Ko e ʻĪsiu Kuo Pau Ke Tau Fehangahangai Kotoa mo Ia
Vahe Ono
Ko e ʻĪsiu Kuo Pau Ke Tau Fehangahangai Kotoa mo Ia
1, 2. (a) Ko e hā ʻa e ʻīsiu naʻe langaʻi hake ʻe Sētane ʻi ʻĪtení? (e) ʻOku anga-fēfē hono fakahaaʻi ʻa e ʻīsiu ko iá ʻe he meʻa naʻá ne leaʻakí?
ʻOKÚ KE kau ʻi he ʻīsiu mahuʻinga taha kuo faifai ange pea fehangahangai mo e faʻahinga ʻo e tangatá. Ko e tafaʻaki ko ia ʻokú ke tuʻu ki aí te ne fakapapauʻi ho kahaʻu taʻengatá. Ko e ʻīsiu ko ení naʻe langaʻi hake ia ʻi he taimi naʻe mapuna ai ʻa e angatuʻu ʻi ʻĪtení. ʻI he taimi ko iá naʻe ʻeke ange ʻe Sētane kia ʻIvi: “ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe ʻo e ngouetapu?” Naʻá ne tali kuo pehē ʻe he ʻOtuá fekauʻaki mo e fuʻu ʻakau ʻe taha: “ʻE ʻikai te mo kai mei ai . . . naʻa mo mate.” Naʻe hanga leva ʻe Sētane ʻo tukuakiʻi fakahangatonu ʻa Sihova ʻaki ʻene loi, ʻo pehē ʻoku ʻikai fakatuʻunga ʻa e moʻui ʻa ʻIví pe ko ʻĀtama ʻi he talangofua ki he ʻOtuá. Naʻe taukaveʻi ʻe Sētane naʻe taʻofituʻu ʻe he ʻOtuá mei heʻene ongo meʻamoʻuí ha meʻa ʻoku lelei—ʻa e malava ko ia ke na fokotuʻu pē ʻiate kinaua ʻena ngaahi tuʻunga totonu ki he moʻuí. Naʻe fakahā ʻe Sētane: “ʻOku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.”—Senesi 3:1-5.
2 Ko hono moʻoní, naʻe pehē ʻe Sētane ko e faʻahinga ʻo e tangatá te nau sai ange pē kinautolu ʻi heʻenau fai pē ʻenau filí ʻi haʻanau talangofua ki he ngaahi lao ʻa e ʻOtuá. Naʻá ne poleʻi ai ʻa e founga pule ʻa e ʻOtuá. Naʻe langaʻi hake heni ʻa e ʻīsiu mahuʻinga taha ʻo e tuʻunga-hau fakaleveleva ʻo e ʻOtuá, ʻa ia, ko ʻene totonu ke pulé. Ko e fehuʻi naʻe langaʻi haké: Ko fē ʻoku lelei ange ki he faʻahinga ʻo e tangatá, ko e founga pule ʻa Sihová pe ko e tuʻunga-pule ʻoku tauʻatāina meiate iá? Sai, naʻe mei fakaʻauha ai pē ai ʻe Sihova ʻa ʻĀtama mo ʻIvi, ka naʻe ʻikai mei fakaleleiʻi fakafiemālie ai ʻa e ʻīsiu fekauʻaki mo e tuʻunga-haú. ʻI hono fakaʻatā ke tupulekina ʻa e sōsaieti fakaetangatá ʻi ha vahaʻa taimi lahi, naʻe malava ai ke fakahāhā ʻe he ʻOtuá ʻa e meʻa tofu pē ʻe hanga ʻe he tauʻatāina meiate ia mo ʻene ngaahi laó ʻo tokonaki maí.
