Ngāueʻaki ʻa e Anga-Līʻoa Faka-ʻOtuá ʻi ʻApi
Vahe Taha Fitu
Ngāueʻaki ʻa e Anga-Līʻoa Faka-ʻOtuá ʻi ʻApi
1. Kuo anga-fēfē hanga ʻe hono ngāueʻaki ko ia ʻo e tataki ʻa e Folofola ʻa e ʻOtuá ʻo tākiekina ʻa e ngaahi nofo malí?
KO Sihova ʻa e Tupuʻanga ʻo e nofo malí, pea ʻoku tokonaki mai ʻe heʻene Folofolá ʻa e tataki mātuʻaki lelei taha ki he ngaahi fāmilí. Ko e ola ʻo hono ngāueʻaki ʻa e tataki ko iá, kuo langa hake ai ʻe he kakai tokolahi ha ngaahi nofo mali lavameʻa. ʻOku taau ke fakaongoongoleleiʻi, ko e niʻihi ʻa ia naʻa nau nonofo pē kuo ueʻi kinautolu ke lēsisita fakalao ʻenau nofo malí. Ko e niʻihi kuo tuku ʻenau faingāmeʻa ʻi tuʻa ʻi he nofo malí. Ko e kakai fakamālohi ko ia naʻa nau ngaohikoviʻi honau ngaahi uaifí mo ʻenau fānaú kuo nau ako ke fakahāhā ʻa e anga-ʻofa mo e anga-lelei.
2. Ko e hā ʻoku kau ʻi he moʻui fakafāmili faka-Kalisitiané?
2 Ko e moʻui fakafāmili Kalisitiané ʻoku kau ki ai ʻa e ngaahi meʻa lahi, hangē ko ia ko e anga ʻetau vakai ki he fuoloa ʻo e nofo malí, ko e meʻa ʻoku tau fai ke fakahoko hotau ngaahi fatongia ʻi he fāmilí, pea mo e anga ʻo ʻetau feangainga mo e ngaahi mēmipa ʻo e fāmilí. (Efeso 5:33–6:4) Lolotonga ʻoku tau ʻilo nai ʻa e meʻa ʻoku leaʻaki ʻe he Tohitapú fekauʻaki mo e moʻui fakafāmilí, ko e meʻa kehe ʻaupito ʻa hono ngāueʻaki ʻona ʻa e faleʻi ʻa e Tohitapú. ʻOku ʻikai ke loto ha taha ʻo kitautolu ke hangē ko e faʻahinga ko ia naʻe fakahalaiaʻi ʻe Sīsū ko ʻenau kalofi ʻa e ngaahi fekau ʻa e ʻOtuá. Naʻa nau fakaʻuhinga hala ko ha kiʻi anga-līʻoa fakalotu pē naʻe feʻunga ia. (Mātiu 15:4-9) ʻOku ʻikai ke tau loto ke maʻu ha founga ʻo e anga-līʻoa fakaʻotuá kae taʻemalava ke ngāueʻaki ia ʻi hotau fāmilí tonu. Ko hono kehé, ʻoku tau loto ke fakahāhā ʻa e anga-līʻoa fakaʻotua moʻoní, ʻa ia ʻoku “fakakoloa ʻaupito.”—1 Timote 5:4; 6:6; 2 Timote 3:5.
Ko e Hā Hono Fuoloa ʻo e Nofo Malí?
3. (a) Ko e hā ʻoku hoko ki he ngaahi nofo mali lahi, ka ko e hā ʻoku totonu ko ʻetau fakapapaú ia? (e) ʻI hono ngāueʻaki hoʻo Tohitapú, tali ʻa e ngaahi fehuʻi ʻoku fakahokohoko ʻi lalo ʻi he palakalafi ko ení.
