Vahe Ua Noa

Tauhi Maʻu ʻi he ʻAtamaí ʻa e ʻAho ʻo Sihová

1. ʻI he taimi naʻá ke fuofua ako ai ko e fakahaofi mei he ngaahi meʻa fakamamahi ʻo e māmani motuʻa ko ení kuo ofí, naʻe anga-fēfē hoʻo ongoʻí?

 KO E taha ʻo e ʻuluaki ngaahi meʻa naʻá ke ako mei he Tohitapú ko e taumuʻa ʻa Sihová ke hoko ʻa e māmaní kotoa ko ha palataisi. ʻI he māmani foʻou ko iá, ko e taú, faihiá, masivá, mahamahakí, faingataʻaʻiá, pea mo e maté ʻe ʻikai toe ʻi ai. Naʻa mo e maté ʻe toe foki mai ki he moʻuí. He ʻamanaki fakaofo moʻoni ia! Ko e ofi mai ʻo e ngaahi meʻa kotoa ko iá ʻoku fakamamafaʻi ia ʻe he fakamoʻoni ko ia ko e ʻi ai taʻehāmai ʻa Kalaisi ko e Tuʻi ʻoku pulé naʻe kamata ia ʻi he 1914 pea talu mei ai mo ʻetau ʻi he ngaahi ʻaho fakaʻosi ʻo e māmani fulikivanu ko ení. ʻI he ngataʻanga ʻo e ngaahi ʻaho fakaʻosí ni, ʻe fakaʻauha ai ʻe Sihova ʻa e fokotuʻutuʻu ʻo e ngaahi meʻa lolotongá ni pea taki atu ai ki he māmani foʻou kuo talaʻofá!

2. Ko e hā ʻa e “ʻaho ʻo Sihova”?

² ʻOku ui ʻe he Tohitapú ʻa e hoko mai ʻa e taimi fakaʻauha ko ení ko e “ʻaho ʻo Sihová.” (2 Pita 3:10, NW) Ko e “ʻaho ʻo e houhau ʻa Sihova” fekauʻaki mo e māmani kotoa ʻo Sētané. (Sefanaia 2:3) ʻOkú ne aʻu ki hono tumutumú ʻi he “tau ʻo e ʻaho lahi ʻo e ʻOtua Aoniu. . . . ʻOku ui ʻi he lea faka-Hepelu ko Hamaketone [ʻĀmaketone],” ʻa ia ʻoku fakaʻauha ʻosiʻosingamālie ai ʻa e “ngaahi tuʻi ʻo mamani kātoa.” (Fakahā 16:14, 16) ʻOku fakahāhā ʻe hoʻo founga moʻuí ʻa hoʻo tuipau ko ia ko e “ʻaho ʻo Sihova” ʻoku ofi?​—Sefanaia 1:14-18; Selemaia 25:33.

3. (a) Ko fē taimi ʻe hoko mai ai ʻa e ʻaho ʻo Sihová? (e) Kuo anga-fēfē hono fakamoʻoniʻi ʻene ʻaonga ʻo e ʻikai fakaeʻa mai ʻe Sihova ʻa e “ʻaho ko ia, mo hono houa”?

 ³ ʻOku ʻikai ke tala mai ʻe he Tohitapú ia kia kitautolu ʻa e ʻaho tofu pē ko ia ʻe haʻu ai ʻa Sīsū Kalaisi ko e Tokotaha Faifakaʻauha ʻa Sihova fekauʻaki mo e fokotuʻutuʻu ʻo e ngaahi meʻa ʻa Sētané. “Ka ko e meʻa ki he ʻaho ko ia, mo hono houa, ʻoku ʻikai ha taha ʻoku ʻilo ki ai; ʻio, pē ko ha angelo ʻi he langi; pea naʻa mo e ʻAlo ʻoku ʻikai; ngata pē ʻi he Tamai toko taha,” ko e lea ia ʻa Sīsuú. (Maake 13:32) Kapau ʻoku ʻikai ʻofa moʻoni ha taha kia Sihova, te nau hehema ke tautoloi ʻa hono ʻahó ʻi honau ʻatamaí pea nau hanga kinautolu ki he ngaahi ngāue fakamāmaní. Ka ko e faʻahinga ʻoku nau ʻofa moʻoni kia Sihová te nau tauhi ʻaufuatō kiate ia, neongo pe ko e fē taimi ʻoku hoko mai ai ʻa e ngataʻanga ʻo e fokotuʻutuʻu fulikivanu ko ení.​—Sāme 37:4; 1 Sione 5:3.

