ʻOkú Ke Kau ki ha Pole Mahuʻinga ʻAupito
Vahe 12
ʻOkú Ke Kau ki ha Pole Mahuʻinga ʻAupito
1, 2. (a) Ko e hā ʻoku mātuʻaki mahuʻinga ai kiate koe ʻa e founga ʻo hoʻo moʻuí? (e) Ko toe hai ʻoku mahuʻinga ki aí, pea ko e hā hono ʻuhingá?
ʻOKU MĀTUʻAKI mahuʻinga ʻa e founga ʻo hoʻo moʻuí. ʻE hoko ai kiate koe ha kahaʻu fiefia pe fakamamahi. ʻE faifai atu pē pea ʻe fakapapauʻi ai pe te ke mole atu fakataha mo e māmani ko ení, pe hao moʻui atu ʻi hono ngataʻangá ki he māmani foʻou māʻoniʻoni ʻa e ʻOtuá ʻa ia te ke malava ʻo moʻui taʻengata ai.—1 Sione 2:17; 2 Pita 3:13.
2 Ka ko e founga ʻo hoʻo moʻuí ʻoku ʻikai ngata pē ʻene uesiá ʻiate koe. ʻOku kau ai ʻa e faʻahinga kehé. Ko e meʻa ʻokú ke faí ʻokú ne uesia foki mo kinautolu. Ko e fakatātā, kapau ʻoku kei moʻui ʻa hoʻo ongo mātuʻá, ʻe malava ʻe he meʻa ʻokú ke faí ke fakaongoongoleleiʻi pe fakamaaʻi kinaua. ʻOku pehē ʻe he Tohitapú: “Ko e foha poto ko e fiefiaʻanga o ʻene tamai: Ka ko e tama vale ko e fakamamahi o ʻene faʻe.” (Palōvepi 10:1) Ka ko e meʻa mahuʻinga angé, ko hono uesia ʻe hoʻo founga moʻuí ʻa e ʻOtua ko Sihová. ʻE lava ke ʻai ai ia ke ne fiefia pe mamahi. Ko e hā hono ʻuhingá? Koeʻuhi ʻoku ʻi ai ha pole mahuʻinga ʻaupito ʻokú ke kau ki ai.
ʻE ANGATONU ʻA E FAʻAHINGA ʻO E TANGATÁ KI HE ʻOTUÁ?
3. Ko e hā ʻa e pole naʻe fai ʻe Sētane kia Sihová?
3 Naʻe langaʻi ʻa e polé ni ʻe Sētane ko e Tēvoló. Naʻá ne langaʻi ia ʻi he taimi naʻá ne malava ai ke ʻai ʻa ʻĀtama mo ʻIvi ke na maumauʻi ʻa e lao ʻa e ʻOtuá pea kau fakataha mo ia ʻi he angatuʻu ki he ʻOtuá. (Sēnesi 3:1-6) Naʻe tokonaki ʻe he meʻá ni kia Sētane ʻa e meʻa naʻá ne fakakaukau ko e makatuʻunga ia ke leaʻaki kia Sihova ʻa e pole ko ení: ‘ʻOku tauhi pē koe ʻe he kakaí koeʻuhi ko e meʻa ʻoku nau maʻu meiate koé. ʻOmai haku faingamālie pea te u malava ke fakatafokiʻi ha taha pē meiate koe.’ Neongo ʻoku ʻikai hā ʻa e ngaahi leá ni ʻi he Tohitapú, ka ʻoku hā mahino naʻe meimei hangē eni ko e lea naʻe fai ʻe Sētane ki he ʻOtuá. ʻOku hā eni ʻi he tohi Siopé ʻi he Tohitapú.
4, 5. (a) Ko hai ʻa Siope? (e) Ko e hā ʻa e meʻa naʻe hoko ʻi hēvani ʻi he taimi ʻo Siopé?
