú kiate kitautolu: “ʻOku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.”—Ngāue 10:34, 35.

9. ʻOku totonu ke fēfē hono tākiekina kitautolu ʻe he moʻoniʻi meʻa ko ia ko Sihová kuó ne foaki hono ʻAló ko ha huhuʻi maʻa kitautolu?

⁹ ʻOku totonu ke fēfē hono hanga ʻe he moʻoniʻi meʻa ko ia ko Sihová kuó ne foaki hono ʻAló ko ha huhuʻi maʻa kitautolú,  pea fakaava ai ʻa e hala ki he moʻui taʻengatá, ʻo tākiekina ʻa e anga ʻo ʻetau ngāueʻaki ʻetau moʻuí he taimi ní? ʻOku totonu ke ne hanga ʻo fakaloloto ʻetau ʻofa ki he ʻOtua moʻoní, ʻa Sihova. ʻI he taimi tatau, ʻoku totonu ke ne hanga ʻo ʻai kitautolu ke tau fie fanongo kia Sīsū, ʻa ia ʻokú ne fakafofongaʻi ʻa e ʻOtuá. “Ko ʻene mate [ʻa Sīsū] ʻo fetongi ʻa e kakai kotoa pe naʻe fai koeʻuhi ke ʻoua naʻa toe moʻui maʻanautolu ʻa e kakai ʻoku moʻui, ka maʻae toko taha ko ia, ʻa ia naʻa ne pekia mo toetuʻu ko honau fetongi.” (2 Kolinito 5:15) He meʻa fakafiefia moʻoni ia ke molomolo muivaʻe ʻi he vaʻe ʻo Sīsuú, he ko e faʻifaʻitakiʻanga ia ʻi he faʻifaʻitaki ki he ʻofa mo e kaungā ongoʻi ʻa Sihová! ʻOku fakahaaʻi eni ʻi he meʻa naʻe leaʻaki ʻe Sīsū ki he faʻahinga ʻoku anga-fakatōkilaló: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu. ʻAi ʻeku ioke kiate kimoutolu, pea mou ako ʻiate au: he ʻoku ou faʻa kataki mo angafākatuʻa, pea te mou ʻilo ha mālōlō ʻi homou laumalie. He ko e ioke aʻaku ʻoku molū, pea ko e kavenga aʻaku ʻoku maʻamaʻa.”—Mātiu 11:28-30.

Fakahāhā ʻa e ʻOfa ki he Niʻihi Kehé

10. Ko e hā ʻa e ngaahi founga ʻe niʻihi ʻe lava ke tau fakahāhā ai ʻa e ʻofa ki he kaungā Kalisitiané?

¹⁰ ʻE lava fēfē ke tau fakahāhā ʻoku tau maʻu ʻa e faʻahinga ʻofa ki he kaungā Kalisitiané ʻa ia ʻoku maʻu ʻe Sihova mo Sīsū kiate kitautolú? Fakatokangaʻi ʻa e ngaahi founga lahi ʻoku lava ke tau fai ai ení: “Ko ʻOfa ʻoku ne angamokomoko, mo angalelei. Ko ʻOfa ʻoku ʻikai, te ne meheka, ʻoku ʻikai te ne fai pe ke ongoongoa, ʻoku ʻikai te ne fakafuofuolahi, ʻoku ʻikai te ne fai taʻetāu, ʻoku ʻikai te ne kumi ʻene lelei aʻana, ʻoku ʻikai te ne fakaʻita, ʻoku ʻikai te ne lau ʻa e kovi, ʻoku ʻikai te ne fiefia ʻi he taʻetotonu, ka ʻoku ne kaungā-fiefia mo e Moʻoni. ʻOku ne ʻukuma ʻi he meʻa kotoa pe, ʻoku ne tui ʻi he meʻa kotoa pe, ʻoku ne ʻamanaki ʻi he meʻa kotoa pe, ʻoku ne kataki ʻi he meʻa kotoa pe. Ko ʻOfa ʻoku ʻikai ke kaʻanga ia ʻi ha taimi.”—1 Kolinito 13:4-8; 1 Sione 3:14-18; 4:7-12.

11. Ko hai ʻoku toe totonu ke tau fakahā ki ai ʻa e ʻofá, pea ʻe anga-fēfē?

¹¹ Ko hai ia ʻoku totonu ke tau toe fakahā ki ai ʻa e ʻofá, pea  ʻe anga-fēfē? Naʻe pehē ʻe Sīsū: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.” (Mātiu 28:19, 20) ʻOku kau heni ʻa e fevahevaheʻaki ʻa e ongoongo lelei ʻo e māmani foʻou palataisi ʻoku teu hoko mai ʻa e ʻOtuá mo e faʻahinga ko ia ʻoku teʻeki ke nau hoko ko hotau kaungā Kalisitiané. Naʻe fakahā mahino ʻe Sīsū ko ʻetau ʻofá ʻoku ʻikai totonu ke fakangatangata pē ki he faʻahinga ʻoku tau fevahevaheʻaki ʻetau tuí, he naʻá ne pehē: “He kapau te mou ʻofaʻi ʻa kinautolu pe ʻoku ʻofa mai, ko e meʻa ia ʻe fakakoloa? ʻikai ʻoku fai pehē mo e kau popilikane? Pea kapau ʻoku mou fetapa ki homou kainga pe, ko e hā ha meʻa ʻoku mou fai ʻoku hulu atu? ʻikai ʻoku fai ʻe he Senitaile foki ʻa e meʻa ko ia?”—Mātiu 5:46, 47; 24:14; Kaletia 6:10.

