Vahe Hongofulu

Ko ha Puleʻanga “E Ikai Auha o Lauikuoga”

1. Ko e hā ʻa e foʻi moʻoni kuo fakamamafaʻi ʻe he ngaahi meʻa ʻoku hoko he māmaní ʻi he kotoa ʻo e hisitōlia ʻo e tangatá?

 KO E ngaahi meʻa ʻoku hoko ʻi he māmaní ʻi he ʻaho taki taha ʻokú ne fakamamafaʻi ʻa e foʻi moʻoni ko ia ko e faʻahinga ʻo e tangatá kuo ʻikai ke nau maʻu ha fiefia ʻi hono talitekeʻi ko ia ʻa e tuʻunga-hau ʻo Sihová pea feinga ke nau puleʻi pē kinautolú. Kuo ʻikai ha fokotuʻutuʻu ia ʻo e puleʻanga fakaetangatá kuó ne ʻomai ha ngaahi ʻaonga taʻefilifilimānako ki he faʻahinga ʻo e tangatá. Neongo kuo fakalakalaka ʻa e tangatá ʻi heʻenau ʻilo fakasaienisí ki ha tuʻunga taʻealafakatataua, kuo ʻikai ke nau malava kinautolu ke ikuʻi ʻa e mahamahakí pe fakangata ʻa e maté, naʻa mo ha foʻi tokotaha pē ā. Kuo teʻeki hanga ʻe he pule fakaetangatá ia ʻo toʻo atu ʻa e taú, fakamālohí, faihiá, taʻefaitotonú, pe masivá. ʻOku kei puleʻi pē ʻe he ngaahi puleʻanga fakaaoaó ia ʻa e kakaí ʻi he ngaahi fonua lahi. (Koheleti 8:9) ʻOku kau fakataha ʻa e tekinolosiá, mānumanú, mo e taʻeʻiló ke ʻuliʻi ʻa e fonuá, vaí, mo e ʻeá. Ko hono puleʻi kovi ʻo e ʻekonōmiká ʻe he kau maʻu mafaí kuó ne ʻai ai ke faingataʻa ki he tokolahi ke maʻu ʻa e ngaahi fiemaʻu ʻo e moʻuí. Kuo hanga ʻe he pule laui afeʻi taʻu ʻa e tangatá ʻo ʻai ke hā mahino ʻa e foʻi moʻoni ko ení: “ʻOku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.”​—Selemaia 10:23.

2. Ko e hā ʻa e fakaleleiʻanga pē taha ki he ngaahi palopalema ʻo e faʻahinga ʻo e tangatá?

² Ko e hā ʻa e fakaleleiʻangá? Ko e Puleʻanga ʻo e ʻOtuá, ʻa ia ko ē naʻe akoʻi ʻe Sīsū ki hono kau muimuí ke nau lotu: “Ke  hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.” (Mātiu 6:9, 10, Ko e Kōsipeli ʻe Fā) Ko e Puleʻanga fakahēvani ʻo e ʻOtuá ʻoku fakamatalaʻi ia ʻi he 2 Pita 3:13 ko e “ngaahi langi foʻou,” ʻa ē ʻe pule ki he “fonua foʻou,” ʻa ia, ko e sōsaieti māʻoniʻoni fakaetangata. ʻI he mahuʻinga fau ʻo e Puleʻanga fakahēvani ʻo e ʻOtuá naʻe ʻai ai ia ʻe Sīsū ko e taumuʻa tefito ʻo ʻene malangá. (Mātiu 4:17) Naʻá ne fakahā ʻa e feituʻu ʻoku totonu ke ʻi ai ʻa e meʻa ko iá ʻi heʻetau moʻuí, ʻi heʻene enginaki: “Hanganaki fuofua kumi leva ʻa e puleʻangá pea mo ʻene māʻoniʻoní.”​—Mātiu 6:33, NW.