3 ʻI ha tuʻunga fakautuutu, ko e haʻi ʻo e nofo malí ʻoku fakamoʻoniʻi kuo ngāvaivai. Ko e ngaahi hoa mali ʻe niʻihi ʻa ia kuo nau nofo fakataha ʻi ha laui taʻu kuo nau fili eni ke vete pea mali mo ha tokotaha kehe. Pehē foki ʻoku ʻikai toe ngali kehe ia ke fanongo ko e ngaahi hoa mali kei īkí ia kuo nau fili ke taki taha maʻana hili ia ha mali ʻi ha taimi nounou pē. Neongo pe ko e hā ʻa e meʻa ʻoku fai ʻe he niʻihi kehé, ʻoku totonu ke tau loto kitautolu ke fakahōifuaʻi ʻa Sihova. Ko ia tau lāulea angé ki he ngaahi fehuʻi mo e ngaahi konga Tohitapu ʻoku hoko haké ke sio pe ko e hā ʻa e meʻa ʻoku leaʻaki ʻe he Folofola ʻa e ʻOtuá fekauʻaki mo e fuoloa ʻo e nofo malí.
ʻI he taimi ʻoku mali ai ha tangata mo ha fefine, ko e hā hono fuoloa ʻoku totonu ke na ʻamanekina ke na nofo fakataha aí? (Maake 10:6-9; Loma 7:2, 3)
Ko e hā ʻa e makatuʻunga pē taha ki he vete malí fakataha mo e ala malava ke toe malí ʻa ia ʻoku totonu ʻi he ʻao ʻo e ʻOtuá? (Mātiu 5:31, 32; 19:3-9)
ʻOku anga-fēfē ongoʻi ʻa Sihova fekauʻaki mo e ngaahi vete mali ko ia ʻoku ʻikai fakamafaiʻi ʻe heʻene Folofolá? (Malakai 2:13-16)
ʻOku poupouʻi ʻe he Tohitapú ʻa e māvaé ko ha founga ia ʻo e fakaleleiʻi ʻo e ngaahi palopalema fakaemalí? (1 Kolinito 7:10-13)
ʻI he ngaahi tuʻunga fē ʻe feʻunga nai ai ke fai ha māvae? (Same 11:5; Luke 4:8; 1 Timote 5:8)
4. Ko e hā ʻoku tolonga ai ʻa e ngaahi nofo mali ʻe niʻihi?
4 ʻOku lavameʻa ʻa e ngaahi nofo mali ʻe niʻihi, ʻo tolonga. Ko e hā hono ʻuhingá? Ko e fakatatali ko ia kae ʻoleva ke matuʻotuʻa ʻa e ongo faʻahí ko e taha ia e moʻoniʻi meʻa, ka ko hono ʻilo ha hoa ʻa ia ʻoku ʻinasi ʻi he ngaahi meʻa ʻokú te mahuʻingaʻia aí pea malava ke fetalanoaʻaki hangatonu ki he ngaahi meʻá ʻoku toe mahuʻinga mo ia. Ko e meʻa ʻoku mahuʻinga angé foki, ko hono ʻilo ko ia ha hoa ʻoku ʻofa kia Sihova mo ʻapasia ki heʻene Folofolá ko e makatuʻunga ia ki hono fakaleleiʻi ʻo e ngaahi palopalemá. (Sāme 119:97, 104; 2 Timote 3:16, 17) Ko ha tokotaha pehē ʻe ʻikai te ne maʻu ʻe ia ʻa e fakakaukau kapau heʻikai lele lelei ʻa e ngaahi meʻá, te ne malava maʻu pē ke fai ha māvae pe ko ha vete mali. ʻE ʻikai te ne ngāueʻaki ʻa e ngaahi tōnounou ʻa hono hoá ko ha kalofanga ia ke kalofi ai hono ngaahi fatongiá tonu. Ko hono kehé, te ne fehangahangai mo e ʻū palopalemá pea kumi ki ha ngaahi fakaleleiʻanga ʻe ala ngāueʻakí.
5. (a) ʻOku anga-fēfē kau ʻa e mateaki kia Sihová ʻi he nofo malí? (e) Naʻa mo e taimi ʻoku fai ai ha fehangahangai mo e fakafepakí, ko e hā ʻa e ngaahi ʻaonga ʻe lava ke hoko mai mei he piki maʻu ko ia ki he ngaahi tuʻunga ʻa Sihová?