3. Ko e hā ʻa e ʻīsiu hono ua naʻe langaʻi hake ʻe Sētané?
3 Ko e ʻohofi ko ia ʻe Sētane ʻa e totonu ʻa Sihova ke pulé naʻe ʻikai ngata ia ʻi he meʻa naʻe hoko ʻi ʻĪtení. Naʻá ne fehuʻia ʻa e mateaki kia Sihová mei he tafaʻaki ʻa e niʻihi kehé. Naʻe hoko eni ko ha ʻīsiu hono ua naʻe felāveʻi vāofi mo ia. Ko ʻene polé naʻe aʻu atu ia ʻo kau fakatouʻosi ki ai ʻa e hako ʻo ʻĀtama mo ʻIví pea mo e kotoa ʻo e ngaahi foha fakalaumālie ʻo e ʻOtuá, ʻo aʻu ki he ʻAlo ʻuluaki mātuʻaki ʻofeina ʻo Sihová. Hangē ko ení, ʻi he ngaahi ʻaho ʻo Siopé, naʻe taukaveʻi ʻe Sētane ko e faʻahinga ʻoku nau tauhi kia Sihová ko ʻenau fai iá, ʻikai ko e fai ko e ʻofa ki he ʻOtuá mo ʻene founga pulé, ka koeʻuhi ko e ngaahi ʻuhinga siokita. Naʻá ne kikihi ko e taimi ko ia te nau tofanga ai ʻi ha faingataʻa, te nau tukulolo kotoa ki he ngaahi holi siokitá.—Siope 2:1-6; Fakahā 12:10.
Meʻa Kuo Fakamoʻoniʻi ʻe he Hisitōliá
4, 5. Ko e hā kuo fakamoʻoniʻi ʻe he hisitōliá ʻo fekauʻaki mo e fakaʻuli pē ʻe he tangatá ʻene laká?
4 Ko ha poini mahuʻinga ʻi he ʻīsiu fekauʻaki mo e tuʻunga-haú, ko eni: Naʻe ʻikai fakatupu ʻe he ʻOtuá ʻa e faʻahinga ʻo e tangatá ke moʻui ʻo tauʻatāina mei heʻene tuʻunga pulé pea hoko ʻo lavameʻa. Ki haʻanau lelei pē naʻá ne ngaohi ai kinautolu ke nau fakafalala ki heʻene ngaahi lao māʻoniʻoní. Naʻe fakahā ʻe he palōfita ko Selemaiá: “ʻOku ou ʻilo, ʻe Sihova, ʻoku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu. Akonakiʻi au, ʻe Sihova.” (Selemaia 10:23, 24) Ko ia ʻoku naʻinaʻi mai ʻa e Folofola ʻa e ʻOtuá: “Falala kia Jihova aki ho loto kotoa; bea oua naa ke faaki ki ho boto oou.” (Palovepi 3:5, PM) Hangē pē ko ia ko hono ngaohi ʻe he ʻOtuá ʻa e faʻahinga ʻo e tangatá ke moʻulaloa ki heʻene ngaahi laó ka nau moʻuí, naʻá ne toe faʻu foki mo e ngaahi lao fakaeʻulungaanga, ʻa ia kapau ʻe fai ha talangofua ki ai te ne ʻomi ha sōsaieti uouangataha.
5 ʻOku hā mahino, naʻe ʻafioʻi ʻe he ʻOtuá ko e fāmili fakaetangatá ʻe ʻikai ʻaupito te ne lavameʻa ʻi hono puleʻi iá taʻekau ai hono tuʻunga pulé. ʻI ha feinga vale ke tauʻatāina mei he pule ʻa e ʻOtuá, kuo hanga ai ʻe he faʻahinga ʻo e tangatá ʻo fokotuʻu ʻa e ngaahi fokotuʻutuʻu kehekehe fakapolitikale, fakaʻekonōmika, pea mo e fakalotu. Ko e ngaahi faikehekehe ko ení kuó ne ʻomi ki he kakaí ʻa e tauʻaki fekeʻikeʻi hokohoko, ʻo iku ai ki he fakamālohi, tau, mo e mate. “Oku bule ae tagata e toko taha ki he toko taha ka e kovi ai ia.” (Koheleti 8:9, PM) Ko e meʻa tofu pē ia kuo hoko ʻi he hisitōlia kotoa ʻo e tangatá. Hangē ko ia naʻe tomuʻa tala ʻe he Folofola ʻa e ʻOtuá, ko e kau tangata fulikivanú mo e kau tangata kākaá kuo nau hokohoko atu ke “fakaʻau mei he kovi ki he kovi.” (2 Timote 3:13) Pea ko e senituli hono 20, ʻa ia kuo nau mātā ai ʻa e aʻu ʻa e tangatá ki he ngaahi tumutumu lahi ʻo e lavameʻa fakasaienisí mo e lavameʻa fakaengāué, kuo nau mātā ʻa e ngaahi fakatamaki lahi taha kuo faifai ange pea hokó. Ko e ngaahi lea ʻa Selemaia 10:23 kuo fakamoʻoniʻi lahi ʻaupito—naʻe ʻikai fakatupu ʻa e faʻahinga ʻo e tangatá ke nau fakaʻuli pē ʻenau laká.
