Ko e Founga-Pule Melino ʻa e ʻOtuá
Vahe 13
Ko e Founga-Pule Melino ʻa e ʻOtuá
1. Ko e hā kuo ʻikai malava ke fai ʻe he ngaahi founga-pule fakaetangatá?
KUÓ KE fakatokangaʻi kuo ʻikai malava ʻe he ngaahi founga-pule fakaetangatá pea pehē ki he ngaahi founga-pule ʻoku fakahangahanga ke fai lelei̇́, ke nau fakalato ʻa e ngaahi fiemaʻu moʻoni ʻa e kakaí? ʻOku halaʻatā ha taha ai kuó ne toʻo ʻa e ngaahi palopalema ʻo e faihiá mo e tāufehiʻa fakamatakalí pe kuó ne tokonaki ha meʻakai totonu mo ha ngaahi nofoʻanga totonu ki honau kakaí kotoa. Kuo ʻikai te nau fakatauʻatāinaʻi fakaʻaufuli ʻa honau kakaí mei he ngaahi mahakí. Pea kuo ʻikai ha founga-pule kuó ne malava ke taʻofi ʻa e hoholo ke motuʻá pe ko e maté pe ke toe fakafoki mai ʻa e kau maté ke moʻui. Naʻa mo e melino mo e maluʻanga tuʻuloá kuo ʻikai ha taha te ne ʻomi ia ki hono kakaí. ʻOku ʻikai pē malava ʻe he ngaahi founga-pule ʻa e tangatá ke ne toʻo ʻa e ngaahi palopalema lahi ʻoku fehangahangai mo e kakaí.
2. Ko e hā ʻa e pōpoaki tefito ʻa e Tohitapú?
2 ʻOku ʻafioʻi ʻe hotau Tokotaha-fakatupú ʻa hono lahi ʻo e fiemaʻu kiate kitautolu ha founga-pule angatonu ʻa ia te ne ʻai ke malava ʻa e kakai kotoa pē ke nau fiefia ʻi ha moʻui kakato mo fiefia. Ko ia ko e ʻuhinga ia ʻoku lāulea ai ʻa e Tohitapú ʻo kau ki ha founga-pule ʻi he malumalu ʻo e tataki ʻa e ʻOtuá. Ko hono moʻoní, ko e founga-pule ko eni naʻe talaʻofa ʻe he ʻOtuá ko e pōpoaki tefito ia ʻa e Tohitapú.
3. Ko e hā ʻa e lau ʻa ʻAisea 9:6, 7 ʻo fekauʻaki mo e founga-pule ʻa e ʻOtuá?
3 Ka te ke ʻeke nai: ‘Ko fē ʻi he Tohitapú ʻoku lāulea ai ʻo kau ki he founga-pule ʻa e ʻOtuá?’ ʻOku lāulea pehē ʻia ʻAisea 9:6, 7 [5, 6, PM]. Fakatatau ki he King James Version, ʻoku pehē ʻe he ongo veesí ni: “Kuo ʻaloʻi mai ha tama kiate kitautolu, kuo foaki mai kiate kitautolu ha foha, pea ʻe ʻi hono umá ʻa e founga-pule: pea ko hono huafa ʻe uiʻaki ko Fakaofo, Tokotaha-faleʻi, Ko e ʻOtua mafimafi, Ko e Tamai taʻengata, Ko e Pilinisi ʻo e Melinó. ʻE ʻikai ha ngataʻanga ʻa e tupulaki ʻa ʻene founga-pulé mo e melinó.”
