Ko ha Fuʻu Kakai Lahi ʻi he ʻAo ʻo e Taloni ʻo Sihová
Vahe Taha Tolu
Ko ha Fuʻu Kakai Lahi ʻi he ʻAo ʻo e Taloni ʻo Sihová
1. (a) Ki muʻa ke maʻu ʻe he kau sevāniti ʻa e ʻOtuá ʻi muʻa ʻi he Kalisitiané pe ko e toko 144,000 honau palé, ko e hā kuo pau ke nau hokosiá? (e) Ko e hā ʻe ala maʻu ʻe he “fuʻu kakai lahi” ko ia ʻoku nau lolotonga moʻui he taimi ní?
KO E kau sevāniti faitōnunga ʻa Sihová meia ʻĒpeli kia Sione Papitaiso naʻa nau fakamuʻomuʻa ʻa hono fai ʻo e finangalo ʻo e ʻOtuá ʻi heʻenau moʻuí. Neongo ia, naʻa nau mate kotoa pē, ʻo fakatatali ki heʻenau toetuʻu hake ke moʻui ʻi he māmaní ʻi he māmani foʻou ʻa e ʻOtuá. Ko e toko 144,000, ʻa ia te nau pule mo Kalaisi ʻi he Puleʻanga fakahēvani ʻo e ʻOtuá, kuo pau ke nau toe mate mo kinautolu ki muʻa ke lava ke nau maʻu honau palé. Kae kehe, ʻoku fakahā ʻe he Fakahā 7:9 ko e ngaahi ʻaho fakaʻosi ko ení, ʻe ʻi ai ha “fuʻu kakai lahi” mei he puleʻanga kotoa pē ʻa ia ʻe ʻikai te nau hokosia ʻa e maté ka te nau maʻu ʻa e ʻamanaki ʻo e moʻui taʻengata ʻi he māmaní. ʻOkú ke kau ʻi honau lotolotongá?
Ko Hono ʻIloʻi Pau ʻa e Fuʻu Kakai Lahí
2. Ko e hā naʻe taki atu ki hono mahinoʻi māʻalaʻala ʻo e ʻiloʻanga ʻo e fuʻu kakai lahi ʻi he Fakahā 7:9?
2 ʻI he 1923, naʻe ʻiloʻi ai ʻe he kau sevāniti ʻa Sihová ko e “fanga sipi” ʻo e pealapeli ʻa Sīsū ʻoku hā ʻi he Mātiu 25:31-46 pea mo e “fanga sipi kehe” naʻá ne lave ki ai ʻa ia ʻoku hiki ʻi he Sione 10:16 ko e kakai ia te nau maʻu ʻa e faingamālie ke moʻui taʻengata ʻi he māmaní. ʻI he 1931 ko e faʻahinga ʻoku fakamatalaʻi ʻi he Isikeli 9:1-11 ʻa ia ʻoku fakaʻilongaʻi honau foʻi laʻé naʻe toe fai ʻa e sio ki ai ko e faʻahinga ia ʻoku nau maʻu ʻa e ʻamanaki fakaemāmani. Pea ʻi he 1935 naʻe ʻilo ai ko e fuʻu kakai lahí ʻoku faʻuʻaki ia ʻa e konga ʻo e kalasi fanga sipi kehe naʻe leaʻaki ʻe Sīsuú. ʻI he ʻahó ni, ko e fuʻu kakai lahi fakahōifua ko ení ʻoku laui miliona honau tokolahí.
3. Ko e hā ʻoku ʻikai ai ko e lave ia ki ha kalasi fakahēvani ʻa e fakalea “tutuʻu ʻi he ʻao ʻo e taloni”?
3 ʻI he Fakahā 7:9, ko e fuʻu kakai lahí ʻoku ʻikai mātā kinautolu ʻoku nau ʻi hēvani. Ko ʻenau “tutuʻu ʻi he ʻao ʻo e taloni” ʻo e ʻOtuá ʻoku ʻikai fiemaʻu ia ke nau ʻi hēvani. ʻOku nau ʻi he vakai mai pē ʻa e ʻOtuá. (Sāme 11:4) Ko e moʻoniʻi meʻa ko ia ko e fuʻu kakai lahí, “ʻa ia ʻe ʻikai lava ʻe ha taha hono lau,” ʻoku ʻikai ko ha kalasi fakahēvaní ʻoku hā ia ʻi hono fakahoa ʻa e taʻefakahā hono tokolahí mo e meʻa ko ia ʻoku hiki ʻi he Fakahā 7:4-8 mo e Fakahā 14:1-4. ʻI aí ko e tokolahi ko ia ʻoku toʻo mei māmani ki hēvaní ʻoku fakahā ia ko e toko 144,000.