6. ʻE anga-fēfē fakaleleiʻi vave mai ʻe he ʻOtuá ʻa e tauʻatāina ʻa e tangatá meiate iá?
6 Ko e ngaahi nunuʻa fakamamahi mo taimi fuoloa ʻo e tauʻatāina mei he ʻOtuá kuó ne fakahā tā tuʻo taha ko e tuʻunga-pule ʻa e faʻahinga ʻo e tangatá ʻe ʻikai pē ke lavameʻa. Ko e tuʻunga-pule ʻa e ʻOtuá ko e founga pē ia ʻe taha ki he fiefiá, fāʻūtahá, moʻuileleí, pea mo e moʻuí. Pea ʻoku fakahā ʻe he Folofola ʻa e ʻOtuá ko e kātakiʻi ko ia ʻe Sihova ʻa e pule tauʻatāina fakaetangatá kuo ofi ki hono ngataʻangá. (Mātiu 24:3-14; 2 Timote 3:1-5) Kuo vavé ni, ke ne kau mai ʻi he ngaahi meʻa ʻa e faʻahinga ʻo e tangatá ke fakahaaʻi hono tuʻunga-pulé ki he māmaní. ʻOku pehē ʻe he kikite ʻa e Tohitapú: “ʻI he taimi ʻo e ngaahi tuʻi ko ia [ngaahi tuʻunga-pule fakaetangata ʻoku lolotonga tuʻú], ko e ʻOtua ʻo Langi te ne fokotuʻu ha puleʻanga [ʻi hēvani] ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe [ʻikai ʻaupito toe pule ʻa e faʻahinga ʻo e tangatá ʻi māmani]: ka te ne laiki mo fakaʻauha ʻa e ngaahi puleʻanga [lolotonga] ko ia, kae tuʻu pe ia ʻo taʻengata.”—Taniela 2:44.
Hao Atu ki he Māmani Foʻou ʻa e ʻOtuá
7. ʻI he taimi ʻe fakangata ai ʻe he pule ʻa e ʻOtuá ʻa e pule ʻa e tangatá, ko hai ʻe haó?
7 ʻI he taimi ʻe fakangata ai ʻe he pule ʻa e ʻOtuá ʻa e pule ʻa e tangatá, ko hai ʻe haó? ʻOku tali mai ʻe he Tohitapú: “Ko e kau angatonu [faʻahinga ʻoku nau poupouʻi ʻa e totonu ʻa e ʻOtuá ke pulé] te nau nofoʻia ʻa e fonua [“māmaní,” NW], pea ko e haohaoa te ne ʻi ai ai pe. Ka ko e kakai kovi [faʻahinga ʻoku ʻikai ke nau poupouʻi ʻa e totonu ʻa e ʻOtuá ke pulé] ʻe tuʻusi mei he fonua [“māmaní,” NW].” (Palovepi 2:21, 22) Pehē foki, ʻoku fakahā ʻe he tokotaha-tohi-sāmé: “ʻOku toe siʻi pea mole ʻa ia ʻoku faikovi . . . Ko haʻa fai totonu te nau maʻu ʻa e fonua [“māmaní,” NW], pea te nau nofo ai ʻo tuputupuʻa.”—Sāme 37:10, 29.
8. ʻE anga-fēfē hanga ʻe he ʻOtuá ʻo fakatonuhiaʻi fakaʻaufuli hono tuʻunga-haú?
8 Hili hono fakaʻauha ʻa e fokotuʻutuʻu ʻa Sētané, ʻe hanga ʻe he ʻOtuá ʻo fakaava mai hono māmani foʻoú, ʻa ia ʻe toʻo fakaʻaufuli atu ai ʻa e fakamālohi fakatupu maumaú, taú, hongé, faingataʻaʻiá, mahamahakí, pea mo e maté, ʻa ia kuó ne pukenimā ʻa e faʻahinga ʻo e tangatá ʻi he laui afeʻi taʻu. ʻOku fakamatala lelei mai ʻe he Tohitapú ʻa e ngaahi tāpuaki ʻoku fakatatali mai ki he faʻahinga talangofua ʻo e tangatá: “Te ne holoholo [ʻe he ʻOtuá] ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” (Fakahā 21:3, 4) Fakafou ʻi he founga-pule hono Puleʻanga fakahēvaní ʻi he malumalu ʻo Kalaisí, ʻe hanga ai ʻe he ʻOtuá ʻo fakatonuhiaʻi (pe fakamoʻoniʻi) ʻa ʻEne totonu ke hoko ko hotau Haú, ʻa ia, ko hotau Pulé.—Loma 16:20; 2 Pita 3:10-13; Fakahā 20:1-6.