4. Ko hai ʻa e tama ʻoku hoko ko e tokotaha-pule ʻi he founga-pule ʻa e ʻOtuá?
4 ʻOku lāulea heni ʻa e Tohitapú ʻo fekauʻaki mo e fanauʻi ʻo ha tama, ko ha pilinisi. ʻI he faai mai ʻa e taimí ʻe hoko ʻa e ‘ʻalo ʻo e tuʻi’ ko ení ko ha pule lahi, “Ko e Pilinisi ʻo e Melinó.” Te ne pule ʻi ha founga-pule fakaofo moʻoni. ʻE ʻomai ʻe he founga-pulé ni ʻa e melino ki he māmaní fakakātoa, pea ʻe tuʻuloa ʻa e melinó ʻo taʻengata. Ko e tama ko ia naʻe kikiteʻi ʻa hono fanauʻí ʻi he ʻAisea 9:6, 7, ko Sīsū ia. ʻI he fanongonongo ʻa hono fanauʻí ki he taʻahine tāupoʻou ko Melé, naʻe pehē ʻe he ʻāngelo ko Kepalelí ʻo fekauʻaki mo Sīsū: “Te ne tuʻi . . . pea ko ʻene pule [puleʻanga, NW] ʻe ʻikai ngata.”—Luke 1:30-33.
KO HONO FAKAMAMAFAʻI ʻA E MAHUʻINGA ʻO E PULEʻANGÁ
5. (a) ʻOku anga-fefē ʻa hono fakahaaʻi ʻi he Tohitapú ʻa e mahuʻinga ʻo e Puleʻangá? (e) Ko e hā ʻa e puleʻanga ʻo e ʻOtuá, pea ko e hā ʻa e meʻa te ne faí?
5 ʻI he kei ʻi māmani ʻa Sīsū Kalaisi mo hono kau poupoú, ko ʻenau ngāue tefitó ke malanga mo faiako ʻo fekauʻaki mo e puleʻanga ka hoko mai ʻo e ʻOtuá. (Luke 4:43; 8:1) ʻOku nau lave ki he puleʻanga ko ení ʻo meimei tuʻo 140 ʻi he Tohitapú. Naʻe toe akoʻi ʻe Sīsū ʻa hono kau muimuí ke nau lotu ki he ʻOtuá: “Ke hoko mai hoo bule [puleʻanga, KJ]. Ke fai ho finagalo i mamani, o hage i he lagi.” (Mātiu 6:10, PM) ʻOku moʻoni ko ha founga-pule ʻa e puleʻanga ko eni ʻoku lotu ʻa e kau Kalisitiané ʻo fekauʻaki mo iá? Mahalo pē kuo ʻikai te ke fakakaukau ko ha founga-pule moʻoni ia, ka ʻoku pehē ia. Ko e ʻAlo ʻo e ʻOtuá, ʻa Sīsū Kalaisi, ko e Tuʻi ia ʻo e Puleʻangá. Pea ko e māmaní fakakātoa ko e feituʻu ia te ne pule ki aí. Ko ha lelei lahi ē ka ko e toki hoko ai ʻa e kakaí ʻo ʻikai toe māvahevahe ʻi he ngaahi puleʻanga fepakipakí, ka ʻe fāʻūtaha ʻa e faʻahinga kotoa ʻo e tangatá ʻi he melino ʻi he malumalu ʻo e founga-pule Puleʻanga-fakatuʻi ʻo e ʻOtuá!
6. ʻI he ʻi māmani ʻa Sīsuú, ko e hā naʻe pehē ai ʻoku “ofi” ʻa e Puleʻangá pea “ʻoku ʻi homou lotolotonga”?
6 Naʻe kamata ke malanga ʻa Sione ko e Papitaisó ʻo fekauʻaki mo e founga-pule ko ení, ʻo tala ki he kakaí: “Mou fakatomala, he kuo ofi ʻa e puleʻanga ʻo e langi.” (Mātiu 3:1, 2) Ko e hā naʻe malava ai ke lea pehē ʻa Sioné? Koeʻuhi ko Sīsū, ʻa e Tokotaha te ne hoko ko e pule ʻo e founga-pule fakahēvani ʻa e ʻOtuá, naʻe teu ke papitaiso ia ʻe Sione pea ʻe pani ʻaki ʻa e laumālie māʻoniʻoni ʻo e ʻOtuá. Ko ia ʻoku malava ke mahino kiate koe ʻa e ʻuhinga naʻe talaange ai ki mui ʻe Sīsū ki he kau Fālesí: “Vakai, ko e puleʻanga ʻo e ʻOtua ʻoku ʻi homou lotolotonga ni.” (Luke 17:21) Naʻe lea pehē ʻa Sīsū koeʻuhi ko ia, ʻa e tokotaha kuo fakanofo ʻe he ʻOtuá ke tuʻí, naʻe ʻi ai fakataha mo kinautolu. Lolotonga ʻo e taʻu ʻe tolu mo e konga ʻo ʻene malanga mo faiakó, naʻe fakamoʻoniʻi ai ʻe Sīsū ʻa ʻene totonu ke tuʻí, ʻaki ʻene angatonu ki he ʻOtuá ʻo aʻu ki he mate.
