Ko Hono ʻOmai ʻa e Fakamaama ki he ʻI Ai ʻa Kalaisí

“Ka ʻo ka ʻiloange ʻe hoko mai ʻa e Fanautama ʻa Tangata, kuo ne ʻai hono nāunau, . . . ʻe fakatahataha ki hono ʻao ʻa e ngāhi kakai kotoa pe; pea te ne vaheʻi kinautolu.”​—MĀTIU 25:​31, 32.

 1. Kuo fakaʻuhingaʻi ʻe he haʻa-faifekau ʻo Puleʻanga-Haʻa-Kalisitiané ʻa e ngaahi lea ʻa Sīsū ʻi he Mātiu 24:3 ke ʻuhinga ki he hā?

 ʻI HE ʻaho ʻe tolu ki muʻa pea pekia ʻa Sīsuú, naʻe haʻu kiate ia ʻa e toko fā ʻo ʻene kau ākongá ʻo ʻeke tōtōivi kiate ia: “Fakaha kiate kimautolu, e hoko afe ae gaahi mea ni? bea koeha ae fakailoga o hoo haʻu [faka-Kalisi, pa·rou·siʹa], bea moe gataaga o mamani?” Kuo laui senituli ʻa hono fakaʻuhingaʻi ʻe he haʻa-faifekau mo e kau faʻu tohi ʻo Puleʻanga-Haʻa-Kalisitiané ʻa e ngaahi lea ko eni ʻa Sīsū ʻi he Mātiu 24:3 (PM) ke ʻuhinga ʻe toe hā mai ia ʻi he kakano ke mātā ʻe he faʻahinga ʻo e tangatá kātoa. Ko ia ai, kuo nau akoʻi ko e foki mai ʻa Kalaisí ʻe fakahāhā lahi ia mo e ngeia hā mai. ʻOku nau lave ki ai ko e hāʻele ʻanga ua mai ʻa Kalaisi. Ka ʻoku totonu ʻenau ngaahi fakakaukau peheé?

 2, 3. (a) Ko e hā ʻa e fakafaikehekeheʻi naʻe fai ʻe he Voliume 2 ʻo e Studies in the Scriptures ki he ongo foʻi lea ko e “haʻu” mo e “ʻi ai”? (e) Ko e hā naʻe hoko ʻo mahino ki he kakai ʻa Sihová ʻi he fekauʻaki mo e ʻuhinga ʻo e pa·rou·siʹa ʻa Kalaisí?

² ʻI he aʻu mai ki he 1889, ko e kau pani ʻa Sihová ʻi he tuʻunga ko e kau tapua atu ʻo e maamá ʻi he senituli 19, naʻa nau ʻosi maʻu ʻa e fakatonutonu ki he meʻa fekauʻaki mo e foki mai ʻa Kalaisí. ʻI he Voliume 2 ʻo e Studies in the Scriptures, peesi 158 ki he 161, naʻe tohi ai  ʻa Charles T. Russell, ko e ʻuluaki palesiteni ʻo e Watch Tower Bible and Tract Society, ʻo ne pehē: “Ko e parousia . . . ʻoku ʻuhinga ki he ʻi ai, pea ʻoku totonu ke ʻoua ʻaupito ʻe liliu lea ia ko e haʻu, ʻo hangē ko ia ʻoku ʻi he Tohi Tapu faka-Pilitania lahi . . . Ko e ‘Emphatic Diaglott,’ ko ha liliu mātuʻaki mahuʻinga ia ʻo e Fuakava Foʻoú, kuó ne liliu totonu ʻa e parousia, ko e ʻi ai . . . , kae ʻikai ko e haʻu, ʻo hangē ʻoku fononga mai, ka ko e ʻi ai, he ʻi he hili ʻo e aʻu ki aí ʻoku pehē ʻe [Sīsū], ‘Hangē ko e ngaahi ʻaho ʻo Noa, ʻe pehē foki ʻa e parousia [ʻi ai] ʻa e Fanautama ʻa tangatá.’ Fakatokangaʻi, ʻoku ʻikai ko hono fakafehoanaki ʻa e haʻu ʻa Noa pea mo e haʻu ʻa hotau ʻEikí . . . Ka, ko hono fakafehoanaki ʻo e taimi ʻo e ʻi ai ʻa Noa ʻi he lotolotonga ʻo e kakai ‘ki muʻa he lōmakí,’ pea mo e taimi ʻo e ʻi ai ʻa Kalaisi ʻi he māmaní, ʻi heʻene ʻi ai hono ua, ‘ki muʻa ʻi he afi’​—ko e faingataʻa lahi ʻo e ʻaho ʻo e ʻEiki [Sihova] ʻa ia ʻe ngata ai ʻa e kuonga ko ení.”​—Mātiu 24:37.

