Ko e Laumālie Māʻoniʻoni—Ko e Ivi Ngāue ʻo e ʻOtua

HANGĒ ko ia ʻoku fakamatalaʻi ʻe he tokāteline Tolu-tahaʻi-ʻotua, ko e tokotaha hono tolu ko e laumālie māʻoniʻoni ʻi ha ʻUlui-ʻotua, tatau pē mo e Tamai mo e ʻAlo. ʻO hangē ko e pehē ʻe he tohi ko e Our Orthodox Christian Faith: “Ko e Laumālie Māʻoniʻoni ko e ʻOtua kakato.”

ʻI he Konga Tohitapu Faka-Hepelū, ko e foʻi lea ʻoku toutou ngāueʻaki lahi taha ki he “laumālie” [spirit] ko e ruʹach, ʻoku ʻuhinga ko e “mānava; matangi; laumālie.” ʻI he Konga Tohitapu Faka-Kalisi, ko e foʻi lea ko e pneuʹma, ʻoku na ʻuhinga tatau. ʻOku fakahāhaaʻi ʻe he ngaahi lea ni ko e laumālie māʻoniʻoni ko e konga ʻo ha Tolu-tahaʻi-ʻotua?

Ko Ha Ivi Ngāue

ʻOKU fakahā ʻi he anga hono ngāueʻaki ʻe he Tohitapu ʻa e foʻi lea “laumālie māʻoniʻoni” ko ha ivi ʻoku mapuleʻi ʻa ia ʻoku ngāueʻaki ʻe he ʻOtua ko Sihova ke fakahokoʻaki ʻa e faʻahinga kehekehe ʻo ʻene ngaahi taumuʻa. ʻE lava ke fakatatauʻi ia ʻi ha founga ʻe niʻihi ki he ivi ʻuhila, ko ha ivi ʻe lava ʻo liliu ke faiʻaki ha ngaahi ngāue kehekehe.

ʻIa Sēnesi 1:2, ʻoku fakahā ai ʻe he Tohitapu “naʻe ʻōʻōfaki ʻe he Laumālie [“spirit” (faka-Hepelū, ruʹach)] ʻo e ʻOtua ki he fukahi vai.” ʻI heni, ko e laumālie ʻo e ʻOtua ʻa ia ko hono ivi ngāue naʻe ngāue ki hono fakafuo ʻo e māmani.

ʻOku ngāueʻaki ʻe he ʻOtua hono laumālie ke fakamaama ʻa e faʻahinga ʻoku nau tauhi kiate ia. Naʻe lotu ʻa Tēvita: “Ako au ke u fai ho finangalo; he ko hoku ʻOtua ʻa hoʻo ʻAfio. Ko ho laumalie [ruʹach] lelei ke ne taki kita ki ha fonua tafangafanga.” (Sāme 143:10) ʻI hono fakanofo ʻo e kau tangata alafua ʻe toko 70 ke tokoni kia Mōsese, naʻe tala ange ʻe he ʻOtua kiate ia: “Te u vaheʻi mei he laumalie [ruʹach] ʻoku ʻiate koe, ʻo ʻai kiate kinautolu.”—Nōmipa 11:17.

Naʻe hiki ʻa e kikite faka-Tohitapu ʻe he kau tangata ʻa e ʻOtua ʻi he taimi naʻe “takina kinautolu ʻe he laumalie maʻoniʻoni [faka-Kalisi, pneuʹma].” (2 Pita 1:20, 21) ʻI he founga ni, naʻe “inspired of God” ʻa e Tohitapu, ko e foʻi lea faka-Kalisi ki ai ko e The·oʹpneu·stos, ʻoku ʻuhinga “fakamanava-mei-he-ʻOtua.” (2 Tīmote 3:16) Pea naʻe tataki ʻe he laumālie māʻoniʻoni ha kakai ke nau mata vīsone pe maʻu ʻa e ngaahi misi fakakikite.—2 Sāmiuela 23:2; Sioeli 2:28, 29; Luke 1:67; Ngāue 1:16; 2:32, 33.

