Vahe Taha Ua

Ko e ʻUhinga ʻo Hoʻo Papitaisó

1. Ko e hā ʻoku totonu ai ke hoko ʻa e papitaiso ʻi he vaí ko e meʻa mahuʻinga fakafoʻituitui kiate kitautolu taki taha?

 ʻI HE taʻu 29 T.S., naʻe papitaiso ai ʻa Sīsū, ʻo fakauku ʻe Sione Papitaiso ʻi he Vaitafe Sioataní. Ko Sihova tonu naʻá ne ʻafio ki ai pea fakahāhaaʻi ʻene hōifua ai. (Mātiu 3:16, 17) Naʻe fokotuʻu ai ʻe Sīsū ha sīpinga ke muimui kotoa ai ʻene kau ākongá. Hili ʻa e taʻu ʻe tolu mo e konga mei ai, naʻe ʻoange ai ʻe Sīsū ʻa e ngaahi fakahinohino ko eni ki heʻene kau ākongá: “Kuo tuku kiate au ʻa e pule kotoa pe ʻi langi pea ki mamani. Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni.” (Mātiu 28:18, 19) Kuó ke ʻosi papitaiso ʻo fehoanaki mo e meʻa naʻe fakahinohino heni ʻe Sīsuú? Kapau ʻoku ʻikai, ʻokú ke teuteu atu ke fai pehē?

2. ʻI he felāveʻi mo e papitaisó, ko e hā ʻa e ngaahi fehuʻi ʻoku fiemaʻu ke talí?

² Ki ha taha pē ʻo e ongo tuʻungá, ko hano mahinoʻi māʻalaʻala ʻa e papitaisó ʻoku mahuʻinga ia ki he tokotaha kotoa pē ʻokú ne loto ke tauhi ʻa Sihova pea moʻui ʻi heʻene māmani foʻou māʻoniʻoní. Ko e ngaahi fehuʻi ʻoku tuha mo ha talí ʻoku kau ai eni: ʻOku maʻu ʻe he papitaiso faka-Kalisitiane ʻi he ʻaho ní ʻa e ʻuhinga tatau mo ia ʻo e papitaiso ʻo Sīsuú? Ko e hā ʻa e ʻuhinga ʻo e papitaiso “ki he huafa ʻo e Tamai mo e ʻAlo mo e Laumalie Maʻoniʻoni”? Ko e hā ʻoku kau atu ʻi he moʻui ʻo fakatatau mo e meʻa ʻoku fakatātaaʻi ʻe he papitaiso faka-Kalisitiane ʻi he vaí?

Ngaahi Papitaiso Naʻe Fai ʻe Sioné

3. Ko hai naʻe fakangatangata ki ai ʻa e papitaiso ʻa Sioné?

³ Fakafuofua ki he māhina ʻe ono ki muʻa ʻi hono papitaiso  ʻo Sīsuú, naʻe ʻalu ai ʻa Sione Papitaiso ʻo malanga ʻi he toafa ʻo Siuteá, ʻo pehē: “Mou fakatomala, he kuo ofi ʻa e Puleʻanga ʻo e Langi.” (Mātiu 3:1, 2) Naʻe fanongo ʻa e kakaí ki he meʻa naʻe leaʻaki ʻe Sioné pea nau fai ki ai. Naʻa nau vete fakahāhā ʻenau ngaahi angahalá, fakatomalaʻi ia, pea nau haʻu leva kia Sione ke papitaiso kinautolu ʻi he Vaitafe Sioataní. Ko e papitaiso ia maʻá e kau Siú.​—Luke 1:13-16; Ngāue 13:23, 24.

