Vahe 21

Ko e ʻAho Fakamaaú mo e Hili Iá

1. Ko e hā ha vakai lahi ʻo fekauʻaki mo e ʻAho Fakamaaú?

 KO E HĀ hoʻo fakakaukau ʻi hoʻo fanongo ʻo fekauʻaki mo e ʻAho Fakamaaú? ʻOku fakakaukauloto atu ʻa e niʻihi ki ha taloni lahi, pea ʻi muʻa aí ʻoku tuʻu fakaholoholo lōloa ai ʻa e kakai kuo toetuʻu mei he maté. ʻI ha aʻu atu ʻa e tokotaha taki taha ki muʻa ʻi he taloní, ʻoku fakamaauʻi ia tuʻunga ʻi heʻene ngaahi ngāue he kuo hilí, ʻa ia kuo tohi kotoa ia ʻi he tohi ʻa e Fakamaaú. Fakatuʻunga ʻi he ngaahi meʻa naʻá ne faí, ʻoku ʻoatu ai ʻa e tokotaha ko iá ki hēvani pe ki ha afi ko heli.

2. (a) Ko hai kuó ne fokotuʻutuʻu ʻa e ʻAho Fakamaaú? (e) Ko hai naʻá ne fakanofo ke fakamaaú?

² Kaekehe, ʻoku ʻomai ʻe he Tohitapú ha fakakaukau kehekehe lahi ʻo fekauʻaki mo e ʻAho Fakamaaú. ʻOku ʻikai ko ha ʻaho ia ke tailiili pe manavahē ki ai. Fakatokangaʻi ange ʻa e lau ʻa e Tohitapú ʻo fekauʻaki mo e ʻOtuá: “Kuo ne kotofa ae aho, te ne fakamāu maonioni ai a mamani, i he tagata kuo ne fakanofo.” (Ngāue 17:​31, PM) Ko e fakamaau ko eni kuo fakanofo ʻe he ʻOtuá, ko Sīsū Kalaisi.

3. (a) Ko e hā ʻoku malava ai ke tau ʻilo pau ʻe angatonu ʻa Kalaisi ʻi heʻene fakamaaú? (e) ʻE fakamaauʻi ʻa e kakaí ʻo fakatuʻunga ʻi he hā?

³ ʻOku malava ke tau ʻilo pau ʻe angatonu mo faitotonu ʻa Kalaisi ʻi heʻene fakamaaú. ʻOku fakapapauʻi eni kiate kitautolu ʻe ha kikite fekauʻaki mo ia ʻia ʻAisea 11:​3, 4. Ko ia, ʻi hono kehekehe mei he fakakaukau lahi, heʻikai te ne fakamaauʻi ʻa e kakaí ʻo fakatuʻunga ʻi heʻenau ngaahi angahala he kuo hilí, he ko e lahi ai naʻe fai nai ʻi he taʻeʻilo. ʻOku fakamatalaʻi ʻe he Tohitapú ʻoku fakaʻatā pe tukuange ʻi he maté ha taha mei ha angahala pē kuó ne fai. ʻOkú ne pehē: “Ko ia kuó ne mate kuó ne ʻataʻatā mei heʻene angahala.” (Loma 6:​7, NW) ʻOku ʻuhinga ení ʻi he toetuʻu ʻa ha taha ʻe fakamaauʻi ia ʻo fakatuʻunga ʻi he meʻa ʻokú ne fai he lolotonga ʻa e ʻAho Fakamaaú, ʻikai ʻi he meʻa naʻá ne fai ki muʻa peá ne toki maté.

4. (a) Ko e hā hono fuoloa ʻo e ʻAho Fakamaaú? (e) Ko hai ʻe kaungāfakamaau mo Kalaisí?

