Tauhi ʻa e Fanga Sipi ʻa e ʻOtuá ʻi he Loto-Fiefai
Tauhi ʻa e Fanga Sipi ʻa e ʻOtuá ʻi he Loto-Fiefai
“Tauhi ʻa e fanga sipi ʻa e ʻOtua ʻoku ʻiate kimoutolu, ʻo ʻoua naʻa fai fakakoloto hono leʻohi, ka ʻi he loto fiefai.”—1 PITA 5:2.
1. Ko e hā ʻoku totonu ai ke tau ʻamanekina ʻe ‘tauhi loto-fiefai ʻa e fanga sipi ʻa e ʻOtuá’ ʻe he kau mātuʻa Kalisitiané?
ʻOKU tauhi loto-fiefai ʻe Sihova ʻa ʻene kakaí. (Sāme 23:1-4) “Ko e Tauhi Lelei,” ko Sīsū Kalaisi, naʻá ne loto-fiefoaki ʻene moʻui ko e tangata haohaoá maʻá e kakai hangē ha sipí. (Sione 10:11-15) Ko ia ai, naʻe enginaki ʻa e ʻaposetolo ko Pitá ki he kau mātuʻa Kalisitiané ke nau ‘tauhi loto fiefai ʻa e fanga sipi ʻa e ʻOtuá.’—1 Pita 5:2.
2. Ko e hā ʻa e ngaahi fehuʻi ʻoku taau ke fai ha fakakaukau ki ai ʻo fekauʻaki mo e ngaahi ngāue fakatauhisipi ʻa e kau mātuʻa Kalisitiané?
2 Ko e ngāue loto-fiefaí ko e fakaʻilonga ia ʻo e kau sevāniti ʻa e ʻOtuá. (Sāme 110:3) Ka ʻoku toe lahi ange ʻa e meʻa ʻoku fie maʻu mei he tangata Kalisitiané ʻi he ngāue loto-fiefai pē, kae fakanofo ko ha ʻovasia, pe tauhi-sipi tokoni. Ko hai ʻoku taau ke hoko ko ha kau tauhi-sipi pehē? Ko e hā ʻa e meʻa ʻoku kau ki heʻenau ngāue fakatauhisipí? ʻE lava fēfē ke fakahoko ia ki he lelei tahá?
ʻOku Pule ki he Fāmilí
3. Ko e hā ʻoku lava ai ke pehē ko e founga ʻo e tokanga ʻa ha tangata Kalisitiane ki hono fāmilí ʻoku ʻi ai hono kaunga pe ʻokú ne taau ke hoko ko e tauhi-sipi ʻi he fakatahaʻangá?
3 Ki muʻa ke fakanofo ha taha ki he “gaue oe faifekau [“ʻovasia,” NW],” kuo pau ke ne aʻusia ʻa e ngaahi fie maʻu faka-Tohitapú. (1 Tīmote 3:1-7, PM; Taitusi 1:5-9) Ko e meʻa ʻe taha, naʻe pehē ʻe he ʻaposetolo ko Paulá ʻoku totonu ki ha ʻovasia “ko e toko taha ʻoku pule lelei ki hono fale oʻona, ʻoku mapuleʻi ʻene fanau ʻi he fakaʻapaʻapa ai pe.” ʻOku ʻi ai ha ʻuhinga lelei ki he meʻá ni, he naʻe pehē ʻe Paula: “Ka ʻo kapau ʻoku ʻikai lava ʻe ha tangata ke pule ki hono fale oʻona, pea fefe haʻane tauhi ʻa e Siasi ʻa e ʻOtua?” (1 Tīmote 3:4, 5) ʻI hono fakanofo ʻa e kau tangata matuʻotuʻa fakalaumālie ʻi he fakatahaʻanga ʻi he motu ko Kēlití, naʻe tala kia Taitusi ke ne vakai ko ha “toko taha ia ʻoku ʻikai ha lau ki ai, ko e husepaniti ʻo ha fefine pe taha, ʻoku ʻi ai ʻene fanau ʻoku lotu, pea kuo ʻikai fakaʻilo kinautolu ʻi ha fakamaveuveu, pe ko e fanau talangataʻa.” (Taitusi 1:6) ʻIo, kuo pau ke fakatokangaʻi ʻa e founga ʻo e tokanga ʻa ha tangata Kalisitiane ki hono fāmilí ke fakapapauʻi pe ʻokú ne taau ke fua ʻa e fatongia mamafa ange ko e tauhi ʻa e fakatahaʻangá.