³ Ko ia ko e kakai ʻa Sihová ʻi he senituli 19 naʻa nau maʻu ʻa e mahino totonu ʻoku taʻe hā mai ʻa e pa·rou·siʹa ʻa Kalaisí. Naʻa nau toe maʻu ʻa e mahino ʻe ngata ʻa e Kuonga ʻo e Senitailé ʻi he faʻahitaʻu fakatōlau ʻo e 1914. ʻI he fakaʻau ke lahi ange ʻa e fakamaama fakalaumālié, naʻa nau maʻu ʻa e mahino ki mui ki hono fakanofo ʻa Sīsū Kalaisi ki he taloni ʻi hēvaní ko e Tuʻi ʻo e Puleʻangá ʻi he taʻu tatau pē ko iá, ko e 1914.​—Palōvepi 4:18; Tāniela 7:​13, 14; Luke 21:24; Fakahā 11:15.

Ko e “ʻI Ai ʻa Hotau ʻEiki”

 4. ʻOku ʻuhinga ki he hā ʻa e “ʻi ai ʻa hotau ʻEiki ko Sisu Kalaisi”?

⁴ Ko ia ai, ko e hā ʻa e ʻuhinga ʻi hotau ʻahó ni ʻa e kupuʻi lea faka-Tohitapu ko e “hoko mai [“ʻi ai,” NW] ʻa hotau ʻEiki ko Sisu Kalaisi?” (1 Tesalonaika 5:23) ʻOku fakamatala ʻe ha mataotao ʻe taha ʻo pehē ko e foʻi lea ko e “ʻi ai,” pa·rou·siʹa, “naʻe hoko ia ko e foʻi lea ke ngāueʻaki ki ha ʻaʻahi ʻa ha toko taha ʻoku ʻi he tuʻunga māʻolunga, tautefito ki he ngaahi tuʻi pea mo e kau ʻemipola ʻi heʻenau ʻaʻahi ki ha vahefonua.” Ko ia ʻoku ʻuhinga ʻa e kupuʻi leá ni ki he ʻi ai fakatuʻi ʻa e ʻEiki ko Sīsū Kalaisí ʻi hono tuʻunga ko e Tuʻi, talu mei he 1914, ʻi he hili ʻa hono fakanofo ia ki he taloni ʻi hēvaní. Ko ia ai, ʻokú ne ʻi ai taʻe hā mai ke ‘pule ʻi he lotolotonga ʻo hono ngaahi fili,’ ʻo ne pule ko e Tuʻi ke ne fakahoko ʻa e fekau fakaekikite ko ení. (Sāme 110:2) Kuo aʻusia ʻe he kakai ʻi he māmaní ʻa e ngaahi ola ʻo e ʻi ai fakatuʻi taʻe hā mai ʻa Kalaisí ʻi he taʻu nai ʻe 79.

 5. Ko e hā ʻa e ngaahi meʻa he lolotonga ko eni ʻo e pa·rou·siʹa ʻe fakamatalaʻi ʻi he ngaahi kupu ako ʻe tolu ʻo e makasini ko ení?

⁵ ʻI he ngaahi kupu ʻe tolu ko ení, te tau toe vakaiʻi ʻa e ngaahi fakamoʻoni hā mahino ki he ngaahi lavameʻa ʻa e Puleʻanga ʻo Kalaisí he lolotonga ʻo e vahaʻa taimi ko ení. ʻUluakí, te mau fakahā ʻa e ngaahi kikite faka-Tohitapu ʻe niʻihi naʻe kikiteʻi ai ʻa e ngaahi meʻa ʻa ia kuo ʻosi hoko pe ʻoku lolotonga hoko. Ko hono uá, te mau fakamatalaʻi ʻa e ngāue lahi ʻoku lolotonga fai ʻe he kalasi tamaioʻeiki anga-tonu mo poto ʻoku ngāueʻaki ʻe Sīsū ʻi he lolotonga ʻo e vahaʻa taimi fakakātoa ko eni ʻo ʻene ʻi ai fakatuʻí. (Mātiu 24:​45-47) ʻE fakamatalaʻi kiate kitautolu ʻe he kupu hono tolú ʻa e fakaʻosiʻosi maʻongoʻonga, ko e vahaʻa taimi ʻo e “mamahi lahi.” Ko e taimi ia ʻe haʻu ai ʻa Sīsū ko e Toko Taha Faitāmate ʻa Sihová ke fakaʻauha ʻa e kakai taʻe māʻoniʻoní pea ke fakahaofi ʻa e kau māʻoniʻoní. (Mātiu 24:​21, 29-31) ʻOku fakamatalaʻi ʻe he ʻaposetolo ko Paulá ʻa e taimi fakaʻauha ko iá ʻo pehē ʻe fakahoko ia “kiate kimoutolu oku mamahi, koe fiemalie mo kimautolu, oka fakaha mai ae Eiki ko Jisu mei he lagi mo ene kau agelo malohi, i he afi uloulo moe fai totogi kiate kinautolu oku ikai te nau ilo ae Otua, bea oku ikai talagofua ki he ogoogolelei o ho tau Eiki ko Jisu Kalaisi.”​—2 Tesalonaika 1:​7, 8, PM, fakaʻītali ʻamautolu.

