Vahe 8

Ko e Hā ʻOku Hoko ʻi he Maté?

1. Ko e hā ʻa e ngaahi fehuʻi ʻoku faʻa ʻekeʻi ʻe he kakaí ʻo fekauʻaki mo e kau maté?

 MAHALO PĒ ʻokú ke ʻiloʻi ʻa e ongoʻi loto-mamahi ʻoku hoko ʻi he mole atu ʻi he maté ha taha ʻokú ke ʻofa ai. Ko ha toki loto-mamahi mo e tukuhāusia lahi ē te ke ongoʻi! ʻOku fakaenatula pē ke ʻeke: Ko e hā ʻoku hoko ki ha tokotaha ʻi heʻene maté? ʻOkú ne kei moʻui ʻi ha feituʻu? ʻE toe malava nai ʻa e kau moʻuí ke fiefia ʻi ha toe feohi ʻi he māmaní mo e faʻahinga ʻoku mate ʻi he taimi ní?

2. Ko e hā naʻe hoko ki he ʻuluaki tangatá, ko ʻĀtama, ʻi heʻene maté?

² Ke tali ʻa e ngaahi fehuʻi pehe ní, ʻe hoko ia ko ha tokoni kiate kitautolu ke ʻiloʻi ʻa e meʻa naʻe hoko kia ʻĀtama ʻi heʻene maté. ʻI heʻene faiangahalá, naʻe folofola ange ʻa e ʻOtua kiate ia: “[Te] ke foki ki he kelekele ʻa ia naʻe toʻo koe mei ai: he ko e efu koe, pea ko e efu te ke foki ki ai.” (Sēnesi 3:19) Fakakaukau ki he ʻuhinga ʻo e meʻá ni. Naʻe ʻikai ha ʻĀtama ki muʻa ʻi hono fakatupu ia ʻe he ʻOtuá mei he efú. Naʻe ʻikai te ne moʻui. Ko ia, naʻe foki ʻa ʻĀtama ki he tuʻunga tatau ʻo ʻikai moʻui he hili ʻa ʻene maté.

3. (a) Ko e hā ʻa e maté? (e) Ko e hā ʻa e lau ʻa Tangata Malanga Koheleti 9:5, 10 ʻo fekauʻaki mo e tuʻunga ʻo e kau maté?

³ Ko hono ʻai mahinó, ko e maté ko e fehangahangai ia ʻo e moʻuí. ʻOku fakahaaʻi eni ʻe he Tohitapú ʻia Tangata Malanga Koheleti 9:​5, 10 (PM). ʻOku pehē ʻe he ongo veesí ni: “He oku ilo e he kakai moui te nau mate: ka oku ikai jii ilo ha mea e he mate, bea oku ikai te nau kei maʻu ha totogi: he kuo galo a ho nau fakamanatu. Koia kotoabe oku ilo e ho nima ke fai, fai ia aki ho malohi kotoabe; he oku ikai ha  gaue, be ha filioi, be ha ilo, be ha boto i he faitoka, aia oku ke alu ki ai.”

4. (a) Ko e hā ʻoku hoko ki ha ngaahi malava fakaefakakaukau ʻa ha taha ʻi he maté? (e) Ko e hā ʻoku ʻikai ke toe ngāue kotoa ai ʻa e ngaahi ongo ʻo ha taha ʻi he maté?