3. Ko e hā ʻoku hoko ai ʻa e ako fekauʻaki mo e Puleʻanga ʻo e ʻOtuá ko e meʻa fakavavevave taha he taimi ní?

³ Ko e ako fekauʻaki mo e Puleʻanga ʻo e ʻOtuá ko e meʻa fakavavevave taha ia ʻi he taimi ní, he ʻoku vavé ni ke fai ʻe he Puleʻanga ko iá ha meʻa ke liliu taʻengata ai ʻa e tuʻunga-pule ʻo e māmani ko ení. ʻOku tomuʻa tala ʻe he Taniela 2:44 (PM): “I he gaahi aho oe gaahi tuʻi ni [ngaahi puleʻanga ʻoku pule he taimi ní] e fokotuʻu e he Otua oe lagi, ha buleaga [ʻi hēvani], aia e ikai auha o lauikuoga: bea e ikai tuku ae buleaga ki ha kakai kehe [heʻikai ʻaupito toe pule ʻa e faʻahinga ʻo e tangatá ki māmani], ka te ne laiki mo fakaauha ae gaahi buleaga [lolotongá] ni kotoabe, bea e tuu mau ia o taegata.” Ko ia ʻe hanga ʻe he Puleʻangá ʻo fakangata ʻa e ngaahi ʻaho fakaʻosí ni ʻaki hono fakaʻauha ʻa e fokotuʻutuʻu fulikivanu ʻo e ngaahi meʻa kotoa ko ení. Ko e tuʻunga-pule ʻo e māmaní fakafou ʻi he Puleʻanga fakahēvaní ʻe hoko leva ia ʻo ʻikai toe fakafekikiʻi. He houngaʻia moʻoni ʻoku totonu ke ʻotautolú he ko e fiemālie ʻe ʻomi ʻe he meʻá ni ʻoku mātuʻaki ofí ni!

4. ʻI he fekauʻaki mo e Puleʻangá, ko e hā ʻa e meʻa naʻe hoko ʻi hēvani ʻi he 1914, pea ko e hā ʻoku mahuʻinga ai ia kiate kitautolú?

⁴ ʻI he 1914, naʻe fakanofo ai ʻa Kalaisi Sīsū ko e Tuʻi pea naʻe fakamafaiʻi ia ke ‘bule i he lotolotoga o [hono] gaahi filí.’ (Sāme 110:1, 2, PM) ʻI he taʻu ko iá foki, naʻe kamata ai ʻa e “kuonga fakamui” ʻo e fokotuʻutuʻu fulikivanu ʻo e  ngaahi meʻa lolotongá. (2 Timote 3:1-5, 13) ʻI he taimi tatau, ko e ngaahi meʻa naʻe hoko naʻe mamata ki ai ʻa Taniela ʻi he vīsone fakaekikité naʻe hoko moʻoni ia ʻi hēvani. Ko “Talumeimuʻa,” ʻa Sihova ko e ʻOtuá, naʻá ne foaki ki he Foha ʻo e tangatá, ʻa Sīsū Kalaisi, ʻa e “hau, mo ha langilangi, mo ha pule [“puleʻanga,” NW], koeʻuhi ke tauhi kiate ia ʻe he ngaahi kakai, matakali, mo faʻahinga lea kehekehe.” ʻI he fakamatala fekauʻaki mo e vīsoné, naʻe tohi ʻe Taniela: “Ko hono hau ko e hau taʻengata, ʻa ia ʻe ʻikai liua, pea ko hono puleʻanga ko e taha ʻe ʻikai ʻauha.” (Taniela 7:13, 14) Fakafou ʻi he Puleʻanga fakahēvani ko ení ʻi he nima ʻo Kalaisi Sīsuú ʻe hanga ai ʻe he ʻOtuá ʻo fakamafeia ʻa e kau ʻofa ki he māʻoniʻoní ke nau maʻu ʻa e meʻa lelei taʻefaʻalaua naʻá ne fakataumuʻa ki ai ʻi he taimi naʻá ne tuku ai ʻetau ʻuluaki ongo mātuʻa fakaetangatá ʻi Palataisí.

5. Ko e hā ʻa e ngaahi fakaikiiki fekauʻaki mo e Puleʻangá ʻoku mātuʻaki mahuʻinga kiate kitautolú, pea ko e hā hono ʻuhingá?

