Ko e Meʻa Kuo Pau ke Ke Fai ka ke Moʻui Taʻengata
Vahe 30
Ko e Meʻa Kuo Pau ke Ke Fai ka ke Moʻui Taʻengata
1. (a) Ko e hā ʻa e ongo ʻalunga ʻe ua ʻoku ʻatā kiate koé? (e) ʻE malava fēfē haʻo fili ʻa e ʻalunga totonú?
ʻOKU TUKU ATU ʻe he ʻOtua ko Sihová ha meʻa fakaofo kiate koe—ko e moʻui taʻengata ʻi heʻene fokotuʻutuʻu foʻou māʻoniʻoní. (2 Pita 3:13) Ka ʻoku fakatuʻunga ʻa e moʻui aí ʻi hoʻo fai ʻa e finangalo ʻo e ʻOtuá he taimí ni. Kuo mei mole atu ʻa e māmani fulikivanu lolotongá, ʻo kau ai ʻa e faʻahinga kotoa ʻoku nau kei hoko ko ha konga ʻo iá, “ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:17) Ko ia kuo pau ke ke fili ʻi he ongo ʻalunga ʻe ua. ʻOku fakatau ʻa e taha ki he maté pea ki he moʻui taʻengatá ʻa e taha. (Teutalōnome 30:19, 20) Ko fē ʻa e ʻalunga te ke fou aí?
2. (a) Kapau ʻokú ke maʻu ʻa e tui moʻoní, ko e hā ʻa e meʻa te ke tui pau ki aí? (e) ʻE anga-fēfē ʻa hono tokoniʻi koe ke tauhi ki he ʻOtuá ʻe hoʻo falala kiate ia ʻo hangē ko e falala ʻa ha tama ki ha tamai ʻofa?
2 ʻE anga-fēfē haʻo fakahā ʻokú ke fili ki he moʻuí? Ko e ʻuluaki meʻá, kuo pau ke ke tui kia Sihova mo ʻene ngaahi talaʻofá. ʻOkú ke tui pau ʻoku ʻi ai ʻa e ʻOtua “pea te ne hanga ʻo totongi kiate kinautolu ʻoku kumi hākili kiate ia”? (Hepelū 11:6) ʻOku fiemaʻu ke ke falala ki he ʻOtuá ʻo hangē ko e falala ʻa ha foha pe ko ha ʻofefine ki ha tamai ʻofa mo manavaʻofa. (Sāme 103:13, 14; Palōvepi 3:11, 12) Naʻa mo e taimi ʻoku ʻikai mahino kakato ai kiate koe ha meʻa, heʻikai te ke tālaʻa ki he fakapotopoto ʻa ʻene akonakí pe ki he totonu ʻa ʻene ngaahi foungá, ʻo kapau ʻokú ke maʻu ʻa e tui pehē.
3. (a) Tānaki atu ki he tuí, ko e toe hā ʻoku fiemaʻú? (e) Ko e hā ʻa e ngaahi ngāue ʻoku fiemaʻu ke fakahāhā ai ʻokú ke fili ki he moʻuí?
3 Kaekehe, ʻoku fiemaʻu ha meʻa lahi ange ia ʻi he tuí. Kuo pau ke ʻi ai foki ʻa e ngaahi ngāue ke ne fakahāhā pe ʻoku fēfē ʻa hoʻo ongoʻi moʻoni ʻo fekauʻaki mo Sihová. (Sēmisi 2:20, 26) Kuó ke fai ha ngaahi meʻa ke fakahā ʻokú ke ongoʻi fakatomala koeʻuhi ko ha tō nounou ʻi he kuo hilí mei hono fai ʻa e meʻa ʻoku totonú? Kuo ueʻi koe ke ke fakatomala pe fai ha ngaahi liliu ke ʻai ʻa e ʻalunga ʻo hoʻo moʻuí ke fehoanaki mo e finangalo ʻo Sihová? Kuó ke tafoki, ʻa ia ke talitekeʻi ha faʻahinga ʻalunga hala naʻá ke muimui nai ai, pea kuó ke kamata ʻa hono fai ʻa e ngaahi meʻa ʻoku finangalo ki ai ʻa e ʻOtuá? (Ngāue 3:19; 17:30) ʻE fakahā ʻe he ngaahi ngāue peheé ʻokú ke fili ki he moʻuí.
FAKATAPUI MO E PAPITAISO
4. (a) Ko e hā ʻoku totonu ke ne ueʻi koe ke fai ʻa e finangalo ʻo e ʻOtuá? (e) ʻI hoʻo fili ke tauhi ki he ʻOtuá, ko e hā ʻoku totonu ke ke faí?