 ⁴ Ko ia ai, ʻoku ʻikai ko e ʻaho houa ʻe 24 moʻoni ʻa e ʻAho Fakamaaú. ʻOku ʻai eni ʻe he Tohitapú ke mahino ʻi heʻene lave ʻo fekauʻaki mo e faʻahinga te nau kaungākau mo Sīsū Kalaisi ʻi hono fai ʻa e fakamaaú. (1 Kolinitō 6:​1-3) ʻOku pehē ʻe ha tokotaha-tohi Tohitapu: “Bea neu mamata ki he gaahi nofoa fakaeieiki, mo kinautolu nae nofo ai, bea nae tuku ae fakamāu kiate kinautolu.” Ko e kau fakamaaú ni ko e kau muimui angatonu pani ʻa Kalaisí, ʻa ia ʻo hangē ko ia ʻoku hoko atu ʻe he Tohitapú, “Naa nau moui, mo bule mo Kalaisi i he taʻu e taha afe.” Ko ia ʻe taʻu ʻe taha afe ʻa e fuoloa ʻo e ʻAho Fakamaaú. Ko e vahaʻa taimi taʻu ʻe taha  afe tatau pē ia ʻe pule mai ai ʻa Kalaisi mo ʻene kau muimui angatonu pani ʻe toko 144,000 ʻi honau tuʻunga ko e “ngaahi langi foʻou” ki he “fonua foʻou.”​—Fakahā 20:​4, 6, PM; 2 Pita 3:13.

5, 6. (a) Naʻe anga-fēfē hono fakamatalaʻi ʻe ha tangata-tohi Sāme ʻo e Tohitapú ʻa e ʻAho Fakamaaú? (e) ʻE fēfē ʻa e moʻui ʻi he māmaní he lolotonga ʻo e ʻAho Fakamaaú?

⁵ Sio ki he ongo peesi ko ení. ʻOku nau ʻomai ha mahino ki he fakaofo ʻa e ʻAho Fakamaaú ki he faʻahinga ʻo e tangatá. Naʻe tohi ʻa e tangata-tohi Sāme ʻo e Tohitapú ʻo fekauʻaki mo e taimi nāunauʻia ko iá: “Ke fiefia ae goue, moe mea kotoabe oku i ai: bea e toki fiefia ae gaahi akau kotoabe oe vao, I he ao o Jihova: he oku ne haele mai, he oku haele mai ia ke fakamāu a mamani: te ne fakamāu a mamani i he maonioni, moe kakai i he ene mooni.”​—Sāme 96:​12, 13, PM.

⁶ ʻE ngāue ʻa e faʻahinga te nau hao moʻui atu ʻi ʻĀmaketoné  ke ʻai ʻa e māmaní ko ha palataisi ʻi he lolotonga ʻo e ʻAho Fakamaaú. ʻE talitali lelei mai ʻa e kau maté ki he palataisi ko ení. (Luke 23:43) Ko ha fiefia lahi ē ʻe ʻi hono toe fakatahaʻi ʻa e ngaahi fāmili kuo fuoloa hono fakamavaheʻi kinautolu ʻe he maté! ʻIo, hono ʻikai lelei ke moʻui ʻi he melino, ke moʻui lelei pea ke maʻu ʻa e fakahinohino ʻo fekauʻaki mo e ngaahi taumuʻa ʻa e ʻOtuá! ʻOku pehē ʻe he Tohitapú: “He ka i he fonua a hoo gaahi fakamāu, e toki ako ae kakai o mamani ki he maonioni.” (ʻAisea 26:​9, PM) ʻE ako ʻa e kakai kotoa pē ʻo fekauʻaki mo Sihova ʻi he lolotonga ʻo e ʻAho Fakamaaú, pea ʻe foaki kiate kinautolu ʻa e faingamālie kotoa ke talangofua mo tauhi kiate ia.

7. Lolotonga ʻa e ʻAho Fakamaaú, ko e hā ʻe hoko ki he faʻahinga te nau fili ke tauhi ʻa e ʻOtuá pea mo e faʻahinga ʻe fakafisi ke fai pehē?

