Vahe Taha Hiva

Hokohoko Atu ke Leaʻaki ʻa e Folofola ʻa e ʻOtuá ʻi he Loto-Toʻa

1. (a) Ko e hā ʻa e ongoongo lelei naʻe fanongonongo ʻe he kau ākonga ʻa Sīsuú, ka naʻe anga-fēfē tali ʻa e niʻihi ʻo e kau Siú? (e) Ko e hā ʻa e ngaahi fehuʻi te tau ʻeke nai?

 MEIMEI ʻi he taʻu ʻe 2,000 kuohilí, ko e ʻAlo ʻo e ʻOtuá, ʻa Sīsū Kalaisi, naʻe pani ia ko e Tuʻi ki he kahaʻú ki he māmaní kotoa. Naʻe fakapoongi ʻa Sīsū ko e fakaʻaiʻai ʻe he ngaahi fili fakalotú, ka naʻe fokotuʻu ia ʻe Sihova mei he maté. Fakafou ʻia Sīsū, kuo malava ai he taimí ni ʻa e moʻui taʻengatá. Kae kehe, ʻi he taimi naʻe fanongonongo fakahāhā ai ʻe he kau ākonga ʻa Sīsuú ʻa e ongoongo lelei ko ení, naʻe mapuna hake ai ha fakatanga. Naʻe fakahū pilīsone honau niʻihi, pea aʻu ʻo haha mo fekauʻi ke tuku ʻenau lea fekauʻaki mo Sīsuú. (Ngāue 4:1-3, 17; 5:17, 18, 40) Ko e hā te nau faí? Ko e hā naʻá ke mei faí? Naʻá ke mei hokohoko atu ke fai fakamoʻoni loto-toʻa?

2. (a) Ko e hā ʻa e ongoongo fakaofo ʻoku fiemaʻu ke fanongonongo ʻi hotau ʻahó? (e) Ko hai ʻokú ne maʻu ʻa e fatongia ke malangaʻi ʻa e ongoongo leleí?

² ʻI he 1914 ko e Tuʻi ʻo e Puleʻanga ʻo e ʻOtuá, ʻa Sīsū Kalaisi, naʻe fakanofo ia ʻi hēvani ke pule ‘ʻi he lotolotonga ʻo hono ngaahi filí.’ (Sāme 110:2) Ko hono hokó, ko Sētane mo ʻene kau tēmenioó naʻe lī hifo ia ki māmani. (Fakahā 12:1-5, 7-12) Kuo kamata ʻa e ngaahi ʻaho fakaʻosi ʻo e fokotuʻutuʻu fulikivanu lolotongá. ʻI he ngata ʻa e vahaʻa taimi ko ení, ʻe hanga ʻe he ʻOtuá ʻo laiki ʻa e fokotuʻutuʻu ʻo e ngaahi meʻa fakasētane kotoa pē. (Taniela 2:44; Mātiu 24:21) Ko e kau haó ʻe hanga mai mei muʻa kia kinautolu ʻa e ʻamanaki ʻo e moʻui taʻengata ʻi ha māmani ʻa ia ʻe hoko ko ha palataisi. Kapau  kuó ke tali lelei ʻa e ongoongo lelei ko ení, te ke loto ke fevahevaheʻaki ia mo e niʻihi kehé. (Mātiu 24:14) Ka ko e hā ʻa e tali ʻe malava ke ke ʻamanekiná?

3. (a) ʻOku anga-fēfē tali ʻa e kakaí ki he pōpoaki ʻo e Puleʻangá? (e) Ko e hā ʻa e fehuʻi kuo pau ke tau fehangahangai mo ia?