4 Ko e hā ʻoku totonu ke ne ueʻi koe ke ke fili ki he moʻuí ʻi hoʻo fai ʻa e finangalo ʻo e ʻOtuá? Ko e houngaʻiá. Fakakaukau angé: Kuo ʻai ʻe Sihova ke malava ke fakatauʻatāinaʻi koe mei he mahaki mo e faingataʻaʻia kotoa pē, pea pehē ki he maté! Kuó ne fakaava kiate koe ʻa e hala ki he moʻui taʻengatá ʻi ha māmani palataisi, ʻo fou mai ʻi he meʻaʻofa maʻongoʻonga ko hono ʻAló. (1 Kolinitō 6:19, 20; 7:23; Sione 3:16) ʻI hono ueʻi koe ʻe he ʻofa ʻa Sihová ke ke ʻofa ange kiate iá, ko e hā ʻoku totonu ke ke faí? (1 Sione 4:9, 10; 5:2, 3) ʻOku totonu ke ke fakaofi ki he ʻOtuá ʻi he huafa ʻo Sīsuú pea fakahā kiate ia ʻi he lotu ʻokú ke fie hoko ko ʻene sevāniti, ʻokú ke fie kau maʻana. ʻI he foungá ni ʻokú ke fakatapui ai koe ki he ʻOtuá. Ko ha meʻa fakafoʻituitui, pe fakatāutaha eni. Heʻikai malava ke fai ia ʻe ha taha maʻau.
5. (a) Hili hoʻo fai hoʻo fakatapui ki he ʻOtuá, ko e hā ʻokú ne ʻamanekina mai te ke faí? (e) Ko e hā ʻa e tokoni ʻoku ala maʻu kiate koe ʻi hoʻo fai ki hoʻo fakatapuí?
5 Hili hoʻo fai hoʻo fakatapuí ki he ʻOtuá, te ne ʻamanekina mai te ke fai ki he meʻa ko iá. Ko ia fakamoʻoniʻi ko e tokotaha koe ʻokú ke fai ki hoʻo leá ʻaki hoʻo pīkitai ki he fili pe fakatapui ko ení ʻo aʻu ki he ngataʻanga ʻo hoʻo moʻuí. (Sāme 50:14) Kapau te ke vāofi mo e kautaha hāmai ʻa e ʻOtuá, ʻe tokoniʻi ai koe ʻe he kaungā Kalisitiané, ʻa ia te nau foaki fiefia atu kiate koe ʻa e fakalototoʻa mo e poupou ʻofa.—1 Tesalonaika 5:11.
6. (a) ʻI hoʻo fakatapui hoʻo moʻui ki he ʻOtuá, ko e hā ʻa e lākanga kuo pau ke faí? (e) Ko e hā ʻa e ʻuhinga ʻo e papitaisó?
6 Kaekehe, kuo pau heʻikai ngata pē ʻi hoʻo tala fakaekoe kia Sihova ʻokú ke fie kau kiate iá. ʻOku fiemaʻu ke ke fakahāhā ʻi he ʻao ʻo e niʻihi kehé kuó ke fai ha fakatapui ke tauhi ki he ʻOtuá. ʻOku anga-fēfē ʻa hoʻo fai ení? ʻAki hoʻo papitaiso ʻi he vai. Ko e papitaiso ko eni ʻi he vaí ko ha fakahā fakahāhā ia kuo fakatapui ʻe ha taha ʻa ʻene moʻuí kia Sihova pea ʻokú ne foaki atu ia ke fai Hono finangaló.
7. (a) Ko e hā ʻa e faʻifaʻitakiʻanga naʻe tokonaki ʻe Sīsū ki he kau Kalisitiané? (e) Ko e hā ʻoku ʻikai ki he kau valevalé ai ʻa e papitaiso naʻe fekauʻi mai ʻe Sīsuú?