⁵ Ko hoʻo fakaʻamú ia ke ke hoko ko ha tangataʻifonua mateaki ʻo e Puleʻangá? Kapau ko ia, te ke mātuʻaki mahuʻingaʻia  ʻi he faʻunga pea mo e ngāue ʻa e puleʻanga fakahēvani ko ení. Te ke saiʻia ke ʻilo ki he meʻa ʻokú ne fai he taimi ní, ko e meʻa te ne fakahoko ʻi he kahaʻú, pea mo e meʻa ʻokú ne fiemaʻu meiate koé. ʻI hoʻo sivisiviʻi fakalelei ʻa e Puleʻangá, ʻoku totonu ke tupulekina hoʻo houngaʻia aí. Kapau te ke tali ʻa hono tuʻunga-pulé, te ke mateuteu lelei ange ai ke tala ki he niʻihi kehé fekauʻaki mo e ngaahi meʻa fakaofo ʻe fai ʻe he Puleʻanga ʻo e ʻOtuá maʻá e faʻahinga talangofua ʻo e tangatá.​—Sāme 48:12, 13.

Ko e Kau Pule ʻo e Puleʻanga ʻo e ʻOtuá

6. (a) ʻOku anga-fēfē hono fakahā ʻe he ngaahi Konga Tohitapú ko e tuʻunga-hau ʻo hai ʻoku fakahāhaaʻi fakafou ʻi he Puleʻanga faka-Mīsaiá? (e) ʻOku totonu ke fēfē hono ueʻi kitautolu ʻe he meʻa ʻoku tau ako fekauʻaki mo e Puleʻangá?

⁶ Ko e taha ʻo e ngaahi muʻaki meʻa ʻe hanga ʻe ha sivisiviʻi pehē ʻo fakaeʻá ko e Puleʻanga faka-Mīsaia ko iá ko ha fakahāhā ia ʻo e tuʻunga-hau ʻo Sihová tonu. Ko Sihova ia naʻá ne  foaki ʻa e “hau, mo ha langilangi, mo ha puleʻanga” ki hono ʻAló. Hili hono fakamafaiʻi ʻa e ʻAlo ʻo e ʻOtuá ke kamata ʻene pule ko e Tuʻí, naʻe fakahā feʻungamālie ʻe he ngaahi leʻo ʻi hēvani: “Ko e puleʻanga ʻo mamani kuo hoko ko e puleʻanga ʻo hotau ʻEiki [Sihova ko e ʻOtuá], mo ʻEne Kalaisi: pea te ne [Sihova] pule ʻo lauikuonga ʻo taʻengata.” (Fakahā 11:15) Ko ia ko e meʻa kotoa ʻoku tau fakatokangaʻi fekauʻaki mo e Puleʻanga ko ení pea mo e meʻa ʻokú ne fakahokó ʻoku lava ke ne tohoakiʻi ofi ange ai kitautolu kia Sihova tonu. Ko e meʻa ʻoku tau akó ʻoku totonu ke ne fokotuʻu maʻu ʻiate kitautolu ha holi ke ʻulutukua ki hono tuʻunga-haú ʻo taʻengata.

7. Ko e hā ʻoku mahuʻinga makehe ai kiate kitautolu ko Sīsū Kalaisí ko e Pule Tokoni ia ʻa Sihová?

⁷ Toe fakakaukau foki, ki he moʻoniʻi meʻa ko ia ko Sihová kuó ne hanga ʻo fokotuʻu ʻa Sīsū Kalaisi ki he taloní ko hono Pule Tokoni. Koeʻuhi ko e Tufunga Lahi ia naʻe ngāueʻaki ʻe he ʻOtuá ke ngaohi ʻa e māmaní mo e faʻahinga ʻo e tangatá, ʻoku ʻiloʻi lelei ange ai ʻe Sīsū ʻetau ngaahi fiemaʻú ʻi ha taha pē ʻo kitautolu. ʻIkai ngata aí, mei he kamataʻanga ʻo e hisitōlia ʻo e tangatá, naʻá ne fakahāhaaʻi ai ko e ‘fānau ae tagatá a ʻene fiefiaagá.’ (Palovepi 8:30, 31, PM; Kolose 1:15-17) ʻI he lahi fau ʻene ʻofa ki he faʻahinga ʻo e tangatá naʻá ne haʻu tonu ai ki māmani ʻo foaki ʻene moʻuí ko ha huhuʻi koeʻuhi ko kitautolu. (Sione 3:16) Ko ia naʻá ne ʻai ke ala maʻu maʻa kitautolu ʻa e founga ki hono vete ange mei he angahalá mo e maté pea mo e faingamālie ki he moʻui taʻengatá.​—Mātiu 20:28.