7. Ko e hā ʻokú ne fakahaaʻi ko e Puleʻangá ko e pole mahuʻinga ia ʻi he taimi naʻe i māmani ai ʻa Sīsuú?
7 Ke fakahā ko e puleʻanga ʻo e ʻOtuá ko e pole mahuʻinga ia lolotonga ʻa e ngāue fakafaifekau ʻa Kalaisí, tau fakakaukau ange ki he meʻa naʻe hoko ʻi he ʻaho fakaʻosi peá ne pekiá. ʻOku fakahā mai kiate kitautolu ʻe he Tohitapú naʻe talatalaakiʻi ʻe he kakaí ʻa Sīsū, ʻo pehē: “Naa mau ilo ae jiana ni oku ne veuveuki ae kakai, o ne taofi ae tukuhau kia Sisa, o ne behe, ko ia be koe Kalaisi koe Tuʻi.” ʻI he fanongo ki he ngaahi meʻá ni, naʻe ʻeke ʻe he kōvana Loma ko Ponito Pailató kia Sīsū: “Koe Tuʻi koe oe kakai Jiu?”—Luke 23:1-3, PM.
8. (a) Naʻe anga-fēfē ʻa e tali ʻa Sīsū ʻi hono ʻeke pe ko ha tuʻi iá? (e) Ko e hā ʻa e ʻuhinga ʻa Sīsū ʻi heʻene pehē ko hono puleʻangá “ʻoku ʻikai ʻo ʻeni”?
8 Naʻe ʻikai ke tali fakahangatonu ʻe Sīsū ʻa e fehuʻi ʻa Pailató, ka naʻá ne pehē: “Ko hoku puleʻanga ʻoku ʻikai ʻo e maama ko eni: ka ne ʻo e maama ko eni ʻa hoku puleʻanga, pehē ʻe tau haʻaku kau ʻofisa ke taʻofi hoku tukuange ki haʻa Siu: ka ko eni, ko hoku puleʻanga ʻoku ʻikai ʻo ʻeni.” Naʻe pehē ʻa e tali ʻa Sīsuú koeʻuhi ko hono puleʻangá ʻe ʻikai ko ha puleʻanga fakamāmani. Te ne toki pule mei hēvani, kae ʻikai mei ha taloni ʻi he māmaní ʻi hono tuʻunga ko e tangatá. Koeʻuhi ko e polé pe ʻoku maʻu ʻe Sīsū ʻa e totonu ke tuʻí pe ʻikai, naʻe toe ʻeke ai ʻe Pailato kia Sīsū: “Pea ta ko e tuʻi koe, ʻo?”
9. (a) Ko e hā ʻa e moʻoni fakaofo naʻe ʻai ʻe Sīsū ke ʻiloá? (e) Ko e hā ʻa e ngaahi fehuʻi mahuʻinga lahi he ʻaho ní?