4. Ko e hā naʻe fiemaʻu fakavavevave ai ki he kau Siu ʻi he ʻuluaki senitulí ke nau fakatomalá?

⁴ Ko e kau Siu ko iá naʻe fiemaʻu fakavavevave ki ai ʻa e fakatomala. ʻI he Moʻunga Sainaí ʻi he taʻu 1513 K.M., naʻe hū atu ai ʻenau fanga kuí ki ha fuakava fakapuleʻanga​—ko ha felotoi molumalu mo fakaʻofisiale​—pea mo Sihova ko e ʻOtuá. Ka koeʻuhi ko ʻenau ngaahi angahala mamafá, naʻe ʻikai ai ke nau moʻui ʻo fakatatau mo honau ngaahi fatongia ʻi he malumalu ʻo e fuakava ko iá, ko ia naʻe fakahalaiaʻi ai kinautolu ʻe he fuakavá. ʻI he aʻu mai ki he ʻaho ʻo Sīsuú ko honau tuʻungá naʻe ʻi ha tuʻunga fakatuʻutāmaki. Naʻe ofi “ʻa e ʻaho ʻo Sihova, ʻa e ʻaho lahi mo fakalilifu” ʻa ia naʻe tomuʻa tala ʻe Malakaí. ʻI he 70 T.S., ko e “ʻaho” ko iá naʻe hoko ia ʻi he taimi naʻe fakaʻauha ai ʻe he kau Lomá ʻa Selusalemá, ko hono temipalé, pea mo e kau Siu laka hake he milioná. Ko Sione Papitaiso, ʻi heʻene faivelenga fekauʻaki mo e lotu moʻoní, naʻe fekauʻi muʻomuʻa atu ia ʻi he fakaʻauha ko iá, “ke teuʻi maʻa e ʻEiki ʻa e kakai ne tokonaki.” Naʻe fiemaʻu ke nau fakatomalaʻi ʻenau ngaahi angahala fekauʻaki mo e fuakava Lao ʻa Mōsesé pea ke mateuteu ke tali ʻa e ʻAlo ʻo e ʻOtuá, ʻa Sīsū, ʻa ia naʻe fekauʻi ʻe Sihova kiate kinautolú.​—Malakai 4:4-6; Luke 1:17; Ngāue 19:4.

5. (a) ʻI he haʻu ʻa Sīsū ke papitaisó, ko e hā naʻe fehuʻia ai ʻe Sione ʻa e meʻá ni? (e) Ko e hā naʻe fakatātaaʻi ʻe he papitaiso ʻo Sīsuú?

⁵ Naʻe kau ʻi he faʻahinga ko ia naʻa nau haʻu kia Sione ke papitaisó ʻa Sīsū tonu. Ka ko e hā hono ʻuhingá? ʻI heʻene  ʻiloʻi naʻe ʻikai ha angahala ʻa Sīsū ke veté, naʻe pehē ai ʻe Sione: “Naʻe totonu muʻa ke u papitaiso ʻiate koe, pea ʻoku ke haʻu koā kiate au?” Ka ko e papitaiso ia ʻo Sīsuú naʻá ne fakatātaaʻi ʻe ia ʻa e meʻa kehe. Ko ia naʻe tali ʻe Sīsū: “Tukuange pe ʻi he taimi ni: he ʻoku taau pehe mo kitaua ke fakakakato ʻae tuʻutuʻuni kotoa pe.” (Mātiu 3:13-15) Koeʻuhi naʻe ʻikai ha angahala ʻa Sīsū, ko hono papitaisó naʻe ʻikai ko ha fakatātā ia ʻo haʻane fakatomalaʻi ha angahala; hala ha fiemaʻu ke ne fakatapui ia ki he ʻOtuá, koeʻuhi ko ha mēmipa ia ʻo ha puleʻanga naʻe ʻosi fakatapui kia Sihova. Ka, ko hono papitaiso ia ʻi hono taʻu 30 naʻe makehe ia kiate ia, pea naʻe fakatātaaʻi ʻe heʻene papitaisó ʻa hono foaki atu ia tonu ki heʻene Tamai fakahēvaní ke fai Hono finangaló.

6. Naʻe fakamātoato fēfē ʻa Sīsū fekauʻaki mo hono fai ʻa e finangalo ʻo e ʻOtuá kiate iá?

⁶ Ko e finangalo ʻo e ʻOtuá kia Kalaisi Sīsuú naʻe kau ai ʻa e ngāue felāveʻi mo e Puleʻangá. (Luke 8:1) Naʻe toe kau ai ʻa e feilaulauʻi ʻene moʻui haohaoa fakaetangatá ko ha huhuʻi pea mo e makatuʻunga ki ha fuakava foʻou. (Mātiu 20:28; 26:26-28; Hepelu 10:5-10) Naʻe tokanga fakamātoato ʻa Sīsū ki he meʻa naʻe fakatātaaʻi ʻe heʻene papitaiso ʻi he vaí. Naʻe ʻikai te ne fakaʻatā ʻene tokangá ke ofeʻi ki he ngaahi meʻa kehé. Ki he ngataʻanga ʻo ʻene moʻui fakaemāmaní, naʻá ne nofo maʻu ki hono fai ʻa e finangalo ʻo e ʻOtuá, ʻo ʻai ʻa hono malangaʻi ʻa e Puleʻanga ʻo e ʻOtuá ko ʻene ngāue tefitó ia.​—Sione 4:34.