4. Ko e hā naʻe leaʻaki ʻe Sīsū ko ha fakatokangá?

⁴ ʻI he lea ko ha fakatokanga ki he kau ʻofa kia Sihová, ʻoku pehē ʻe Sīsū: “Mou tokanga, mou ʻā pē: he ʻoku ʻikai te mou ʻilo pe fakakū hono taimi.” (Maake 13:33-37) ʻOkú ne naʻinaʻi mai kia kitautolu ke ʻoua naʻa fakaʻatā ʻa e inú mo e kaí pe “faʻa lotomoʻua ki he moʻui ni” ke ne inumia ʻa e lahi fau ʻo ʻetau tokangá ʻo mole ai ʻetau vakai ki he mafatukituki ʻo e ngaahi taimí.​—Luke 21:34-36; Mātiu 24:37-42.

5. Hangē ko ia naʻe fakamatalaʻi ʻe Pitá, ko e hā ʻe ʻomi ʻe he ʻaho ʻo Sihová?

⁵ ʻOku pehē ʻa hono akonekina kitautolu ʻe Pita ke tauhi maʻu ʻi he ʻatamaí ʻa e “hoko mai oe aho oe Otua [“Sihova,” NW] aia e vela o auha ai ae gaahi lagi, bea e vai i he vela lahi ae gaahi tefitoʻi mea.” Ko e ngaahi puleʻanga fakaetangata kotoa pē​—ʻa e “gaahi lagi”​—ʻe fakaʻauha, pea ʻe pehē ki he fakalūkufua ʻo e sōsaieti fakaetangatá​—ʻa e “fonua”—mo hono “gaahi tefitoʻi mea,” ʻa e ngaahi fakakaukau mo e ngaahi ngāue ʻa e māmani koví ni, ʻo hangē ko ʻene ngaahi fakakaukau tauʻatāina mei he ʻOtuá mo ʻene founga  moʻui taʻetaau mo fakamatelié. ʻE fetongi eni ʻe ha “gaahi lagi foou [Puleʻanga fakahēvani ʻo e ʻOtuá] moe fonua foou [ko ha sōsaieti foʻou fakaemāmani]” ʻa ia “oku nofo ai ae maonioni.” (2 Pita 3:10-13, PM) Ko e ngaahi meʻa fakatupu movete ko eni ki he māmaní ʻe kamata fakafokifā ia pea ʻi ha ʻaho mo ha houa taʻeʻamanekina.​—Mātiu 24:44.

Tokanga Ai Pē ki he Fakaʻilongá

6. (a) Ko e hā hono lahi ʻo e kaunga ki he ngataʻanga ʻo e fokotuʻutuʻu faka-Siú ʻa e tali ko ia ʻa Sīsū ki he fehuʻi ʻene kau ākongá? (e) Ko e hā ʻa e ngaahi konga ʻo e tali ʻa Sīsuú ʻokú ne fakahanga ʻa e tokangá ki he ngaahi meʻa mo e ngaahi tuʻunga naʻe hoko mei he 1914 ʻo faai mai?

⁶ ʻI he vakai ki he kuonga ʻa ia ʻoku tau moʻui aí, ʻoku totonu ke tau hoko ʻo alāanga mo e ngaahi fakaikiiki ʻo e fakaʻilonga tuifio ko ia ʻokú ne fakamahinoʻi pau ʻa e ngaahi ʻaho fakaʻosí​—“fakaʻosiʻosi ʻo e ngaahi meʻa ʻoku tuʻú ni.” Tauhi maʻu ʻi he ʻatamaí ko e taimi naʻe tali ai ʻe Sīsū ʻa e fehuʻi ʻa ʻene kau ākongá, ʻa ē ʻoku lēkooti ʻi he Mātiu 24:3 (NW), ko e niʻihi ʻo e meʻa naʻá ne fakamatalaʻi ʻi he veesi 4 ki he 22 naʻe fakahoko ia ʻi ha tuʻunga siʻisiʻi ange ʻi he fokotuʻutuʻu ʻo e ngaahi meʻa faka-Siú ʻi he vahaʻa ʻo e 33 mo e 70 T.S. Ka ko e kikité ia ʻoku ʻi ai hono fakahoko lahi ange ʻi he vahaʻa taimi talu mei he 1914, ʻa e taimi ʻo e “ʻi ai ʻa [Kalaisí] mo e fakaʻosiʻosi ʻo e ngaahi meʻa ʻoku tuʻú ni.” ʻOku fakamatala ʻa e Mātiu 24:23-28 ki he meʻa ʻe hoko mei he 70 T.S. ki he taimi ʻo e ʻi ai ʻa Kalaisí. Ko e ngaahi meʻa ʻoku fakamatalaʻi ʻi he Mātiu 24:29–25:46 ʻoku fakahoko ia lolotonga ʻa e taimi ʻo e ngataʻangá.