9 ʻOku hā mahino, naʻe fakamaauʻi ʻa e moʻui ʻa Sīsū ʻi he mate pe ko e moʻui koeʻuhi ko ʻene malanga mo akonaki ʻo kau ki ha founga-pule foʻoú. Ko ia naʻe tali ʻe Sīsū kia Pailato: ‘Ko ia pe ʻoku ke meʻā ko e tuʻi au. Ko e meʻa ko ia naʻe fanauʻi ai au, pea ko e meʻa ko ia kuo u haʻu ai ki māmani, koeʻuhi ke u fakahāʻi ʻa e moʻoni.’ (Sione 18:36, 37) ʻIo, ʻi he ʻi māmani ʻa Sīsuú naʻá ne ngāueʻaki ʻene moʻuí ke tala ki he kakaí ʻa e moʻoni fakaofo ʻo kau ki he founga-pule Puleʻanga-fakatuʻi ʻo e ʻOtuá. Ko ʻene pōpoaki tefitó ia. Pea ʻoku kei hoko ʻa e Puleʻangá ni ko e pole mahuʻinga taha ia he ʻaho ní. Ka ʻoku kei tuʻu pē ʻa e ngaahi fehuʻí ni: Ko fē ʻa e founga-pule ʻoku mahuʻinga tahá ʻi he moʻui ʻa ha taha? Ko ha taha ʻi he ngaahi founga-pule ʻa e tangatá, pe ko e puleʻanga ʻo e ʻOtuá ʻia Kalaisi ko e tokotaha-pulé?
KO E FOKOTUʻUTUʻU KI HE FOUNGA-PULE FOʻOU ʻO E MĀMANÍ
10. (a) Ko fē taimi naʻe vakai ai ʻa e ʻOtuá ki he fiemaʻu ʻo ha founga-pule foʻoú? (e) ʻI he Tohitapú, ko fē ʻa e ʻuluaki lave ai ki he founga-pulé ni? (f) Ko hai ʻoku fakatātaaʻi ʻe he ngatá?
10 ʻI he taimi naʻe ʻai ai ʻe Sētane ʻa ʻĀtama mo ʻIvi ke kau mo ia ʻi he angatuʻú, naʻe vakai leva ʻa Sihova ki he fiemaʻu ʻo ha founga-pule foʻou ki he faʻahinga ʻo e tangatá. Ko ia naʻe fakahā leva ʻe he ʻOtuá ʻo kau ki heʻene taumuʻa ke fokotuʻu ha founga-pule pehē. Naʻá ne lave ki he founga-pulé ni ʻi he taimi naʻá ne fakahā ai ʻa e tautea ki he ngatá, ka ko hono moʻoní ko ʻene fakahā tonu kia Sētane ko e Tēvoló: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako: ʻe laiki ʻe ia ho ʻulu, pea te ke laiki ʻe koe ʻa hono muivaʻe.”—Sēnesi 3:14, 15.
11. ʻI he vā ʻo hai ʻe ʻi ai ʻa e fetāufehiʻaʻakí?
11 Ka te ke ʻeke nai: ‘Ko fē ʻoku lave ai heni ʻo kau ki ha founga-pulé?’ Te tau ʻilo ia ʻi haʻatau vakai tokanga ki he fakamatalá ni. ʻOku pehē ʻe he konga tohí ʻe ʻi ai ʻa e tāufehiʻa ʻi he vā ʻo Sētané pea “mo e fefine.” Tānaki atu ki ai, ʻe ʻi ai ʻa e fehiʻa ʻi he vā ʻo e “hako,” pe fānau ʻa Sētané, mo e “hako,” pe fānau ʻa e fefiné. Ko e ʻuluaki meʻá, ʻoku fiemaʻu ke tau ʻiloʻi pe ko hai ʻa e “fefine.”