Papitaiso ʻi he Vaí ʻa e Kau Ākonga Kalisitiané

7. Talu mei he Penitekosi 33 T.S., ko e hā ʻa e ngaahi meʻa naʻe tala ki he kau Kalisitiané ke nau fai felāveʻi mo e papitaisó?

⁷ Ko e muʻaki kau ākonga ʻa Sīsuú naʻe papitaiso kinautolu ʻi he vaí ʻe Sione pea toki tataki leva kia Sīsū ko e kau mēmipa ka hoko ʻo e Puleʻanga fakahēvaní. (Sione 3:25-30) ʻI he malumalu ʻo e tataki ʻa Sīsuú naʻe toe fai ʻe he kau ākonga ko ení ha papitaiso, ʻa ia naʻe ʻuhinga tatau mo e papitaiso  ʻa Sioné. (Sione 4:1, 2) Kae kehe, kamata mei he Penitekosi 33 T.S., naʻa nau kamata ai ke fakahoko ʻa e fekau ke papitaiso “ʻi he Huafa ʻo e Tamai mo e ʻAlo mo e Laumalie Maʻoniʻoni.” (Mātiu 28:19) Te ke ʻilo ʻoku mātuʻaki ʻaonga ke fakamanatu ʻa e ʻuhinga ʻo e meʻa ko iá.

8. Ko e hā ʻa e ʻuhinga ʻo e hoko ʻo papitaiso “ʻi he huafa ʻo e Tamai”?

⁸ Ko e hā ʻa e ʻuhinga ʻo e hoko ʻo papitaiso “ʻi he huafa ʻo e Tamai”? ʻOku ʻuhinga iá ko hono tali hono huafá, tuʻungá, mafaí, taumuʻá, pea mo ʻene ngaahi laó. Fakakaukau ki he meʻa ʻoku kau ki he meʻá ni. (1) Fekauʻaki mo hono huafá, ʻoku pehē ʻe he Sāme 83:18: “Ko ho huafa ko Sihova ʻoku hope atu ʻi mamani katoa.” (2) Fekauʻaki mo hono tuʻungá, ʻoku pehē ʻe he 2 Tuʻi 19:15 (NW): “ʻE Sihova . . . ko koe pē ʻa e ʻOtua moʻoní.” (3) Fekauʻaki mo hono mafaí, ʻoku tala mai kiate kitautolu ʻe he Fakahā 4:11: “Tāu pē Koe, ʻa e ʻAfiona [“Sihova,” NW] ko homau ʻOtua, ke lau ki ai ʻa e kololia, mo e fakaʻapaʻapa, mo e mafai: he ko koe ia naʻa ke ngaohi ʻa e meʻa kotoa pē, pea naʻa nau ʻi ai, pea naʻe ngaohi kinautolu, koeʻuhi pē ko ho finangalo ia.” (4) Kuo pau foki ke tau ʻiloʻi ko Sihová ko e Tokotaha Foaki-Moʻuí ia, ʻa ia ʻokú ne taumuʻa ke fakahaofi kitautolu mei he angahalá mo e maté: “Oku ia Jihova ae fakamoui.” (Sāme 3:8, PM; Sāme 36:9) (5) ʻOku fiemaʻu ke tau tali ko Sihová ko e Foaki-Lao Taupotú ia: “Ko Sihova ko hotau fakamaau, ko Sihova ko hatau fai-fono, ko Sihova ko hotau tuʻi.” (Aisea 33:22) Koeʻuhi ʻoku ʻo Sihova kotoa ʻa e ngaahi meʻa ko iá, ʻoku ekinaki ai kitautolu: “Ke ke ofa kia Jihova ko ho Otua aki ho laumalie kotoa, mo hoo moui kotoa, mo ho loto kotoa.”​—Mātiu 22:37, PM.

