Fakaʻehiʻehi mei he Musika Fakatupu-Koví!

“Ko ia, mou tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto: mo mou lamalama ke ngaueʻaki ʻa e faingamalie, koeʻuhi ʻoku kovi ʻa e ngaahi ʻaho.”​—EFESO 5:​15, 16.

 1. Ko e hā ʻoku lava ai ke ui ʻa e musiká “ko e meʻaʻofa fakaʻotua”?

 “KO E meʻaʻofa fakaʻotua . . . ʻa e musiká.” Naʻe tohi ia ʻe Lulu Rumsey Wiley ʻi heʻene tohi ko e Bible Music. Kuo lāuʻilo ki he meʻa ko ʻení ʻa e kau tangata mo e kau fefine manavahē ki he ʻOtuá talu mei he ngaahi muʻaki kuongá pē. Kuo fakahā ʻe he tangatá ʻa ʻene ngaahi ongoʻi loloto taha ʻo e fiefia, mamahi, ʻita lahi mo e ʻofa, ʻo fakafou mai ʻi he musiká. Ko ia naʻe mahuʻinga ʻa e kaunga ʻo e musiká ʻi he kuonga ʻo e Tohi Tapú, ʻo lave ki ai ʻi he tohi toputapú kotoa.​—Sēnesi 4:21; Fakahā 18:22.

 2. Ko e hā ʻa e founga naʻe ngāueʻaki ai ʻa e musiká ke fakalāngilangiʻi ʻa Sihova ʻi he kuonga ʻo e Tohi Tapú?

² Naʻe mālie taha ʻa e fakamatala ʻi he musika naʻe ngāueʻaki ʻi he lotu kia Sihová. Naʻe ʻuluaki fokotuʻu ʻi he musiká ʻa e niʻihi ʻo e ngaahi lea fakamālō mālie taha kuo fai kia Sihova ko e ʻOtuá. “Te u fakamaloʻia ʻa e huafa ʻo Elohimi ʻaki ha hiva,” naʻe tohi ia ʻe he toko taha tohi-sāme ko Tēvitá. (Sāme 69:30) Naʻe ngāueʻaki pē ʻa e musiká ke ō fakataha mo e fakalaulauloto ʻaki ʻa e faʻa lotú. Naʻe tohi ʻe ʻĒsafe: “Naʻa ku pehe, kau manatua ʻeku faʻa hiva ʻi he po, kau talanoa mo hoku loto: ka naʻe hanga hoku laumalie ʻo fai ʻa e ngaahi ʻeke.”  (Sāme 77:6) ʻI he temipale ʻo Sihová, naʻe fokotuʻutuʻu maau mo molumalu ai ʻa e musiká. (1 Kalonikali 23:​1-5; 2 Kalonikali 29:​25, 26) ʻI he taimi ʻe niʻihi, naʻe fokotuʻutuʻu maau ʻa e kau poto tokolahi ʻi he musiká, ʻo hangē ko ia naʻe fai ʻi he fakatapui ʻo e temipalé, ʻi hono ngāueʻaki ʻa e kau ifi talupite ʻe toko 120. (2 Kalonikali 5:​12, 13) ʻOku ʻikai te tau maʻu ha fakamatala pe naʻe ongo fēfē ʻa e musika molumalu ko ʻení, ka ʻoku pehē ʻe he tohi ko e The Music of the Bible: “ʻE ʻikai ke faingataʻa ke maʻu ha fakakaukau ki hono ola fakalūkufua ʻo e musika ʻi he Temipalé ʻi hono ngaahi tuʻunga molumalú . . . Kapau ʻe lava ke ʻave ha toko taha ʻiate kitautolu ki he lotolotonga ʻo e ngaahi tuʻunga peheé, ʻe ʻikai ala mataʻofi ʻa e ongoʻi ʻo e ʻapasia loloto mo e ngeia kāfakafa.” a

Ko Hono Ngāuekoviʻaki ʻa e Musiká

 3, 4. ʻI he founga fē naʻe ngāuekoviʻaki ai ʻa e meʻaʻofa ko e musiká ʻe he kakai ʻa e ʻOtuá pea mo honau ngaahi kaungāʻapi hītení?

