ʻOku Mālohi ʻa e Kau Laumālie Anga-Fulikivanú
Vahe 10
ʻOku Mālohi ʻa e Kau Laumālie Anga-Fulikivanú
1. Ko e hā hono ʻuhinga ʻoku tui ai ʻa e tokolahi ʻoku nau lava ʻo talanoa mo e kau maté?
ʻOKU FAʻA PEHĒ ʻe he kakaí kuo nau talanoa mo e kau maté. Ko ha pīsope lotu faka-ʻĒpikopō ʻiloa kuo mate, ko James A. Pike, naʻá ne pehē naʻá ne talanoa mo hono foha kuo mate, ko Jim. Fakatatau kia Pike, naʻe talaange ʻe hono fohá kiate ia: “ʻOku tokolahi ʻa e kakai takatakai ʻiate au, pea ʻoku hiki au ʻe he ngaahi nima . . . naʻá ku fuʻu loto-mamahi kaeʻoua kuó u malava ke u fakahā atu ke ke ʻilo.”
2. (a) Ko e hā ʻoku ʻikai lava ai ha taha ke talanoa mo e kau maté? (e) Ko ia, ko e hā ʻa e ngaahi fehuʻi ʻoku malanga haké?
2 Koeʻuhi ʻoku faʻa hoko ʻa e ngaahi meʻa pehē, ʻoku hā mahino kuo talanoa ʻa e kakai tokolahi mo ha tokotaha mei he nofoʻanga ʻo e kau laumālié. Ka kuo ʻikai te nau talanoa mo e kau maté. ʻOku mahino ʻaupito ʻa e lea ʻa e Tohitapu ʻi heʻene pehē: “Ka ko e kau pekia ʻoku ʻikai te nau ʻilo ha momoʻi meʻa.” (Koheleti 9:5) Ko ia, kapau ʻoku ʻikai ko e kau maté ʻoku lea mei he nofoʻanga ʻo e kau laumālié, ko hai ʻoku leá? Ko hai ʻoku nau fakangalingali ko e kau maté?
3. (a) Ko hai ʻoku fakangalingali ko e faʻahinga kuo maté, pea ko e hā hono ʻuhingá? (e) ʻOku faʻa tokonaki ʻilo ʻa e kau laumālie anga-fulikivanú kia hai?
3 Ko e kau laumālie anga-fulikivanú. Ko e kau laumālie ko ení, pe ko e kau tēmeniō, ko e kau ʻāngelo naʻa nau kau mo Sētane ʻi he angatuʻu ki he ʻOtuá. Ko e hā ʻoku nau fakangalingali ai ko e faʻahinga kuo maté? Koeʻuhi ke poupouʻi ʻa e foʻi fakakaukau ʻoku pehē ʻoku kei moʻui ʻa e kau maté. Kuo toe taki ʻe he kau laumālie anga-fulikivanú ʻa e tokolahi ke tui ki he foʻi loi ko e maté ko ha liliu pē ki ha toe moʻui ʻe taha. Ke fakamafola ʻa e foʻi loi ko ení, ʻoku tokonaki ʻe he kau laumālie anga-fulikivanú ki he kakai ʻoku vaka ai ʻa e kau laumālié, ki he kau fakahāmonū mo e kau faimaná ha ʻilo makehe ʻo ngali ko e haʻu pē mei he faʻahinga kuo maté.
KO HONO FAKANGALINGALI KO E TOKOTAHA MATE KO SĀMIUELÁ
4. (a) Ko e hā naʻe faingataʻaʻia lahi ai ʻa e Tuʻi ko Saulá ke maʻu ha tokoní? (e) Ko e hā ʻa e lao ʻa e ʻOtuá ʻo fekauʻaki mo e kakai ʻoku vaka ai ʻa e kau laumālié pea mo e kau fakahāmonū?