9. Ko e hā ʻa e ʻuhinga ʻo e hoko ʻo papitaiso “ʻi he huafa . . . ʻo e ʻAlo”?

⁹ Ko e hā ʻa e ʻuhinga ʻo e papitaiso “ʻi he huafa . . . ʻo e ʻAlo”? ʻOku ʻuhinga iá ko hono ʻiloʻi ʻa e huafa, tuʻunga, mo e mafai ʻo Sīsū Kalaisí. Ko hono huafá, ʻa e Sīsuú, ʻoku ʻuhinga ia ko “Sihova ko e Fakamoʻui.” ʻOku haʻu hono tuʻungá mei he moʻoniʻi meʻa ko ia ko e ʻAlo-tofu-pē-taha-ne-fakatupu ia ʻo e  ʻOtuá, ko e ʻuluaki ʻi he fakatupu ʻa e ʻOtuá. (Mātiu 16:16; Kolose 1:15, 16) Fekauʻaki mo e ʻAlo ko ení, ʻoku tala mai ʻe he Sione 3:16 kiate kitautolu: “Naʻe ʻofa pehe ʻa e ʻOtua ki mamani [ʻo e faʻahinga ala ke huhuʻi ʻo e tangatá], ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” Koeʻuhi naʻe pekia faitōnunga ʻa Sīsū, naʻe toe fokotuʻu ia ʻe he ʻOtuá mei he pekiá pea foaki kiate ia ʻa e mafai foʻou. Fakatatau ki he ʻapositolo ko Paulá, “naʻe matuʻaki hakeakiʻi ai [ʻa Sīsū]” ʻe he ʻOtuá ʻi he ʻunivēsí, ʻo fika ua hake pē kia Sihova. Ko e ʻuhinga ia “ʻilonga ha tui . . . pea peluki ʻi he huafa ʻo Sisu; pea ʻilonga ha ʻelelo, pea fakamoʻoni ko e ʻEiki ʻa Sisu Kalaisi—moʻo fakalangilangiʻi ʻa e ʻOtua ko e Tamai.” (Filipai 2:9-11) ʻOku ʻuhinga ení ko e talangofua ki he ngaahi fekau ʻa Sīsuú, ʻa ia ko e haʻu meia Sihova tonu.​—Sione 15:10.

10. Ko e hā ʻa e ʻuhinga ʻo e hoko ʻo papitaiso “ʻi he huafa . . . ʻo e Laumalie Maʻoniʻoni”?

¹⁰ Ko e hā ʻa e ʻuhinga ʻo e hoko ʻo papitaiso “ʻi he huafa . . . ʻo e Laumlie Maʻoniʻoni”? ʻOku ʻuhinga iá ko e ʻiloʻi ʻa e ngafa mo e ngāue ʻa e laumālie māʻoniʻoní. Pea ko e hā ʻa e laumālie māʻoniʻoni? Ko e ivi ngāue ia ʻo Sihová, ʻa ia ʻokú ne fakahokoʻaki ʻene ngaahi taumuʻá. Naʻe tala ange ʻe Sīsū ki hono kau muimuí: “Te u tala ki he Tamai, pea te ne foaki kiate kimoutolu ha Taukapo ʻe toko taha, koeʻuhi ke ne ʻiate kimoutolu ʻo taʻengata; ʻio, ko e Laumālie ʻo e Moʻoni.” (Sione 14:16, 17) Ko e hā ʻe fakamafeia kinautolu ʻe he meʻá ni ke nau faí? Naʻe toe tala ange ʻe Sīsū kiate kinautolu: “Te mou maʻu pe ha mālohi, ʻo ka hifo ʻa e Laumālie Maʻoniʻoni kiate kimoutolu: pea te mou hoko ko ʻeku kau fakamoʻoni, ʻo ʻikai ʻi Selusalema pe, ka ʻi Siutea kātoa, mo Samelia, ʻio, ʻo aʻu ki he ngataʻanga ʻo māmani.” (Ngāue 1:8) Fakafou ʻi he laumālie māʻoniʻoní, naʻe toe fakamānavaʻi ai ʻe Sihova ʻa hono tohi ʻo e Tohitapú: “He kuo teʻeki siʻi ke ʻomeia ha palofisai ʻi he tuʻutuʻuni ʻa e tangata: ka naʻe lea mei he ʻOtua ha  kau tangata ʻi he takina kinautolu ʻe he Laumalie Maʻoniʻoni.” (2 Pita 1:21) Ko ia ʻoku tau ʻiloʻi ʻa e ngafa ʻo e laumālie māʻoniʻoní ʻi he taimi ʻoku tau ako ai ʻa e Tohitapú. Ko e toe founga ʻe taha ʻoku tau ʻiloʻi ai ʻa e laumālie māʻoniʻoní ko hono kole kia Sihova ke tokoniʻi kitautolu ke tau fakahā ʻa e “fua ʻo e laumālié,” ʻa ia ko e “ʻofa, fiefia, melino, kātaki-fuoloa, anga-ʻofa, anga-lelei, tui, anga-malū, māpuleʻi-kita.”​—Kaletia 5:22, 23, NW.

