“Ui Ange ʻa e Kau Matuʻa”

“ʻOku ʻi ai hamou taha ʻoku mahaki? ke ne ui ange ʻa e kau matuʻa ʻo e siasi.”​—SEMISI 5:14.

 1, 2. (a) Ko e hā ʻa e tuʻunga fakatuʻutāmaki kuo aʻusia ʻe he kau sevāniti ʻa Sihová he taimi ní, pea ʻe fēfē nai ʻenau ongoʻí? (e) Ko e hā ʻa e ongo fehuʻi ʻoku fie maʻu ke maʻu ha ngaahi tali ki ai?

 KO E “ngaahi taimi faingataʻa” ʻeni kuo hoko. Ko e tōʻonga ʻa e kakaí ko e siokita, ʻofa ki he meʻa fakamatelié, loto-mahikihiki, ʻo nau faʻa fakatupunga ʻa e taʻe manonga ʻi he “kuonga fakamui” ko ʻení. (2 Tīmote 3:​1-5) ʻI hotau tuʻunga ko e kau Kalisitiane ʻoku tau moʻui he lotolotonga ʻo e ngaahi meʻa fulikivanu ʻoku tuʻu ní, ʻoku tau fehangahangai mo e ngaahi meʻa ngali fakatuʻutāmaki lahi ʻe tolu: ko Sētane ko e Tēvoló, ko e māmani ʻo e kakai anga-taʻefakaʻotuá, pea mo ʻetau hehema angahala kuo tukufakaholo maí.​—Loma 5:12; 1 Pita 5:8; 1 Sione 5:19.

² ʻI he fakamanamana mai ʻa e ngaahi meʻa fakatuʻutāmaki lahi ko ʻení, te tau ongoʻi taulōfuʻu nai ʻi ha taimi ʻe niʻihi. Ko ia ai, te tau malava ke maʻu mei fē ha poupou ke tokoniʻi kitautolu ke tau kātaki ʻi he anga-tonu? Ko hai te tau hanga ki ai ke maʻu ʻa e tataki ʻi heʻetau fehangahangai mo e fie maʻu ke fai ʻa e ngaahi fili ʻo kau ki heʻetau ngaahi ngāue faka-Kalisitiané mo ʻetau lotú?

Tokoni ʻE Lava ke Maʻu

 3. Ko hai ʻe maʻu mei ai ha fakafiemālie fakanonga, pea ʻoku anga-fēfē hono maʻú?

³ ʻOku tau maʻu ʻa e fakafiemālie fakanonga ʻi he ʻiloʻi ko Sihova ko e Matavai ia ʻo hotau mālohí. (2 Kolinitō 1:​3, 4; Filipai 4:13) Ko e tangata tohi-sāme ko Tēvitá, ʻa ia naʻá ne hokosia ʻa e tokoni  mei he ʻOtuá, naʻá ne lea ʻo pehē: “Tekaki kia Sihova ho ʻalunga; ʻio falala ki ai, pea te ne fai ʻe ia.” “Li hoʻo kavenga kia Sihova, he te ne poupou koe ʻe ia: ʻe ʻikai te ne tuku ʻa e maʻoniʻoni ke ueʻia ʻo taʻengata.” (Sāme 37:5; 55:22) Ko ha loto-hounga lahi ē ke tau maʻu ha poupou pehē!