8. (a) ʻI he faikehekehe mo e ngaahi tuʻunga-pule ʻa e tangatá, ko e hā ʻe tuʻuloa ai ʻa e puleʻanga ʻo e ʻOtuá? (e) Ko e hā ʻa e felāveʻi ʻoku maʻu ʻe he “tamaioeiki agatonu mo boto” pea mo e puleʻanga fakahēvaní?

⁸ Ko e Puleʻanga ʻo e ʻOtuá ko ha puleʻanga ia ʻoku tuʻumaʻu mo tuʻuloa. Ko e tuʻunga ʻo ʻene tuʻuloá ʻoku fakapapauʻi ia ʻe he moʻoniʻi meʻa ko ia ko Sihova tonu ʻoku ʻikai moʻulaloa ia ki he maté. (Sāme 146:3-5, 10) Ko hono kehe  mei he ngaahi tuʻi fakaetangatá, ko Sīsū Kalaisí, ʻa e tokotaha ʻa ia kuo tuku ki ai ʻe he ʻOtuá ʻa e tuʻunga-tuʻí, ʻoku toe taʻefaʻamate mo ia. (Loma 6:9; 1 Timote 6:15, 16) ʻE feohi mo Kalaisi ʻi he ngaahi taloni fakahēvaní ʻa e toko 144,000 kehe, ko e kau sevāniti mateaki ʻa e ʻOtuá mei he “matakali fulipē mo e lea, mo e faʻahinga mo e puleʻanga.” Ko e faʻahingá ni foki ʻoku toe ʻoange ki ai ʻa e moʻui taʻefaʻamate. (Fakahā 5:9, 10; 14:1-4; 1 Kolinito 15:42-44, 53) Ko e fuʻu konga lahi ʻo kinautolu kuo nau ʻosi ʻi hēvani, pea ko e toenga ʻo kinautolu ʻoku nau kei ʻi māmaní ʻoku faʻuʻaki ia ʻa e “tamaioeiki agatonu mo boto,” ʻa ia ʻoku nau fakalahi mateaki atu ʻa e ngaahi meʻa ʻi heni ʻo e Puleʻanga ko iá.​—Mātiu 24:45-47, PM.

9, 10. (a) Ko e hā ʻa e ngaahi tākiekina fakatupu māvahevahe mo fakatupu maumau ʻe toʻo atu ʻe he Puleʻangá? (e) Kapau ʻoku ʻikai ke tau fie hoko ko e ngaahi fili ʻo e Puleʻanga ʻo e ʻOtuá, ko e hā ʻa e ngaahi fihiaʻanga ʻoku totonu ke tau fakaʻehiʻehi mei aí?

⁹ ʻOku vavé ni he taimí ni, ʻi heʻene taimi kotofá, ke hanga ʻe Sihova ʻo fekauʻi atu ʻene ngaahi kongakau fakaʻauhá ke nau ngāue ke fakamaʻa ʻa e māmaní. Te nau fakaʻauha taʻengata ʻa e faʻahinga ko ia ʻo e tangatá ʻoku nau fakafisi tuʻunga ʻi he fili pē ʻa kinautolu ke tali ʻa hono tuʻunga-haú mo paetaku ki he ngaahi tokonaki ʻofa ʻokú ne fai ʻo fakafou ʻia Sīsū Kalaisí. (2 Tesalonaika 1:6-9) ʻE hoko ia ko e ʻaho ʻo Sihová, ʻa e taimi kuo fuoloa ʻa e fakatatali ki ai ki hono fakatonuhiaʻi ʻa hono Tuʻunga-Hau Fakalevelevá. “Vakai ʻoku haʻu ʻa e ʻaho ʻo Sihova, ko e ʻaho fakamamahi mo e houhau mo e ʻita kakaha; . . . pea ke fakaeve mei ai hono kau angahala.” (Aisea 13:9) “Ko e ʻaho ʻo e huhua houhau ʻa e ʻaho ko ia, ko e ʻaho ʻo e ʻefihia mo e taʻomi, ko e ʻaho ʻo e maveu mo e anganoa, ko e ʻaho poʻuli ko e kaupoʻuli, ko e ʻaho ʻo e loa mo e poʻuli matolu.”—Sefanaia 1:15.

