Kautaha Hāmai ʻa e ʻOtuá
Vahe 23
Kautaha Hāmai ʻa e ʻOtuá
1. Ko e hā ʻa e lau ʻa e Tohitapú ʻo fekauʻaki mo e kautaha taʻehāmai ʻa e ʻOtuá?
KO E HĀ ʻOKU MALAVA ai ke tau ʻilo pau ʻoku ʻi ai ha kautaha hāmai ʻa e ʻOtuá? Ko e ʻuhinga ʻe taha he ʻoku ʻi ai ʻene kautaha taʻehāmai. Naʻe fakatupu ʻe Sihova ʻa e kau selupimi, kau selāfimi mo e kau ʻāngelo kehe tokolahi ke nau fai hono finangaló ʻi hēvani. (Sēnesi 3:24; ʻAisea 6:2, 3; Sāme 103:20) Ko e ʻĀngelo-pulé ʻa Sīsū Kalaisi ki he faʻahingá ni kotoa. (1 Tesalonaika 4:16; Siutasi 9; Fakahā 12:7) ʻOku fakamatalaʻi ʻe he Tohitapú ko e kau ʻāngeló ʻoku fokotuʻutuʻu maau “ko ha faʻahinga maʻu taloni, pe ko ha faʻahinga houʻeiki, pe ko ha faʻahinga pule, pe ko ha faʻahinga maʻu tuʻunga.” (Kolose 1:16; ʻEfesō 1:21) Kātoa kinautolu ʻoku nau fai ʻa e fekau ʻa Sihová, ʻo fai fāʻūtaha ʻa e ngāue kuó ne tuku kiate kinautolu ke faí.—Tāniela 7:9, 10; Siope 1:6; 2:1.
2. ʻOku anga-fēfē hono fakahā ʻe he founga naʻe fakatupu ai ʻe he ʻOtuá hotau ʻuniveesi fakamatelié ni ʻa ʻene mahuʻinga lahi ki he fokotuʻutuʻu maaú?
2 ʻOku tau toe maʻu ha fakakaukau ʻo fekauʻaki mo e mahuʻinga ki he ʻOtuá ʻa e fokotuʻutuʻu maaú ʻi heʻetau fakakaukau atu ki heʻene ngaahi fakatupu fakamatelié. Ko e fakatātā, ʻoku laui afe piliona ʻa e ngaahi fetuʻu ʻi he ʻuniveesí ʻoku fokotuʻutuʻu ʻi he ngaahi kulupu kāfakafa ʻoku ui ko e ngaahi kaniva. Ko e ngaahi kanivá ni ʻoku nau fononga takai ʻi he ʻataá ʻi ha founga maau, pea pehē pē ki he ngaahi fetuʻú mo e ngaahi palanite taki taha ʻi he lotolotonga ʻo e ngaahi kanivá ni. Hangē ko ení, ko hotau palanite ko Māmaní, ʻi he taʻu taki taha ʻokú ne ʻalu takai ki he laʻaá, ʻa ia ko e fetuʻu ofi taha ia kiate kitautolú, ʻi he ʻaho ʻe 365, houa ʻe 5, miniti ʻe 48 mo e sēkoni ʻe 45.51. ʻIo, ʻoku mātuʻaki fokotuʻutuʻu maau ʻa e ʻuniveesi matelié ni!
3. Ko e hā ʻoku tau ako mei he fokotuʻutuʻu maau lelei ʻi he ngaahi fakatupu taʻehāmai ʻa e ʻOtuá pea mo ʻene ʻuniveesi fakamatelié?
3 ʻOku tau ako ha meʻa mei he fokotuʻutuʻu maau fakaofo ko ení ʻi he ngaahi fakatupu taʻehāmai ʻa e ʻOtuá pea mo ʻene ʻuniveesi fakamatelié? ʻIo, ʻoku tau ako ai ko Sihová ko ha ʻOtua ʻo e fokotuʻutuʻu maau. Ko ia, ʻoku pau, heʻikai liʻaki ʻe ha ʻOtua pehē ʻa e faʻahinga ʻo e tangatá ʻi he māmaní ʻa ia ʻoku nau mātuʻaki ʻofa kiate iá ʻo taʻe ʻi ai ha tataki mo ha fokotuʻutuʻu maau kiate kinautolu.
KAUTAHA HĀMAI ʻA E ʻOTUÁ—ʻI HE KUO HILÍ MO E LOLOTONGÁ NI
4, 5. ʻOku tau ʻilo fēfē naʻe tataki ʻe he ʻOtuá hono kakaí ʻi ha founga fokotuʻutuʻu maau ʻi he ngaahi ʻaho ʻo ʻĒpalahamé pea pehē ki he puleʻanga ʻo ʻIsilelí?
4 ʻOku fakahā ʻe he Tohitapú kuo tataki maʻu pē ʻe Sihova ʻene kau sevānití ʻi ha founga fokotuʻutuʻu maau. Ko e fakatātā, naʻe taki ʻe he kau tangata ʻo e tuí ʻo hangē ko ʻĒpalahamé ʻa honau ngaahi fāmilí mo e kau sevānití ʻi he lotu kia Sihová. Naʻe ʻai ʻe Sihova ke ʻilo ʻe ʻĒpalahame hono finangaló ʻaki ʻene lea ki ai. (Sēnesi 12:1) Pea naʻe fakahinohino ki ai ʻe he ʻOtuá ke ne ʻoatu ʻa e fakamatalá ni ki he niʻihi kehé, ʻo pehē: “Oku ou iloʻi [ʻa ʻĒpalahame], te ne fekau ene fānau mo hono kau nofoaga kotoabe tuku fakaholo, bea te nau alu i he hala o Jihova.” (Sēnesi 18:19, PM) Ko ha fokotuʻutuʻu maau eni ki ha falukunga kakai ke lotu ʻi he founga totonú kia Sihova.