⁷ ʻE fakamaauʻi ʻi he malumalu ʻo e ngaahi tuʻunga fakapalataisi peheé ʻe Sīsū Kalaisi pea mo hono kaungātuʻi ʻe toko 144,000 ʻa e faʻahinga ʻo e tangatá. Ko e kakai te nau fili ke tauhi ʻa Sihová te nau ʻi ha tuʻunga ke maʻu ʻa e moʻui taʻengatá. Ka, neongo ʻa e ʻi ai ʻi he malumalu ʻo e ngaahi tuʻunga lelei tahá ni, ʻe fakafisi ha niʻihi ke tauhi ʻa e ʻOtuá. Hangē ko e lau ʻa e Tohitapú: “Ke ha ae aloofa ki he agakovi, ka e ikai te ne ako ki he maonioni: i he fonua oe agatonu te ne fai kākā.” (ʻAisea 26:​10, PM) Ko ia ʻi he hili hono foaki ʻa e faingamālie kakato ke liliu ʻenau ngaahi foungá pea mo ako ki he māʻoniʻoní, ʻe fakaʻauha leva ʻa e faʻahinga anga-fulikivanu peheé. Naʻa mo e ki muʻa ke ngata ʻa e ʻAho Fakamaaú ʻe tuku ʻa e niʻihi ke mate. (ʻAisea 65:20) Heʻikai fakaʻatā ʻa kinautolu ke nau kei ʻi ai ke maumauʻi pe fakameleʻi ʻa e māmani palataisí.

8. Ko e hā ʻa e tuʻunga fakaeʻulungaanga ʻo e kau tangata ʻo Sōtomá?

 ⁸ ʻE hoko moʻoni ko ha monūʻia lahi ke toetuʻu ʻi he māmaní he lolotonga ʻo e ʻAho Fakamaau lahi ʻa Sihová. Kaekehe, ʻoku fakahā ʻe he Tohitapú heʻikai maʻu ʻe he tokotaha kotoa pē ʻa e monūʻia ko iá. Ko e fakatātā, fakakaukau atu ki he kakai ʻo Sōtoma ʻo e kuonga muʻá. ʻOku pehē ʻe he Tohitapú naʻe feinga ʻa e kau tangata ʻo Sōtomá ke fai ʻa e fehokotaki fakasino mo e “ongo tangata” naʻá na ʻaʻahi kia Loté. Naʻe hulu pehē fau ʻenau ʻulungaanga taʻetaaú, he naʻa mo e taimi naʻe fakakuihi fakaemana ai ʻa kinautolú naʻa “nau fiuʻa kumi ki he matapa” ʻo e fale ke nau hū ki loto ke mohe mo e kau ʻaʻahi ʻa Loté.​—Sēnesi 19:​4-11.

9, 10. Ko e hā ʻoku fakahaaʻi ʻe he Tohitapú ʻo fekauʻaki mo e ʻamanaki ki ha toetuʻu ʻa e faʻahinga anga-fulikivanu ʻo Sōtomá?

⁹ ʻE toetuʻu ha faʻahinga anga-fulikivanu fakalilifu pehē he lolotonga ʻa e ʻAho Fakamaaú? ʻOku fakahā ʻe he Tohitapú ʻoku hangehangē ʻe ʻikai. Ko e fakatātā, naʻe tohi ʻa Siutasi, ko e taha ʻo e kau ākonga fakamānavaʻi ʻa Sīsuú, ʻo ʻuluaki fekauʻaki mo e kau ʻāngelo naʻá nau liʻaki honau nofoʻanga ʻi hēvaní kae fai ʻa e fehokotaki fakasino mo e ngaahi ʻofefine ʻo e tangatá. Hili ia peá ne toe tānaki atu: “Ko Sotoma foki mo Komola, mo e ngaahi kolo naʻe tuʻu takai ki ai, ʻa ia naʻa nau tuli ki he feʻauaki, ʻo hange tofu pe ʻa e faʻahinga ko é, ʻo nau afe ki ha faʻahinga kakano kehe, ko ia kuo fokotuʻu kinautolu ko e taipe, honau moʻua he tautea totonu, ko e afi taʻengata.” (Siutasi 6, 7; Sēnesi 6:​1, 2) ʻIo, ʻi heʻenau tuli ki he ʻulungaanga taʻetaaú naʻe moʻua ai ʻa e kakai ʻo Sōtomá mo e ngaahi kolo takai ki aí ʻi ha fakaʻauha ʻa ia ʻoku hangehangē heʻikai ʻaupito te nau toetuʻu mei ai.​—2 Pita 2:​4-6, 9, 10a.

