ʻOku Mātuʻaki Mahuʻinga ʻa e Lotu ʻOkú Ke Kau ki Aí
Vahe 3
ʻOku Mātuʻaki Mahuʻinga ʻa e Lotu ʻOkú Ke Kau ki Aí
1. Ko e hā ʻa e tui ʻa e kakai ʻe niʻihi ʻo fekauʻaki mo e lotú?
‘ʻOKU LELEI ʻa e lotu kotoa pē,’ ko e lau ia ʻa e tokolahi. ‘Ko e ngaahi hala kehekehe pē ka ʻoku nau fakatau ki he feituʻu pē ʻe taha.’ Kapau ko e moʻoni eni, ʻoku ʻikai mātuʻaki mahuʻinga ʻa e lotu ʻokú ke kau ki aí, he ko hono ʻuhingá tā ko e lotu kotoa pē ʻoku ala tali ʻe he ʻOtuá. Ka ʻoku pehē?
2. (a) Naʻe anga-fēfē ʻa e angafai ʻa e kau Fālesí kia Sīsū? (e) Ko hai naʻe taukaveʻi ʻe he kau Fālesí ko ʻenau tamaí?
2 ʻI he ʻi māmani ʻa Sīsū Kalaisí, naʻe ʻi ai ha kulupu fakalotu naʻe ui ko e kau Fālesi. Naʻa nau fakatupu ha founga lotu pea naʻa nau tui ne hōifua ki ai ʻa e ʻOtuá. Ka ʻi he taimi tatau pē, naʻe feinga ai ʻa e kau Fālesí ke tāmateʻi ʻa Sīsū! Ko ia naʻe fakahā ʻe Sīsū kiate kinautolu: “Oku mou fai ae gaue a hoo mou tamai.” Naʻa nau tali ʻo pehē: “Oku taha be e mau Tamai, koe Otua.”—Sione 8:41, PM.
3. Ko e hā ʻa e lau ʻa Sīsū ʻo fekauʻaki mo e tamai ʻa e kau Fālesí?
3 Ka ko e moʻoni ko ʻenau tamaí ʻa e ʻOtuá? Naʻe tali ʻe he ʻOtuá ʻenau founga lotú? ʻIkai ʻaupito! Neongo naʻe maʻu ʻe he kau Fālesí ʻa e Tohitapú mo fakakaukau ʻoku nau muimui ki ai, naʻe takihalaʻi pē kinautolu ʻe he Tēvoló. Pea naʻe tala pehē ʻe Sīsū kiate kinautolu: “Oku mou i hoo mou tamai koe tevolo, bea koe holi a hoo mou tamai te mou fai. Ko e fakabo ia talu mei he kamataaga, bea nae ikai nofo mau i he mooni, . . . he koe loi ia, moe tamai o ia.”—Sione 8:44, PM.
4. Naʻe anga-fēfē ʻa e vakai ʻa Sīsū ki he lotu ʻa e kau Fālesí?
4 ʻOku hā mahino, naʻe loi ʻa e lotu ʻa e kau Fālesí. Naʻá ne tauhi ʻa e ngaahi taumuʻa ʻa e Tēvoló, kae ʻikai ko e ʻOtuá. ʻI he ʻikai ke lelei ʻenau lotú ʻi he vakai ʻa Sīsuú, naʻá ne fakahalaiaʻi ia. Naʻá ne pehē ki he kau Fālesi faʻalotú: “Oku mou tabuni ae buleaga oe lagi ki he kakai: he oku ikai te mou hu ki ai, be tuku ke hu ki ai akinautolu oku fai ke hu ki ai.” (Mātiu 23:13, PM) Koeʻuhi ko ʻenau lotu loí, naʻe ui ai ʻe Sīsū ʻa e kau Fālesi ko iá ko e kau mālualoi mo e fanga ngata huhu kona. Koeʻuhi ko ʻenau ʻalunga koví, naʻá ne pehē ʻoku nau ʻi he hala ʻoku fakatau ki he fakaʻauha.—Mātiu 23:25-33.
5. Naʻe anga-fēfē hono fakahā ʻe Sīsū ko e ngaahi lotu lahi ʻoku ʻikai ko ha ngaahi hala kehekehe pē ʻoku fakatau ki he feituʻu tatau?