⁴ ʻOku ʻuhinga ení ʻoku ʻikai malava ʻe he kau maté ke fai ha meʻa mo ʻikai malava ke ongoʻi ha meʻa. ʻOku ʻikai te nau kei maʻu ha fakakaukau, ʻo hangē ko ia ʻoku fakahā ʻe he Tohitapú: “ʻOua ʻe tuku hoʻomou falalá ki he kau nōpelé, pe ki he foha ʻo e tangatá, he ʻoku ʻikai ʻanautolu ʻa e fakamoʻuí. ʻOku mole atu hono laumālié, ʻokú ne foki ki hono kelekelé; ʻi he ʻaho ko iá ʻoku mate ai ʻene ngaahi fakakaukau.” (Sāme 146:​3, 4, NW) ʻI he maté “ʻoku mole atu” ʻa e laumālie ʻo e tangatá, ʻa hono ivi-moʻuí, ʻa ia ʻoku fakatolonga ʻaki ʻa e mānavá. ʻOku ʻikai ke kei moʻui ia. Ko ia ko e ngaahi ongo ʻa e tangatá ki he fanongó, mamatá, ongó, nanamú, mo e ifó ʻa ia ʻoku fakatuʻunga ʻi heʻene kei malava ke fakakaukaú, ʻoku ʻikai ke toe ngāue kotoa ia. Fakatatau ki he Tohitapú, ʻoku hū atu ʻa e kau maté ki ha tuʻunga ʻo e taʻe toe ʻiloʻi pe ongoʻi ha meʻa ʻe taha.

5. (a) ʻOku anga-fēfē hono fakahā ʻe he Tohitapú ʻoku tatau ʻa e tuʻunga ʻo e faʻahinga ʻo e tangatá mo e fanga manú fakatouʻosi ʻi he maté? (e) Ko e hā ʻa e “laumālie” ʻokú ne ʻai ʻa e faʻahinga ʻo e tangatá mo e fanga manú fakatouʻosi ke moʻuí?

⁵ ʻI he mate ʻa e faʻahinga ʻo e tangatá mo e fanga manú fakatouʻosi ʻokú na ʻi he tuʻunga tatau ko eni ko e taʻe toe ʻiloʻi pe ongoʻi ha meʻa ʻe taha. Fakatokangaʻi ʻa hono fakahaaʻi ʻe he Tohitapú ʻa e meʻá ni: “Hange ko e mate ʻa ē ʻoku pehe ʻa e mate ʻo ē; pea ko e moʻui [laumālie, NW] pe taha ʻoku ʻiate kinautolu kotoa; pea ʻoku ʻikai ke amo atu ʻa e tangata ʻi he manu: he ko e muna kotoa pe. ʻOku ʻalu kotoa ki ha potu pe taha; ʻoku mei he efu kotoa pe, pea ʻoku foki kotoa pe ki he efu.” (Koheleti 3:​19, 20) Ko e “laumālie” ʻokú ne ʻai ʻa e fanga manú ke moʻui ʻoku tatau pē mo ia ʻokú ne ʻai ʻa e faʻahinga ʻo e tangatá ke moʻuí. ʻI he mole atu ʻa e “laumālie” pe ivi-moʻui taʻehāmai ko ení, ʻoku foki ʻa e tangatá mo e fanga manú fakatouʻosi ki he efu ʻa ia naʻe ngaohi kinaua mei aí.

ʻOKU MATE ʻA E SOULÚ

6. ʻOku anga-fēfe hono fakahā ʻe he Tohitapú ko e ngaahi soulu ʻa e fanga manú?

⁶ Kuo pehē ʻe ha faʻahinga ʻe niʻihi ko e meʻa ʻoku faikehekehe ai ʻa e tangatá mei  he fanga manú he ʻoku maʻu ʻe he tangatá ha soulu kae hala ʻa e fanga manú. Kaekehe, ʻoku pehē ʻia Sēnesi 1:20 mo e 30 (NW), naʻe fakatupu ʻe he ʻOtua ʻa e “ngaahi soulu moʻui” ke moʻui ʻi he vai, pea ko e fanga manu ʻoku maʻu “moʻui ko ha soulu.” ʻI he ngaahi veesí ni ʻoku ngāueʻaki ʻe he ngaahi Tohitapu ʻe niʻihi ʻa e foʻi lea ko e “meʻa moʻui” mo e “moʻui” kae ʻikai ko e “soulu,” ka ʻi honau ngaahi fakamatala ʻi he tafaʻaki ʻo e ngaahi peesí ʻoku poupouʻi ai ko e foʻi lea “soulu” ʻoku hā ʻi he muʻaki leá. Ko e konga tohi ʻe taha ʻi he Tohitapú ʻoku lave ki he fanga manú ko e ngaahi soulú ko Nōmipa 31:28 (NW, KJ). ʻI ai ʻoku lāulea ʻo fekauʻaki mo e “soulu ʻe taha mei he toko nimangeau, mei he faʻahinga ʻo e tangata mo e fanga pulu mo e fanga ʻasi pea mo e tākanga sipi mo e kosi.”