¹⁰ Naʻe toe fakahā foki ʻe Sīsū heʻikai nai ke toetuʻu ʻa e kau Sōtomá. ʻI heʻene lea ʻo fekauʻaki mo Kāpaneumé, ko e taha ʻo e ngaahi kolo naʻá ne fai ai ʻa e ngaahi maná, naʻá ne pehē: “He ka ne momoʻi fai ʻi Sotoma ʻa e ngāhi ngaue mamafa ne fai ʻiate koe [Kāpaneume], pehe ne tolonga ʻo aʻu mai ki he ʻaho ni. Ka ʻoku ou tala atu, ʻE katakingofua ʻi he ʻAho Fakamāu ʻa e fonua ko Sotoma ʻiate koe.” (Mātiu 11:​22-24) Naʻe fakamamafaʻi heni ʻe Sīsū ʻa e taau ke valokiʻi ʻa e kau Kāpaneumé ʻaki ʻene pehē ʻe kātakingofua ange ʻa e kau Sōtoma ʻo e kuonga muʻá, ʻa ia naʻa nau taʻefeʻunga fakaʻaufuli ki he toetuʻu ʻi he ʻAho Fakamaaú, ʻo fakatatau ki he fakakaukau ʻa ʻene kau fanongo ʻIsilelí.

11. Ko e hā ʻe faingofua ange ai ʻi he ʻAho Fakamaaú ki he kau “agatonu” ʻi ha taha pē ʻo e kau “taeagatonu”?

¹¹ Ko ia ai, ʻoku totonu ke tau fai ʻa e meʻa kotoa pē te tau malavá ke ʻai ʻetau moʻuí ke taau ki ha toetuʻu. Ka ʻe kei malava ke ʻeke nai: ʻE faingataʻa ange ki ha niʻihi ʻo e faʻahinga ʻe fokotuʻu mei he maté ke ako  mo ngāueʻaki ʻa e māʻoniʻoní ʻi ha niʻihi kehe? Fakakaukau angé: Ki muʻa pea mate ʻa e faʻahinga “agatonu” ʻo hangē ko ʻĒpalahame, ʻAisake, Siope, Tēpola, Lute mo Tānielá, naʻa nau fakatuʻotuʻa kotoa ki he hoko mai ʻa e Mīsaiá. Ko ha fiefia lahi ē te nau maʻu he lolotonga ʻo e ʻAho Fakamaaú ke ako fekauʻaki mo ia pea ke ʻilo ʻokú ne pule ʻi hēvani! Ko ia ʻe faingofua ʻaupito ange ki he faʻahinga “agatonu” ni ke fai angatonu ʻi he taimi ko iá ʻi ha taha pē ʻo e kau “taeagatonu” ʻe fokotuʻu mei he maté.​—Ngāue 24:15, PM.

KO E TOETUʻU KI HE “MOʻUI” MO E “FAKAMĀU”

12. Fakatatau kia Sione 5:​28-30, ko hai ʻe “toetuʻu ke moʻui,” pea ko hai ʻe “toetuʻu ke fakamāu”?

¹² ʻI hono fakamatalaʻi ʻa e tuʻunga ʻo e ʻAho Fakamaaú, naʻe pehē ʻe Sīsū: “ʻE fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu. . . . ʻOku ou fakamāu ʻo hange ko ʻeku fanongo: pea ko e fakamāu aʻaku ʻoku totonu; koeʻuhi ʻoku ʻikai te u tuli ki he loto oʻoku, ka ki he finangalo ʻo ia naʻa ne fekau mai au.” (Sione 5:​28-30) Ko e hā ʻa e “toetuʻu ke moʻui,” pea mo e “toetuʻu ke fakamāu”? Pea ko hai te ne maʻu iá?

13. ʻOku ʻuhinga ki he hā ke maʻu ʻe ha taha ʻa e “toetuʻu ke moʻui”?