5 ʻOku taukaveʻi ʻe Sētane ko e taimi ko ia ʻoku tau faingataʻaʻia aí, te tau siʻaki leva ʻa e ngaahi founga ʻa Sihová. (Siope 2:4, 5; Palovepi 27:11) Ka ko e fuʻu tokolahi ʻo e Kau Fakamoʻoni ʻa Sihova ko ia kuo nau faingataʻaʻia koeʻuhi ko haʻanau maʻu ha hoa ʻoku fakafepakí kuo ʻikai ke nau fakangata ʻenautolu ʻenau fuakava malí. ʻOku nau hokohoko atu ke mateaki kia Sihova mo ʻene ngaahi fekaú. (Mātiu 5:37) Ko e faʻahinga kuo nau kīvoí kuo nau maʻu ʻa e fiefia ʻo e kau fakataha mai honau hoá ʻi hono tauhi ʻa Sihová—neongo e hili atu ha laui taʻu ʻo e fakafepakí! (1 Pita 3:1, 2) Ka ki he kau Kalisitiane ko ia ʻoku ʻikai fakahā ʻe honau ngaahi hoá ha fakaʻilonga ʻo ha liliu pe ko ia kuo liʻaki ʻe honau ngaahi hoá koeʻuhi ko ʻenau tauhi kia Sihová, ko e faʻahingá ni foki ʻoku nau ʻilo ʻe tāpuekina kinautolu ʻi heʻenau ʻoatu ʻa e fakamoʻoni ʻo e anga-līʻoa fakaʻotua ʻi ʻapí.—Sāme 55:22; 145:16.
Taki Taha Fai ʻEne Tafaʻaki
6. Ke maʻu ha nofo mali lavameʻa, ko e hā ʻa e fokotuʻutuʻu kuo pau ke ʻapasiaʻí?
6 Ko e moʻoni, ko hono maʻu ha nofo mali lavameʻa ʻoku fiemaʻu ʻa e meʻa lahi ange ia ʻi he nofo fakatahá pē. Ko ha fiemaʻu tefito ʻi he tafaʻaki ʻo e hoa taki taha ko e ʻapasia ki he fokotuʻutuʻu ko ia ʻa Sihova fekauʻaki mo e tuʻunga-ʻulú. ʻOku tokoni eni ki he tuʻunga maau mo e ongoʻi malu ʻi he ʻapí. ʻI he 1 Kolinito 11:3, ʻoku tau lau ai: “Ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata; pea ko e ʻulu ʻo Kalaisi ko e ʻOtua.”
7. ʻOku totonu ke fēfē hono fakahoko ʻo e tuʻunga-ʻulú ʻi he fāmilí?
7 Naʻá ke fakatokangaʻi ʻa e meʻa ʻoku ʻuluaki lave ki ai ʻa e veesi ko iá? ʻIo, ko e tangata kotoa pē ʻoku ʻi ai hono ʻUlu, ko Kalaisi, ʻa ia ʻoku totonu ke ne ʻulutukua ki ai. ʻOku ʻuhinga ení ko e husepānití ʻoku totonu ke ne fakahoko hono tuʻunga-ʻulú ʻi ha founga ʻoku tapua mai ai ʻa e ngaahi ʻulungaanga ʻo Sīsuú. ʻOku ʻulutukua ʻa Kalaisi kia Sihova, ʻo ʻofa loloto ki he fakatahaʻangá mo tokonaki ki ai. (1 Timote 3:15) Naʻe aʻu ʻo ne “foaki ia koeuhi koia.” Ko Sīsuú, ʻoku ʻikai ke hīkisia mo taʻefakaʻatuʻi, ka ʻoku “anga-mokomoko mo loto-fakatōkilalo.” Ko e faʻahinga ʻoku nau ʻi he malumalu ʻo hono tuʻunga-ʻulú ʻoku nau “ʻilo ha fakaivifoʻou ki [honau] soulú.” ʻI he taimi ʻoku feangainga ai ha husepāniti ki hono fāmilí ʻi he founga ko ení, ʻokú ne fakahāhā ai ʻokú ne fakamoʻulaloaʻi ia kia Kalaisi. ʻOku totonu leva ki ha uaifi Kalisitiane ke ne ʻilo ʻoku ʻaonga mo fakaivifoʻou ke ngāue fakataha mo hono husepānití mo ʻulutukua ki hono tuʻunga-ʻulú.—Efeso 5:25-33, PM; Mātiu 11:28, 29, NW; Palovepi 31:10, 28.