³ Kae kehe, naʻe ʻikai ke ngāueʻaki maʻu ai pē ʻa e musiká ʻi ha founga ngeia pehē. ʻI he Moʻunga Sainaí, naʻe ngāueʻaki ai ʻa e musiká ke fakaʻaiʻai ʻa e lotu tamapua ki ha pulu koula. (ʻEkisoto 32:18) ʻI he taimi ʻe niʻihi naʻe fakafekauʻaki ʻa e musiká foki mo e tōʻonga konaá pea naʻa mo e tōʻonga fakapaʻumutú. (Sāme 69:12; ʻAisea 23:15) Naʻe halaia tatau pē ʻa e ngaahi kaungāʻapi hīteni ʻo ʻIsilelí ʻi hono ngāuekoviʻaki ʻa e meʻaʻofa fakaʻotua ko ʻení. ʻOku fakamatalaʻi ʻe he The Interpreter’s Dictionary of the Bible: “ʻI Finisia mo Sīlia, ʻoku meimei ko hono kotoa ʻo e ngaahi musika manakoá naʻe fakaeʻa mei ai ʻa e lotu kia ʻIsitā, ko e ʻotua-fefine ʻo e fakafuá. Ko ia ai, naʻe faʻa iku ʻa e hiva manakoá ki he ngaahi kātoanga tōtuʻa ʻo e fehokotaki fakasinó.” ʻOku pehē pē mo e kau Kalisi ʻo e kuonga muʻá naʻa nau ngāueʻaki ʻa e musiká fakataha mo e “ngaahi hulohula fakatupu holi fakakakano.”

⁴ ʻIo, ʻoku maʻu ʻe he musiká ʻa e mālohi ke ne fai ʻa e ueʻi, fakakāvealoto, pea mo e tākiekina. ʻI he ngaahi hongofuluʻi taʻu kuo maliu atú, naʻe taukaveʻi ʻe he tohi ʻa John Stainer ko e The Music of the Bible: “ʻOku ʻikai ke ʻi ai ha tuʻunga poto ʻokú ne maʻu ha tākiekina mālohi pehē ki he faʻahinga ʻo e tangatá ʻi he taimi ko ʻení ka ko e Musiká.” ʻOku kei hokohoko atu ʻe he musika ʻi he ʻaho ní ʻa e tākiekina fuʻu mālohi. Ko ia ai, ʻe lava ke fokotuʻu mai ʻe he musika ʻoku koví ha fakatuʻutāmaki moʻoni ki he kau talavou ʻoku manavahē ki he ʻOtuá.

Ko ha Fie Maʻu ke Tokanga

 5. (a) ʻOku lahi fēfē ʻa e kaunga ʻa e musiká ʻi he moʻui ʻa e kau talavou tokolahi? (e) Ko e hā ʻa e vakai ʻa e ʻOtuá ki he maʻu ʻa e fiefia ʻe he kau talavoú?

⁵ Kapau ko ha toko taha kei talavou koe, tā ʻokú ke ʻiloʻi lelei ʻa e mahuʻinga ʻo e musiká​—ki he tokolahi ʻi ho toʻu meʻá tautefito ki he ngaahi faʻahinga kehekehe ʻo e musika ko e pop pe rock. Kuo aʻu ʻo ui ʻa e musiká ko e “konga tefito mātuʻaki mahuʻinga ia ʻo e toʻu tupú.” ʻOku fakafuofua ʻo pehē ʻi he ngaahi taʻu fakaʻosi ʻe ono ʻo e ako ʻa ha talavou ʻi he ʻIunaite Seteté te ne fanongo ki he musika ko e rock ʻo lahi hake ʻi he houa ʻe fā ʻi he ʻaho taki taha! ʻOku hā moʻoni mei ai ʻa e ʻikai ke mafamafatatau. ʻOku ʻikai ke ʻi ai ha meʻa ia ʻe kovi ʻi hono maʻu ʻa e fiefia ʻi ha meʻa ʻokú ne ʻai koe ke ke ongoʻi fiemālie. ʻOku pau ko Sihová, ko e Toko Taha Fakatupu ia ʻo e musika fakatupu-fiefiá, ʻoku ʻikai te ne ʻamanekina ʻa e kau talavoú ke nau fakaumiuminoa mo loto-mamahi. Ko hono moʻoní, ʻokú ne fekau ki heʻene kakaí: “Mou fiefia ʻi he ʻEiki ʻa e kau maʻoniʻoni, pea hakahaka; ʻio, mou mavava kotoa ʻa e kau loto-totonua.” (Sāme 32:11) ʻOku pehē ʻe heʻene Folofolá ki he kau talavoú: “Tama, ke ke fiefia ʻi hoʻo toki tupu; pea fakafiefiaʻi koe ʻe ho loto ʻi ho taimi talavou.”​—Koheleti 12:1 (Koheleti 11:​9, PM).

 6. (a) Ko e hā ʻoku fie maʻu ai ki he kau talavoú ke nau tokanga ʻi heʻenau fili ʻa e musiká? (e) Ko e hā ʻoku pango ange ai ʻa e ngaahi musika lahi ange ʻi he ʻaho ní ʻi he musika ʻo e ngaahi toʻu tangata ki muʻá?

