Vahe 1

Ko e Moʻui Taʻengatá ʻOku ʻIkai ko ha Misi Pē

1, 2. Ko e hā ʻoku faingataʻa ai ke tui ʻe malava ke moʻui taʻengata fiefia ʻa e kakaí ʻi māmani?

 FIEFIA ʻi he māmaní​—ʻoku hā ʻoku ʻikai malava ke maʻu ia naʻa mo ha kiʻi taimi nounou pē. Ko e mahamahakí, hoholo ke motuʻá, fiekaiá, faihiá​—ko e leaʻaki ia ha konga pē ʻo e ngaahi palopalema​—ʻoku faʻa hoko ai ʻo fakamamahi ki he moʻuí. Ko ia, mahalo te ke pehē, ko e lau ʻo kau ki he moʻui taʻengata he palataisi ʻi he māmaní ʻoku fakaʻikaiʻi ia ʻe he meʻa ʻoku hoko tonú. Mahalo te ke ongoʻi ʻoku maumau taimi ke talanoa ʻo kau ki ai, ko e moʻui taʻengatá ia ko ha misi pē.

² ʻOku ʻikai ha veiveiua ko e tokolahi taha ʻo e kakaí ʻoku mou loto-tatau. Ko ia ai, ko e hā te tau mātuʻaki ʻilo pau ai te ke malava ʻo moʻui taʻengata he palataisi ʻi he māmaní? Ko e hā te tau lava ai ʻo tui ko e moʻui taʻengatá ʻoku ʻikai ko ha misi pē?

ʻUHINGA ʻE LAVA KE TAU TUI AÍ

3. Ko e hā ʻokú ne fakahaaʻi ʻoku fiemaʻu ʻe he ʻOtuá ke fiefia ʻa e faʻahinga ʻo e tangatá he māmaní?

³ Te tau lava ke tuí koeʻuhi ko ha Mālohi Fakaleveleva, ko e ʻOtua Māfimafiʻiá, naʻá ne teuteu ʻa e māmaní fakataha mo e meʻa kotoa pē ke fakafiemālieʻiʻaki ʻetau fiemaʻú. Naʻá ne ngaohi ʻa e māmaní ke haohaoa matematē maʻatautolu! Pea naʻá ne fakatupu ʻa e tangatá mo e fefiné ʻi he founga lelei tahá ke na fiefia ʻi he moʻui ki he kakato tahá ʻi he ʻapi fakamāmani ko ení​—ʻo taʻengata.​—Sāme 115:16.

4. Ko e hā kuo ako ʻe he kau saienisí ʻo kau ki he sino ʻo e tangatá ʻo hā ai naʻe ngaohi ia ke moʻui taʻengata?

⁴ Kuo fuoloa hono ʻiloʻi ʻe he kau saienisí ʻa e malava ʻe he sino ʻo e faʻahinga ʻo e tangatá ke ne fakafoʻou ʻiate ia pē. ʻI he founga fakaofo ʻoku malava ʻe he fanga kiʻi sela (cells) ʻo e sinó ke nau fai ʻa e fetongi pe monomono, ʻo ka fiemaʻu. Pea ʻoku ngalingali ko e founga ko eni ʻo e fakafoʻou ʻiate ia pē ʻoku totonu ke hokohoko atu ia ʻo taʻengata. Ka ʻoku ʻikai hoko ia, pea ko e meʻa eni ʻoku ʻikai malava ke fakamatalaʻi ʻe he kau saienisí. ʻOku teʻeki ai ke mahino kakato kiate kinautolu ʻa e ʻuhinga  ʻoku tupu ai ʻa e kakaí ʻo motuʻá. ʻOku nau pehē, ʻi he malumalu ʻo e ngaahi tuʻunga totonu, ʻoku totonu ke malava ʻa e faʻahinga ʻo e tangatá ke moʻui taʻengata.​—Sāme 139:14.