4 Ko Siopé ko ha tangata naʻe moʻui ʻi he hili ʻa e ngaahi senituli lahi mei he hoko ʻa e angatuʻu ʻi he ngoue ko ʻItení. Ko ha sevāniti māʻoniʻoni mo angatonu ia ʻa e ʻOtuá. Ka naʻe mātuʻaki mahuʻinga ʻa e angatonu ʻa Siopé ki he ʻOtuá pe ko Sētane? ʻOku fakahā ʻe he Tohitapú naʻe mātuʻaki mahuʻinga. ʻOkú ne fakahā kiate kitautolu ʻo kau ki he ʻasi ʻa Sētane ki he ʻao ʻo Sihová ʻi he fakamaauʻanga ʻo hēvaní. Fakatokangaʻi ange ʻa e kaveinga ʻo ʻena fetalanoaʻakí:
5 “Ka nae ai ae aho nae fakataha ai ae gaahi foha oe Otua ke fakaha akinautolu i he ao a Jihova, bea nae haʻu ai foki a Setani mo kinautolu. Bea nae behe e Jihova kia Setani, Ko hoo haʻu mei fe? Bea tali e Setani kia Jihova, o behe, Mei he eku fakatakamilo a mamani mo eku fealuaki fano i ai. Bea nae behe e Jihova kia Setani, Kuo ke tokagaʻi a eku tamaioeiki ko Jobe, he oku ikai hano tatau i mamani, koe tagata haohaoa mo agatonu, oku manavahe ia ki he Otua, bea afe mei he kovi?”—Siope 1:6-8, PM.
6. Ko e hā ʻa e pole ʻoku fakahā ʻe he Tohitapú naʻe ʻi he taimi ʻo Siopé?
6 Ko e hā naʻe leaʻaki ai ʻe Sihova kia Sētane ʻo pehē ko ha tangata angatonu ʻa Siopé? ʻOku hā mahino, naʻe ʻi ai ha pole pe ʻe kei tauhi angatonu ʻa Siope kia Sihova pe ʻikai. Fakakaukau ki he fehuʻi ʻa e ʻOtuá, “Ko hoo haʻu mei fe?” mo e tali ʻa Sētane, “Mei he eku fakatakamilo a mamani mo eku fealuaki fano i ai.” ʻOku fakahā ʻe he fehuʻi ko ení mo e tali ʻa Sētané naʻe fakangofua ʻe Sihova ʻa e faingamālie kia Sētane ke fakahoko ʻene taukaveʻi ʻo pehē te ne malava ke fakatafokiʻi ha taha pē mei he ʻOtuá. Sai, ko e hā ʻa e tali naʻe fai ʻe Sētane ki he fehuʻi ʻa Sihova ʻo fekauʻaki mo e angatonu ʻa Siopé?
7, 8. (a) Naʻe pehē ʻe Sētane ʻoku tauhi ʻe Siope ʻa e ʻOtuá ʻi he ʻuhinga fē? (e) Ko e hā naʻe fai ʻe Sihova ke fakapapauʻi ʻa e polé ni?
7 “Bea nae tali ai e Setani kia Jihova, o behe, He kuo manavahe a Jobe ki he Otua tae ha totogi? Ikai kuo ke takatakai aki ia ae a, mo hono fale, mo ene mea kotoabe mei he botu kotoabe? bea kuo ke fakamonuiaʻi ae gaue a hono nima, bea oku tubulekina ene koloa i he fonua. Kae mafao atu eni ho nima, o taʻi aia kotoabe oku aana, bea te ne laui koviʻi koe i ho fofoga.”—Siope 1:9-11, PM.