4 ʻOku ʻi ai ha fakatātā ʻi he Tohitapú ki ha laumālie anga-fulikivanu naʻe fakangalingali ko ha palōfita mate ʻa e ʻOtuá, ko Sāmiuela. Naʻe hoko eni ʻi he taʻu hono 40 ʻo e pule ʻa e Tuʻi ko Saulá. Naʻe ʻi ai ha kau tau Filisitia mālohi naʻa nau ō atu ke fakafepakiʻi ʻa e kau tau ʻIsileli ʻa Saulá, pea naʻe ilifia ʻaupito ai ʻa Saula. Naʻe ʻilo ʻe Saula ʻa e lao ʻa e ʻOtuá: “Oua naa tokaga kiate kinautolu oku vaka ai ae kau laumalie uli, bea oua naa kumi ki ha gaahi taula faahikehe tuki, ke mou uli ai iate kinautolu.” (Livitikō 19:31, PM) Kaekehe, naʻe faifai pē pea tafoki ʻa Saula meia Sihova. Ko ia ai, ko Sāmiuela ʻa ia naʻe kei moʻui ʻi he taimi ko iá, naʻá ne fakafisi ke toe sio kia Saula. (1 Sāmiuela 15:35) Pea ʻi he taimi tauhaʻa ko eni ʻo e faingataʻá, naʻe faingataʻaʻia lahi ʻa e Tuʻi ko Saulá koeʻuhi heʻikai fanongo ʻa Sihova ki heʻene ui tokoní.
5. (a) Naʻe kumi tokoni ʻa Saula ki fē? (e) Ko e hā naʻe malava ke fai ʻe he fefine ʻoku vaka ai ʻa e kau laumālié?
5 Naʻe vēkeveke ʻa Saula ke ʻilo ʻo fekauʻaki mo e meʻa ʻe hokó peá ne ʻalu ki ʻEnitoa ki ha fefine ʻoku vaka ai ʻa e kau laumālié. Naʻe malava ʻe he fefiné ni ke ne fakaʻasi mai ha fōlinga ʻo ha tokotaha ʻa ia naʻe malava ke mamata ki ai ʻe he fefiné ni. ʻI heʻene fakamatalaʻi ʻa e fōlinga ko iá, naʻe tui ʻa Saula ko “Sāmiuela” ia. Naʻe lea leva ʻa e tokotaha laumālie naʻe fakangalingali ko Sāmiuelá, ʻo pehē: “Ko e ha kuo ke ueʻi ai au ke ʻohake au?” Naʻe tali ʻe Saula: “Kuo u faingataʻaʻia lahi, he ʻoku fai tau kiate au ʻe he kau Filisitia.” Naʻe tali ange ʻe he tokotaha laumālié: “Pea koeʻumaʻa hoʻo huhū kiate au, ka kuo mahuʻi ʻa e ʻEiki [Sihova, NW] meiate koe, pea kuo ne hoko ko ho fili?” Pea toki hoko atu ʻa e tokotaha laumālie anga-fulikivanú, ʻa ia naʻá ne fakangalingali ko e tokotaha mate ko Sāmiuelá, ʻo ne fakahā kia Saula te ne mate tāmateʻi ʻi he tau mo e kau Filisitiá.—1 Sāmiuela 28:3-19.
6. Ko e hā naʻe ʻikai ko Sāmiuela ai naʻe lea kia Saulá?
6 ʻOku hā mahino, naʻe ʻikai moʻoni ko Sāmiuela naʻe fetuʻutaki ki ai ʻa e fefine ʻoku vaka ai ʻa e kau laumālié. Naʻe mate ʻa Sāmiuela, pea ʻi he maté ʻoku foki ʻa e tokotaha ko iá “ki hono kelekele; Ko e ʻaho pe ko ia ko ʻene ngaahi fakakaukau ʻoku mate.” (Sāme 146:4) Ko ha toe kiʻi fakakaukau atu ki he meʻá ni ʻoku hā ai naʻe ʻikai moʻoni ko e leʻo ʻo e tokotaha mate ko Sāmiuelá naʻe ongo maí. Naʻe hoko ʻa Sāmiuela ko e palōfita ʻa e ʻOtuá. Ko ia naʻá ne fakafepakiʻi ʻa e kakai ʻoku vaka ai ʻa e kau laumālié. Pea hangē ko ia kuo tau ako ki aí, ʻi heʻene kei moʻuí naʻá ne fakafisi ke toe lea ki he tokotaha talangataʻa ko Saulá. Ko ia ai, kapau naʻe kei moʻui ʻa Sāmiuela, te ne fakangofua ha tokotaha ʻoku vaka ai ʻa e kau laumālié ke ne ʻai ia ke fetuʻutaki mo Saula? Toe fakakaukau foki: Naʻe fakafisi ʻa Sihova ke toe ʻoange kia Saula ha fakamatala. Naʻe lava ʻe ha tokotaha ʻoku vaka ai ʻa e kau laumālié ke ne fakamālohiʻi ʻa Sihova ke ʻoange kia Saula ha pōpoaki ʻo fakafou ʻi he tokotaha mate ko Sāmiuelá? Pea kapau ʻoku lava moʻoni ʻa e kau moʻuí ke talanoa mo e faʻahinga ʻofeina kuo maté, ʻoku pau heʻikai lea ha ʻOtua ʻofa ʻo pehē kuo nau hoko ʻo “uli” koeʻuhi ko ʻenau hanga ki ha tokotaha ʻoku vaka ai ʻa e kau laumālié.