7. (a) Ko e hā ʻoku totonu ai ke tau tokanga fakafoʻituitui ki he anga hono fakahoko ʻe he ngaahi tuʻunga lolotongá ʻa e fakaʻilongá? (e) Tali ʻa e ngaahi fehuʻi ʻi he ngataʻanga ʻo e palakalafi ko ení, ʻo fakahā ai ʻa e anga ʻo hono ʻosi fakahoko ʻa e fakaʻilongá talu mei he 1914.

⁷ ʻOku totonu ke tau mātuʻaki tokanga fakafoʻituitui ki he ngaahi meʻa mo e ngaahi tuʻunga ʻoku hoko ʻokú ne fakahoko ʻa e fakaʻilongá. ʻI hono fakafehokotaki ʻa e ngaahi meʻá ni ki he kikite ʻa e Tohitapú te ne tokoniʻi ai kitautolu ke tauhi maʻu ʻi he ʻatamaí ʻa e ʻaho ʻo Sihová. Te ne  toe fakamafeia ai kitautolu ke tau leʻo-afea ʻi he taimi ʻoku tau fakatokanga ai ki he niʻihi kehé fekauʻaki mo e ofi ʻo e ʻaho ko iá. (Aisea 61:1, 2) ʻI hono tuku ʻi he ʻatamaí ʻa e ngaahi taumuʻa ko ení, tau fakamanatu angé ʻa e ngaahi fehuʻi ʻoku hoko haké ʻa ia ʻokú ne fakamahinoʻi ʻa e ngaahi konga ʻo e fakaʻilongá, ʻo hangē ko ia ʻoku lēkooti ʻi he Mātiu 24:7 mo e Luke 21:10, 11.

 ʻI he founga makehe fē naʻe fakahoko ai kamata mei he 1914, ʻa ia naʻe tomuʻa talá, ʻa e tuʻu “ha kakai ki ha kakai, mo ha puleʻanga ki ha puleʻanga”? Fekauʻaki mo e ngaahi taú, ko e hā kuo hoko talu mei ai?

 ʻI he 1918, ko e hā ʻa e mahaki fakaʻauha naʻá ne toʻo ʻa e moʻui ʻo laka hake ia ʻi he Tau I ʻa Māmaní? Neongo ʻa e ʻilo fakafaitoʻo ʻa e tangatá, ko e hā ʻa e ngaahi mahaki ʻokú ne kei tāmateʻi ʻa e laui miliona?

 Ko e hā hono lahi kuo uesia ai ʻe he nounou fakameʻatokoní ʻa e māmaní neongo ʻa e ngaahi fakalakalaka fakasaienisi ʻo e senituli kuo ʻosí?

 Ko e hā ʻokú ne fakatuipauʻi koe ko e 2 Timote 3:1-5, 13 ʻokú ne fakamatalaʻi, ʻo ʻikai ko e founga anga-maheni pē ia ʻo e moʻuí, ka ko e founga ia kuo toe fakautuutu lahi ange ai ʻa e ngaahi tuʻunga koví ʻi heʻetau ngaʻunu atu ko ia ki he ngataʻanga ʻo e ngaahi ʻaho fakaʻosí?

Vaheʻi ʻo e Kakaí

8. (a) Ko e hā ha toe meʻa, hangē ko ia ʻoku fakamatalaʻi ʻi he Mātiu 13:24-30, 36-43, naʻe fakafekauʻaki ʻe Sīsū mo e fakaʻosiʻosi ʻo e fokotuʻutuʻu ʻo e ngaahi meʻá? (e) Ko e hā ʻa e ʻuhinga ʻo e talanoa fakatātā ʻa Sīsuú?