¹⁰ Ko e lotu loi kotoa pē mo e ngaahi puleʻanga fakaetangata kotoa pē mo ʻenau kau taú, ʻa ia kuo puleʻi kinautolu ʻe he tokotaha pule fulikivanu taʻehāmai ʻo e māmaní,  ʻe fakaʻauha taʻengata. Ko e faʻahinga kotoa ʻoku nau fakakau fakataha kinautolu mo e māmani ko ení ʻi heʻenau tuli ki he founga moʻui siokita, taʻefaitotonu mo taʻetāú, ʻe tuʻusi atu kinautolu ʻi he maté. Ko Sētane mo ʻene kau tēmenioó ʻe toʻo atu kinautolu mei haʻanau fetuʻutaki mo e kau nofo ʻi he māmaní, ʻo tuku pōpula malu ʻi ha taʻu ʻe afe. ʻE maʻu leva ai ʻe he Puleʻanga ʻo e ʻOtuá ʻa e pule kakato ki he ngaahi meʻa ʻo e māmaní. He toki meʻa fakafiemālie moʻoni ia ki he faʻahinga kotoa ʻoku nau ʻofa ki he māʻoniʻoní!​—Fakahā 18:21, 24; 19:11-16, 19-21; 20:1, 2. 

Ngaahi Taumuʻa ʻa e Puleʻangá​—Founga Hono Aʻusiá

11. (a) ʻE anga-fēfē hono hanga ʻe he Puleʻanga faka-Mīsaiá ʻo fakahoko ʻa e taumuʻa ʻa Sihová ki he māmaní? (e) Ko e hā ʻa e ʻuhinga ʻo e pule ʻa e Puleʻangá ki he kakai ko ia te nau nofo ʻi he māmaní ʻi he taimi ko iá?

¹¹ ʻE hanga ʻe he Puleʻanga faka-Mīsaiá ʻo fakahoko kakato ʻa e muʻaki taumuʻa ʻa e ʻOtuá ki he māmaní. (Senesi 1:28; 2:8, 9, 15) Ki he ʻahó ni, kuo taʻemalava ʻe he faʻahinga ʻo e tangatá ke poupouʻi ʻa e taumuʻa ko iá. Kae kehe, “ko e māmani nofoʻi ka hoko maí” ʻe moʻulaloa ia ki he Foha ʻo e tangatá, ʻa Sīsū Kalaisi. Ko e faʻahinga kotoa ʻe hao ʻi he fakahoko ʻo e fakamaau ʻa Sihova ki he fokotuʻutuʻu motuʻa ko ení te nau ngāue fāʻūtaha ʻi he malumalu ʻo Kalaisi ko e Tuʻí, ʻo fai fiefia ha meʻa pē ʻokú ne fakahinohino, koeʻuhí ke hoko ʻa e māmaní ko ha palataisi fakalūkufua. (Hepelu 2:5-9, NW) Ko e kātoa ʻo e faʻahinga ʻo e tangatá te nau fiefia ʻi he ngāue ʻa honau nimá pea maʻu ʻaonga kakato mei he lahi fau ʻo e fua ʻo e māmaní.​—Sāme 72:1, 7, 8, 16-19; Aisea 65:21, 22.

12. ʻE anga-fēfē hono fakafoki mai ʻa e haohaoa ʻo e ʻatamaí mo e sinó ki he kakai ʻo e Puleʻangá?

¹² ʻI he taimi naʻe fakatupu ai ʻa ʻĀtama mo ʻIví, naʻá na haohaoa, pea ko e taumuʻa ia ʻa e ʻOtuá ki he māmaní ke fakafonu ia ʻaki hona hakó, ʻo nau maʻu kotoa ʻa e ʻatamai mo e sino haohaoa. ʻE hoko ʻa e taumuʻa ko iá ko ha meʻa moʻoni lāngilangiʻia ʻi he malumalu ʻo e pule ʻa e Puleʻangá. ʻOku fiemaʻu  heni ʻa hono toʻo atu ʻa e nunuʻa kotoa ʻo e angahalá, pea ke aʻusia iá, ʻe ngāue ʻa Kalaisi ʻo ʻikai ngata pē ko e Tuʻi kae toe pehē foki ko e Taulaʻeiki Lahi. ʻI he anga-kātaki, te ne hanga ʻo tokoniʻi ʻa ʻene kakai talangofuá ke nau maʻu ʻa e ʻaonga mei he mahuʻinga ʻo e huhuʻi angahala ʻo e feilaulauʻi ʻo ʻene moʻui fakaetangatá tonu.