Anga ʻEnau Tali ki he ʻĪsiú
9. (a) Kuo anga-fēfē vakai ʻa e faʻahinga ko ia kuo nau nofo mateaki kia Sihová ki heʻene folofolá? (e) Naʻe anga-fēfē fakamoʻoniʻi ʻe Noa ʻene mateakí, pea ʻe anga-fēfē lava ke tau maʻu ʻaonga mei heʻene faʻifaʻitakiʻangá?
9 ʻI he tukuʻau mai ʻa e hisitōliá, kuo ʻi ai ʻa e kau tangata mo e kau fefine ʻo e tuí kuo nau fakamoʻoniʻi ʻenau mateaki kia Sihova ko e Haú ia. Naʻa nau ʻilo ko ʻenau moʻuí naʻe fakatuʻunga ia ʻi he fanongo mo talangofua kiate iá. Ko Noa ko e taha ia ha tangata naʻe pehē. Ko ia naʻe tala ʻe he ʻOtuá kia Noa: “Kuo ongo mai kiate au kuo aʻu ʻa e kakano kotoa pe ki hono ngataʻanga . . . Ke ke faʻu moʻou ha aake.” Pea naʻe talangofua ʻa Noa ki he fakahinohino ʻa Sihová. Neongo hono fai ha fakatokanga, ko e kakai kehe ʻo e ʻaho ko iá ne hoko atu pē ʻenau moʻuí ʻo hangē naʻe ʻikai ha meʻa ngali kehe ia naʻe teu ke hokó. Ka naʻe langa ʻe Noa ia ha fuʻu ʻaʻake kāfakafa pea femoʻuekina he malanga ki he niʻihi kehé ʻo fekauʻaki mo e ngaahi founga māʻoniʻoni ʻa Sihová. ʻOku hoko atu ʻa e fakamatalá ʻo pehē: “Pea fai ʻe Noa; ʻilonga ha meʻa naʻe tuʻutuʻuni kiate ia ʻe he ʻOtua, naʻa ne fai ia.”—Senesi 6:13-22; Hepelu 11:7; 2 Pita 2:5.
10. (a) Naʻe anga-fēfē hono poupouʻi ʻe ʻĒpalahame mo Sela ʻa e tuʻunga-hau ʻo Sihová? (e) ʻI he founga fē ʻe lava ke tau maʻu ʻaonga ai mei he faʻifaʻitakiʻanga ʻa ʻĒpalahame mo Selá?
10 Ko ʻĒpalahame mo Selá ko e toe ongo faʻifaʻitakiʻanga lelei kinaua ʻi hono poupouʻi ʻa e tuʻunga-hau ʻo Sihová, ʻo fai ha meʻa pē naʻá ne fekau kiate kinaua. Naʻá na nofo ʻi ʻUa ʻo e kau Kalitiá, ko ha kolo koloaʻia. Ka ʻi he taimi naʻe tala ai ʻe Sihova kia ʻĒpalahame ke ʻalu ki ha fonua kehe, ko ha fonua ʻa ia naʻe ʻikai te ne maheni mo ia, ko ʻĒpalahamé naʻe “hiki . . . ʻo hange ko e folofola ʻa Sihova kiate ia.” Ko Selá ʻoku ʻikai ha veiveiua naʻá ne maʻu ha founga moʻui fiemālie—ʻi ai e ʻapi, ngaahi kaungāmeʻa, mo e kāinga. Neongo ia, naʻá ne anganofo kia Sihova pea ki hono husepānití peá ne ʻalu ki he fonua ko Kēnaní, neongo naʻe ʻikai te ne ʻilo ʻa e ngaahi tuʻunga naʻe fakatatali mai kiate ia mei aí.—Senesi 11:31–12:4; Ngāue 7:2-4.
11. (a) ʻI he malumalu ʻo e ngaahi tuʻunga fē naʻe poupouʻi ai ʻe Mōsese ʻa e tuʻunga-hau ʻo Sihová? (e) ʻE ʻaonga fēfē nai ʻa e faʻifaʻitakiʻanga ʻa Mōsesé kiate kitautolu?
