ʻOku Anga-Fēfē Hono Fakamatalaʻi ʻa e Tolu-Tahaʻi-ʻOtua?

ʻOKU lau ʻe he Siasi Katolika Loma: “Ko e Tolu-tahaʻi-ʻotua ko e kupuʻi lea ʻoku ngāueʻaki ke ne fakahā ʻa e tefitoʻi tokāteline ʻo e lotu Kalisitiane . . . Ko ia ai, ʻoku fakamatala ʻe he Tui ʻa ʻAfenesiesi (Athanasian Creed): ‘ko e Tamai ko e ʻOtua, ko e ʻAlo ko e ʻOtua, pea ko e Laumālie Māʻoniʻoni ko e ʻOtua, ka neongo ia ʻoku ʻikai ko ha ʻOtua ʻe tolu ka ko e ʻOtua pē taha.’ ʻI he Tolu-tahaʻi-ʻotua ni . . . ko e Tokotolu ʻoku nau ʻi ai taʻengata mo tatau tofu pē: ʻoku nau tatau kotoa ʻo taʻefakatupu mo mafai taʻefakangatangata.”—The Catholic Encyclopedia.

ʻOku loto-tatau ki ai ʻa e meimei siasi kehe kotoa ʻi Puleʻanga-Haʻa-Kalisitiane. Hangē ko eni, ʻoku ui foki ʻe he Siasi faka-Kalisi ʻa e Tolu-tahaʻi-ʻotua “ko e tefitoʻi tokāteline ʻa e lotu faka-Kalisitiane,” ʻoku aʻu ʻo nau pehē: “Ko e kau Kalisitiane ʻa e faʻahinga ʻoku nau tali ʻa Kalaisi ko e ʻOtua ia.” ʻI he tohi ko e Our Orthodox Christian Faith, ʻoku lau ʻe he siasi tatau pē: “ʻOku tolu ʻa e ʻOtua. . . . Ko e ʻOtua kakato ʻa e  Tamai. Ko e ʻOtua kakato ʻa e ʻAlo. Ko e ʻOtua kakato ʻa e Laumālie Māʻoniʻoni.”

Ko ia, ʻoku lau ko e Tolu-tahaʻi-ʻotua “ko e Tokotolu ʻi he ʻOtua ʻe taha.” ʻOku pehē ko kinautolu taki taha ʻoku ʻikai ha kamataʻanga, kuo nau moʻui mei ʻitāniti. ʻOku pehē ko kinautolu taki taha ʻoku māfimafiʻia, pea ko kinautolu taki taha ʻoku ʻikai ha lahi ange pe siʻi ange.

ʻOku faingataʻa ke mahino ʻa e fakaʻuhinga pehē? Kuo puputuʻu ai ʻa e kau tui loto-totonu tokolahi, he ʻoku kehekehe mei he fakaʻuhinga totonu, ʻo kehe ʻaupito ia mei he meʻa kuo nau ʻilo ki ai. ʻOku nau ʻeke, ʻoku malava fēfē ke ʻOtua ʻa e Tamai, ke ʻOtua ʻa Sīsū, pea ke ʻOtua ʻa e laumālie māʻoniʻoni, kae ʻikai ʻOtua ʻe tolu kae ʻOtua pē taha?

“Mamaʻo Atu mei he Fakakaukau Fakaetangata”

ʻOKU lahi ʻa e puputuʻu ni. ʻOku pehē ʻe he The Encyclopedia Americana ʻoku lau ʻa e tokāteline fekauʻaki mo e Tolu-tahaʻi-ʻotua ʻoku “mamaʻo atu mei he fakakaukau fakaetangata.”

ʻOku pehē ʻa e vakai ki ai ʻa e tokolahi ʻoku nau tali ʻa e Tolu-tahaʻi-ʻotua. ʻOku pehē ʻe Monsignor Eugene Clark: “ʻOku taha ʻa e ʻOtua, pea ʻoku tolu ʻa e ʻOtua. Koeʻuhi ʻoku ʻikai ha meʻa pehe ni ʻi he fakatupu, ʻoku ʻikai malava ke tau mahinoʻi ia, kae tali pē ia.” ʻOku lau ʻe Katinale John O’Connor: “ʻOku tau ʻilo ko ha misiteli loloto ʻaupito ia, ʻa ia ʻoku ʻikai haʻatau kihiʻi mahinoʻi.” Pea ʻoku lea ʻa Tuʻi Tapu Soane Paulo II ki he “misiteli ʻuhingangataʻa ʻaupito ʻo e ʻOtua, ko e Tolu-tahaʻi-ʻotua.”