4. Tānaki atu ki hono fai tuʻumaʻu ʻa e ako Tohi Tapú mo e lotú, ʻoku fēfē hono fakahā ʻe he ngaahi mātuʻa Kalisitiané ʻa e ʻofa ki honau ngaahi fāmilí?
4 Ko e kau tangata ʻoku pule lelei ki honau ngaahi fāmilí ʻoku nau fai ʻa e meʻa lahi ange ʻo ʻikai ngata pē ʻi hono fai ʻa e lotu mo ako tuʻumaʻu ʻa e Tohi Tapú mo honau ngaahi fāmilí. ʻOku nau mateuteu maʻu pē ke tokoni kiate kinautolu ʻoku nau ʻofa aí. Ko kinautolu ʻoku hoko ko e ngaahi mātuʻá, ʻoku kamata ia ʻi he ʻaho ʻoku fāʻeleʻi ai ha tama. ʻOku ʻiloʻi ʻe he ngaahi mātuʻa Kalisitiané ko e toe ofi ange ʻenau pipiki ki he founga tuʻumaʻu fakaʻotuá, ko e vave ange ia ʻa e hoko ʻenau fānaú ke feʻunga mo e taimi-tēpile ʻa e ongo mātuʻá ke fai fakaʻaho ʻenau ngaahi ngāue faka-Kalisitiané. Ko e lelei ʻo e taki ʻa e tamai Kalisitiané ʻi he ngaahi tuʻunga ko ʻení ʻe hā mai ai ʻene taau ke hoko ko ha taha ʻo e kau mātuʻá.—ʻEfesō 5:15, 16; Filipai 3:16.
5. ʻE lava fēfē ke tauhi hake ʻe ha tamai Kalisitiane ʻene fānaú ʻi he “akonekina ʻaki ʻa e fakatonutonu fakaeʻatamai ʻa e ʻEiki”?
5 ʻI he pule lelei ki hono fale ʻoʻoná, ko ha tamai Kalisitiane loto-tōnunga te ne tokaʻi ʻa e akonaki ʻa Paulá: “ʻOua te mou fakaʻitaʻi hoʻomou fanau; kae akonekina ʻaki ʻa e tautea mo e valoki [“fakatonutonu fakaeʻatamai,” NW] ʻa e ʻEiki.” (ʻEfesō 6:4) Ko hono fai tuʻumaʻu ʻa e ako Tohi Tapu mo e fāmilí, ʻo kau fakatouʻosi ai ʻa e uaifí mo e fānaú, ko e faingamālie lelei ia ke fai ai ʻa e fakahinohino anga-ʻofá. ʻE maʻu ai ʻe he fānaú ʻa e “akonekina,” pe fakahinohino fakatonutonu. Pea ko e “fakatonutonu fakaeʻatamai” ʻoku hokó ʻe tokoni ia ki he kiʻi tama taki taha ke ne hoko ʻo ʻilo ʻa e anga ʻo e finangalo ʻo Sihová ki ha meʻa. (Teutalōnome 4:9; 6:6, 7; Palōvepi 3:11; 22:6) ʻI he feōngoaki fiemālie ʻo e fakatahataha fakalaumālie ko ení, ʻe fanongo fakalelei ʻa e tamai ʻoku tokanga moʻoní ki he lea ʻa ʻene fānaú. ʻE ngāueʻaki ha ngaahi fehuʻi tataki ke maʻu ʻa e fakamatala ʻoku haʻu mei honau lotó ʻo kau ki he meʻa ʻoku nau loto-hohaʻa ki aí mo e anga ʻo ʻenau fakakaukaú. ʻOku ʻikai ke fakakaukau pē ʻa e tamaí ʻokú ne ʻosi ʻilo ʻa e ngaahi fakakaukau ʻa e fānaú. Ko e moʻoni, “ko ia ʻoku fai ʻene tali ʻi he teʻeki ke ne fanongo, ʻoku hoko ko e fakaʻilonga o ʻene vale mo e meʻa fakama,” ko e lau ia ʻi he Palōvepi 18:13. ʻI he ʻahó ni, ko e lahi taha ʻo e ngaahi mātuʻá ʻoku nau ʻilo ʻoku fehangahangai ʻenau fānaú mo e ngaahi meʻa ʻoku kehe lahi ʻaupito ia mei he meʻa naʻe hokosia ʻe kinautolu ngaahi mātuʻá ʻi heʻenau kei taʻu siʻí. Ko ia ai, ʻe feinga ʻa e tamaí ke ne ʻilo ʻa e ngaahi fakaikiiki mo e ngaahi meʻa ʻoku kaunga ki he palōpalemá ki muʻa peá ne toki fakahā ʻa e founga ʻoku totonu ke fakaleleiʻi ai iá.—Fakafehoanaki mo Sēmisi 1:19.