Hili hono papitaiso ʻa Sīsū, naʻe taki ia ʻe he laumālie māʻoniʻoni ki he toafa. (Maʻake 1:12) Naʻe  hangē ha afi ʻa e laumālie ʻi he loto ʻo e kau sevāniti ʻa e ʻOtua, pea naʻe hanga ʻe he ivi ngāue ko eni ʻo ʻai kinautolu ke nau longomoʻui. Pea naʻa ne fakamafeia kinautolu ke nau lea loto-toʻa mo taʻemāluʻia.—Maika 3:8; Ngāue 7:55-60; 18:25; Loma 12:11; 1 Tesalonaika 5:19.

ʻOku fakahokoʻaki ʻe he ʻOtua hono laumālie ʻene ngaahi fakamaau ki he kau tangata mo e ngaahi puleʻanga. (ʻAisea 30:27, 28; 59:18, 19) Pea ʻoku malava ʻa e laumālie ʻo e ʻOtua ke ngāue maʻa e kakai pe fakafepaki kiate kinautolu ʻo aʻu ki ha feituʻu pē.—Sāme 139:7-12.

‘Mafai Makehe Atu’

ʻOKU malava foki ke ʻomai ʻe he laumālie ʻo e ʻOtua “ʻa e makehe atu ʻo e mafai” ki he faʻahinga ʻoku nau tauhi kiate ia. (2 Kolinitō 4:7) ʻOku fakamafeia ʻe he meʻa ni kinautolu ke nau kātekina ʻa e ngaahi ʻahiʻahiʻi ʻo e tui pe ke fai ʻa e ngaahi meʻa ʻoku ʻikai ke nau malava ke fai.

Hangē ko eni, fekauʻaki mo Samisoni, ʻoku tala mai ʻia Fakamaau 14:6: “Naʻe maʻu ia ʻe he laumālie ʻo Iāue, pea neongo naʻe ʻikai ha meʻatau ʻi hono nima naʻa ne hae konga iiki ʻa e laione.” (Jerusalem Bible) Naʻe hū nai ki loto pe maʻu ʻe ha tokotaha fakaʻotua ʻa Samisoni, ʻo ne ngaohi hono sino ke ne lava e meʻa naʻa ne fai? ʻIkai, ʻoku moʻoni “ko e mafai ʻo e ʻEIKI naʻa ne ʻai ʻa Samisoni ke malohi.”—Today’s English Version.

ʻOku pehē ʻe he Tohitapu ʻi he taimi naʻe papitaiso ai ʻa Sīsū, naʻe hifo kiate ia ʻa e laumālie māʻoniʻoni ʻo hangē ha lupe, ʻikai hangē ha fuo ʻo ha tangata. (Maʻake 1:10) Ko e ivi ngāue ko eni ʻo e ʻOtua naʻa ne fakamafeia ʻa Sīsū ke fakamoʻui ʻa e mahaki pea fokotuʻu ʻa e mate. Hangē ko ia ʻoku pehē ʻe Luke 5:17: “Ko e mafai ʻo e ʻEiki [ʻOtua] naʻe ʻi heʻene [Sīsū] ngaahi ngāue fakamoʻui.”—Jerusalem Bible.

Naʻe toe fakamafaiʻi ʻe he laumālie ʻo e ʻOtua ʻa e kau ākonga ʻa Sīsū ke fai ʻa e ngaahi mana. ʻOku fakahā ʻia Ngāue 2:1-4 naʻe fakatahataha fakataha ʻa e kau ākonga ʻi he Penitekosi pea “fakafokifā naʻe hoko mei he langi ha meʻa, ʻo hangē ko e mumuhu ʻo ha fuʻu tuʻoni matangi . . . Pea fāʻofale ʻiate kinautolu katokātoa ʻa e laumālie maʻoniʻoni; pea nau hanga ʻo lea ʻi he ngaahi lea kehe, ʻo fakatatau ki he fakaleaʻi kinautolu ʻe he laumālie.”

Ko ia naʻe foaki ʻe he laumālie māʻoniʻoni kia Sīsū mo e kau sevāniti kehe ʻa e ʻOtua ʻa e mafai ke nau faiʻaki ʻa e meʻa ʻoku ʻikai malava ke faʻa fai ʻe he faʻahinga ʻo e tangata.