³ ʻI hoʻo fanongonongo ʻa e ongoongo lelei ʻo e Puleʻangá, ʻe talitali lelei nai ia ʻe he kakai ʻe niʻihi, ka ko e tokolahi tahá ʻe ʻikai te nau mahuʻingaʻia. (Mātiu 24:37-39) ʻE manukiʻi pe fakafepakiʻi nai koe ʻe he niʻihi. Naʻe fakatokanga ʻa Sīsū ʻe malava ke hoko mai ʻa e fakafepakí mei ho kāingá tonu. (Luke 21:16-19) ʻE toe haʻu nai mei he feituʻu ʻokú ke ngāue aí pe ʻi he ʻapiakó. ʻI he ngaahi tafaʻaki ʻe niʻihi ʻo e māmaní, ʻoku aʻu ʻo tofanga ʻa e Kau Fakamoʻoni ʻa Sihová ʻi he fakataputapui fakapuleʻanga. ʻI he fehangahangai mo e ngaahi tuʻunga peheé, te ke hokohoko atu ke leaʻaki ʻa e Folofola ʻa e ʻOtuá ʻi he loto-toʻa pea “tuʻu fefeka ʻi he tuí”?​—1 Kolinito 16:13, NW.

ʻIkai Falala ki Hotau Mālohí Tonu

4. (a) Ke fakamoʻoniʻi kitautolu ko e kau sevāniti faitōnunga ʻa e ʻOtuá, ko e hā ha fiemaʻu tefito? (e) Ko e hā ʻoku mātuʻaki mahuʻinga ai ʻa e ngaahi fakataha faka-Kalisitiané?

⁴ Ko e makatuʻunga ki he hoko ko e sevāniti faitōnunga ʻa Sihová ko e falala ki heʻene ngaahi tokonakí. Ko e taha ʻo e ngaahi meʻá ni ko e ngaahi fakataha ʻa e fakatahaʻangá. ʻOku naʻinaʻi mai ʻa e ngaahi konga Tohitapú ke ʻoua naʻa liʻaki kinautolu. (Hepelu 10:23-25) Ko e faʻahinga ko ia kuo nau hokohoko mai ko e Kau Fakamoʻoni faitōnunga ʻa Sihová kuo nau kīvoi ke hoko ʻo maʻu tuʻumaʻu ʻa e ngaahi fakatahá fakataha mo honau kaungālotú. ʻI he ngaahi fakataha ko ení ʻoku fakautuutu ai ʻetau ʻiloʻi ʻa e ngaahi konga Tohitapú. Pehē foki, ʻe tupulaki ai ʻetau mahinoʻi ʻa e ngaahi moʻoni taukeí, pea ʻe fakamāsila ai ʻetau ʻiloʻi ʻa e ngaahi founga ke ngāueʻaki ai kinautolú. ʻOku tohoaki ofi ange ai kitautolu ki hotau fanga tokoua Kalisitiané ʻi he lotu fāʻūtahá pea ʻoku fakaivimālohiʻi ai kitautolu ke fai ʻa e finangalo ʻo e ʻOtuá.  ʻOku tokonaki mai ʻe he laumālie ʻo Sihová ʻa e tataki fakafou ʻi he fakatahaʻangá, pea fakafou ʻi he laumālie ko iá, ʻoku ʻi hotau haʻohaʻongá ai ʻa Sīsū.​—Mātiu 18:20; Fakahā 3:6.

5. ʻI he taimi ʻoku tofanga ai ʻa e Kau Fakamoʻoni ʻa Sihová ʻi ha fakataputapui, ko e hā ʻoku fai fekauʻaki mo e ngaahi fakatahá?

⁵ ʻOkú ke maʻu maʻu pē ʻa e ngaahi fakatahá kotoa, pea ʻokú ke ngāueʻaki fakafoʻituitui ʻa e meʻa ʻokú ke fanongo ʻoku tālangaʻí? ʻI he taimi ʻe niʻihi, ʻi he taimi ʻoku tofanga ai ʻa e Kau Fakamoʻoni ʻa Sihová ʻi ha fakataputapui, ʻoku feʻungamālie ke fakahoko ʻa e ngaahi fakatahá ʻi ha fanga kiʻi kulupu iiki ʻi he ngaahi ʻapi fakatāutahá. Ko e ngaahi feituʻú mo e taimí ʻe maliuliu nai pea ʻe ʻikai nai faʻa faingamālie, he ko e ngaahi fakataha ia ʻe niʻihi ʻoku fai ia kuo tuʻapō. Ka neongo ʻa e faingatāmaki fakafoʻituituí pe faingataʻá, ʻoku fai ʻe he fanga tokoua mo e fanga tuofāfine faitōnungá ʻa e feinga fakamātoato ke ʻi he fakataha taki taha.