5 Ko ia naʻe ʻikai akoʻi ʻe Sīsū ko e ngaahi lotu kotoa ko e ngaahi hala kehekehe pē ʻoku fakatau ki he feituʻu tatau ʻo e fakamoʻuí. ʻI heʻene Malanga ʻiloa ʻi he Moʻungá, naʻe pehē ai ʻe Sīsū: “Mou hu ʻi he matapa fāsiʻi: he ʻoku fālahi ʻa e matapa, pea ʻatā ʻa e hala, ʻoku fakatau ki mala [fakaʻauha, NW], pea toko lahi ʻa e kakai ʻoku hū atu ai: koeʻuhi ʻoku fāsiʻi ʻa e matapa, pea ʻefiʻefi ʻa e hala, ʻoku fakatau ki he moʻui; pea tokosiʻi ʻa e kakai ʻoku ʻilo ia.” (Mātiu 7:13, 14) Koeʻuhi ko ʻenau taʻefai ʻa e lotu ki he ʻOtuá ʻi he founga totonú, ʻoku tokolahi taha ai ʻa e faʻahinga ʻi he hala ki he fakaʻauhá. Ko e tokosiʻi pē ʻoku ʻi he hala ʻoku fakatau ki he moʻuí.
6. Ko e hā ʻoku lava ke tau ako mei ha vakai atu ki he lotu ʻa e puleʻanga ʻIsilelí?
6 Ko ha vakai atu ki he angafai ʻa e ʻOtuá mo e puleʻanga ʻIsilelí ʻoku hā mahino ai ʻa e mahuʻinga ʻo hono fai ʻa e lotu ki he ʻOtuá ʻi he founga ʻokú ne hōifua ki aí. Naʻe fakatokanga ʻa e ʻOtuá ki he kau ʻIsilelí ke nau fakamamaʻo mei he lotu loi ʻo e ngaahi puleʻanga naʻe tuʻu takai kiate kinautolú. (Teutalōnome 7:25) Naʻe feilaulauʻaki ʻe he kakai ko iá ʻa ʻenau fānaú ki honau ngaahi ʻotua pea naʻa nau kau ʻi he ngaahi tōʻonga fehokotaki fakasino taʻemaʻa, kau ai ʻa e mohe pē ʻa ha tangata mo ha tangata. (Livitikō 18:20-30) Naʻe fekauʻi ʻe he ʻOtuá ʻa e kakai ʻIsilelí ke fakaʻehiʻehi mei he ngaahi tōʻonga ko ení. ʻI heʻenau talangataʻa mo lotu ki he ngaahi ʻotua kehé, naʻá ne tautea kinautolu. (Siōsiua 24:20; ʻAisea 63:10) Ko ia naʻe mātuʻaki mahuʻinga ʻa e lotu naʻa nau kau ki aí.
KO E LOTU LOI ʻI HE ʻAHO NÍ?
7, 8. (a) Ko e hā ʻa e tuʻunga naʻe ʻi ai ʻa e lotú he lolotonga ʻo e ongo tau ʻa māmaní? (e) ʻOku fēfē hoʻo fakakaukau ki he ongoʻi ʻa e ʻOtuá ʻo fekauʻaki mo e meʻa kuo fai ʻe he lotú he lolotonga ʻo e taimi taú?
7 Fēfē ʻa e laui teau ʻo e ngaahi lotu ʻi he ʻaho ní? Mahalo pē ʻokú ke loto-tatau ʻoku ʻi ai ʻa e ngaahi meʻa lahi ʻoku fai ʻi he hingoa ʻo e lotú ʻoku ʻikai hōifua ki ai ʻa e ʻOtuá. Lolotonga ʻa e ongo tau ʻa māmaní naʻe toki faí, ʻa ia naʻe hao moʻui mai ai ʻa e laui miliona ʻoku lolotonga moʻui he taimí ni, naʻe fakaʻaiʻai ai ʻe he ngaahi lotu ʻi he ongo faʻahí fakatouʻosi honau kakaí ke tāmate. Naʻe pehē ʻe he pīsope ʻo Lonitoní: “Tāmateʻi ʻa e kau Siamane—tāmateʻi kinautolu.” Pea ʻi he faʻahi ʻe tahá, naʻe tala ai ʻe he ʻāleki-ʻepikopō ʻo Cologne ki he kau Siamané: “ʻOku mau fekauʻi kimoutolu ʻi he huafa ʻo e ʻOtuá ke faitau maʻá e ngeia mo e lāngilangi ʻo e fonuá ke aʻu ki he tulutā fakaʻosi ʻo homou totó.”
