Vahe 18

Ko e “Ngataʻanga ʻo e Māmani” ʻOku Ofi!

1. ʻE ʻilo fēfē ʻe he kau muimui fakaemāmani ʻo Kalaisí ʻa e taimi naʻe kamata ke ne pule ai ʻi hēvaní?

 ʻI HONO LĪ HIFO ʻe Sīsū Kalaisi ʻa Sētane mo ʻene kau ʻāngeló mei hēvani pea kamata ʻa e pule hono puleʻangá, naʻe ʻuhinga iá kuo ofi ʻa e ngataʻanga ʻo Sētane mo ʻene tuʻunga fulikivanú. (Fakahā 12:​7-12) Ka ʻoku malava fēfē ke ʻilo ʻe he kau muimui ʻo Kalaisi ʻi māmaní kuo ʻosi hoko ʻa e meʻá ni ʻi hēvani, ʻa ia naʻe taʻehāmai ki honau matá? ʻOku malava fēfē ke nau ʻilo ʻoku ʻi ai taʻehāmai ʻa Kalaisi ʻi he mafai faka-Puleʻangá pea kuo ofi ʻa e “ngataʻanga ʻo e māmani”? ʻOku malava ke nau ʻilo ʻaki ʻenau vakai pe ʻoku fakahoko ʻa e “fakaʻilonga” naʻe ʻomai ʻe Sīsuú.

2. Ko e hā ʻa e fehuʻi naʻe ʻeke ʻe he kau ākonga ʻa Kalaisí kiate iá?

² Ki muʻa siʻi pea pekia ʻa Sīsuú, lolotonga ʻene nofo ʻi he Moʻunga ʻOlivé, naʻe ō mai ha toko fā ʻo ʻene kau ʻapositoló kiate ia ʻo kole ha “fakaʻilonga.” ʻOku pehé ni ʻa hono lau ʻe he kakai tokolahi ʻi he Paaki Motuʻá ʻa e fehuʻi ʻa e kau ʻapositoló: “Fakaha kiate kimautolu, e hoko afe ae gaahi mea ni? bea koeha ae fakailoga o hoo haʻu, bea moe gataaga oe mamani?” (Mātiu 24:​3, PM) Ka ko e hā ʻa e ʻuhinga moʻoni ʻo e ongo kupuʻi leá ni, ko e “hoʻo haʻu” pea mo e “ngataʻanga ʻo e māmani”?

3. (a) Ko e hā ʻa e ʻuhinga moʻoni ʻo e ongo kupuʻi lea ko e “hoʻo haʻu” mo e “ngataʻanga ʻo e māmani”? (e) ʻOku anga-fēfē leva ʻa hono liliu lea totonu ʻo e fehuʻi naʻe ʻeke ʻe he kau ākonga ʻa Kalaisí?

³ Ko e foʻi lea faka-Kalisi ʻa ē ʻoku liliu lea heni ki he “haʻu” ko e parousia, pea ʻoku ʻuhinga ia ki he “ʻi ai.” Ko ia ai, ʻi he sio ki he “fakaʻilonga”, ʻoku ʻuhinga ení te tau ʻilo ʻoku ʻi ai ʻa Kalaisi neongo ʻoku taʻehāmai ia, ʻa ia kuó ne ʻosi hoko ki he mafai faka-Puleʻangá. ʻOku toe takihalaʻi lahi kita ʻe he kupuʻi lea ko e “ngataʻanga ʻo e māmani.” ʻOku ʻikai ʻuhinga eni ko e ngataʻanga ʻo e foʻi māmaní, ka ko e ngataʻanga ʻo e ngaahi meʻa ʻo e tuʻu ko ʻeni ʻa Sētané. (2 Kolinitō 4:4) Ko ia ko hono lau totonu ʻo e fehuʻi ʻa e kau ʻapositoló ʻoku pehē: “Fakahā kiate kimautolu, ʻE hoko fakakū ʻa e ngaahi meʻa ni pea ko e hā ʻa e fakaʻilonga ʻo hoʻo ʻi ai mo e fakaʻosiʻosi ʻo e ngaahi meʻa ʻoku tuʻu ní?”​—Mātiu 24:​3, NW.