5. Ko e hā ʻa e lau ʻa e Tohitapú ʻo fekauʻaki mo e taumuʻa ʻa e ʻOtuá ki he māmaní?

⁵ Ka, ko e moʻoni ko e taumuʻa ia ʻa e ʻOtuá ke moʻui fiefia ʻa e kakaí ʻi he māmaní ʻo taʻengata? Kapau ko ia, tā ko e moʻui taʻengatá ʻoku ʻikai ko ha fakaʻānaua pe ko ha misi pē​—ʻoku papau ke hoko ia! Ko e hā ʻa e lau ʻa e Tohitapú, ʻa e tohi ʻokú ne fakahā ʻa e ngaahi taumuʻa ʻa e ʻOtuá, ʻo kau ki he meʻá ni? ʻOkú ne ui ʻa e ʻOtuá “ʻa e ʻAfio naʻa ne faʻu ʻa e fonua mo ngaohi ia,” pea tānaki atu ki ai: “Ko ia naʻa ne teu ia, naʻe ʻikai te ne fakatupu ia ke maomaonganoa, naʻa ne faʻu ia ke nofoʻanga.”​—ʻAisea 45:18.

6. (a) ʻOku fēfē ʻa e ngaahi tuʻunga ʻi he māmaní he ʻahó ni? (e) Ko e founga ia ʻoku fiemaʻu ʻe he ʻOtuá?

⁶ ʻOku hā kiate koe ʻoku nofoʻi ʻa e māmaní ʻi he ʻahó ni ʻi he founga ko ia naʻe fakataumuʻa ki ai ʻe he ʻOtuá? Ko e moʻoni, ʻoku nofo ʻa e kakai ʻi he meimei feituʻu kotoa pē ʻo e māmaní. Ka ʻoku nau moʻui fiefia fakataha ʻo hangē ha fāmili fāʻūtahá, ʻi he founga lelei naʻe fakataumuʻa kiate kinautolu ʻe honau Tokotaha-fakatupú? ʻI he ʻahó ni ʻoku māvahevahe ʻa e māmaní. ʻOku ʻi ai ʻa e fetāufehiʻaʻaki. ʻOku ʻi ai ʻa e faihia. ʻOku ʻi ai ʻa e tau. ʻOku laui miliona ʻa e kakai ʻoku fiekaia mo mahamahaki. Ko e faʻahinga ʻe niʻihi ʻoku nau loto-moʻua fakaʻaho ʻo kau ki ha nofoʻanga, ngāue mo e ngaahi fakamole. Pea ʻoku hala ʻatā ha taha ʻi he ngaahi meʻá ni ʻokú ne ʻomi ha lāngilangi ki he ʻOtuá. ʻOku hā mahino, tā ʻoku ʻikai nofoʻi ʻa e māmaní ia ʻi he founga naʻe ʻuluaki taumuʻa ki ai ʻa e ʻOtua Māfimafiʻiá.

7. Ko e hā ʻa e taumuʻa ʻa e ʻOtuá ki he māmaní ʻi heʻene fakatupu ʻa e ʻuluaki ongo mātuʻá?

⁷ Hili hono fakatupu ʻa e ʻuluaki ongo mātuʻá, naʻe tuku ʻa kinaua ʻe he ʻOtuá ki ha palataisi fakaemāmani. Naʻá ne fiemaʻu ke na fiefia ʻi he moʻui he māmaní ʻo taʻengata. Ko ʻene taumuʻá ke na fakalahi hona palataisí ki he māmaní kātoa. ʻOku hā ia ʻi heʻene ngaahi tuʻutuʻuni kiate kinauá: “Mo fakatupu, mo fakatokolahi, mo fakafonu ʻa mamani, pea ikuna ia.” (Sēnesi 1:28) ʻIo, ko e taumuʻa ʻa e ʻOtuá ke faifai  atu pē pea puleʻi fakakātoa ʻa e māmaní ʻe he fāmili angatonu, mo nofo fakataha kotoa ʻi he melino mo e fiefia.

8. Neongo naʻe talangataʻa ʻa e ʻuluaki ongo mātuʻá ki he ʻOtuá, ko e hā ʻoku tau ʻilo pau ai naʻe ʻikai liliu ʻa e taumuʻa ʻa e ʻOtuá ki he māmaní?

⁸ Neongo naʻe talangataʻa ʻa e ʻuluaki ongo mātuʻá ki he ʻOtuá, ʻo hoko ai ʻa ʻena taʻefeʻunga ki he moʻui taʻengatá, ka naʻe ʻikai ke liliu ai ʻa e taumuʻa tefito ʻa e ʻOtuá. Kuo pau pē ke fakahoko ia! (ʻAisea 55:11) Ko e talaʻofa ʻa e Tohitapú: “Ko haʻa fai totonu te nau maʻu ʻa e fonua [māmani, NW], pea te nau nofo ai ʻo tuputupuʻa.” (Sāme 37:​29) ʻOku faʻa fakahā ʻe he Tohitapú ʻa e fokotuʻutuʻu ʻa e ʻOtuá ke ʻoange ʻa e moʻui taʻengatá  ki he faʻahinga ʻo e tangatá ʻoku nau tauhi iá.​—Sione 3:14-16, 36; ʻAisea 25:8; Fakahā 21:3, 4.