⁶ Ka neongo iá, ʻoku ʻi ai ʻa e ʻuhinga lelei kiate koe ke ke tokanga ʻi hoʻo fili ʻa e musiká. Naʻe pehē ʻe he ʻaposetolo ko Paulá ʻi he ʻEfesō 5:​15, 16: “Ko ia, mou tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto: mo mou lamalama ke ngaueʻaki ʻa e faingamalie, koeʻuhi ʻoku kovi ʻa e ngaahi ʻaho.” ʻOku lea fakafepaki nai ʻa e kau talavou ʻe niʻihi, ʻo hangē ko ia naʻe fai ʻe ha finemui ʻe taha: “Naʻe fanongo ʻa ʻemau ngaahi mātuʻá ki heʻenau musiká ʻi he taimi naʻa nau kei talavou aí. Ko e hā ʻe ʻikai ke lava ai ke mau fanongo kimautolu ki heʻemau musiká?” Naʻe ʻi ai nai mo e ngaahi tafaʻaki ʻe niʻihi ʻo e musika naʻe fanongo ki ai ʻa hoʻo ongo mātuʻá  ʻi heʻena taʻu tatau mo koé naʻe ʻikai ke sai. ʻI hano sivisiviʻi lelei, ʻoku hā mai ʻi he ngaahi hiva manakoa lahi ʻa e fakahuʻuhuʻu ai ki he fehokotaki fakasinó mo e ngaahi fakapuli ki he ʻulungāanga taʻe taaú. Ka ko e meʻa naʻe lave siʻisiʻi pē ki ai ʻi he taimi ko ē ʻoku fakamatala fakapatonu ia ʻi he taimí ni. ʻOku pehē ʻe ha toko taha fatu tohi: “ʻI he taimí ni ʻoku mātuʻaki lahi ʻa hono nafui ʻaki ʻa e ngaahi pōpoaki fakapatonu ki he fānaú ʻo ʻikai ke tatau ia mo ha meʻa kuo hoko ʻi hotau sivilaisé ʻi ha toe taimi ki muʻa.”

Musika ko e Rap​—Ko e Musika ʻo e Angatuʻu

 7, 8. (a) Ko e hā ʻa e musika ko e rap, pea ko e hā ʻoku manakoa lahi aí? (e) Ko e hā ʻokú ne ʻai ke ʻilonga ha toko taha ʻoku muimui ki he founga moʻui ʻo e musika ko e rap?

⁷ Ko e fakatātā, fakakaukau ange ki he musika manakoa lahi ʻaupito he taimí ni ko e rap. Fakatatau ki he makasini ko e Time, kuo hoko ʻa e musika ko e rap ko ha “fuʻu liliu ʻoku ongo-mālie ʻi he hokohoko ʻa e ngaahi fakamamafa ʻa e musiká ʻi māmani lahi” pea ʻoku fakaʻulia ʻa hono manakoa ia ʻi Pelēsila, ʻEulope, Siapani, Lūsia, mo e ʻIunaite Seteté. ʻOku faʻa ʻikai ke ʻi ai hano tuʻunga-fasi, pea ʻoku leaʻaki pē ʻa e ngaahi foʻi leá ʻi he foʻi hivá kae ʻikai ke hivaʻi ʻo fai ʻeni fakataha mo e tā taimi haʻuhaʻulu mālohi. Ka, ko e tā taimi haʻuhaʻulu fuʻu tōtuʻa ko iá ʻoku ngalingali ko e meʻa tefito ia ʻoku lavameʻa lahi fakapisinisi ai ʻa e musika ko e rap. ʻOku pehē ʻe ha talavou Siapani ʻe taha: “ʻI heʻeku fanongo ki he musika ko e rap, ʻoku ou ongoʻi toʻoa, pea ʻi heʻeku hulohulá ʻoku ou ongoʻi tauʻatāina.”