6. Ko e hā ʻoku totonu ai ki he tamai Kalisitiané ke ne vakai ki he Folofola ʻa e ʻOtuá ʻi heʻene tokoni ki hono fāmilí?
6 Ko e hā ʻa e meʻa ʻoku hoko ʻi he ʻosi hono ʻiloʻi ʻa e ngaahi palōpalema, ngaahi loto-moʻua mo e anga ʻo e fakakaukau ʻa ʻete fānaú? Ko e tamai ʻoku pule leleí te ne vakai ki he Tohi Tapú, ʻa ia “oku aoga ia ki he akonaki, moe valoki, moe fakatonutonu, moe fakaboto ki he maonioni.” ʻOkú ne akoʻi ai ki heʻene fānaú ʻa e founga ke ngāueʻaki ai ʻa e fakahinohino fakamānavaʻi mei he Tohi Tapú. ʻI he founga ko ení, ko kinautolu ʻoku nau kei taʻu iikí te nau hoko ai ʻo “kakato hono teuteu ki he gaahi gaue lelei kotoabe.”—2 Tīmote 3:16, 17, PM; Sāme 78:1-4.
7. Ko e hā ʻa e faʻifaʻitakiʻanga ʻoku totonu ke fokotuʻu ʻe he ngaahi tamai Kalisitiané ʻo fekauʻaki mo e lotú?
7 ʻOku fehangahangai ʻa e kau talavou ʻoku anga fakaʻotuá mo e ngaahi tuʻunga faingataʻa ʻi he fekauʻaki mo e kaungāako fakaemāmaní. Ko ia ʻe lava fēfē ke fakanonga ʻe he ngaahi tamai Kalisitiané ʻa e loto-hohaʻa ʻa ʻenau fānaú? Ko e founga ʻe taha ko hono fai tuʻumaʻu ʻa e lotu mo e fānaú pea ke lotu koeʻuhi ko kinautolu. ʻI he fehangahangai ʻa e fānau ko iá mo e ngaahi ʻahiʻahí, ʻoku ngalingali te nau faʻifaʻitaki ki he falala ki he ʻOtuá ʻa ʻenau ngaahi mātuʻá. ʻI ha fakaʻekeʻeke naʻe fai ki ha kiʻi taʻahine taʻu 13 ki muʻa pea papitaiso ke fakahāhā ʻene fakatapui ki he ʻOtuá, naʻá ne fakahā naʻá ne hokosia ʻa e manuki mo e ngaohikoviʻi mei hono kaungāakó. ʻI heʻene pouaki ʻa ʻene tui fakatuʻunga ʻi he Tohi Tapú ʻo fekauʻaki mo e tuʻunga toputapu ʻo e totó, naʻe tā mo ʻaʻanu ange ki ai ʻa e tamaiki fefine kehé. (Ngāue 15:28, 29) Naʻá ne totongi ʻa e kovi ʻaki ʻa e kovi? ʻIkai. Ko ʻene fakamatalá: “Naʻá ku toutou lotu kia Sihova ke tokoniʻi au ke ʻoua te u ʻita. Naʻá ku toe manatuʻi ʻa e meʻa naʻe akoʻi ʻe heʻeku ongo mātuʻá kiate au ʻi heʻemau ako fakafāmili ʻo kau ki he fie maʻu ke fakamaʻumaʻu ʻo ka hoko ha kovi.”—2 Tīmote 2:24.
8. ʻE lava fēfē ʻe ha taha ʻo e kau mātuʻá ʻoku ʻikai ke ʻi ai haʻane fānaú ke pule lelei ki hono fale ʻoʻoná?
8 ʻE lava foki ʻe ha taha ʻo e kau mātuʻá ʻoku ʻikai ke ʻi ai haʻane fānaú ke ne tokonaki feʻunga fakalaumālie mo fakamatelie kiate kinautolu ʻoku nofo ʻi hono falé. ʻOku kau ki ai ʻa hono hoa malí mo ha niʻihi ʻokú ne tauhi nai ko ha kāinga Kalisitiane ʻoku nau nofo ʻi hono ʻapí. (1 Tīmote 5:8) Ko hono fai ʻa e pule lelei peheé ko e taha ia ʻo e ngaahi fie maʻu kuo pau ke aʻusia ʻe he tangata kuo fakanofo ke ne fua fatongia ko e toko taha mātuʻa ʻi he fakatahaʻangá. Ko ia ai, ʻoku totonu leva ke fēfē ʻa e vakai ʻa e kau tangata matuʻotuʻa fakalaumālié ki honau ngaahi fatongia ko e monū ʻi he fakatahaʻangá?