11 Ko Mōsese ko ha toe tokotaha ia naʻá ne poupouʻi ʻa e tuʻunga-hau ʻo Sihová. Pea naʻá ne fai eni ʻi he malumalu ʻo e ngaahi tuʻunga faingataʻa tahá—ko e fehangahangai mata ki he mata mo Felo ʻo ʻIsipité. ʻOku ʻikai ʻuhinga eni naʻe falala-kia-kita ʻa Mōsese. ʻI hono kehé, naʻá ne veiveiua ʻi heʻene malava ko ia ke lea lelei feʻungá. Ka naʻá ne talangofua kia Sihova. ʻI he poupou ʻa Sihová pea mo e tokoni ʻa hono tokouá, ʻa ʻĒlone, naʻe toutou tala ai ʻe Mōsese ʻa e folofola ʻa Sihová kia Felo loto-fefeka. Naʻa mo e niʻihi ʻo e ngaahi foha ʻo ʻIsilelí naʻa nau fakaangaʻi fefeka ʻa Mōsese. Neongo ia, naʻe mateaki pē ʻa Mōsese ʻi hono fai ʻa e meʻa kotoa pē naʻe fekau ʻe Sihova kiate iá, pea fakafou ʻiate ia, naʻe fakatauʻatāinaʻi ai ʻa ʻIsileli mei ʻIsipite.—Ekisoto 7:6; 12:50, 51; Hepelu 11:24-27.
12. (a) Ko e hā ʻokú ne fakahaaʻi ko e mateaki kia Sihová ʻoku kaunga ki ai ʻa e meʻa lahi ange ia ʻi hono fai pē ʻa e meʻa kuo fakamahino ʻe he ʻOtuá ʻi hano tohi? (e) ʻE anga-fēfē nai hono hanga ʻe he mahinoʻi ʻo e faʻahinga mateaki ko ení ʻo tokoniʻi kitautolu ke ngāueʻaki ʻa e 1 Sione 2:15?
12 Ko e faʻahinga ko ia naʻa nau mateaki kia Sihová naʻe ʻikai te nau fakaʻuhinga ʻo pehē ko e meʻa pē naʻe fiemaʻú ko e talangofua ki he meʻa kuo ʻai ʻe he ʻOtuá ke tohí. ʻI he taimi naʻe feinga ai ʻa e uaifi ʻo Pōtifá ke fakataueleʻi ʻa Siosifa ke fai ha fehokotaki tono mo iá, naʻe ʻikai ke ʻi ai ha fekau ia kuo tohi mei he ʻOtuá ʻo tapui ʻa e tonó. Kae kehe, naʻe ʻilo ʻa Siosifa ia fekauʻaki mo e fokotuʻutuʻu fakaemali naʻe fokotuʻu ʻe Sihova ʻi ʻĪtení. Naʻá ne lāuʻilo ko e fai ko ia ha fehokotaki fakasino mo e uaifi ʻo ha tokotaha kehe ʻe taʻefakahōifua ia ki he ʻOtuá. Naʻe ʻikai saiʻia ʻa Siosifa ke ʻahiʻahiʻi ʻa e ngaahi ngataʻanga ʻe fakaʻatā ai ʻe he ʻOtuá ke ne hangē ko e kau ʻIsipité. Naʻá ne poupouʻi ʻa e ngaahi founga ʻa Sihová ʻaki ʻene fakalaulauloto ki he ngaahi feangainga ʻa e ʻOtuá mo e faʻahinga ʻo e tangatá peá ne ngāueleleiʻaki leva ʻa e meʻa naʻá ne ʻilo ko e finangalo ia ʻo e ʻOtuá.—Senesi 39:7-12; Sāme 77:11, 12.