7 ʻOku fakahāhā ʻe he faʻifaʻitakiʻanga ʻa Sīsū Kalaisí ko ha fiemaʻu mahuʻinga ʻa e papitaiso ko ia ʻi he vaí. Naʻe ʻikai ke tala pē ʻe Sīsū ki heʻene Tamaí kuó ne haʻu ke fai Hono finangaló. (Hepelū 10:7) ʻI he taimi naʻá ne teu ke kamata ai ʻa ʻene ngāue ko ha tokotaha-malanga ʻo fekauʻaki mo e puleʻanga ʻo e ʻOtuá, naʻe foaki atu ʻe Sīsū ʻa ia tonu kia Sihova peá ne papitaiso ʻi he vaí. (Mātiu 3:13-17) Koeʻuhi kuo fokotuʻu ʻe Sīsū ʻa e sīpingá, ʻoku totonu ke papitaiso ʻa e faʻahinga he ʻahó ni ʻoku nau fakatapui ʻa kinautolu kia Sihova ke fai hono finangaló. (1 Pita 2:21; 3:21) Ko hono moʻoní, naʻe fekauʻi ʻe Sīsū ʻa hono kau muimuí ke ngaohi ākonga ʻi he kakai ʻo e ngaahi puleʻanga kotoa pea toki papitaiso ʻa e kau ākonga foʻoú ni. ʻOku ʻikai ko ha papitaiso eni ʻo e kau valevalé. Ko ha papitaiso ia ʻo e faʻahinga kuo nau hoko ko e kau tui, ʻa ia kuo nau fakapapauʻi ʻiate kinautolu ke tauhi kia Sihova.—Mātiu 28:19; Ngāue 8:12.
8. Kapau ʻokú ke fie papitaiso, ko hai ʻi he fakatahaʻangá ʻoku totonu ke ke ʻai ke ʻilo ki aí, pea ko e hā hono ʻuhingá?
8 Kapau kuó ke fakapapauʻi ke tauhi kia Sihova peá ke fie papitaiso, ko e hā ʻoku totonu ke ke faí? ʻOku totonu ke ke ʻai ke ʻilo ʻa hoʻo fiemaʻú ʻe he ʻovasia pule ʻo e fakatahaʻanga ʻo e Kau Fakamoʻoni ʻa Sihová ʻa ia ʻokú ke kau ki aí. Te ne fiefia fakataha mo e kau mātuʻa kehe ʻi he fakatahaʻangá ke nau toe vakai mo koe ki he fakamatala ʻoku fiemaʻu ke ke ʻilo ki aí kae lava ke ke tauhi ki he ʻOtuá ʻi ha founga fakahōifua. ʻE toki fai leva ʻa e fokotuʻutuʻu ke ke papitaisó.
FINANGALO ʻO E ʻOTUÁ KIATE KOE HE ʻAHO NÍ
9. Ko e hā naʻe fai ʻe Noa ki muʻa ʻi he lōmakí pea ko e meʻa ia ʻoku finangalo ki ai ʻa e ʻOtuá ke ke fai he taimi ní?
9 Ki muʻa he lōmakí, naʻe ngāueʻaki ʻe Sihova ʻa Noa, “ʻa ia naʻa ne malangaʻaki ʻa e māʻoniʻoni,” ke fai ha fakatokanga ʻo fekauʻaki mo e fakaʻauha ʻe hoko pea fakahā ʻa e feituʻu pē ʻe taha ke malu aí, ko e ʻaʻaké. (Mātiu 24:37-39; 2 Pita 2:5; Hepelū 11:7) Ko e finangalo ia ʻo e ʻOtuá ke ke fai he taimí ni ha ngāue fakamalanga tatau. Naʻe kikite ʻa Sīsū ʻo fekauʻaki mo hotau kuongá: “Bea koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” (Mātiu 24:14, PM) Kuo pau ke ʻilo ʻe he niʻihi kehé ʻa e ngaahi meʻa kuó ke ako ʻo fekauʻaki mo e ngaahi taumuʻa ʻa e ʻOtuá ka nau hao moʻui atu ʻi he ngataʻanga ʻo e tuʻu ko ení pea moʻui taʻengata. (Sione 17:3) ʻIkai ʻoku ueʻi ho lotó ke kau ʻi hono vahevahe atu ʻa e ʻilo foaki-moʻuí ni ki he niʻihi kehé?
10. (a) Ko e hā ʻa e faʻifaʻitakiʻanga ʻa Sīsū ʻoku totonu ke tau muimui ai ʻi hono ueʻi kitautolu ʻe he ʻofa ki he kakaí? (e) ʻI he founga fē ʻoku fai lahi ai ʻa e ngāue fakamalangá?