⁸ ʻOku ngalingali ko e toe ʻuhinga ʻe taha ki hono manakoa ʻo e musika ko e rap ko e ngaahi leá, ʻa ia ʻoku faʻa tuifio ai ʻa e ngaahi lea fakalielia mo e ngaahi fakakaukau ʻo ha ʻātakai ʻoku lahi ai ʻa e fakamālohí. ʻOku ʻikai ke hangē ia ko e musika ko e rock, ʻa ia ko e ngaahi lea lahi ai ʻoku nōfoʻi pē ʻi he kaveinga ʻo e feʻofaʻaki ʻa e toʻu tupú, ka ko e ngaahi lea ia ʻo e musika ko e rap ʻoku faʻa ʻi ai ʻa e fakamatala mamafa ange. Ko e musika ko e rap ʻe niʻihi ʻoku fakalea ʻo fakafepaki ki he fakamaau taʻe totonú, lau matakali, mo e anga-fakamanu ʻa e kau polisí. Ka, ʻi he taimi ʻe niʻihi, ko hono ngaahi taú ʻoku fakaiku ongo tataú ʻoku fai ia ʻi he lea ʻuli mo fakalielia taha te ke fakakaukau ki ai. ʻOku hangehangē foki ʻoku fakafepaki ʻa e musika ko e rap ki he ngaahi tuʻunga totonu ʻo e valá, teuteú mo e ʻulungāanga taau fakaefehokotaki fakasinó. ʻOku ʻikai ha ofo kuo hoko ʻa e musika ko e rap ko ha founga moʻui ia. ʻOku ʻilonga ʻa kinautolu ʻoku muimui ki aí ʻi he ngaahi ngaue tōtuʻa ʻo e sinó ke fakahā ʻa e fakakaukaú, ko e ngaahi lea ʻoku nau fakahā ʻa e fakakaukau ʻo ha ʻātakai ʻoku lahi ai ʻa e fakamālohí, mo e vala​—ngaahi tangakalī kōkō, ngaahi sū sipoti ʻoku ʻikai ke haʻi hono tepí, ngaahi sēini koula, ngaahi kepi ʻo e kau peisipoló, mo e ngaahi mata-sioʻata fakapoʻupoʻuli.

 9, 10. (a) Ko e hā ʻa e ngaahi meʻa ʻoku totonu ki he kau talavoú ke nau tokangaʻi ʻi hono fili pe ko e “meʻa ʻe hōifua ai ʻa e ʻEiki” ki ai ʻa e musika ko e rap mo hono founga moʻuí? (e) Ko e hā ʻoku ʻikai ke sio fakamātoato ki ai ʻa e kau talavou Kalisitiane ʻe niʻihi?

⁹ ʻOku tala ki he kau Kalisitiané ʻi he ʻEfesō 5:​10, ke hanganaki “sivi ʻo ʻilo, pe ko e ha ʻa e meʻa ʻe hōifua ai ʻa e ʻEiki.” ʻI he fakakaukau atu ki he ongoongo ʻo e musika ko e rap, ʻokú ke fakakaukau ʻe “hōifua ai ʻa e ʻEiki” ke ke kau ki ai? ʻOku totonu ke loto ha talavou Kalisitiane ke ʻiloʻi ia ʻokú ne kau ʻi he founga moʻui naʻa mo e kakai tokolahi ʻi he māmaní ʻoku nau lau ʻoku ʻikai ke leleí? Fakatokangaʻi ʻa e anga ʻo e fakamatala ʻe ha toko taha ʻo fekauʻaki mo ha koniseti naʻe ngāueʻaki ai ʻa e musika ko e rap: “Naʻe feʻauʻauhi ʻa e kau hiva ʻi he musika ko e rap ke fakalielia taha ʻaki ʻa e lea ʻulí mo e ngaahi lea fakapatonu ʻo kau ki he fehokotaki fakasinó. . . . Naʻe fakaʻalingalelei mai ʻe he kau hula fefine mo e kau tangata ʻa e ngaahi  tōʻonga fakaefehokotaki fakasinó ʻi he funga siteisí.” ʻI he fekauʻaki mo ha kulupu tā meʻa ongoongoa ʻe taha, naʻe pehē ʻe ha toko taha ʻo e kau tuʻuaki ʻo e konisetí: “Ko e meimei ko hono kotoa ʻo e ngaahi lea naʻe ngāueʻakí ʻoku (fakalielia).”

