Fanongo ki he Faleʻí, Tali ʻa e Akonakí
Vahe Taha Nima
Fanongo ki he Faleʻí, Tali ʻa e Akonakí
1. (a) Ko e hā ʻoku fiemaʻu ai kiate kitautolu kotoa ʻa e faleʻí mo e akonakí? (e) Ko e hā ʻa e fehuʻi ʻoku fiemaʻu ke tau fakakaukau ki aí?
“ʻOKU lahi ʻa e meʻa ʻoku tau humu ai kotoa pe,” ko e lau ia ʻa e Tohitapú ʻi he Semisi 3:2. ʻE lava ke tau fakakaukau atu ki he ngaahi taimi lahi kuo ʻikai ke tau hokosi ai ʻa e faʻahinga tokotaha ʻoku ekinaki mai ʻe he Folofola ʻa e ʻOtuá ke tau hoko ki aí. Ko ia ʻoku tau ʻilo ʻoku moʻoni ʻa e Tohitapú ʻi heʻene pehē: “Tokanga ki ho faleʻi, pea tali akonaki: koeʻuhi ke ke poto ʻi ho ngaahi ʻaho ʻamui.” (Palovepi 19:20) ʻOku ʻikai ha veiveiua kuo tau ʻosi fai ʻa e ngaahi fengaʻunuʻaki ʻi heʻetau moʻuí ke fakatonutonu ia ʻo fakatatau mo e akonaki ʻa e Tohitapú. Ka ʻoku anga-fēfē ʻetau fakafeangaí kapau ʻoku faleʻi kitautolu ʻe ha kaungā Kalisitiane fekauʻaki mo ha meʻa pau?
2. Ko e hā ʻoku totonu ke tau faí ʻi he taimi ʻoku tau maʻu ai ha faleʻi fakafoʻituitui?
2 ʻOku tali ʻa e niʻihi ʻaki ʻenau feinga ke fakatonuhiaʻi kinautolu, ʻo fakasiʻisiʻia ʻa e mafatukituki ʻo e meʻa ʻoku hokó, pe ko e leʻei ʻa e tukuakiʻí ki he niʻihi kehé. Ka ʻoku lelei ange ke fanongo ki he faleʻí pea ngāueʻaki ia. (Hepelu 12:11) Ko e moʻoni, ʻoku ʻikai totonu ke ʻamanekina ʻe ha taha ʻa e haohaoá mei he niʻihi kehé, pea ʻikai totonu ke ne ʻoatu maʻu pē ha faleʻi fekauʻaki mo e ngaahi meʻa īkí pe ngaahi meʻa ʻoku tuku ia ʻe he Tohitapú ki he fili fakafoʻituituí. Pehē foki, mahalo ko e tokotaha ʻokú ne ʻoatu ʻa e faleʻí kuo teʻeki ke ne fakakaukauʻi kotoa ʻe ia ʻa e ngaahi foʻi moʻoní, pea ko e ngaahi meʻá ni ʻe fakamanatu anga-tokaʻi nai kiate ia. Ka ʻi he lāulea hoko maí, tau pehē pē ko e faleʻi pe akonaki ʻoku faí ʻoku feʻungamālie, ʻo makatuʻunga faka-Tohitapu. ʻOku totonu ke fēfē tali ʻa ha taha?
Ngaahi Faʻifaʻitakiʻanga ko Hotau Naʻinaʻi
3, 4. (a) Ko e hā ʻoku ʻi he Tohitapú ʻoku lava ke ne tokoniʻi kitautolu ke fakatupulekina ʻa e vakai totonu fekauʻaki mo e faleʻí mo e akonakí? (e) Naʻe anga-fēfē tali ʻa Saula ki he faleʻí, pea ko e hā hono ikuʻangá?