¹³ Hangē ko ia kuo tau ʻosi ako ki aí, ʻi he taimi ʻe haʻu ai ʻa e kau maté mei he faʻitoká, heʻikai ke fakamaauʻi kinautolu ʻi heʻenau ngaahi ngāue he kuo hilí. Ka ʻe fakamaauʻi ʻa kinautolu ʻo fakatuʻunga ʻi he meʻa te nau fai he lolotonga ʻa e ʻAho Fakamaaú. Ko ia ʻi he lave ʻa Sīsū ʻo fekauʻaki mo “kinautolu naʻe ngaue lelei” pea mo “kinautolu naʻe fai kovi,” naʻá ne ʻuhinga ki he ngaahi meʻa lelei mo e ngaahi meʻa ʻoku kovi te nau fai lolotonga ʻa e ʻAho Fakamaaú. Koeʻuhi ko e ngaahi meʻa lelei te nau faí, ʻe fakalakalaka atu ai ʻa e tokolahi ʻo e kau toetuʻú ki he tuʻunga haohaoa fakaetangatá ʻi he ngataʻanga ʻo e ʻAho Fakamaau taʻu ʻe 1,000. Ko ia ai, ʻe fakamoʻoniʻi ko ha “toetuʻu ke moʻui” ʻa ʻenau foki mei he maté, he te nau aʻusia ʻa e moʻui haohaoa taʻe ʻi ai ha angahala.

14. ʻOku ʻuhinga ki he hā ke maʻu ʻe ha taha ʻa e “toetuʻu ke fakamāu”?

¹⁴ ʻI he tafaʻaki ʻe tahá, fēfē ʻa e faʻahinga ‘ʻoku faikovi’ lolotonga ʻa e ʻAho Fakamaaú? ʻE fakamoʻoniʻi ko ha “toetuʻu ke fakamāu” ʻa ʻenau foki mei he maté. ʻOku ʻuhinga eni ki he hā? ʻOku ʻuhinga ia ki ha fakamaau pe tuʻutuʻuni ke mate. Ko ia ʻe fakaʻauha ʻa e faʻahingá ni ʻi he lolotonga pe ʻi he ʻosi ʻa e ʻAho Fakamaaú. Ko hono ʻuhingá he ʻoku nau fai ʻa e ngaahi meʻa ʻoku kovi; ʻoku nau fakafisi loto-fefeka ke ako mo ngāueʻaki ʻa e māʻoniʻoní.

 ʻI HE KAMATA ʻA E ʻAHO FAKAMAAÚ

15. Ko e hā ʻe hoko ki muʻa pē pea kamata ʻa e ʻAho Fakamaaú?

¹⁵ Naʻe mata vīsone ʻa e ʻapositolo ko Sioné ki he meʻa ʻe hoko ki muʻa pē he ʻAho Fakamaaú. Naʻá ne tohi: “Pea u vakai ha fuʻu taloni hinehina, pea mo ia naʻe ʻafio ai, ʻa ia naʻe hola mei hono fofonga ʻa mamani mo e langi; . . . Pea u vakai ʻa e pekia, ʻa e lalahi mo e iki, ʻoku nau tutuʻu ʻi he ʻao ʻo e taloni; . . . pea naʻe fakamāu ʻa e pekia.” (Fakahā 20:​11, 12) Ko ia ki muʻa ke kamata ʻa e ʻAho Fakamaaú, ʻe mole atu ʻa e ngaahi meʻa ʻo e tuʻu lolotongá ni ʻa ia ʻoku faʻuʻaki “ʻa mamani mo e langi.” ʻE hao moʻui atu pē ʻa e faʻahinga ʻoku nau tauhi ʻa e ʻOtuá, ka ʻe fakaʻauha kotoa ʻa e kakai anga-fulikivanú ʻi ʻĀmaketone.​—1 Sione 2:17.

16. (a) Ko hai ʻe fakamaauʻi lolotonga ʻa e ʻAho Fakamaaú tukukehe ʻa e kau pekiá? (e) ʻE fakamaauʻi ʻa kinautolu mei he hā?

¹⁶ Ko ia, ʻoku ʻikai ko e kau “pekia” pē ʻe toetuʻú ʻe fakamaauʻi he lolotonga ʻa e ʻAho Fakamaaú. ʻE toe fakamaauʻi foki ʻa e kau “moʻui” ʻe hao moʻui atu ʻi ʻĀmaketoné, pea pehē ki he fānau te nau maʻu nai ai. (2 Tīmote 4:1) ʻI he vīsoné naʻe mamata ai ʻa Sione ki he founga hono fakamaauʻi kinautolú. Naʻá ne tohi: “Pea naʻe folahi ʻa e ngaahi tohi, . . . Pea naʻe fakamāu ʻa e pekia ʻi he ngaahi meʻa ʻoku tuʻu ʻi he ngaahi tohi, ʻo fakatatau ki heʻenau ngāue. Pea naʻe tukuange ʻe he tahi ʻa e pekia naʻe ʻi ai; pea mo mate foki mo e Hetesi naʻa na tukuange ʻa e pekia naʻe ʻiate kinaua: pea naʻe fakamāu kinautolu taki taha, ʻo fakatatau ki heʻenau ngāue.”​—Fakahā 20:12, 13.