8. (a) Ko e hā nai ʻe hā ai ko e ngaahi founga faka-Kalisitiané ʻoku ʻikai ke ne maʻu ʻe ia ʻa e ola ʻoku fiemaʻú ʻi he ngaahi ʻapi ʻe niʻihi? (e) Ko e hā ʻoku totonu ke tau faí kapau ʻoku tau fehangahangai mo ha tuʻunga pehē?
8 Kae kehe, ʻe malanga hake ʻa e ngaahi palopalema. Ko ha tuʻunga fehiʻa ki hano fakahinohinoʻi ʻe he niʻihi kehé ʻe ʻosi hoko nai ia ʻo faiaka loloto ki muʻa ia ke kamata ha taha ʻi he fāmilí ke ngāueʻaki ʻa e ngaahi tefitoʻi moʻoni ʻo e Tohitapú. Ko ha kole fakalelei mo ha tōʻonga anga-ʻofa ʻe ʻikai nai hā ngali ola lelei ia. ʻOku tau ʻilo ʻoku pehē ʻe he Tohitapú ke tuku ʻa e “lili mo e ʻita mo e feʻiohoʻaki mo e lauʻikovi.” (Efeso 4:31) Ka ʻo kapau ʻoku ʻikai hā ʻoku mahinoʻi ʻe he niʻihi kehé ia ha toe meʻa kehe, ko e hā ʻoku totonu ke faí? Sai, naʻe ʻikai ke faʻifaʻitaki ʻa Sīsū ia ki he faʻahinga naʻa nau fakamanamana mo leakoví, ka naʻá ne falala ki heʻene Tamaí. (1 Pita 2:22, 23) Ko ia ʻi he taimi ʻoku malanga hake ai ha tuʻunga fakamafasia ʻi he ʻapí, ʻoatu ha fakamoʻoni ʻo e anga-līʻoa fakaʻotuá ʻaki ʻa e lotu kia Sihova ki heʻene tokoní kae tuku hono ohi mai ʻa e ngaahi founga ʻo e māmaní.—Palovepi 3:5-7.
9. ʻI he ʻikai ko e fakasio ʻo e fehālaakí, ko e hā kuo ako ʻe he ngaahi husepāniti Kalisitiane tokolahi ke faí?
9 Ko e liliú ʻoku ʻikai hoko vave maʻu pē, ka ko e faleʻi ʻa e Tohitapú ʻoku ngāue maʻu pē ʻi he taimi ʻoku ngāueʻaki anga-kātaki mo tōtōivi aí. Kuo ʻilo ʻe he ngaahi husepāniti tokolahi ko e nofo malí ʻoku kamata ke fakalakalaka ia ʻi he taimi ʻoku nau hoko ai ʻo mahinoʻi ʻa e ngaahi feangainga ʻa Kalaisi mo e fakatahaʻangá. Ko e fakatahaʻanga ko iá ʻoku ʻikai faʻuʻaki ia ha faʻahinga haohaoa ʻo e tangatá. Neongo ia, ʻoku ʻofaʻi ia ʻe Kalaisi, ʻo ne fokotuʻu ʻa e faʻifaʻitakiʻanga totonu ki aí, pea mo ngāueʻaki ʻa e ngaahi konga Tohitapú ke tokoniʻi ia ke fakalakalaka. Naʻá ne foaki ʻene moʻuí koeʻuhi ko e fakatahaʻangá. (1 Pita 2:21) Kuo fakalototoʻaʻi ʻe heʻene ngaahi faʻifaʻitakiʻangá ʻa e ngaahi husepāniti Kalisitiane tokolahi ke nau tokonaki ha tuʻunga-ʻulu lelei mo ʻoatu ha tokoni anga-ʻofa ke fakalakalaka ai ki muʻa. ʻOku ʻomi ʻe he meʻá ni ha ola lelei ange ia ʻi hono fakasio pē ʻo e fehālaakí pe ko e fakafisi ko ia ke talanoá.