⁸ ʻOku ʻi ai ʻa e ngaahi meʻa mahuʻinga kehe naʻe fakafekauʻaki ʻe Sīsū mo e fakaʻosiʻosi ʻo e fokotuʻutuʻu ʻo e ngaahi meʻá. Ko e taha ʻo e ngaahi meʻá ni ko hono vaheʻi ko ia ʻo e “fanau ʻo e Puleʻanga” mei he “fanau ʻa e Toko Taha Kovi.” Naʻe leaʻaki ʻe Sīsū ʻa e meʻá ni ʻi heʻene pealapeli ko ia fekauʻaki  mo ha ngoue uite naʻe toe tūtuuʻi ai ʻe he filí ʻa e tea. Ko e “uite” ʻi heʻene talanoa fakatātaá ʻokú ne fakafofongaʻi ʻa e kau Kalisitiane pani moʻoní. Ko e “tea” ko e faʻahinga ia ʻoku nau taku ko e kau Kalisitiane ka ʻoku nau fakamoʻoniʻi kinautolu ko e “fanau ʻa e Toko Taha Kovi” koeʻuhi ʻoku nau piki ki he māmani ʻoku pule ai ʻa e Tēvoló. ʻOku vaheʻi ʻa e faʻahingá ni mei he “fanau ʻo e Puleʻanga [ʻo e ʻOtuá]” pea ʻoku fakaʻilongaʻi kinautolu ki he ʻauha. (Mātiu 13:24-30, 36-43) Kuo hoko moʻoni ʻa e meʻá ni?

9. (a) Hili ʻa e Tau I ʻa Māmaní, ko e hā ʻa e vaheʻi lahi naʻe fai ki he faʻahinga kotoa naʻa nau taku ko e Kalisitiané? (e) Naʻe anga-fēfē hono ʻoatu ʻe he kau Kalisitiane paní ʻa e fakamoʻoni ko kinautolu ia ʻa e kau sevāniti moʻoni ʻo e Puleʻangá?

⁹ Hili ʻa e Tau I ʻa Māmaní, naʻe ʻi ai ʻa hono vaheʻi ʻo e faʻahinga kotoa pē naʻa nau taku ko e Kalisitiané ki he kalasi ʻe ua: (1) Ko e haʻa faifekau ʻo e Puleʻanga-Haʻa-Kalisitiané mo honau kau muimuí, ʻa ia naʻa nau talaki ʻenau poupou fefeka ki he Kautaha ʻa e Ngaahi Puleʻangá (ʻa ia ko e Ngaahi Puleʻanga Fakatahatahá he taimí ni) lolotonga ia ʻenau piki mālohi ki heʻenau ngaahi mateaki fakafonuá, mo e (2) kau Kalisitiane moʻoni ʻi he hili ʻa e vahaʻa taimi tau ko iá, ʻa ia naʻa nau ʻoatu ʻenau poupou kakato ki he Puleʻanga Faka-Mīsaia ʻo e ʻOtuá, kae ʻikai ki he ngaahi puleʻanga ʻo e māmaní. (Sione 17:16) Naʻe fakamoʻoniʻi ʻe he faʻahingá ni ko e kau sevāniti moʻoni kinautolu ʻo e Puleʻanga ʻo e ʻOtuá ʻaki ʻenau fakahoko ʻa hono malangaʻi ʻo e “ongoongolelei ko eni ʻo e puleʻanga” ʻi māmani kotoa. (Mātiu 24:14) Ko e hā hono ngaahi olá?

10. Ko e hā ʻa e ʻuluaki ola ʻo e ngāue malangaʻi ʻo e Puleʻangá?

¹⁰ ʻUluakí, ko hono fakatahatahaʻi ko ia ʻo e toenga ʻo e faʻahinga kuo pani ʻe he laumālie ʻo e ʻOtuá, ʻa ia ʻoku nau maʻu ʻa e ʻamanaki ke fakataha mo Kalaisi ko e konga ʻo e Puleʻanga fakahēvaní. Neongo ko e faʻahinga ko iá naʻa nau movetevete holo ʻi he ngaahi puleʻangá, naʻe ʻomi kinautolu ki he fāʻūtaha  fakaekautaha. Ko e kakato ʻo hono silaʻi ʻo e faʻahinga pani ko ení ʻoku fakaofi mai.​—Fakahā 7:3, 4.