17. Ko e hā ʻa e “ngaahi tohi” ʻe fai mei ai hono fakamaauʻi ʻo e kau “pekia” mo e kau “moʻui”?

¹⁷ Ko e hā ʻa e “ngaahi tohi” ʻoku folahi ʻa ia ʻoku fakamaauʻi mei ai ʻa e kau “pekia” pea pehē ki he kau “moʻui”? ʻOku hā mahino ko ha meʻa mavahe mei he ʻetau Tohitapu lolotongá. Ko e ngaahi tohi fakamānavaʻi ia ʻoku ʻi ai ʻa e ngaahi lao mo e ngaahi fakahinohino ʻa Sihová. ʻI hono lau ení ʻe malava ai ʻa e kakai kotoa pē ʻi he māmaní ke ʻilo ʻa e finangalo ʻo e ʻOtuá. Pea fakatuʻunga ʻi he ngaahi lao mo e ngaahi fakahinohino ʻi he “ngaahi tohi” ni ʻe fakamaauʻi ai ʻa e tokotaha kotoa pē ʻi he māmaní. Ko e faʻahinga ʻoku talangofua ki he ngaahi meʻa kuo tohi ʻi aí te nau maʻu ʻa e ngaahi ʻaonga ʻo e feilaulau huhuʻi ʻa Sīsuú, pea te nau tupulaki māmālie ki he tuʻunga haohaoa fakaetangatá.

18. (a) Ko e hā ʻa e tuʻunga ʻe ʻi he ngataʻanga ʻo e ʻAho Fakamaaú? (e) ʻI he ʻuhinga fē ʻe hoko ai ʻa e kau “pekia” ʻo moʻui ʻi he ngataʻanga ʻo e taʻu ʻe 1,000?

¹⁸ ʻI he ngataʻanga ʻo e ʻAho Fakamaau taʻu ʻe 1,000 heʻikai toe ʻi ai ha taha ʻi he māmaní ʻe mate koeʻuhi ko e angahala ʻa ʻĀtamá. Ko e moʻoni, ʻi he ʻuhinga kakato tahá ʻe hoko ʻo moʻui ʻa e tokotaha kotoa. Ko e meʻa  eni ʻoku ʻuhinga ki ai ʻa e Tohitapú ʻi heʻene pehē: “Ko hono toe ʻo e pekia [ko e faʻahinga tukukehe ʻa e toko 144,000 ʻoku ō ki hēvani] naʻe ʻikai te nau moʻui hake kaeʻoua ke kakato ʻa e taʻu ʻe taha afe.” (Fakahā 20:5) Ko e lave ko eni ki “hono toe ʻo e pekia” ʻoku ʻikai ʻuhinga ia ʻe toetuʻu ha niʻihi kehe ʻi he ngataʻanga ʻo e ʻAho Fakamaau taʻu ʻe 1,000. Ka ʻe hoko ʻo moʻui ʻa e faʻahinga kotoa pē ʻi he ʻuhinga te nau aʻusia ai ʻa e tuʻunga haohaoa fakaetangatá. Te nau ʻi he tuʻunga haohaoa tatau mo ia naʻe ʻia ʻĀtama mo ʻIvi ʻi he ngoue ko ʻĪtení. Ko e hā leva ʻa e meʻa ʻe hokó?