KO E HOLI KE MOʻUI​—ʻI FĒ?

9. (a) Ko e hā ʻa e holi totonu ʻa e kakaí? (e) Ko e hā ʻa e ʻuhinga ʻa e pehē ʻe he Tohitapú ‘kuo ʻai ʻe he ʻOtuá ʻa ʻitāniti ki honau loto’?

⁹ ʻE lava ke tau fiefia moʻoni ko e taumuʻa ʻa e ʻOtuá ke tau moʻui taʻengata. Fakakaukau ange: Kapau kuo tuku atu ke ke fili, ko e hā ʻa e ʻaho pau te ke fili ke ke mate aí? Heʻikai te ke lava ʻo fili ha ʻaho pau, ʻikai ko ia? ʻOku ʻikai te ke fiemaʻu ke ke mate, pea ʻe pehē pē ki ha taha fakakaukau mo moʻui lelei. Naʻe ngaohi kitautolu ʻe he ʻOtuá fakataha mo e holi ke moʻui, ʻo ʻikai ko e holi ke mate. Fekauʻaki mo e founga naʻe ngaohi ai ʻa e faʻahinga ʻo e tangatá ʻe he ʻOtuá, ʻoku pehē ʻe he Tohitapú: “Kuo ne ʻai ʻa itaniti ki honau loto.” (Koheleti 3:11) ʻOku ʻuhinga eni ki he hā? ʻOku ʻuhingá ko e māʻunga holi ia ʻa e kakaí ke moʻui hokohoko atu, ʻo ʻikai mate. Tuʻunga ʻi he holi ko eni ki ha kahaʻu taʻengatá, kuo fuoloa ʻa e fekumi ʻa e tangatá ki ha founga ke kei talavou ai ʻo taʻengata.

10. (a) Ko fē ʻa e feituʻu ʻoku holi totonu ʻa e tangatá ke moʻui taʻengata aí? (e) Ko e hā ʻoku tau falala ai ʻe ʻai ʻe he ʻOtuá ke tau malava ʻo moʻui taʻengata he māmaní?

¹⁰ Ko fē ʻa e feituʻu ʻoku fiemaʻu totonu ʻe he faʻahinga ʻo e tangatá ke moʻui taʻengata aí? Ko e feituʻu kuo nau anga he nofo aí, ʻi heni ʻi he māmaní. Naʻe ngaohi ʻa e tangatá maʻá e māmaní, pea ko e māmaní maʻá e tangatá. (Sēnesi 2:8, 9, 15) ʻOku pehē ʻe he Tohitapú: “Naʻa ne [ʻOtua] fakamaʻu ʻa e fonua ki hono ngaahi tuʻunga, ke ʻoua naʻa ueʻi ʻo lauikuonga pea taʻengata.” (Sāme 104:5) Koeʻuhi naʻe ngaohi ʻa e māmaní ke tuʻu ʻo taʻengata, ko ia ʻoku totonu ke moʻui foki ʻa e tangatá ʻo taʻengata. ʻOku pau heʻikai ke fakatupu ʻe ha ʻOtua ʻofa ʻa e faʻahinga ʻo e tangatá fakataha mo e holi ki he moʻui taʻengatá pea hili ia pea ʻikai te ne ʻai ke malava ke fakahoko kiate kinautolu ʻa e holi ko iá!​—1 Sione 4:8; Sāme 133:3.