Pule “ke Fakamātoato ʻEne Fai Ia”
9. Ko e hā ʻa e anga ʻo e fakakaukau ʻoku totonu ke maʻu ʻe he kau mātuʻa Kalisitiané ki he ngāue kuo vaheʻi kiate kinautolú?
9 ʻI he ʻuluaki senituli ʻo hotau Kuonga Lolotongá, naʻe ngāue ʻa e ʻaposetolo ko Paulá ko e setuata ʻi he fale ʻo e ʻOtuá, ko e fakatahaʻanga Kalisitiané ko hono ʻulú ko Kalaisi. (ʻEfesō 3:2, 7; 4:15) Ko ia ai, naʻe akonaki ʻa Paula ki hono kaungātui ʻi Lomá: “Koia i he e tau maʻu ae gaahi foaki oku fai kehekehe, o tāu moe ofa kuo foaki kiate kitautolu, kabau koe kikite, tau fai ia o fakatatau mo hono lahi oe tui; Be koe tauhi, tau fai ae tauhi: be ko ia oku akonaki, ke fai ene akonaki; Be ko ia oku ekinaki, ke ne ekinaki: ko ia oku foaki, ke fai ia o agatotonu; ko ia oku bule, ke faa [“fakamātoato ʻene,” NW] fai ia; ko ia oku fai ofa, ke fai i he fiefie fai.”—Loma 12:6-8, PM.
10. ʻI hono tokangaʻi ʻa e fanga sipi ʻa e ʻOtuá, ko e hā ʻa e faʻifaʻitakiʻanga naʻe fokotuʻu ʻe Paula ki he kau mātuʻa ʻi he ʻaho ní?
10 Naʻe fakamanatu ʻe Paula ki he kakai Tesalonaiká: “Hange ko e fai ʻa ha tamai ki heʻene fanau aʻana, naʻe pehe ʻemau enginaki kimoutolu tāutaha, mo lotaki, mo tapou, ke mou laka ʻo tāu mo e ʻOtua, ʻa ia ʻoku ne ui kimoutolu ke hu ki hono puleʻanga mo hono langilangi.” (1 Tesalonaika 1:1; 2:11, 12) Naʻe fai ʻa e enginakí ʻi ha founga anga-ʻofa ko ia naʻe lava ai ke tohi ʻa Paula: “Naʻa mau ʻi homou lotolotonga ʻo angalelei pe; hange tofu pe ha fefine toutama ʻa ia ʻoku ne tauhi siʻene fanau aʻana, pehe ʻi heʻemau ʻofauʻuuʻu kiate kimoutolu naʻa mau fakaʻamu ke ʻatu, ʻo ʻikai ko e Kosipeli pe ʻa e ʻOtua, ka ko siʻemau moʻui foki—kae fēfē, he ne mou hoko ko homau ʻofaʻanga.” (1 Tesalonaika 2:7, 8) ʻI he fehoanaki mo e faʻifaʻitakiʻanga fakaetamai ʻa Paulá, ko e kau tangata matuʻotuʻa fakalaumālie mo mateakí ʻoku nau tokanga lahi kiate kinautolu kotoa pē ʻi he fakatahaʻangá.
11. ʻE lava fēfē ke fakahāhā ʻe he kau mātuʻa kuo fakanofó ʻa e loto-vēkeveke?
11 Kuo pau ke hā ʻa e fakaalaala fakataha mo e loto-vēkeveke ʻi he tataki anga-ʻofa ʻoku ngāueʻaki ʻe he kau tauhi-sipi Kalisitiane anga-tonú. ʻOku fakahā ʻe honau angá ʻa e meʻa lahi. Naʻe akonakiʻi ʻe Pita ʻa e kau mātuʻá ke nau tauhi ʻa e fanga sipi ʻa e ʻOtuá “ʻo ʻoua naʻa fai fakakoloto” pe “ko e sio paʻanga ʻuli.” (1 Pita 5:2) ʻI he fekauʻaki mo e poini ko ʻení, naʻe fakahā ʻa e fakatokanga ʻe he tangata mataotao ko William Barclay, ʻo ne tohi: “ʻOku ʻi ai ʻa e founga hono tali ha tuʻunga mafai mo hono fai ha ngāue ʻo hangē ko ha ngāue ia ʻoku matamatakovi mo taʻe fakafiemālie, ʻo hangē ko ha meʻa fakahela ia, ʻo hangē ko ha kavenga ke fisiʻia ki ai. ʻOku lava ke kole ki ha tangata ke ne fai ha faʻahinga meʻa, pea ke ne fai ia, ka te ne fai fakapāpākū ia ʻo hoko ʻo taʻe ʻaonga ai ʻa e ngāué. . . . Ka naʻe pehē [ʻe Pita] ʻoku totonu ki he kau Kalisitiane kotoa pē ke fiefia tetetete ke fai ʻa e ngāué ki heʻene malavá, neongo ʻokú ne ʻilo lelei ʻa ʻene taʻe feʻunga ke fai iá.”