HILI ʻA E ʻAHO FAKAMAAÚ

19. Ko e hā ʻe fai ʻe Kalaisi ʻi he ngataʻanga ʻo e ʻAho Fakamaaú?

¹⁹ ʻI hono fai kotoa ʻa e meʻa kuo tuku ki ai ʻe he ʻOtuá ke ne faí, ʻe toki hanga leva ʻe Sīsū Kalaisi ʻo “tukuange . . . ʻa e puleʻanga ki he ʻOtua, ʻio ki he Tamai.” ʻE hoko eni ʻi he ngataʻanga ʻo e ʻAho Fakamaau taʻu ʻe 1,000. Ko e hili atu ia hono toʻo atu ʻa e ngaahi fili kotoa pē. Ko e fakamuimui taha aí ko e mate kuo tukufakaholo meia ʻĀtamá. ʻE fakaʻauha ia! ʻE hoko leva ʻa e Puleʻangá ko e meʻa ʻa e ʻOtua ko Sihová. Te ne pule fakahangatonu ki ai ko e Tuʻi.​—1 Kolinitō 15:24-28.

20. (a) Ko e hā ʻe fai ʻe Sihova ke fakapapauʻi pe ko e hingoa ʻo hai ʻe tohi ʻi he “tohi ʻo e moʻui”? (e) Ko e hā ʻoku feʻungamālie ai ha ʻahiʻahi fakaʻosi ki he faʻahinga ʻo e tangatá?

²⁰ ʻE fakapapauʻi fēfē ʻe Sihova pe ko e hingoa ʻo hai ʻe tohi ʻi he “tohi ʻo e moʻui”? (Fakahā 20:​12, 15) ʻE fakahoko ia ʻi ha ʻahiʻahi ʻe fai ki he faʻahinga ʻo e tangatá. Manatuʻi ʻa e tō ʻa ʻĀtama mo ʻIvi ʻi ha ʻahiʻahi pehē, pea mo e tauhi angatonu ʻa Siope ʻi hono ʻahiʻahí. Ka ko e tokolahi taha ʻo e faʻahinga ʻo e tangatá ʻe moʻui ʻo aʻu ki he ngataʻanga ʻo e taʻu ʻe 1,000 kuo ʻikai ʻaupito ʻahiʻahiʻi ʻenau tuí. Ki muʻa pea nau toetuʻú naʻe ʻikai te nau ʻilo ki he ngaahi taumuʻa ʻa Sihová. Naʻa nau hoko ko e konga ʻo e ngaahi meʻa ʻo e tuʻu fulikivanu ʻa Sētané; naʻa nau “taeagatonu.” Pea ʻi he hili ʻenau toetuʻú, kuo faingofua kiate kinautolu ke tauhi ʻa Sihova koeʻuhi ko ʻenau moʻui ʻi he Palataisí ʻo ʻikai toe ʻi ai ha fakafepaki mei he Tēvoló. Ka ʻe tauhi ʻa Sihova ʻe he laui piliona ko eni ʻo e faʻahinga ʻo e tangatá, ʻa ia ʻe haohaoa, ʻo kapau ʻe ʻave ʻa e faingamālie kia Sētane ke ne feinga ke taʻofi kinautolu mei heʻenau fai peheé? ʻE lava ʻe Sētane ke fai kiate kinautolu ʻa e meʻa naʻá ne fai kia ʻĀtama mo ʻIvi ʻi heʻena haohaoá?

21. (a) ʻE anga-fēfē hono tuku atu ʻe Sihova ʻa e faʻahinga ʻo e tangatá ke ʻahiʻahiʻí? (e) ʻI he hili ʻa e ʻahiʻahí, ko e hā ʻe hoko ki he faʻahinga kotoa pē naʻe kau ki aí?

²¹ Ke fakapapauʻi ʻa e ngaahi fehuʻi peheé, ʻe tukuange ʻe Sihova ʻa  Sētane mo ʻene kau tēmeniō mei he luo taʻe hano takelé ʻa ia naʻa nau ʻi ai he taʻu ʻe 1,000. Ko e hā hono olá? ʻOku fakahā mai ʻe he Tohitapú ʻe lavameʻa ʻa Sētane ke fakatafokiʻi ha niʻihi mei hono tauhi ʻa Sihová. Te nau hangē “ko e ʻoneʻone ʻo e tahi,” pea ʻoku ʻuhingá ʻoku ʻikai fakapapauʻi hono tokolahí. Hili hono fai ʻa e ʻahiʻahí ni, ʻe lī leva ʻa Sētane mo ʻene kau tēmenioó pea pehē ki he faʻahinga heʻikai lava ʻi he ʻahiʻahí, ki he “anoafi” fakaefakatātā, ʻa ia ko e mate ʻangaua (taʻengata). (Fakahā 20:​7-10, 15) Ka ʻe kei nofo pē ʻi he māmani palataisi nāunauʻiá ʻa e faʻahinga ʻoku hā honau hingoá ʻi he “tohi ʻo e moʻui.” Ko hono tohi ʻo honau hingoá ʻi he “tohi ʻo e moʻui” ʻoku ʻuhingá ʻoku fakamaauʻi kinautolu ʻe Sihova pea ʻoku nau māʻoniʻoni haohaoa ʻi he lotó, ʻatamai mo e sino pea nau taau ai ki he moʻui taʻengata he palataisi ʻi he māmaní.

