Vahe 24

ʻOku Tau Moʻulaloa ki he Fekau ʻe Hongofulú?

1. Ko e hā ʻa e lao naʻe fakaaʻu mai ʻe Mōsese ki he kakaí?

 KO E HĀ ʻA E NGAAHI LAO ʻoku fiemaʻu ʻe he ʻOtua ko Sihová ke tau talangofua ki aí? Kuo pau ke tau tauhi ʻa ia ʻoku ui ʻe he Tohitapú ko e “lao ʻa Mosese” pe ʻi he taimi ʻe niʻihi ʻoku ui ko e “Lao”? (1 Tuʻi 2:3; Taitusi 3:9) ʻOku toe ui pē eni ko e “lao ʻa Sihova,” koeʻuhi ko ia ʻa e Tokotaha naʻá ne foaki mai iá. (1 Kalonikali 16:40) Naʻe fakaaʻu mai pē ʻe Mōsese ʻa e Laó ki he kakaí.

2. ʻOku faʻu ʻa e laó ni ʻaki ʻa e hā?

² ʻOku faʻu ʻa e lao ʻa Mōsesé ʻaki ʻa e ngaahi lao pe ngaahi fekau kehekehe lahi hake he 600, ʻo kau ai ʻa e tefitoʻi lao ʻe 10. Hangē ko ia naʻe pehē ʻe Mōsese: “Naa ne [Sihova] fekau ke mou fai, io koe fekau e hogofulu; bea naa ne tohi ia i he maka lafalafa e ua.” (Teutalōnome 4:​13, PM; ʻEkisoto 31:​18) Ka kia hai naʻe foaki ki ai ʻe Sihova ʻa e Laó, ʻo kau ai ʻa e Fekau ʻe Hongofulú? Naʻá ne foaki ia ki he faʻahinga kotoa ʻo e tangatá? Ko e hā naʻe fakataumuʻa ki ai ʻa e Laó?

KI ʻISILELI KI HA TAUMUʻA MAKEHE

3. ʻOku anga-fēfē ʻetau ʻilo naʻe foaki ʻa e Laó ki ʻIsileli pē?

³ Naʻe ʻikai foaki ʻa e Laó ki he faʻahinga kotoa ʻo e tangatá. Naʻe fai ʻe Sihova ha fuakava pe ha aleapau mo e ngaahi hako ʻo Sēkopé, ʻa ia  naʻa nau hoko ko e puleʻanga ʻo ʻIsilelí. Naʻe foaki ʻe Sihova ʻene ngaahi laó ki he puleʻanga pē taha ko ení. ʻOku ʻai ʻeni ʻe he Tohitapú ke hā mahino ʻia Teutalōnome 5:​1-3 mo e Sāme 147:​19, 20.

4. Ko e hā naʻe foaki ai ʻa e Laó ki he puleʻanga ʻo ʻIsilelí?

⁴ Naʻe ʻeke ʻe he ʻapositolo ko Paulá ʻa e fehuʻí ni: “Ko ia, ko e hā ai ʻa e Lao?” ʻIo, ko e hā ʻa e taumuʻa naʻe foaki ai ʻe Sihova ʻene laó ki ʻIsilelí? Naʻe tali ʻe Paula: “Ke ʻai ke hā mahino ʻa e ngaahi angahalá, kaeʻoua kuo aʻu mai ʻa e hako ʻa ia naʻe fai ki ai ʻa e talaʻofá . . . Ko ia ai, kuo hoko ʻa e Laó ko ʻetau faiako ʻo taki kia Kalaisi.” (Kalētia 3:​19-24, NW) Ko e taumuʻa makehe ʻo hono foaki ʻo e Laó ke maluʻi mo tataki ʻa e puleʻanga ʻo ʻIsilelí ke nau mateuteu ke tali ʻa Kalaisi ʻi heʻene aʻu maí. Ko e ngaahi feilaulau lahi naʻe fiemaʻu ʻo fakatatau ki he Laó naʻa nau fakamanatuʻi ki he kau ʻIsilelí ko e kau angahala ʻa kinautolu ʻa ia ʻoku fiemaʻu ki ai ha Tokotaha-fakamoʻui.​—Hepelū 10:​1-4.

“KO KALAISI KO E FAKANGATA IA ʻO LAO”

5. ʻI he haʻu ʻa Kalaisi pea pekia maʻatautolú, ko e hā leva naʻe hoko ki he Laó?