3 ʻOku ʻi he Folofola ʻa e ʻOtuá ʻa e ngaahi meʻa naʻe hokosia moʻoni ʻi he moʻuí ʻe he faʻahinga tāutaha naʻa nau maʻu ʻa e faleʻi naʻe fiemaʻú. ʻI he taimi ʻe niʻihi, ko e faleʻí naʻe ō ua ia mo e akonaki. Ko e taha ha tokotaha naʻe pehē ko Tuʻi Saula ʻo ʻIsilelí. Naʻá ne taʻemalava ke talangofua kia Sihova fekauʻaki mo e puleʻanga ʻAmalekí. Naʻe fakafepakiʻi ʻe he kau ʻAmalekí ʻa e kau sevāniti ʻa e ʻOtuá, pea ko e fakamaau fakaʻotua ʻa Sihová ke ʻoua naʻa fakahaofi ʻa e kau ʻAmalekí pe ko ʻenau fanga monumanú. Ka naʻe fakahaofi ʻe Tuʻi Saula ia ʻa honau tuʻí mo e lelei taha ʻi heʻenau fanga monumanú.—1 Samiuela 15:1-11.
4 Naʻe fekauʻi ʻe Sihova ʻa e palōfita ko Sāmiuelá ke valokiʻi ʻa Saula. Ko e hā ʻa e tali ʻa Saulá? Naʻá ne kikihi naʻá ne ikunaʻi ʻa e kau ʻAmalekí ka naʻá ne fakakaukau pē ke fakahaofi honau tuʻí. Kae kehe, ko e meʻa ko iá, naʻe fepaki ia mo e fekau ʻa Sihová. (1 Samiuela 15:20) Naʻe feinga ʻa Saula ke leʻei ʻa e tukuakiʻí ki he kakaí ʻi hono fakahaofi ko eni ʻo e fanga monumanú, ʻo pehē: “Naʻa ku manavahe ki he kakai, ʻou fakaongo ki honau leʻo.” (1 Samiuela 15:24) Naʻe hā naʻá ne tokanga lahi ange ia ki hono ngeiá, ʻo aʻu ʻo ne kole kia Samiuela ke fakalāngilangiʻi ia ʻi he ʻao ʻo e kakaí. (1 Samiuela 15:30) Naʻe faai pē, ʻo hanga ʻe Sihova ʻo talitekeʻi ʻa Saula mei he tuʻí.—1 Samiuela 16:1.
5. Ko e hā naʻe hoko kia Tuʻi ʻŪsaia ʻi he taimi naʻá ne talitekeʻi ai ʻa e faleʻí?
5 Ko Tuʻi ʻŪsaia ʻo Siutá “ne hia kia Sihova ko hono ʻOtua, he naʻa ne hu ki he Temipale ʻo e ʻEiki ke tutu inisenisi ʻi he olita tutuʻanga-inisenisi.” (2 Kalonikali 26:16) Ka ko e kau taulaʻeikí pē naʻe malava fakalao ke nau tutu ʻinisēnisí. ʻI he taimi naʻe feinga ai ʻa e taulaʻeiki lahí ke taʻofi ʻa ʻŪsaiá, naʻe tali ʻita ʻa e tuʻí. Ko e hā naʻe hokó? ʻOku pehē ʻe he Tohitapú: “Naʻe fisiki mai ʻa e kilia ʻi hono laʻe . . . he kuo taaʻi ʻe he ʻEiki. Pea ne kilia ʻa Kingi Usaia ʻo aʻu ki heʻene pekia.”—2 Kalonikali 26:19-21.
6. (a) Ko e hā naʻe talitekeʻi fakatouʻosi ai ʻe Saula mo ʻŪsaia ʻa e faleʻí? (e) Ko e hā ko ha palopalema mafatukituki ai ʻi he ʻahó ni ʻa hono talitekeʻi ʻo e faleʻí?
6 Ko e hā naʻe faingataʻa fakatouʻosi ai kia Saula mo ʻŪsaia ke tali ʻa e faleʻí? Ko e palopalema tefitó ko e hīkisiá, naʻá na taki taha fakakaukau fuʻu māʻolunga fekauʻaki mo kinaua. ʻOku ʻomi ʻe he tokolahi ʻa e mamahi kiate kinautolu koeʻuhi ko e anga ko ení. ʻOku hā ngali ʻoku nau ongoʻi ko hono ʻiloʻi ʻo e faleʻí ʻoku fakahuʻunga ai ʻoku ʻi ai ha tuʻunga taʻefeʻunga ʻiate kinautolu pe ʻoku maumauʻi ai honau ongoongó. Ka ko e hīkisiá ko ha vaivaiʻanga ia. ʻOku hanga ʻe he hīkisiá ʻo fakaʻuliʻulilātaiʻi ʻa e fakakaukau ʻa ha taha ʻo ne hehema ai ke talitekeʻi ʻa e tokoni ʻoku tokonaki mai ʻe Sihova fakafou ʻi heʻene Folofolá mo ʻene kautahá. Ko ia ai, ʻoku fakatokanga mai ʻa Sihova: “Ko e fieʻeiki [“hīkisiá,” NW] ko e fakamelomelo ʻo e haveʻi: pea ko e angahiki ko e fakamelomelo ʻo e hinga.”—Palovepi 16:18; Loma 12:3.