Ko e Fakaʻilonga

 6. Ko e hā ʻa e fakaʻilonga faʻu fetuiaki ʻoku fakamatalaʻi ʻi he Mātiu vahe 24 mo e 25?

⁶ Ki muʻa he taʻu ʻe 1,900 kuo maliu atú, naʻe ʻeke ʻe he kau ākonga tapua atu ʻo e maama ʻa Sīsū kiate ia ʻo kau ki ha fakaʻilonga, pe ngaahi fakamoʻoni, ki heʻene ʻi ai he kahaʻú ʻi he mafai ki he Puleʻangá. ʻOku hiki ʻa ʻene tali ki aí ʻi he Mātiu vahe 24 mo e 25 ʻo e tohi Mātiú, ʻo kikiteʻi ha  fakaʻilonga faʻu fetuiaki ʻa ia ʻoku lolotonga fakahoko ʻi he tapa kotoa ʻo māmaní. ʻOku fakahā ʻe he fakaʻilonga ko iá ha taimi ʻo e faingataʻa mo e ʻahiʻahi lahi. Naʻe fai fakatokanga mai ʻa Sīsū: “Vakavakai, naʻa taki hē kimoutolu ʻe ha taha. Koeʻuhi ʻe ai ha tokolahi te nau haʻu ʻi he hingoa oʻoku, mo nau pehe, Ko au ko e Misaia; pea te nau taki hē ha tokolahi. Pea ʻe faifai pea te mou fanongo ki ha ngāhi tau, mo ha ngāhi tala tau: tokanga ke ʻoua naʻa fakamanavasiʻi ai kimoutolu: he kuo pau ke hoko ia, kae kei tuai pe ʻa e ngataʻanga.”​—Mātiu 24:​4-6.

 7. Ko e hā ʻa e ngaahi tafaʻaki ʻo e fakaʻilonga kuo tau sio kuo fakahoko talu mei he 1914?

⁷ Naʻe toe kikiteʻi ʻe Sīsū ʻe hoko ʻa e ngaahi tau ʻi he tuʻunga naʻe teʻeki ke ʻi ai hano tatau ki muʻa. ʻI he fakahoko ʻo e meʻá ni, kuo ui ʻa e ongo tau ʻe ua ʻi he ngaahi taú ni ko e ongo tau ʻa māmani, ko e taha mei he 1914 ki he 1918, pea ko hono uá mei he 1939 ki he 1945. ʻIkai ngata ai, naʻá ne pehē ʻe ʻi ai ʻa e ngaahi honge mo e ngaahi mofuike ʻi he feituʻu kehekehe. ʻE fakatangaʻi kakaha ʻa e kau Kalisitiane moʻoní. ʻOku hangē ko ia naʻe kikiteʻí, ko e Kau Fakamoʻoni ʻa Sihová, ko e kau tapua atu ʻo e maamá ʻi onopooní, kuo fakatangaʻi kinautolu ʻi he ngaahi hongofuluʻi taʻu ʻe valu kuo maliu atú he lolotonga ʻenau malangaʻi ʻa e ongoongo lelei ʻo e Puleʻanga ʻo e ʻOtuá “koe mea fakamooni ki he buleaga kotoabe.” (Mātiu 24:​7-14, PM) ʻI he Yearbook of Jehovah’s Witnesses taki taha ʻokú ne tānaki mai ʻa e fakamoʻoni ʻoku lolotonga fakahoko ʻa e ngaahi tafaʻaki ko eni ʻo e fakaʻilongá.