 4. Ko e hā ʻa e fakafiemālie naʻe fakahā fakatouʻosi mai ʻe Pita mo Paula?

⁴ Te tau toe malava foki ke maʻu ha fiemālie mei he ʻiloʻi ʻoku ʻikai ko kitautolu pē ʻoku tau fehangahangai mo e ngaahi ʻahiʻahí mo e ngaahi faingataʻá. Naʻe naʻinaʻi ʻe he ʻaposetolo ko Pitá ki he kaungā-Kalisitiané: “ʻA ia ke mou talitekeʻi [ʻa Sētane ko e Tēvolo], he tuʻu maʻumaʻuluta he tui; mo mou ʻilo ʻoku tatau ʻaupito mo e ngaahi mamahi na ʻa e ngaahi meʻa ʻoku moʻua ai homou faʻahinga ʻi mamani.” (1 Pita 5:9) ʻOku pau, ʻoku loto ʻa e kau Kalisitiane kotoa pē ke tuʻumaʻu ʻi he tuí. Ko e moʻoni, te tau faʻa ongoʻi ʻa e “fetekeekina . . . mei he potu kotoa pe,” ʻo hangē ko e ʻaposetolo ko Paulá. Ka, naʻe ʻikai te ne “ʻefituʻua.” Hangē ko iá, te tau puputuʻu nai “kae ʻikai hē ʻaupito.” Neongo ka fakatangaʻi kitautolu, “kae ʻikai liʻekina.” Kapau “ko e teʻia,” ʻoku “ʻikai fakamate” kiate kitautolu. Ko ia ai, “ʻoku ʻikai te [tau] foʻi.” ʻOku tau feinga ke ʻai hotau matá ke “ʻikai te [tau] tokangaʻi ʻa e ngaahi meʻa ʻoku ha ni, ka ko e ngaahi meʻa ʻoku ʻikai ha.” (2 Kolinitō 4:​8, 9, 16, 18) ʻE lava fēfē ke tau fai ʻa e meʻá ni?

 5. Ko e hā ʻa e tokoni lōtolu ʻoku tokonaki mai ʻe Sihová?

⁵ ʻOku tokonaki mai ʻe Sihova, ʻa ia “oku [ne] ogoʻi ae lotu,” ʻa e tokoni lōtolu. (Sāme 65:​2, PM; 1 Sione 5:14) ʻUluaki, ʻokú ne foaki mai ʻa e tataki ʻo fakafou mai ʻi heʻene folofola fakamānavaʻi, ko e Tohi Tapú. (Sāme 119:105; 2 Tīmote 3:16) Ko hono uá, ʻoku fakaiviʻi kitautolu ʻe hono laumālie māʻoniʻoní ke tau fai hono finangaló. (Fakafehoanaki mo Ngāue 4:​29-31.) Pea ko hono tolú, ʻoku tuʻu mateuteu ʻa e kautaha ʻa Sihova ʻi he māmaní ke tokoniʻi kitautolu. Ko e hā ʻa e meʻa kuo pau ke tau faí ke maʻu ʻa e tokoní?

“Gaahi Foaki ki he Kakai” ko e Kau Tangata

 6. Ko e hā ʻa e tokoni naʻe tokonaki mai ʻe Sihova ʻi Tapelá, pea ʻi he founga fē?

⁶ Ko e meʻa naʻe hoko ʻi he taimi ʻo e palōfita ko Mōsesé te ne tokoniʻi kitautolu ke tau houngaʻia ʻi he tokanga anga-ʻofa ʻa Sihova ʻo tokonaki ʻa e tokoni ki Heʻene kau sevānití. Naʻe hoko ʻeni ʻi Tapela, ʻoku ʻuhinga ia ki he “vela; afi; ulo.” ʻI he feituʻu ko ʻeni ʻi he toafa ko Sainaí, naʻe fakatupunga ʻe he ʻOtuá ʻa e afi ke vela ki he kau ʻIsileli faʻa lāungá. “Bea koe kakai iate kinautolu mei he botu kehekehe” ʻa ia naʻa nau haʻu fakataha mo e kakai ʻIsileli mei ʻIsipité naʻa nau kau mo kinautolu ʻi he fakahāhā ʻo e taʻe fiemālie ki he meʻakai naʻe tokonaki ʻe he ʻOtuá. ʻI he fakatokangaʻi ʻe Mōsese ʻa e houhau ʻa e ʻOtuá mo lōmekina ia ʻe he fatongia ki he kakaí mo ʻenau ngaahi fie maʻú, naʻe tangi hake ʻa Mōsese: “Oku ikai teu malohi keu fua toko taha be ae kakai ni, koeuhi oku nau mamafa fau kiate au. Bea kabau te ke fai behe kiate au, oku ou kole atu ki hoo afio ke ke tamateʻi leva au mei ho nima, o kabau oku ou iloa ae ofa i ho ao; kae oua e tuku au keu mamata ki hoku mamahi.” (Nōmipa 11:​1-15, PM) Ko e hā ʻa e tali ʻa Sihová? Naʻá ne fakanofo “ae kau tagata e toko fitugofulu i he kau mātua o Isileli” peá ne ʻai hono laumālié kiate kinautolu ke nau malava feʻunga ke kaungākau mo Mōsese ʻi hono tokangaʻi ʻo e ngāué. (Nōmipa 11:​16, 17, 24, 25, PM) ʻI hono fili ʻa e kau tangata taau peheé, naʻe ala maʻu ange ai ʻa e tokoni ki he kakai ʻIsilelí pea mo e “gaahi kakai kehe toko lahi.”​—ʻEkisoto 12:​38, PM.