“ʻAʻeva ʻi he Huafa ʻo Sihová”

12. Ko e hā ʻoku lava ai ke ngāueʻaki ʻa e huafa ʻo e ʻOtuá kiate ia toko taha pē?

¹² Ko e toe tafaʻaki mahuʻinga ʻe taha ʻo hono fakahīkihikiʻi ʻa e ʻOtua moʻoní ko hono ʻiloʻi, ngāueʻaki, mo akoʻaki hono huafa laulōtahá, ʻa e Sihová. Naʻe fakahā ʻe he tokotaha-tohi-sāmé ʻa e fakaʻamu fakamātoato ko ení: “Ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.” (Sāme 83:18) Ko e ʻuhinga ʻo e huafa Sihová “ʻOkú Ne Fakatupunga ke Hoko.” Ko ia ʻa e Fakahoko Taumuʻa Lahí, ʻo ʻomi maʻu pē ʻene ngaahi taumuʻá ki ha fakamulituku ola lelei. Pea ko e ʻOtua moʻoní pē taha ʻoku malava totonu ke ne maʻu ʻa e huafa ko iá, koeʻuhí heʻikai ʻaupito lava ʻe he faʻahinga ʻo e tangatá ke fakapapauʻi ko ʻenau ngaahi feingá ʻe lavameʻa. (Semisi 4:13, 14) Ko Sihova toko taha pē ʻoku malava ke ne pehē ko ʻene folofolá “kuo pau te ne lavameʻa” ʻi he meʻa ʻokú ne fekau atu ia ki aí. (Aisea 55:11, NW) ʻOku fiefia ʻa e tokolahi ʻi he taimi ʻoku nau sio ai ʻi he fuofua taimí ki he huafa ʻo e ʻOtuá ʻi heʻenau Tohitapú pea ʻilo ʻa hono ʻuhingá. (Ekisoto 6:3) Ka te nau maʻu ʻaonga pē mei he ʻilo ko ení kapau te nau “ʻaʻeva ʻi he huafa ʻo Sihová . . . ʻo taʻengata.”​—Maika 4:5, NW.

13. Ko e hā ʻoku kau ʻi he ʻilo ki he huafa ʻo Sihová mo ʻaʻeva ʻi hono huafá?

 ¹³ Fekauʻaki mo e huafa ʻo e ʻOtuá, ʻoku pehē ʻe he Sāme 9:10 (PM): “Ko kinautolu oku ilo ki ho huafa te nau falala kiate koe.” ʻOku kau ki heni ʻa e meʻa lahi ange ia ʻi hono ʻiloʻi pē ʻa e huafa Sihová, ʻa ia ʻoku ʻikai hoko noa pē ʻene ʻuhingá ko e falala kiate ia. Ko e ʻilo ki he huafa ʻo e ʻOtuá ʻoku ʻuhinga ia ko hono mahinoʻi pe ko e ʻOtua fēfē ʻa Sihova, fakaʻapaʻapaʻi hono mafaí, talangofua ki heʻene ngaahi fekaú, pea falala kiate ia ʻi he meʻa kotoa pē. (Palovepi 3:5, 6) ʻI he tuʻunga meimei tatau, ko e ʻaʻeva ʻi he huafa ʻo Sihová ʻoku ʻuhingá ko e hoko ʻo fakatapui kiate ia pea fakafofongaʻi ia ko e taha ʻo ʻene kau lotú, ʻo ngāueʻaki moʻoni ʻetau moʻuí ke fehoanaki mo e finangalo ʻo e ʻOtuá. (Luke 10:27) ʻOkú ke fai ʻa e meʻa ko iá?