⁵ ʻOku hā mahino, ko Sīsū Kalaisi ʻa e Fakamoʻui naʻe talaʻofá, ʻo hangē pē ko ia naʻe fanongonongo mai ʻe ha ʻāngelo ʻi hono ʻaloʻí. (Luke 2:​8-14) Ko ia ʻi he haʻu ʻa Kalaisí pea foaki ʻene moʻui haohaoa ko ha feilaulaú, ko e hā leva naʻe hoko ki he Laó? Naʻe toʻo atu ia. Naʻe fakamatala ʻe Paula: “ʻOku ʻikai ke tau kei moʻulaloa ki ha faiako.” (Kalētia 3:​25, NW) Naʻe fiemālie ʻa e kau ʻIsilelí ʻi hono toʻo atu ʻa e Laó. Naʻe fakahaaʻi ai ko e kau angahala ʻa kinautolu, he naʻa nau tō nounou kotoa mei hono tauhi haohaoa ʻa e Lao ko iá. Naʻe pehē ʻe Paula: “Ne  huhuʻi kitautolu ʻe Kalaisi mei he malaʻia faka-Lao.” (Kalētia 3:​10-14) Ko ia ʻoku toe pehē ʻe he Tohitapú: “Ko Kalaisi ko e fakangata ia ʻo Lao.”​—Loma 10:4; 6:14.

6. (a) Ko e hā ʻa e ola naʻe ʻi he kau ʻIsilelí mo e ʻikai ʻIsilelí ʻi hono fakangata ʻo e Laó, pea ko e hā hono ʻuhingá? (e) Ko e hā ʻa e ngāue naʻe fai ʻe Sihova ki he Laó?

⁶ Naʻe hoko ʻa e Laó ʻo hangē ha meʻa fakangatangataʻanga pe “ʻā” ʻi he vahaʻa ʻo e kau ʻIsilelí mo e ngaahi kakai kehe naʻe ʻikai te nau moʻulaloa ki he laó. Kaekehe, ʻi hono feilaulauʻi ʻe Kalaisi ʻene moʻuí, naʻá ne “tāmateʻi . . . ʻa e Lao ko e ngaahi fekau ʻoku faʻuʻaki ʻa e ngaahi tuʻutuʻuni, ke ne fakatupu ʻa e kakai ʻe ua [ʻIsileli mo e ʻikai ʻIsileli] ke tangata foʻou pē taha ʻiate ia.” (ʻEfesō 2:​11-18, NW) ʻOku tau lau ʻo fekauʻaki mo e ngāue naʻe fai ʻe he ʻOtua ko Sihová tonu ki he lao ʻa Mōsesé: “Naʻá ne fakamolemoleʻi angaʻofa ʻetau ngaahi angahalá kotoa peá ne tāmateʻi ʻa e tohi tohinima naʻe tuʻu kiate kitautolu, ʻa ia naʻe faʻuʻaki ʻa e ngaahi tuʻutuʻuni [kau ai ʻa e Fekau ʻe Hongofulú] pea naʻe fakafepaki tuʻu kiate kitautolu [koeʻuhi ko hono fakahalaiaʻi ai ʻa e kau ʻIsilelí ko e kau angahalá]; pea kuó Ne toʻo atu ia ʻaki hono tukifaʻo ia ki he ʻakau fakamamahí.” (Kolose 2:​13, 14, NW) Ko ia, ʻi he feilaulau haohaoa ʻa Kalaisí, naʻe fakangata ai ʻa e Laó.

7, 8. Ko e hā ʻa e meʻa ʻokú ne fakamoʻoniʻi naʻe ʻikai vahevahe ʻa e Laó ki he konga ʻe ua?

⁷ Kaekehe, ʻoku pehē ʻe he faʻahinga ʻe niʻihi ʻoku vahevahe ʻa e Lao ki he konga ʻe ua: Ko e Fekau ʻe Hongofulu, pea mo e toenga ʻo e ngaahi laó. ʻOku nau pehē ko e toenga ʻo e ngaahi laó ko e meʻá ia naʻe fakangatá, ka ʻoku kei tuku pē ʻa e Fekau ʻe Hongofulú. Ka ʻoku ʻikai moʻoni ia. Naʻe lave ʻa Sīsū ʻi heʻene Malanga he Moʻungá ki he Fekau ʻe Hongofulú pea pehē ki he ngaahi konga kehe ʻo e Laó pea naʻe ʻikai te ne fakafaikehekeheʻi kinaua. Ko ia naʻe fakahaaʻi ʻe Sīsū naʻe ʻikai ke vahevahe ʻa e Lao ʻa Mōsesé ki ha konga ʻe ua.​—Mātiu 5:​21-42.