4. (a) Ko e hā ʻa e “mamahi lahi” ʻoku hao atu ai ʻa e fuʻu kakai lahí? (e) Hangē ko ia ʻoku fakahā ʻi he Fakahā 7:11, 12, ko hai ʻoku mamata ki he fuʻu kakai lahí mo kau fakataha mo kinautolu ʻi he lotú?
4 ʻOku pehē ʻe he Fakahā 7:14 fekauʻaki mo e fuʻu kakai lahí: “Ko eni ia ʻakinautolu ʻoku haʻu mei he mamahi lahi.” ʻOku nau hao atu ʻi he faingataʻa fakalilifu taha kuo faifai ange pea hokosia ʻi he hisitōlia ʻo e faʻahinga ʻo e tangatá. (Mātiu 24:21) ʻI he taimi te nau tuku ai ʻi he fakamālōʻia honau fakahaofí ki he ʻOtuá pea kia Kalaisí, ʻe toki fāʻūtaha fakataha leva ʻa e ngaahi meʻamoʻui faitōnunga kotoa pē ʻi hēvani mo kinautolu ʻi he pehē: “Emeni: ko e tapuaki, mo e kololia, mo e poto, mo e fakafetaʻi, mo e fakaʻapaʻapa, mo e mafai, mo e malohi, ʻe lau ia ki hotau ʻOtua, ʻo lauikuonga pea taʻengata. ʻEmeni.”—Fakahā 7:11, 12.
Fakamoʻoniʻi ʻOku Taau
5. ʻE malava fēfē ke tau fakapapauʻi ʻa e meʻa ʻoku fiemaʻu ka tau hoko ai ko ha konga ʻo e fuʻu kakai lahí?
5 Ko hono fakahaofi atu ʻo e fuʻu kakai lahí ʻi he mamahi lahí ʻoku fakahoko ia ʻo fehoanaki mo e ngaahi tuʻunga māʻoniʻoni ʻa Sihová. Ko e ngaahi ʻulungaanga ko ia ko e fakaʻilonga ʻo e faʻahinga ʻe fakahaofí ʻoku fakamatalaʻi māʻalaʻala ia ʻi he Tohitapú. Ko ia ai, ʻoku malava ki he kau ʻofa ʻo e māʻoniʻoní ke fai ha meʻa he taimí ni fakataha mo ha vakai atu ki hono fakamoʻoniʻi ʻoku nau taau ke hao. Ko e hā kuo pau ke fai ʻe he faʻahingá ni?
6. Ko e hā ʻoku malava ai ke fakatatau feʻungamālie ʻa e fuʻu kakai lahí ki ha fanga sipi?
6 Ko e fanga sipí ʻoku nau anga-vaivai mo anganofo. Ko ia ʻi he taimi naʻe pehē ai ʻe Sīsū naʻe ʻi ai ʻene fanga sipi kehe naʻe ʻikai kau ʻi he kalasi fakahēvaní, naʻá ne ʻuhingá ki he kakai ʻa ia ʻe ʻikai ngata pē ʻi heʻenau loto ke moʻui taʻengata ʻi he māmaní kae pehē foki te nau toe anganofo ki heʻene ngaahi akonakí. “Ko ʻete fanga sipi aʻata ʻoku nau tokanga ki hoto leʻo, pea ʻoku ou ʻilo kinautolu; pea ʻoku nau muimui kiate au,” ko ʻene leá ia. (Sione 10:16, 27) Ko e kakai eni ʻoku nau fanongo moʻoni mo fai talangofua ki he meʻa ʻoku leaʻaki ʻe Sīsuú, ʻo nau hoko ai ko ʻene kau ākonga.