8 ʻI he tali ʻa Sētané naʻá ne feinga ai ke fakamatala ha ʻuhinga ki he angatonu ʻa Siope ki he ʻOtuá. Naʻe kikihi ʻa Sētane, ‘ʻoku tauhi koe ʻe Siope koeʻuhi ko e ngaahi meʻa ʻokú ke foaki kiate ia, kae ʻikai ko haʻane ʻofa kiate koe.’ Naʻe lāunga foki ʻa Sētane ʻo pehē ʻoku ngāueʻaki ʻe Sihova ʻa hono mālohi lahi angé ʻi ha founga taʻetotonu. ‘Kuo ke maluʻi maʻu pē ia,’ ko ʻene leá ia. Ko ia, ke fakapapauʻi ʻa e polé ni, naʻe tali ʻe Sihova: “Vakai, oku i ho nima ae mea kotoabe oku aana; kae oua naa ke hilifaki ho nima kiate ia.”—Siope 1:12, PM.
9. Ko e hā ʻa e faingataʻa naʻe fakatupunga ʻe Sētane kia Siopé, pea ko e hā hono ikuʻangá?
9 Naʻe kamata leva ke fakatupunga ʻe Sētane ʻa e faingataʻá kia Siope. Naʻá ne ʻai ke tāmateʻi pe kaihaʻasi ʻa e fanga manu kotoa ʻa Siopé. Hili iá naʻá ne fokotuʻutuʻu ke mate ʻa e fānau ʻe toko 10 ʻa Siopé. Naʻe mole ʻa e meimei meʻa kotoa meia Siope, ka naʻá ne tauhi angatonu pē kia Sihova. Naʻe ʻikai te ne lea kovi ki he ʻOtuá. (Siope 1:2, 13-22) Ka naʻe ʻikai ko e ngataʻanga ia ʻo e meʻá ni.
10. Ko e hā ʻokú ne fakahā naʻe ʻikai ke ʻunua ʻa Sētane?
10 Naʻe toe ʻasi ʻa Sētane mo e kau ʻāngelo kehé ki he ʻao ʻo Sihová. Naʻe toe ʻeke ʻe Sihova kia Sētane pe naʻá ne fakatokangaʻi ʻa e angatonu ʻa Siopé mo ne pehē: “Oku ne kei kuku mau be ene agatonu.” Pea naʻe tali ia ʻe Sētane ʻo pehē: “Koe kili ma ae kili, io, e foaki e he tagata ene mea kotoabe ke ne moui ai. Kae mafao atu eni ho nima, o ala ki hono hui mo hono kakano, bea te ne lauikoviʻi koe i ho fofoga.”—Siope 2:1-5, PM.
11. (a) Ko e hā mo e toe ngaahi ʻahiʻahi naʻe fakatupunga ʻe Sētane kia Siopé? (e) Ko e hā hono ola?
11 Ke tali ení, naʻe fakangofua ʻe Sihova ʻa Sētane ke fai ha meʻa pē te ne malava ke fai kia Siopé, neongo naʻe pehē ʻe he ʻOtuá: ‘ʻOua te ke tāmateʻi ia.’ (Siope 2:6) Ko ia naʻe taaʻi ʻe Sētane ʻa Siope ʻaki ha mahaki fakalilifu. Naʻe lahi fau ʻa e faingataʻaʻia ʻa Siopé peá ne lotu ai ke ne mate. (Siope 2:7; 14:13, 14) Naʻe fakafepaki tuʻu kiate ia ʻa hono uaifí, ʻo ne pehē: “Lea kovi ki he Otua, ka ke mate.” (Siope 2:9, PM) Ka naʻe fakafisi ʻa Siope ke fai pehē. Naʻá ne pehē: “Teu mate be ka e ikai teu tukuage eku agatonu meiate au.” (Siope 27:5, PM) Naʻe tauhi maʻu ʻe Siope ʻa ʻene angatonú ki he ʻOtuá. Ko ia naʻe fakamoʻoniʻi ai naʻe hala ʻa Sētane ʻi heʻene taukaveʻi ʻo pehē naʻe tauhi pē ʻe Siope ʻa e ʻOtuá koeʻuhi ko e koloa fakamatelie ʻokú ne maʻú kae ʻikai ʻi he ʻofa. Pea naʻe toe hā foki ai ʻoku ʻikai malava ʻe Sētane ke ne fakatafokiʻi ʻa e tokotaha kotoa mei he tauhi ki he ʻOtuá.