8 Ko ia naʻe tāmateʻi ʻe he kau Katolika ʻa e kau Katolika ʻi he loto-lelei ki ai ʻa honau kau taki lotú, pea naʻe fai pehē foki mo e kau Palōtisaní. Naʻe fakahā tonu ʻe he faifekau ko Harry Emerson Fosdick: “Naʻa mo ʻi homau ngaahi fale lotú kuo fusi ai ʻa e ngaahi fuka ki he taú . . . ʻI he faʻahi ʻe taha homau ngutú kuo mau fakamālō ai ki he Pilinisi ʻo e Melinó pea ʻi he faʻahi ʻe taha kuo mau fakalāngilangiʻi ai ʻa e taú.” ʻOku fēfē hoʻo fakakaukau ki he ongoʻi ʻa e ʻOtuá ʻo fekauʻaki mo ha lotu ʻoku taukaveʻi ʻokú ne fai hono finangaló ka ʻokú ne fakalāngilangiʻi ʻe ia ʻa e taú?
9. (a) Kuo anga-fēfē ʻa e ongoʻi ʻa e tokolahi ʻo fekauʻaki mo e ngaahi faihia kuo fai ʻe he ngaahi mēmipa ʻo e ngaahi lotu kehekehe? (e) ʻI he ʻai pē ʻe he lotú ke ne hoko ko ha konga ʻo e māmaní, ko e hā kuo pau ke tau fakaʻosiʻakí?
9 Koeʻuhi ko e ngaahi faihia naʻe fai ʻi he huafa ʻo e ʻOtuá ʻe he kau mēmipa ʻo e ngaahi lotu kehekehe ʻi he faai mai ʻa e hisitōliá, kuo laui miliona ai ʻa e kakai ʻi he ʻahó ni kuo nau tafoki mei he ʻOtuá mo Kalaisi. ʻOku nau tukuakiʻi ʻa e ʻOtuá ʻi he ngaahi tau fakalilifu fakalotú, ʻo hangē ko e ngaahi tau ʻi he vahaʻa ʻo e kau Katoliká mo e kau Mosilemí naʻe ui ko e Kaluseti (tau fakalotu), ʻa e ngaahi tau ʻi he vahaʻa ʻo e kau Mosilemí mo e kau Hinitū, pea pehē foki ki he ngaahi tau ʻi he vahaʻa ʻo e kau Katoliká mo e kau Palōtisaní. ʻOku nau tuhu ki he fakapoongi ʻo e kakai Siú ʻi he hingoa ʻo Kalaisí, pea mo e ngaahi fakaʻekeʻeke mo e fakamālohi anga-fakamamahi faka-Katoliká. Neongo naʻe taukaveʻi ʻe he kau taki lotu naʻe tupu mei ai ʻa e ngaahi faihia fakalilifu peheé ko ʻenau Tamaí ʻa e ʻOtuá, ʻikai ko e fānau tofu pē kinautolu ia ʻa e Tēvoló ʻo hangē ko e kau Fālesi naʻe fakahalaiaʻi ʻe Sīsuú? Koeʻuhi ko Sētane ko e ʻotua ʻo e māmani ko ení, ʻikai ʻoku totonu ke tau fakakaukau atu ʻokú ne toe puleʻi ʻa e ngaahi lotu ʻoku kau ai ʻa e kakai ʻo e māmaní?—2 Kolinitō 4:4; Fakahā 12:9.