11. (a) Ko e hā ʻa e ʻuhinga moʻoni ʻo e papitaisó ʻi hotau ʻahó ni? (e) ʻOku anga-fēfē hangē ʻa e papitaisó ko ha mate pea fokotuʻu haké?

¹¹ Ko e ʻuluaki faʻahinga ke hoko ʻo papitaiso ʻo fehoanaki mo e ngaahi fakahinohino ʻa Sīsuú ko e kau Siú mo e kau ului Siú, ʻo kamata ʻi he 33 T.S. Taimi nounou mei ai, ko e monū ʻo e tuʻunga ākonga faka-Kalisitiané naʻe fakaaʻu atu ia ki he kau Samēliá. Pea ʻi he 36 T.S. leva, ko e uí naʻe fakalahi atu ia ʻo kau ai ʻa e kau Senitaile taʻekamú. Ki muʻa ke hoko ʻo papitaisó, naʻe pau ki he kau Samēliá mo e kau Senitailé ke nau fai ha fakatapui fakafoʻituitui kia Sihova ke tauhi kiate ia ko e kau ākonga ʻa hono ʻAló. ʻOku hokohoko mai eni ko e ʻuhinga ʻo e papitaiso faka-Kalisitiane ʻi he vaí ʻo aʻu mai ki hotau ʻahó ni. Ko e fakauku kakato ʻi he vaí ko ha fakatātā feʻungamālie ia ʻo e fakatapui fakafoʻituitui ko ení, he ko e papitaisó ko ha tanu fakaefakatātā. Ko hoʻo ʻalu hifo ki lalo ʻi he vai papitaisó ʻokú ne fakafofongaʻi ai ʻa hoʻo mate ki hoʻo ʻalunga moʻui ki muʻá. Ko hono fokotuʻu hake mei he vaí ʻoku fakatātaaʻi ai ʻa hono fakamoʻui hake koe ke fai ʻa e finangalo ʻo e ʻOtuá. Ko e “babitaiso be taha” ko ení ʻoku ngāueʻaki ia ki he faʻahinga kotoa pē ʻoku nau hoko ko e kau Kalisitiane moʻoní. ʻI he papitaisó ʻoku nau hoko ai ko e Kau Fakamoʻoni Kalisitiane ʻa Sihova, ko e kau faifekau kuo fakanofo ʻa e ʻOtuá.​—Efeso 4:5, PM; 2 Kolinito 6:3, 4.

12. Ko e hā ʻoku fehoanakimālie mo e papitaiso faka-Kalisitiane ʻi he vaí, pea ʻoku anga-fēfē?

¹² Ko e papitaiso peheé ʻokú ne maʻu ʻa e mahuʻinga lahi  fakaefakahaofi moʻui ʻi he vakai ʻa e ʻOtuá. Hangē ko ení, hili ʻa e lave ki hono faʻu ʻe Noa ʻa e ʻaʻaké, ʻa ia naʻe fakahaofi ai ia mo hono fāmilí ʻi he Lōmakí, naʻe tohi ʻe he ʻapositolo ko Pitá: “ʻA ia ʻoku ne fakamoʻui ʻa kimoutolu foki ʻi onopōni, ʻa e meʻa naʻa ne taipe [“fehoanakimālie,” NW] ki ai, ko e papitaiso; (ʻo ʻikai ko e huʻihuʻi ʻe he kakano ʻa e ʻuli, ka ko e kumi ʻe ha konisenisi ʻataʻatā ki he ʻOtua;) ko e meʻa ʻi he toetuʻu ʻa Sisu Kalaisi.” (1 Pita 3:21, fakaʻītali ʻamautolu) Ko e ʻaʻaké ko e fakamoʻoni pau ia naʻe fai loto-tōnunga ʻe Noa ʻa e ngāue naʻe vaheʻi ange ʻe he ʻOtuá. Hili e ʻosi ʻa e ngāue ki he ʻaʻaké, “naʻe lomaki vai ai ʻa e maama ʻo onoʻaho, ʻo ʻauha.” (2 Pita 3:6) Ka ko Noa mo hono fāmilí, “ko e toko valu tokua, naʻe fakamoʻui ʻaki ʻa e vai.”​—1 Pita 3:20.