7. Ko e hā ʻa e fakatokanga naʻe ʻomai ʻe he ʻOtuá ke maluʻi ʻa hono kakaí mei he kau laumālie anga-fulikivanú?
7 Ko hono moʻoní, ko e kau laumālie anga-fulikivanú ʻoku nau fie fai ha kovi ki he faʻahinga ʻo e tangatá, ko ia ʻoku ʻomai ai ʻe Sihova ʻa e ngaahi fakatokanga ke maluʻi ʻene kau sevānití. Lau ʻa e fakatokanga ko eni ki he puleʻanga ʻo ʻIsilelí. Te ne tokoniʻi koe ke mahino ʻa e ngaahi founga ʻoku ngāueʻaki ʻe he kau tēmenioó ke takihalaʻi ʻa e kakaí. ʻOku pehē ʻe he Tohitapú: “ʻE ʻikai ʻilo ʻiate koe . . . ha taha ʻoku fai meʻa tongafisi, ha taha ʻoku fai ʻa e talotalo kovi, pe ha fai tuki, pe fiemana, pe ha fai sausau, pe ha fakahaʻele faʻahikehe, pe ha maki, pe ha fakahaʻele mate [pe ha taha ʻoku fakaʻekeʻeke ʻo fekauʻaki mo e kau maté, NW]. He ko e meʻa fakalielia kia Sihova ʻa ia fua pē ʻoku fai meʻa pehe.” (Teutalōnome 18:10-12) ʻOku totonu ke tau fie ʻilo ki he meʻa ʻoku fai ʻe he kau laumālie anga-fulikivanú ke uesia ai ʻa e kakai he ʻaho ní pea mo e founga ʻe malava ke maluʻi ai ʻa kitautolu meiate kinautolú. Ka ki muʻa ke tau ako ʻo fekauʻaki mo e meʻá ni, tau fakakaukau ki he taimi mo e founga naʻe kamata ai ʻa e kau laumālie anga-fulikivanú.
KAU ʻĀNGELO NAʻE HOKO KO E KAU LAUMĀLIE ANGA-FULIKIVANU
8. (a) Ko hai naʻe toe ʻai ʻe Sētane ke angatuʻu ki he ʻOtuá? (e) Hili ʻenau tuku ʻenau ngāue ʻi hēvaní, naʻa nau ō ki fē?