13. Naʻe fakamoʻoniʻi fēfē ko e Tēvoló ko e tokotaha-loi ʻi he fekauʻaki (a) mo Siopé? (e) mo e toko tolu Hepeluú?
13 Neongo kapau ʻe mātuʻaki tuku atu ke ʻahiʻahiʻi, ko e faʻahinga ko ia ʻoku nau ʻiloʻi moʻoni ʻa Sihová ʻe ʻikai te nau tafoki meiate ia. Naʻe tukuakiʻi ʻe Sētane kapau ʻe mole meia Siope ʻa ʻene ngaahi ʻotu koloá pe ko ʻene moʻuileleí, naʻa mo ia—ʻa ia naʻe fakaongoongoleleiʻi ʻe Sihová—te ne siʻaki ʻa e ʻOtuá. Ka naʻe fakamoʻoniʻi ʻe Siope ko e tokotaha-loi ʻa e Tēvoló, neongo naʻe ʻikai ke ʻiloʻi ʻe Siope tonu ʻa e ʻuhinga naʻe kāpui ai ia ʻe he faingataʻá. (Siope 2:9, 10) Hili ha laui senituli mei ai, ʻi heʻene kei feinga ke fakamoʻoniʻi ʻene poiní, naʻe fakatupunga ai ʻe Sētane ha tuʻi houhau lahi ʻo Pāpilone ke ne fakamanamanaʻi ha kau talavou Hepelū ʻe toko tolu ʻaki ʻa e mate ʻi ha fōnise afi, kapau heʻikai te nau punou ʻo lotu ki he ʻīmisi naʻe fokotuʻu ʻe he tuʻí. ʻI he pau ke fai ha fili pe ko e talangofua ki he fekau ʻa e tuʻí pe ko e talangofua ki he lao ʻa Sihova fekauʻaki mo e lotu ʻaitolí, naʻa nau tuʻukāivi ʻi hono ʻai ke ʻiloʻi ʻoku nau tauhi ʻa Sihova pea ko ia honau Hau Aoniú. Ko e faitōnunga ki he ʻOtuá naʻe mahuʻinga ange ia kiate kinautolu ʻi heʻenau moʻui lolotongá!—Taniela 3:14-18.
14. ʻOku malava fēfē kiate kitautolu faʻahinga taʻehaohaoa ʻo e tangatá ke tau fakamoʻoniʻi ʻoku tau mateaki moʻoni kia Sihova?
14 Te tau fakaʻosiʻaki nai mei he ngaahi faʻifaʻitakiʻanga peheé ko e hoko ʻo mateaki kia Sihová, ko e tokotaha ko iá kuo pau ke haohaoa pe ko e tokotaha ʻokú ne fai ha halá kuó ne mātuʻaki tō? ʻIkai ʻaupito! ʻOku tala mai ʻe he Tohitapú kiate kitautolu naʻe tōnounou ʻa Mōsese ʻi he taimi ki he taimi. Neongo naʻe ʻikai hōifua ai ʻa Sihova, naʻe ʻikai ke ne talitekeʻi ai ʻa Mōsese. Ko e kau ʻapositolo foki ʻa Sīsū Kalaisí naʻe ʻi ai mo honau ngaahi vaivaiʻanga. ʻI heʻetau fakakaukau atu ki he tukufakaholo ʻiate kitautolu ʻa e taʻehaohaoá, ʻe fakahōifua kia Sihova kapau ʻoku ʻikai ke tau tukunoaʻi fakakaukauʻi pē hono finangaló ʻi ha faʻahinga tuʻunga. Kapau koeʻuhi ko haʻatau vaivai ʻoku tau hoko ai ʻo faihalá, ʻoku mahuʻinga ke tau fakatomala moʻoni pea ʻoua ʻe tōʻongaʻaki ʻa e hala ko iá. ʻI he founga ko ení ʻoku tau fakahāhā ai ʻoku tau ʻofa moʻoni ki he meʻa ʻoku folofolaʻaki ʻe Sihova ʻoku leleí pea fehiʻa ki he meʻa ʻokú ne fakahā ʻoku koví. Makatuʻunga ʻi heʻetau tui ko ia ki he mahuʻinga ʻo e fakalelei angahala ʻa e feilaulau ʻa Sīsuú, ʻe lava ke tau maʻu ha tuʻunga maʻa ʻi he ʻao ʻo e ʻOtuá.—Emosi 5:15; Ngāue 3:19; Hepelu 9:14.
15. (a) Ko hai ia ʻi he haʻohaʻonga kotoa ʻo e faʻahinga ʻo e tangatá naʻá ne tauhi maʻu ʻa e anga-tonu haohaoa ki he ʻOtuá, pea ko e hā naʻe fakamoʻoniʻi ʻe he meʻá ni? (e) ʻOku tokoniʻi fēfē kitautolu ʻe he meʻa naʻe fai ʻe Sīsuú?