 8, 9. (a) Ko e hā ʻoku fekauʻaki mo e ʻi ai fakatuʻi ʻa Sīsuú? (e) Ko e hā ʻoku fakahā ʻe he kikite ʻa Sīsū ʻo fekauʻaki mo e kau Kalaisi loi ʻi he felāveʻi mo e feituʻu mo e anga ʻo ʻene ʻi aí?

⁸ Koeʻuhi ʻoku fālute ʻe he tuʻunga-tuʻi ʻo Sīsuú ʻa e māmaní kotoa, ʻoku fakalahi atu ʻa e lotu moʻoní ki he ngaahi konitineniti kotoa. Ko ʻene ʻi ai (pa·rou·siʹa) fakatuʻí ko e taimi ia ʻo e sivi ʻi māmani lahi. (1 Pita 2:12) Ka ʻoku ʻi ai ha kolomuʻa pe feituʻu ʻe malava ke alea ai mo Sīsū? Naʻe tali eni ʻe Sīsū ʻaki ʻene kikiteʻi ʻo pehē ʻi he ʻamanekina ke hoko ʻa ʻene ʻi aí, ʻe ʻi ai ha kau Kalaisi loi. Naʻá ne fakatokanga mai: “Ko ia kapau te nau pehe kiate kimoutolu, Si, ʻoku ne [Kalaisi] ʻi he toafa; ʻoua te mou ʻalu ki ai: Si, ʻoku ne ʻi ha tukunga koloa; ʻoua te mou momoʻi tui ki ai. He hange ko e pa mai ʻa e ʻuhila mei hahake, pea ʻoku ha ʻo aʻu ki hihifo; ʻe pehe foki ʻa e hoko mai [“ʻi ai,” NW, pa·rou·siʹa] ʻa e Fanautama ʻa Tangata.”​—Mātiu 24:​24, 26, 27.

⁹ Naʻe ʻilo lelei ange ʻa Sīsū, ko e “Fanautama ʻa Tangata,” ʻi ha toe taha kehe ʻi he māmaní ki he feituʻu te ne ʻi ai ʻi he kamata ʻa ʻene ʻi aí. He ʻikai te ne ʻi ai ʻi ha faʻahinga feituʻu pau ʻi he māmaní. He ʻikai te ne ʻasi ʻi ha feituʻu lala, “ʻi he toafa,” kae lava ke alea mo ia ʻa e faʻahinga te nau kumi ki he Mīsaiá ʻo mamaʻo mei he vakai ʻa e kau maʻu mafai fakapuleʻanga ʻo e fonuá, ko e feituʻu ʻe lava ke ako ai ʻa hono kau muimuí ʻi heʻene tuʻunga-takí, ʻo nau teuteu ke fai ha meʻa fakapolitikale pea fokotuʻu ia ko e Pule faka-Mīsaia ʻo e māmaní. ʻIkai ngata ai, he ʻikai te ne toitoi ʻi ha “tukunga koloa,” ʻa ia ʻoku ʻilo ki ai ʻe ha tokosiʻi pē kuo fili, ʻo ne faʻufaʻu mo fokotuʻu fakapulipuli ai mo ha niʻihi kehe ke liliu ʻa e ngaahi puleʻanga ʻo e māmaní pea ʻai ai ia ke hoko ko e Mīsaia kuo pani naʻe talaʻofá. ʻIkai!

10. Kuo hoko fēfē ʻa e pā atu ʻa e moʻoni faka-Tohitapú hangē ha ʻuhilá ʻi māmani lahi?

¹⁰ Ko e meʻa mātuʻaki fehangahangaí, naʻe ʻikai ko ha meʻa ke fakapulipuli ʻa e ʻosi hoko mai ʻa Sīsū ko e Tuʻí, ʻo ne kamata ʻene ʻi ai fakatuʻí. Hangē ko ia naʻe kikiteʻi ʻe Sīsū, ʻoku hokohoko atu ʻa e pā atu ʻo e moʻoni faka-Tohitapu hangē ha ʻuhilá ki he ngaahi feituʻu mei he hahaké ki he hihifó, ʻi māmani lahi. Ko e moʻoni, ʻi he tuʻunga ko e kau tapua atu ʻo e maamá ʻi onopooní, ʻoku hoko ai ʻa e Kau Fakamoʻoni ʻa Sihová “ko e maama ki he ngaahi puleʻanga, ke hoko [ʻa e] fakamoʻuiʻanga [ʻa Sihova] ʻo aʻu ki he ngataʻanga ʻo mamani.”​—ʻAisea 49:6.