12. Ko e hā ʻa e lau ʻo fekauʻaki mo e “fefine” ʻia Fakahā vahe 12?
12 ʻOku ʻikai ko ha fefine fakaemāmani eni. Kuo ʻikai ha tāufehiʻa mavahe ʻa Sētane ki ha fēfine ʻi māmani. Kaekehe, ko ha fefine fakaefakatātā eni ia. Ko hono ʻuhingá, ʻoku tuʻu ia ki ha meʻa kehe. ʻOku fakahā eni ʻi he tohi fakamuimui ʻo e Tohitapú, ʻa e tohi Fakahā, ʻa ia ʻokú ne ʻomai ʻa e fakamatala lahi ange ʻo kau ki he fefiné ni. ʻOku fakamatalaʻi ai ʻa e “fefine” ni ʻokú ne “kofu ʻaki ʻa e laʻā, pea naʻe ʻi hono lalo vaʻe ʻa e mahina, pea naʻe ʻai ki hono fofonga ha kalauni naʻe hongofulu ma ua hono fetuʻu.” Ke tokoniʻi kitautolu ke ʻilo pe ko hai ʻoku fakatātaaʻi ʻe he “fefine” ni, fakatokangaʻi ʻa e meʻa ʻoku hoko atu ki ai ʻa e lau ʻa Fakahā ʻo fekauʻaki mo ʻene tamá: “Pea ne faʻeleʻi ha tama tangata, ʻa e toko taha te ne puleʻi ʻa e ngaahi kakai kotoa pē ʻaki ha sepita ukamea: pea naʻe hamusi hake ʻene tama ki he ʻOtua, ʻio ki hono taloni.”—Fakahā 12:1-5.
13. Ko hai pe ko e hā ʻoku fakatātaaʻi ʻe he “tama tangata” mo e “fefine”?
13 ʻI heʻetau ako ke ʻilo pe ko hai pe ko e hā ʻa e “tama tangata,” ʻe tokoni ia kiate kitautolu ke ʻilo ai pe ko hai pe ko e hā ʻoku fakatātaaʻi ʻe he “fefine.” ʻOku ʻikai ko ha tokotaha moʻoni ʻa e tamá, ʻo hangē pē ko e ʻikai ko ha fefine moʻoni ʻi māmani ʻa e fefiné ni. ʻOku fakahā ʻe he konga tohí ko e “tama tangata” ko ení te ne “puleʻi ʻa e ngaahi kakai kotoa pe.” Ko ia ʻoku fakatātaaʻi ʻe he “tama” ni ʻa e founga-pule ʻa e ʻOtuá ʻa ia ʻoku pule ai ʻa Sīsū Kalaisi ko e Tuʻí. Ko ia ai, ʻoku fakatātaaʻi ʻe he “fefine” ʻa e kautaha ʻo e ngaahi meʻa moʻui fakahēvani angatonu ʻa e ʻOtuá. Hangē ko ia naʻe haʻu ʻa e “tama tangata” mei he “fefine,” ʻoku pehē pē ʻa e hoko mai ʻa e Tuʻi ko Sīsū Kalaisí mei he kautaha fakahēvaní, ʻa ia ko e tānekinga ʻo e meʻa moʻui laumālie ʻofa-mateaki ʻi hēvani ʻoku nau ngāue fakataha ke fakahoko ʻa e taumuʻa ʻa e ʻOtuá. ʻOku ui ʻia Kalētia 4:26 (PM) ʻa e kautahá ni “ko Jelusalema oku i oluga.” Ko ia, ʻi he angatuʻu pē ʻa ʻĀtama mo ʻIvi ki he tuʻunga-pule ʻa e ʻOtuá, naʻe fai leva ʻe Sihova ha fokotuʻutuʻu ki ha founga-pule Puleʻanga-fakatuʻi ʻa ia ʻe hoko ko ha ʻamanakiʻanga maʻá e kau ʻofa ki he māʻoniʻoní.
ʻOKU MANATUʻI ʻE SIHOVA ʻA ʻENE TALAʻOFÁ
14. (a) Naʻe anga-fēfē hono fakahaaʻi ʻe Sihova naʻá ne manatuʻi ʻa ʻene talaʻofa ʻo fekauʻaki mo ha “hako” ʻa ia te ne laiki ʻa Sētané? (e) Ko hai ʻa e “hako” ko ia ne talaʻofá?