13. Ko e hā ʻa e ngaahi ʻaonga fakaesino ʻe aʻusia ʻi he malumalu ʻo e pule ʻa e Puleʻangá?

¹³ ʻI he malumalu ʻo e pule ʻa e Puleʻangá, ko e kau nofo ʻi he māmaní te nau aʻusia ʻa e ngaahi ʻaonga fakaofo fakaesino. “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa.” (Aisea 35:5, 6) Ko e kakano ko ia kuo fakafōtungakeheʻi ʻe he taʻumotuʻá pe mahamahakí ʻe hoko ʻo foʻou ange ia ʻi he kakano ʻo ha kiʻi tama, pea ko e ngaahi tuʻunga vaivai koví ʻe fetongi ia ko e moʻui longomoʻui. “Tupu ʻafaʻafa ai hono kakano, ʻo hulu ʻi ha tamasiʻi; foki ai ia ki he taimi talavou.” (Siope 33:25) ʻE hoko mai ʻa e ʻaho ʻa ia ʻe ʻikai ha taha te ne maʻu ha ʻuhinga ke pehē ai, “ʻOku ou mahaki.” Ko e hā hono ʻuhingá? Koeʻuhí ko e faʻahinga manavahē-ʻOtua ʻo e tangatá ʻe vete ange kinautolu mei he haʻisia ʻo e angahalá mo hono ngaahi nunuʻa fakamamahí. (Aisea 33:24; Luke 13:11-13) ʻIo, ko e ʻOtuá “te ne holoholo ʻa e loʻimata kotoa pe mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:4.

14. Ko e hā ʻoku kau ki hono aʻusia ʻa e haohaoa fakaetangatá?

¹⁴ Kae kehe, ko hono aʻusia ʻa e tuʻunga haohaoá, ʻoku kaunga ki ai ʻa e meʻa lahi ange ia ʻi hono maʻu pē ha sino moʻui lelei pea mo ha ʻatamai moʻui lelei. ʻOku kau ki ai ʻa hono tapua totonu atu ʻa e ngaahi ʻulungaanga ʻo Sihová, koeʻuhi naʻe ngaohi kitautolu ‘ʻi he ʻīmisi ʻo e ʻOtuá, ʻo fakatatau ki hono tataú.’ (Senesi 1:26, NW) Ke aʻusia iá, ʻoku fiemaʻu ʻa e ako lahi ʻaupito. ʻI he māmani foʻoú, ʻe “nofoʻanga  ai ʻa maʻoniʻoni.” Ko ia, hangē ko hono tomuʻa tala ʻe ʻAiseá, “e toki ako ae kakai o mamani ki he maonioni.” (2 Pita 3:13; Aisea 26:9, PM) Ko e ʻulungaanga ko ení ʻoku taki atu ia ki he melino​—ʻi he vahaʻa ʻo e kakai ʻo e matakali kotoa pē, haʻohaʻonga ʻo e ngaahi kaungāmeʻa ofí, ʻi he fāmili ʻo ha taha, pea hiliō ʻi he meʻa kotoa, pea mo e ʻOtuá tonu. (Same 85:10-13; Aisea 32:17) Ko e faʻahinga ʻoku nau ako ʻa e māʻoniʻoní ʻe akoʻi fakalakalaka kinautolu fekauʻaki mo e finangalo ʻo e ʻOtuá kiate kinautolú. ʻI he hoko ʻa e ʻofa ki he ʻOtuá ʻo faiaka loloto ʻi honau lotó, te nau muimui leva ʻi heʻene ngaahi foungá ʻi he tafaʻaki kotoa ʻo ʻenau moʻuí. ʻE malava leva ke nau pehē hangē ko ia naʻe fai ʻe Sīsuú, ‘ʻoku ou fai maʻuaipē ʻa e ngaahi meʻa ʻoku hōhōʻia ki heʻeku Tamaí.’ (Sione 8:29) He meʻa fakafiefia moʻoni ia ʻe hoko ki he moʻuí ʻi he taimi ʻe moʻoni ai ia fekauʻaki mo e faʻahinga kotoa ʻo e tangatá!