Ngāue ʻa e Kau ʻAngelo

11. (a) ʻI he founga fē ʻoku ngāueʻaki ai ʻa e kongakau ʻangelo ʻi hono fakahaaʻi atu ʻa e maama ʻo e Puleʻangá? (e) ʻAnefē pea ki he kulupu fē kuo fakatahatahaʻi ki ai ʻa e faʻahinga ʻi he kalasi ko e uité?

¹¹ ʻOku fakamatalaʻi ʻe he ngaahi konga Tohi Tapu kehe ʻoku lave ki he ʻi ai ʻa Sīsuú ʻo pehē ʻoku kau fakataha mo ia, pe ʻokú ne ‘fekau  atu,’ ha ngaahi kongakau ʻangelo. (Mātiu 16:27; 24:31) ʻI he talanoa fakatātā fekauʻaki mo e uité mo e teá, naʻe fakahā ʻe Sīsū “ko e ngoue ko māmani” pea “ko e ututaʻu ko e fakaʻosi ʻo ha kuonga; ko e kau tuʻusi ko e kau angelo.” Kae kehe, ʻoku ʻikai ʻuhinga eni, ʻo pehē, ʻi he lolotonga ʻo ʻene ʻi ai ʻi he mafai mo e nāunau ʻo e Puleʻangá, ʻokú ne ngāueʻaki pē ʻa e kau ʻangelo ko e kau talafekau ki hono fai ha meʻa ʻi māmani. Naʻe kamata ʻi he 1919 ʻi he tataki ʻa Sīsuú ʻa hono fakamavaheʻi ʻe he kau ʻangeló ʻa e kalasi uité ko e faʻahinga pani ʻe he laumālié ʻi māmani ʻa ia naʻe fakamovetevete ʻe he ngaahi meʻa naʻe hoko ʻi he Tau I ʻa Māmaní, pea naʻe mateuteu ʻa e faʻahingá ni ke fai ha ngāue lahi ange ʻi he huafa ʻo e Tuʻí. (Mātiu 13:​38-43) ʻI he ngaahi taʻu 1920 tupú naʻe ʻi ai ʻa e laui afe kehe naʻa nau kau maʻá e Puleʻanga ʻo e ʻOtuá kuo fokotuʻú pea naʻe pani ʻaki ʻa e laumālie ʻo e ʻOtuá. Naʻe tānaki atu ʻa e faʻahinga pani ko ení ki he muʻaki toenga ʻo e kau paní. Ko hono fakakātoa ʻo e faʻahingá ni ʻoku nau faʻu ʻa e kalasi tamaioʻeiki anga-tonu mo poto ʻi hotau ʻaho ní.

12. Ko e hā ʻa e ngāue fakamaʻa kuo kau ki ai ʻa e kau ʻangeló, pea ko e hā hono ikuʻanga ki he māmaní?

¹² Ko ha toe fakatātā ʻe taha ʻo e kau ʻa e kau ʻangeló he lolotonga ʻo e ʻi ai ʻa Sīsuú pea mo e hili ʻa hono fakanofo ia ki he taloní ʻi he 1914 ʻoku hā ia ʻi he Fakahā 12:​7-9: “Ko Maikeli [Sīsū Kalaisi] mo ʻene kau ʻangelo naʻa nau fai tau mo e Talakoni, pea naʻe tau ʻa e Talakoni mo ʻene kau ʻangelo aʻana, ka naʻe ʻikai te nau lava; ʻio, naʻe ʻikai kei maʻu hanau potu ʻi he langi. Pea naʻe kapusi ʻa e Talakoni lahi, ʻa ia ko e Ngata ʻo ono ʻaho, ʻa e toko taha ʻoku ui ko e Tevolo mo Setane, ʻa e toko taha ʻoku ne kākāʻi ʻa mamani kātoa: naʻe li ia ki mamani, pea li mo ia ʻene kau ʻangelo.” Ko ia ai, kuo fakamaʻa ʻa e ngaahi langi ʻi ʻolungá, kae teʻeki ai ke fakamaʻa fakaʻaufuli ʻa e feituʻu fakaemāmani ʻo e Puleʻangá ke fakamāʻoniʻoniʻi ʻa e huafa ʻo Sihová. ʻI he taʻu ko ení, ko e 1993, ʻoku kei kaunga tonu ʻa e fakatokanga fakaeʻotua: “ʻOiaue ʻa e fonua . . . he kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.”​—Fakahā 12:12.

Toe Tuʻu Fakahēvani

13, 14. (a) Ko e hā ʻoku fakahā ʻe he Tohi Tapú kuo hoko talu mei he 1918 ʻo faai mai? (e) Ko e hā ʻoku fakahā ʻe Paula mo Sione ʻo kau ki he toenga ʻo e kau paní ʻi he ʻaho ní?