15 Kae kehe, meʻa ní ko e talangofua haohaoa ki he tuʻunga-hau ʻo Sihová ʻoku ʻikai pē malava ia ki he faʻahinga ʻo e tangatá? Ko e tali ki hení naʻe hangē ia ha “fakalilolilo toputapu” ʻi ha taʻu nai ʻe 4,000. (1 Timote 3:16, NW) Ko ʻĀtama, neongo naʻe fakatupu haohaoa ia, naʻe ʻikai te ne fokotuʻu ha faʻifaʻitakiʻanga haohaoa ʻo e anga-līʻoa fakaʻotuá. Ko ia ko hai te ne lavá? ʻE hala ʻaupito pē ha taha ia ʻi hono hako angahalaʻiá. Ko e tangata pē taha ke fai peheé ko Sīsū Kalaisi. (Hepelu 4:15) Ko e meʻa naʻe fakahoko ʻe Sīsuú naʻe fakamoʻoniʻi ai ko ʻĀtamá, ʻa ia naʻe faingamālie ange hono ngaahi tuʻungá, naʻá ne mei malava pē ke tauhi maʻu ʻene anga-tonu haohaoá kapau naʻá ne loto ki ai. Ko e fehālaakí naʻe ʻikai ʻi he ngāue fakaefakatupu ia ʻa e ʻOtuá. Ko ia ai ko Kalaisi ʻa e faʻifaʻitakiʻanga ʻoku tau kumi ke faʻifaʻitaki ki ai ʻi hono fakahāhaaʻi ʻo ʻikai ngata pē ʻi he talangofua ki he lao fakaʻotuá kae pehē foki ki he līʻoa fakafoʻituitui kia Sihová, ʻa e Hau Fakalevelevá.—Teutalonome 32:4, 5.
Ko e Hā ʻEtau Tali Fakafoʻituituí?
16. Ko e hā kuo pau ai ke tau mateuteu maʻu pē fekauʻaki mo ʻetau fakakaukau ki he tuʻunga-hau ʻo Sihová?
16 Ko e tokotaha taki taha ʻo kitautolu he ʻaho ní kuo pau ke tau fehangahangai mo e ʻīsiu ko ia ʻo e tuʻunga-hau fakalevelevá. Kapau kuo tau fakahā fakahāhā ʻoku tau kau ʻi he tafaʻaki ʻa Sihová, ʻoku tāketi mai leva ʻa Sētane kiate kitautolu. ʻOkú ne ʻomi ʻa e faingataʻa mei he tafaʻaki kotoa pē pea te ne hokohoko atu ke fai pehē ʻo aʻu ki he ngataʻanga ʻo e fokotuʻutuʻu ʻo ʻene ngaahi meʻa fulikivanú. Kuo pau ke ʻoua naʻa tau fakaʻatā ke homo ʻetau maluʻí. (1 Pita 5:8) ʻOku fakahā heʻetau tōʻongá ʻa e feituʻu ʻoku tau tuʻu ki ai ʻi he ʻīsiu mahuʻinga taha ko ia ʻo e tuʻunga-hau ʻo Sihová pea mo e ʻīsiu hono ua ʻo e tauhi anga-tonu ki he ʻOtuá ʻi he malumalu ʻo e ʻahiʻahí. ʻOku ʻikai totonu ke tau vakai ki he tōʻonga taʻemateakí ʻoku taʻemahuʻinga koeʻuhí pē ʻoku failahia ia ʻi he māmaní. Ko hono tauhi maʻu ʻa e anga-tonú ʻoku fiemaʻu ke tau feinga ke ngāueʻaki ʻa e ngaahi founga māʻoniʻoni ʻa Sihová ʻi he meʻa kotoa pē ʻo e moʻuí.