7. Ko e hā ʻa e ngaahi ʻulungaanga ʻoku fiemaʻu ke fakatupulekina ʻe he kau muimui ʻo Sīsuú?
7 Ko e hā ʻa e ngaahi ʻulungaanga kehe ʻe fiemaʻu ke fakatupulekina tāutaha ʻe he kau muimui ko eni ʻo Sīsuú? ʻOku tali mai ʻe he Folofola ʻa e ʻOtuá: “Ke mou liliu hoʻomou toʻonga muʻa, ʻo huʻihuʻi ʻa e motuʻa tangata . . . pea ke mou kofuʻaki ʻa e tangata foʻou, ʻa ia naʻe ngaohi ke hoko ki he ʻOtua ʻi he angatonu mo e maʻoniʻoni ʻa Moʻoni.” (Efeso 4:22-24) ʻOku nau fakatupulekina ʻa e ngaahi ʻulungaanga ʻokú ne hanga ʻo fakaleleiʻi ʻa e fāʻūtaha ʻa e kau sevāniti ʻa e ʻOtuá—ko e “ʻofa, fiefia, melino, kātaki-fuoloa, anga-ʻofa, anga-lelei, tui, anga-malū, mo e mapuleʻi-kita.”—Kaletia 5:22, 23, NW.
8. Ko e hā ʻe fehangahangai mo e fuʻu kakai lahí ʻi heʻenau poupouʻi ko ia ʻa e toenga ʻo e kau paní?
8 ʻOku poupouʻi ʻe he fuʻu kakai lahí ʻa e kiʻi tokosiʻi ko ia ʻoku nau maʻu ʻa e ʻamanaki fakahēvaní, ʻa ia ʻoku nau takimuʻa ʻi he ngāue fakamalangá. (Mātiu 24:14; 25:40) ʻOku ʻoatu ʻe he fanga sipi kehé ʻa e poupou ko ení, neongo ʻoku nau ʻilo te nau fehangahangai ai mo e fakafepaki koeʻuhi ʻi he kamataʻanga ʻo e ngaahi ʻaho fakaʻosi ko ení, naʻe hanga ʻe Kalaisi Sīsū mo ʻene kau ʻāngeló ʻo lī ʻa Sētane mo ʻene kau tēmenioó ki tuʻa mei hēvani. Naʻe ʻuhinga ení ko e ‘ʻoiaue ʻa e fonuá . . . He kuo hoko hifo ʻa e Tevoló kiate koe, ʻokú ne ʻita lahi, ko ʻene ʻilo, ʻoku toesiʻi pe hono taimí.’ (Fakahā 12:7-12) Ko ia, ʻoku fakalahi ʻe Sētane ʻa ʻene fakafepaki ki he kau sevāniti ʻa e ʻOtuá ʻi he fakaofi mai ʻa e ngataʻanga ʻo e fokotuʻutuʻu ko ení.
9. ʻOku lavameʻa fēfē ʻa e kau sevāniti ʻa e ʻOtuá ʻi hono malangaʻi ʻo e ongoongo leleí, pea ko e hā hono ʻuhingá?
9 Neongo ʻa e fakafepaki kakahá, ʻoku hokohoko atu ʻa e ngāue fakamalangá ke laka ki muʻa. Mei he kiʻi laui afe siʻi pē ʻo e kau malangá ʻi he ngataʻanga ʻo e Tau I ʻa Māmaní, ʻoku laui miliona ia he taimí ni, he naʻe talaʻofa ʻe Sihova: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa.” (Aisea 54:17) Naʻa mo ha mēmipa ʻo e fakamaauʻanga māʻolunga faka-Siú naʻá ne ʻiloʻi heʻikai malava ke ikuʻi ha ngāue ʻa e ʻOtuá. Naʻá ne tala ange ki he kau Fālesi ʻi he ʻuluaki senitulí fekauʻaki mo e kau ākongá: “Tuku ai pe a kinautolu: he kapau ʻoku mei he tangata ʻa e fakakaukau ko eni mo e ngaue ni, ʻe ngata: ka ʻo kapau ʻoku mei he ʻOtua, ʻe ʻikai te mou lava ke fakangata kinautolu: kaeʻumaʻā foki naʻa ʻiloange ʻoku mou tauʻi ʻa e ʻOtua.”—Ngāue 5:38, 39.