¹³ Ko e toe meʻa fakaofo ʻe taha kuo hoko he lolotonga ʻa e ʻi ai ʻa Kalaisí ko e kamata ʻo e toe tuʻu fakahēvaní. Naʻe fakahā ʻe he ʻaposetolo ko Paulá ʻo pehē ko e kau Kalisitiane kuo paní kuo fuoloa ʻenau mohe ʻi honau ngaahi faʻitoká te nau hoko ko e ʻuluaki faʻahinga ke toe moʻui pea nofo fakataha mo Sīsū Kalaisi ʻi he feituʻu laumālie. Kuo ʻomai ʻa e fakamoʻoni ʻi he ngaahi taʻu lahi ke fakahāhā ʻoku ngalingali naʻe kamata eni mei he 1918 ʻo faai mai. ʻOku tohi ʻe Paula: “ʻE fakamoʻui hake kotoa pe ʻia Kalaisi. Ka ʻe taki taha ʻi hono vahenga: ko e polopolo ko Kalaisi; hoko ai ʻa kinautolu ʻoku ʻo Kalaisi, ʻoka fai ʻene haʻele mai [“ʻi ai,” NW, pa·rou·siʹa].” (1 Kolinitō 15:​22, 23) ʻOku fakapapauʻi ʻi he 1 Tesalonaika 4:​15-17 ʻa e toe tuʻu ʻa e kau paní he lolotonga ʻa e ʻi ʻai ʻa Kalaisí: “He ko e meʻa ni ʻoku mau talaatu ko e folofola tonu ʻa e ʻEiki, Neongo kitaua ʻe tolonga ʻo aʻusia ʻa e hoko mai [“ʻi ai,” NW, pa·rou·siʹa] ʻa e ʻEiki, mole ke mamaʻo haʻata muʻomuʻa ʻiate kinautolu kuo mohe . . . pea ko e pekia ʻia Kalaisi ʻe tomuʻa tuʻu: hili ia, ko kitaua kuo ta tolonga ʻo aʻusia, ʻe punakaki kitaua fakataha mo kinautolu ʻi he ngaahi ʻao ki he ʻatā, ke fakafetaulaki ki he ʻEiki.” Ko e toko 144,000 ʻoku kau kia Kalaisí ko e faʻahinga paní ʻe faifai atu pea te nau maʻu ʻa e pale fakaofo ko ení.​—Fakahā 14:1.

¹⁴ Hangē ko ia ʻoku fakahā ʻe Paulá, ko e toenga ko ia ʻo e kau paní ʻoku nau kei moʻui ʻi he ʻaho ní he ʻikai te nau muʻomuʻa ki he Puleʻangá ʻi he kau maʻata mo e kau ākonga ko e kau ʻaposetolo anga-tonu ki muʻá. ʻOku toe fakamatalaʻi ʻe he ʻaposetolo ko Sioné ʻa e faʻahinga ʻo e kau paní ʻoku nau mate he taimi ní ʻo pehē ni: “ʻOku monuʻia ʻa e pekia ʻoku pekia ʻi he ʻEiki. Pea ʻoku folofola ʻa e Laumalie, ʻIo, koeʻuhi te nau mālōlō mei heʻenau fakaongosia, he ko ʻenau ngaahi ngaue te nau muimui atu mo kinautolu,” ʻa ia ko ʻenau moʻui he hili ʻa e toe tuʻú. (Fakahā 14:13) Pea ʻoku pehē ʻe Paula: “ʻE! kau tala atu ha misiteli: ʻE ʻikai te tau  mohe kotoa pe, ka te tau liliu kotoa pe, ʻi ha foʻi momeniti, ʻi ha foʻi kemo pe, ʻi he ifi fakamui ʻo e talupite: ʻio, ʻe ifi ʻa e talupite, pea ʻe fokotuʻu ʻa e pekia, ʻo taʻefaʻaʻauha, pea ko kitautolu ʻe liliu.” (1 Kolinitō 15:​51, 52) Ko ha mana fakaofo lahi ē!

15, 16. (a) Ko e hā ʻa e talanoa fakatātā naʻe fai ʻe Sīsū ʻi he Luke 19:​11-15, pea ko e hā hono ʻuhingá? (e) Kuo fakahoko fēfē ʻa e kikité ni?