11. (a) Ko e hā ʻa e ngāue fakatahatahaʻi ʻoku kei hokohoko maí, pea ʻoku fehoanaki ia mo e kikite fē? (e) Ko e hā ʻoku fakahaaʻi ʻe hono fakahoko ʻo e kikite ko ení?

¹¹ Pea, ʻi he malumalu ʻo e tataki ʻa Kalaisí, naʻe kamata leva ʻa hono fakatahatahaʻi ʻo e “fuʻu kakai lahi . . . mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” ʻOku faʻu ʻaki eni ʻa e “fanga sipi kehe” te nau hao atu ko ia ʻi he “mamahi lahi” ki he māmani foʻou  ʻa e ʻOtuá. (Fakahā 7:9, 14; Sione 10:16) Ko e ngāue ko eni ʻo hono malangaʻi ʻo e Puleʻanga ʻo e ʻOtuá ki muʻa ke hoko mai ʻa e ngataʻangá ʻoku hokohoko mai ia ʻo aʻu ki he taimi lolotongá ni. ʻI he fai mateaki, ko e fuʻu kakai lahi ko ia ʻo e fanga sipi kehé, ʻa ia ʻoku nau toko laui miliona he taimí ni, ʻoku nau tokoni ki he toenga ʻo e kau paní ke malangaʻi ʻa e pōpoaki mātuʻaki mahuʻinga ko ia ʻo e Puleʻangá. Ko e pōpoaki ko ení ʻoku ongona ia ʻi he kotoa ʻo e ngaahi puleʻangá.

Ko e Hā ʻOku Toka mei Muʻá?

12. ʻOku kei toe lahi fēfē ʻa e ngāue fakamalanga ke fai ki muʻa ke hoko mai ʻa e ʻaho ʻo Sihová?

¹² Ko e ngaahi meʻa kotoa ʻi ʻolungá ʻokú ne fakahaaʻi ʻoku  tau ofi ki he ngataʻanga ʻo e ngaahi ʻaho fakaʻosí pea ko e ʻaho ʻo Sihová ʻoku ofi mai. Ka ʻoku kei ʻi ai ha ngaahi kikite ʻoku teʻeki ke fakahoko ki muʻa ke kamata ʻa e ʻaho fakamanavahē ko iá? ʻIo. Ko e taha e meʻa, ko hono vaheʻi ko ia ʻo e kakaí fekauʻaki mo e ʻīsiu ʻo e Puleʻangá ʻoku teʻeki ai ke ʻosi. ʻI he ngaahi feituʻu ʻe niʻihi ʻa ia naʻe hokosia ai ʻa e fakafepaki fefeká ʻi ha laui taʻu, kuo ʻi ai ʻa e tupulaki ia he taimí ni ʻo e kau ākonga foʻoú. Naʻa mo e feituʻu naʻe talitekeʻi ai ʻe he kakaí ʻa e ongoongo leleí, kuo fakahāhaaʻi ai ʻa e meesi ʻa Sihová ʻi heʻetau ʻoatu ko ia ʻa e fakamoʻoní. Ko ia, hoko atu ʻa e ngāué! ʻOku fakapapauʻi mai ʻe Sīsū kia kitautolu ko e taimi ʻe ʻosi ai ʻa e ngāué, ʻe hoko mai leva ʻa e ngataʻangá.

13. Hangē ko ia ʻoku lēkooti ʻi he 1 Tesalonaika 5:2, 3, ko e hā ʻa e meʻa mahuʻinga ʻoku teʻeki ke fakahokó, pea ko e hā ʻene ʻuhinga ia kia kitautolú?

¹³ ʻOku tomuʻa tala ʻe ha kikite mātuʻaki mahuʻinga ʻe taha ʻa e Tohitapú: “Tokaange ha taimi ʻoku nau pehe, ʻOku tau lelei mo tuʻumalie [“melino mo malu,” NW], fakafokifā ʻoku tuʻu mai ʻa mala, ʻo hange ko e langā ki he fefine feitama: pea ʻe ʻikai ʻaupito te nau hao.” (1 Tesalonaika 5:2, 3) Ko e faʻahinga founga ʻe fanongonongo ai ʻa e “melino mo e malu” ko iá ʻoku teʻeki ke tau sio ki ai. Ka ʻe ʻikai ʻaupito ʻuhinga ia kuo fakaleleiʻi moʻoni ʻe he kau taki fakaemāmaní ʻa e ngaahi palopalema ʻa e faʻahinga ʻo e tangatá. Ko e faʻahinga ko ia ʻoku nau tauhi maʻu ʻi he ʻatamaí ʻa e ʻaho ʻo Sihová ʻe ʻikai ke takihalaʻi ia ʻe he fanongonongo ko iá. ʻOku nau ʻilo ko e hili pē iá, ʻe hoko fakafokifā mai leva ʻa e fakaʻauhá.