⁸ Toe fakatokangaʻi ʻa e meʻa naʻe fakamānavaʻi ʻe he ʻOtuá ʻa e ʻapositolo ko Paulá ke ne tohí: “Kuo fakaʻataʻatā kitautolu meia Lao.” Naʻe fakaʻataʻatā ʻa e kau Siú mei he ngaahi laó tukukehe pē ʻa e Fekau ʻe Hongofulú? ʻIkai, he ʻoku hoko atu ʻa e lea ʻa Paulá: “Ka neongo ia, ka naʻe ʻikai te u laveʻi ʻa e angahala, ka ne taʻeʻoua pe ʻa e Lao. ʻO pehe; ne ʻikai te u ongona ʻa e manumanu, ka ne taʻeʻoua ʻa e pehe mai ʻe he Lao, ʻOua naʻa ke manumanu.” (Loma 7:​6, 7; ʻEkisoto 20:17) Koeʻuhi ko e pehē “ʻOua naʻa ke manumanu” ko e fekau fakamuimui ia ʻo e Fekau ʻe Hongofulú, ʻoku hā ai naʻe toe fakaʻataʻatā ʻa e kau ʻIsilelí mei he Fekau ʻe Hongofulú.

9. Ko e hā ʻokú ne fakahaaʻi naʻe toe toʻo atu mo e lao ʻo fekauʻaki mo e Sāpate fakauiké?

 ⁹ ʻOku ʻuhinga ení naʻe toe toʻo atu ʻa e lao ko ia ke tauhi ha Sāpate fakauiké, ʻa ia ko hono fā ia ʻi he Fekau ʻe Hongofulú? ʻIo, ʻoku pehē. Ko e meʻa ʻoku lāulea ki ai ʻa e Tohitapú ʻia Kalētia 4:​8-11 mo Kolose 2:​16, 17 ʻoku fakahaaʻi ai ʻoku ʻikai moʻulaloa ʻa e kau Kalisitiané ki he lao ʻa e ʻOtuá naʻe foaki ki he kau ʻIsilelí, fakataha mo ʻene ngaahi fiemaʻu ko ia ke tauhi ha Sāpate fakauiké pea ke fakamanatu mo ha ngaahi ʻaho makehe ʻi he taʻú. ʻOku malava ke toe ʻilo ʻia Loma 14:5 ʻoku ʻikai ko ha fiemaʻu faka-Kalisitiane ʻa hono tauhi ha Sāpate fakauiké.

NGAAHI LAO ʻOKU KAUNGATONU KI HE KAU KALISITIANÉ

10. (a) Ko e hā ʻa e ngaahi lao ʻoku moʻulaloa ki ai ʻa e kau Kalisitiané? (e) Naʻe toʻo ʻa e konga lahi ʻo e ngaahi laó ni mei fē, pea ko e hā ʻoku ʻuhinga lelei ai ʻa hono toʻo kinautolu mei aí?

¹⁰ ʻOku ʻuhinga ení, koeʻuhi ʻoku ʻikai moʻulaloa ʻa e kau Kalisitiané ki he Fekau ʻe Hongofulú, ʻoku ʻikai fiemaʻu ke nau tauhi ha faʻahinga lao? ʻIkai ʻaupito. Naʻe fakahoko ʻe Sīsū ha “fuakava foʻou,” ʻo fakatuʻunga ʻi he feilaulau lelei ange ko ʻene moʻui fakaetangata haohaoa pē ʻaʻaná. ʻOku moʻulaloa ʻa e kau Kalisitiané ki he fuakava foʻoú ni pea ʻoku nau moʻulaloa ki he ngaahi lao faka-Kalisitiané. (Hepelū 8:​7-13; Luke 22:20) Ko e konga lahi ʻo e ngaahi laó ni naʻe toʻo mei he lao ʻa Mōsesé. ʻOku ʻikai ngali kehe ʻa e meʻá ni. ʻOku faʻa hoko ha meʻa meimei tatau mo ia ʻi he taimi ʻoku puleʻi ai ha fonua ʻe ha founga-pule foʻou. ʻOku tāmateʻi nai pea fetongi ʻa e konisitutone naʻe ʻi he founga-pule motuʻá, ka ʻoku tauhi nai ʻe he konisitutone foʻoú ʻa e konga lahi ʻo e ngaahi lao ʻo e konisitutone motuʻá. ʻI ha founga meimei tatau pē, naʻe fakangata ʻa e fuakava ʻo e Laó, ka ko e konga lahi ʻo hono ngaahi lao mo hono ngaahi tefitoʻi moʻoni tefitó naʻe fakahū ia ki he lotu faka-Kalisitiané.