8 ʻI he loi kia ʻIvi ʻi he ngoue ko ʻItení, naʻe ʻai ai ʻe ha meʻa moʻui fakaeʻāngelo ʻa ia pē ke ne hoko ko e laumālie anga-fulikivanu ko Sētane ko e Tēvoló. Hili iá naʻe kamata ke ne feinga ke toe ʻai ha kau ʻāngelo kehe ke nau tafoki ʻo fakafepaki ki he ʻOtuá. Naʻe faifai pē peá ne malava ia. Naʻe tuku ʻe he kau ʻāngelo ʻe niʻihi ʻa e ngāue naʻe ʻoange ʻe he ʻOtuá kiate kinautolu ke nau fai ʻi hēvaní, pea nau hifo ki māmani mo nau ʻai kiate kinautolu ʻa e ngaahi sino fakakakano ʻo hangē ko e ngaahi sino ʻo e faʻahinga ʻo e tangatá. Naʻe tohi ʻa e ākonga Kalisitiane ko Siutasí ʻo fekauʻaki mo kinautolu ʻi heʻene pehē “ko e kau angelo foki, ʻa kinautolu naʻe ʻikai te nau tauhi ʻa e tuʻunga naʻe ʻonautolu, ka nau liʻaki honau nofoʻanga totonu.” (Siutasi 6) Ko e hā ʻa e ʻuhinga naʻa nau hifo ai ki māmaní? Ko e hā ʻa e holi taʻetotonu naʻe ʻai ʻe Sētane ki honau lotó ke nau liʻaki ai ʻa e ngaahi tuʻunga lelei naʻa nau maʻu ʻi hēvaní?
9. (a) Ko e hā naʻe hifo ai ʻa e kau ʻāngeló ki māmaní? (e) ʻOku anga-fēfē hono fakahā ʻe he Tohitapú naʻe hala ʻa e meʻa naʻa nau faí?
9 ʻOku fakahā ia ʻe he Tohitapú kiate kitautolu ʻi heʻene pehē: “Naʻe sio ʻe he ngaahi foha ʻo e ʻOtua ki he ngaahi ʻofefine ʻo e tangata ʻoku nau hoihoifua; pea nau hanga ʻo mali mo ha niʻihi, ʻa ia pe naʻa nau loto ki ai.” (Sēnesi 6:2) ʻIo, naʻe ʻai ʻe he kau ʻāngeló ni ʻa e sino fakakakano pea nau hifo ki māmani ke fai ʻa e fehokotaki fakasino mo e kau fefine fakaʻofoʻofá. Ka ko e ngaahi tōʻonga peheé naʻe taʻetotonu ki he kau ʻāngeló. Naʻe hoko eni ko ha ngāue talangataʻa ia. ʻOku fakahā ʻe he Tohitapú ko e meʻa naʻa nau faí naʻe hala tatau pē mo e ngāue faka-Sōtoma ʻa e kakai ʻo Sōtoma mo Komolá. (Siutasi 6, 7) Ko e hā hono ikuʻangá?
10, 11. (a) Ko e faʻahinga fānau fēfē naʻe maʻu ʻe he kau ʻāngeló ni? (e) Ko e hā naʻe hoko ki he kau saianití ʻi he hoko mai ʻa e Lōmakí? (f) Ko e hā naʻe hoko ki he kau ʻāngeló ʻi he taimi ʻo e Lōmakí?
10 Ko ia, naʻe fanauʻi ʻa e ngaahi kiʻi pēpē ʻa e kau ʻāngeló ni ʻe honau ngaahi uaifí. Ka naʻe kehe ʻa e ngaahi kiʻi pēpē ko ení. Naʻa nau tupu ʻo lalahi ange ʻo hoko ko e kau saianiti, ʻio ko e kau saianiti anga-fulikivanu. ʻOku ui kinautolu ʻe he Tohitapú “ko e kau toʻa ia ʻo onoʻaho, ko e faʻahinga ongoongo.” Naʻe feinga ʻa e kau saianití ni ke fakamālohiʻi ʻa e tokotaha kotoa pē ke kovi ʻo hangē ko kinautolú. Ko hono ikuʻangá, ʻoku pehē ʻe he Tohitapú “kuo fakautuutu ʻa e kovi ʻa e tangata ʻi mamani, pea ʻoku kovi ʻatā ʻa e filioʻi kotoa pe ʻo e ngaahi fakakaukau ʻa hono loto maʻuaipe.” (Sēnesi 6:4, 5) Ko ia naʻe ʻomai ʻe Sihova ʻa e Lōmakí. Naʻe melemo ai ʻa e kau saianití, pe “Nefilimi,” mo e kakai anga-fulikivanu kotoa pē. Ka ko e hā naʻe hoko ki he kau ʻāngelo naʻa nau hifo ki māmaní?