 7, 8. (a) Naʻe anga-fēfē hono tokonaki mai ʻe Sihova ʻa e “gaahi mea foaki ki he kakai” ko e kau tangata ʻi ʻIsileli ʻo e onoʻahó? (e) Ko e hā ʻa e lave naʻe fai ʻe Paula ki he Sāme 68:18 ʻi he ʻuluaki senitulí?

⁷ ʻI he ʻosi ha ngaahi taʻu lahi ʻo e nofo ʻa e kakai ʻIsilelí ʻi he Fonua ʻo e Talaʻofá, naʻe hāʻele hake ʻa Sihova ʻi he tuʻunga fakaefakatātā ki he Moʻunga Saioné ʻo ne ʻai ʻa Selūsalema ko e kolomuʻa ia ʻo e puleʻangá pea hoko ʻa Tēvita ko hono tuʻi. ʻI hono fakahīkihikiʻi ʻa e ʻOtuá, ko e toko taha “Mafimafi,” naʻe hiki hake ʻe Tēvita hono leʻó ʻo ne hiva: “Kuo ke haele hake ki oluga, kuo ke taki bobula ae fakabobula: kuo ke maʻu ae gaahi mea foaki ki he kakai [“ko e kau tangata,” NW].” (Sāme 68:​14, 18, PM) Ko e moʻoni, ko e kau tangata naʻe taki pōpula lolotonga hono ikuna ʻo e Fonua ʻo e Talaʻofá naʻa nau malava ke tokoni ki he kau Līvaí ʻi honau ngaahi fatongiá.​—ʻĒsela 8:20.

⁸ ʻI he ʻuluaki senituli T.S., naʻe fakahanga ʻe he ʻaposetolo Kalisitiane ko Paulá ʻa e tokangá ki he fakahoko fakaekikite ʻo e ngaahi lea ʻa e tangata tohi-sāmé. Naʻe tohi ʻe Paula: “Ka kuo foaki kiate kitautolu taki taha kotoabe ae ofa, o  fakatatau ki hono lahi oe foaki a Kalaisi. Koia oku ne behe ai, I he ene alu hake ki oluga, naa ne taki bobula ae fakabobula, o ne atu ae gaahi foaki ki he kakai [“ko e kau tangata,” NW]. (Bea ko ene alu hake, koeha ia ka koeuhi nae tomua alu hifo ia ki he gaahi botu i mama ki lalo ni? Ko ia naa ne alu hifo, ko ia ia foki naa ne alu hake o maoluga lahi aubito i he gaahi lagi kotoabe, koeuhi ke ne fakafonu ae gaahi mea kotoabe).” (ʻEfesō 4:​7-10, PM) ʻOku ʻuhinga ʻa e “ko ia” kia hai? ʻOku ʻikai mo ha toe taha ka ko e fakafofonga ʻo Sihová, ko e Tēvita Lahi Ange mo e Tuʻi faka-Mīsaiá, ko Sīsū Kalaisi. Ko e toko taha ia naʻe fokotuʻu ʻe he ʻOtuá mei he pekiá peá ne hakeakiʻi “o lahi aubito.”​—Filipai 2:​5-11, PM.

 9. (a) Ko hai ʻa e ngaahi meʻaʻofa ko e kau tangata ʻi he ʻuluaki senitulí? (e) Ko hai ʻa e ngaahi meʻaʻofa ko e kau tangata ʻi onopooní?