¹⁵ ʻI he taimi ʻe taha, ʻi he malanga ʻa Sīsū ki ha kulupu ʻo ʻene kau muimuí ʻo fekauʻaki mo e Puleʻanga ʻo e ʻOtuá, naʻá ne ngāueʻaki ha talanoa fakatātā ke tokoniʻi kinautolu ke fakatonutonu ʻenau fakakaukau halá. ʻOku pehē ni ʻa e lau ʻa e fakamatalá: “ʻOku ʻamanaki ʻa e kakai, ʻoku panaki ʻaupito ʻa e fakaha mai ʻo e Puleʻanga ʻo e ʻOtua. Ko ia naʻa ne lea ʻo pehē, Tokua, naʻe ai ha tangata, ko e foʻi ʻeiki, naʻa ne ʻalu ki ha fonua mamaʻo ke maʻu moʻona ha puleʻanga, pea toki foki mai. Pea ne ui ha toko hongofulu o ʻene kau tamaioʻeiki, ʻo ne tuku kiate kinautolu ha mina paʻanga ʻe hongofulu, ʻo ne pehe kiate kinautolu, Fai fakatau ʻaki ia lolotonga ʻeku mamaʻo. . . . Pea faifai pea ne foki mai, kuo oʻona ʻa e puleʻanga; pea ne fekau ke ui mai ʻa e tuʻunga tamaioʻeiki ko ia, ʻa ia naʻa ne tuku ki ai ʻa e paʻanga, koeʻuhi ke ne meaʻi pe kuo fēfē ʻenau fakatau.”​—Luke 19:​11-15.

¹⁶ Ko Sīsū ʻa e “tangata” ʻa ia naʻá ne ʻalu ki hēvani, ko e “fonua mamaʻo” ia ʻa ia te ne maʻu ai ha puleʻanga. Naʻá ne maʻu ʻa e Puleʻanga ko iá ʻi he 1914. ʻIkai ke fuʻu fuoloa mei ai, naʻe fie maʻu ʻe Kalaisi ko e Tuʻí ha fakamatala meiate kinautolu kuo taku ko ʻene kau muimuí ke ne ʻilo ʻa e meʻa naʻa nau fai ʻi hono tokangaʻi ʻa e ngaahi meʻa mahuʻinga ʻo e Puleʻangá ʻa ia naʻe tuku kiate kinautolú. Ko ha tokosiʻi pē naʻe anga-tonu naʻe fili ke nau maʻu ʻa e fakaongoongolelei ʻa e ʻeikí: “Mālō, siʻi tamaioʻeiki lelei! pea ko e meʻa ʻi hoʻo lototō ʻi ha kiʻi momoʻi meʻa pehē, ke ke nofo ko e pule ʻo ha kolo ʻe hongofulu.” (Luke 19:17) Naʻe kau ki he vahaʻa taimi ko eni ʻo e ʻi ai ʻa Kalaisí ʻa e ngāue fakamalanga fuʻu lahi mo hokohoko fekauʻaki mo e Puleʻangá, kau ai mo hono fanongonongo ʻa e ngaahi fakamaau ʻa e ʻOtuá ki he kau fai koví, pea ko hono tokangaʻi ʻa e ngāue ko ení naʻe kau ia ʻi he mafai naʻe tuku ki he “tamaioʻeiki lelei.”

Ngāue Fakamalanga ʻi Māmani Lahi

17. Ko e hā ʻa e fiefia ʻokú ne fakaʻilongaʻi ʻa e pa·rou·siʹa?

¹⁷ Ko e hā ha toe meʻa ʻe hoko he lolotonga ʻa e vahaʻa taimi ko eni ʻo e pa·rou·siʹa? ʻE hoko ai ʻa e fiefia lahi ʻi he ngāue fakamalangá pea ʻi hono tokoniʻi ʻa e kau foʻoú ke nau mateuteu ke hao moʻui atu mei he mamahi lahi ʻoku tuʻunuku maí ni. Ko e faʻahinga ko eni ʻo e “fuʻu kakai lahi,” ʻa ia ʻoku nau tokoni ki he toenga ʻo e kau paní, ʻoku nau hoko ko “ha tohi fakaogolelei.” (Fakahā 7:9; 2 Kolinitō 3:​1-3, PM) ʻOku lave ʻa Paula ki he fiefia ʻo e ngāue utu-taʻu ko ení ʻi heʻene pehē: “He kofaʻā ia homau ʻamanakiʻanga, mo e fiefiaʻanga mo e pale te mau polepole ai ʻi he ʻao ʻo hotau ʻEiki ko Sisu, ʻo ka hā mai [“ʻi ai,” NW, pa·rou·siʹa]?”​—1 Tesalonaika 2:19.