11 Naʻe ʻikai te nau melemo. Naʻa nau tukuange honau sino fakakakanó pea nau foki ki hēvani ko e faʻahinga laumālie. Ka naʻe ʻikai fakangofua ke nau toe hoko ko ha konga ʻo e kautaha ʻo e kau ʻāngelo māʻoniʻoni ʻa e ʻOtuá. Kaekehe, ʻoku pehē ʻe he Tohitapú “naʻe ʻikai maemaeʻekina ʻa e ʻOtua mei hono tautea ʻa e kau ʻāngelo ko ia naʻe angahalá, ka ʻi hono lī kinautolu ki Tātalusi, naʻe tuku ai kinautolu ki he ngaahi ʻana ʻo e koto fakapoʻuli ke tauhi ki he fakamaau.”—2 Pita 2:4, NW.
12. (a) Ko e hā naʻe hoko ki he kau ʻāngelo anga-fulikivanú ʻi heʻenau foki ki hēvaní? (e) Ko e hā ʻoku ʻikai malava ai ke nau toe ʻai ʻa e sino fakaetangatá? (f) Ko e hā ʻa e meʻa ʻoku nau lolotonga faí?
12 Naʻe ʻikai lī ʻa e kau ʻāngelo anga-fulikivanu ko ení ki ha feituʻu moʻoni naʻe ui ko Tātalusi. Ka ko Tātalusí, ʻa ia ʻoku liliu lea halaʻi ko e “heli” ʻi he ngaahi Tohitapu ʻe niʻihi, ʻoku ʻuhinga ia ki he tuʻunga māʻulalo pe tuʻunga tō ʻa e kau ʻāngeló ni. Naʻe motuhi ʻa kinautolu mei he maama fakalaumālie ʻa e kautaha ʻa e ʻOtuá, pea ʻoku tatali mai pē kiate kinautolu honau fakaʻauha taʻengatá. (Sēmisi 2:19; Siutasi 6) Talu mei he taimi ʻo e Lōmakí, kuo ʻikai toe fakangofua ʻe he ʻOtuá ʻa e kau ʻāngelo tēmeniō ko ení ke toe ʻai ha sino fakakakano, ko ia ai, heʻikai te nau toe lava ke fakafiemālieʻi fakahangatonu ʻa ʻenau ngaahi holi fakakakano taʻefakanatulá. Ka ʻoku kei malava ke nau ʻai ʻa e mālohi fakatuʻutāmaki ki he tangatá mo e fefiné. Ko hono moʻoní, “ʻoku . . . kākāʻi ʻa mamani” ʻe Sētane ʻaki ʻa e tokoni ʻa e kau tēmeniō ko ení. (Fakahā 12:9) Ko e tupulaki lahi he ʻahó ni ʻi he ngaahi hia fehokotaki fakasinó, fakamālohí mo e ngaahi faihala kehé, ʻoku hā ai ʻa e fiemaʻu ke tau maluʻi kitautolu mei he takihalaʻi ʻoku fai ʻe he kau tēmenioó.
FOUNGA TAKIHALAʻI ʻOKU FAI ʻE HE KAU LAUMĀLIE ANGA-FULIKIVANU
13. (a) ʻOku anga-fēfē ʻa e takihalaʻi ʻoku fai ʻe he kau laumālie anga-fulikivanú? (e) Ko e hā ʻa e fakahaʻele faʻahikehé, pea ko e hā ʻa e lau ʻa e Tohitapú ʻo fekauʻaki mo iá?
13 Kuo tau ʻosi ako ki muʻa atu ʻoku ngāueʻaki ʻe Sētane ʻi hono tuʻunga ko e “ʻotua ʻo e tuʻu ko eni,” ʻa e ngaahi puleʻanga fakamāmaní mo e lotu loí ke fakakuihi ʻaki ʻa e kakaí mei he ngaahi moʻoni ʻo e Tohitapú. (2 Kolinitō 4:4) Ko e founga tuʻu-ki-muʻa ʻe taha ʻoku takihalaʻi ʻaki ʻe he kau laumālie anga-fulikivanú ʻa e tangatá mo e fefiné ʻoku fakafou ʻi he fakahaʻele faʻahikehe. Ko e hā ʻa e fakahaʻele faʻahikehe? Ko e fetuʻutaki mo e kau laumālie anga-fulikivanú, ʻo fakahangatonu pe fakafou ʻi ha tangata pe fefine. ʻOku ʻomai ʻe he fakahaʻele faʻahikehé ha taha ki he malumalu ʻo e tākiekina ʻa e kau tēmenioó. ʻOku fakatokangaʻi kitautolu ʻe he Tohitapú ke tau fakamamaʻo mei he tōʻonga kotoa pē ʻoku fekauʻaki mo e fakahaʻele faʻahikehé.—Kalētia 5:19-21; Fakahā 21:8.