Tali ʻa e Faleʻí
7. Ko e hā ʻa e ngaahi lēsoni lelei ʻoku lava ke tau ako mei he founga tali ko ia ʻa Mōsese ki he faleʻí?
7 ʻOku toe ʻi he ngaahi Konga Tohitapú foki ha ngaahi faʻifaʻitakiʻanga lelei ʻo e faʻahinga ko ia naʻa nau tali ʻa e faleʻí, pea ʻoku lava ke tau ako mei he faʻahingá ni. Fakakaukau atu kia Mōsese, ʻa ia naʻe ʻoange ki ai ʻe heʻene tamai ʻi he fonó ha faleʻi ki he anga hono fataki ʻene kavenga mamafá. Naʻe fanongo ʻa Mōsese kiate ia peá ne ngāueʻaki leva ia. (Ekisoto 18:13-24) Neongo naʻe maʻu ʻe Mōsese ha mafai lahi, ko e hā naʻá ne ongongofua ai ki he faleʻí? Koeʻuhí naʻá ne anga-fakatōkilalo. “Ko Mosese nae agavaivai ia, o lahi hake i he kau tagata kotoabe nae i he fuga o mamani.” (Nomipa 12:3, PM) ʻOku mahuʻinga fēfē ʻa e anga-vaivaí? ʻOku fakahā ʻe Sefanaia 2:3 ʻoku ʻuhinga ia ko ʻetau moʻuí.
8. (a) Ko e hā ʻa e ongo angahala naʻe fai ʻe Tēvitá? (e) Ko e hā ʻa e tali ʻa Tēvita ki he valoki ʻa Nētané? (f) Ko e hā ʻa e nunuʻa ʻo e angahala ʻa Tēvitá?
8 Naʻe fakahoko ʻe Tēvita ʻa e tono mo Patisepa peá ne feinga ke fakapuliki ia ʻaki hono fakapoongi hono husepānití, ʻa ʻUlaia. Naʻe fekauʻi atu ʻe Sihova ʻene palōfita ko Nētané ke valokiʻi ʻa Tēvita. Naʻá ne fakatomala peá ne vete ange leva: “Kuo u hia kia Sihova.” (2 Samiuela 12:13) Lolotonga naʻe tali ʻe he ʻOtuá ʻa e fakatomala ʻa Tēvitá, te ne tofanga ia ʻi he ngaahi nunuʻa ʻo ʻene faihalá. Naʻe tala ʻe Sihova kiate ia ko e heletaá ʻe “ʻikai mahuʻi . . . mei [hono] fale,” pea ko hono ngaahi uaifí ʻe ʻoange “ki [hono] kaungaʻapi,” pea ko e foha naʻe fāʻeleʻi ʻi heʻene tonó ʻe “mate ia.”—2 Samiuela 12:10, 11, 14.
9. Ko e hā ʻoku totonu ke ʻoua naʻa ngalo ʻiate kitautolu kapau ʻoku faleʻi pe akonakiʻi kitautolu?
9 Naʻe ʻilo ʻe Tēvita ʻa e ʻaonga ʻo e fanongo ki he faleʻi leleí. ʻI he taimi ki he taimi, naʻá ne fakamālō ai ki he ʻOtuá ki he tokotaha naʻe fakafou mai ai iá. (1 Samiuela 25:32-35) ʻOku tau pehē? Kapau ko ia, te tau malu ai mei hano leaʻaki pe fai ha ngaahi meʻa lahi ʻe malava ke ne fakatupunga ha fakaʻiseʻisa. Ka ʻe fēfē leva kapau ʻoku tau hoko mai ki ha ngaahi tuʻunga ʻoku taki atu ki hano faleʻi pe aʻu ʻo akonakiʻi ai kitautolu? ʻOfa ke ʻoua naʻa ngalo ko e meʻá ni ko e fakamoʻoni ia ʻo e ʻofa ʻa Sihová, fakataha mo e vakai atu ki hotau tuʻunga lelei taʻengatá.—Palovepi 3:11, 12; 4:13.