13. Ko e hā ʻa e meʻa ʻoku fakahaofi mei ai ʻa e Kalisitiané fakafou ʻi he papitaiso ʻi he vaí?

¹³ ʻI he ʻahó ni, ko e faʻahinga ko ia ʻoku nau fakatapui kinautolu kia Sihova ʻo makatuʻunga ʻi he tui kia Kalaisi ʻa ia kuo toetuʻú ʻoku nau papitaiso ko e fakatātā ʻo e fakatapui ko iá. ʻOku nau hoko atu ʻo fai ʻa e finangalo ko ia ʻo e ʻOtuá ki hotau ʻaho ní pea ʻoku fakahaofi ai kinautolu mei he māmani fulikivanu lolotongá. (Kaletia 1:3, 4) ʻOku ʻikai ke nau kei huʻu atu ki he ʻauha fakataha mo e fokotuʻutuʻu fulikivanu ʻo e ngaahi meʻa lolotongá. ʻOku fakahaofi kinautolu  mei he meʻá ni pea foaki ange mo ha konisēnisi lelei ʻe he ʻOtuá. ʻOku fakapapauʻi mai ʻe he ʻapositolo ko Sioné ki he kau sevāniti ʻa e ʻOtuá: “Oku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.”​—1 Sione 2:17.

Moʻui ʻo Fakatatau ki Hotau Ngaahi Fatongiá

14. Ko e hā ʻoku ʻikai ai ko ha fakapapauʻiʻanga ʻa e papitaisó ʻiate ia pē ki he fakamoʻuí?

¹⁴ Ko ha hala ia ke fakaʻosiʻaki ʻo pehē ko e papitaisó ʻiate ia pē ʻe fakapapauʻi ai ʻa e fakamoʻuí. ʻOku mahuʻinga pē ia kapau kuo fakatapui moʻoni ʻe ha taha ia kia Sihova fakafou ʻia Sīsū Kalaisi pea hokohoko mai ai hono fai ʻa e finangalo ʻo e ʻOtuá, ʻo faitōnunga ai pē ki he ngataʻangá. “Ko ia te ne kataki ʻo aʻu ki he ngataʻanga, ko e toko taha ko ia te ne moʻui.” ​—Mātiu 24:13.

15. (a) Ko e hā ʻa e finangalo ʻo e ʻOtuá ʻi he ʻahó ni ki he kau Kalisitiane ʻosi papitaisó? (e) ʻOku totonu ke mahuʻinga fēfē ʻa e tuʻunga ākonga faka-Kalisitiané ʻi heʻetau moʻuí?

¹⁵ Ko e finangalo ʻo e ʻOtuá kia Sīsuú naʻe kau ai ʻa e founga ʻo ʻene ngāueʻaki ʻa ʻene moʻuí ko ha tangatá. ʻE tuku ia ke mole ʻi he pekia ko ha feilaulau. ʻI hotau tuʻungá, ko hotau sinó ke tau foaki atu ia ki he ʻOtuá, pea ke tau hoko atu ʻi ha moʻui feilaulauʻi-kita ʻaki hono fai ʻa e finangalo ʻo e ʻOtuá. (Loma 12:1, 2) ʻE ʻikai ʻaupito ko haʻatau fai ia ʻa e finangalo ʻo e ʻOtuá kapau ʻoku tau fai ʻiloʻilo pau naʻa mo e ʻi he taimi ki he taimi ʻo hangē ko e māmani takatakai ʻiate kitautolú pe ʻo kapau ʻoku tau langa takai ʻetau moʻuí ʻi he ngaahi ngāue siokita, ʻo ʻoatu pē ʻa e ngāue kehe ke fai ki he ʻOtuá. (1 Pita 4:1-3; 1 Sione 2:15, 16) ʻI he taimi naʻe ʻeke ai ʻe ha tokotaha Siu pe ko e hā kuo pau ke ne fai kae maʻu ʻa e moʻui taʻengatá, naʻe fakahā ange ʻe Sīsū ʻa e mahuʻinga ʻo e moʻuiʻaki ha moʻui ʻulungaanga maʻá. Ka naʻá ne fakahaaʻi ange leva ha meʻa ia naʻe mahuʻinga ange: ʻa e fiemaʻu ko ia ke hoko ko ha ākonga Kalisitiané, ko ha muimui ʻo Sīsū. Kuo pau ke hoko  ia ko e meʻa tefito ʻi he moʻuí. ʻE ʻikai lava ke hoko ia ʻo fika ua ki he ngaahi ngāue fakamatelié.​—Mātiu 19:16-21.