10. (a) Ko e hā ʻa e ʻuhinga ʻo e “fakaʻilonga” ko ia ʻi he faʻahinga ʻo e fuʻu kakai lahí? (e) ʻOku anga-fēfē ʻa e talangofua ʻa e kau sevāniti ʻa e ʻOtuá ki he “leʻo . . . mei he langi”?
10 Ko e faʻahinga ko ia ʻo e fuʻu kakai lahí ʻoku fakatātaaʻi kinautolu ʻoku fakaʻilongaʻi ke hao. (Isikeli 9:4-6) Ko e ‘fakaʻilongá’ ko e fakamoʻoni ia kuo nau fakatapui kinautolu kia Sihova, ʻo papitaiso ko e kau ākonga ʻa Sīsū, pea ʻoku nau kau atu ʻi hono fakatupulekina ha angaʻitangata faka-Kalaisi. ʻOku nau talangofua ki he “leʻo . . . mei he langi” ʻokú ne pehē fekauʻaki mo e ʻemipaea ʻi māmani lahi ʻo e lotu loi ʻa Sētané: “Hiki meiate ia, ʻe hoku kakai, ke ʻoua naʻa mou kau ʻi heʻene hia, pea ʻinasi ʻi hono tautea.”—Fakahā 18:1-5.
11. ʻI he founga mahuʻinga fē ʻoku fakahāhaaʻi ai ʻe he faʻahinga ko ia ʻo e fuʻu kakai lahí ko e kau sevāniti kinautolu ʻa Sihova?
11 Pehē foki, naʻe tala ʻe Sīsū ki hono kau muimuí: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:35) Ko hono kehé, ko e ngaahi mēmipa ʻo e ngaahi lotu ʻo e māmani ko ení ʻoku nau tāmateʻi ʻe kinautolu honau kau mēmipa kehé ʻi he taú, ʻa ia ʻoku faʻa hoko pē koeʻuhi ko ʻenau tangataʻifonua kehé! ʻOku pehē ʻe he Folofola ʻa e ʻOtuá: “Ko e meʻa ko ia ʻoku mahino ai ʻa e fanau ʻa e ʻOtua pea mo e fanau ʻa e Tevolo: ko ia ʻoku ʻikai ke fai maʻoniʻoni ʻoku ʻikai mei he ʻOtua ia, kaeʻumaʻā ʻa ia ʻoku ʻikai ke ʻofa ki hono tokoua. . . . Ke tau feʻofaʻaki. He ko e pehe koā ke tau hange ko Keini ʻa ia ko e tupu-mei-he-Fili, ʻo ne tamateʻi hono tokoua.”—1 Sione 3:10-12.
12. ʻI he mamahi lahí, ʻe anga-fēfē feangainga ʻa Sihova mo e ‘ngaahi ʻakau’ ʻokú ne tokonaki ʻa e fua taʻeʻaongá?
12 Naʻe fakahā ʻe Sīsū: “ʻIlonga ha ʻakau lelei ʻoku ne fua ʻaonga: ka ʻilonga ha ʻakau tamaki ʻoku fua kovi. ʻOku ʻikai lava ʻe he ʻakau lelei ke fua kovi, pe ko e ʻakau tamaki ke fua ʻaonga. ʻIlonga ha ʻakau ʻoku ʻikai fua ʻaonga, ʻoku ta ʻo laku ki he afi. ʻAua, ko honau ngāhi fua te mou ʻilo lelei ai kinautolu.” (Mātiu 7:17-20) Ko e fua ʻoku tokonaki ʻe he ngaahi lotu ʻo e māmaní ʻokú ne fakaʻilongaʻi ai kinautolu ko e ‘ngaahi ʻakau’ tamaki, ʻa ia ʻoku vavé ni ke fakaʻauha ʻe Sihova ʻi he mamahi lahí.—Fakahā 17:16.