KO E FOUNGA MOʻUI ʻOKÚ KE HOLI KI AÍ

11. Ko e hā ʻa e lau ʻa e Tohitapú ʻoku hā ai ʻe malava ʻa e kakaí ʻo moʻui taʻengata ʻi he moʻui haohaoa?

¹¹ Vakai atu ki he peesi hoko maí. Ko e hā ʻa e founga moʻui ʻoku fiefia ai ʻa e kakai ko ení? Te ke fie hoko ko ha taha ʻo kinaua? ʻĀua, ko hoʻo laú ia! Vakai atu hono ʻikai moʻui lelei mo kei talavou ʻena haá! Kapau ʻe tala atu kuo moʻui ʻa e kakaí ni he laui afeʻi taʻu, te ke tui ki ai? ʻOku fakahā mai kiate kitautolu ʻe he Tohitapú ʻe toe foki ʻo talavou ʻa e kau taʻu motuʻá, ʻe moʻui lelei ʻa e mahamahakí, pea ko e heké, kuí, tulí mo e noá ʻe fakamoʻui honau faingataʻaʻiá kotoa. ʻI he taimi naʻe ʻi māmani ai ʻa Sīsū Kalaisí naʻá ne fai ʻa e ngaahi mana lahi ke fakamoʻui ʻa e kakai  naʻe mahamahakí. ʻI heʻene fai peheé, naʻá ne fakahā ai ko kinautolu kotoa ʻe moʻui ʻi he taimi lāngilangiʻia ofi maí ni ʻe fakafoki ki he moʻui haohaoa.​—Siope 33:25; ʻAisea 33:24; 35:5, 6; Mātiu 15:30, 31.

12. Ko e hā ʻa e ngaahi tuʻunga ʻoku tau vakai ki ai ʻi he ngaahi fakatātā ko ení?

¹² Vakai atu, tā ko e toki meʻa fakaʻofoʻofa ko e ʻapi ngoue ko ení! Hangē ko e talaʻofa ʻa Kalaisí, ʻoku moʻoni ko ha palataisi ia, tatau mo ia naʻe mole ʻi he talangataʻa ʻa e ʻuluaki tangatá mo e fefiné. (Luke 23:43) Pea fakatokangaʻi ange ʻa e melino mo e feongoongoi ʻoku ʻi aí. Ko e kakai ʻo e matakali kotoa pē​—ko e ʻuliʻuli, ko e hinehina, ko e melomelo—​ʻoku nau nofo ko e fāmili pē ʻe taha. Naʻa mo e fanga manú  ʻoku nau melino. Vakai atu ki he kiʻi tamasiʻi ʻoku vaʻinga mo e laioné. Ka ʻoku ʻikai ha ʻuhinga ke manavahē. ʻOku folofola mai ʻa e Tokotaha-fakatupú ʻo fekauʻaki mo e meʻá ni: “Pea ʻe takoto ʻa e lepati mo e kiʻi kosi, pea fakataha ʻa e kafi mo e laione mui mo e pulu sino, pea ʻoku fakateka kinautolu ʻe ha momoʻi tamasiʻi. . . . Pea ʻoku kai kaui koane ʻe he laione hange ko e pulu. Pea ko e tamasiʻi kei huhu te ne fakava ʻi he ngutuluo ʻo e ata [ngata].”​—ʻAisea 11:6-9.

13. Ko e hā ʻe mole atu mei he māmaní ʻi hono fakahoko ʻa e ngaahi taumuʻa ʻa e ʻOtuá?

¹³ ʻI he palataisi ʻoku fakataumuʻa ʻe he ʻOtuá ki he faʻahinga  ʻo e tangatá, ʻe fakatupu-fiefia ʻa e meʻa kotoa pē kiate koe. ʻE fakafua ʻe he kelekelé ʻa e ngaahi meʻa lelei lahi ke kai. ʻE ʻikai ke toe ʻi ai ha taha ʻe fiekaia. (Sāme 72:16; 67:6) Ko e ngaahi taú, faihiá, fakamālohí, naʻa mo e fetāufehiʻaʻakí mo e siokitá, ʻe hoko ko e ngaahi meʻa pē ʻo e kuo hilí. ʻIo, te nau mole atu ʻo taʻengata! (Sāme 46:​8, 9; 37:9-11) ʻOkú ke tui ʻe malava kotoa ʻa e ngaahi meʻá ni?

14. Ko e hā ʻokú ne ʻai koe ke ke tui ʻe fakangata ʻe he ʻOtuá ʻa e mamahí?

¹⁴ Ko ia, fakakaukau ange: Kapau ʻokú ke maʻu ha mafai, te ke fakangata ʻa e ngaahi meʻa ʻoku nau fakatupunga ʻa e mamahí ki he faʻahinga ʻo e tangatá? Pea te ke fakahoko mai ʻa e ngaahi tuʻunga ʻoku ʻunaloto ki ai ʻa e faʻahinga ʻo e tangatá? ʻOku pau te ke fai ia. Ko e meʻa tofu pē ia ʻe fai ʻe heʻetau Tamai ʻofa fakahēvaní. Te ne fakafiemālieʻi ʻa ʻetau ngaahi fiemaʻú mo ʻetau ngaahi holí, he ʻoku pehē ʻe he Sāme 145:16 ʻo kau ki he ʻOtuá: “ʻOku ke folahi ho nima, pea ke fakamakona ʻa e holi ʻa e meʻa moʻui kotoa.” Ka ʻe hoko mai eni ʻafē?