10. (a) ʻI he ngaahi founga fē ʻe hanga nai ai ʻe ha husepāniti pe ko ha uaifi—naʻa mo ha taha ʻokú ne taku ko ha Kalisitiane ia—ʻo ʻai ʻa e moʻuí ke faingataʻa ki he niʻihi kehe ʻi ʻapí? (e) Ko e hā ʻe fai nai ke fakaleleiʻi ʻa e tuʻunga ko iá?
10 Fēfē kapau ʻoku ʻikai ke ongongofua ha husepāniti ia ki he ngaahi fiemaʻu fakaeongo ʻa hono fāmilí pe ʻoku ʻikai ke tamuʻomuʻa ia ʻi hono fai ha fokotuʻutuʻu ki ha fetalanoaʻaki fakafāmili ʻi he Tohitapú pea ki he ngaahi ngāue kehé? Pe ʻe fēfē kapau ʻoku ʻikai fie ngāue fakataha ha uaifi ia mo fakahāhā ʻa e anganofo fakaʻotuá? ʻOku faʻa maʻu ʻe he niʻihi ʻa e ola lelei ʻi hono fai ha ngaahi fetalanoaʻaki fakafāmili anga-fakaʻapaʻapa fekauʻaki mo e ngaahi palopalemá. (Senesi 21:10-12; Palovepi 15:22) Pea neongo kapau ko e olá ʻoku ʻikai ko ia kotoa ia naʻe fai ki ai ʻa e ʻamanakí, ko kitautolu taki taha ʻe lava ke tau tokoni ki ha fakalakalaka ʻi he ʻātakai ʻo e ʻapí ʻaki hono fakaʻatā ʻa e fua ʻo e laumālie ʻo e ʻOtuá ʻi heʻetau moʻuí, ʻo fakahāhā ʻa e fakaʻatuʻi anga-ʻofa ki he ngaahi mēmipa kehe ʻo e fāmilí. (Kaletia 5:22, 23) ʻE hoko mai ʻa e fakalakalaká, ʻikai ʻaki ʻa e fakatatali ki he tokotaha kehé ke ne fai ha meʻa, ka ʻi hono fai ʻetau tafaʻakí tonu, ʻo fakahāhaaʻi ai ʻoku tau ngāueʻaki ʻa e anga-līʻoa fakaʻotuá.—Kolose 3:18-21.
Feituʻu ʻe Maʻu mei Ai ʻa e Talí
11, 12. Ko e hā kuo tokonaki ʻe Sihova ke tokoniʻi kitautolu ke ʻai ke lavameʻa ʻa e moʻui fakafāmilí?
11 ʻOku lahi ʻa e ngaahi maʻuʻanga fakamatala ʻa ia ʻoku hanga ki ai ʻa e kakaí ki ha faleʻi fekauʻaki mo ʻenau ngaahi meʻa fakafāmilí. Ka ʻoku tau ʻilo ʻetautolu ko e Folofola ʻa e ʻOtuá ʻoku ʻi ai ʻa e akonaki mātuʻaki lelei tahá, pea ʻoku tau houngaʻia he fakafou ʻi heʻene kautaha hāmaí, ʻoku tokoniʻi ai kitautolu ʻe he ʻOtuá ke ngāueʻaki ia. ʻOkú ke maʻu ʻaonga kakato mei he tokoni ko iá?—Sāme 119:129, 130; Maika 4:2.
12 Tānaki atu ki he maʻu ʻo e ngaahi fakataha ʻa e fakatahaʻangá, kuó ke tuku mavahe ha taimi tuʻumaʻu ki he ako Tohitapu fakafāmilí? Ko e ngaahi fāmili ko ia ʻoku nau fai peheé ʻoku lava ke nau ngāue atu ke hoko ʻo fāʻūtaha ʻi heʻenau lotú. Ko ʻenau moʻui fakafāmilí ʻoku fakakoloaʻi ia ʻi heʻenau ngāueʻaki ko ia ʻa e Folofola ʻa e ʻOtuá ki honau ngaahi tuʻungá tonu.—Teutalonome 11:18-21.