KO E ʻAHO FAKAMAAU LOLOTONGÁ NI

22. Ke moʻui ke sio ʻi he ʻAho Fakamaaú mo e ʻahiʻahiʻi fakaʻosi ʻo e faʻahinga ʻo e tangatá, ko e hā ʻa e meʻa kuo pau ke tau hao moʻui atu aí?

²² Ko ia ʻoku ʻomai ʻe he Tohitapú ʻa e fakamatala ʻo fekauʻaki mo e ngaahi meʻa ʻe hoko ʻi he kahaʻú ʻo laka hake ʻi he taʻu ʻe 1,000. Pea ʻokú ne fakahaaʻi ʻoku ʻikai ha ʻuhinga ke manavahē ai ki he ngaahi meʻa ʻe hokó. Ka ko e fehuʻí: Te ke ʻi ai ke fiefia he ngaahi meʻa lelei kuo tukutauhi ʻe he ʻOtua ko Sihová? ʻE fakatuʻunga ení pe te ke hao moʻui atu ʻi ha ʻaho fakamaau ki muʻa, ʻa ia, ko e “ʻaho ʻo e fakamāuʻi” lolotonga “mo e fakaʻauha ʻo e kakai fakaʻotuamate.”​—2 Pita 3:7.

23. (a) Ko e hā ʻa e ongo kalasi ʻe ua ʻoku lolotonga vaheʻi ki ai ʻa e kakaí ʻi he taimí ni? (e) Ko e hā ʻe hoko ki he kalasi taki taha, pea ko e hā hono ʻuhingá?

²³ ʻIo, talu mei he foki ʻa Kalaisi ʻo ne ʻafio ʻi hono taloni fakahēvaní, kuo fakamaauʻi kotoa ʻa e faʻahinga ʻo e tangatá. ʻOku hoko ʻa e “ʻaho ʻo e fakamāuʻi” lolotonga ko ení ki muʻa pea kamata ʻa e ʻAho Fakamaau taʻu ʻe 1,000. ʻOku vaheʻi ʻa e kakaí he lolotonga ʻo e fakamaau lolotongá ni ko e “fanga kosi” ki he toʻohema ʻo Kalaisí pe ko e “fanga sipi” ki hono toʻomataʻú. ʻE fakaʻauha ʻa e “fanga kosi” koeʻuhi ʻoku ʻikai te nau tokoni ki he “ngaahi tokoua” pani ʻo Kalaisí ʻi heʻenau ngāue ki he ʻOtuá. ʻI he faai atu ʻa e taimí, ʻoku fakahā ʻe he “fanga kosi” ni ko e kau faiangahala taʻefakatomala kinautolu, anga-fulikivanu, pea mahimango ʻi heʻenau hokohoko hono fai ʻa e taʻeangatonú. ʻI he tafaʻaki ʻe tahá, ʻe tāpuakiʻi ʻa e “fanga sipi” ʻaki ʻa e moʻui ʻi he malumalu ʻo e pule ʻa e Puleʻangá koeʻuhi ʻoku nau poupouʻi ʻa e “ngaahi tokoua” ʻo Kalaisí ʻi he founga kotoa pē.​—Mātiu 25:31-46.

[Fehuʻi ki he Ako]

[Fakatātā ʻi he peesi 178]

Ko e hā naʻe pehē ai ʻe Sīsū ʻe kātakingofua ange ki he kau Sōtomá ʻi he ʻAho Fakamaaú?