14. Ke tau tauhi ʻa Sihova ʻo taʻengata, ko e hā ʻoku fiemaʻú tuku kehe ʻa e ongoʻi pē ko e fatongiá?

¹⁴ Ke tau tauhi ʻa Sihova ʻo taʻengata, kuo pau ke ueʻi kitautolu ʻe ha meʻa lahi ange ia ʻi he ongoʻi pē ko e fatongiá. Naʻe naʻinaʻi ʻa e ʻapositolo ko Paulá kia Tīmote, ʻa ia naʻá ne tauhi kia Sihova ʻi he ngaahi taʻu lahi: “Akoʻi koe ʻo ʻai ʻa e anga-līʻoa fakaʻotuá ko hoʻo taumuʻa.” (1 Timote 4:7, NW) Ko e anga-līʻoá ʻoku haʻu ia mei ha loto kuo fonu ʻi he houngaʻia ki he tokotaha ʻoku fakahanga ki ai ʻa e anga-līʻoá. Ko e “anga-līʻoa fakaʻotuá” ʻokú ne fakahaaʻi ʻa e fakaʻapaʻapa loloto kia Sihova tonu. ʻOkú ne fakaeʻa ʻa e ʻofa pīkitai kiate ia koeʻuhi ko e mahuʻingaʻia taʻefakangatangata kiate ia mo ʻene ngaahi foungá. ʻOkú ne fakatupunga ai kitautolu ke tau loto ke fakaʻapaʻapaʻi māʻolunga ʻe he tokotaha kotoa pē ʻa hono huafá. Ke ʻaʻeva ʻi he huafa ʻo Sihová, ʻa e ʻOtua moʻoni pē tahá, ʻo taʻengatá, kuo pau ke tau fakatupulekina ʻa e anga-līʻoa fakaʻotuá ʻi heʻetau moʻuí.​—Sāme 37:4; 2 Pita 3:11.

15. ʻE malava fēfē ke tau ʻoatu ki he ʻOtuá ʻetau anga-līʻoa maʻataʻataá?

¹⁵ Ke tauhi fakahōifua ki he ʻOtuá, kuo pau ke tau ʻoatu kiate ia ʻa e lotu ʻaufuatō, koeʻuhí ko iá “ko e ʻOtua ʻokú ne kounaʻi ʻa e anga-līʻoa maʻataʻatā.” (Ekisoto 20:5, NW) ʻE ʻikai lava ke  tau ʻofa ki he ʻOtuá pea ʻofa ʻi he taimi tatau ki he māmani fulikivanu ko ia ʻoku ʻotua ai ʻa Sētané. (Semisi 4:4; 1 Sione 2:15-17) ʻOku ʻafioʻi tonu ʻe Sihova ʻa e faʻahinga tokotaha ʻoku tau feinga tāutaha ke hoko ki aí. (Selemaia 17:10) Kapau ʻoku tau ʻofa moʻoni ki he māʻoniʻoní, te ne sio ki ai pea te ne tokoniʻi kitautolu ke kātekina hotau ngaahi ʻahiʻahi fakaʻahó. ʻI heʻene poupouʻi kitautolu ʻaki hono laumālie māʻoniʻoni mafimafiʻiá, te ne fakamafeia ai kitautolu ke ikunaʻi ʻa e fulikivanu ko ia ʻoku lahi fau ʻi he māmani ko ení. (2 Kolinito 4:7) Te ne toe tokoniʻi foki kitautolu ke tauhi maʻu ʻetau ʻamanaki mālohi ko ia ki he ʻamanaki ʻo e moʻui taʻengata ʻi ha māmani palataisí. He ʻamanaki lāngilangiʻia moʻoni ē! ʻOku totonu ke tau houngaʻia loloto ai pea loto-lelei ke tauhi ʻa e ʻOtua moʻoní, ʻa Sihova, ʻa ia ʻokú ne ʻai ia ke malavá.

16. Ko e hā ʻoku totonu ke ke loto ke fai fakataha mo e laui miliona ʻo e niʻihi kehé?

¹⁶ ʻOku laui miliona ʻa e kakai ʻi he māmaní kotoa kuo nau tali fiefia ʻa e fakaafe ʻa e tokotaha-tohi-sāmé ʻa ia naʻá ne tohi: “Mou kau mo au ke viki ʻa Sihova, pea tau hakeakiʻi hono huafa fakataha.” (Sāme 34:3) ʻOku fakaafeʻi koe ʻe Sihova ke kau ʻi he haʻohaʻonga ʻo e fuʻu tokolahi fakautuutu ko ia ʻo e puleʻanga kotoa pē ʻoku nau fai ʻa e meʻá ni.

Fetalanoaʻaki Fakamanatu

• Ko e tokotaha fēfē ʻa Sihova? ʻOku anga-fēfē ʻetau maʻu ʻaonga ʻi hono maʻu ha mahino māʻalaʻala fekauʻaki mo hono ngaahi ʻulungāngá?

• ʻE lava fēfē ke tau tokoniʻi ʻa e kakai kehé ke nau ako ʻa e moʻoni fekauʻaki mo e ʻOtuá?

• Ko e hā ʻoku kau ʻi he ʻilo ki he huafa ʻo Sihová mo ʻaʻeva ʻi hono huafá?

[Fehuʻi ki he Ako]

 [Fakatātā ʻi he peesi 14]

Ko Sihova, ʻi heʻene ʻofa lahí, ‘te ne folahi hono nimá ke fakamākona ʻa e holi ʻa e meʻa moʻui kotoa’