ʻIkai ko ha Tokotaha

KAEKEHE, ʻikai koā ʻoku lave ʻa e ngaahi veesi ʻi he Tohitapu fekauʻaki mo e laumālie māʻoniʻoni ʻo hā ai ia ko ha tokotaha? ʻIo, kae fakatokangaʻi ange ʻa e meʻa ʻoku lave ki ai ʻa e lotukalafi Katolika ko Edmund Fortman fekauʻaki mo e meʻa ni ʻi he The Triune God: “Neongo ʻoku faʻa fakamatalaʻi ʻa e laumālie ni ʻi he ngaahi lea ko ha tokotaha, ʻoku ngali hā mahino naʻe ʻikai teitei fakakaukau pe fakahā ʻe he kau tohi toputapu [ʻo e Konga Tohitapu Faka-Hepelū] ʻa e laumālie ni ko ha tokotaha makehe.”

ʻI he Tohitapu ʻoku ʻikai ngalikehe ke fakasino pe lau ha meʻa ko ha tokotaha. ʻOku pehē ʻoku maʻu fānau ʻa Poto. (Luke 7:35) ʻOku ui ʻa e angahala mo e  mate ko e ongo hau pe tuʻi. (Loma 5:14, 21) ʻIa Sēnesi 4:7, ʻoku pehē ʻe he The New English Bible (NE): “Ko e angahala ko ha tēmeniō ʻoku unga ʻi he matapā,” ʻoku ne fakasino ʻa e angahala ko ha laumālie ʻuli ʻoku unga ʻi he matapā ʻo Keini. Ka, ko hono moʻoni, ʻoku ʻikai ko ha tokotaha laumālie ʻa e angahala; pea ko e fakasino ʻa e laumālie māʻoniʻoni ʻoku ʻikai ʻai ai ia ko ha tokotaha laumālie.

Tatau pē mo ia, ʻia 1 Sione 5:6-8 (NE) ʻoku ʻikai ngata pē ʻi he laumālie ka ʻoku toe pehē “mo e vai mo e taʻataʻa” ʻoku ui ko e “fakamoʻoni.” Ka ʻoku hā mahino ʻoku ʻikai ko ha ongo tokotaha ʻa e vai mo e taʻataʻa, pea pehē pē ki he laumālie māʻoniʻoni ʻoku ʻikai ko ha tokotaha.

ʻO fakatatau ki he meʻa ni ʻoku ngāue angamaheniʻaki ʻe he Tohitapu ʻa e “laumālie māʻoniʻoni” ʻi ha founga taʻekau ki ha taha, hangē ko hono fakahoa ia ʻaki ʻa e vai mo e afi. (Mātiu 3:11; Maʻake 1:8) ʻOku naʻinaʻi ki he kakai ke fakafonuʻaki kinautolu ʻa e laumālie māʻoniʻoni kae ʻikai ʻaki ʻa e uaine. (ʻEfesō 5:18) ʻOku lea fekauʻaki mo kinautolu ʻoku fakafonuʻaki ʻa e laumālie māʻoniʻoni ʻi he founga tatau ʻoku fakafonuʻaki ai kinautolu ʻa e ngaahi anga hangē ko e poto, tui mo e fiefia. (Ngāue 6:3; 11:24; 13:52) Pea ʻia 2 Kolinitō 6:6, ʻoku fakakau ʻa e laumālie māʻoniʻoni ʻi he ngaahi anga lahi. Kapau ko ha tokotaha moʻoni ʻa e laumālie māʻoniʻoni, ʻe ʻikai lava ke ngāuelahiʻaki ʻa e ngaahi kupuʻi lea pehe ni.

Kau atu ki ai foki, neongo ʻoku pehē ʻe he ngaahi konga Tohitapu ʻe niʻihi ʻoku lea ʻa e laumālie, ʻoku fakahā ia ʻe he ngaahi konga Tohitapu kehe naʻe fai ʻa e meʻa ni ʻo fakafou ʻi he tangata pe kau ʻāngelo. (Mātiu 10:19, 20; Ngāue 4:24, 25; 28:25; Hepelū 2:2) ʻI he taimi pehe ni ko e ngāue ʻa e laumālie ʻoku hangē ko e fakahoko ʻe he ngaahi peau fakaletiō ʻa e ngaahi pōpoaki mei ha tokotaha ki ha tokotaha ʻi ha feituʻu mamaʻo.