⁹ Ko hai leva, ʻa kinautolu “ae gaahi foaki ki he kakai” ko e kau tangata (pe “ʻoku faʻu ʻaki ʻa e kau tangata”)? Naʻe fakamatala ʻa Paula ʻo pehē ko e Fakafofonga Pule ʻa e ʻOtuá ne “foaki pe ʻe ia ha niʻihi ʻoku aposetolo, ha niʻihi ʻoku palofita, ha niʻihi ʻoku evangelio, ha niʻihi ʻoku tauhi mo faiako: koeʻuhi ke ʻosi sāuni ʻa e kakai lotu maʻa e ngaue tokoni, moʻo langa hake ʻa e sino ʻo Kalaisi.” (ʻEfesō 4:​11, 12) Ko e kotoa ʻo e kau muimui ʻo Kalaisí naʻa nau ngāue ʻi he tuʻunga ko e kau ʻaposetolo, kau palōfita, kau ʻevangeliō, kau tauhi, mo e faiako naʻa nau fai ia ʻi he tataki fakateokalatí. (Luke 6:​12-16; Ngāue 8:12; 11:​27, 28; 15:22; 1 Pita 5:​1-3) ʻI hotau ʻahó ni, ʻoku fai tauhi ʻa e kau tangata matuʻotuʻa fakalaumālie ʻa ia kuo fakanofo ʻe he laumālie māʻoniʻoní ʻi he tuʻunga ko e kau ʻovasia ʻi he ngaahi fakatahaʻanga ʻe 70,000 nai ʻo e Kau Fakamoʻoni ʻa Sihová ʻi māmani lahi. Ko kinautolu ia ʻa e ngaahi foaki pe meʻaʻofa ko e kau tangata kiate kitautolú. (Ngāue 20:28) ʻI he vave ʻa e tupu ʻo e ngāue fakamalanga ʻo e Puleʻangá ʻi māmani lahí, ʻoku tokolahi mo toe tokolahi ange ʻa e ngaahi tokoua ʻoku nau “kakapa atu” mo fua ʻa e ngaahi fatongia ʻa ia ʻoku kau ki he “tuʻunga ko e ʻovasia.” (1 Tīmote 3:1, NW) ʻI hono fakanofo kinautolú kuo nau hoko leva ai ko e ngaahi meʻaʻofa ko e kau tangata.

10. Naʻe fēfē hono fakamatalaʻi ʻe ʻAisea ʻa e kau “pilinisi,” ʻo feʻunga mālie mo e ngafa ʻo e kau mātuʻa Kalisitiane he ʻaho ní?

¹⁰ Ko e kau mātuʻa Kalisitiané ni, pe ngaahi meʻaʻofa ko e kau tangata ko ení, ʻoku nau feʻunga mālie mo e fakamatala ʻa e palōfita ko ʻAiseá ʻi heʻene kikiteʻi ʻa e ngafa ʻo e kau “houʻeiki [“pilinisi,” NW],” ko e kau tokangaʻi ʻo e ngāué ʻi he pule mai ʻa e Puleʻangá. Kuo pau ke hoko ʻa e toko taha taki taha ke “hange ha fakaū mei he matangi, mo e toitoiʻanga mei he ʻalotamaki, hange ko e ngaahi mangaʻi vai ʻi ha potu momoa, hange ko e malu ʻo ha makatuʻu kafakafa ʻi ha fonua puhengia.” (ʻAisea 32:​1, 2) ʻOku fakahā heni ʻoku totonu ke lahi ʻa e poupou mo e tataki anga-ʻofa ʻa e kau tangata kuo fakanofó. Te ke malava fēfē ke maʻu ʻa e ʻaonga lahi taha mei ai?

Ko Hono Tomuʻa Fai ʻe Kita ha Meʻa

11. ʻE anga-fēfē haʻatau maʻu ha tokoni ʻi he hoko ʻo vaivai hotau tuʻunga fakalaumālié?