7. Ko e hā ʻa e lau ʻa e Tohitapú ke fakamoʻoniʻi ʻoku mate ʻa e soulu ʻo e fanga manú mo e soulu fakaetangatá fakatouʻosi?

⁷ Koeʻuhi ko e fanga manú ko e ngaahi soulu, ʻi heʻenau maté ʻoku mate honau ngaahi soulú. Hangē ko ia ʻoku pehē  ʻe he Tohitapú: “Naʻe mate ʻa e soulu moʻui kotoa pē, ʻio, ʻa e ngaahi meʻa ʻi he tahí.” (Fakahā 16:3, NW) Kae fēfē ʻa e ngaahi soulu fakaetangatá? Hangē ko ia kuo tau ako ki ai ʻi he vahe ki muʻá, naʻe ʻikai fakatupu ʻe he ʻOtuá ʻa e tangatá mo ha soulu. Ko e tangatá ko e soulu. Ko ia, hangē ko ia ke tau fakakaukau atu ki aí, ʻi he mate ʻa e tangatá ʻoku mate hono soulú. ʻOku toutou pehē ʻe he Tohitapú ʻoku moʻoni ʻa e meʻa ko iá. ʻOku ʻikai teitei pehē ʻe he Tohitapú ʻoku taʻemate ʻa e soulú pe ʻikai malava ke mate ia. ʻOku pehē ʻe Sāme 22:29 (NW): “ʻE tūʻulutui ʻa e faʻahinga kotoa ʻoku ʻalu hifo ki he efu, pea heʻikai ha taha te ne fakatolonga moʻui hono soulú.” ʻOku fakamatalaʻi ʻe ʻIsikeli 18:4 mo e 20 (NW): “Ko e soulu ʻoku faiangahalá​—ko ia ia ʻe maté.” Pea kapau te ke vakai kia Siōsiua 10:​28-39 (NW, KJ), te ke ʻilo ai ʻoku tuʻo fitu ʻa e pehē ai ʻoku mate pe fakaʻauha ʻa e soulú.

8. ʻOku anga-fēfē ʻetau ʻilo naʻe pekia ʻa e soulu fakaetangata, ko Sīsū Kalaisí?

⁸ ʻI ha kikite ʻo fekauʻaki mo Sīsū Kalaisi ʻoku pehē ʻe he Tohitapú: “Naʻa ne lilingi hono soulú ki he mate . . . pea ne fua ʻe ia ʻa e angahala ʻa e kakai tokolahi.” (ʻAisea 53:​12, NW) ʻOku fakamoʻoniʻi ai ʻa e akonaki ʻo fekauʻaki mo e huhuʻí ko ha soulu (ko ʻĀtama) naʻe angahala, pea ke huhuʻi ʻa e faʻahinga ʻo e tangatá naʻe pau ke ʻi ai ha feilaulau ʻo ha soulu fehoanakimālie (ko ha tangata). Naʻe tokonaki ʻe Kalaisi ʻa e totongi huhuʻí ʻaki hono ‘lilingi hono soulú ki he mate.’ Naʻe pekia ʻa e soulu fakaetangata, ko Sīsū.