13. (a) Kapau ʻoku ʻi ai haʻatau ngaahi fehuʻi fekauʻaki mo e ngaahi meʻa fakafāmilí, ko fē feituʻu ʻoku faʻa malava ke tau maʻu mei ai ʻa e tokoni ʻoku fiemaʻú? (e) Ko e hā ʻoku totonu ke tapua atu ʻi he ngaahi fili kotoa ʻoku tau faí?
13 ʻOku ʻi ai nai hoʻo ngaahi fehuʻi fekauʻaki mo e ngaahi meʻa fakafāmilí. Ko e fakatātaá, fēfē ʻa e fakavahavaha fanaú? Kuo fakatonuhiaʻi tuʻo taha ʻa e fakatōtamá? Kapau ʻoku ʻikai loko mahuʻingaʻia ʻa e kiʻi tamá ʻi he ngaahi meʻa fakalaumālié, ko e hā hono lahi ʻoku totonu ke fiemaʻu ai ia ke kau ʻi he lotu fakafāmilí? Ko e lahi ʻo e ngaahi fehuʻi peheé kuo fai ʻa e lāulea ki ai ʻi he ngaahi tohi kuo pulusi ʻe he Kau Fakamoʻoni ʻa Sihová. Ako ke ngāueʻaki ʻa e ngaahi tokoni ki he ako Tohitapú, kau ai ʻa e ʻū ʻinitekí, ke kumiʻaki ʻa e ngaahi talí. Kapau ʻoku ʻikai ke ke maʻu ʻa e ngaahi tohi ko ia ʻoku lave ki ai ʻi ha ʻiniteki, vakaiʻi ʻa e laipeli ʻi he Fale Fakatahaʻangá. Pe ʻokú ke ala maʻu nai ʻe koe ʻa e ngaahi tohi ko ení ʻi hoʻo komipiutá. ʻE lava ke ke toe fetalanoaʻaki ki hoʻo ngaahi fehuʻí mo e kau tangata pe kau fefine Kalisitiane matuʻotuʻá. Kae ʻoua te ke ʻamanekina maʻu pē ha tali ʻio pe ʻikai ki he fehuʻi kotoa pē. ʻI he taimi lahi kuo pau ke ke fai ha fili, ʻo fai fakafoʻituitui pe ʻi he tuʻunga ko e ongo meʻa mali. Pea fai ʻa e ngaahi fili ko ia ʻoku fakahāhā ai ʻokú ke ngāueʻaki ʻa e anga-līʻoa fakaʻotuá ʻo ʻikai ngata pē ʻi he kakaí kae pehē foki ʻi ʻapi.—Loma 14:19; Efeso 5:10.
Fetalanoaʻaki Fakamanatu
• ʻOku anga-fēfē kau ʻa e mateaki kia Sihová ʻi he faitōnunga ki hoto hoa malí?
• ʻI he tofanga ko ia ʻi ha mafasia koeʻuhi ko e ngaahi palopalema fakafāmilí, ko e hā te ne tokoniʻi kitautolu ke fai ʻa e meʻa ʻoku fakahōifua ki he ʻOtuá?
• Neongo kapau ko e niʻihi kehe ʻi he fāmilí ʻoku nau tōnounou, ko e hā ʻe lava ke tau fai ke fakaleleiʻi ai ʻa e tuʻunga ʻoku hokó?
[Fehuʻi ki he Ako]
[Fakatātā ʻi he peesi 155]
Ko e tuʻunga-ʻulu ʻo e husepānití ʻoku totonu ke tapua atu ai ʻa e ngaahi ʻulungaanga ʻo Sīsuú
[Fakatātā ʻi he peesi 157]
Ko hono fai ko ia ha ako Tohitapu tuʻumaʻu mo e fāmilí ʻoku tokoni ia ke fakafāʻūtahaʻi ia