10. Ko e hā ʻa e ngaahi meʻa kuo fai ʻi he hingoa ʻo e lotú ka ʻoku ʻikai te ke loto-tatau ki ai?
10 ʻOku ʻikai ha veiveiua ʻoku lahi ʻa e ngaahi meʻa ʻoku fai ʻi he hingoa ʻo e lotú ʻi he ʻahó ni ʻokú ke fakakaukau ʻoku ʻikai totonu. ʻOkú ke faʻa fanongo nai ʻo fekauʻaki mo ha kakai ʻoku nau ʻi he founga moʻui mātuʻaki taʻetaau, ka ko e kau mēmipa fakaʻapaʻapaʻia kinautolu ʻo e ngaahi siasí. ʻOkú ke ʻilo nai foki ʻo fekauʻaki mo ha kau taki lotu ʻoku nau ʻi ha founga moʻui mātuʻaki kovi, ka ʻoku kei tali lelei pē ko ha kau taki lotu lelei ʻi honau ngaahi siasí. Kuo pehē ʻe ha kau taki lotu ʻe niʻihi ʻoku ʻikai hala ʻa e fehokotaki fakasino ha tangata mo ha tangata pea mo e fehokotaki fakasino teʻeki malí. Kae mahalo pē ʻokú ke ʻilo ʻoku ʻikai ha lau pehē ʻa e Tohitapú. Ko hono moʻoní, naʻe tautea ʻe he ʻOtuá hono kakai ʻi ʻIsilelí ʻaki ʻa e mate koeʻuhi ko ʻenau fai ʻa e ngaahi meʻa pehē. Ko e ʻuhinga tatau pē naʻá ne fakaʻauha ai ʻa Sōtoma mo Komolá. (Siutasi 7) ʻOku vavé ni ke ne fai ʻa e meʻa tatau ki he lotu loi kotoa pē ʻi onopooní. ʻI he Tohitapú, ko e lotu peheé ʻoku fakatātāʻaki ha fuʻu paʻumutu koeʻuhi ko ʻene fehokotaki taʻetaau mo e “ngaahi tuʻi ʻo mamani.”—Fakahā 17:1, 2, 16.
LOTU [WORSHIP] ʻOKU HŌIFUA AI ʻA E ʻOTUÁ
11. Ko e hā ʻoku fiemaʻu ʻo kapau ko ʻetau lotú ke tali ʻe he ʻOtuá?
11 Koeʻuhi ʻoku ʻikai hōifua ʻa e ʻOtuá ki he lotu kotoa pē, ʻoku fiemaʻu ke tau ʻeke: ‘ʻOku ou lotu ki he ʻOtuá ʻi he founga ʻokú ne hōifua ki aí?’ ʻE anga-fēfē ʻetau ʻilo ʻoku tau fai ia? ʻOku ʻikai ko ha tangata, ka ko e ʻOtuá pē ʻa e fakamaau ki he meʻa ko e lotu moʻoní. Ko ia kapau ko ʻetau lotú ke tali ʻe he ʻOtuá, kuo pau ke faiaka fefeka ʻaupito ia ʻi he Folofola moʻoni ʻa e ʻOtuá, ko e Tohitapú. ʻOku totonu ke tau ongoʻi tatau mo e tokotaha-tohi Tohitapu ʻa ia naʻá ne pehē: “Ke mooni ae Otua, kae loi ai tagata kotoabe.”—Loma 3:3, 4, PM.
12. Ko e hā naʻe pehē ai ʻe Sīsū ko e lotu ʻa e kau Fālesí naʻe ʻikai hōifua ki ai ʻa e ʻOtuá?
12 Naʻe ʻikai ke pehē ʻa e ongoʻi ʻa e kau Fālesí ʻi he ʻuluaki senitulí. Naʻa nau fokotuʻu ʻa e ngaahi tui mo e ngaahi talatukufakaholo pē ʻa kinautolu pea nau muimui ki ai kae ʻikai ko e Folofola ʻa e ʻOtuá. Ko e hā hono ikuʻangá? Naʻe fakahā ʻe Sīsū kiate kinautolu: “Kuo mou fakataeʻaongaʻi ʻa e lao ʻa e Otua ʻaki hoʻomou lau fakaeonoʻaho. ʻA e kau malualoi! ʻE halaā ʻa e palofisai ʻa ʻAisea ʻiate kimoutolu, ʻo pehe, Ko e kakai ni ʻoku nau fakaʻapaʻapa kiate au ʻaki honau loungutu, ka ko honau loto ʻoku fakamamaʻo. Ka ko e kula noa ʻenau lotu mai; ʻoku nau ako ʻaki ha ngāhi tokateline ʻa ia ko e ngāhi tuʻutuʻuni pe ʻa e tangata.” (Mātiu 15:1-9; ʻAisea 29:13) Ko ia kapau ʻoku tau fiemaʻu ʻa e hōifua ʻa e ʻOtuá, ʻoku totonu ke tau fakapapauʻi ko e meʻa ʻoku tau tui ki aí ʻoku fehoanaki mālie ia mo e ngaahi akonaki ʻa e Tohitapú.