14. Ko e hā ʻa e ngaahi meʻa ʻe hoko lolotonga ʻa e mamahi lahí, pea ʻi he fakahokohoko fē?

¹⁴ ʻI he kamata ʻa e mamahi lahí, ʻe hanga hake ʻa e kau pulé ki Pāpilone ko e Lahi, ʻa e ʻemipaea ʻo e lotu loí ʻi māmaní, pea te nau fakaʻauha ia. (Mātiu 24:21; Fakahā 17:15, 16) Hili iá, ʻe hanga hake leva ʻa e ngaahi puleʻangá ki he faʻahinga ko ia  ʻoku nau poupouʻi ʻa e tuʻunga-hau ʻo Sihová, ʻo langaʻi ai ʻa e houhau ʻa Sihova ki he ngaahi puleʻanga fakapolitikalé mo honau kau poupoú, ʻo iku ai ki he ʻauha fakaʻaufuli kia kinautolu. Ko e tumutumú ko ʻĀmaketone ia ʻo e mamahi lahí. Pea ʻe tuku leva ʻa Sētane mo ʻene kau tēmenioó ki he luó, ʻo ʻikai toe malava ke nau tākiekina ʻa e faʻahinga ʻo e tangatá. ʻE fakaʻosi ʻaki eni ʻa e ʻaho ʻo Sihová ʻi he taimi ʻe fakahīkihikiʻi ai hono huafá.​—Isikeli 38:18, 22, 23; Fakahā 19:11–20:3.

15. Ko e hā ʻe taʻefakapotopoto ai ke fakaʻuhinga ko e ʻaho ʻo Sihová ʻoku kei mamaʻo?

¹⁵ ʻE hoko totonu mai ʻa e ngataʻanga ʻo e fokotuʻutuʻu ko ení ʻi hono taimí, ʻo fakatatau ki he taimi-tēpile ʻa e ʻOtuá. ʻE ʻikai tōmui ia. (Hapakuke 2:3) Manatuʻi, ko e fakaʻauha ʻo Selusalema ʻi he 70 T.S. naʻe hoko vave mai ia, ʻi he taimi naʻe taʻeʻamanekina ʻe he kau Siú, ʻi he taimi naʻa nau fakakaukau ai kuo fakalaka ʻa e faingataʻá. Pea fēfē ʻa Pāpilone motuʻa? Naʻá ne mālohi, loto-falala, mo maluʻi ʻaki ha ngaahi fuʻu ʻā kāfakafa. Ka naʻe tō ia ʻi he foʻi pō pē taha. Pehē pē foki, ʻe hoko fakafokifā mai ʻa e fakaʻauhá ki he fokotuʻutuʻu fulikivanu lolotongá ni. ʻI heʻene hoko maí, ʻofa ke ʻilo kitautolu ʻoku tau fāʻūtaha ʻi he lotu, ʻo tauhi maʻu ʻi he ʻatamaí ʻa e ʻaho ʻo Sihová.

Fetalanoaʻaki Fakamanatu

• Ko e hā ʻoku mātuʻaki mahuʻinga ai ke tauhi maʻu ʻi he ʻatamaí ʻa e ʻaho ʻo Sihová? ʻE anga-fēfē haʻatau fai ia?

• ʻOku anga-fēfē hono uesia fakafoʻituitui kitautolu ʻe he vaheʻi ko ia ʻo e kakaí ʻoku lolotonga faí?

• Ko e hā ʻoku kei toka mei muʻa ki muʻa ke kamata ʻa e ʻaho ʻo Sihová? Ko ia, ko e hā leva ʻoku totonu ke tau fai fakafoʻituituí?

[Fehuʻi ki he Ako]

[Fakatātā ʻi he peesi 180, 181]

Kuo vavé ni ke ngata ʻa e ngaahi ʻaho fakaʻosí fakataha mo hono fakaʻauha ʻo e fokotuʻutuʻu ʻa Sētané