13. ʻOku anga-fēfē hono fakahāhā ʻe he fuʻu kakai lahí ʻoku nau “tutuʻu [fāʻūtaha] ʻi he ʻao ʻo e taloni” ʻo Sihová?
13 ʻOku fakahanga ʻe he Fakahā 7:9-15 ʻa e tokangá ki he ngaahi meʻa ko ia ʻoku taki atu ki hono fakahaofi ʻo e fuʻu kakai lahí. ʻOku fakahā kinautolu ʻoku nau “tutuʻu [fāʻūtaha] ʻi he ʻao ʻo e taloni” ʻo Sihová, ʻo poupouʻi ʻa hono tuʻunga-hau fakalevelevá. Kuo nau “fō honau kofu, ʻo fakahinehina ʻi he taʻataʻa ʻo e Lami,” ʻo fakahaaʻi ai ʻoku nau ʻiloʻi ʻa e feilaulau fakamolemole-angahala ʻa Sīsuú. (Sione 1:29) Kuo nau fakatapui kinautolu ki he ʻOtuá pea kuo nau fakahāhā eni ʻaki ʻa e fakauku ʻi he vaí. Ko ia ʻoku nau maʻu ai ha tuʻunga maʻa ʻi he ʻao ʻo e ʻOtuá, ʻa ia ʻoku fakatātaaʻi ʻe he ngaahi kofu hinehiná, pea ʻoku “nau tauhi kiate ia . . . ʻi he ʻaho mo e po.” ʻOku ʻi ai ha ngaahi founga ʻoku malava ke ke ʻomi ai hoʻo moʻuí ke fehoanaki kakato ange mo e meʻa ʻoku fakamatalaʻi hení?
Ngaahi ʻAonga he Taimi Ní
14. Ko e hā ʻa e niʻihi ʻo e ngaahi ʻaonga makehe ʻoku haʻu ki he kau sevāniti ʻa Sihová naʻa mo e taimí ni?
14 Ngalingali kuó ke fakatokangaʻi ʻa e ngaahi ʻaonga makehe ʻoku haʻu naʻa mo e taimí ni ki he faʻahinga ko ia ʻoku nau tauhi ʻa Sihová. Ko e fakatātaá, ʻi he taimi naʻá ke ako ai fekauʻaki mo e ngaahi taumuʻa māʻoniʻoni ʻa Sihová, naʻá ke mahinoʻi ai naʻe ʻi ai ʻa e ʻamanaki fakafiefia ki he kahaʻú. Ko ia ʻokú ke maʻu ai ʻi he taimí ni ha taumuʻa moʻoni ʻi he moʻuí—ke tauhi ʻa e ʻOtua moʻoní fakataha mo e ʻamanaki fakafiefia ki he moʻui taʻengata ʻi ha māmani palataisi. ʻIo, ko e Tuʻi ko Sīsū Kalaisí te ne “tataki [ʻa e fuʻu kakai lahí] ki he gaahi matavai moui.”—Fakahā 7:17, PM.
15. ʻOku anga-fēfē maʻu ʻaonga ʻa e Kau Fakamoʻoni ʻa Sihová ʻi heʻenau piki ko ia ki he ngaahi tefitoʻi moʻoni faka-Tohitapu fekauʻaki mo e ngaahi meʻa fakapolitikalé mo e ngaahi meʻa fakaeʻulungāngá?
15 Ko ha ʻaonga fakaofo ʻoku maʻu ʻe he fuʻu kakai lahí ko e ʻofa, fāʻūtaha, pea mo e feongoongoi ʻoku ʻilo ʻi he haʻohaʻonga ʻo e kau sevāniti ʻa Sihová ʻi he māmaní kotoa. Koeʻuhi ʻoku tau kai ʻi he meʻakai fakalaumālie tatau, ʻoku tau talangofua ai ki he ngaahi lao mo e ngaahi tefitoʻi moʻoni tatau ʻoku maʻu ʻi he Folofola ʻa e ʻOtuá. Ko e ʻuhinga ia ʻoku ʻikai ke fakamavahevaheʻi ai kitautolu ʻe he ngaahi fakakaukau fakapolitikale pe fakafonuá. Pehē foki, ʻoku tau tauhi maʻu ʻa e ngaahi tuʻunga ʻulungaanga māʻolunga ko ia ʻoku fiemaʻu ʻe he ʻOtuá mei heʻene kakaí. (1 Kolinito 6:9-11) Ko ia ai, ʻi he ʻikai ko e hokosia ʻa e fekeʻikeʻi, taʻefāʻūtaha, mo e ʻulungaanga taʻetaau ʻoku mafolalahia ʻi he māmaní, ʻoku maʻu ʻe he kakai ia ʻa Sihová ʻa e meʻa ko ia ʻoku malava ke ui ko e palataisi fakalaumālie. Fakatokangaʻi ʻa e anga hono fakamatalaʻi eni ʻi he Aisea 65:13, 14.