Kau Tangata ʻOku Nau Fai Loto-Fiefai ʻa e Ngāue Tauhi-Sipí
12. ʻE lava fēfē ke fakahāhā ʻe he kau mātuʻa Kalisitiané ʻa e ngāue loto-fiefai?
12 Naʻe toe naʻinaʻi mai ʻe Pita: “Tauhi ʻa e fanga sipi ʻa e ʻOtua ʻoku ʻiate kimoutolu . . . ʻi he loto fiefai.” Ko ha ʻovasia Kalisitiane ʻokú ne tokangaʻi ʻa e fanga sipí ʻokú ne fai loto-fiefai ia, ʻi hono loto tauʻatāina pē ʻoʻona, ʻi he tataki ʻa e Tauhi Lelei, ko Sīsū Kalaisí. ʻOku toe ʻuhinga ʻa e ngāue tauhi loto-fiefaí ke fakamoʻulaloa ʻa e tauhi-sipi Kalisitiané ki he tuʻunga mafai ʻo Sihová, ‘ko e tauhi-sipi mo e ʻovasia ʻo hotau soulu.’ (1 Pita 2:25) Ko ha Kalisitiane ko e tauhi-sipi tokoní ʻokú ne loto-fiefai ke fakahāhā ʻa ʻene ʻapasia ki he fokotuʻutuʻu fakateokalatí. ʻOkú ne fai ʻeni ʻi heʻene tataki ʻa kinautolu ʻoku fie maʻu ha akonakí ki he Folofola ʻa e ʻOtuá, ko e Tohi Tapú. Neongo ʻe tokoni ʻa e taukeí ke tuku tauhi ʻe he toko taha mātuʻá ʻa e ngaahi akonaki fakatuʻunga mei he Tohi Tapú ʻi hono ʻatamaí, ka ʻoku ʻikai ke ʻuhinga ai ʻeni ia te ne ʻilo leva ha fakaleleiʻanga faka-Tohitapu ki he faʻahinga palōpalema kotoa pē. Neongo te ne ʻilo ʻa e tali ki ha fehuʻi, te ne ʻilo ʻoku fakapotopoto ange ke vakai fakataha mo e toko taha naʻá ne ʻeke ʻa e fehuʻí ki he Watch Tower Publications Index pe ko ha faʻahinga tohi fakahokohoko pehē. ʻOkú ne faiako leva ʻi he founga ʻe ua: ʻOkú ne fakahāhā ʻa e founga ke maʻu ai ha fakamatala ʻaongá mo fakahā ʻa e ʻapasia anga-fakatōkilalo kia Sihova ʻaki ʻene fakahanga ʻa e tokangá ki he ngaahi tohi kuo pulusi ʻe he kautaha ʻa e ʻOtuá.
13. Ko e hā ʻa e ngaahi meʻa ʻe malava ke fai ke tokoni ki he kau mātuʻá ke nau fai ha faleʻi lelei?
13 Ko e hā ʻa e meʻa ʻe malava ke fai ʻe ha toko taha mātuʻa kapau kuo teʻeki ai ke hā ha fakamatala ʻi he ngaahi tohi ʻa e Sosaieté ʻo kau ki ha faʻahinga palōpalema ʻoku lolotonga fie maʻu ha tokoni ki ai? ʻOku ʻikai ha veiveiua, te ne lotu ke maʻu ʻa e fakamaama pea te ne fekumi ki ha ngaahi tefitoʻi moʻoni faka-Tohitapu ʻoku kaunga ki he meʻa ko iá. Te ne toe ʻilo ʻe ʻaonga nai ke fokotuʻu atu ki he toko taha ʻokú ne fie maʻu ʻa e tokoní ke ne fakakaukau ki he faʻifaʻitakiʻanga ʻa Sīsuú. ʻE ʻeke ange nai ʻe he toko taha mātuʻá: “Kapau ko Sīsū, ko e Faiako Lahi Tahá, naʻe ʻi he tuʻunga ʻokú ke ʻi aí, ʻokú ke fakakaukau ko e hā ʻa e meʻa te ne faí?” (1 Kolinitō 2:16) Ko e faʻahinga fakakaukau pehē ʻe tokoni nai ki he toko taha ko iá ke ne fai ha fili fakapotopoto. Ka ʻe fuʻu taʻe fakapotopoto ki ha toko taha mātuʻa ke ne fakahā haʻane fakakaukau pē ʻaʻana ʻo ʻai ke hangē ko ha akonaki faka-Tohitapu ia! Ka, ʻe lava ke fetalanoaʻaki ʻa e kau mātuʻá ʻiate kinautolu ʻo kau ki he ngaahi palōpalema faingataʻá. Te nau ʻomai nai ha meʻa mahuʻinga ke fai ha fetalanoaʻaki ki ai ʻi ha fakataha ʻa e kulupu ʻo e kau mātuʻá. (Palōvepi 11:14) ʻE tokoni ʻa e ngaahi fili kuo nau faí ke nau lea loto-taha kotoa.—1 Kolinitō 1:10.