14. (a) Ko e hā ʻa e tongafisi? (e) Ko e hā ʻa e lau ʻa e Tohitapú ʻo fekauʻaki mo iá?
14 Ko e tongafisí ko ha founga ngāuelahiʻaki ʻo e fakahaʻele faʻahikehé. Ko e tōʻonga ia ʻo e feinga ke ʻilo ʻo fekauʻaki mo e kahaʻú, pe fekauʻaki mo ha meʻa taʻeʻiloa, ʻaki ʻa e tokoni ʻa e kau laumālie taʻehāmaí. ʻOku hā eni ʻi he meʻa naʻe tohi ʻe he ākonga Kalisitiane ko Luké: “Mo e fakafetaulaki mai ha kaunanga ʻa ia naʻe ulusino ai ha faʻahikehe tongafisi, pea naʻe lahi ʻa e koloa naʻe maʻu ʻe he kakai naʻe ʻonautolu ia ʻi heʻene kikite.” Naʻe malava ʻa e ʻapositolo ko Paulá ke ne fakatauʻatāinaʻi ʻa e taʻahiné ni mei he mālohi ʻo e laumālie anga-fulikivanu ko ení, pea ʻikai ke kei malava ʻa e taʻahiné ni ke vavalo ki he kahaʻú.—Ngāue 16:16-19.
15. (a) Ko e hā ʻa e ngaahi meʻa ʻe niʻihi ʻoku fekauʻaki mo e fakahaʻele faʻahikehé? (e) Ko e hā ʻoku fakatuʻutāmaki ai ke kau ki he ngaahi meʻa peheé?
15 ʻOku manako ʻa e faʻahinga tokolahi ʻi he fakahaʻele faʻahikehé koeʻuhi ʻoku fakamisiteli mo ngalikehe. ʻOkú ne fusiakiʻi ʻa kinautolu. Ko ia ai, ʻoku kamata ke nau kau ki he fakahaʻele faʻahikehé, founga faitoʻo fakamohe, fiemana, tala ʻa e kahaʻú ʻi he ako ki he fetuʻú mo e palanité, ngaahi laʻipapa ko e Ouija pe ko ha meʻa kehe ʻo fekauʻaki mo e fakahaʻele faʻahikehé. ʻOku nau lau nai ha ngaahi tohi ʻo fekauʻaki mo e ngaahi meʻá ni, pe ʻalu ʻo sio heleʻuhila pe sio he ngaahi polokalama televīsone ʻo fekauʻaki mo e ngaahi meʻá ni. ʻOku aʻu nai ʻo nau ʻalu ki ha fakataha ʻa ia ʻoku ʻi ai ha taha ʻokú ne feinga ai ke fetuʻutaki ki he nofoʻanga ʻo e kau laumālié. Ka ʻoku taʻefakapotopoto ʻa e ngaahi meʻá ni kotoa ki ha taha ʻokú ne fie tauhi ʻa e ʻOtua moʻoní. ʻOku toe fakatuʻutāmaki ia. ʻOku malava ke aʻusia ai ʻa e faingataʻa lahi moʻoni he taimí ni. Pehē foki, ʻe fakamaauʻi mo kapusi ʻe he ʻOtuá meiate ia ʻa e faʻahinga kotoa pē ʻoku nau tōʻongaʻaki ʻa e fakahaʻele faʻahikehé.—Fakahā 22:15.
16. ʻOku anga-fēfē hono fakahaaʻi ʻe he Tohitapú ʻa e faitau ʻa e kau Kalisitiané mo e kau laumālie anga-fulikivanú?