10 Muimui ki he faʻifaʻitakiʻanga ʻa Kalaisí. Naʻe ʻikai te ne tatali ke haʻu ʻa e kakaí kiate ia, ka naʻá ne ʻalu ʻo kumi ki he faʻahinga te nau fanongo ki he pōpoaki ʻo e Puleʻangá. Pea naʻá ne fakahinohino ki hono kau muimuí—ko kinautolu kotoa—ke nau fai ʻa e meʻa tatau. (Mātiu 28:19; Ngāue 4:13; Loma 10:10-15) ʻI he muimui ki he fakahinohino mo e faʻifaʻitakiʻanga ʻa Kalaisí, naʻe ʻaʻahi ʻa e muʻaki kau Kalisitiané ki he kakaí ʻi honau ngaahi ʻapí. Naʻa nau ʻalu ‘mei he fale ki he fale’ mo e pōpoaki ʻo e Puleʻangá. (Luke 10:1-6; Ngāue 20:20) Ko e founga tefito eni ʻoku kei fakahoko ai ʻi hotau ʻahó ni ʻe he kau Kalisitiane moʻoní ʻa ʻenau ngāue fakamalangá.
11. (a) Ko e hā ʻoku fiemaʻu ai ke lototoʻa ʻi he malanga ʻo fekauʻaki mo e puleʻanga ʻo e ʻOtuá, ka ko e hā ʻoku ʻikai ke fiemaʻu ai ke tau ilifiá? (e) ʻOku anga-fēfē ʻa e vakai ʻa Sihova ki he ngāue ʻoku tau faí?
11 ʻOku fiemaʻu ʻa e lototoʻa ki hono fai ʻa e ngāué ni. ʻOku pau ke feinga ʻa Sētane mo ʻene māmaní ke taʻofi koe, ʻo hangē pē ko ʻenau feinga ke taʻofi ʻa e muʻaki kau muimui ʻo Kalaisí mei he ngāue fakamalangá. (Ngāue 4:17-21; 5:27-29, 40-42) Ka ʻoku ʻikai fiemaʻu ke ke ilifia. Hangē pē ko hono poupouʻi mo fakamālohiange ʻe Sihova ʻa e muʻaki kau Kalisitiané, te ne fai ʻa e meʻa tatau pē kiate koe he ʻahó ni. (2 Tīmote 4:17) Ko ia lototoʻa! Fakamoʻoniʻi ʻokú ke mātuʻaki ʻofa ʻia Sihova pea mo ho kaungā faʻahinga ʻo e tangatá ʻaki hoʻo kau kakato ʻi he ngāue fakamalanga mo fakafaiako fakahaofi moʻuí. (1 Kolinitō 9:16; 1 Tīmote 4:16) ʻE ʻikai ngalo ʻia Sihova ʻa hoʻo ngāué, ka te ne fakapaleʻi lahi ʻaupito ai koe.—Hepelū 6:10-12; Taitusi 1:2.
12. Ko e hā ʻoku malava ke tau ako mei he faʻifaʻitakiʻanga ʻa e uaifi ʻo Loté?
12 ʻOku hala ʻatā ha meʻa ʻoku ʻaonga moʻoni ʻoku tuku mai ʻe he tuʻu ko ení, ko ia ʻi hoʻo tafoki mei aí ʻoua ʻaupito ʻe fakakaukau ʻokú ke siva ʻi ha meʻa. Naʻe pehē ʻe Sīsū: “Manatuʻi ʻa e uaifi ʻo Lote.” (Luke 17:32) Hili ʻene hola mo hono fāmilí mei Sōtomá, naʻá ne toe sio ʻo ʻunaloto ki he ngaahi meʻa naʻa nau liʻakí. Naʻe ʻafioʻi ʻe he ʻOtuá ʻa e holi ʻa hono lotó, pea naʻá ne hoko ko ha pou māsima. (Sēnesi 19:26) ʻOua ʻe hangē ko e uaifi ʻo Loté! Tauhimaʻu ho matá ʻi he meʻa ʻoku hanganaki maí, ʻi “he moʻui moʻoni” ʻi he fokotuʻutuʻu foʻou māʻoniʻoni ʻa e ʻOtuá.—1 Tīmote 6:19.