11. Ko e hā ʻa e ngaahi lao pe ngaahi akonaki kuo foaki ki he kau Kalisitiané ʻoku mātuʻaki meimei tatau mo e Fekau ʻe Hongofulú?

¹¹ Fakatokangaʻi ʻa e meʻá ni ʻi hoʻo lau ʻa e Fekau ʻe Hongofulú ʻi he peesi 203, pea fakahoa leva ia mo e ngaahi lao mo e ngaahi akonaki faka-Kalisitiane ko ení: “Ko e ʻEiki [Sihova, NW] ko ho ʻOtua te ke lotu ki ai.” (Mātiu 4:10; 1 Kolinitō 10:​20-22) “Taʻofi kimoutolu mei he tauhi aitoli.” (1 Sione 5:21; 1 Kolinitō 10:14) “Ko ʻemau Tamai ʻoku ʻi hevani, ke tapuhā [ʻoua ʻe takuanoa] ho huafa.” (Mātiu 6:9) “ʻA e fanau, mou talangofua . . . ki hoʻomou matuʻa.” (ʻEfesō 6:​1, 2) Pea ʻoku ʻai ʻe he Tohitapú ke hā mahino ko e fakapō, fai feʻauakí, kaihaʻá, loí mo e mānumanú ʻoku nau fepaki mo e ngaahi lao ki he kau Kalisitiané.​—Fakahā 21:8; 1 Sione 3:15; Hepelū 13:4; 1 Tesalonaika 4:​3-7; ʻEfesō 4:​25, 28; 1 Kolinitō 6:​9-11; Luke 12:15; Kolose 3:5.

12. ʻOku anga-fēfē ʻa hono hoko atu ʻa e tefitoʻi moʻoni ʻo e lao faka-Sāpaté ki he fokotuʻutuʻu faka-Kalisitiané?

 ¹² Neongo ʻoku ʻikai fekauʻi ʻa e kau Kalisitiané ke tauhi ha Sāpate fakauike, ʻoku tau ako ha meʻa mei he fokotuʻutuʻu ko iá. Naʻe mālōlō ʻa e kau ʻIsilelí ʻi ha founga ʻoku fakahoko moʻoni, ka kuo pau ke mālōlō ʻa e kau Kalisitiané ʻi ha founga fakalaumālie. ʻO anga-fēfē? Tupu mei he tuí mo e talangofuá ʻoku liʻaki ai ʻe he kau Kalisitiane moʻoní ʻa hono fai ha ngaahi ngāue siokita. ʻOku fakakau ki he ngaahi ngāue siokitá ni ʻa e ngaahi feinga ke fokotuʻu haʻanau māʻoniʻoni pē ʻanautolu. (Hepelū 4:10) ʻOku ʻikai tauhi ʻa e mālōlō fakalaumālie ko ení ʻi ha ʻaho pē ʻe taha he uike ka ʻi he ʻaho kotoa ʻe fitú. Ko e fiemaʻu ʻo e lao faka-Sāpate moʻoní ke vaheʻi ha ʻaho ʻe taha maʻá e ngaahi meʻa fakalaumālié naʻá ne maluʻi ʻa e kau ʻIsilelí mei heʻenau ngāue siokitaʻaki honau taimí kotoa ke fekumi ki heʻenau lelei fakamatelie pē ʻanautolú. Ko hono ngāueʻaki ʻi he ʻaho kotoa pē ʻa e tefitoʻi moʻoni ko ení ʻi ha founga fakalaumālié ko ha maluʻanga ola lelei ange ia mei he holi ke maʻu koloa lahi fakamatelié.

13. (a) Ko e hā ʻa e lao ʻoku enginaki ki he kau Kalisitiané ke nau ʻosikí, pea ʻoku anga-fēfē ʻenau ʻosiki iá? (e) Ko e hā ʻa e lao naʻe fakamamafaʻi ʻe Sīsuú? (f) Ko e hā ʻa e lao ko e makatuʻunga ia ʻo e lao fakakātoa ʻa Mōsesé?

¹³ Ko ia ʻoku enginaki ki he kau Kalisitiané ke nau “ʻosiki ʻaupito ʻa e lao ʻa Kalaisi,” ka ʻoku ʻikai ko hono tauhi ʻa e Fekau ʻe Hongofulú. (Kalētia 6:2) Naʻe foaki mai ʻe Sīsū ʻa e ngaahi fekau mo e ngaahi fakahinohino lahi, pea ʻi haʻatau talangofua ki ai ʻoku tau tauhi ai pe ʻosiki ʻene laó. Tautautefito ki he ʻofá, naʻe fakamamafaʻi ʻe Sīsū ʻa hono mahuʻingá. (Mātiu 22:​36-40; Sione 13:​34, 35) ʻIo, ko ha lao faka-Kalisitiane ke ʻofa ki he niʻihi kehé. Ko e makatuʻunga ia ʻo e lao fakakātoa ʻa Mōsesé, ʻo hangē ko ia ʻoku pehē ʻe he Tohitapú: “He ʻoku ʻosiki ʻa e Lao kotoa ʻi ha foʻi lea; ʻa ʻeni, Te ke ʻofa ki ho kaungaʻapi ʻo hange ko hoʻo ʻofa kiate koe.”​—Kalētia 5:​13, 14; Loma 13:​8-10.