16 Naʻa mo e taimi ʻoku fai kotoa ai ʻe ha taha ʻa ʻene malavá ke ʻataʻatā mei he fakahaʻele faʻahikehé, ʻe kei ʻohofi pē nai ia ʻe he kau laumālie anga-fulikivanú. Manatuʻi naʻe ongona ʻe Sīsū Kalaisi ʻa e leʻo ʻo e Tēvoló ʻi hono ʻahiʻahiʻi ia ke ne maumauʻi ʻa e lao ʻa e ʻOtuá. (Mātiu 4:8, 9) Naʻe fai ha ngaahi ʻohofi pehē ki he kau sevāniti kehe ʻa e ʻOtuá. Naʻe pehē ʻe he ʻapositolo ko Paulá: “Koe tau fagatua . . . moe kau laumalie kovi i he gaahi botu i oluga.” ʻOku ʻuhinga ení ko e sevāniti kotoa pē ʻa e ʻOtuá kuo pau ke ne “too ae mahafu tau kotoa oe Otua, koeuhi ke [ne] faa tuu.”—ʻEfesō 6:11-13, PM.
TALITEKEʻI ʻA E NGAAHI ʻOHOFI ʻA E KAU LAUMĀLIE ANGA-FULIKIVANÚ
17. Ko e hā ʻoku totonu ke ke fai ʻo kapau ʻoku lea atu kiate koe ha “leʻo” mei he nofoʻanga ʻo e kau laumālié?
17 Ko e hā ʻoku totonu ke ke faí ʻo kapau ʻoku lea atu kiate koe ha “leʻo” mei he nofoʻanga ʻo e kau laumālié? Fēfē kapau ʻoku fakangalingali ʻa e “leʻo” ko iá ko ha kāinga kuo mate pe ha laumālie lelei? Sai, ko e hā ʻa e meʻa naʻe fai ʻe Sīsū ʻi he lea kiate ia ʻa e “pule ʻo e kau tevolo (tēmeniō, NW)”? (Mātiu 9:34) Naʻá ne pehē: “Setane, fei mo ʻalu!” (Mātiu 4:10) ʻE lava ke ke fai pehē foki. Pea ʻoku malava foki ke ke ui tokoni kia Sihova. Lotu leʻo lahi pea ngāueʻaki ʻa e huafa ʻo e ʻOtuá. Manatuʻi ʻoku mālohi ange ia ʻi he kau laumālie anga-fulikivanú. Muimui ʻi he ʻalunga fakapotopotó ni. ʻOua ʻe fakafanongo ki he ngaahi leʻo pehē mei he nofoʻanga ʻo e kau laumālié. (Palōvepi 18:10; Sēmisi 4:7) ʻOku ʻikai ʻuhinga eni ia ko e tokotaha kotoa pē ʻoku fanongo ki ha “leʻo” ʻoku lea ki ai ʻa e kau tēmenioó. ʻI he taimi ʻe niʻihi ʻoku malava ke tupu ʻa e fanongo ki he ngaahi leʻó mei he mahaki fakaesino pe fakaeʻatamai.
18. Ko e hā ʻa e faʻifaʻitakiʻanga ʻa e muʻaki kau Kalisitiane ʻi ʻEfesoó ko ha faʻifaʻitakiʻanga lelei ia ke muimui ai ha taha ʻo kapau ʻokú ne saiʻia ke ʻataʻatā mei he fakahaʻele faʻahikehé?