12. (a) Ko e hā ʻa e tali naʻe tokonaki ʻe Siope maʻá e ʻOtuá ki he meʻa naʻe taukaveʻi ʻe Sētané? (e) Ko e hā naʻe fakamoʻoniʻi ʻe he angatonu ʻa Sīsū ki he ʻOtuá?
12 Ko e hā hoʻo fakakaukau ki he ongoʻi ʻa Sihova ʻo fekauʻaki mo e ʻalunga angatonu ʻa Siopé? Naʻá ne ʻai ia ke ne mātuʻaki fiefia! ʻOku naʻinaʻi mai ʻe he Folofola ʻa e ʻOtuá: “E hoku foha, ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.” (Palōvepi 27:11, PM) Ko Sētane ʻokú ne manukiʻi ʻa Sihová. Pea ʻi he ʻalunga angatonu ʻa Siopé naʻá ne fakafiefiaʻi ai ʻa e loto ʻo e ʻOtuá. ʻI he meʻá ni naʻe maʻu ai ʻe he ʻOtuá ʻa ʻene tali ki he manuki pe taukaveʻi anga-pōlepole ʻa Sētane ʻo pehē ʻe ʻikai tauhi Ia ʻe he faʻahinga ʻo e tangatá ʻo kapau ʻe ʻahiʻahiʻi. Kuo toe tokonaki ʻe he faʻahinga tokolahi kehe ha tali pehē maʻá e ʻOtuá. Ko e faʻifaʻitakiʻanga lahi tahá ko e tangata haohaoa ko Sīsuú. Naʻá ne tauhi maʻu ʻa ʻene ʻofa-mateakí ki he ʻOtuá neongo ʻa e ngaahi ʻahiʻahi mo e ngaahi faingataʻa kotoa naʻe fakahoko ʻe Sētane kiate iá. Naʻe fakamoʻoniʻi ʻe he meʻá ni naʻe mei lava ʻe he tangata haohaoa ko ʻĀtamá ke fai ʻa e meʻa tatau ʻo kapau naʻá ne fie fai pehē, pea naʻe ʻikai taʻeangatonu ʻa e ʻOtuá ʻi heʻene fiemaʻu ʻa e talangofua kakató mei he tangatá.
ʻOKÚ KE KAU KI FĒ?
13. (a) Ko e hā ʻa e kaunga ʻa hoʻo founga moʻuí ki he polé ni? (e) ʻOku anga-fēfē ʻa ʻetau ʻai ke fiefia ʻa e ʻOtuá pe fakalotomamahiʻi iá?
13 Fēfē hoʻo moʻuí? Mahalo pē ʻokú ke fakakaukau ʻoku ʻikai mātuʻaki mahuʻinga ʻa e founga moʻui ʻokú ke ʻi aí. Ka ʻoku mātuʻaki mahuʻinga ia. Tatau ai pē pe ʻokú ke ʻiloʻi pe ʻikai, ʻokú ne poupouʻi ʻa e tafaʻaki ʻa e ʻOtuá pe ko e tafaʻaki ʻa Sētané ʻi he pole ko ení. ʻOku tokanga mai ʻa Sihova kiate koe, pea ʻokú ne fiemaʻu ke ke tauhi ia pea moʻui taʻengata ʻi he māmaní ko e palataisi. (Sione 3:16) ʻI he taimi naʻe angatuʻu ai ʻa e kau ʻIsilelí ki he ʻOtuá, naʻá ne loto-mamahi pe ongoʻi mamahi ai. (Sāme 78:40, 41) ʻOku ʻai ʻe he ʻalunga ʻo hoʻo moʻuí ʻa e ʻOtuá ke fiefia pe ʻoku fakalotomamahi kiate ia? Ko hono moʻoní, ke ʻai ke fiefia ʻa e ʻOtuá ʻoku fiemaʻu ke ke ako ʻene ngaahi laó pea talangofua ki ai.