14. (a) Ko e hā ʻa e lelei ʻe hoko ʻi heʻetau ako mo ngāueʻaongaʻaki ʻa e ngaahi tefitoʻi moʻoni ʻo e lao ʻa Mōsesé? (e) Ko e hā ʻa e meʻa ʻe ueʻi ʻe he ʻofá ke tau faí?

¹⁴ Ko e lao naʻe foaki ʻo fakafou mai ʻia Mōsesé, kau ai mo e Fekau ʻe Hongofulú, ko ha ngaahi kupuʻi lao māʻoniʻoni ia mei he ʻOtuá. Pea neongo ʻoku ʻikai te tau moʻulaloa ki he lao ko iá he ʻahó ni, ʻoku kei mahuʻinga lahi kiate kitautolu ʻa e ngaahi tefitoʻi moʻoni fakaʻotua ʻoku ʻi aí. ʻI hono ako mo ngāueʻaongaʻaki kinautolú te tau tupulaki ʻi he houngaʻia ki he Tokotaha-foakilao lahi ko e ʻOtua ko Sihová. Ka ʻoku totonu ke tautefito ʻetau akó mo ngāueʻaongaʻaki ʻi heʻetau moʻuí ʻa e ngaahi lao mo e ngaahi akonaki faka-Kalisitiané. ʻE ueʻi kitautolu ʻe he ʻofa kia Sihová ke tau talangofua ki he meʻa kotoa pē ʻokú ne lolotonga fiemaʻu meiate kitautolú.​—1 Sione 5:3.

[Fehuʻi ki he Ako]

[Puha ʻi he peesi 203]

KO E FEKAU ʻE HONGOFULÚ

1. “Ko au ko Sihova ko ho ʻOtua . . . ʻOua naʻa ai hao ʻOtua kehe, ʻo uaʻaki au.

2. “ʻOua te ke ngaohi maʻau ha tamapua, pe ha momoʻi fakatātā ʻo ha meʻa ʻo e langi ʻi ʻolunga na, pe ʻo mamani ʻi lalo ni, pe ʻo e tahi ʻi lolofonua. ʻOua te ke hū ki ai, pea ʻoua te ke tauhi ki ai . . .

3. “ʻOua te ke takuanoa ʻa e huafa ʻo Sihova ko ho ʻOtua . . .

4. “Manatu ʻa e ʻaho sapate ke tauhi ia ke tapu. Ko e ʻaho ʻe ono te ke ngāue, ʻo fai ai ho ngaahi nafa kehekehe; ka ko hono ʻaho fitu ko e sapate ia ʻa Sihova ko ho ʻOtua: tapu hoʻo fai ai ha momoʻi ngāue, ʻa koe mo hoʻo fanau tangata pe fanau fefine . . .

5. “Fakaʻapaʻapa ki hoʻo tamai mo hoʻo faʻe; koeʻuhi ke lahi ho ngaahi ʻaho ʻi he kelekele, ʻa ia ʻe foaki kiate koe ʻe Sihova ko ho ʻOtua.

6. “ʻOua naʻa ke fakapō.

7. “ʻOua naʻa ke tono ʻunoho.

8. “ʻOua naʻa ke kaihaʻa.

9. “ʻOua naʻa ke tuʻu ko e fakamoʻoni loi ki ho kaungaʻapi.

10. “ʻOua te ke manumanu ki he fale ʻo ho kaungaʻapi. ʻOua te ke manumanu ki he uaifi ʻo ho kaungaʻapi, pe ki haʻane tamaioʻeiki, pe ki haʻane kaunanga, pe ki haʻane pulu, pe ki haʻane asi, pe ki ha meʻa ʻe taha ʻoku ʻa ho kaungaʻapi.”​—ʻEkisoto 20:​2-17.

[Fakatātā ʻi he peesi 204, 205]

Naʻe hoko ʻa e Laó ʻo hangē ko ha ʻā ʻi he vahaʻa ʻo e kau ʻIsilelí mo e ngaahi kakai kehé