¹⁰ Ka neongo ia, ko e musika naʻe tā ʻi he efiafi ko iá naʻe ʻikai ke fuʻu tōtuʻa ia mei he musika ko e rap ʻoku faʻa tā. Naʻe pehē ʻe he talekita ʻo e fale faiʻanga konisetí: “Ko e meʻa ko ē ʻokú ke fanongo ki aí ko e musika ko e rap ʻoku faʻa taá ʻoku tatau pē mo ia ʻoku fakatau ʻe he kau talavoú ʻi he ngaahi fale koloá.” Ko ha meʻa fakamamahi ē ke fakahā, ʻi he lotolotonga ʻo e kau talavou lahi hake he toko 4,000 naʻe ʻi he konisetí ko ha niʻihi ai ʻoku nau taukaveʻi ko e Kau Fakamoʻoni ʻa Sihova kinautolu! ʻOku hā mahino ʻoku ʻikai te nau sio fakamātoato ki he moʻoniʻi meʻa ko ia ko Sētané ko e “ʻeiki ʻo e puleʻanga ʻo e ʻatā.” ʻOkú ne puleʻi ʻa e “faʻahinga laumalie [pe, ko e anga ʻo e fakakaukau ʻoku eʻa lahi taha] ʻoku lolotonga ngaue ni ʻi he hako ʻo talangataʻa.” (ʻEfesō 2:2) Ko e lelei ʻa hai te ke pouaki ʻo kapau te ke kau ʻi he musika ko e rap pe ko e founga moʻui ko iá? Ko e moʻoni, ko e musika ko e rap ʻe niʻihi ʻoku siʻi ange ʻa e meʻa ʻoku pango aí. Ka ʻoku ngali ʻuhinga lelei ke fakatupulekina ha saiʻia ki ha faʻahinga musika ʻoku faʻa taukovi ki he ngaahi tuʻunga faka-Kalisitiané?

Musika ko e Heavy Metal​—Fehokotaki Fakasino, Fakamālohi, mo e Lotu Fakasētane

11, 12. Ko e hā ʻa e musika ko e heavy metal, pea ko e hā ʻa e ngaahi meʻa pango ʻoku fakaeʻa aí?

¹¹ Ko e toe faʻahinga musika manakoa ʻe taha ko e heavy metal. ʻOku mahulu atu ia ʻi he musika leʻo lahi ko e hard rock. ʻOku pehē ʻi ha fakamatala ʻi he The Journal of the American Medical Association: “Ko e musika heavy metal . . . ʻoku fakaeʻa ai ʻa e tā taimi leʻo lahi pea ʻoku fonu ʻi he ngaahi lea ʻoku nau fakalāngilangiʻi ʻa e tāufehiʻa, ngāuekoviʻaki, fehokotaki fakasino ʻoku hē mei hono tuʻunga totonú, pea ʻi he taimi ʻe niʻihi ʻoku fakalāngilangiʻi ai ʻa e lotu fakasētané.” Naʻa mo e ngaahi hingoa pē ʻo e ngaahi kulupu tā meʻá ʻokú ne fakamoʻoniʻi ʻa e anga-fakalielia ʻo e faʻahinga musika rock ko ʻení. ʻOku nau ui kinautolu ʻaki ʻa e ngaahi foʻi lea ʻo hangē ko e “meʻa fakakona,” “ngaahi meʻafana,” mo e “mate.” Ka ko e heavy metal ʻoku ngali saisai ange ia ʻi hono fakafehoanaki mo e thrash metal mo e death metal​—ʻa ia ko e faʻahinga musika kovi ange ʻoku tupu mei he heavy metal. Ko e hingoa ʻo e ngaahi kulupu tā meʻa ko iá ʻoku nau ngāueʻaki ʻa e ngaahi hingoa ʻo hangē ko e “tangata kai-tangata” mo e “fakamatala ki ha taha kuo mate.” ʻOku ʻikai ke ʻilo nai ʻe he kau talavou ia ʻi he ngaahi fonua lahi ʻa e fakalielia ʻa e ngaahi hingoa ko ʻení koeʻuhi he ʻoku ʻi he lea faka-Pilitaniá ia pe ko ha toe lea muli kehe.

¹² ʻOku faʻa fekauʻaki ʻa e musika ko e heavy metal mo e taonakita ʻa e toʻu tupú, loto-mafasiá, mo e ngāueʻaki ʻa e faitoʻo kona tapú. Koeʻuhi ʻoku faʻa fekauʻaki ia mo e ʻulungāanga fakamālohí naʻe hanga ai ʻe ha toko taha fai fakahinohino ʻi he letiō ʻo ui fakatenetene ʻa e musika ko iá ko e “musika ke tāmateʻi ʻa hoʻomou ngaahi mātuʻá.” Ko ʻene fekauʻaki mo e lotu Fakasētané ʻoku manavahē ai ʻa e ngaahi mātuʻa tokolahi​—mo e kau ʻofisa polisi. Naʻe taukaveʻi ʻe ha toko taha ʻokú ne fakatotoloʻi ʻa e meʻá ni ʻo pehē ko e kau talavou ʻe niʻihi ʻoku nau vavaku ʻi he lotu fakasētané naʻe kamata ʻenau kau ki aí ʻo fakafou ʻi he musika ko ʻení. Naʻá ne fakaʻosi ʻaki: “ʻOku ʻikai pē te nau ʻilo ʻa e meʻa ʻoku nau kau ki aí.”