Ngaahi ʻUlungaanga Taʻefakatataua ke Fakatupulekina
10. Ko e hā ʻa e ʻulungaanga naʻe fakahā ʻe Sīsū ʻoku fiemaʻu ki he faʻahinga ko ia te nau hū ki he Puleʻangá?
10 Ke maʻu ha vahaʻangatae lelei mo Sihova pea mo hotau fanga tokoua Kalisitiané, ʻoku fiemaʻu ke tau fakatupulekina ʻa e ngaahi ʻulungaanga pau. Naʻe lave ʻa Sīsū ki he taha ʻo e ngaahi ʻulungaangá ni ʻi he taimi naʻá ne fokotuʻu ai ha kiʻi tamasiʻi ʻi he haʻohaʻonga ʻo ʻene kau ākongá peá ne pehē: “Kapau ʻe ʻikai te mou liliu, ʻo hoko ʻo hange ko e tamaiki, ʻe ʻikai ʻaupito te mou hu ki he Puleʻanga ʻo Hevani. Ko ia ʻilonga ʻa ia te ne fakavaivaiʻi ia ʻo hange ko e tamasiʻi ko eni, ko ia ia ʻoku lahi ʻi he Puleʻanga ʻo Hevani.” (Mātiu 18:3, 4) Naʻe fiemaʻu ki he kau ākonga ʻa Sīsuú ke nau fakatupulekina ʻa e anga-fakatōkilaló, koeʻuhi he naʻa nau fekihiaki ʻiate kinautolu pe ko hai ʻoku lahi tahá.—Luke 22:24-27.
11. (a) ʻI he ʻao ʻo hai ʻoku fiemaʻu ke tau anga-fakatōkilalo ki aí, pea ko e hā hono ʻuhingá? (e) Kapau ʻoku tau anga-fakatōkilalo, ʻe anga-fēfē ʻetau tali ki he faleʻí?
11 Naʻe tohi ʻe he ʻapositolo ko Pitá: “Mou noʻo kotoa ʻaki ʻa e fakakaukau fefakatōkilaloʻakí, koeʻuhi ʻoku talitekeʻi ʻe he ʻOtuá ʻa e faʻahinga hīkisiá, ka ʻokú ne foaki ʻofa maʻataʻatā ki he faʻahinga anga-fakatōkilaló.” (1 Pita 5:5, NW) ʻOku tau ʻilo ʻoku fiemaʻu ke tau anga-fakatōkilalo ʻi he ʻao ʻo e ʻOtuá, ka ʻoku fakahā ʻe he konga Tohitapu ko ení ʻoku toe fiemaʻu kiate kitautolu ke tau anga-fakatōkilalo ki he kaungātuí. Kapau ʻoku tau pehē, ʻe ʻikai ke tau fehiʻa ki he ngaahi fokotuʻu totonu ʻoku ʻomai ʻe he niʻihi kehé kiate kitautolú ka te tau ako meiate kinautolu.—Palovepi 12:15.
12. (a) Ko e hā ʻa e ʻulungaanga mahuʻinga ʻoku felāveʻi vāofi mo e anga-fakatōkilaló? (e) Ko e hā ʻoku totonu ai ke tau tokanga fekauʻaki mo e ola ʻoku hanga ʻe heʻetau tōʻongá ʻo fai ki he niʻihi kehé?
12 ʻOku felāveʻi vāofi mo e anga-fakatōkilaló ʻa e tokanga ki he lelei ʻa e niʻihi kehé. Naʻe tohi ʻe he ʻapositolo ko Paulá: “Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha. . . . Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua. Ke taʻemelengatāmaki hoʻomou toʻonga ki he Siu mo e Kalisi fakatouʻosi, pea ki he siasi foki ʻa e ʻOtua.” (1 Kolinito 10:24-33) Naʻe ʻikai ke pehē ʻe Paula ia kuo pau ke tau tuku ki tafaʻaki ʻa e ngaahi meʻa ʻoku tau saiʻia fakafoʻituitui aí, ka naʻá ne ekinaki kiate kitautolu ke ʻoua te tau fai ha meʻa te ne ngali fakamālohiʻi ai ha taha kehe ke ne fai ʻa e meʻa kuo tala ange ʻe hono konisēnisí ʻoku halá.