ʻIa Mātiu 28:19 ʻoku lave ai ki he “huafa ʻo e . . . laumalie maʻoniʻoni.” Ka ko e foʻi lea “huafa” ʻoku ʻikai ʻuhinga maʻu pē ki ha hingoa ʻo ha taha ʻi he lea faka-Kalisi pe lea faka-Tonga. ʻI heʻetau pehē “ʻi he huafa ʻo e lao,” ʻoku ʻikai te tau ʻuhinga ki ha tokotaha. ʻOku tau ʻuhinga ki he meʻa ʻoku tuʻu ki ai ʻa e lao, ko hono mafai. ʻOku pehē ʻe he tohi ʻa Robertson ko e Word Pictures in the New Testament: “Ko hono ngāuelahiʻaki ʻa e huafa (onoma) ʻi he Sepituakini mo e papaila [pepa tohi ngaohi mei he kuta] ʻoku ʻuhinga ki he mālohi mo e mafai.” Ko ia ko e papitaiso ‘ʻi he huafa ʻo e laumālie māʻoniʻoni’ ʻoku ʻiloʻi ai ʻa e mafai ʻo e laumālie, ʻoku mei he ʻOtua ia pea ʻoku ngāue koeʻuhi ko e finangalo fakaʻotua.

Ko e “Taukapo”

NAʻE lea ʻa Sīsū fekauʻaki mo e laumālie māʻoniʻoni ko ha “taukapo,” pea naʻa ne pehē te ne faiako, tataki, mo lea. (Sione 14:16, 26; 16:13) Ko e foʻi lea faka-Kalisi naʻe ngāueʻaki ki he taukapo (pa·raʹkle·tos) ʻoku ʻi he kalama ki he senita tangata (masculine gender). Ko ia ʻi he lave ʻa Sīsū ki he meʻa ʻe fai ʻe he taukapo, naʻa ne ngāueʻaki ʻa e ngaahi fetongi nauna tangata tāutaha. (Sione 16:7, 8) ʻI he tafaʻaki ʻe taha, ʻi hono ngāueʻaki ʻa e foʻi lea faka-Kalisi senita noa pē ki he laumālie (pneuʹma), ko e fetongi nauna noa pē ko e “ia” [it] ʻoku ngāuetotonuʻaki.

ʻOku fakapulipuliʻi ʻe he tokolahi taha ʻo e kau liliu lea Tui-tolu-tahaʻi-ʻotua ʻa e moʻoniʻi meʻa ni, hangē ko ia ʻoku tala moʻoni ʻe he New American Bible ʻa e Katolika fekauʻaki mo Sione 14:17: “ʻOku senita noa pē ʻa e foʻi lea faka-Kalisi ki he ‘Laumālie,’ pea neongo ʻoku mau ngāueʻaki ʻa e fetongi nauna tāutaha ʻi he lea faka-Pilitānia (‘he,’ ‘his,’ ‘him’), ʻoku ngāueʻaki ʻe he ngaahi tohi tohinima lahi faka-Kalisi ko e ‘it.’”

Ko ia ʻi hono ngāueʻaki ʻe he Tohitapu ʻa e ngaahi fetongi nauna tangata tāutaha ʻo fekauʻaki mo e pa·raʹkle·tos ʻia Sione 16:7, 8, ʻoku fehoanaki ia mo e ngaahi lao fakakalama, kae ʻikai ko ha fakahā ʻo ha tokāteline.

ʻIkai Ko Ha Konga ʻO Ha Tolu-tahaʻi-ʻotua

ʻOKU tala moʻoni ʻe he ngaahi matavai kehekehe ʻo e ʻilo, ʻoku ʻikai poupouʻi ʻe he Tohitapu ʻa e foʻi fakakaukau, ko e laumālie māʻoniʻoni ko hono toko tolu ia ʻo ha Tolu-tahaʻi-ʻotua. Hangē ko eni:

The Catholic Encyclopedia: “ʻOku hala ʻatā ʻi he Fuakava Motuʻa ke mau maʻu ai ha fakahā mahino fekauʻaki mo ha Tokotaha Hono Tolu.”