4. (a) Ko e hā ʻa e ngaahi meʻa ʻoku faʻuʻaki ʻa e “fakaʻilonga” naʻe ʻomai ʻe Sīsuú? (e) ʻI he founga fē ʻoku malava ai ke fakatatau ʻa e “fakaʻilonga” ki ha fakaʻilonga nima?

 ⁴ Naʻe ʻikai ʻoange ʻe Sīsū ha meʻa pē ʻe taha ko e “fakaʻilonga.” Naʻá ne fakahā ʻa e ngaahi tuʻunga mo e ngaahi meʻa lahi ʻe hoko. Naʻe lave ʻa e kau tohi Tohitapu ʻe niʻihi tukukehe ʻa Mātiu ki he toe ngaahi meʻa ʻe fakaʻilongaʻiʻaki ʻa e “gaahi aho fakamui.” ʻE hoko ʻa e ngaahi meʻa kotoa ko eni naʻe kikiteʻí ʻi he lolotonga ʻo e taimi naʻe ui ʻe he kau tohi Tohitapú ko e “gaahi aho fakamui.” (2 Tīmote 3:​1-5, PM; 2 Pita 3:​3, 4) ʻE hangē pē ʻa e ngaahi meʻa ko eni ʻoku hokó ko e ngaahi laine kehekehe ʻoku maʻu ʻi ha fakaʻilonga nima ʻo ha taha, ʻa e meʻa ʻoku ʻikai malava ke kaunga ki ha taha kehe. ʻOku maʻu pē ʻe he “gaahi aho fakamui” ʻa hono ngaahi fakaʻilonga pe ngaahi meʻa pē ʻaʻana tonu ʻoku hokó. Ko e ngaahi meʻa kotoa ko ení ʻoku nau faʻu ha “fakaʻilonga nima” pau ʻa ia ʻoku ʻikai malava ke kaunga ia ki ha toe vahaʻa taimi kehe.

5, 6. ʻI hoʻo vakaiʻi lelei ʻa e ngaahi fakamoʻoni ʻe 11 ʻo e “gaahi aho fakamui” ʻi he ngaahi peesi hono hokó, ko e hā ʻoku mahino kiate koe ʻo fekauʻaki mo e “fakaʻosiʻosi ʻo e ngaahi meʻa ʻoku tuʻu ni”?

⁵ ʻI he vahe 16 ʻo e tohí ni naʻa tau vakai ai ki he fakamoʻoni Tohitapu naʻe toe foki mai ʻa Kalaisi pea kamata ʻene pule ʻi he lolotonga ʻo hono ngaahi filí ʻi he taʻu 1914. Fai leva ha vakai tokanga ki he ngaahi tapa kehekehe ʻo e “fakaʻilonga” ʻo e ʻi ai ʻa Kalaisí mo e toe fakamoʻoni ki he “gaahi aho fakamui” ʻo e ngaahi meʻa ʻo e tuʻu fulikivanu ʻa Sētané. ʻI hoʻo vakaiʻi lelei ʻa e ngaahi meʻa ko eni naʻe kikiteʻí ʻi he peesi ʻe fā hono hokó, fakatokangaʻi ʻa e anga ʻo honau fakahoko talu mei he 1914.

  “ʻE TUʻU HA KAKAI KI HA KAKAI, MO HA PULEʻANGA KI HA PULEʻANGA.”​—Mātiu 24:7.

 ʻOku pau pē kuó ke mamata ki hono fakahoko ʻo e konga ko eni ʻo e “fakaʻilonga” talu mei he 1914! Ko e taʻu ia naʻe kamata ai ʻa e Tau I ʻa Māmaní. Naʻe teʻeki ai ha tau fakalilifu pehē he hisitōliá. Ko ha tau fakakātoa. Naʻe lahi mamaʻo ange ʻa e Tau I ʻa Māmani ʻi he ngaahi tau lalahi kotoa naʻe fai he lolotonga ʻo e taʻu ʻe 2,400 ki muʻa he 1914. Ka ko e taʻu pē ʻe 21 mei he ʻosi ʻa e tau ko iá, naʻe kamata leva ʻa e Tau II ʻa Māmaní. Pea naʻe liunga fā ʻa hono lahi ange ʻo ʻene fakaʻauhá ʻaʻana ʻi he Tau I ʻa Māmaní.