Tauhi Maʻu ke Maʻa mo Taʻe Mele

18. (a) Ko e hā ʻa e lotu ʻa Paula ʻoku fekauʻaki mo e pa·rou·siʹa? (e) Ko e hā ʻa e faʻahinga loto kuo pau ke tau fakahāhā kotoa he lolotonga ʻo e taimi ko ení, pea ʻi he ngaahi founga fē?

¹⁸ Naʻe toe lotu ʻa Paula ke fakamāʻoniʻoniʻi ʻa e faʻahinga ʻoku nau moʻui ʻi  he vahaʻa taimi ko eni ʻo e ʻi ai ʻa Kalaisí: “Pea ko e ʻAfio ʻa e ʻOtua, ʻa ia ʻoku aʻana ʻa e nonga, ʻofa ke ne fakamaʻoniʻoniʻi fakaʻaufuli kimoutolu! ʻio, ʻi he hoko mai [“ʻi ai,” NW, pa·rou·siʹa] ʻa hotau Eiki ko Sisu Kalaisi.” (1 Tesalonaika 5:​22, 23) ʻIo, ʻi he ʻahó ni, tatau ai pē pe ʻoku tau kau ki he toenga ʻo e kau paní pe ki he fanga sipi kehe ʻoku tokolahí, ʻoku haʻi fakataha kitautolu ʻi he ʻofa-mateaki ʻe he loto ke ngāue fakataha koeʻuhi ke tau hokohoko atu ʻo maʻa mo taʻe mele ʻi he taimi laulōtahá ni. Pehē foki, ʻoku fie maʻu ke tau anga-kātaki. Naʻe tohi ʻe Sēmisi: “Ko ia, kainga, mou kataki pe ʻo aʻu ki he hoko mai [“ʻi ai,” NW, pa·rou·siʹa] ʻa e ʻEiki. . . . Poupou homou loto: he kuo ofi ʻa e hoko mai [“ʻi ai,” NW, pa·rou·siʹa] ʻa e ʻEiki.”​—Sēmisi 5:​7, 8.

19. Ko e hā ʻa e fakatokanga naʻe fai mai ʻe Pita ʻi he fekauʻaki mo e pa·rou·siʹa, pea ko e hā ʻoku totonu ke tau faí?

¹⁹ Naʻe toe ʻi ai ha meʻa ke fakahā ʻe he ʻaposetolo ko Pitá kiate kitautolu ʻoku moʻui ʻi he vahaʻa taimi ko ení. Naʻá ne fakatokanga mai kiate kitautolu fekauʻaki mo e kau manukí, ʻa ia ʻoku nau tokolahi ʻi he ngaahi tapa kotoa ʻo e māmaní. ʻOku pehē ʻe Pita: “Mou ʻilo muʻa ʻa e meʻa ni, Tokua ʻe hoko ʻi he taimi fakamui ha faʻahinga ʻoku matuʻaki manuki, ʻo nau fou ʻi he ngaahi holi ʻanautolu, mo nau lau, Komaʻāʻia ʻa e talaʻofa ʻo ʻene hoko mai [“ʻi ai,” NW, pa·rou·siʹa]? he talu ʻa e mohe ʻa e kau mātuʻa, mo e pehe ni pe ʻa e meʻa kotoa pe, ʻio, ʻa ia ai pe talu mei he kamataʻanga ʻo mamani.” (2 Pita 3:​3, 4) Neongo ʻa e tokolahi fau ʻa e kau manuki he lolotonga ʻa e ʻi ai ʻa Kalaisí, ʻoku hokohoko atu ʻa e kakai ʻa Sihová ke ulo atu ko e maama ʻo māmani, ke fakahaofi ai ʻa e tokolahi.

Ngaahi Fehuʻi Fakamanatu

◻ ʻI he founga fē naʻe fakaʻau ke lahi ange ai ʻa hono fakamāmaʻi ʻa e kakai ʻa Sihová ʻo fekauʻaki mo e pa·rou·siʹa?

◻ ʻI he founga fē kuo fakahoko ai ʻa e Mātiu 24:​4-8?

◻ ʻI he founga fē kuo ngāue fakataha ai ʻa e kau ʻangeló mo Kalaisi ʻa ia kuo fakanofo ki he taloní?

◻ Ko e hā ʻa e mana fakaofo ʻoku fekauʻaki tonu mo e pa·rou·siʹa?

◻ Ko e hā ʻa e fiefia ʻoku maʻu he taimí ni, pea ko hai ʻokú ne maʻu iá?

[Fehuʻi ki he Ako]