5 Ki mui aí, ʻi he tupu tokolahi ʻa e kau ʻIsilelí ʻo aʻu ki he laui milioná, naʻe ʻikai fakangofua ʻe Sihova ke taki taha lotu ʻi he founga pē ʻaʻana, ʻo mavahe mei ha fokotuʻutuʻu maau pē. Naʻe fokotuʻu ʻa e kau ʻIsilelí ko ha puleʻanga ʻo e kau lotu fokotuʻutuʻu maau. Naʻe ui ʻa e puleʻanga ʻo ʻIsilelí ko e “fakatahaʻanga ʻa Sihova.” (Nōmipa 20:4, NW; 1 Kalonikali 28:8, NW) Kapau ko ha tokotaha lotu moʻoni koe ʻa Sihova ʻi he taimi ko iá, naʻe pau ke ke hoko ko ha konga ʻo e kau lotu ʻo e fakatahaʻanga ko iá, ʻo ʻikai mavahe mei ai.—Sāme 147:19, 20.
6. (a) Naʻe anga-fēfē hono fakahā ʻe he ʻOtuá naʻe ʻi he kau muimui ʻo Kalaisí ʻa ʻene hōifuá? (e) Ko e hā ʻa e fakamoʻoni ʻoku ʻi ai naʻe fokotuʻutuʻu maau ʻa e kau Kalisitiané ki he lotu?
6 Ko e hā ʻa e tuʻunga naʻe ʻi he ʻuluaki senitulí? ʻOku fakahā ʻe he Tohitapú ko e hōifua ʻa Sihová naʻe ʻi he kau muimui ʻo hono ʻAló ko Sīsū Kalaisi. Naʻe huaʻi hifo ʻe Sihova hono laumālie māʻoniʻoní kiate kinautolu. Ke fakahāhā kuó ne ngāueʻaki ʻa e kautaha Kalisitiané ni kae ʻikai ko e puleʻanga ʻo ʻIsilelí, naʻá ne foaki ʻa e mafai ki ha niʻihi ʻo e muʻaki kau Kalisitiané ke fakamoʻui mahaki, fokotuʻu ʻa e maté pea ke fakahoko mo e ngaahi mana kehe. Heʻikai malava ke ke lau ʻa e Konga Tohitapu Faka-Kalisi Kalisitiané pea taʻemaongo kiate koe ʻa e moʻoniʻi meʻa ʻo pehē naʻe fokotuʻutuʻu maau ʻa e kau Kalisitiané ki he lotu. Ko hono moʻoní, naʻe fekauʻi ʻa kinautolu ke fakatahataha fakataha ki he taumuʻa ko ení. (Hepelū 10:24, 25) Ko ia kapau ko ha tokotaha lotu moʻoni koe ʻa Sihova ʻi he ʻuluaki senitulí, naʻe pau ke ke hoko ko ha konga ʻo ʻene kautaha Kalisitiané.
7. ʻOku anga-fēfē ʻetau ʻilo naʻe ʻikai ngāueʻaki ʻe Sihova ha kautaha ʻoku lahi hake ʻi he tahá ʻi ha vahaʻa taimi pē?
7 Naʻe ngāueʻaki ʻe Sihova ha kautaha ʻo lahi hake ʻi he tahá ʻi ha vahaʻa taimi pē? ʻI he taimi ʻo Noá ko Noa pē mo e faʻahinga naʻe ʻiate ia ʻi loto he ʻaʻaké naʻa nau maʻu ʻa e maluʻi ʻa e ʻOtuá pea hao moʻui atu he lōmakí. (1 Pita 3:20) Pehē foki, naʻe ʻikai ua pe toe lahi hake ʻa e kautaha Kalisitiane ʻi he ʻuluaki senitulí. Naʻe feangai ʻa e ʻOtuá mo e taha pē. Naʻe “taha pe ʻa e ʻEiki, taha ʻa e tui, taha ʻa e papitaiso.” (ʻEfesō 4:5) Tatau pē mo hotau ʻahó ni, naʻe kikiteʻi ʻe Sīsū Kalaisí ʻe taha pē ʻa e matavai ʻo e tataki fakalaumālié ki he kakai ʻa e ʻOtuá.
8. Naʻe anga-fēfē hono fakahāhā ʻe Sīsū ʻe taha pē ʻa e kautaha hāmai ʻa e ʻOtuá ʻi māmani ʻi hotau kuongá ni?
8 ʻI he lave ki heʻene ʻi ai ʻi he mafai faka-Puleʻangá, naʻe pehē ʻe Sīsū: “Bea kohai ae tamaioeiki agatonu mo boto, kuo fakanofo e he ene eiki ke bule ki hono kaugaabi, mo tufaki kiate kinautolu ae mea kai i hono taimi totonu? Oku monuia ae tamaioeiki koia, oka haʻu a ene eiki, o ilo ia oku ne fai behe. Ko eku tala mooni atu kiate kimoutolu, te ne fakanofo ia ke ne buleʻi ene mea kotoabe.” (Mātiu 24:45-47, PM) ʻI heʻene foki mai ʻi he mafai faka-Puleʻangá ʻi he taʻu 1914, naʻe ʻilo ʻe Kalaisi ha kalasi “tamaioeiki agatonu mo boto” ʻoku nau tokonaki ha “mea kai,” pe fakamatala fakalaumālie? ʻIo, naʻá ne maʻu ha “tamaioeiki” pehē ko e toenga ʻi māmani ʻo hono ‘ngaahi tokoua’ ʻe toko 144,000. (Fakahā 12:10; 14:1, 3) Pea talu mei he 1914 kuo laui miliona ʻa e kakai kuo nau tali ʻa e “mea kai” ʻoku nau tokonakí, pea kuo kamata ke nau fai ʻa e lotu moʻoní fakataha mo kinautolu. Ko e kautaha ko eni ʻo e kau sevāniti ʻa e ʻOtuá ʻoku ʻiloa ko e Kau Fakamoʻoni ʻa Sihova.