ʻOKU OFÍ NI ʻA E NGAAHI TĀPUAKI MAʻONGOʻONGA

15. (a) Ko e hā ʻa e ʻuhinga ʻo e ngataʻanga ʻo e māmaní ki he foʻi māmani ko ení? (e) Ko e hā hono ʻuhinga fekauʻaki mo e kakai koví? (f) Ko e hā hono ʻuhinga fekauʻaki mo kinautolu ʻoku nau fai ʻa e finangalo ʻo e ʻOtuá?

¹⁵ Ke malava ʻo fakahoko ʻa e ngaahi tāpuaki leleí ni ki he māmaní, ʻoku talaʻofa ʻe he ʻOtuá te ne fakatou fakangata ʻa e fulikivanú mo kinautolu ʻoku nau fakatupunga iá. ʻI he taimi tatau pē, te ne maluʻi ʻa kinautolu ʻoku tauhi kiate iá, he ʻoku pehē ʻe he Tohitapú: “Pea ʻoku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:17) Ko ha toki liliu ē ʻe hoko! Ko e ngataʻanga ʻo e māmaní ʻe ʻikai ʻuhinga ko e ʻauha ʻo e foʻi māmaní. Ka, hangē ko ia naʻe hoko ʻi he lōmaki ki māmani kotoa ʻi he ʻaho ʻo Noá, ko hono ʻuhingá ko e ngataʻanga pē ʻo e kakai koví mo ʻenau founga moʻuí. Ka ʻe hao moʻui ʻi he ngataʻangá ʻa kinautolu pē ʻoku tauhi ki he ʻOtuá. Pea, ʻi he māmani kuo maʻa, te nau fiefia ʻi he tauʻatāina meiate kinautolu kotoa ʻoku loto ke fakamamahiʻi mo fakamālohiʻi ʻa kinautolú.​—Mātiu 24:3, 37-39; Palōvepi 2:21, 22.

16. Ko e hā ʻa e ngaahi meʻa naʻe kikiteʻi ʻe ʻi he ‘ngaahi ʻaho fakaʻosí’?

¹⁶ Ka naʻa pehē ʻe ha taha: ‘ʻOku fakaʻau ʻa e ngaahi tuʻungá ki he kovi ange, ʻoku ʻikai ki he lelei ange. ʻE anga-fēfē ke tau ʻilo pau ʻoku ofi ʻa e liliu maʻongoʻongá ni?’ Naʻe kikiteʻi ʻe Sīsū Kalaisi ʻa e ngaahi meʻa lahi ke tokanga ki ai ʻa hono kau muimui ʻi he kahaʻú pea ke nau ʻilo ʻa e taimi ʻa e ʻOtuá te ne fakahoko ai ʻa e ngataʻanga ki he māmaní. Naʻe pehē ʻe Sīsū ko e ngaahi ʻaho fakaʻosi ʻo e tuʻu ko ení ʻe fakaʻilongaʻiʻaki ʻa e ngaahi meʻa ʻo hangē ko e ngaahi tau lahi, ngaahi honge, ngaahi mofuike lahi, tupulekina ʻa e maumaulaó, mo e tupulekina ʻa e mole ʻo e  ʻofá. (Mātiu 24:3-12) Naʻá ne pehē “ʻe mamahi ʻa e ngaahi kakai, ko ʻenau puputuʻu.” (Luke 21:25) ʻOku hoko atu ʻe he Tohitapú ʻo pehē: “E hoko i he gaahi aho fakamui ae kuoga fakatuutamaki.” (2 Tīmote 3:1-5, PM) ʻOku ʻikai nai ko e ngaahi tuʻunga eni ʻoku tau aʻusia he taimi ní?