13. Ko e hā ʻa e fakatuʻutāmaki ʻo e kau ki he musika ko e heavy metal?

¹³ Kae kehe, ʻoku totonu ki he kau talavou Kalisitiané ke ʻoua te nau “vale ki he ene [Sētane] gaahi filioi.” (2 Kolinitō 2:​11, PM) Koeʻuhi, “ko ʻetau milimilisino ni ko e fai . . . mo e ngaahi kongakau laumalie ʻa e kovi ʻi he ngaahi feituʻu ʻo langi.” (ʻEfesō 6:12) Ko ha meʻa ngali vale ē ke te fakaafeʻi mai ʻa e kau tēmenioó ki heʻete moʻuí ʻaki ʻete saiʻia ʻi ha faʻahinga musika! (1 Kolinitō 10:​20, 21) Ka, ʻoku hā mahino ʻoku ʻi ai ʻa e kau talavou Kalisitiane tokolahi ʻoku nau saiʻia lahi ʻi he musika ko ʻení. Ko ha niʻihi kuo nau aʻu ʻo fai kākā koeʻuhi ko ʻenau manako ki he musiká. Naʻe fakahā ʻe ha finemui ʻe taha: “Naʻá ku fanongo ki he heavy metal, ʻi he taimi ʻe niʻihi naʻá ku fanongo ki ai ʻi he meimei pō kotoa. Naʻá ku fakatau mai ʻa e ngaahi makasini fekauʻaki mo e heavy metal pea fūfuuʻi ia mei heʻeku ongo mātuʻá ʻi he ngaahi puha faʻoʻanga sū. Naʻá ku lohiakiʻi ʻeku ongo mātuʻá. ʻOku ou ʻilo naʻe ʻikai ke hōifua mai ʻa Sihova kiate au.” Naʻe fakatonutonu ʻa e anga ʻo ʻene fakakaukaú ʻe ha kupu ʻi he makasini ko e Awake! Ko ha toe toko fiha nai ʻo e kau talavou kehe ʻoku nau kei ʻefihia ʻi he tauhele ʻa e musika peheé?

Ko Hono Utu ʻa e Meʻa Naʻá Ke Tō

14, 15. Ko e hā ʻoku tau ʻilo fakapapau ai ʻe uesia kitautolu ʻe he fanongo ki he musika fakatupu-koví? Fakatātaaʻi.

¹⁴ ʻOua te ke hanga ʻo fakasiʻisiʻi ʻa e fakatuʻutāmaki  ʻe lava ke hoko mei he musika peheé. Ko e moʻoni ia, ʻe ʻikai te ke hehema nai ke tāmateʻi ha toko taha pe te ke kau ki he ʻulungāanga taʻe taau fakaefehokotaki fakasinó koeʻuhi ko hoʻo fanongo pē ki ha hiva. Ka neongo ia, ʻoku pehē ʻi he Kalētia 6:8: “He ko ia ʻoku ne to ʻi hono kakano, te ne utu mei he kakano ʻa e ʻauha.” Ko e fakakaukau taʻe pau pē te ke maʻu mei he fanongo ki he musika ʻoku fakamāmani, anga-fakamanu, pea mo fakatēmenioó. (Fakafehoanaki mo Sēmisi 3:15.) Ko e fakalau eni ʻo ha fakamatala naʻe fai ʻe he palōfesa ʻo e musiká ko Joseph Stuessy: “ʻOku uesia ʻe ha faʻahinga musika pē ʻa hotau anga fakataimi ʻo e lotó, ngaahi ongoʻí, ngaahi fakakaukaú mo hotau ʻulungāangá hili ʻetau fanongo ki aí . . . Ko ha toko taha ʻokú ne pehē, ‘ʻE lava ke u fanongo pē au ki he heavy metal, ka he ʻikai te ne uesia au,’ ʻoku mātuʻaki hala ia. ʻOkú ne mātuʻaki uesia ʻa e kakai kehekehe ʻi he ngaahi founga kehekehe pea ʻoku kehekehe hono lahi ʻo e uesiá.”