Ngaahi Lavameʻa Kuo ʻOsi Hā Mahino

15. ʻI hono ngāueʻaki ʻa e ngaahi fehuʻi ʻi he palakalafi ko ení, fakamahinoʻi ʻa e ngaahi lavameʻa ʻa e Puleʻangá pea fakahā ʻa e meʻa ʻoku totonu ke tau fai he taimi ní.

¹⁵ Ko e ngaahi lavameʻa kāfakafa ʻa e Puleʻanga ʻo e ʻOtuá mo hono kakaí ʻoku hā mahino ia. Ko e ngaahi fehuʻi mo e ngaahi konga tohi ʻoku muimui maí te ne fakamanatu kiate koe ʻa e niʻihi ʻo e ngaahi lavameʻa ko ení, pea pehē ki he ngaahi meʻa ʻoku malava pea ʻoku totonu ke fai he taimí ni ʻe he tangataʻifonua kotoa ʻo e Puleʻangá.

 Ko hai ia naʻe ʻuluaki ngāue ki ai ʻa e Puleʻangá, pea ko e hā hono olá? (Fakahā 12:7-10, 12)

 Ko e fakatahatahaʻi mai ʻo e toenga ʻo e kau mēmipa ʻo e kulupu fē ʻoku fai ʻa e tokanga ki ai talu hono fakanofo tuʻi ʻo Kalaisí? (Fakahā 14:1-3)

 Ko e hā ʻa e ngāue naʻe tomuʻa tala ʻe Sīsū te ne fai hili ʻa e kamata ko ia ʻa e fuʻu mamahi lahí, hangē ko ia ʻoku lēkooti ʻi he Mātiu 25:31-33?

  Ko e hā ʻa e ngāue tokamuʻa ʻoku lolotonga fakahoko he ʻaho ní? Ko hai ʻoku kau ki aí? (Sāme 110:3; Mātiu 24:14; Fakahā 14:6, 7)

 Ko e hā kuo ʻikai malava ai ʻe he kau fakafepaki fakapolitikalé mo fakalotú ke taʻofi ʻa e ngāue fakamalangá? (Sakalaia 4:6; Ngāue 5:38, 39)

 Ko e hā ʻa e ngaahi liliu kuo fakahoko ʻi he moʻui ʻa e faʻahinga ko ia ʻoku nau ʻulutukua ki he pule ʻa e Puleʻangá? (Aisea 2:4; 1 Kolinito 6:9-11)

Puleʻanga ʻo ha Taʻu ʻe Afe

16. (a) Ko e hā ʻa e fuoloa ʻe pule ai ʻa Kalaisí? (e) Ko e hā ʻa e ngaahi meʻa fakaofo ʻe fai ʻi he lolotonga mo e hili ʻa e taimi ko iá?

¹⁶ Hili hono tuku ki he luó ʻa Sētane mo ʻene kau tēmenioó, ʻe pule ʻa Sīsū Kalaisi mo hono kaungā ʻea ʻe toko 144,000 ko e ngaahi tuʻi mo e kau taulaʻeiki ʻi he taʻu ʻe afe. (Fakahā 20:6) Lolotonga ʻa e vahaʻa taimi ko iá, ʻe ʻomi ai ʻa e faʻahinga ʻo e tangatá ki he haohaoá, fakataha mo hono toʻo taʻengata atu ʻa e angahalá mo e mate ʻia ʻĀtamá. ʻI he ngata ʻa e Pule Taʻu ʻe Afé, hili ia ʻa hono fakahoko ola lelei ʻene ngāue ko e Tuʻi-Taulaʻeiki faka-Mīsaiá, ʻe hanga leva ʻe Sīsū ʻo ‘tukuange . . . ʻa e puleʻangá’ ki heʻene Tamaí, ‘ke tāfataha ʻa e ʻOtuá ʻi he meʻa kotoa pe.’ (1 Kolinito 15:24-28) ʻI he tuʻunga ko iá, ʻoku tuku ange mai leva ʻa Sētane ʻo fuoloa siʻi ke ne ʻahiʻahiʻi ʻa e faʻahinga kuo huhuʻi ʻo e tangatá fekauʻaki mo ʻenau poupou ki he tuʻunga-hau fakaleveleva ʻo Sihová. Hili ʻa e kakato ʻa e ʻahiʻahi fakaʻosi ko iá, ʻe fakaʻauha leva ʻe Sihova ʻa Sētane mo e kau angatuʻu ko ia ʻoku kau mo iá. (Fakahā 20:7-10) Ko e faʻahinga ko ia ʻoku nau poupouʻi ʻa e tuʻunga-hau ʻo Sihová​—ʻa ʻene totonu ko ia ke pulé—te nau ʻosi fakahāhaaʻi kakato ʻenau mateaki taʻemaliliu. ʻE toki ʻomai leva kinautolu ki honau vahaʻangatae totonu mo Sihová, ʻo ne tali lelei kinautolu ko hono ngaahi foha mo hono ngaahi ʻofefine, kuo fakahōifuaʻi fakaʻotua ki he moʻui taʻengata.​—Loma 8:21.