13. Ko e hā naʻe tala ʻe Sīsū kuo pau ke tau fai kae hōifua ai ʻa e ʻOtuá?
13 ʻOku ʻikai feʻunga ke tau pehē ʻoku tau tui kia Kalaisi pea fai leva ʻa e meʻa ʻoku tau fakakaukau ʻoku totonú. ʻOku mātuʻaki fiemaʻu ke tau fekumi pe ko e hā ʻa e finangalo ʻo e ʻOtuá ʻo fekauʻaki mo e meʻá ni. Naʻe fakahā ʻeni ʻe Sīsū heʻene Malanga he Moʻungá ʻi heʻene pehē: “ʻOku ʻikai ko ia pe ʻoku ne lau mai, ʻEī, ʻEī, [ʻEiki, ʻEiki] te ne hū ki he Puleʻanga ʻo Hevani; ka ko ia ʻoku ne fai ʻa e finangalo ʻo ʻeku Tamai ʻoku ʻi Hevani.”—Mātiu 7:21.
14. Ko e hā nai ʻe lau ai pē ʻe Sīsū ʻa kitautolu ko e “kau maumau lao” neongo naʻa tau fai ha “ngaahi ngāue lelei?”
14 ʻOku malava foki ke tau fai ʻa e meʻa ʻoku tau tui ko e “ngaahi ngāue lelei,” pea fai ʻa e ngaahi meʻá ni ʻi he hingoa ʻo Kalaisí. Ka ʻe taʻeʻaonga ʻa e ngaahi meʻá ni kotoa ʻo kapau ʻoku ʻikai te tau fai ʻa e finangalo ʻo e ʻOtuá. Te tau ʻi he tuʻunga ʻo e faʻahinga ʻoku hoko atu ki ai ʻa e lea ʻa Kalaisí: “Ko e tokolahi te nau lea mai ʻi he ʻaho ko ē, ʻo pehe, ʻEī, ʻEī, ʻikai ko ho huafa naʻa mau palofisai ai? pea ko ho huafa naʻa mau kapusi tevolo ai? pea ko ho huafa naʻa mau feia ai ʻa e ngāhi mana lahi? Pea te u toki vete kiate kinautolu hoku loto, ʻo pehe, Teʻeki te u ʻiloa kimoutolu: ʻalu meiate au, ʻa e kau maumau lao.” (Mātiu 7:22, 23) ʻIo, ʻoku malava ke tau fai ha ngaahi meʻa ʻoku tau fakakaukau ʻoku lelei—pea fakamālōʻia nai ai kitautolu ʻe he niʻihi he faʻahinga ʻo e tangatá pea aʻu ʻo fakahīkihikiʻi ai kitautolu—ka ʻo kapau ʻoku ʻikai te tau fai ʻa e meʻa ʻoku pehē ʻe he ʻOtuá ʻoku totonú, ʻe lau pē kitautolu ʻe Sīsū Kalaisi ko e “kau maumau lao.”
15. Ko e hā ʻoku fakapotopoto ai ke tau muimui ʻi he ʻalunga ʻo e kau Pēlea ʻi he kuonga muʻá?
15 Koeʻuhi ʻoku ʻikai fai ʻe he ngaahi lotu lahi he ʻahó ni ʻa e finangalo ʻo e ʻOtuá, heʻikai malava ke tau pehē pē ko e ngaahi akonaki ʻa e kautaha lotu ʻoku tau kau ki aí ʻoku fehoanaki mo e Folofola ʻa e ʻOtuá. Ko e moʻoniʻi meʻa ko ia ʻo hono ngāueʻaki ʻo e Tohitapú ʻe he kau taki lotú ʻoku ʻikai te ne fakamoʻoniʻi ʻe ia ʻoku ʻi he Tohitapú ʻa e ngaahi meʻa kotoa ʻoku nau akoʻí mo faí. ʻOku mahuʻinga ke tau sivisiviʻi ʻe kitautolu pe ko ia pe ʻikai. Naʻe fakaongoongoleleiʻi ʻa e faʻahinga ʻi he kolo ko Pēleá koeʻuhi ʻi he hili ʻa e malanga kiate kinautolu ʻa e ʻapositolo Kalisitiane ko Paulá, naʻa nau vakaiʻi ʻa e Tohitapú ke fakapapauʻi ʻoku moʻoni ʻa e ngaahi meʻa naʻá ne tala kiate kinautolú. (Ngāue 17:10, 11) Ko e lotu ʻoku hōifua ki ai ʻa e ʻOtuá kuo pau ke fehoanaki ʻi he meʻa kotoa pē mo e Tohitapú; ʻe ʻikai te ne tali ha konga pē ʻo e Tohitapú kae liʻaki ha konga kehe.—2 Tīmote 3:16.