9. (a) Ko e hā ʻoku ʻai ai ʻe he kau sevāniti ʻa e ʻOtuá ʻa e hingoa ko e Kau Fakamoʻoni ʻa Sihová? (e) Ko e hā ʻoku nau ui ai honau ngaahi feituʻu faiʻanga lotú ko e Kingdom Hall?
9 ʻOku hanga ʻa e Kau Fakamoʻoni ʻa Sihová ki he ʻOtuá mo ʻene Folofolá ki ha tataki ʻi he meʻa kotoa pē ʻoku nau faí. Naʻa mo honau hingoa ko e Kau Fakamoʻoni ʻa Sihová ʻokú ne fakahaaʻi ko ʻenau ngāue tefitó ke fai fakamoʻoni ʻo fekauʻaki mo e huafa mo e puleʻanga ʻo e ʻOtua ko Sihová, ʻo hangē ko ia naʻe fai ʻe Kalaisí. (Sione 17:6; Fakahā 1:5) Pea ʻoku nau ui ʻa e feituʻu ʻoku nau fakataha ai ke lotú ko e Kingdom Hall koeʻuhi ko e puleʻanga [Kingdom] ʻo e ʻOtuá ʻi he Mīsaiá, pe Kalaisí, ko e kaveinga ia ʻo e Tohitapú fakakātoa. Koeʻuhi ʻoku hā mahino naʻe maʻu ʻe he lotu faka-Kalisitiane he ʻuluaki senitulí ʻa e hōifua ʻa e ʻOtuá, ʻoku tā sīpinga ki ai ʻe he Kau Fakamoʻoni ʻa Sihová ʻa ʻenau kautahá. Tau kiʻi vakai ange ki he muʻaki kautaha Kalisitiane ko iá pea fakatokangaʻi ʻa e ngaahi meʻa ʻoku tatau ai mo e kautaha hāmai ʻa e ʻOtuá he ʻaho ní.
KO E SĪPINGA ʻA E ʻULUAKI SENITULÍ
10. Ko e hā ʻa e ngaahi meʻa hā mahino ʻo e kautaha Kalisitiane he ʻuluaki senitulí?
10 Pe ko fē pē ha feituʻu naʻe ʻi ai ʻa e kau Kalisitiané ʻi he ʻuluaki senitulí, naʻa nau fakatahataha fakataha ʻi he ngaahi kulupu ke lotu. Naʻe fakataha maʻu pē ʻa e ngaahi fakatahaʻangá ni ke feohi mo ako. (Hepelū 10:24, 25) Ko ʻenau ngāue tefitó ke malanga mo faiako ʻo fekauʻaki mo e puleʻanga ʻo e ʻOtuá, ʻo hangē ko ia naʻe fai ʻe Kalaisí. (Mātiu 4:17; 28:19, 20) Kapau naʻe tafoki ha mēmipa ʻo e fakatahaʻangá ki ha founga moʻui kovi, naʻe tuku ia ki tuʻa mei he fakatahaʻangá.—1 Kolinitō 5:9-13; 2 Sione 10, 11.
11, 12. (a) Ko e hā ʻokú ne fakamoʻoniʻi naʻe maʻu ʻe he muʻaki ngaahi fakatahaʻanga Kalisitiané ʻa e tataki mo e fakahinohino mei he kau ʻapositoló mo e kau “mātua” ʻi Selusalemá? (e) Ko e hā hono ʻuhinga ʻo e fakahinohino “fakateokalati”? (f) Ko e hā ʻa e ola mei hono tali ʻe he ngaahi fakatahaʻangá ʻa e fakahinohino peheé?
11 Naʻe taki taha tauʻatāina pē ʻa e ngaahi fakatahaʻanga Kalisitiané ʻi he ʻuluaki senitulí, ʻo taki taha fai pē ʻene fili ʻi ha ngaahi meʻa? ʻIkai, ʻoku fakahā ʻe he Tohitapú naʻa nau fāʻūtaha ʻi he tui faka-Kalisitiane pē ʻe taha. Naʻe maʻu ʻe he ngaahi fakatahaʻangá kotoa ʻa e tataki mo e fakahinohino mei he matavai tatau pē. Ko ia ai, ʻi he malanga hake ha fakakikihi ʻo fekauʻaki mo e kamú, naʻe ʻikai ke taki taha fai ʻe he ngaahi fakatahaʻangá pe ko ha tokotaha ʻenau fili ki he meʻa ke faí. Ka naʻe fekauʻi ʻa Paula mo Panepasa mo e niʻihi kehe ke “alu hake ki Jelusalema . . . ki he kau abosetolo moe mātua, koeuhi koe mea ni.” ʻI hono fai ʻe he kau mātuʻá ni ʻenau filí ʻaki ʻa e tokoni ʻa e Folofola ʻa e ʻOtuá mo hono “laumalie maonioni,” naʻa nau tuku atu ha kau tangata angatonu ke fakahā ia ki he ngaahi fakatahaʻangá.—Ngāue 15:2, 27-29, PM.