Ko e lotukalafi Katolika ko Fortman: “Naʻe ʻikai teitei lau ʻe he kau Siu ʻa e laumālie ko ha tokotaha; pea ʻikai ʻaupito ha fakamoʻoni fefeka naʻe maʻu ʻe ha tokotaha tohi Fuakava Motuʻa ʻa e fakakaukau ni. . . . ʻOku faʻa fakahaaʻi ʻa e Laumālie Māʻoniʻoni ʻi he Synoptics [Kōsipeli] pea pehē ki he tohi Ngāue ko ha ivi pe mafai fakaʻotua.”

Ko e New Catholic Encyclopedia: “ʻOku ʻikai fakaʻuta mahino atu ʻa e F[uakava] M[otuʻa] ki he laumālie ʻo e ʻOtua ko ha tokotaha . . . ko e laumālie ʻo e ʻOtua ko e mafai pē ʻo e ʻOtua. Kapau ʻoku fakahaaʻi ʻi ha taimi ko ha meʻa mavahe mei he ʻOtua, ʻoku pehē koeʻuhi ʻoku ngāue ki tuʻa ʻa e mānava ʻa Iāue.” ʻOku ne toe pehē: “Ko e ngaahi  konga Tohitapu lahi ʻo e F[uakava] F[oʻou] ʻoku nau fakahā ʻa e laumālie ʻo e ʻOtua ko ha meʻa, ʻikai ko ha taha; tautefito ʻene hā ʻeni ʻi he fakafehoanaki ʻa e laumālie mo e mafai ʻo e ʻOtua.”—Fakaʻitali ʻamautolu.

A Catholic Dictionary: “ʻI hono ngāuelahiʻaki, ko e Fuakava Foʻou, pehē pē ki he Fuakava Motuʻa, ʻoku lave ki he laumālie ko ha ivi moʻui pe mafai fakaʻotua.”

Ko ia ai, naʻe ʻikai fakakaukau ʻa e kau Siu pea pehē ki he muʻaki kau Kalisitiane ko e laumālie māʻoniʻoni ko ha konga ʻo ha Tolu-tahaʻi-ʻotua. Naʻe maʻu ʻa e akonaki ia ko eni ʻi he ngaahi senituli ki mui mai. Hangē ko ia ʻoku pehē ʻe he A Catholic Dictionary: “Naʻe fakapapauʻi ʻa e Tokotaha Hono Tolu ʻi ha Fakataha ʻi ʻAlekisānitia ʻi he [taʻu] 362 . . . pea fakaʻosi ʻe he Fakataha ʻi Konisitanitinopale ʻi he [taʻu] 381”—ko e senituli nai ia ʻe tolu mo e konga hili hono fakafonu ʻe he laumālie māʻoniʻoni ʻa e kau ākonga ʻi he Penitekosi!

ʻIkai, ʻoku ʻikai ko ha tokotaha ʻa e laumālie māʻoniʻoni pea ʻoku ʻikai ko ha konga ʻo ha Tolu-tahaʻi-ʻotua. Ko e laumālie māʻoniʻoni ko e ivi ngāue ia ʻo e ʻOtua ʻoku ne ngāueʻaki ke fakahokoʻaki hono finangalo. ʻOku ʻikai tatau ia mo e ʻOtua ka ʻoku mateuteu maʻu pē ki heʻene ngāueʻaki pea ʻoku māʻulalo ange ʻiate ia.

[Fakamatala ʻi he peesi 22]

“ʻI hono ngāuelahiʻaki, ko e Fuakava Foʻou, pehē pē ki he Fuakava Motuʻa, ʻoku lave ki he laumālie ko ha ivi moʻui pe mafai fakaʻotua.”—A Catholic Dictionary

[Fakatātā ʻi he peesi 21]

ʻI ha taimi ʻe taha naʻe hā ʻa e laumālie māʻoniʻoni hangē ha lupe. ʻI he toe taimi ʻe taha naʻe hā ia hangē ha ngaahi ʻeleloʻi afi—ʻikai teitei hangē ko ha tokotaha