ʻOKU ʻIKAI FEʻUNGA ʻA E LOTO-MOʻONI ʻATAʻATĀ PĒ
16. Ko e hā naʻe leaʻaki ʻe Sīsū ke fakahāhā ai ʻoku ʻikai feʻunga ʻa e loto-moʻoni ʻataʻatā pē ke hōifua ai ʻa e ʻOtuá ki ha taha?
16 Ka ʻeke nai ʻe ha taha: ‘Ka loto-moʻoni ha taha ki he ngaahi meʻa ʻoku tui ki aí, ʻikai ʻe hōifua kiate ia ʻa e ʻOtuá neongo ʻoku hala ʻa e lotu ʻoku kau ki aí?’ Kaekehe, naʻe pehē ʻe Sīsū heʻikai te ne hōifua ki he “kau maumau lao” neongo naʻa nau tui naʻe totonu ʻa e meʻa naʻa nau faí. (Mātiu 7:22, 23) Ko ia heʻikai ke hōifua mo e ʻOtuá foki ʻi he loto-moʻoni ʻataʻatā pē. Naʻe tala ʻe Sīsū ki hono kau muimuí: “ʻOku ʻunu mai ha taimi, ʻa ia ʻe ʻilonga ai ha taha te ne tamateʻi kimoutolu, te ne lau kuo ne fai ha feilaulau ki he ʻOtua.” (Sione 16:2) Ko e kau tāmate pehē ʻo e kau Kalisitiané ʻoku nau tui loto-moʻoni nai naʻa nau tauhi ai ʻa e ʻOtuá, ka ʻoku hā mahino naʻe ʻikai. ʻOku ʻikai ke hōifua ʻa e ʻOtuá ki he meʻa naʻa nau faí.
17. Neongo naʻe loto-moʻoni ʻa Paula, ko e hā naʻá ne fai ki muʻa peá ne toki hoko ko ha Kalisitiané?
17 Ki muʻa peá ne toki hoko ko ha Kalisitiané, naʻe tokoni ʻa e ʻapositolo ko Paulá ki hono fakapoongi ʻo Sitīvení. Ki mui mai, naʻá ne fekumi ai ki ha ngaahi founga ke tāmateʻi ai ha kau Kalisitiane tokolahi ange. (Ngāue 8:1 [Ngāue 7:60, PM]; Ngāue 9:1, 2) Naʻe fakamatala ʻa Paula: “ʻA e makehe atu oʻeku fakatangaʻi ʻa e siasi ʻa e ʻOtua, mo ʻeku laiki ia: mo ʻeku ʻamo atu ʻi he tokolahi ʻo hoku kakai naʻe toʻumeʻa mo au ʻi he lotu faka-Siu, ʻo u hulu atu ʻi he mamahiʻi ʻo e ngaahi tuʻutuʻuni naʻe tukufakaholo mei heʻeku ngaahi kui.” (Kalētia 1:13, 14) ʻIo, naʻe loto-moʻoni ʻa Paula, ka naʻe ʻikai ko ha meʻa ia ke ne ʻai ai ʻa e lotu naʻe kau ki aí ke tonu.
18. (a) Naʻe kau ʻa Paula ki he lotu fē he taimi naʻá ne fakatangaʻi ai ʻa e kau Kalisitiané? (e) Ko e hā naʻe fiemaʻu ai kia Paula mo e niʻihi ʻi hono ʻahó ke liliu ʻenau lotú?