13. Ko e hā ha fakatātā te ne fakamahino nai pe ʻoku tau angaʻaki hono ngāueʻaki ʻa e akonaki faka-Tohitapú?
13 ʻOkú ke tuku ʻa e ngaahi meʻa ʻa e kakai kehé ke muʻomuʻa ia ʻi hoʻo manako fakafoʻituituí? ʻOku totonu ke tau ako kotoa ke fai pehē. ʻOku lahi ʻa e ngaahi founga ʻoku malava ke fai ai ení. Fakakaukau atu ki he valá mo e teuteú ke fakatātāʻaki. ʻOku ʻi ai ʻa e ngaahi meʻa fekauʻaki mo e saiʻia fakafoʻituituí ʻoku ʻi loto ʻi he ngaahi fakahinohino faka-Tohitapu fekauʻaki mo e hoko ʻo anga-fakanānā, maau, mo e maʻá. Ka ʻo kapau te ke ʻilo koeʻuhi ko e ʻātakai ʻo e kakai ʻi ho koló, ʻoku hanga ai ʻe he anga ho valá pe teuteú ʻo taʻofi ʻa e niʻihi kehé mei heʻenau fanongo ki he pōpoaki ʻo e Puleʻangá, te ke fai ha ngaahi fengaʻunuʻakí? ʻOku pau moʻoni, ko hono tokoniʻi ha tokotaha kehe ke maʻu ʻa e moʻui taʻengatá ʻoku mahuʻinga ange ia ʻi hono fakahōhōʻiaʻi kitá.
14. Ko e hā ʻoku mahuʻinga ai ke fakatupulekina ʻa e anga-fakatōkilaló mo e tokanga ki he niʻihi kehé?
14 ʻI he hoko ʻo anga-fakatōkilaló pea mo fakahāhā ʻa e tokanga ki he niʻihi kehé, naʻe fokotuʻu ai ʻe Sīsū ʻa e faʻifaʻitakiʻangá, ʻo aʻu ʻo ne fufulu ʻa e vaʻe ʻo ʻene kau ākongá. (Sione 13:12-15) Fekauʻaki mo Iá, ʻoku pehē ʻe he Folofola ʻa e ʻOtuá: “ʻIo, ke ʻiate kimoutolu ʻa e loto pehe, ʻa ia naʻe ʻia Kalaisi Sisu foki. ʻA ia, neongo ʻene ʻafio ʻi he anga ʻo e ʻOtua, ka naʻe ʻikai te ne lau ʻene tatau mo e ʻOtua ko e meʻa ke haʻaki puke ki ai: kaekehe naʻa ne fakamasivesivaʻi ʻe ia ia, heʻene toʻo ʻa e anga ʻo e tamaioʻeiki, mo ʻene hoko ʻi he tatau ʻo e tangata: pea ʻi he ʻiloange naʻe ha ʻiate ia ʻa e toʻonga ʻa e tangata, naʻa ne fakamoʻulaloaʻi [“fakatōkilaloʻi,” NW] ia, heʻene hoko ko e fai talangofua ʻo aʻu ki heʻene mate.”—Filipai 2:5-8; Loma 15:2, 3.
ʻOua ʻe Talitekeʻi ʻa e Akonaki ʻa Sihová
15. (a) Ko e hā ʻa e ngaahi liliu ʻoku fiemaʻu ke tau fai ke maʻu ai ha ʻulungaanga ʻoku fakahōifua ki he ʻOtuá? (e) ʻI he founga fē kuo tokonaki mai ai ʻe Sihova ʻa e faleʻí mo e akonakí kiate kitautolú?