6. Te tau fakahāhā fēfē ʻetau falala kia Sihová, pea ʻe lava fēfē ke tokoniʻi kitautolu ʻe he meʻá ni ke tau hanganaki lea loto-toʻa?

⁶ Ko e falala kia Sihová ʻoku fakatupulekina ia ʻi he hanga maʻu pē kiate ia ʻi he lotu fakamātoato, ʻi hono ʻiloʻi ʻoku tau fiemaʻu ʻa e tokoni ʻa e ʻOtuá. ʻOkú ke fai ia? Naʻe lotu maʻu pē ʻa Sīsū lolotonga ʻene ngāue fakafaifekau fakaemāmaní. (Luke 3:21; 6:12, 13; 22:39-44) Pea ʻi he pō ki muʻa ʻi hono tutukí, naʻá ne ekinaki ki heʻene kau ākongá: “Leʻo pe mo lotu, ke ʻoua naʻa mou hū ki ha ʻahiʻahi.” (Maake 14:38) Kapau te tau fetaulaki mo ha taʻemahuʻingaʻia ki he pōpoaki ʻo e Puleʻangá, ʻe lava ke fakataueleʻi kitautolu ke hōloa ʻetau ngāue fakafaifekaú. Kapau ʻe lumaʻi kitautolu pe fakatangaʻi kitautolu ʻe he kakaí, ʻe lava ke fakataueleʻi ai kitautolu ke tau fakalongolongo ke kalofi ʻa e ngaahi palopalemá. Ka ʻo kapau te tau lotu fakamātoato ki he laumālie ʻo e ʻOtuá ke tokoniʻi kitautolu ke tau hanganaki lea loto-toʻa, ʻe maluʻi ai kitautolu mei haʻatau tukulolo ki he ngaahi ʻahiʻahi ko iá.​—Luke 11:13; Efeso 6:18-20.

 Ko ha Lēkooti ʻo e Fakamoʻoni Loto-Toʻa

7. (a) Ko e hā ʻoku mahuʻinga makehe ai kia kitautolu ʻa e lēkooti ʻi he Ngāué? (e) Tali ʻa e ngaahi fehuʻi ʻoku ʻomai ʻi he ngataʻanga ʻo e palakalafi ko ení, ʻo fakamamafaʻi ʻa e founga ʻe malava ke ʻaonga ai ʻa e fakamatalá kia kitautolú.

⁷ Ko e lēkooti ʻoku ʻi he tohi ʻa Ngāué ʻoku mahuʻinga makehe ia kia kitautolu kotoa. ʻOku fakamatala ai ki he anga ʻo e hanga ʻe he kau ʻapositoló mo e muʻaki kau ākongá​—ʻa ia ko e kakai naʻa nau maʻu ʻa e ngaahi ongoʻi hangē pē ko kitautolú​—ʻo ikuʻi ʻa e ngaahi fakafaingataʻaʻiaʻangá pea fakamoʻoniʻi ko e kau fakamoʻoni loto-toʻa mo faitōnunga kinautolu ʻa Sihova. Tau sivisiviʻi angé ha konga ʻo e lēkooti ko iá ʻaki ʻa e tokoni ʻa e ngaahi fehuʻi ʻoku hoko haké mo e ngaahi konga Tohitapu ʻoku fakahaá. ʻI heʻetau fai peheé, fakakaukau atu ki he founga ʻe malava ke ke maʻu ʻaonga fakafoʻituitui ai mei he meʻa ʻokú ke laú.