16. (a) Ko e hā ʻa e fatongia ʻoku maʻu ʻe he kau Kalisitiane kotoa felāveʻi mo e Puleʻangá? (e) Hangē ko ia ʻoku fakatātaaʻi ʻi he peesi 116 mo e 117, ko e hā ʻa e ngaahi founga ola lelei ʻe niʻihi ke faiʻaki ʻa e ngāue ʻo e Puleʻangá? (f) Ko ʻetau kau ʻaufuatō atu ko ia ki he ngāue fakamoʻoní ko e fakamoʻoni ia ʻo e hā?

¹⁶ ʻOku totonu ke toe fakamamafaʻi ko e finangalo ʻo e ʻOtuá kia Sīsuú ʻoku kau ai ʻa e ngāue mātuʻaki mahuʻinga felāveʻi mo e Puleʻanga ʻo e ʻOtuá. Ko Sīsuú naʻe pani tonu ia ke hoko ko e Tuʻi. Kae lolotonga ʻene ʻi māmaní, naʻá ne toe fai mo ha fakamoʻoni faivelenga fekauʻaki mo e Puleʻangá. ʻOku tau maʻu mo ha ngāue fakamoʻoni tatau ke fai, pea ʻoku tau maʻu ʻa e ʻuhinga totonu ke kau ʻaufuatō atu ki ai. ʻI he fai peheé, ʻoku tau fakahāhā ai ʻetau houngaʻia ki he tuʻunga-hau ʻo Sihová pea pehē ki heʻetau ʻofa ki he kaungā faʻahinga ʻo e tangatá. (Mātiu 22:36-40) ʻOku tau toe fakahā foki ʻoku tau fāʻūtaha mo hotau kaungā lotu ʻi he māmaní kotoa, ʻa ia ko e kotoa ʻo kinautolu ko e kau fanongonongo ʻo e Puleʻangá. ʻOku tau tutui atu ki muʻa fakataha, ʻi he fāʻūtaha ʻi he kolopé, ki he taumuʻa ko e moʻui taʻengata ʻi he nofoʻanga fakaemāmani ʻo e Puleʻanga ko iá.

Fetalanoaʻaki Fakamanatu

• Ko e hā ʻa e ngaahi faitatau pea ko e hā ʻa e ngaahi faikehekehe ʻoku ʻi ai fekauʻaki mo e papitaiso ʻo Sīsuú mo e papitaiso ko ia ʻi he ʻahó ni ʻi he vaí?

• Ko e hā ʻa e ʻuhinga ʻo e hoko ʻo papitaiso “ʻi he huafa ʻo e Tamai mo e ʻAlo mo e Laumalie Maʻoniʻoni”?

•Ko e hā ʻoku kau atu ʻi he moʻui ʻo fakatatau mo e ngaahi fatongia ʻo e papitaiso faka-Kalisitiane ʻi he vaí?

[Fehuʻi ki he Ako]

[Fakatātā ʻi he peesi 116, 117]

 NGAAHI FOUNGA ʻE NIʻIHI KE TALAKI AI ʻA E PULEʻANGÁ

Mei he matapā ki he matapā

Ki he ngaahi kāingá

Ki he kaungāngāué

Ki he kaungāakó

ʻI he halá

ʻI he toe foki ke ʻaʻahi ki he faʻahinga mahuʻingaʻiá

ʻI he ngaahi ako Tohitapu ʻi ʻapí