¹¹ Ka melemo ha tangata ʻokú ne kaila leva ki ha tokoni. ʻOku ʻikai ke toe toumoua ia. ʻI he aʻu ʻa e moʻuí ki ha tuʻunga fakatuʻutāmaki, ʻoku ʻikai fie maʻu ke toki ueʻi ha taha ke ne ui ki ha tokoni. ʻIkai naʻe toutou ui ʻa e Tuʻi ko Tēvitá ki ha tokoni meia Sihova? (Sāme 3:4; 4:1; 5:​1-3; 17:​1, 6; 34:​6, 17-19; 39:12) ʻI he vaivai hotau tuʻunga fakalaumālié, ʻoku lōmia nai kitautolu ʻe he taʻe ʻi ai ha ʻamanakí, ʻoku tau hanga leva kia Sihova ʻi he lotu ʻo kole kiate ia ke tataki kitautolu ʻaki hono laumālie māʻoniʻoní. (Sāme 55:22; Filipai 4:​6, 7) ʻOku tau kumi ha fakafiemālie mei he Tohi Tapú. (Loma 15:4) ʻOku tau kumi ʻi he ngaahi tohi faka-Kalisitiane ʻa e Watch Tower Society ki ha ngaahi akonaki ʻe malava ke ngāueʻakí. ʻOku faʻa hoko ʻeni ke tau malava ai ke fakaleleiʻi ʻetau ngaahi palōpalemá ʻe kitautolu tonu. Ka, ʻo kapau ʻoku ngali lōmia kitautolu ʻe he ngaahi faingataʻá, te tau malava foki ke fekumi ki ha akonaki mei he kau mātuʻa kuo fakanofo ʻi he fakatahaʻangá. Ko hono moʻoní, ʻe ʻi ai nai ha ngaahi taimi ʻe mātuʻaki fie maʻu kiate kitautolu ke “ui ange ʻa e kau matuʻa.” Ko e hā ke ui ai ʻa e kau mātuʻa Kalisitiané? ʻE lava fēfē ke nau fai ha tokoni kiate kinautolu ʻoku fie maʻu ki ai ha tokoni fakalaumālié?

12-14. (a) Ko e hā ʻa e founga fakapotopoto ke muimui ki ai ʻo ka ʻi ai ha taha ʻe puke? (e) Fakatatau ki he tohi ʻa Sēmisi 5:​14, ko e hā ʻa e akonaki ʻoku fakahā ki he kau Kalisitiane ʻoku “mahaki” ke nau faí? (f) Ko e faʻahinga mahaki fēfē ʻoku lave ki ai ʻi he Sēmisi 5:​14, pea ko e hā ʻokú ke tali pehē aí?

¹² ʻI haʻatau hoko ʻo puke, ʻoku tau mālōlō koeʻuhi ke tuku ki hotau sinó ʻa e faingamālie ke toe fakaakeake. Ka ʻo ka hokohoko atu ʻetau puké  ʻoku fakapotopoto ke tau fekumi ki ha tokoni ʻa ha tōketā. ʻIkai ʻoku totonu ke tau fai pehē kapau te tau hoko ʻo vaivai fakalaumālie?

¹³ Fakatokangaʻi ʻa e akonaki ʻa e ākonga ko Sēmisí kiate kitautolu ʻo fekauʻaki mo e meʻá ni. Naʻá ne pehē: “ʻOku ʻi ai hamou taha ʻoku mahaki? ke ne ui ange ʻa e kau matuʻa ʻo e siasi; pea te nau lotua ia, ʻo tākai ʻaki ʻa e lolo ʻi he huafa ʻo e ʻEiki.” (Sēmisi 5:14) Ko e hā ʻa e faʻahinga mahaki naʻe ʻuhinga ki ai heni ʻa Sēmisí? ʻOku fakaʻosi ʻaki ʻe ha kau fakamatala Tohi Tapu ʻe niʻihi ʻo pehē ko e mahaki fakaesinó, he ʻoku nau pehē ko e pani ʻaki ʻa e loló ko e founga fakafaitoʻo ia naʻe lahi hono ngāueʻaki ʻi he ngaahi ʻaho ko iá. (Luke 10:34) ʻOku nau toe tui foki naʻe ʻi he fakakaukau ʻa Sēmisí ʻa e fakamoʻui fakaemana ʻo fakafou ʻi he foaki ʻofa ko e fakamoʻui mahakí. Ka, ko e hā ʻa e meʻa ia ʻoku fakahā ʻe he potutohí?