 Ko ha kau tangata naʻe ako lelei ʻa e kau ʻapositoló? Ko ha faʻahinga tāutaha kinautolu naʻa nau natula taʻemanavahē, neongo ʻa e meʻa naʻe hokó? (Sione 18:17, 25-27; 20:19; Ngāue 4:13)

 Ko e hā naʻá ne fakamafeia ʻa Pita ke lea loto-toʻa ʻi he ʻao ʻo e fakamaauʻanga faka-Siu ko ia naʻa nau fakahalaiaʻi ʻa e ʻAlo tonu ʻo e ʻOtuá? (Mātiu 10:19, 20; Ngāue 4:8)

 Ko e hā naʻe fai ʻe he kau ʻapositoló lolotonga ʻa e ngaahi uike ki muʻa pea ʻomi kinautolu ki he ʻao ʻo e Sanetalimí? (Ngāue 1:14; 2:1, 42)

 ʻI he taimi naʻe fekauʻi ai ʻe he kau pulé ʻa e ongo ʻapositoló ke tuku ʻena malanga makatuʻunga ʻi he huafa ʻo Sīsuú, naʻe anga-fēfē tali ʻa Pita mo Sioné? (Ngāue 4:19, 20)

 Hili hono tukuange kinauá, ko hai naʻe toe kumi ki ai ʻa e kau ʻapositoló ki ha tokoní? Naʻa nau lotu ke tuku ʻa e fakatangá, pe ko e hā? (Ngāue 4:24-31)

  Ko e hā ʻa e founga naʻe tokonaki mai ai ʻe Sihova ʻa e tokoní ʻi he taimi naʻe feinga ai ʻa e kau fakafepakí ke taʻofi ʻa e ngāue fakamalangá? (Ngāue 5:17-20)

 Naʻe anga-fēfē fakahāhā ʻe he kau ʻapositoló naʻa nau mahinoʻi ʻa e ʻuhinga naʻe tuku ange ai kinautolú? (Ngāue 5:21, 41, 42)

 Naʻa mo e taimi naʻe movete ai ʻa e tokolahi ʻo e kau ākongá koeʻuhi ko e fakatangá, ko e hā naʻa nau hokohoko atu ke faí? (Ngāue 8:3, 4; 11:19-21)

8. Ko e hā ʻa e ngaahi ola fakafiefia naʻe haʻu mei he ngāue fakafaifekau ʻa e muʻaki kau ākongá, pea kuo anga-fēfē ʻetau kau atu aí?

⁸ Ko e ngāue ʻo hono malangaʻi ʻo e ongoongo leleí naʻe ʻikai ke kulanoa. Ko e kau ākonga nai ʻe toko 3,000 naʻe papitaiso ʻi he Penitekosi 33 T.S. “Pea fakautuutu ai ʻa e ului mai ki he ʻEiki ʻa ha kakai naʻe tui, ko e fuʻu tokolahi ʻo e kau tangata mo e kau fefine foki.” (Ngāue 2:41; 4:4; 5:14) ʻI he faai mai ʻa e taimí, naʻa mo e tokotaha fakatanga fefeka taha ʻo e kakai ʻa e ʻOtuá, ʻa Saula ʻo Tāsusí, naʻe hoko ko ha Kalisitiane peá ne kamata ke malangaʻi loto-toʻa ʻa e moʻoní. Naʻá ne hoko ʻo ʻiloa ko e ʻapositolo ko Paulá. (Kaletia 1:22-24) Ko e ngāue naʻe kamata ʻi he ʻuluaki senitulí kuo teʻeki ke tuku ia. Kuo maʻu ʻene omá ʻi he ngaahi ʻaho fakaʻosí ni pea kuo aʻu ia ki he ngaahi tafaʻaki kotoa ʻo e māmaní. ʻOku tau maʻu ʻa e monū ʻo e kau atu ai, pea ʻi heʻetau fai peheé, ʻoku lava ke tau ako ai mei he faʻifaʻitakiʻanga naʻe fokotuʻu ʻe he kau fakamoʻoni mateaki ko ia naʻa nau ngāue ki muʻa ʻia kitautolú.