9. Ko e hā ʻa e ʻuhinga ʻo e lea, ‘pea foki ʻa e laumālie ki he ʻOtuá ʻa ia naʻa ne tuku mai ia’?

⁹ Hangē ko ia kuo tau akó, ko e “laumālie” ko ha meʻa kehe ia mei hotau soulú. Ko e laumālié ko hotau ivi-moʻuí ia. Ko e ivi-moʻuí ni ʻoku ʻi he fanga kiʻi sela taki taha ʻi he sino ʻo e faʻahinga ʻo e tangatá pea mo e fanga manú fakatouʻosi. ʻOku fakatolonga pe tauhi ke moʻui ia, ʻaki ʻa e mānava. Ko ia ko e hā nai hono ʻuhingá ʻi he pehē ʻe he Tohitapú ʻi he maté ʻoku “foki ʻa e efu ki he kelekele . . . pea foki ʻa e laumalie kia Elohimi [ki he ʻOtua moʻoni, NW] ʻa ia naʻa ne tuku mai ia”? (Koheleti 12:7) ʻI he maté ʻoku mavahe ʻa e ivi-moʻuí mei he fanga kiʻi sela kotoa ʻo e sinó pea kamata ʻa e sinó ke ʻaunga. Ka ʻoku ʻikai ʻuhinga eni ia ʻoku mavahe hotau ivi-moʻuí mei māmani pea fononga atu ʻi he ʻataá ki he ʻOtuá. Kaekehe, ʻoku foki ʻa e laumālie ki he ʻOtuá ʻi he ʻuhinga ʻoku fakafalala kakato pē ʻetau ʻamanaki ki he kahaʻú ʻi he ʻOtuá. Ko hono mālohí pē ʻe lava ke ne fakafoki mai ʻa e laumālié, pe ivi-moʻuí, ke tau toe moʻui.​—Sāme 104:​29, 30.

KO LASALOSI​—KO HA TANGATA NAʻE MATE ʻAHO ʻE FĀ

10. Neongo naʻe mate ʻa Lasalosi, ko e hā naʻe leaʻaki ʻe Sīsū ʻo fekauʻaki mo hono tuʻungá?

¹⁰ Ko e meʻa naʻe hoko kia Lasalosí, ʻa ia naʻe mate he ʻaho ʻe fā, ʻoku tokoni kiate kitautolu ke mahino ʻa e tuʻunga ʻo e kau maté. Naʻe tala ʻe Sīsū ki heʻene kau ākongá: “Ko siʻota kaumeʻa ko Lasalosi kuo mohe;  ka ko ʻeku ʻalu ni ke u fafangu ia.” Kaekehe, naʻe tali ange ʻe he kau ākongá: “ʻEiki, kapau kuo ne mohe te ne moʻui.” ʻI heʻenau lea peheé, naʻe tala fakapatonu ange ʻe Sīsū kiate kinautolu: “Kuo pekia ʻa Lasalosi.” Ko e hā naʻe pehē ai ʻe Sīsū ʻoku mohe ʻa Lasalosí, ka ʻi hono moʻoní naʻá ne mate? Tau vakai ange ki ai.

11. Ko e hā naʻe fai ʻe Sīsū ki he tokotaha mate ko Lasalosí?

¹¹ ʻI he fakaofiofi atu ʻa Sīsū ki he kolo naʻe nofo ai ʻa Lasalosí, naʻe fakafetaulaki kiate ia ʻa Māʻata, ko e tuofefine ʻo Lasalosí. Naʻá na fononga fakataha leva mo e niʻihi kehe tokolahi ki he fonualoto naʻe tuku ai ʻa Lasalosí. Ko ha ʻana, pea naʻe fakafalala ki ai ha fuʻu maka. Naʻe pehē ʻe Sīsū: “Toʻo ʻa e maka.” Koeʻuhi naʻe ʻaho fā ʻa e mate ʻa Lasalosí, naʻe lea fakafepaki ange ʻa Māʻata: “ʻEiki, kuo namuhāhā.” Ka naʻe toʻo ʻa e maká, pea ui atu ʻa Sīsū: “Lasalosi, tuʻu mai kituʻa.” Peá ne tuʻu mai! Naʻe moʻui ia ʻo hū ki tuʻa, ʻoku kei haʻiʻaki ʻa e kofu tanú. Naʻe pehē ʻe Sīsū: “Vete ia, pea tukuange ke ne ʻalu.”​—Sione 11:​11-44.