12 Ko e hā ʻa e ola mei hono maʻu ʻe he ngaahi fakatahaʻangá ʻa e tataki mo e fakahinohino fakateokalatí ni pe foaki fakaʻotuá? ʻOku pehē ʻe he Tohitapú: “Bea i he e nau [ko e ʻapositolo ko Paulá mo hono takangá] alu i he gaahi kolo, naa nau tuku kiate kinautolu ae fono aia nae fokotuu e he kau abosetolo moe mātua i Jelusalema, ke nau fai. Bea nae ajili ai ae tuu mau ae gaahi jiaji i he tui, bea nae fakatokolahi akinautolu i he aho kotoabe.” (Ngāue 16:4, 5, PM) ʻIo, naʻe ngāue fakataha ʻa e ngaahi fakatahaʻangá kotoa ki he meʻa naʻe fili ʻe he kulupu kau mātuʻa ʻi Selusalemá, pea naʻa nau tupu ʻo toe mālohi ange ʻi he tuí.
FAKAHINOHINO FAKATEOKALATI HE ʻAHO NÍ
13. (a) Mei he feituʻu fē ʻi he māmaní pea fakafou mai ʻi he kulupu ʻo e kau tangata fē ʻoku maʻu ai ʻe he kautaha hāmai ʻa e ʻOtuá ʻa e tataki he ʻahó ní? (e) Ko e hā ʻa e felāveʻi ʻo e kulupu pulé ki he “tamaioeiki agatonu mo boto”?
13 ʻOku toe maʻu ʻe he kautaha hāmai ʻa e ʻOtuá he ʻaho ní ʻa e tataki mo e fakahinohino fakateokalati. ʻI he ʻuluʻi ʻōfisi ʻo e Kau Fakamoʻoni ʻa Sihová ʻi Brooklyn, Niu ʻIoaké, ʻoku ʻi ai ha kulupu pule ko e kau tangata Kalisitiane matuʻotuʻa ange mei he ngaahi tapa kehekehe ʻo e māmaní ʻoku nau fai ʻa e tokanga ʻoku fiemaʻu ki he ngaahi ngāue ʻi māmani lahi ʻa e kakai ʻa e ʻOtuá. ʻOku fokotuʻuʻaki ʻa e kulupu pulé ni ʻa e kau mēmipa ʻo e “tamaioeiki agatonu mo boto.” ʻOkú ne ngāue ko ha fakafofonga maʻá e “tamaioeiki” angatonu ko iá.
14. ʻOku fakafalala ki he hā ʻa e kulupu pule ʻa e kakai ʻa e ʻOtuá ʻi hono fai ʻene ngaahi filí?
14 ʻOku taukei he ngaahi taʻu lahi ʻi he ngāue ʻa e ʻOtuá ʻa e kau tangata ʻo e kulupu pule ko iá, ʻo hangē ko e kau ʻapositolo mo e kau tangata matuʻotuʻa ange ʻi Selusalemá. Ka ʻoku ʻikai te nau falala ki ha poto fakaetangata ʻi hono fai ha ngaahi fili. Koeʻuhi ko hono puleʻi fakateokalati ʻa kinautolú, ʻoku nau muimui ʻi he faʻifaʻitakiʻanga ʻa e muʻaki kulupu pule ʻi Selusalemá, ʻa ia ko ʻenau ngaahi filí naʻe fakatuʻunga ʻi he Folofola ʻa e ʻOtuá pea naʻe fai ʻi he malumalu ʻo e tataki ʻa e laumālie māʻoniʻoní.—Ngāue 15:13-17, 28, 29.
KO HONO TATAKI HA KAUTAHA ʻI MĀMANI LAHI
15. Ko e hā ʻoku fakahaaʻi ai ʻe he ngaahi lea ʻa Sīsū ʻia Mātiu 24:14 ʻe maʻu ʻe he ʻOtuá ha kautaha lahi ʻi māmani he lolotonga ʻa e taimi ʻo e ngataʻangá?
15 Naʻe ʻomai ʻe Sīsū Kalaisi ha fakakaukau ʻo fekauʻaki mo e lahi ʻo e kautaha ʻe maʻu ʻe he ʻOtuá ʻi he māmaní he lolotonga ʻo e taimi ko eni ʻo e ngataʻangá ʻi heʻene pehē: “Bea koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” (Mātiu 24:14, PM) Fakakaukau atu ki hono lahi fakaʻulia ʻo e ngāue ʻoku fiemaʻu ke tala ki he laui afe miliona ʻo e kakai ʻi he māmaní ʻo fekauʻaki mo e puleʻanga ʻo e ʻOtuá kuo fokotuʻú. ʻOku teuʻi ke fai ʻa e ngāue lahí ni ʻe he kautaha Kalisitiane ʻi onopooní ʻa ia ʻoku hanga ki hono kulupu pulé ki ha tataki mo ha fakahinohino?
16. (a) Ko e hā kuo fokotuʻu lahi ai ʻe he Kau Fakamoʻoni ʻa Sihová ʻa e ngaahi fale paaki lalahí? (e) Ko e hā ʻoku ngaohi ʻi he ngaahi fale paakí ni?
16 ʻOku lolotonga malangaʻi ʻe he Kau Fakamoʻoni ʻa Sihová ʻa e pōpoaki ʻo e Puleʻangá ʻo laka hake he fonua mo e ʻotu motu ʻe 200 ʻi he māmaní kātoa. Kuo fokotuʻu ʻa e ngaahi fale paaki lalahi ʻi he ngaahi fonua lahi ke tokoni ki he kau malanga ʻo e Puleʻangá ʻoku laka hake he toko 4,000,000 (ʻi he 1990) ke fakahoko ʻa e ngāué ni. ʻOku lahi ʻaupito ʻa e ngaahi Tohitapu mo e ngaahi tohi faka-Tohitapu ʻoku ngaohi ai. ʻOku fakaʻavalisi ʻi he ʻaho ngāue kotoa pē, ʻoku laka hake ʻi he makasini Taua Leʻo mo e Awake! ʻe ua miliona ʻoku paaki pea fakaheka mei he ngaahi fale paakí ni.