9. (a) Ko e hā ʻa e ngaahi faingamālie naʻe ngāueʻaki ʻe Paula ke faifakamoʻoni aí? (e) ʻI he ngaahi founga fē ʻokú ke fakamafola ai ʻa e pōpoaki ʻo e Puleʻangá ki he niʻihi kehé?

⁹ ʻI he taimi naʻe ako ai ʻe Paula ʻa e moʻoni fekauʻaki mo Sīsū Kalaisí, ko e hā naʻá ne faí? “Pea ne hanga leva ʻo malangaʻaki ʻa Sisu . . . Ko e ʻAlo ʻo e ʻOtua ia.” (Ngāue 9:20) Naʻá ne houngaʻia ʻi he ʻofa maʻataʻatā ʻa e ʻOtuá kiate iá, pea  naʻá ne ʻilo naʻe fiemaʻu ki he tokotaha kotoa pē ʻa e ongoongo lelei kuó ne maʻú. Ko Paulá ko ha Siu, pea fakatatau ki he anga fakafonua ʻo e ʻaho ko iá, naʻá ne ʻalu ki he ngaahi sinakoké ʻo faifakamoʻoni ai. Naʻá ne toe malanga foki mei he fale ki he fale mo fakaʻuhinga mo e kakaí ʻi he māketí. Pea naʻá ne loto-lelei ke hiki ki ha ngaahi vāhenga-ngāue foʻou ke malangaʻi ai ʻa e ongoongo leleí.​—Ngāue 17:17; 20:20; Loma 15:23, 24.

10. (a) Naʻe anga-fēfē hono fakahāhā ʻe Paula lolotonga naʻá ne loto-toʻa, naʻá ne toe ʻiloʻilo foki ki he founga naʻá ne faifakamoʻoni aí? (e) ʻE anga-fēfē nai haʻatau tapua atu ʻa e ngaahi ʻulungaanga ʻo Paulá ʻi he taimi ʻoku tau faifakamoʻoni ai ki he ngaahi kāingá, kaungāngāué, pe kaungāakó?

¹⁰ Naʻe loto-toʻa ʻa Paula ka naʻá ne toe ʻiloʻilo, pea ʻoku totonu ke tau pehē. Ki he kau Siú naʻá ne tohoaki ʻenau tokangá ʻo makatuʻunga ʻi he ngaahi talaʻofa naʻe fai ʻe he ʻOtuá ki heʻenau fanga kuí. Ki he kau Kalisí naʻá ne lea ʻo makatuʻunga ʻi he ngaahi meʻa naʻa nau maheni mo iá. ʻI he taimi ʻe niʻihi naʻá ne ngāueʻaki ʻa e meʻa naʻá ne hokosia tonu ʻi heʻene ako ʻa e moʻoní ko ha founga ia ki hono fai ha fakamoʻoní. Naʻá ne pehē: “ʻIlonga ha meʻa ʻoku ou fai, ʻoku ou fai koeʻuhi ko e Kosipeli, koeʻuhi ke u ʻinasi ai fakataha mo e kakai kehe.”​—1 Kolinito 9:20-23; Ngāue 22:3-21.

11. (a) Ko e hā naʻe fai ʻe Paula ke kalofi ai ha toutou fehangahangai mo e kau fakafepakí? (e) Ko fē taimi te tau faʻifaʻitaki fakapotopoto nai ai ki he faʻifaʻitakiʻanga ʻa Paulá, pea ʻe anga-fēfē? (f) ʻOku haʻu mei fē ʻa e mālohi ke hanganaki lea loto-toʻá?