ʻOku Mātuʻaki Mahuʻinga ʻa e Anga-Malū
14, 15. Ko e hā ʻa e meʻa ʻoku fie maʻu ke fai ʻe he kau mātuʻá ʻi heʻenau fakatonutonu ha Kalisitiane ‘kuó ne fai ha hala ki muʻa peá ne toki ʻiloʻi ia’?
14 ʻOku fie maʻu ke fakahāhā ʻe ha toko taha mātuʻa Kalisitiane ʻa e anga-malū ʻi heʻene akoʻi ʻa e niʻihi kehé, kae tautefito ʻi heʻene akonakiʻi kinautolú. Naʻe akonaki mai ʻa Paula: “Ngaahi tokoua, neongo ʻe tō ha tangata ki ha laka hala ki muʻa peá ne toki ʻiloʻi ia, feinga kimoutolu ʻoku mou maʻu ʻa e tuʻunga fakalaumālie ʻoku taaú ke fakatonutonu ha tangata pehē ʻaki ʻa e loto anga-malū.” (Kalētia 6:1, NW) Ko e meʻa ʻoku fakatupu tokangá, ko e foʻi lea faka-Kalisi ko ʻeni ʻoku liliu ko e “fakatonutonu” ʻoku lave ki he foʻi lea fakatōketā naʻe ngāueʻaki ke fakamatalaʻi hano fokotuʻu ʻo ha hui ke ne taʻofi ha faingataʻaʻia ʻi he toenga ʻo e moʻuí. ʻOku fakafelāveʻi ʻe ha tangata ʻetita tikisinale ko W. E. Vine ʻa e meʻá ni ki he toe fakafoki ʻoku fai “ʻe kinautolu ʻoku fakalaumālié ki ha taha kuo fai angahala, pea ko e toko tahá ni ʻoku hangē ha kupu ʻo e sinó kuo homo mei he sino fakalaumālié.” Ko e ongo liliu kehe ʻo e meʻá ni ko e, “ke toe fakafoki ki he tuʻunga totonu; ke fakahangatonu.”
15 ʻOku ʻikai ke faingofua ke fakatonutonu ʻete fakakaukau pē ʻaʻatá, pea ʻe toe fuʻu faingataʻa ange nai ke fakatonutonu ki he tuʻunga totonú ʻa e fakakaukau ʻa ha taha kuo faihala. Ka ʻi hono fai ʻa e tokoní ʻi he loto anga-maluú ʻoku hangehangē ʻe tali ia ʻi he loto-hounga. Ko ia ai, ʻoku totonu ke tokaʻi ʻe he kau mātuʻa Kalisitiané ʻa e akonaki ʻa Paulá: “Mou ai, . . . ae manavaofa, moe agalelei, moe loto agavaivai, moe agamalu, moe kataki fuoloa.” (Kolose 3:12, PM) Ko e hā ʻa e meʻa ʻoku totonu ke fai ʻe he kau mātuʻá ʻi hono fie maʻu ʻa e fakatonutonu ki ha taha ʻokú ne maʻu ʻa e anga ʻo e fakakaukau ʻoku koví? ʻOku totonú “ke tuli . . . ki he angavaivai [“anga-malū,” NW].”—1 Tīmote 6:11.
Fai ʻa e Ngāue Fakatauhisipí ʻAki ʻa e Tokanga
16, 17. Ko e hā ʻa e faʻahinga fakatuʻutāmaki ʻoku totonu ke tokanga ʻa e kau mātuʻá naʻa nau tō ki ai ʻi hono fai ha akonaki ki he niʻihi kehé?