17. (a) Ko e hā ʻe hoko ki he Puleʻangá ʻi he ngata ʻa e taʻu ʻe taha afé? (e) ʻI he ʻuhinga fē ʻe moʻoni ai ko e Puleʻangá “e ikai auha o lauikuoga”?

 ¹⁷ Ko ia ai, ko e ngāue tonu ʻa Sīsuú mo ia ʻo e toko 144,000 ʻe liliu ia ʻi he tuʻunga felāveʻi mo e māmaní. Ko e hā ʻenau ngāue ki he kahaʻú? ʻOku ʻikai ha lau ia ʻa e Tohitapú ki ai. Ka ʻo kapau te tau poupou faitōnunga ai pē ki he tuʻunga-hau ʻo Sihová, te tau moʻui atu ʻi he ngataʻanga ʻo e Pule Taʻu ʻe Afé ke ʻilo ai ʻa e meʻa kuo fakataumuʻa kinautolu ki ai ʻe Sihová pea pehē ki hono ʻuniveesi kāfakafá. Kae kehe, ko e tuʻunga-pule taʻu ʻe afe ʻa Kalaisí ʻe “taʻengata” pea ko hono Puleʻangá “ʻe ʻikai ʻauha.” (Taniela 7:14) ʻI he ʻuhinga fē? Ko e taha e meʻa, ko e mafai pulé ʻe ʻikai ʻoange ia ki he nima ʻo e niʻihi kehé ʻa ia ʻoku nau maʻu ʻa e ngaahi taumuʻa kehekehe, he ko Sihova ia ʻe hoko ko e Pulé. Pehē foki, ko e Puleʻangá “e ikai auha o lauikuoga” koeʻuhí ko ʻene ngaahi lavameʻá ʻe tuʻuloa ʻo taʻengata. (Taniela 2:44) Pea ko e Tuʻi-Taulaʻeiki faka-Mīsaiá mo hono kaungā tuʻi-taulaʻeikí ʻe fakalāngilangiʻi taʻengata koeʻuhí ko ʻenau ngāue faitōnunga kia Sihová.

Fetalanoaʻaki Fakamanatu

• Ko e hā ʻa e ʻuhinga ko e Puleʻanga pē ʻo e ʻOtuá ʻa e fakaleleiʻanga ki he ngaahi palopalema ʻo e faʻahinga ʻo e tangatá? Ko fē taimi naʻe kamata pule ai ʻa e Tuʻi ʻo e Puleʻanga ʻo e ʻOtuá?

• Ko e hā ʻa e meʻa ʻoku mātuʻaki fakamānako kiate koe fekauʻaki mo e Puleʻanga ʻo e ʻOtuá pea ko e hā ʻa e meʻa te ne fakahokó?

• Ko e hā ʻa e ngaahi lavameʻa ʻa e Puleʻangá kuo ʻosi malava ke tau sio ki aí, pea ko e hā ʻa e tafaʻaki ʻoku tau kaunga ki ai ʻi he ngaahi meʻá ni?

[Fehuʻi ki he Ako]

[Fakatātā ʻi he peesi 93]

ʻI he malumalu ʻo e Puleʻanga ʻo e ʻOtuá, ʻe ako ʻe he kakai kotoa pē ʻa e māʻoniʻoní