 ʻOku kei fai ʻa e ngaahi tau fakalilifu. Talu mei he ʻosi ʻa e Tau II ʻa Māmaní ʻi he 1945, kuo tāmateʻi ʻa e kakai lahi ange he toko 25 milioná ʻi he ngaahi tau ʻe 150 naʻe fai ʻi he māmaní. ʻI ha ʻaho pē, ʻoku fakaʻavalisi ki he tau ʻe 12 ʻoku fai ʻi ha feituʻu pē ʻi he māmaní. Pea ko e fakamanamana hokohoko ia ki ha toe tau ʻe taha ʻa e māmaní. ʻI he ʻIunaite Seteté ʻataʻatā pē ʻoku feʻunga ʻenau nāunau tau niukiliá ke fakaʻauha ʻa e tangatá, fefine mo e tamaiki kotoa ʻi he māmaní ʻo tuʻo 12!

 “ʻE AI HA NGAAHI HONGE.”​—Mātiu 24:7.

 Hili ʻa e Tau I ʻa Māmaní naʻe hoko ʻa e honge lahi taha ʻi he hisitōliá fakakātoa. ʻI Siaina fakatokelau ʻataʻatā pē naʻe mate ai ʻa e toko 15,000 ʻi he ʻaho kotoa pē mei he hongé. Ka naʻe toe lahi ange ʻa e nounou fakameʻatokoni ʻi he hili ʻa e Tau II ʻa Māmaní. Naʻe hōngea ha vahe fā ʻe taha ʻo e māmaní ʻi he taimi ko iá! Pea talu mei ai, mo e tāiʻi ʻa e meʻakaí ki he kakai tokolahi ʻi he māmaní.

 “ʻI he sēkoni ʻe 8.6 kotoa pē ʻoku mate ai ha tokotaha ʻi ha fonua langalanga hake ko e tupu mei ha mahaki fakatupunga ʻe he fasimanavá,” ko e lau ia ʻa e Times ʻa Niu ʻIoake ʻi he 1967. ʻOku kei maté ni ʻa e laui miliona tupu mei he honge​—ko e toko 50 miliona he taʻu! ʻI he 1980, naʻe fiekaia ai ʻa e meimei vahe fā ʻe taha ʻo e kakai ʻi he māmaní (kakai ʻe toko 1,000,000,000) koeʻuhi ko e ʻikai malava ke nau maʻu ha meʻakai feʻunga. Naʻa mo e ngaahi feituʻu ʻoku mahu fakameʻatokoní, ʻoku masiva ʻaupito ʻa e tokolahi ke fakatau ia.

  “ʻE AI HA NGAAHI . . . MOFUIKE ʻI HE NGAAHI POTU KEHEKEHE.”—Mātiu 24:7.

 Talu mei he 1914 ʻo aʻu mai ki he taimí ni, kuo lahi ange ʻa e ngaahi mofuike lalahi aí ʻi ha toe taimi ʻi he fakamatala ʻa e hisitōliá. Meí he taʻu 856 T.S. ki he 1914, ʻa ia ʻoku laka hake ʻi he taʻu ʻe 1,000, naʻe mofuike lalahi pē ai ʻe 24, ʻo mate ai ʻa e toko 1,973,000. Ka ʻi he taʻu ʻe 63 mei he 1915 ki he 1978, naʻe mate ai ʻa e kakai ʻe toko 1,600,000 ʻi he mofuike lalahi ʻe 43.

 ‘NGAAHI MAHAKI FAKAʻAUHA ʻI HE NGAAHI POTU KEHEKEHE.’—Luke 21:11.

 Hili pē ʻa e Tau I ʻa Māmaní naʻe tokolahi ange ʻa e kakai ia naʻe mate ʻi he Mahaki Fakaʻauhá (Spanish flu) ʻi he mate ʻi ha toe mahaki ʻi he hisitōlia ʻo e faʻahinga ʻo e tangatá. Ko e tokolahi fakakātoa ʻo e kau maté ko e toko 21 miliona! Ka ʻoku tupulaki taʻetuku ʻa e mahaki fakaʻauhá. ʻOku mate ʻa e laui miliona ʻi he taʻu taki taha tupu mei he mahaki mafu mo e kanisā. Pea ʻoku mafola vave ʻaupito ʻa e mahaki māʻiafiá. Ko e ngaahi mahaki fakalilifu kehe ʻo hangē ko e malēlia, mofi ʻelili-vao (snail fever) mo e kui fakaevaitafe (river blindness) ʻoku hoko mei he fonua ki he fonua, tautefito ki ʻĒsia, ʻAfilika, mo ʻAmelika Latina.