16 ʻOku toe lahi ange ʻa e meʻa ʻoku kau ki he akonaki ʻa Paula ʻi he Kalētia 6:1, (NW). Naʻá ne naʻinaʻi ki he kau tangata taau fakalaumālié: “Feinga . . . ke fakatonutonu ha [toko taha faihala] ʻaki ʻa e loto anga-malū; pea ke tokanga kiate koe, naʻa toe ʻahiʻahiʻi mo koe foki.” Ko ha ngaahi nunuʻa mafatukituki ē ʻe lava ke hoko ʻo kapau ʻe taʻe tokaʻi ʻa e akonaki ko ʻení! ʻI hono langaʻi hake eni ʻe ha fakamatala ʻo kau ki ha faifekau ʻIngilani naʻe halaia ʻi he fai tono mo e toko ua ʻo e kāinga lotú, naʻe pehē ʻe he The Times ʻo Lonitoní “ko ha tuʻunga eni kuo hoko maʻu pē: ʻi hono fai ha akonaki, kuo tō ai ki he angahalá ha tangata fai akonaki ʻoku hā hangē ha tamaí pe ha tuongaʻané koeʻuhi ko e falala kiate ia ʻa kinautolu ʻokú ne akonakiʻí.” Pea naʻe lave ʻa e toko taha faiongoongo naʻá ne hiki ʻa e fakamatala ki he lave ʻa e Tōketā ko Peter Rutter ʻo pehē: “Ko e faʻa mohe ʻa e kau kumi faleʻí mo e kau tangata fai akonaki ʻoku nau falala ki aí—ko e kau tōketaá, kau loea, kau pātele, mo e kau pule ngāué—kuo hoko ia ʻi he anga ʻo ʻetau nofo ʻoku tauʻatāina ʻi he meʻa fekauʻaki mo e fehokotaki fakasinó ʻo hangē ha mahaki tō ʻoku ʻikai ke lāuʻilo ki ai, ʻoku fakatupu maumau pea ko e meʻa fakamā.”
17 ʻOku ʻikai totonu ke tau pehē ʻoku ʻatā ʻa e kakai ʻa Sihová mei he faʻahinga fakatauele peheé. Ko ha toko taha mātuʻa ʻe taha naʻe tokaʻi ʻa ia naʻá ne ngāue anga-tonu he ngaahi taʻu lahi, ne hoko ʻo kau ki he ʻulungāanga taʻe taau koeʻuhi naʻá ne fai ʻa e ngaahi ʻaʻahi fakatauhisipi ki ha tuofefine ʻosi mali ʻi he taimi naʻe toko taha ai pē ʻi ʻapi ʻa e tuofefiné ni. Neongo ʻene fakatomalá, naʻe mole mei he tokoua ko ení ʻa e ngaahi monū kotoa ʻo e ngāué. (1 Kolinitō 10:12) Ko ia, ʻe lava fēfē ke fai ʻa e ngaahi ʻaʻahi fakatauhisipí ʻe he kau tangata matuʻotuʻa fakalaumālie kuo fakanofó ʻi ha founga ʻe ʻikai te nau tō ai ki ha fakatauele? ʻE lava fēfē ke nau fokotuʻutuʻu ke ʻi ai ha tuʻunga mavahe, ke lotu pea ke maʻu ha faingamālie ke vakaiʻi ʻa e Folofola ʻa e ʻOtuá mo e ngaahi tohi faka-Kalisitiané?
18. (a) ʻE lava fēfē ke tokoni ki he kau mātuʻá ʻa hono ngāueʻaki ʻa e tefitoʻi moʻoni ko e tuʻunga-ʻulú ke taʻofi ke ʻoua ʻe aʻu ki ha tuʻunga ongoongo kovi nai? (e) Ko e hā ʻa e fokotuʻutuʻu ʻe malava ke fai ʻi hono fai ha ʻaʻahi fakatauhisipi ki ha tuofefine?