15 Koeʻuhi ko e kau angahala kotoa kitautolu, ke tapua atu ʻiate kitautolu ʻa e anga ʻo hotau ʻOtuá, ʻoku fiemaʻu ʻa e ngaahi liliu ʻi he ʻetau fakakaukaú mo ʻetau tōʻongá. ʻOku fiemaʻu ke tau ʻai ʻa e “tangata foʻou.” (Kolose 3:5-14) ʻOku tokoniʻi kitautolu ʻe he faleʻí mo e akonakí ke ʻiloʻi ʻa e ngaahi tafaʻaki ʻoku fiemaʻu ki ai ʻa e ngaahi fengaʻunuʻakí pea sio leva ki he anga hono fai ʻa e ngaahi meʻá ni. Ko e matavai tefito ʻo e fakamatala ʻoku tau fiemaʻú ko e Tohitapú tonu. (2 Timote 3:16, 17) ʻOku tokoniʻi kitautolu ʻe he ngaahi tohi faka-Tohitapú mo e ngaahi fakataha ʻoku tokonaki mai ʻe he kautaha ʻa Sihová ke tau ngāueʻaki ʻa e Folofola ʻa e ʻOtuá. Neongo kapau kuo tau fanongo ʻi he faleʻi ko iá ki muʻa, te tau fakatokangaʻi ʻa ʻetau fiemaʻu iá pea feinga ke fakaleleiʻi?
16. Ko e hā ʻa e tokoni ʻoku hanga ʻe Sihova ʻo tokonaki kiate kitautolu tāutaha?
16 ʻI he tokanga anga-ʻofa, ʻoku tokoniʻi kitautolu ʻe Sihova ʻi hotau ngaahi palopalemá. Kuo tokoniʻi ʻa e laui miliona fakafou ʻi he ngaahi ako Tohitapu ʻi ʻapi. ʻOku faleʻi mo akonakiʻi ʻe he ngaahi mātuʻá ʻenau fānaú ke maluʻi kinautolu mei he tōʻonga ʻoku malava ke ne fakatupunga ʻa e loto-mamahi. (Palovepi 6:20-23) ʻI loto ʻi he fakatahaʻangá, ʻoku faʻa kole ʻa e niʻihi ki he kau faifekau taukeí ki ha faleʻi mo ha ngaahi fokotuʻu koeʻuhi ke fakaleleiʻi ʻenau ngaahi feinga ko ia ʻi he malaʻe ngāué. Ko e kau mātuʻá, ʻi he taimi ki he taimi, te nau kole faleʻi nai ʻiate kinautolu pe mei he niʻihi ko ia ʻoku taukei ʻi he ngāue fakafaifekaú. Ko e faʻahinga ko ia ʻoku nau ʻi he ngaahi tuʻunga taau fakalaumālié ʻoku nau ngāueʻaki ʻa e Tohitapú ke ʻoatu ʻa e tokoni ki he faʻahinga ʻoku nau fiemaʻu iá, ʻo fai ia ʻi he laumālie ʻo e anga-malū. Kapau ʻokú ke ʻoatu ha faleʻi, manatuʻi ke “vakai kiate koe naʻa ʻiloange ʻe ʻahiʻahiʻi mo koe foki.” (Kaletia 6:1, 2) ʻIo, ʻoku tau fiemaʻu kotoa ʻa e faleʻí mo e akonakí ke lotu fāʻūtaha ai ki he ʻOtua moʻoni pē tahá.
Fetalanoaʻaki Fakamanatu
• ʻOku anga-fēfē hono tokoniʻi anga-ʻofa kitautolu ʻe Sihova ke tau sio ki he tafaʻaki ʻoku fiemaʻu fakafoʻituitui kiate kitautolu ke fai ai ha ngaahi fengaʻunuʻakí?
• Ko e hā ʻoku faingataʻa ai ki he tokolahi ke tali ʻa e faleʻi ʻoku fiemaʻú, pea ʻoku mafatukituki fēfē eni?
• Ko e hā ʻa e ngaahi ʻulungaanga taʻefakatataua te ne tokoniʻi kitautolu ke ongongofua ki he faleʻí, pea naʻe anga-fēfē hono fokotuʻu ʻe Sīsū ha faʻifaʻitakiʻanga ʻi he ngaahi meʻá ni?
[Fehuʻi ki he Ako]
[Fakatātā ʻi he peesi 142]
Naʻe talitekeʻi ʻe ʻŪsaia ʻa e faleʻí pea naʻe taaʻi ia ʻaki ʻa e kilia
[Fakatātā ʻi he peesi 142]
Naʻe maʻu ʻaonga ʻa Mōsese ʻi heʻene tali ʻa e faleʻi meia Seteloó