18 ʻI he taimi ko iá, ko ha mēmipa ʻa Paula ʻo e tuʻunga lotu faka-Siú, ʻa ia naʻe siʻaki ai ʻa Sīsū Kalaisí pea siʻaki ai ʻa e lotu ko iá ʻe he ʻOtuá. (Ngāue 2:36, 40; Palōvepi 14:12) Ko ia ke maʻu ʻa e hōifua ʻa e ʻOtuá, ko e meʻa naʻe fiemaʻu kia Paulá ke liliu ʻa e lotu naʻe kau ki aí. Naʻá ne toe tohi ʻo kau ki ha niʻihi naʻa nau “mamahiʻi ʻa e ʻOtua”—naʻa nau loto-moʻoni ka naʻe ʻikai hōifua ki ai ʻa e ʻOtuá koeʻuhi ko ʻenau lotú naʻe ʻikai fakatuʻunga ʻi he ʻilo kānokano ki he ngaahi taumuʻa ʻa e ʻOtuá.—Loma 10:2, 3.
19. Ko e hā ʻokú ne fakahaaʻi ʻe ʻikai ke fakaʻatā ʻe he moʻoní ʻa e ngaahi faʻahinga kehekehe ʻo e tokāteline fakalotú?
19 ʻE ʻikai fakaʻatā ʻe he moʻoní ʻa e ngaahi faʻahinga kehekehe kotoa pē ʻo e tokāteline fakalotu ʻi he māmaní. Ko e fakatātā, ʻoku maʻu ʻe he faʻahinga ʻo e tangatá ha laumālie ʻoku kei moʻui ʻi he mate ʻa e sinó pe ʻikai. ʻE tuʻumaʻu atu ai pē ʻa e māmaní ʻo taʻengata pe ʻikai. ʻE fakangata ʻe he ʻOtuá ʻa e fulikivanú pe ʻikai. Ko e ngaahi meʻá ni mo e ngaahi tui kehe ʻoku tonu pe hala. ʻE ʻikai malava ke ʻi ai ha tuʻunga ʻe ua ʻo e moʻoní ʻi he ʻikai fehoanaki ʻa e taha ko ē mo ē. Ko e taha pē ʻiate kinaua ʻoku moʻoní, ka heʻikai ke na fakatou moʻoni. Ko e tui loto-moʻoni ki ha faʻahinga meʻa, pea mo hono fai iá, ʻe ʻikai te ne ʻai ia ke tonu ʻo kapau ʻoku hala.
20. Fekauʻaki mo e lotú, ʻe malava fēfē ke tau muimui nai ki he “mape ʻo e hala” totonú?
20 ʻOku totonu ke fēfē hoʻo ongoʻí ʻo kapau ʻe fakamoʻoniʻi ko e meʻa ʻokú ke tui ki aí ʻoku hala? Ko e fakatātā, tau pehē ʻokú ke ʻi ha motokā, pea ko e fuofua taimi eni hoʻo fononga ki ha feituʻu. ʻOku ʻi ai hoʻo mape ki he halá, ka naʻe teʻeki ai fakamole ha taimi ke ke sio fakalelei ki ai. Pea kuo tala atu ʻe ha taha kiate koe ʻa e hala ke ke fou aí. ʻOkú ke falala kiate ia, ʻo tui loto-moʻoni ʻoku totonu ʻa e hala kuó ne fakahinohino koe ki aí. Kae fakakaukau atu angé ʻo kapau ʻoku ʻikai totonu ia. Fēfē kapau ʻe fakahā atu ʻe ha taha ʻa e meʻa ʻoku halá? Fēfē kapau te ne tuhu ki hoʻo mapé, ʻo fakahā ai ʻoku hala ʻa e hala ʻokú ke fou aí? ʻE hanga ʻe he loto-pōlepolé mo e loto-taʻeʻunuá ʻo taʻofi koe mei haʻo fakamoʻoniʻi ʻoku hala ʻa e hala ʻokú ke fou aí? Ko ia, kapau ʻokú ke ako mei hoʻo sivi hoʻo Tohitapú ʻokú ke fononga ʻi ha hala fakalotu ʻoku hala, loto-lelei ke liliu. Fakaʻehiʻehi mei he hala fālahi ki he fakaʻauhá; fou atu ʻi he hala fāsiʻi ki he moʻuí!
KUO PAU KE FAI ʻA E FINANGALO ʻO E ʻOTUÁ
21. (a) Tānaki atu ki hono ʻilo ʻa e moʻoní, ko e hā kuo pau ke faí? (e) Ko e hā te ke fai ʻo kapau te ke ako ʻo ʻilo ʻoku ʻikai hōifua ʻa e ʻOtuá ki ha ngaahi meʻa ʻokú ke fai?