14 Naʻe ʻikai ngalo ʻia Sihova ʻa ʻene talaʻofa ke ʻomi ha “hako” ʻa ia ʻe hoko ko e tokotaha-pule ʻi he founga-pule ʻa e ʻOtuá. ʻE fakaʻauha ʻe he tokotaha-pule ko ení ʻa Sētane ʻaki ʻene laiki hono ʻulú. (Loma 16:20; Hepelū 2:14) Ki mui mai, naʻe pehē ʻe Sihova ʻe fakafou mai ʻi he tangata angatonu ko ʻĒpalahamé ʻa e hako ʻo e talaʻofá. Naʻe fakahā ʻe Sihova kia ʻĒpalahame: “Pea ko ho hako ʻe monuʻia ai ʻa e ngaahi puleʻanga ʻo mamani.” (Sēnesi 22:18) Ko hai ʻa e “hako” ko eni ʻa ia naʻe talaʻofa ʻe fakafou mai ʻi he laine ʻo ʻĒpalahamé? ʻOku ʻomai ʻe he Tohitapú ʻa e talí ki mui mai, ʻo pehē: “Pea ko eni, naʻe fai ʻa e ngaahi talaʻofa maʻa Epalahame mo hono hako. ʻOku ʻikai te ne pehe, Pea mo ho ngaahi hako, ʻo hange ko haʻane lau ki ha tokolahi; ka hange ko ʻene lau ki ha toko taha pe, ʻo pehe, Pea mo ho hako: ʻa ia ko Kalaisi.” (Kalētia 3:16) Naʻe toe fakahā ʻe Sihova ki he foha ʻo ʻĒpalahamé ko ʻAisake pea ki hono mokopuna ko Sēkopé ʻe fakafou mai ʻi hona lainé ʻa e “hako” ʻo e “fefine” ʻa e ʻOtuá.—Sēnesi 26:1-5; 28:10-14.
15, 16. Ko e hā ʻokú ne fakamoʻoniʻi ʻe hoko ʻa e “hako” ko ha tuʻi pulé?
15 ʻI hono ʻai ke mahino ʻe hoko ʻa e “hako” ni ko ha tuʻi pulé, naʻe fai ai ʻe Sēkope ʻa e fakamatalá ni ki hono foha ko Siutá: “Ko e sepita [pe mafai ke pule] meia Siuta ʻe ʻikai ʻave, mo e tokotoko mei hono vahaʻa vaʻe, kaeʻoua ke haʻu ʻa Sailo, pea ʻe fai kiate ia ʻe he ngaahi kakai ʻenau tukulolo.” (Sēnesi 49:10) Naʻe haʻu ʻa Sīsū Kalaisi mei he matakali ʻo Siutá. Naʻe fakamoʻoniʻi ai ko ia ʻa e “Sailo” ko ení, ʻa ia “ʻe fai kiate ia ʻe he ngaahi kakai ʻenau tukulolo.”—Hepelū 7:14.
16 Hili ʻa e meimei taʻu ʻe 700 ʻo e fakamatala kia Siutá, naʻe folofola ʻa Sihova ʻo fekauʻaki mo Tēvita ʻo e matakali ʻo Siutá: “Kuou iloʻi a Tevita ko eku tamaioeiki . . . Teu gaohi foki hono hako ke nau tologa o taegata, mo hono nofoa [taloni] o hage koe gaahi aho oe lagi.” (Sāme 89:20, 29, PM) ʻI he folofola ʻa e ʻOtuá ʻo pehē ʻe fokotuʻu ʻa e “hako” ʻo Tēvitá ʻo “taegata” pea ʻe tuʻu “hono taloni” ʻo fuoloa “hage koe gaahi aho oe lagi,” ko ʻene ʻuhinga ki he hā? ʻOku lave ʻa e ʻOtua ko Sihová ki he moʻoniʻi meʻa ko ia ʻe tolonga ʻo taʻengata ʻa e founga-pule Puleʻanga-fakatuʻí ʻi he nima ʻo ʻene tokotaha-pule kuo fakanofo, ko Sīsū Kalaisi. ʻOku tau ʻilo fēfē ia?
17. ʻOku tau ʻilo fēfē ko Sīsū Kalaisi ʻa e tokotaha-pule ne talaʻofá?