¹⁴ ʻOku fakafaikehekeheʻi heni ʻa e “loto fiefia” mo e “ngaohikovia.” ʻOku fakahā nai heni naʻe lāulea ʻa Sēmisi ki he puke fakalaumālie. (Sēmisi 5:13) Naʻe fie maʻu ke ui mai ʻa e “kau matuʻa ʻo e siasi,” kae ʻikai ko e kau tōketā pea naʻa mo kinautolu naʻa nau maʻu ʻa e foaki ʻofa ko e fakamoʻui mahaki fakaemaná. Pea ko e hā ʻenau meʻa ke faí? Naʻe pehē ʻe Sēmisi: “Pea te nau lotua ia. . . . Pea ko e lotu ʻa tui te ne fakamoʻui ʻa e mahaki.” (Sēmisi 5:​14, 15; fakafehoanaki mo Sāme 119:​9-16) Ko e fakamoʻoni fakamulituku ko e lave eni ʻa Sēmisi ki he puke fakalaumālié ko ʻene hanga ko ia ʻo fakalototoʻaʻi ke vete ʻa e ngaahi angahalá ʻi he fekauʻaki mo e ʻamanaki ke fakamoʻuí. Naʻá ne tohi: “Ko ia mou feveteʻaki hoʻomou ngaahi angahala, pea fehufiaʻaki; koeʻuhi ke mou moʻui.” Kapau naʻe fakatupunga ʻa e puke fakalaumālié ʻi hono fai ha angahala mamafa, ʻe ʻamanekina ʻe toe lelei pē ʻa e toko taha puké ʻo kapau ʻe lelei ʻa e anga ʻo ʻene tali ʻa e akonaki fakatuʻunga ʻi he Folofola ʻa e ʻOtuá, ʻo ne fakatomala, pea tafoki mei heʻene ʻalunga fai angahalá.​—Sēmisi 5:16; Ngāue 3:19.

15. Ko e hā ʻa e faʻahinga meʻa ke fai ʻoku fakahinohino mai ʻi he tohi ʻa Sēmisi 5:​13, 14?

¹⁵ ʻOku toe ʻi ai mo e meʻa ʻe taha ke fakatokangaʻi mei he akonaki naʻe fai ʻe Sēmisí. Ka ʻo ka ngaohikovia ha Kalisitiane ʻoku totonu ke ne “lotu pe.” Kapau ʻokú ne loto-fiefia, “ke ne fai ha hiva.” ʻI he tuʻunga taki taha​—tatau ai pē pe ʻoku ngaohikovia kita pe ʻokú te loto-fiefia​—ʻoku fie maʻu ke fai ha meʻa. ʻI he tafaʻaki ʻe tahá, ʻoku fie maʻu ke fai ha lotu, ʻi he tafaʻaki ʻe tahá, ke fakahāhā ʻa e fiefia. Ko ia, ko e hā ʻoku totonu ke tau ʻamanekina mei he ʻeke ʻe Sēmisi ʻa e fehuʻi: “ʻOku ʻi ai hamou taha ʻoku mahaki?” ʻOkú ne toe fakahinohino mai ha ngāue pau, ʻio, ko e tomuʻa fai ʻe kita ha meʻa. “Ke ne ui ange ʻa e kau matuʻa ʻo e siasi.”​—Sāme 50:15; ʻEfesō 5:19; Kolose 3:16.

Founga Tokoni “ʻa e Kau Matuʻa”

16, 17. Ko e hā ʻa e founga ʻoku tokoniʻi ai kitautolu ʻe he kau mātuʻá ke ngāueʻaki ʻa e ngaahi tefitoʻi moʻoni ʻo e Tohi Tapú?

¹⁶ ʻOku faingataʻa ʻi he taimi ʻe niʻihi ke tau ʻilo pe ko e hā ʻa e founga ke ngāueʻaki ai ʻa e ngaahi  tefitoʻi moʻoni ʻo e Tohi Tapú ki hotau tuʻunga fakafoʻituituí. Ko e meʻa ʻeni ʻoku hoko ai ʻa e kau mātuʻa Kalisitiané ko e maʻuʻanga ʻo e tokoni mahuʻinga taʻe mafakatataua. Ko e fakatātā, ʻoku nau lotua ha toko taha ʻoku puke fakalaumālie pea ‘pani ia ʻaki ʻa e lolo ʻi he huafa ʻo Sihová’ ʻaki ʻenau ngāueʻaki pōtoʻi ʻa e ngaahi fakahinohino fakafiemālie mei he Folofola ʻa e ʻOtuá. Ko ia ai, ʻe lava ʻe he kau mātuʻá ke fai ha tokoni lahi ki haʻatau fakaakeake fakalaumālie. (Sāme 141:5) ʻI he taimi lahi, ko e meʻa pē ʻoku fie maʻú ko e fakapapauʻi ʻoku tau fakakaukau ʻi he founga ʻoku totonu. Ko e fetalanoaʻaki mo ha taha ʻo e kau mātuʻa Kalisitiane taukeí te ne fakaongoʻimālohi ʻa ʻetau fakapapau ke fai ʻa e meʻa ʻoku totonú.​—Palōvepi 27:17.