 ‘TUPULAKI ʻO E MAUMAU LAO.’—Mātiu 24:12.

 ʻOku ʻi ai ʻa e lipooti mei he tapa kehekehe kotoa ʻo e māmaní ki he tupulaki ʻo e maumau laó mo e faihiá. ʻOku fakautuutu ʻaupito he taimí ni ʻa e ngaahi faihia ʻi he fakamālohí, ʻo hangē ko e fakapō, tohotoho mo e ngaahi kaihaʻa fakamālohi. ʻI he ʻIunaite Seteté ʻataʻatā pē, ʻoku fakahoko ha faihia mamafa ʻo fakaʻavalisi hono faí ʻi he meimei sēkoni kotoa pē. ʻI he ngaahi feituʻu lahi, naʻa mo e lolotonga ʻa e ʻahó, ʻoku ʻikai ongoʻi malu ʻe ha taha ke fononga ʻi he halá. ʻI he taimi poʻulí ʻoku nofo ʻa e kakaí ʻi honau ngaahi ʻapí pea lokolokaʻi mo taʻotaʻo honau ngaahi matapā, pea manavahē ke toe hū ki tuʻa.

  “ʻE TŌ ʻA E MĀNAVA ʻO E KAKAI KO ʻENAU ILIFIA.”—Luke 21:26.

 Mahalo ko e manavaheé ko e ongo lahi taha ia ʻi he moʻui ʻa e kakaí he ʻahó ni. ʻIkai fuoloa mei he hili ʻa e pā ʻa e ʻuluaki ngaahi pomu fakaniukiliá, naʻe pehē ʻe he faisaienisi ʻātomi ko Harold C. Urey: “Te tau kai ʻi he manavahē, mohe ʻi he manavahē, moʻui ʻi he manavahē pea mate ʻi he manavahē.” Ko e meʻa ia ʻoku hoko ki he tokolahi ʻo e faʻahinga ʻo e tangatá. Pea ʻoku ʻikai pehē pē koeʻuhi ko e fakamanamana tuʻumaʻu ʻo e tau fakaniukiliá. ʻOku toe manavahē foki ʻa e kakaí ki he faihia, ʻuliʻi ʻo e ʻātakai, mahaki, hikihiki ʻa e totongi ʻo e koloá mo e ngaahi meʻa kehe lahi ʻa ia ʻoku fakamanamana ki heʻenau maluʻangá mo ʻenau moʻuí.

 “KAU . . . ʻOFA KI HE PAʻANGA.”—2 Tīmote 3:2.

 ʻI ha feituʻu pē ʻokú ke vakai ki ai he ʻahó ni ʻoku malava ke ke sio ai ki he ngaahi ngāue ʻo e mānumanú. ʻE meimei fai ʻe he tokolahi ha meʻa pē koeʻuhi ko e paʻangá. Te nau kaihaʻa pea aʻu ʻo tāmate. ʻOku ʻikai ngali kehe ki he kakai mānumanú ke faʻu mo fakatau atu ʻa e ngaahi meʻa ʻoku ʻilo ʻe ʻai ke puke pe tāmateʻi ai ha niʻihi. Tatau pē pe ʻoku lea hangatonuʻaki pe hā ʻi he founga moʻuí, ʻoku pehē ʻe he kakaí ʻo fekauʻaki mo e paʻangá: ‘Ko hoku ʻotuá eni.’

 “TALANGATAʻA KI HE MATUʻA.”—2 Tīmote 3:2.

 ʻOku faʻa mapuleʻi siʻi pē ʻe he ngaahi mātuʻá he ʻahó ni ʻenau fānaú. ʻOku angatuʻu ʻa e kau talavoú ki he mafai kotoa pē. Ko ia ʻoku uesia ʻa e fonua kotoa pē ʻi he māmaní ʻe he palopalema ʻo e faihia ʻa e kau talavoú. Lahi hake ʻi he vaeua ʻo e ngaahi faihia mamafa kotoa pē ʻi he ngaahi fonua ʻe niʻihi ko e fai ʻe he fānau taʻu 10 ki he taʻu 17. Ko e fakapō, tohotoho, ngaohikoviʻi, kaihaʻa fakamālohi, hae fale, kaihaʻa kā​—ko e fai ʻe he fānau ʻa e ngaahi meʻá ni kotoa. Naʻe ʻikai teitei fai lahia pehē ʻa e talangataʻa ki he mātuʻá ʻi he hisitōliá.