Ko ia ʻoku pehē ʻe he A Dictionary of Religious Knowledge: “Ki he tonu matematē ʻa e tokāteline ni pē ko hono fakamatalaʻi tonu matematē, ʻoku ʻikai loto-tatau ai ʻa e kau Tui-tolu-tahaʻi-ʻotua ʻiate kinautolu.”

Ko ia, ʻoku malava ke tau mahinoʻi ʻa e ʻuhinga ʻoku pehē ai ʻe he New Catholic Encyclopedia: “ʻOku tokolahi ʻa e kau faiako ki he lotukalafi faka-Tolu-tahaʻi-ʻotua ʻi he ngaahi seminālio Katolika Loma kuo faʻa fehuʻi kiate kinautolu ʻi ha taimi, ‘Ka ʻe malava fēfē ke te malangaʻi ʻa e Tolu-tahaʻi-ʻotua?’ Pea kapau ʻoku fakahā ʻe he fehuʻi ni ʻa e puputuʻu ʻi he tafaʻaki ʻa e kau ako, ʻoku ne fakahā nai ʻa e puputuʻu tatau pē ʻi he tafaʻaki ʻo ʻenau kau faiako.”

Ko e moʻoni fekauʻaki mo e fakakaukau ko ia, ʻoku malava ke fakapapauʻi ʻaki ha ʻalu ki he laipeli, pea sivisiviʻi ʻa e ngaahi tohi ʻoku nau poupouʻi ʻa e Tolu-tahaʻi-ʻotua. ʻOku taʻefaʻalaua ʻa e ngaahi peesi kuo tohi ʻi he feinga ke fakamatalaʻi ia. Ka neongo ia, ʻi he hili ʻa e fekuki mo e ngaahi kupuʻi lea mo e fakamatala fakalotukalafi fakatupu-puputuʻu, ʻoku kei taʻemahino pē ki he kau fekumi.

ʻI he meʻa ni, ʻoku pehē ʻe Joseph Bracken ko ha Jesuit ʻi heʻene tohi ko e What Are They Saying About the Trinity? (Ko e Hā ʻOku Nau Leaʻaki Fekauʻaki mo e Tolu-tahaʻi-ʻotua?): “Ko e kau pātele kuo nau feinga lahi ke ako . . . ʻa e Tolu-tahaʻi-ʻotua, lolotonga honau ngaahi taʻu ʻi ha seminālio kuo nau toumoua ke fakahā ia mei he tuʻunga malanga ki honau kakai pehē pē ʻi he Sāpate Tolu-tahaʻi-ʻotua. . . . Ko e hā ke te fakapipikoʻi ai ʻa e kakai ʻaki ha meʻa hili ia ʻe ʻikai ke nau mahinoʻi lelei?” ʻOku ne toe pehē: “Ko ha tōʻonga-tui pē ʻa e Tolu-tahaʻi-ʻotua, ka ʻoku siʻi pe hala haʻane uesia ʻa e moʻui mo e lotu fakaʻaho faka-Kalisitiane.” Ka neongo ia, “ko e tefitoʻi tokāteline” ia ʻa e ngaahi siasi!