¹⁵ Naʻe fakahā ʻe ha talavou Kalisitiane ʻe taha: “Naʻe fuʻu lahi fau ʻa ʻeku kau ki he thrash metal ʻo liliu ai ʻeku tōʻongá fakakātoa.” Naʻe fuoloa siʻi pē pea kamata leva ʻa ʻene hokosia ʻa e ngaahi palōpalema mei he kau tēmenioó. “Faifai atu pē naʻá ku liʻaki ʻa ʻeku ngaahi kāseté mo e ngaahi peletí pea naʻe tuku ange leva au ʻe he kau tēmenioó.” Naʻe fakahā ʻe ha toe talavou ʻe taha: “Naʻe fekauʻaki ʻa e musika naʻá ku faʻa fanongo aí mo e meʻa fakatēvolo, faitoʻo kona tapu, pe ko e fehokotaki fakasino. ʻOku pehē ʻe he kau talavou tokolahi ʻoku ʻikai ke uesia ai kinautolu, ka ko hono moʻoní ʻoku uesia ai kinautolu. Naʻá ku meimei mavahe ʻaupito ai mei he moʻoní.” ʻOku ʻeke ʻi he palōvepi ʻe taha: “ʻE hikofi koā ʻe ha tangata ha afi, ʻo ʻai ki hono fatafata, ʻo ʻikai mofia hono kofu?”​—Palōvepi 6:27.

 Hanganaki Vakavakai

16. Ko e hā ʻe lava ke leaʻaki ʻo kau ki he kau faʻu hiva mo e kau hiva ʻo e ngaahi musika lahi ʻo e ʻaho ní?

¹⁶ Naʻe tohi ʻa Paula ki he kau Kalisitiane ʻi ʻEfesō ʻo e kuonga muʻá: “Ko ia, ko e meʻa ʻoku ou tala mo fakapapau atu ʻi he ʻEiki, ʻa ʻeni, Ke ʻoua te mou kei laka ʻo hange ko e fai ʻa Senitaile; ʻa ia ʻoku nau fou ʻi he muna ʻa honau loto, kuo fakapoʻuli honau ʻatamai, kuo nau motu mei he moʻui ʻa e ʻOtua, ko e meʻa ʻi he vale ʻoku nofoʻia kinautolu, ko e meʻa ʻi he fakafefeka honau loto.” (ʻEfesō 4:​17, 18) ʻIkai ʻe kaunga tonu ʻeni ki he kau faʻu hiva mo e kau hiva ʻo e ngaahi musika lahi ʻo e ʻaho ní? ʻOku lahi ange eni ia ʻi ha toe taimi ki muʻa, ʻa e hā mei he faʻahinga musika kehekehe ʻa e tākiekina ʻa e “ʻotua ʻo e tuʻu ko eni,” ko Sētane ko e Tēvoló.​—2 Kolinitō 4:4.

17. ʻOku malava fēfē ke fakamāuʻi pe ʻahiʻahiʻi ʻe he kau talavoú ʻa e musiká?

¹⁷ ʻI he fekauʻaki mo e “kuonga fakamui,” naʻe kikiteʻi ʻe he Tohi Tapú: “Ka ko e kakai kovi mo fakahekeheke te nau fakaaʻau atu mei he kovi ki he kovi.” (2 Tīmote 3:​1, 13) Ko ia ai, ʻoku lahi ange eni ia ʻi ha toe taimi ki muʻa, ʻa e fie maʻu ke ke mātuʻaki tokanga ki he musika ʻokú ke fili ke fanongo ki aí. ʻOku faʻa hoko ko e hingoa ʻoku taʻe taaú ʻoku faʻa taʻe taau ai pē mo e musika ko iá. ʻOku ʻeke ʻi he Siope 12:11: “ʻO ʻikai koā sivi ʻe ha telinga ʻa e meʻa ʻoku tala, ʻo hange ʻoku kamata maʻaku ʻe he ʻoʻaoʻingutu ʻa e meʻakai?” ʻI he founga meimei tatau, ʻe lava ke ke sivisiviʻi ʻa e musiká ʻaki haʻo fanongo ki ha konga ke ke ʻilo pe ʻoku taau feʻunga ʻa e musika ko iá. Ko e faʻahinga ongo fēfē ʻoku fakatupu ʻiate koe ʻe he fasi ko iá? ʻOkú ne fakatupu ʻa e ʻulungāanga taʻe taau ʻoku fuʻu tōtuʻa mo fakaʻau ke kovi​—ko e loto ke fiefia longoaʻa? (Kalētia 5:​19-21) ʻOku fēfē ʻa e ngaahi leá? ʻOku nau fakaʻaiʻai ʻa e ʻulungāanga taʻe taau fakaefehokotaki fakasinó, ke ngāueʻaki ʻa e faitoʻo kona tapú, pe ngaahi meʻa kehe ʻoku hala ʻa ia “naʻa mo e lea ki ai ko e meʻa fakamā”? (ʻEfesō 5:12) ʻOku pehē ʻi he Tohi Tapú ko e ngaahi meʻa peheé “naʻa mo e lau ki ai ke mou fakaʻehiʻehi mei ai” ʻi he lotolotonga ʻo e kakai ʻa e ʻOtuá, huanoa hono ʻai ha ngaahi lea peheé ʻi ha hiva ʻo toutou lea ʻaki ai ʻa e ngaahi lea taʻe taau. (ʻEfesō 5:1 [ʻEfesō 5:​3, PM]) Fēfē ʻa e fakatātā ʻoku ʻasi ʻi he puha ʻoku faʻo ai ʻa e peletí pe kāseté? ʻOku hā ai ha ngaahi kaveinga fekauʻaki mo e fakahaʻele faʻahikehé pe ngaahi fakatātā ʻokú ne fakatupu ʻa e holi fakaefehokotaki fakasinó?