18 Mahalo pē naʻá ke kau ʻi ha tōʻonga fakahaʻele faʻahikehe ʻe niʻihi pea ʻokú ke saiʻia ke mavahe mei ai he taimí ni. Ko e hā ʻoku malava ke ke faí? Sai, fakakaukau ange ki he faʻifaʻitakiʻanga ʻa e muʻaki kau Kalisitiane ʻi ʻEfesoó. Hili ʻenau tali ʻa e ‘folofola ʻa Sihova’ naʻe malangaʻaki ʻe he ʻapositolo ko Paulá, ʻoku pehē ʻe he Tohitapú: “Ko e niʻihi ʻi he faʻahinga naʻe ngaue fie mana naʻa nau haʻu mo kinautolu ʻenau ngaahi tohi, ʻo tutu ʻi he ʻao ʻo e kakai.” Pea ko e mahuʻinga ʻo e ngaahi tohí ni naʻe feʻunga mo e konga siliva ʻe 50,000! (Ngāue 19:19, 20) ʻI he faʻifaʻitaki ki he faʻahinga naʻa nau hoko ko e kau muimui ʻo Kalaisí ʻi ʻEfesoó, kapau ʻoku ʻi ai haʻo ngaahi meʻa ʻoku fekauʻaki fakahangatonu ki he fakahaʻele faʻahikehé, ko e ʻalunga fakapotopotó ko hono fakaʻauha ʻo tatau ai pē pe ko e hā ʻa e lahi ʻa hono mahuʻingá.
19. (a) Ko e hā ʻa e meʻa ʻoku ʻikai ʻilo ʻe he tokolahi taha ʻo e faʻahinga ʻoku kau ki he fakahaʻele faʻahikehé? (e) Kapau ʻoku tau saiʻia ke moʻui taʻengata ʻi he fiefia he māmaní, ko e hā kuo pau ke tau faí?
19 Koeʻuhi ko e fuʻu lahi ʻa e manako he ʻahó ni ʻi he ngaahi meʻa ngalikehe mo fakamisitelí, ʻoku fakaʻau ke toe lahi ange ʻa e faʻahinga ʻoku kau ʻi he fakahaʻele faʻahikehé. Kaekehe, ko e tokolahi taha ʻo e faʻahingá ni, ʻoku ʻikai te nau ʻilo ʻoku nau hoko moʻoni ʻo kau fakataha mo e kau laumālie anga-fulikivanú. ʻOku ʻikai ko ha kiʻi vaʻinga fakaoli pē eni. ʻOku maʻu ʻe he kau laumālie anga-fulikivanú ha mālohi ke fakalaveaʻi mo fai ha kovi. ʻOku nau anga-fulikivanu moʻoni. Pea ki muʻa ke tuku pōpulaʻi ʻa kinautolu ʻe Kalaisi ki he fakaʻauha taʻengatá, ʻoku nau fai ʻa e kotoa ʻoku nau malavá ke ʻomai ʻa e faʻahinga ʻo e tangatá ki he malumalu ʻo honau mālohi anga-fulikivanú. (Mātiu 8:28, 29) Ko ia kapau ʻokú ke saiʻia ke ke moʻui taʻengata ʻi he fiefia he māmaní ʻi he hili hono toʻo atu ʻa e anga-fulikivanú, ʻoku fiemaʻu ke ke fakaʻataʻatā mei he mālohi fakatēmenioó ʻaki hoʻo fakamamaʻo mei he faʻahinga kotoa pē ʻo e fakahaʻele faʻahikehé.
[Fehuʻi ki he Ako]
[Fakatātā ʻi he peesi 91]
Naʻe fetuʻutaki ʻa e fefine ʻo ʻEnitoa ʻoku vaka ai ʻa e kau laumālié kia hai?
[Fakatātā ʻi he peesi 92, 93]
Naʻe fakatokangaʻi ʻe he ngaahi foha fakaʻāngelo ʻo e ʻOtuá ʻa e ngaahi ʻofefine ʻo e tangatá
[Fakatātā ʻi he peesi 94]
Naʻe ʻikai melemo ʻa e kau ʻāngelo liliu sinó. Naʻa nau tukuange ʻa honau sino fakakakanó pea nau foki ki hēvani
[Fakatātā ʻi he peesi 97]
ʻOku fakatokanga mai ʻa e Tohitapú: ‘Fakaʻataʻatā mei he ngaahi founga kotoa ʻo e fakahaʻele faʻahikehé’
[Fakatātā ʻi he peesi 98]
Ko kinautolu naʻa nau hoko ko e kau Kalisitiane ʻi ʻEfesoó naʻa nau tutu ʻa ʻenau ngaahi tohi ʻo fekauʻaki mo e fakahaʻele faʻahikehé—ko ha faʻifaʻitakiʻanga lelei ia kiate kitautolu he ʻahó ni