17. Ko e hā ʻa e lau ʻa e kakai mohu fakakaukaú ʻo kau ki he ngaahi tuʻunga ʻo e ʻaho ní?

¹⁷ Ko e tokolahi ʻoku ako ki he ngaahi meʻa ʻoku hoko ʻi he māmaní ʻoku nau pehē ʻoku ʻi ai ʻa e liliu lahi ʻoku kamata ke hoko. Hangē ko ení, ko e ʻētita ʻo e Herald ʻi Miami, U.S.A., naʻá ne tohi: “Ko ha taha pē ʻoku fakakaukau atu ʻo fekauʻaki mo e ngaahi meʻa fakatuʻutāmaki naʻe hoko ʻi he ngaahi taʻu ki muí ni maí, ʻoku malava ke ne ʻilo ʻoku tuʻunuku ʻa e māmaní ki ha tuʻunga fakahisitōlia. . . . Kuo pau ke liliu ʻa e founga moʻui ʻa e tangatá ʻo taʻengata.” ʻI he tuʻunga meimei tatau, naʻe pehē ʻe ha tangata fatutohi ʻAmelika ko Lewis Mumford: “ʻOku tō lalo ʻa e sivilaisé. Ko e moʻoni ʻaupito ia. . . . ʻI he kuo hilí ʻi he taimi naʻe tō lalo ai ʻa e ngaahi sivilaisé, ne hoko fakavahe-fonua pē. . . . Ka ʻi he kuongá ni, tupu mei he fuʻu vāofi pea mo e fāʻūtaha ange ʻa e māmaní ʻi he fetuʻutaki fakaonopooní, ʻi he taimi ʻoku tō lalo ai ʻa e sivilaisé, ʻoku tō lalo fakakātoa ai pē ʻa e foʻi palanité.”

18. (a) Ko e hā ʻoku fakahā ʻe he ngaahi tuʻunga ʻo e māmaní ʻo kau ki he kahaʻú? (e) Ko e hā ʻe fetongiʻaki ʻa e ngaahi puleʻanga lolotongá?

¹⁸ Ko e ngaahi tuʻunga ko eni ʻo e māmaní ʻi he ʻaho ní ʻoku hā ai ʻoku tau lolotonga moʻuí ni ʻi he taimi ʻa ia ʻe fakahoko ai ʻa e fakaʻauha fakakātoa ʻo e tuʻu ko ení. ʻIo, ʻoku vavé ni ʻaupito ke fakamaʻa ʻe he ʻOtuá mei he māmaní ʻa e faʻahinga kotoa ʻoku nau maumauʻi ʻa e māmaní. (Fakahā 11:18) Te ne toʻo ʻa e ngaahi puleʻanga lolotongá kae ʻatā ʻa e pule angatonu ʻo hono puleʻangá ke ne puleʻi ʻa e māmaní kotoa. Naʻe akoʻi ʻe Sīsū ki hono kau muimuí ke nau lotu ʻo fekauʻaki mo e founga-pule Puleʻanga-fakatuʻi ko ení.​—Tāniela 2:44; Mātiu 6:9, 10.

19. Kapau ʻoku tau fie moʻui taʻengata, ko e hā kuo pau ke tau faí?

¹⁹ Kapau ʻokú ke ʻofa ʻi he moʻuí peá ke fie moʻui taʻengata ʻi he māmaní ʻi he malumalu ʻo e pule ʻa e ʻOtuá, kuo pau ke ke fakavave ke maʻu ʻa e ʻilo kānokano ʻo fekauʻaki mo e ʻOtuá, mo ʻene ngaahi taumuʻá mo e ngaahi meʻa ʻokú ne finangalo ki aí. Naʻe pehē ʻe Sīsū ʻi heʻene lotu ki he ʻOtuá: “Pea ko eni ia ʻa e moʻui taʻengata, ke nau fai ke ʻilo koe ko e ʻOtua moʻonia pe taha, pea mo Sisu ne ke fekau mai ko e Misaia.” (Sione 17:3) Ko ha toki fiefia ē ke ʻiloʻi te tau malava ʻo moʻui taʻengata​—ʻa ia ʻoku ʻikai ko ha misi pē! Ka ke tau fiefia ʻi he tāpuaki lelei ko eni mei he ʻOtuá ʻoku fiemaʻu ke tau ako ke ʻilo ʻo fekauʻaki mo ha fili, ʻa ia ʻokú ne feinga ke taʻofi kitautolu mei hano maʻu ʻo e tāpuakí ni.

[Fehuʻi ki he Ako]

[Fakatātā ʻi he peesi 8, 9]

Naʻe finangalo ʻa e ʻOtuá ke pehé ni ʻa e māmaní?

 [Fakatātā peesi kakató ʻi he peesi 11]