 “MAʻU ʻA E NGEʻESI ʻO E LOTU, KA KUO NAU LIʻAKI HONO KAKANO.”—2 Tīmote 3:5.

 ʻOku faʻa fai ha fakahāhā ki tuʻa ʻo e anga fakaʻotuá ʻe he kau taki ʻo e māmaní mo e kakai lāuvalé fakatouʻosi. ʻOku nau maʻu nai ʻa e ngaahi feinga lotu ʻa e siasí pea fai ha ngaahi tokoni fakapaʻanga ki he ngaahi meʻa fakalotú. ʻOku fai nai ʻe he faʻahinga ʻi he puleʻangá ʻenau fuakava ʻi he Tohitapú ʻi heʻenau fuofua kamata ke ngāué. Ka ʻoku faʻa hoko pē ʻa e meʻá ni ko e “ngeʻesi ʻo e lotu.” Hangē ko ia naʻe kikiteʻi ʻe he Tohitapú, ʻoku ʻikai ko ha mālohi moʻoni ʻa e lotu moʻoni ki he ʻOtuá ʻi he moʻui ʻa e kakai tokolahi taha he ʻahó ni. ʻOku ʻikai ueʻi kinautolu ʻe ha mālohi moʻoni ki he leleí.

  “KAU ʻOFA KI HE MĀLIE ʻO ʻIKAI ʻOFA KI HE ʻOTUA.”—2 Tīmote 3:4.

 Ko e tokolahi taha ʻo e kakaí ʻi he ʻahó ni ʻoku nau fakakaukau pē ke fai ʻa e meʻa ʻoku fakafiemālieʻi ai kinautolú pe ko honau ngaahi fāmilí, kae ʻikai ki he meʻa ʻoku fakahōifua ki he ʻOtuá. ʻOku tautefito ʻa e ʻofa ʻa e tokolahi ki he meʻa ʻoku fakahalaiaʻi ʻe he ʻOtuá, ʻo kau ai ʻa e feʻauaki, tono, konā, ngāueʻaki ʻa e faitoʻo kona tapú, mo e ngaahi meʻa kehe ʻoku taku ko e fakafiefiá. Naʻa mo e ngaahi mālie ʻoku malava ke leleí ʻoku fakamuʻomuʻa ia ʻi he feinga ke ako ʻo fekauʻaki mo e ʻOtuá pea tauhi iá.

 “FAKAʻAUHA ʻA E FONUA.”—Fakahā 11:18.

 ʻOku fakaʻuliʻi ʻa e ʻea ʻoku tau mānava aí, vai ʻoku tau inú mo e fonua ʻoku tupu ai ʻetau meʻakaí. Ko ha meʻa lahi fau ia naʻe fakatokanga ki ai ʻa e faisaienisi ko Barry Commoner: “ʻOku ou tui kapau ʻoku ʻikai fai ha tokanga ki he ʻuliʻi hokohoko ʻo e māmaní ʻe mole ai ʻa e taau ʻa e māmani ko ha feituʻu ke moʻui ai ʻa e faʻahinga ʻo e tangatá.”

 ⁶ Hili ʻetau fakakaukau atu ki he ngaahi meʻa ki muʻá, ʻikai ʻoku hā mahino ʻoku lolotonga fakahoko ʻa e “fakaʻilonga” naʻe ʻomai ʻe Kalaisí pea mo e ngaahi fakamoʻoni naʻe kikiteʻi ʻe heʻene kau ākongá? Neongo ʻoku lahi ʻa e ngaahi fakamoʻoni kehe, ʻoku totonu ke feʻungaʻānoa pē ʻa e ngaahi meʻa ko eni ʻoku hā hení ke ne fakahaaʻi ʻoku tau lolotonga moʻui moʻoni ʻi he taimi naʻe kikiteʻi ʻe he Tohitapú ko e “gaahi aho fakamui.”