17. (a) Ko e hā ʻoku teuteuʻi ai ʻa e ngaahi tohi faka-Tohitapú ni? (e) Ko e hā ʻoku fakaafeʻi koe ke ke faí?
17 ʻOku teuteuʻi ʻa e ngaahi tohi faka-Tohitapú ni kotoa ke tokoniʻi ha faʻahinga ke tupulaki ʻi he ʻilo ki he ngaahi taumuʻa maʻongoʻonga ʻa Sihová. Ko hono moʻoní, ko e foʻi lea “Fanongonongo ʻa e Puleʻanga ʻo Sihová” ko e konga ia ʻo e ʻuluʻitohi ʻo e makasini Ko e Taua Leʻó. ʻOku fakaafeʻi koe ke kau ʻi hono tufaki atu ʻa e ngaahi tohi faka-Tohitapú ni pea fakamatala ki he niʻihi kehé ʻa e ngaahi moʻoni faka-Tohitapu ʻoku ʻi aí. Hangē ko ení, ʻoku ʻi ai ha taha ʻoku malava ke ke ʻinasi fakataha mo ia ʻi he fakamatala mātuʻaki mahuʻinga kuó ke ako mei he tohi ko ení, Te Ke Malava ʻo Moʻui Taʻengata he Palataisi ʻi he Māmaní?
18. (a) Ko e kautaha fēfē ʻa e kautaha ʻa e ʻOtuá he ʻahó ni? (e) Ko e hā ʻoku fiemaʻu ai ʻa e fakalototoʻa lahi ki he kakai ʻa e ʻOtuá he taimi ní?
18 Hangē pē ko ia ʻi he ʻuluaki senitulí, ko e kautaha ʻa e ʻOtuá ʻi he ʻahó ni ko ha kautaha ʻo e kau malanga ʻo e Puleʻangá kuo nau fakatapui mo papitaiso. Pea ʻoku fokotuʻu ia ke tokoni ki hono kau mēmipá kotoa ke kau ʻi he ngāue fakamalangá ni. ʻOku fiemaʻu ki he faʻahingá ni ha fakalototoʻa lahi ʻaupito mo ha fakatupu-mālohi fakalaumālie, koeʻuhi ʻoku fakafepakiʻi ʻa e pōpoaki ʻo e Puleʻangá ʻe Sētane mo e faʻahinga ʻoku malava ke ne tākiekiná. Ko e kau fakafepaki pehē naʻa nau ʻai ke tāmateʻi ʻa Sīsū ʻi hono malangaʻi ʻa e Puleʻangá, pea ʻoku fakatokanga mai ʻe he Tohitapú ʻe toe fakatangaʻi pē mo hono kau muimuí.—Sione 15:19, 20; 2 Tīmote 3:12.
19. (a) Ko hai ʻoku tokonaki mai he taimí ni ke tokoni mo fakatupu-mālohi ʻa e kakai ʻa e ʻOtuá? (e) ʻOku anga-fēfē ʻa hono maluʻi ʻa e fakatahaʻangá mei he ngaahi tākiekina kovi ʻoku malava ke ne fakameleʻi iá?
19 Hangē ko ia ʻi he ʻuluaki senitulí ʻoku fakanofo he ʻahó ni ʻa e kau “mātua” ke nau tokoni mo fakatupu-mālohi ʻa e fakatahaʻanga taki taha. ʻOku malava foki ke nau tokoniʻi koe ʻaki ʻa e akonaki faka-Tohitapu ke fekuki mo e ngaahi palopalema kehekehe. ʻOku toe maluʻi ʻe he kau mātuʻá ni “ʻa e fanga sipi ʻa e ʻOtua.” Ko ia ai, ka tafoki ha mēmipa ʻo e fakatahaʻangá ki ha founga moʻui kovi peá ne fakafisi ke liliu, ʻoku fakapapauʻi leva ʻe he kau “mātua” ke tuku ki tuʻa, pe tuʻusi mei he fakatahaʻangá ha taha pehē. Ko ia ʻoku tauhimaʻu ke moʻui lelei mo maʻa fakalaumālie ʻa e fakatahaʻangá.—Taitusi 1:5; 1 Pita 5:1-3; ʻAisea 32:1, 2; 1 Kolinitō 5:13.
20. (a) Ko hai naʻe fekau atu ʻe he kulupu pule ʻi Selusalemá he ʻuluaki senitulí, pea ko e hā hono ʻuhingá? (e) Ko hai ʻi he ʻahó ni ʻoku fekau atu ʻe he kulupu pulé?
20 Hangē pē ko hono fekau atu ʻe he kulupu pule ʻi Selusalemá ʻa e kau fakafofonga makehé, ʻo hangē ko Paula mo Sailosí, ke fakahā ʻa e ngaahi fakahinohino mo fai ha fakalototoʻa ki he kakai ʻa e ʻOtuá, ʻoku fai pehē ʻe he kulupu pule ʻi he ʻahó ní ʻi he taimi ko eni ʻo e ngataʻangá. (Ngāue 15:24-27, 30-32) ʻOku meimei tuʻo ua he taʻu ʻoku fekau atu ai ha faifekau taukei, ʻoku ui ko e ʻovasia fakafeituʻu, ke vaheʻi ha uike ʻe taha mo e fakatahaʻanga taki taha ʻi hono vāhenga-ngāué.