16. Neongo ʻa e ngaahi palopalema anga-maheni fekauʻaki mo e moʻuí, ko e hā ʻa e ʻamanaki ʻoku maʻu ʻe he faʻahinga ko ia ʻo e fuʻu kakai lahí?
16 ʻIkai, ko e kau sevāniti fakaetangata ʻa Sihová ʻoku ʻikai ke nau haohaoa. Pea ʻoku uesia kinautolu ʻe he ngaahi palopalema anga-maheni ʻo e moʻuí ʻi he māmani ko ení, ʻo hangē ko e tō ki ha ngaahi taimi faingataʻa pe hoko ko e kau laveanoa taʻehia ʻi he ngaahi tau ʻa e ngaahi puleʻangá. ʻOku nau toe fehangahangai foki mo e mahamahaki, faingataʻaʻia, mo e mate. Ka ʻoku nau maʻu ʻa e tui ko e māmani foʻoú, ʻe hanga ʻe he ʻOtuá ʻo “holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:4.
17. Neongo pe ko e hā ha meʻa ʻe ngali hoko kia kitautolu he taimí ni, ko e hā ʻa e kahaʻu fakaofo ʻoku tuku tauhi mai ki he faʻahinga ko ia ʻoku nau lotu ki he ʻOtua moʻoní?
17 Neongo kapau ʻe mole hoʻo moʻuí he taimí ni koeʻuhi ko e taʻumotuʻá, mahamahakí, ko ha fakatamaki, pe fakatanga, ʻe hanga ʻe Sihova ʻo toe fokotuʻu koe ki he moʻui ʻi he Palataisí. (Ngāue 24:15) Pea te ke hokohoko atu ai ke fiefia ʻi ha kātoanga fakalaumālie lolotonga ʻa e Pule Mileniume ʻa Kalaisí. Ko hoʻo ʻofa ki he ʻOtuá ʻe fakaloloto ia ʻi hoʻo sio ko ia ki hono fakahoko lāngilangiʻia ʻa ʻene ngaahi taumuʻá. Pea ko e ngaahi tāpuaki fakamatelie ʻe tokonaki ʻe Sihova ʻi he taimi ko iá te ne fakaloloto lahi atu ʻa hoʻo ʻofa kiate iá. (Aisea 25:6-9) He kahaʻu fakaofo moʻoni ia ʻoku tuku tauhi mai ki he kakai ʻa e ʻOtuá!
Fetalanoaʻaki Fakamanatu
• Ko e hā ʻa e meʻa anga-kehe ʻe hoko ʻoku hanga ʻe he Tohitapú ʻo fakafekauʻaki mo e fuʻu kakai lahí?
• Kapau ʻoku tau loto moʻoni ke kau ʻi he fuʻu kakai lahi kuo fakahōifuaʻi fakaʻotua ko iá, ko e hā kuo pau ke tau fai he taimi ní?
• ʻOku mahuʻinga fēfē kiate koe ʻa e ngaahi tāpuaki ʻoku maʻu ʻi he taimí ni ʻe he fuʻu kakai lahí mo ia te nau toki maʻu ʻi he māmani foʻou ʻa e ʻOtuá?
[Fehuʻi ki he Ako]
[Fakatātā ʻi he peesi 123]
Ko e laui miliona ʻo e fuʻu kakai lahí ʻoku nau lotu fāʻūtaha ki he ʻOtua moʻoní