7. (a) Ko e hā ʻokú ne ʻai ke fakaofo lahi ai ʻa e ngaahi kikite ʻa e Tohitapú ʻo fekauʻaki mo e ʻi ai ʻa Kalaisi pea mo e “gaahi aho fakamui”? (e) ʻI hono faikehekehe mo e meʻa naʻe kikiteʻi ʻe he Tohitapú, ko e hā naʻe tala ki muʻa siʻi pē he 1914 ʻe he kau taki ʻo e māmaní ʻe hoko aí?

⁷ Ka ʻe pehē nai ʻe ha niʻihi: ‘Kuo faʻa hoko ʻi he faai mai ʻa e hisitōliá ʻa e ngaahi meʻá ni ʻo hangē ko e ngaahi tau, honge, mahaki mo e ngaahi mofuike. Ko ia heʻikai faingataʻa ke kikiteʻi te nau toe hoko.’ Kae fakakaukau angé: Naʻe ʻikai ngata pē hono kikiteʻi ʻe he Tohitapú ʻa e ngaahi meʻá ni, ka naʻá ne fakahā te nau hoko ʻi māmani lahi. ʻIkai ngata ai, naʻe pehē ʻe he Tohitapú ʻe hoko ʻa e ngaahi meʻá ni kotoa ʻi he toʻutangata naʻe moʻui he 1914. Ka ki muʻa siʻi he 1914 ko e hā naʻe tala ʻe he kau taki tuʻu-ki-muʻa fakamāmaní ʻe hoko aí? Naʻa nau pehē ʻoku ʻikai ha toe taimi kuo ʻamanekina ai ha melino mei he ngaahi tuʻunga ʻo māmaní, ʻe hangē ko e taimi ko iá. Ka naʻe kamata taimi totonu pē ai, ʻi he 1914, ʻa e ngaahi faingataʻa fakalilifu naʻe kikiteʻi ʻe he Tohitapú! Ko hono moʻoní, ʻoku pehē he taimí ni ʻe he kau taki ʻo e māmaní ko e 1914 ko ha liliuʻanga ʻi he hisitōliá.

8. (a) Ko e toʻutangata fē naʻe fakahā ʻe Sīsū te nau sio ki he ngataʻanga ʻo e ngaahi meʻa ʻo e tuʻu ko ení? (e) Ko ia ko e hā ʻoku malava ke tau ʻilo papaú?

⁸ Hili hono fakahanga ʻa e tokangá ki he ngaahi meʻa lahi kuo fakaʻilongaʻiʻaki ʻa e vahaʻa taimi mei he 1914 ʻo faai mai, naʻe pehē ʻe Sīsū: “ʻE ʻikai ʻaupito mole ʻa e toʻutangata ko eni, kaeʻoua ke hoko ʻa e ngāhi meʻa ko ia kotoa pe [kau ai ʻa e ngataʻanga ʻo e tuʻu ko eni].” (Mātiu 24:​34, 14) Ko e toʻutangata fē naʻe ʻuhinga ki ai ʻa Sīsuú? Naʻá ne ʻuhinga ki he toʻutangata ʻo e kakai naʻa nau moʻui ʻi he 1914. Ko e faʻahinga ʻoku kei toe mei he toʻutangata ko iá ʻoku nau fuʻu motuʻa ʻaupito he taimí ni. Kaekehe, ko e niʻihi ʻo kinautolu ʻe kei moʻui pē ke sio ʻi he ngataʻanga ʻo e tuʻu fulikivanu ko ení. Ko ia ko e meʻa eni ʻoku malava ke tau ʻilo papaú: Taimi nounou mei heni ʻe hoko ha ngataʻanga fakafokifā ki he anga-fulikivanu kotoa pē mo e kakai fulikivanú ʻi ʻĀmaketone.

[Fehuʻi ki he Ako]

[Fakatātā ʻi he peesi 149]

Naʻe fakahā ʻe Sīsū ki heʻene kau ākongá ko e meʻa ʻe hokó ko e fakamoʻoni hāmai ia ʻo ʻene ʻi ai taʻehāmai ʻi he mafai faka-Puleʻangá

[Fakatātā ʻi he peesi 154]

1914—ʻĀMAKETONE

Ko e niʻihi ʻo e toʻutangata naʻe moʻui ʻi he 1914 te nau sio ki he ngataʻanga ʻo e ngaahi meʻa ʻo e tuʻu ko ení pea te nau hao moʻui atu ai