21. ʻOku anga-fēfē ʻa e tokoni ʻa e ʻovasia fakafeituʻú ki he ngaahi fakatahaʻanga ʻa e kakai ʻa e ʻOtuá?
21 ʻOku laka hake he ngaahi fakatahaʻanga ʻe 60,000 ʻa e Kau Fakamoʻoni ʻa Sihová ʻi māmani kotoa, pea ʻoku vahevahe ʻa kinautolú ni ki he ngaahi vāhenga-ngāue fakafeituʻu ʻa ia ʻoku meimei fakatahaʻanga ʻe 20 ʻi ai. ʻI he ʻaʻahi ʻa e ʻovasia fakafeituʻú ki he ngaahi fakatahaʻanga ʻi he vāhenga-ngāue ʻoku ngāue ki aí, ʻokú ne langa hake ʻa e kau fakamoʻoni ʻo e Puleʻangá ʻi heʻene ʻalu fakataha mo kinautolu ʻi heʻenau ngāue fakamalangá mo fakafaiakó. Tukukehe hono fakaʻaiʻai kinautolu ʻi he founga ko ení, ʻokú ne fai ha ngaahi fokotuʻu ke tokoniʻi kinautolu ke fakalakalaka ʻenau ngāue fakafaifekaú.—Ngāue 20:20, 21.
22. (a) Ko e toe hā ʻa e fokotuʻutuʻu ʻoku fai tuʻo ua he taʻu ke maʻu ai ʻa e mālohi ʻe he kakai ʻa e ʻOtuá? (e) Ko e hā ʻa e fakaafe ʻoku fai atu kiate koe?
22 ʻOku tokonaki mai ʻa e toe fakalototoʻa mo e fakatupu-mālohi koeʻuhi ʻoku faʻa fai tuʻo ua he taʻu ʻa e fakataha ʻa e ngaahi fakatahaʻanga ʻi he feituʻu taki taha ki ha fakataha ʻaho taha mo ʻaho ua. ʻI he taimi pehe ní ʻoku mei he toko uangeau pe tolungeau nai ʻo aʻu ki he toko 2,000 nai ʻa e faʻahinga ʻoku kau ki aí. ʻOku fakaafeʻi koe ke ke kau ki he fakataha hoko mai ʻi ho feituʻú. ʻOku mau ʻilo pau te ke maʻu ʻi he fakatahá ʻa e fiemālie fakalaumālie mo ʻaonga fakafoʻituitui.
23. (a) Ko e hā ʻa e ngaahi fakataha kehe ʻoku fai tuʻo taha pē he taʻu? (e) Ko e hā ʻa e lahi ʻo e taha ʻo e ngaahi fakatahá ni?
23 Pea ʻoku tuʻo taha pē he taʻu hono fai ʻi ha ngaahi ʻaho ha fakataha lahi ange ʻoku ui ko e fakataha fakavahe. Ko e hā ʻoku ʻikai fai ai ha feinga lahi ke kau ki ai mo fakamoʻoniʻi kiate koe ʻa hono fakamānakó mo hono ʻaonga fakalaumālié? ʻI he ngaahi taʻu ʻe niʻihi, ʻi he ʻikai fai ha ngaahi fakataha fakavahé, kuo fai ai ha ngaahi fakataha lahi ange fakafonua pe fakavahaʻapuleʻanga. Ko e fakataha lahi taha kuo fai ʻi he feituʻu ʻe taha ko e fakataha naʻe fai ʻi he Yankee Stadium mo e Polo Grounds ʻi Niu ʻIoake he ʻaho ʻe valu ʻi he 1958. ʻI he taimi ko iá naʻe ʻi ai ʻa e toko 253,922 ki he malanga fakahāhā ko e “ʻOku Pule ʻa e Puleʻanga ʻo e ʻOtuá—ʻOku Ofi ʻa e Ngataʻanga ʻo Māmaní?” Talu mei ai mo e ʻikai ha feituʻu ʻe haofia ai ha fuʻu kakai tokolahi pehē, ko ia kuo fai ha ngaahi fokotuʻutuʻu ki he ngaahi feituʻu ʻi he ngaahi kolo lalahí ke ngāueʻaki ki he ngaahi fakataha lahí.
NGAAHI FAKATAHA ʻI HE NGAAHI FAKATAHAʻANGÁ
24. Ko e hā ʻa e ngaahi fakataha ʻe nima ʻoku fai fakauike ʻi he ngaahi fakatahaʻanga ʻa e kakai ʻa e ʻOtuá?
24 ʻOku toe fokotuʻutuʻu ʻe he kulupu pule ʻo e Kau Fakamoʻoni ʻa Sihová ʻa e polokalama fāitaha ʻo e fakahinohino faka-Tohitapú ʻa ia ʻoku fai ʻi he ngaahi fakatahaʻanga kotoa ʻo e kakai ʻa Sihová. ʻOku fai ʻe he fakatahaʻanga taki taha ʻa e ngaahi fakataha ʻe nima he uike. Ko e Ako Fakafaifekau Fakateokalati, Fakataha Ngāue, Malanga Fakahāhā, ako Taua Leʻo mo e ako Tohitapu fakaefakatahaʻanga. Koeʻuhi kuo teʻeki ai nai te ke maheni mo e ngaahi fakatahá ni, te mau fakamatalaʻi nounou atu ia.
25, 26. Ko e hā ʻa e taumuʻa ʻo e Ako Fakafaifekau Fakateokalatí mo e Fakataha Ngāué?