18 Ko e meʻa ʻe taha ke fakakaukau ki ai ʻa e kau mātuʻá ko e tefitoʻi moʻoni ko e tuʻunga-ʻulú. (1 Kolinitō 11:3) Kapau ʻe fekumi ha taha kei talavou ki ha tataki, feinga ke fakakau ʻa ʻene ongo mātuʻá ʻi he fetalanoaʻakí, ʻo ka faingamālie. ʻI he kole tokoni fakalaumālie ha tuofefine ʻosi mali, te ke malava ʻo fokotuʻutuʻu ke ʻi ai ʻa hono husepānití he lolotonga ʻa e ʻaʻahi ki aí? Fēfē kapau ʻe ʻikai pē ke malava ia pe ko e husepāniti taʻe tui ia ʻa ia kuó ne faʻa ngaohikoviʻi hono uaifí ʻi ha faʻahinga founga? Pea fai leva ʻa e fokotuʻutuʻu tatau ʻa ia te ke fai ʻi haʻo fai ha ʻaʻahi fakatauhisipi ki ha tuofefine teʻeki ai ke mali. ʻE fakapotopoto ki ha ongo tokoua taau fakalaumālie ke na ʻaʻahi fakataha ki he tuofefiné. Kapau ʻoku ʻikai lava ke fai pehē, mahalo pē ʻe lava ke fili ha taimi feʻunga ke fai ha fetalanoaʻaki mo e tuofefiné ʻe ha tokoua ʻe toko ua ʻi he Kingdom Hall, kae fai ʻi ha loki mavahe mei he ngaahi tokouá. ʻI he ofi ai ʻa e ngaahi tokouá mo e ngaahi tuofāfiné ʻi loto falé, neongo ʻe ʻikai ke malava ke nau sio pe fanongo ki he fetalanoaʻakí, ʻoku ngalingali ʻe taʻofi ai ha hoko ʻa ha faʻahinga fakatūkia.—Filipai 1:9, 10.
19. Ko e hā ʻa e ola lelei ʻoku iku ki ai ʻi hono fai loto-fiefai ʻa e ngāue fakatauhisipi ki he fanga sipi ʻa e ʻOtuá, pea ko hai ʻoku tau fakahāhā ki ai ʻa e loto-hounga koeʻuhi ko e kau tangata ʻoku nau fai loto-fiefai ʻa e ngāue tauhi-sipí?
19 ʻOku iku ʻa hono fai loto-fiefai ʻa e ngāue fakatauhisipi ki he fanga sipi ʻa e ʻOtuá ki he ngaahi ola lelei—ko e takanga mālohi fakalaumālie, ʻoku lelei hono tatakí. Hangē pē ko e ʻaposetolo ko Paulá, ʻoku tokanga lahi ki he kaungātuí ʻa e kau mātuʻa Kalisitiane ʻi he ʻaho ní. (2 Kolinitō 11:28) ʻOku tautefito ʻa e mamafa ʻo e fatongia ke ngāue fakatauhisipi ki he kakai ʻa e ʻOtuá ʻi he taimi faingataʻa ko ʻení. Ko ia ai, ʻoku tau houngaʻia moʻoni ki he ngāue lelei kuo fai ʻe hotau ngaahi tokoua ʻoku nau ngāue ko e kau mātuʻá. (1 Tīmote 5:17) Koeʻuhi ko ʻetau maʻu ʻa e ngaahi “meʻaʻofa ko e kau tangata” ʻa ia ʻoku nau fai loto-fiefai ʻa e ngāue tauhi-sipí, ʻoku tau ʻoatu ai ʻa e fakamālō ki he Toko Taha Foaki ʻo e ngaahi “foaki lelei kotoabe moe foaki haohaoa kotoabe,” ko hotau Tauhi-sipi anga-ʻofa fakahēvaní, ko Sihova.—ʻEfesō 4:8, NW; Sēmisi 1:17, PM.
Ko e Hā Haʻo Tali?
◻ ʻE lava fēfē ke pule lelei ha tangata ki hono fale ʻoʻoná?
◻ Ko e hā ʻa e ngaahi ʻulungāanga ʻoku totonu ke hā mei he tataki ʻa e kau mātuʻa Kalisitiané?
◻ ʻE lava fēfē nai ke fakahāhā ʻe he kau mātuʻá ʻenau anga-fakatōkilalo mo anga-malū ʻi hono fai ʻa e akonakí?
◻ Ko e hā ʻa e meʻa ʻe tokoni ke ola lelei ai ʻa e fakatonutonu fakalaumālié?
◻ ʻE lava fēfē ke taʻofi ʻe he kau mātuʻá ke ʻoua ʻe aʻu ki ha tuʻunga ongoongo kovi nai ʻi hono fai ʻa e ngāue fakatauhisipi ki he fanga sipí?
[Fehuʻi ki he Ako]
[Fakatātā ʻi he peesi 70]
Kuo pau ke pule lelei ʻe ha toko taha mātuʻa Kalisitiane ki hono fale ʻoʻoná
[Fakatātā ʻi he peesi 71]
ʻOku totonu ke fai ʻa e ngāue tauhi-sipi faka-Kalisitiané ʻi he anga-malū mo e fakakaukau lelei