17. Ko e hā ʻa e meʻa fekauʻaki mo e loí mo e kaihaʻá ʻoku totonu ai ke tau fakaʻehiʻehi mei aí?
17 Ko e fakatātaá, ʻe ʻikai lava ke tau faʻifaʻitaki kia Sētane, ʻa ia ko e “tamai ʻo e loí.” (Sione 8:44, NW) Kuo pau ke tau faitotonu ʻi heʻetau feangainga kotoa pē. ʻI he fokotuʻutuʻu ʻa Sētané, ko e kau talavoú ʻoku ʻikai ke nau faʻa faitotonu ki heʻenau ngaahi mātuʻá. Ka ʻoku fakaʻehiʻehi ʻa e kau talavou Kalisitiané ia mei heni, pea nau fakamoʻoniʻi ai ʻoku taʻemoʻoni ʻa e tukuakiʻi ko ia ʻe Sētane ʻe hanga ʻe he kakai ʻa e ʻOtuá ʻo siʻaki ʻenau anga-tonú ʻi he malumalu ʻo e ʻahiʻahí. (Siope 1:9-11; Palovepi 6:16-19) Pea ʻoku ʻi ai ʻa e ngaahi tōʻonga fakapisinisi te ne fakakau nai ai ha taha mo e “tamai ʻo e loí” kae ʻikai ko e ʻOtua ʻo e moʻoní. Ko e ngaahi meʻá ni, tau fakaʻehiʻehi mei ai. (Maika 6:11, 12) Pehē foki, ko e kaihaʻá ʻoku ʻikai pē fakatonuhiaʻi ia, ʻo aʻu kapau ʻoku masiva ha taha pe kapau ko e tokotaha ʻoku kaihaʻasi mei ai ʻa e ngaahi meʻá ʻoku tuʻumālie. (Palovepi 6:30, 31; 1 Pita 4:15) Neongo kapau ko ha tōʻonga anga-maheni ia ʻi he feituʻu ʻoku tau nofo aí pe kapau ko e meʻa ʻoku ʻavé ʻoku siʻisiʻi, ko e kaihaʻá ʻoku kei fepaki pē ia mo e ngaahi lao ʻa e ʻOtuá.—Luke 16:10; Loma 12:2; Efeso 4:28.
18. (a) ʻI he ngataʻanga ʻo e Pule Taʻu ʻe Afe ʻa Kalaisí, ko e hā ʻa e ʻahiʻahi ʻe hoko mai ki he faʻahinga kotoa ʻo e tangatá? (e) Ko e hā ʻa e tōʻonga ʻoku totonu ke tau fakatupulekina he taimi ní?
18 Lolotonga ʻa e Pule Taʻu ʻe Afe ʻa Kalaisí, ko Sētane mo ʻene kau tēmenioó te nau ʻi he luó, ʻo taʻemalava ke uesia ʻa e faʻahinga ʻo e tangatá. He toki meʻa fakafiemālie ē! Ka ʻi he hili ʻa e taʻu ʻe afé, ʻe tuku ange mai kinautolu ʻi ha kiʻi taimi siʻi. Ko Sētane mo e faʻahinga ʻoku muimui ʻiate iá te nau lōmekina ʻa e faʻahinga kuo fakafoʻou ʻo e tangatá ʻa ia ʻoku nau tauhi maʻu ʻenau anga-tonu ki he ʻOtuá. (Fakahā 20:7-10) Kapau ko hotau monū ia ke moʻui ʻi he taimi ko iá, ʻe anga-fēfē haʻatau fakafeangai fekauʻaki mo e ʻīsiu ʻo e tuʻunga-hau fakalevelevá? Koeʻuhi ko e faʻahinga kotoa ʻo e tangatá te nau haohaoa ʻi he taimi ko iá, ko ha faʻahinga tōʻonga taʻemateaki pē ʻe fai ia ʻi he ʻiloʻilo pau pea ʻe iku ia ki he fakaʻauha taʻengata. He mahuʻinga ē ke tau fakatupulekina he taimí ni ha tōʻonga ʻo e tali lelei ha fakahinohino pē ʻoku ʻomai ʻe Sihova kiate kitautolu, tatau ai pē pe ʻoku fakafou mai ʻi heʻene Folofolá pe fakafou mai ʻi heʻene kautahá! ʻI he fai peheé, ʻoku tau fakahā ai ʻetau līʻoa moʻoni kiate ia ko e Hau Fakalevelevá.
Fetalanoaʻaki Fakamanatu
• Ko e hā ʻa e ʻīsiu lahi kuo pau ke tau fehangahangai kotoa mo iá? Naʻe anga-fēfē ʻetau kaunga atu ki aí?
• Ko e hā ʻoku fisi-ki-tuʻa fekauʻaki mo e ngaahi founga naʻe hanga ai ʻe he kau tangata mo e kau fefine ʻo e ngaahi taimi muʻá ʻo fakamoʻoniʻi ʻenau anga-tonu kia Sihová?
• Ko e hā ʻoku mahuʻinga ai ke tau fakalāngilangiʻi ʻa Sihova ʻaki ʻetau tōʻongá ʻi he ʻaho taki taha?
[Fehuʻi ki he Ako]