¹⁷ ʻI hano fie maʻu ke fai ha ʻaʻahi, ʻoku fie maʻu ki he kau mātuʻa Kalisitiané ke nau lea “fakafiemalie ki he kau loto foi.” Pea te nau toe “boubou ae vaivai, ke [nau] faʻa katakiʻi kotoabe.” (1 Tesalonaika 5:​14, PM) ʻOku mahino ʻoku ʻi ai ʻa e ʻamanaki ʻe kakato ʻa e fakaakeake ʻo e tuʻunga fakalaumālié ʻi he ʻi ai ʻa e vahaʻangatae femahinoʻaki mo fekoekoeʻi pehē ʻi he vahaʻa ʻo e “kau matuʻa” mo e “kau vaivai.”

Fatongia Fakaekita mo e Lotu

18, 19. Ko e hā ʻa e ngafa ʻo e kau mātuʻa Kalisitiané ʻi he fekauʻaki mo e tohi Kalētia 6:​2, 5?

¹⁸ Kuo pau ke fua ʻe he kau mātuʻa Kalisitiané honau fatongia fekauʻaki mo e takanga ʻa e ʻOtuá. Kuo pau ke nau fai ʻa e poupou. Ko e fakatātā, naʻe pehē ʻe Paula: “Kainga, neongo pe ʻe puke nima ha taha lolotonga ʻene fai ha kovi; ka ko kimoutolu, ʻa e kau fakalaumalie, mou faitoʻo ki ha taha pehe ʻo angafakaalaala; pea ke vakai kiate koe naʻa ʻiloange ʻe ʻahiʻahiʻi mo koe foki. Mou fetoutou fefuaʻaki homou ngaahi mafaisiaʻanga: pea ʻi hoʻomou fai pehē, kuo mou ʻosiki ʻaupito ʻa e lao ʻa Kalaisi” Naʻe toe tohi ʻa e ʻaposetoló: “Kuo pau ke taki taha fua ʻene kavenga aʻana.”​—Kalētia 6:​1, 2, 5.

¹⁹ ʻE lava fēfē ke tau fefuaʻaki ʻa e ngaahi mafasiaʻangá ka ʻi he taimi tatau ke tau taki taha fua pē ʻetau kavenga? Ko e kií ko e ʻuhinga kehekehe ʻo e ongo foʻi lea faka-Kalisi naʻe liliu ko e “mafasiaʻanga” mo e “kavenga.” Ka aʻu ha Kalisitiane ki ha faingataʻaʻia fakalaumālie ʻa ia ʻe hoko ia ko ha mafasiaʻanga lahi kiate ia, ko e kau mātuʻa mo e niʻihi kehe ʻo e kaungātuí te nau tokoni kiate ia, ke ne fua hono “ngaahi mafasiaʻanga.” Kae kehe, ʻoku ʻamanekina ke ne fua pē ʻe ia ia ʻene “kavenga” ko hono fatongia ki he ʻOtuá. a ʻOku fiefia ʻa e kau mātuʻá ke nau fua ʻa e “ngaahi mafasiaʻanga” ʻo honau ngaahi tokouá ʻaki ʻa e fakalototoʻa, akonaki mei he Tohi Tapú, mo e lotu. Ka, ʻe ʻikai ke toʻo atu ʻe he kau mātuʻá ia ʻetau “kavenga” fakaekitautolu ko hotau fatongia fakalaumālié.​—Loma 15:1.