ʻOku pehē ʻe he lotukalafi Katolika ko Hans Küng ʻi heʻene tohi ko e Christianity and the World Religions (Lotu Faka-Kalisitiane mo e Ngaahi Lotu ʻo e Māmani) ʻoku hoko ʻa e Tolu-tahaʻi-ʻotua ko e ʻuhinga ia ʻe taha kuo ʻikai malava ai ʻe he ngaahi siasi ke fai ha fakalaka lahi ki muʻa mo e kakai taʻe-Kalisitiane. ʻOku ne pehē: “Naʻa mo e kau Mosilemi ʻilo-lahi ʻoku ʻikai pē ke nau mahinoʻi, hangē pē ko e ʻikai ke maʻu ʻa e ʻuhinga ʻe he kau Siu ki he Tolu-tahaʻi-ʻotua ʻo aʻu mai ki he taimi ni. . . . Ko e ngaahi faikehekehe ʻi he tokāteline Tolu-tahaʻi-ʻotua ʻi he vahaʻa ʻo e ʻOtua pē ʻe taha pea mo e konga tefito ʻe tolu ʻoku ʻikai fakafiemālie ki he kau Mosilemi, ʻa ia ʻoku nau puputuʻu ʻo ʻikai fakamaama ʻe he ngaahi kupuʻi lea fakalotukalafi naʻe tupu mei he lea faka-Sīlia, faka-Kalisi mo e faka-Latina. ʻOku fakakaukau ʻa e kau Mosilemi ko ha lea vaʻinga kotoa ia. . . . Ko e hā ʻoku fiemaʻu ai ʻe ha taha ke tānaki ha foʻi fakakaukau fekauʻaki mo e taha mo e taʻe hano tatau ʻa e ʻOtua ʻa ia ʻe malava ai ke fakavaivaiʻi pea fakataʻeʻaongaʻi ʻa e taha mo e taʻe hano tatau ko ia?”

‘ʻIkai ko ha ʻOtua ʻo e Maveuveu’

ANGA-FĒFĒ ʻa e malava ke tupu ha tokāteline maveuveu pehē? ʻOku taku ʻe he The Catholic Encyclopedia: “ʻOku tupu ha tomuʻa fakamahalo ki ha fakahā Fakaʻotua koeʻuhi ko ha tokāteline mātuʻaki misiteli.” ʻOku pehē ʻe he ongo poto mataotao Katolika ko Karl Rahner mo Herbert Vorgrimler ʻi heʻena Theological Dictionary: “Ko ha misiteli ʻa e Tolu-tahaʻi-ʻotua . . . ʻi hono ʻuhinga totonu . . . , kuo ʻikai malava ke ʻilo taʻefakahā mai, pea naʻa mo e hili hono fakahā mai ʻe ʻikai malava ke ʻilo kakato ia.”

 Kaekehe, ʻoku taukaveʻi ʻo pehē ko ha misiteli fakapuputuʻu ʻa e Tolu-tahaʻi-ʻotua koeʻuhi naʻe haʻu ia mei he fakahā fakaʻotua, ka ʻoku tupu ai ha palopalema lahi ʻe taha. Ko e hā hono ʻuhinga? Koeʻuhi ʻoku ʻikai fakaʻatā ʻe he fakahā fakaʻotua ha vakai pehē ki he ʻOtua. “Ko e ʻOtua ʻoku ʻikai ko e fakatupu maveuveu.”—1 Kolinitō 14:33.

Koeʻuhi ko e fakamatala ko eni, naʻe tupu nai mei he ʻOtua ha tokāteline puputuʻu pehē fau fekauʻaki mo ia pea aʻu ʻo ʻikai malava ke fakamatalaʻi ia ʻe he kau poto mataotao faka-Hepelū, faka-Kalisi mo faka-Latina?

Tānaki atu ki ai, kuo pau nai ke hoko ʻa e kakai ko e kau lotukalafi ka nau ‘ʻilo ʻa e ʻOtua moʻonia pē taha pea mo Sīsū Kalaisi naʻa ne fekau mai’? (Sione 17:3) Kapau naʻe pehē, ko e hā naʻe ʻilo ai pē ʻe he kau taki lotu poto Siu tokosiʻi ʻa Sīsū ko e Mīsaia? Kaekehe, ko ʻene kau ākonga loto-tōnunga ko e kau faama anga-fakatōkilalo, kau toutai, kau tānaki tukuhau, kau fefine tauhi ʻapi. Naʻe ʻilo pau ʻe he kakai lāuvale ni ʻa e meʻa naʻe akoʻi ʻe Sīsū fekauʻaki mo e ʻOtua ʻa ia naʻe malava ke nau akoʻi ia ki he niʻihi kehe pea aʻu ki heʻenau loto-lelei ke mate koeʻuhi ko ʻenau tui.—Mātiu 15:1-9; 21:23-32, 43; 23:13-36; Sione 7:45-49; Ngāue 4:13.

[Fakatātā ʻi he peesi 4]

Naʻe mei he kakai lāuvale anga-fakatōkilalo ʻa e kau ākonga ʻa Sīsū, kae ʻikai ko e kau taki lotu