¹¹ ʻI he taimi naʻe hanga ai ʻe he fakafepakí ʻo ʻai ke hā ngali sai ange kia Paula ke malanga ʻi ha toe feituʻu kehe ʻi ha taimi, naʻá ne fai pehē kae ʻikai ko e vilitaki pē ke toutou fehangahangai mo e kau fakafepakí. (Ngāue 14:5-7; 18:5-7; Loma 12:18) Ka naʻe ʻikai ʻaupito te ne maaʻi ʻa e ongoongo leleí. (Loma 1:16) Neongo naʻe ʻilo ʻe Paula ʻa e feangainga taʻefakaʻapaʻapa​—pea aʻu ʻo fakamālohi​—ʻa e kau fakafepakí, naʻe “langaʻi ʻa e loto-toʻa fakafou ʻi hotau ʻOtuá” ke ne hanganaki malanga. Naʻá ne pehē: “Ko e ʻEiki naʻa ne ofi  mai, mo ne fakamalohiʻi hoku loto, koeʻuhi ke kakato ʻiate au ʻa e tala ʻo e Kosipeli.” (1 Tesalonaika 2:2, NW; 2 Timote 4:17) Ko e ʻUlu ʻo e fakatahaʻanga Kalisitiané, ʻa Sīsū, ʻokú ne hokohoko atu ke tokonaki mai ʻa e mālohi ʻoku tau fiemaʻu ke faiʻaki ʻa e ngāue naʻá ne tomuʻa tala fekauʻaki mo hotau ʻahó.​—Maake 13:10.

12. Ko e hā ʻokú ne ʻoatu ʻa e fakamoʻoni ʻo e loto-toʻa faka-Kalisitiané, pea ko e hā ʻa e makatuʻunga ki aí?

¹² ʻOku tau maʻu ʻa e ʻuhinga kotoa ke hokohoko atu ʻetau leaʻaki loto-toʻa ʻa e folofola ʻa e ʻOtuá, ʻo hangē ko ia naʻe fai ʻe Sīsū mo e kau sevāniti faitōnunga kehe ʻa e ʻOtuá ʻi he ʻuluaki senitulí. ʻOku ʻikai ke ʻuhinga eni ia ke tau hoko ai ʻo taʻefakaʻatuʻi pe feinga ke fakamālohiʻi ʻa e pōpoakí ki he faʻahinga ko ia ʻoku ʻikai ke nau fiemaʻu iá. Ka ʻoku ʻikai ke tau foʻi koeʻuhi ko e taʻemahuʻingaʻia ʻa e kakaí; pea ʻoku ʻikai ke fakasīlongoʻi kitautolu ʻe he fakafepakí. Hangē ko Sīsuú, ʻoku tau tuhu ki he Puleʻanga ʻo e ʻOtuá ko e puleʻanga totonu ia ki he māmaní kotoa. ʻOku tau lea ʻi he loto-falala koeʻuhi ʻoku tau fakafofongaʻi ʻa Sihova, ʻa e Hau Fakalevelevá, pea koeʻuhi ko e pōpoaki ʻoku tau fanongonongó ʻoku ʻikai meiate kitautolu ka ʻoku meiate ia. Pea ko ʻetau ʻofa kia Sihová ʻoku totonu ko e fakaueʻiloto mālohi taha ia ki heʻetau fakahīkihikiʻi iá.​—Filipai 1:27, 28; 1 Tesalonaika 2:13.

Fetalanoaʻaki Fakamanatu

• Ko e hā ʻoku mahuʻinga ai ke fevahevaheʻaki ʻa e pōpoaki ʻo e Puleʻangá mo e tokotaha kotoa ʻe malavá, ka ko e hā ʻa e ngaahi tali ʻe lava ke tau ʻamanekiná?

• ʻE malava fēfē ke tau fakahāhā ʻoku ʻikai ke tau falala ki hotau mālohi ʻotautolú ʻi heʻetau tauhi kia Sihová?

• Ko e hā ʻa e ngaahi lēsoni mahuʻinga ʻoku tau ako mei he tohi ʻa Ngāué?

[Fehuʻi ki he Ako]

 [Fakatātā ʻi he peesi 173]

Hangē ko ia ʻi he kuohilí, ko e kau sevāniti ʻa Sihova ʻi he ʻaho ní ʻoku nau leaʻaki ʻa e folofola ʻa e ʻOtuá ʻi he loto-toʻa