17 Sai, manatuʻi ʻa e meʻa naʻe tala kia Mele ʻe he ʻāngelo ʻa Sihova ko Kepalelí ʻo kau ki he tama te ne fanauʻí. Naʻá ne pehē: “Te ke fakahingoa ia ko Sisu.” Ka ʻe ʻikai kei hoko ai pē ʻa Sīsū ko ha tama, pe ko ha tangata ʻi he māmaní. Naʻe hoko atu ʻa e lea ʻa Kepalelí ʻo pehē: “ʻE hoko ko e lahi ʻa e toko taha ko ia; pea ʻe lau ia ko e ʻAlo ʻo e ʻEiki Taupotu; pea ʻe foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi ki he hako ʻo Sekope ʻo lauikuonga; pea ko ʻene pule [puleʻanga, NW] ʻe ʻikai ngata.” (Luke 1:31-33) ʻIkai ʻoku fakaofo moʻoni ʻa e ngaahi fokotuʻutuʻu kuo fai ʻe Sihova ke fokotuʻu ha founga-pule māʻoniʻoni ke hoko ʻo ʻaonga taʻengata maʻá e faʻahinga ʻoku ʻofa mo falala kiate iá?
18. (a) ʻOku anga-fēfē hono fakamatalaʻi ʻe he Tohitapú ʻa e ngataʻanga ʻo e ngaahi founga-pule fakaemāmaní? (e) Ko e hā ʻe fai ʻe he founga-pule ʻa e ʻOtuá maʻá e kakaí?
18 ʻOku ofí ni ʻa e taimi ke ngāue mai ai ʻa e founga-pule Puleʻanga-fakatuʻi ʻo e ʻOtuá ke fakaʻauha ʻa e ngaahi founga-pule kotoa pē ʻo e māmaní. ʻE ngāue leva ʻa Sīsū ʻi hono tuʻungá ko ha Tuʻi ikuna. ʻI hono fakamatalaʻi ʻo e tau ni, ʻoku pehē ʻe he Tohitapú: “Ka ʻi he taimi ʻo e ngaahi tuʻi ko ia, ko e ʻOtua ʻo langi te ne fokotuʻu ha puleʻanga ʻe ʻikai fulihi ʻo taʻengata; . . . ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.” (Tāniela 2:44; Fakahā 19:11-16) ʻI hono toʻo atu ʻa e ngaahi founga-pule kehe kotoa pē, ʻe fakalato leva ʻe he founga-pule ʻa e ʻOtuá ʻa e ngaahi fiemaʻu totonu ʻa e kakaí. Ko e Tokotaha-pulé, ʻa Sīsū Kalaisi, te ne fakapapauʻi ʻoku ʻikai haʻane tokotaha angatonu ʻe puke, tupu ʻo motuʻa pe mate. ʻE toʻo atu ʻa e faihiá, nofoʻanga taʻefeʻungá, fiekaiá mo e ngaahi palopalema kehe pehē. ʻE hoko mai ʻa e melino mo e maluʻanga moʻoní ki he māmaní fakakātoa. (2 Pita 3:13; Fakahā 21:3-5) Kaekehe, ʻoku fiemaʻu ke tau ako lahi ange ʻo fekauʻaki mo e faʻahinga ʻe hoko ko e kau pule ʻi he founga-pule Puleʻanga-fakatuʻi ʻo e ʻOtuá.
[Fehuʻi ki he Ako]
[Fakatātā ʻi he peesi 112, 113]
Naʻe fekau atu ʻe Sīsū ʻa hono kau muimuí ke fai ʻa e ngāue mahuʻinga ko e malanga ʻo fekauʻaki mo e puleʻanga ʻo e ʻOtuá
[Fakatātā ʻi he peesi 114]
ʻI hono fakamaauʻi ʻa Sīsū ʻi he mate pe ko e moʻuí, naʻe hoko atu pē ʻe Sīsū ia ʻa hono malangaʻi ʻa e puleʻanga ʻo e ʻOtuá
[Fakatātā ʻi he peesi 119]
ʻOku fēfē ʻa hoʻo vakai kia Sīsū—ko ha tuʻi ikuna pe ko ha kiʻi pēpē taʻelavameʻa?