25 ʻOku fakataumuʻa ʻa e Ako Fakafaifekau Fakateokalatí ke tokoniʻi ʻa e kau akó ke hoko ʻo ola lelei ange ʻi he lea ki he niʻihi kehé ʻo fekauʻaki mo e puleʻanga ʻo e ʻOtuá. Mei he taimi ki he taimi ʻoku fai ʻe he faʻahinga ʻoku kau ki aí ha ngaahi malanga nounou ki he kulupú fakakātoa ʻi ha ngaahi kaveinga faka-Tohitapu. ʻOku fai leva ʻe ha tokotaha mātuʻa taukei ha ngaahi fokotuʻu ke fakalakalaka ai.
26 ʻOku toe faʻa fai foki ʻa e Fakataha Ngāué ʻi he efiafi tatau pē. ʻOku pulusi ʻa e polokalama ki he fakataha ko ení ʻi he Ko ʻEtau Ngāue Fakafaifekau ʻo e Puleʻangá, ko ha pepa ʻoku pulusi fakamāhina ʻo peesi ua pe lahi ange kuo ʻetitaʻi ʻe he kulupu pulé. Lolotonga ʻa e fakatahá ni ʻoku fakahā ai ha ngaahi fokotuʻu mo e fakahāhā ʻaonga ʻo fekauʻaki mo e ngaahi founga ola lelei ʻo e lea ki he niʻihi kehé ʻo kau ki he pōpoaki ʻo e Puleʻangá. ʻI he founga tatau, naʻe fakalototoʻaʻi ʻe Kalaisi ʻa hono kau muimuí peá ne ʻoange kiate kinautolu ʻa e ngaahi fakahinohino ki he founga ke fakahoko ai ʻenau ngāue fakafaifekaú.—Sione 21:15-17; Mātiu 10:5-14.
27, 28. Ko e faʻahinga fakataha fēfē ʻa e Malanga Fakahāhā, ako Taua Leʻó mo e ako Tohitapu fakaefakatahaʻangá?
27 ʻOku faʻa fai foki ʻa e Malanga Fakahāhā mo e ako Taua Leʻó ʻi he ʻaho Sāpaté. ʻOku fai ha ngaahi feinga makehe ke fakaafeʻi ʻa e kau mahuʻingaʻia foʻoú ki he Malanga Fakahāhā, ʻa ia ko ha malanga faka-Tohitapu ʻoku fai ʻe ha faifekau alafua. Ko e ako Taua Leʻó ko ha fetalanoaʻaki fehuʻi-mo-e-tali ʻi ha kupu faka-Tohitapu ʻoku hā ʻi he tatau lolotonga ʻo e makasini ko e Taua Leʻó.
28 Neongo ʻoku fakataha nai ʻa e fakatahaʻangá fakakātoa ki ha Kingdom Hall ki he ngaahi fakataha ʻoku hā ʻi ʻolungá, ʻoku fakataha fakakulupu siʻi ange ʻi he ngaahi ʻapi nofoʻangá ki he ako Tohitapu fakaefakatahaʻangá ʻi he uike kotoa. Ko ha tokoni ako faka-Tohitapu ʻo hangē ko e tohi ko eni ʻokú ke laú ʻoku ngāueʻaki ko e makatuʻunga ki he fetalanoaʻaki faka-Tohitapu ko iá, ʻa ia ʻoku houa ʻe taha nai hono fuoloá.
29. (a) Ko e hā ʻa e fakamanatu ʻoku tauhi ʻe he kau Kalisitiane moʻoní he taʻu taki taha? (e) Ko hai ʻoku maʻu ʻinasi totonu ʻi he mā mo e uainé?
29 Tānaki atu ki he ngaahi fakataha tuʻumaʻú ni, ʻoku fai ʻe he Kau Fakamoʻoni ʻa Sihová ha fakataha makehe he taʻu taki taha ko hono fakamanatu fakataʻu ʻo e pekia ʻa Sīsuú. ʻI hono ʻuluaki fokotuʻutuʻu ʻo e fakamanatu ko eni ʻo ʻene pekiá, naʻe pehē ʻe Sīsū: “Fai eni i he fakamanatu kiate au.” (Luke 22:19, 20, PM) Lolotonga ʻa e ouau faingofuá ni naʻe ngāueʻaki ʻe Sīsū ʻa e uaine mo e mā taʻefakatupu ko e fakatātā ʻo e moʻui naʻá ne teu ke feilaulauʻi maʻá e faʻahinga ʻo e tangatá. Ko ia ʻi he houa kai Fakamanatu fakataʻú ni ʻoku fakahāhā ai ʻe he toenga ʻi māmani ʻo e kau muimui pani ʻe toko 144,000 ʻo Kalaisí ʻa ʻenau ʻamanaki fakahēvaní ʻaki ʻenau maʻu ʻinasi ʻi he mā mo e uainé.
30. (a) Ko toe hai ʻokú ne maʻu totonu ʻa e Fakamanatú, pea ko e hā ʻenau ʻamanakí? (e) ʻOku anga-fēfē hono fakamatalaʻi ʻe Sīsū ʻa e faʻahingá ni?