20. Ko e hā ʻoku totonu ai ke ʻoua ʻe fakatukutukuʻi ʻa hono fai ʻo e lotú?

²⁰ ʻOku mātuʻaki mahuʻinga ʻaupito ʻa e lotú pea ʻoku totonu ke ʻoua ʻe fakatukutukuʻi ia. Ka ʻoku faingataʻa ki he kau Kalisitiane tokolahi ʻoku puke fakalaumālié ke nau lotu. Ko e hā ʻa e taumuʻa ʻo hono fai ʻe he kau mātuʻá ha ngaahi lotu ʻi he tui koeʻuhi ko e toko taha ʻoku puke fakalaumālié? “ʻE fokotuʻu ia ʻe he ʻEiki,” ʻo hangē ko ʻene fokotuʻu ha toko taha loto-mapelu, pea mo fakaongoʻimālohi ia ke ne tulitāupau ki ha ʻalunga ʻo e moʻoní mo e māʻoniʻoní. ʻOku hala nai ʻa e anga ʻo e fakakaukau ʻa ha Kalisitiane ʻoku puke fakalaumālié ka ʻoku teʻeki ai ke ne fai ha angahala mamafa, he naʻe pehē ʻe Sēmisi: “Pea neongo kuo ne fai ha angahala, ka ʻe fakamolemole ia.” ʻOku ueʻi ʻa e toko taha ʻoku vaivai fakalaumālié ʻe he akonaki mei he Tohi Tapú ʻa e kau mātuʻá fakataha mo ʻenau lotu tōtōivi ke ne vete ʻa e ngaahi angahala mamafa kuó ne fai nai pea ke ne fakahā  ʻa e fakatomalá. ʻOku iku leva ia ki he fakamolemole mei he ʻOtuá.​—Sēmisi 5:​15, 16.

21. (a) Ko e hā ʻoku fakatoupīkoi ai ʻa e kau Kalisitiane ʻe niʻihi ke ui ki he kau mātuʻá? (e) Ko e hā ʻe fai ha lāulea ki ai ʻi he kupu ʻoku hoko maí?

²¹ ʻI he fehangahangai mo e pole ke tokangaʻi ʻa e kau foʻou fuʻu tokolahi ʻoku nau haʻu ki he fakatahaʻanga Kalisitiané, ʻoku lahi ʻa e ngāue ke fai ʻe he kau mātuʻa loto-tōnungá ke nau tokonaki ha tataki feʻunga. Ko e moʻoni, ko kinautolu ʻa e ngaahi meʻaʻofa ko e kau tangatá ʻa ia ko e tokonaki lelei meia Sihova ke tokoni kiate kitautolu ke tau kātakiʻi ʻa e ngaahi taimi faingataʻa ko ʻení. Ka, ʻoku ʻi ai ʻa e kau Kalisitiane ʻe niʻihi ʻoku nau fakatoupīkoi mei he kole ke maʻu ʻa e tokoni ko ʻeni meiate kinautolú, ʻo nau fakakaukau ko e ngaahi tokoua ko ʻení ʻoku nau fuʻu femoʻuekina pe ʻoku fuʻu lahi ʻa e ngaahi palōpalema ke nau fai ha tokanga ki aí. Ko e kupu ʻoku hoko maí te ne tokoniʻi kitautolu ke tau maʻu ʻa e mahino ʻoku fiefia ʻa e kau tangata ko ʻení ke nau hoko ko e tokoni, he ʻoku nau loto-lelei ke fai tauhi ʻi he tuʻunga ko e kau tauhi-sipi tokoni ʻi he fakatahaʻanga Kalisitiané.

[Fakamatala ʻi lalo]

Ko e Hā Haʻo Tali?

◻ ʻI heʻetau fie maʻu ha tokoní, ko e hā ʻa e tokoni lōtolu ʻoku tokonaki mai ʻe Sihová?

◻ Ko hai ʻa e ngaahi meʻaʻofa ko e kau tangata ʻi onopooní?

◻ Ko e fē ʻa e taimi totonu ke ui ai ʻa e kau mātuʻá?

◻ Ko e hā ʻa e tokoni ʻoku malava ke tau ʻamanekina mei he kau mātuʻa Kalisitiané?

[Fehuʻi ki he Ako]

[Fakatātā ʻi he peesi 67]

ʻOkú ke maʻu ha ʻaonga fakalaumālie mei he lotú, ako Tohi Tapú, mo e tokoni mei he kau mātuʻa Kalisitiané?