FILI ʻA E MOʻUI TAʻENGATA HE PALATAISI ʻI HE MĀMANÍ
13. Naʻe anga-fēfē ʻa hono fakahā mai ʻe Sīsū ʻa e fili kuo pau ke fai ʻe kitautolu kotoa?
13 Ko hono moʻoní, ʻoku ua pē ʻa e fili ke faí. Naʻe fakahoa ia ʻe Kalaisi ki hono fili ha taha ʻi he ongo hala ʻe ua. Naʻá ne pehē ko e hala ʻe taha ʻoku “fālahi . . . pea ʻatā.” ʻI aí, ʻoku tauʻatāina pē ʻa e kau fononga aí ke nau faʻiteliha pē ʻa kinautolu. Kaekehe, ko e hala ʻe tahá ʻoku “ʻefiʻefi”. ʻIo, ʻoku fiemaʻu ki he faʻahinga ʻi he hala ko iá ke nau talangofua ki he ngaahi fakahinohino mo e ngaahi lao ʻa e ʻOtuá. Naʻe pehē ʻe Sīsū ʻoku ʻalu ʻi he hala fālahí ʻa e kakai tokolahi tahá, pea ko ha tokosiʻi pē ʻoku ʻi he hala fāsiʻí. Ko fē ʻa e hala te ke filí? ʻI hono fai hoʻo filí, manatuʻi eni: Ko e hala fālahí ʻe ngata fakafokifā—ko e fakaʻauha! ʻI he tafaʻaki ʻe tahá, ʻe taki atu koe ʻe he hala fāsiʻí ki he fokotuʻutuʻu foʻou ʻa e ʻOtuá. ʻI aí te ke lava ʻo kau ai ʻi hono ngaohi ʻa e foʻi māmaní ko ha palataisi lāngilangiʻia, ʻa ia te ke malava ke moʻui taʻengata ai ʻi he fiefia.—Mātiu 7:13, 14.
14. Kuo pau ke ke hoko ko ha konga ʻo e hā kae lava ke ke hao atu ki he fokotuʻutuʻu foʻou ʻa e ʻOtuá?
14 ʻOua te ke fakakaukau ʻoku ʻi ai ha ngaahi hala, pe ngaahi founga kehekehe ʻoku malava ke ke fou ai ke maʻu ʻa e moʻui ʻi he fokotuʻutuʻu foʻou ʻa e ʻOtuá. ʻOku taha pē ʻa e halá. Naʻe taha pē ʻa e ʻaʻake naʻe hao ʻi he Lōmakí, kae ʻikai ko ha ngaahi vaka. Pea ʻe taha pē ʻa e kautaha—ko e kautaha hāmai ʻa e ʻOtuá—ʻe hao atu ʻi he “mamahi lahi” ʻoku vavé ni ʻa ʻene hokó. ʻOku ʻikai pē ke moʻoni ʻa e pehē ia ʻoku fakatau ʻa e ngaahi lotu kotoa pē ki he taumuʻa pē ʻe taha. (Mātiu 7:21-23; 24:21) Kuo pau ke ke hoko ko ha konga ʻo e kautaha ʻa Sihová, ʻo fai ʻa e finangalo ʻo e ʻOtuá, kae lava ke ke maʻu ʻa ʻene tāpuaki ko e moʻui taʻengatá.—Sāme 133:1-3.
15. (a) Ko e hā ʻoku fiemaʻu ke tau fai ʻi he ʻaho kotoa pē? (e) Ko e hā ʻa e ʻamanaki ʻoku mātuʻaki mahulu ange ia ʻi ha misi?
15 Ko ia tauhimaʻu ʻa e ʻata ʻo e fokotuʻutuʻu foʻou talaʻofa ʻa e ʻOtuá ke maamaloa ʻi ho ʻatamaí mo ho lotó. Fakakaukau ʻi he ʻaho kotoa pē ʻo fekauʻaki mo e pale maʻongoʻonga ʻoku fokotuʻu mai ʻe he ʻOtua ko Sihová kiate koé—ko e moʻui taʻengata he Palataisi ʻi he māmaní. ʻOku ʻikai ko ha misi eni. ʻOku moʻoni ia! He ʻoku pau ke fakahoko ʻa e talaʻofa ʻa e Tohitapú: “Ko haʻa fai totonu te nau maʻu ʻa e fonua [māmani, NW], pea te nau nofo ai ʻo tuputupuʻa. . . . Ka hoko ʻa e motuhi ʻo haʻa faikovi te ke mātā ia.”—Sāme 37:29, 34.
[Fehuʻi ki he Ako]
[Fakatātā ʻi he peesi 251]
Fakatapui koe kia Sihova . . . pea ke papitaiso
[Fakatātā ʻi he peesi 253]
“Manatuʻi ʻa e uaifi ʻo Lote”
[Fakatātā ʻi he peesi 254]
Tauhimaʻu ke maamaloa ʻi ho ʻatamaí mo ho lotó ʻa e fokotuʻutuʻu foʻou ʻa e ʻOtuá