18. (a) Ko e hā ʻa e ngaahi liliu ʻe fie maʻu ke fai nai ʻe ha kau talavou ʻe niʻihi ʻo fekauʻaki mo e musiká? (e) ʻE lava fēfē ʻe he kau talavoú ke nau fakatupulekina ʻa e manako ki he musika ʻoku fakatupu langa hake angé?

¹⁸ ʻOku fie maʻu nai ke ke fai ha liliu ʻi he faʻahinga musika ʻokú ke saiʻia aí. Kapau ʻokú ke maʻu ha peleti, kāsete, mo ha compact disc ʻoku ʻi ai ʻa e ngaahi kaveinga taʻe taau mo fakatēmeniō, ʻoku totonu ke ke liʻaki leva ia. (Fakafehoanaki mo Ngāue 19:19.) ʻOku ʻikai ko e ʻuhinga ʻeni ke ʻoua te ke fanongo koe ki ha musika; ʻoku ʻikai ke pango kotoa ʻa e ngaahi musika ʻoku manakoá. Kuo toe feinga foki mo e kau talavou ʻe niʻihi ke toe fakalahi atu ʻa ʻenau saiʻia ʻi he musiká pea kuo nau maʻu ʻa e fiefia ʻi he faʻahinga ʻe niʻihi ʻo e musika ko e classical, folk, light jazz, mo e musika kehe. Kuo tokoniʻi ʻe he ngaahi kāsete ʻo e Kingdom Melodies ʻa e kau talavou tokolahi ke fakatupulekina ʻa e manako ki he musika ʻa e kau ifi mo e tāmeʻalea ʻoku fakatupu langa haké.

19. Ko e hā ʻoku mahuʻinga ai ke tuku pē ʻa e musiká ʻi hono tuʻunga totonú?

¹⁹ Ko e meʻaʻofa fakaʻotua ʻa e musiká. Ka, ki he tokolahi ʻoku fuʻu hulu ʻa ʻenau tokanga ki aí. ʻOku hangē ʻa e faʻahinga ko iá ko e kau ʻIsileli ʻo e kuonga ko ē, he naʻa nau fiefia ʻi he tā ʻo e “haape pe mo e helefilo, ko e nafa fāngongo pe mo e fangufangu, . . . ka [naʻe] ʻikai te nau tokangaʻi ʻa e meʻa ʻoku fai ʻe Sihova.” (ʻAisea 5:12) ʻAi ia ko hoʻo taumuʻa ke tuku pē ʻa e musiká ʻi hono tuʻunga totonu kae ʻai ʻa e ngāue ʻa Sihová ko e meʻa ia ʻokú ke tokanga fakatefito ki aí. ʻAi ke filifili mo tokanga ʻo fekauʻaki mo e musika ʻokú ke saiʻia aí. Ko ia te ke malava ke ngāueʻaki​—kae ʻikai ke ngāuekoviʻaki—​ʻa e meʻaʻofa fakaʻotua ko ʻení.

[Fakamatala ʻi lalo]

ʻOkú Ke Manatuʻi?

◻ Ko e hā ʻoku lava ai ke ui ʻa e musiká ko e meʻaʻofa fakaʻotua?

◻ Naʻe fēfē hono ngāuekoviʻaki ʻa e musiká ʻi he ngaahi kuonga muʻá?

◻ Ko e hā ʻa e ngaahi fakatuʻutāmaki ʻoku fokotuʻu mai ʻe he musika ko e rap mo e heavy metal ki he kau talavou Kalisitiané?

◻ ʻE lava fēfē ke tokanga ʻa e kau talavou Kalisitiané ʻo kau ki he musika ʻoku nau saiʻia aí?

[Fehuʻi ki he Ako]

[Fakatātā ʻi he peesi 45]

ʻI he kuonga ʻo e Tohi Tapú, naʻe faʻa ngāueʻaki ʻa e musika ke fakalāngilangiʻi ʻa Sihova