12, 13. (a) Ko e hā ʻoku lava ai ke tau ʻilo pau naʻe ʻikai toe ʻiloʻi pe ongoʻi ha meʻa ʻe Lasalosi ʻi heʻene maté? (e) Ko e hā naʻe pehē ai ʻe Sīsū ʻoku mohe pē ʻa Lasalosí, ka ko hono moʻoní naʻá ne mate?

¹² Fakakaukau ange ki he meʻá ni: Ko e hā ʻa e tuʻunga ʻo Lasalosí he lolotonga ʻa e ʻaho ʻe fā naʻe mate aí? Naʻá ne ʻi hēvani? Ko ha tangata lelei ia. Ka naʻe ʻikai ʻaupito ha lea ia ʻa Lasalosi ʻo fekauʻaki mo haʻane ʻi hēvani, ʻa ia naʻe pau ke ne fai pehē ʻo kapau naʻá ne ʻi ai. ʻIkai, naʻe mate moʻoni ʻa Lasalosi, ʻo hangē pē ko ia naʻe leaʻaki ʻe Sīsuú. Ka ko e hā naʻe ʻuluaki tala ai ʻe Sīsū ki heʻene kau ākongá ʻoku mohe pē ʻa Lasalosí?

¹³ Sai, naʻe ʻilo ʻe Sīsū ʻoku ʻikai toe ʻiloʻi pe ongoʻi ha meʻa ʻe he tokotaha mate ko Lasalosí, ʻo hangē ko ia ʻoku pehē ʻe he Tohitapú: “Ko e kau pekia ʻoku ʻikai te nau ʻilo ha momoʻi meʻa.” (Koheleti 9:5) Ka ʻe lava ke fafangu ha tangata moʻui mei haʻane mohe maʻu. Ko ia naʻe teu ke fakahā ʻe Sīsū, ʻe lava ke fafangu ʻa hono kaumeʻa ko Lasalosí mei he maté ʻaki ʻa e mālohi ʻo e ʻOtuá naʻe foaki ange kiate iá.

14. Ko e ʻilo ki he mafai ʻo Kalaisi ke fokotuʻu ʻa e kau maté ʻoku totonu ke ne ueʻi kitautolu ke fai ʻa e hā?

¹⁴ ʻI ha mohe maʻu ʻaupito ʻa ha taha, ʻoku ʻikai te ne toe manatuʻi ha meʻa. ʻOku tatau ia mo e kau maté. ʻOku ʻikai te nau toe ongoʻi ha meʻa ʻe taha. ʻOku ʻikai te nau kei moʻui. Ka ʻi he taimi tukupau ʻa e ʻOtuá, ʻe toe fokotuʻu ki he moʻuí ʻa e kau mate kuo huhuʻi ʻe he ʻOtuá. (Sione 5:28) ʻOku totonu ke ueʻi ʻa kitautolu ʻe he ʻilo ko ení ke tau fiemaʻu ke maʻu ʻa e hōifua ʻa e ʻOtuá. Kapau te tau lava ia, neongo ai pē kapau te tau mate, ʻe manatuʻi ʻa kitautolu ʻe he ʻOtuá pea te ne fakafoki mai kitautolu ki he moʻuí.​—1 Tesalonaika 4:​13, 14.

[Fehuʻi ki he Ako]

[Fakatātā ʻi he peesi 76]

KO ʻĀTAMA​—naʻe ngaohi mei he efu . . . naʻe foki ki he efu

[Fakatātā ʻi he peesi 78]

Ko e hā ʻa e tuʻunga naʻe ʻi ai ʻa Lasalosí ki muʻa pea toki fokotuʻu hake ia ʻe Sīsuú?