21 ʻOku mahuʻinga ke ʻilo ʻa e ngaahi moʻoni ʻo e Tohitapú. Kaekehe ʻoku taʻeʻaonga ʻa e ʻilo ko ení ʻo kapau ʻoku ʻikai te ke lotu [worship] ki he ʻOtuá ʻi he moʻoní. (Sione 4:24) Ko e meʻa ʻoku laú, ko hono ngāueʻaki ʻa e moʻoní, pea mo hono fai ʻa e finangalo ʻo e ʻOtuá. “ʻOku mate ʻa e tui ʻo ka mavahe mo e ngaue,” ko e lau ia ʻa e Tohitapú. (Sēmisi 2:26) Ko ia ke fakahōifua ki he ʻOtuá, ko hoʻo lotú kuo pau ke ʻoua ʻe ngata pē ʻi heʻene fehoanaki kakato mo e Tohitapú ka ke ngāueʻaki foki ia ʻi he tafaʻaki kotoa ʻo e moʻuí. Ko ia ai, kapau ʻokú ke ako ʻo ʻilo ko e meʻa ʻokú ke faí ʻoku folofola ki ai ʻa e ʻOtuá ʻoku hala, te ke loto-lelei ke liliu?
22. Ko e hā ʻa e ngaahi ʻaonga te tau maʻu he taimí ni mo e kahaʻú ʻo kapau te tau ngāueʻaki ʻa e lotu moʻoní?
22 ʻE hoko mai ʻa e ngaahi tāpuaki lahi kiate koe ʻo kapau te ke fai ʻa e finangalo ʻo e ʻOtuá. Naʻa mo e taimí ni ʻe ʻaonga kiate koe. Te ke hoko ko ha tokotaha lelei ange—ko ha tangata, husepāniti pe tamai lelei ange, ko ha fefine, uaifi pe faʻē lelei ange, ko ha tamasiʻi lelei ange, ʻi haʻo ngāueʻaki ʻa e lotu moʻoní. Te ne fakatupu ʻiate koe ʻa e ngaahi ʻulungaanga fakaeʻotua te ne ʻai koe ke ke tuʻu ʻilonga ʻi ha lotolotonga ʻo ha faʻahinga koeʻuhi ko hoʻo fai ʻa e meʻa ʻoku totonú. Pea ko e toe lahi angé, te ke ʻi he tuʻunga ai ke maʻu ʻa e ngaahi tāpuaki ʻo e moʻui taʻengatá ʻi he fiefia mo e moʻui haohaoa ʻi he palataisi he māmani foʻou ʻa e ʻOtuá. (2 Pita 3:13) ʻOku ʻikai ha toe veiveiua—ʻoku mātuʻaki mahuʻinga ʻa e lotu ʻokú ke kau ki aí!
[Fehuʻi ki he Ako]
[Fakatātā ʻi he peesi 25]
Naʻe tauhi ʻa e ʻOtuá ʻe he kau taki lotu naʻa nau feinga ke tāmateʻi ʻa Sīsuú?
[Fakatātā ʻi he peesi 26, 27
Naʻe pehē ʻe Sīsū, ko e faʻahinga tokolahi tahá ʻoku ʻi he hala fālahi ki he fakaʻauhá. Ko ha tokosiʻi pē ʻoku ʻi he hala fāsiʻi ki he moʻuí
[Fakatātā ʻi he peesi 28, 29]
“ʻOku nau lau ʻoku nau ʻilo ʻa e ʻOtua, ka ʻi heʻenau ngaahi ngaue ʻoku nau fakaʻikaiʻi ia.”—Taitusi 1:16.
ʻI HE LEA
ʻI HE NGĀUE
[Fakatātā ʻi he peesi 30]
Koeʻuhi ko e kehekehe fakalotú, naʻe kau ai ʻa Paula ʻi hono tolomakaʻi ʻo e ākonga ʻa Sīsū ko Sitīveni
[Fakatātā ʻi he peesi 33]
Kapau ʻoku hala ʻa e hala ʻokú ke fou aí, ʻe hanga ʻe he loto-pōlepolé pe loto-taʻeʻunuá ʻo taʻofi koe mei haʻo fakamoʻoniʻi ia?