14. (a) Fekauʻaki mo e fehokotaki fakasinó, ko e hā ʻa e ngaahi lao kuo pau ke tau talangofua ki ai kae fiefia ʻa e ʻOtuá? (e) Ko e hā hono ʻuhinga ko ha faihia ia ʻa hono maumauʻi ʻa e ngaahi lao peheé?
14 Ko ha taumuʻa tefito ʻa Sētane ke ʻai ha faʻahinga ke nau maumauʻi ʻa e ngaahi lao ʻa e ʻOtuá ʻa ia ʻokú ne puleʻi ʻa hono ngāueʻaki honau ivi fakafanaú, pea mo ʻene fokotuʻutuʻu ki he nofo malí mo e nofo fāmilí. ʻOku pehē ʻe he ngaahi lao ʻa e ʻOtuá ki hono maluʻi ʻa ʻetau fiefiá ʻoku ʻikai totonu ke fai ʻa e fehokotaki fakasinó ʻe ha tokotaha taʻemali mo ha tokotaha kehe, pea ʻoku ʻikai totonu ke fai ʻa e fehokotaki fakasinó ʻe ha taha mali mo ha taha kehe tukukehe ʻa hono hoa mali ʻoʻoná tonu. (1 Tesalonaika 4:3-8; Hepelū 13:4) ʻI hono maumauʻi ʻa e lao ʻa e ʻOtuá, ʻoku faʻa hoko ʻo fanauʻi mai ai ha fānau ʻoku ʻikai ʻofaʻi mo fiemaʻu kinautolu ʻe he ngaahi mātuʻá. Pea kuo aʻu nai ki he fakatōtama ʻa e ngaahi faʻē, ʻo tāmateʻi ʻa e fānaú ki muʻa ke nau fāʻeleʻi maí. Tānaki atu ki ai, ʻoku maʻu ʻe he tokolahi ʻoku nau fai feʻauakí ʻa e ngaahi mahaki fakalilifu ʻoku malava ke fakatuʻutāmaki ki he fānau te nau fāʻeleʻi maí. Ko ha ngāue taʻeangatonu ia, ko ha faihia fakafepaki ki he ʻOtuá ke fai ʻa e fehokotaki fakasinó mo ha taha ʻoku ʻikai te ke mali mo ia. Naʻe pehē ʻe Siope: “Kapau kuo toʻoa hoku loto ki ha fefine alafia, pea u tuku toitoi ki he matapa ʻo hoku kaungaʻapi: . . . ko e angahala fakalielia ia: pea ko e kovi ke ʻave ki he fakamaau.”—Siope 31:1, 9, 11.
15. (a) Kapau ʻoku tau fai feʻauaki, ko hai ʻoku tau fakahōifuaʻí? (e) Ko e hā ʻoku fakapotopoto ai ke talangofua ki he ngaahi lao ʻa e ʻOtuá?
15 ʻOku ʻikai totonu ke tau ofo ʻi hano ʻai ʻe he māmani puleʻi faka-Tēvolo ko ení ke ngali totonu mo lelei kiate koe ke fai ʻa e fehokotaki fakasinó mo ha taha ʻoku ʻikai ko ho malí. Ka ʻo kapau ʻokú ke fai pehē, ko hai leva ʻokú ke fakahōifuaʻí? Ko Sētane, kae ʻikai ko Sihova. Ke fakafiefiaʻi ʻa e ʻOtuá, kuo pau ke ke “hola . . . mei he fai feʻauaki.” (1 Kolinitō 6:18) Ko e moʻoni, ʻoku ʻikai ke faingofua maʻu pē ke angatonu ki he ʻOtuá. Naʻe ʻikai foki ko ha meʻa faingofua ia kia Siope. Kae manatuʻi, ʻoku fakapotopoto ke talangofua ki he ngaahi lao ʻa e ʻOtuá. Te ke fiefia ange he taimí ni ʻo kapau te ke fai pehē. Ka ko e meʻa mahuʻinga angé, te ke poupouʻi ʻa e polé ni ʻi he tafaʻaki ʻa e ʻOtuá pea ʻe fiefia ai ia. Pea te ne tāpuakiʻi koe ʻaki ʻa e moʻui taʻengata ʻi he fiefia he māmaní.