30 Ko e laui miliona leva ʻo e niʻihi kehe ʻoku nau maʻu ʻa e Fakamanatú ni ʻi he ngaahi Kingdom Hall takatakai ʻi he māmaní, ʻoku nau fiefia ke hoko ko e kau mamata ki he meʻa ʻoku faí. ʻOku toe fakamanatu ai kiate kinautolu foki ʻa e meʻa naʻe fai ʻe he ʻOtua ko Sihová mo Sīsū Kalaisí ke ʻai ke malava ai honau fakahaofi mei he angahalá mo e maté. Ka ʻi he ʻikai ke nau fakatuʻotuʻa atu ki he moʻui fakahēvaní, ʻoku nau fiefia ʻi he ʻamanaki ko e moʻui taʻengata he palataisi ʻi he māmaní. ʻOku nau hangē ko Sione ko e Papitaisó ʻa ia naʻá ne lave pē kiate ia ko ha “kaumeʻa ʻo e tangata taʻané” ka ʻoku ʻikai ko ha konga ʻo e fefine taʻane ʻa Kalaisi ʻa ia ʻoku fokotuʻuʻaki ʻa e toko 144,000. (Sione 3:29, NW) Ko e faʻahinga ʻe laui miliona ko ení ko e konga ʻo e “fanga sipi kehe” ʻa ia naʻe lave ki ai ʻa Sīsuú. ʻOku ʻikai ko ha kau mēmipa kinautolu ʻo e “fanga sipi toko siʻi.” Kaekehe, hangē ko ia naʻe pehē ʻe Sīsū, ʻoku nau ngāue fāʻūtaha mo e faʻahinga ʻo e “fanga sipi toko siʻi” koeʻuhi ke nau hoko kotoa “ko e takanga pe taha.”—Sione 10:16; Luke 12:32.
KO HONO TAUHI ʻA E ʻOTUÁ FAKATAHA MO ʻENE KAUTAHÁ
31. Ko e hā ʻa e fakamoʻoni ʻoku ʻi ai ʻoku ʻikai hōifua ʻa e ʻOtuá ʻi he faʻahinga ʻoku nau kei hoko ko e konga ʻo e lotu loí pea nau toe feinga ke hoko ko ha konga ʻo ʻene kautahá?
31 He meʻa toki hā mahino, ʻoku ʻi ai ha kautaha hāmai ʻa e ʻOtua ko Sihová he ʻahó ni, ʻo hangē ko ia ʻi he kuo hilí! ʻOkú ne lolotonga ngāueʻaki ia ke akoʻi ʻa e kakaí ki he moʻui ʻi heʻene fokotuʻutuʻu foʻou angatonú. Kaekehe, ʻoku ʻikai malava ke tau hoko ko ha konga ʻo e kautaha ʻa e ʻOtuá pea ʻi he taimi tatau pē pea hoko ko ha konga ʻo e lotu loí. ʻOku pehē ʻe he Folofola ʻa e ʻOtuá: “ʻOua te mou hanga ʻo hoa-ʻa-kehe, he nonofo mo e kau taʻelotu: he meʻataha fefe ʻa e faitotonu mo e malakilao? pe feohi fefe ʻa e maama mo e poʻuli? . . . pe ʻinasi fakataha fefe ʻa e lotu mo e taʻelotu?” Ko ia ʻoku fekau mai ʻe he ʻOtuá: “Ko ia, mou hiki mei honau lotolotonga, pea mavahe kimoutolu.”—2 Kolinitō 6:14-17.
32. (a) Kapau te tau “hiki mei honau lotolotonga,” ko e hā kuo pau ke tau faí? (e) Ko e hā ʻa e tāpuaki te tau maʻu ʻo kapau te tau ngāue fakapapau ke tauhi ʻa e ʻOtuá fakataha mo ʻene kautaha hāmai fakateokalatí?
32 ʻOku ʻuhinga ki he hā ʻa e pehē ke “hiki mei honau lotolotonga”? ʻOku ʻikai malava ke tau talangofua ki he fekau ko iá ʻaki haʻatau kei hoko ko ha konga pe fai ha poupou ki ha kautaha lotu tukukehe meiate ia ʻoku ngāueʻaki ʻe he ʻOtua ko Sihová. Ko ia kapau ʻoku kei kau ha faʻahinga ʻo kitautolu ki ha kautaha lotu pehē, ʻoku fiemaʻu ke tau fakahā kiate kinautolu ʻoku tau mavahe mei ai. Kapau ʻoku tau hiki he taimí ni mei he lotolotonga ʻo e faʻahinga ʻoku nau fai ʻa e lotu loí pea tau ngāue fakapapau ke tauhi ʻa e ʻOtuá fakataha mo ʻene kautaha hāmai fakateokalatí, te tau kau ki he faʻahinga ʻoku pehē ʻe he ʻOtuá ʻo fekauʻaki mo kinautolu: “Te u faleʻaki kinautolu, te u ʻeveʻeva ʻiate kinautolu, pea te u nofo ko honau ʻOtua, pea te nau nofo ko hoku kakai.”—2 Kolinitō 6:16.
[Fehuʻi ki he Ako]
[Fakatātā ʻi he peesi 192]
ʻI he taimi ʻo e Lōmakí, naʻe lahi hake he tahá ʻa e kautaha ʻa e ʻOtuá?
[Fakatātā ʻi he peesi 196]
KO E ʻULUʻI ʻOFISI ʻO E KAU FAKAMOʻONI ʻA SIHOVÁ HE MĀMANÍ
Ko e NGAAHI ʻOFISI PULE
Komipiuta
PAAKIʻANGA ʻI BROOKLYN
Paaki Fakalōteli
Faiʻanga Takafi Tohi
Fakahekaʻanga Tohi
[Fakatātā ʻi he peesi 197]
NIʻIHI ʻO E TOE NGAAHI PAAKIʻANGA LAHI ʻA E WATCH TOWER
Pelēsila
ʻIngilani
ʻAfilika Tonga
Wallkill, Niu ʻIoake
Kānata
[Fakatātā ʻi he peesi 198]
Niʻihi ʻo e toko 253,922 ʻi he fakataha ʻa e Kau Fakamoʻoni ʻa Sihová ʻi Niu ʻIoake
Polo Grounds
Yankee Stadium
[Fakatātā ʻi he peesi 201]
Ko ha polokalama fakahinohino faka-Tohitapu ʻoku fai ʻi he ngaahi fakataha ʻa e Kau Fakamoʻoni ʻa Sihová