16. (a) Naʻe fēfē ʻa hono tāpuakiʻi ʻo Siope ʻi heʻene angatonú? (e) Ko e hā ʻoku malava ke leaʻaki ʻo kau ki he faingataʻa ʻoku fakatupunga ʻe Sētané, ʻo hangē ko hono tāmateʻi ʻo e fānau ʻe toko 10 ʻa Siopé?
16 Ko e moʻoni, naʻe malava ʻe Sētane ke ne fakamasivaʻi ʻa Siope pea fakatupunga ʻa e mate ʻa ʻene fānau ʻe toko 10. ʻOku ʻikai ke toe fehuʻia ʻa e fuʻu mole fakamamahi ko eni kia Siopé. Ka ʻi he fakamoʻoniʻi ʻe Siope ʻa ʻene angatonú, naʻe tāpuakiʻi ia ʻe he ʻOtuá ʻo liunga ua hono lahi ʻo e meʻa ko ia naʻá ne maʻu ki muʻa pea toki ʻahiʻahiʻi ia ʻe Sētané. Naʻe toe hoko ʻa Siope ko e tamai ʻa e toe fānau ʻe toko 10. (Siope 42:10-17) ʻIkai ngata ai, ʻoku malava ke tau ʻilo pau, ʻi he toetuʻu ʻa e maté ʻe toe fakafoki mai ke moʻui ʻa e fānau ʻe toko 10 ʻa Siope naʻe tāmateʻi ʻe Sētané. ʻOku moʻoni, ʻoku ʻikai ha faingataʻa pe ha fakatuʻutāmaki ʻoku fakangofua ke fai ʻe Sētane ʻe taʻefakatonutonu ʻe heʻetau Tamai ʻofa ko Sihová ʻi heʻene taimi tukupaú.
17. Ko e hā ʻoku mātuʻaki mahuʻinga ai ʻa ʻetau founga moʻuí?
17 Ko ia ʻoku fiemaʻu maʻu pē ke ke tauhimaʻu ʻi hoʻo fakakaukaú ʻoku mātuʻaki mahuʻinga ʻa hoʻo founga moʻuí. ʻOku mahuʻinga ia tautefito ki he ʻOtua ko Sihová pea mo Sētane ko e Tēvoló. ʻOku peheé koeʻuhi he ʻokú ke kau ki he pole pe ʻe angatonu ʻa e faʻahinga ʻo e tangatá ki he ʻOtuá pe ʻikai.
[Fehuʻi ki he Ako]
[Fakatātā ʻi he peesi 106]
Naʻe fekuki ʻa Siope mo e meʻa naʻe taukaveʻi ʻe Sētane ʻo pehē heʻikai ha taha te ne kei tauhi ʻene angatonú ki he ʻOtuá ʻo kapau ʻe ʻahiʻahiʻi
[Fakatātā ʻi he peesi 110]
Ko ha faihia fakafepaki ki he ʻOtuá ʻa e fehokotaki fakasino mo ha taha ʻoku ʻikai ko ho malí
[Fakatātā ʻi he peesi 111]
Naʻe tāpuakiʻi ʻe Sihova ʻa Siope ʻi heʻene angatonú ʻaki ʻa e ngaahi meʻa lahi ange ʻi he meʻa naʻá ne maʻu ki muʻá
